Februar

O Jehova mangela sa olese sluge te oven bahtale. Ov tano paše uzo amende hem dikhela ked hijam tužna ja obeshrabrime (Ps. 145:18, 19). Razmislin ando odova sar o Jehova mothovđa so brininđa pe ando odova sar osetini pe oleso prorok, o Ilija hem sar pomožinđa lese. Akava verno manuš živinđa ko vreme ked e Izraelcenđe hine but pharo. But moćna manuša ko Izrael kola na manglje e Jehova progoninđe okolen kola služinđe e Jehovase, a posebno e Ilija hem čak manglje te mudaren le (1. Kralj. 19:1, 2). O Ilija hine pana pobuter obeshrabrimo odolese so mislinđa soj tano ov jedino proroko kova služini e Jehovase (1. Kralj. 19:10). O Jehova odmah ćerđa diso te pomožini lese. Ov bićhalđa jekhe anđele te uverini e Ilija so ov nane kokri hem so isi pana Izraelcija kola verno služinena e Jehovase (1. Kralj. 19:5, 18). O Isus ko jekh ljubazno način phenđa pe učenikonenđe so i skupština ka ovel olengi porodica (Mar. 10:29, 30). O Jehova, amaro nebesko Dad, obećini so ka pomožini okolenđe kola služinena lese (Ps. 9:10; w21.06 8-9 ¶3-4).

But manuša odbacinena amen odolese so amen koristinaja i Biblija te mothova so disave sikljoviba tane hovavne. O religiozna vođe sikavena pe sledbenikonen so o Devel kaznini e lošnone manušen ko pakao. On koristinena o hovavne sikljoviba te kontrolišinen e manušen. Sar e Jehovase sluge, kola služinena e Devlese kova tano pherdo mangipe, amen pomožinaja e manušenđe te haljon so odova sikljovibe tano hovavno. Isto ađahar, o religiozna vođe sikavena so i duša tani besmrtno. Ako tano odova sikljovibe tačno, tegani niko ne bi valjani te ovel uskrsnimo. Amen mothovaja so i Biblija na sikavi odova. Iako but religije sikavena so sa o buća kola desinena pe amenđe o Devel angleder pisinđa ja phenđa, amen sikavaja so o manuš isi le slobodno volja hem so kokri birini da li ka služini e Devlese. Sar o religiozna vođe reagujinena? Često tane holjame! Ako mangaja o ćaćipe, amen mora te verujina hem te šuna odova so o Devel phenela (Jov. 8:45, 46). Amen niked na ka cida amen ando ćaćipe, sar so ćerđa o Satana, o Beng. Isto ađahar, amen niked na ćeraja diso so na složini pe odoleja ko so verujinaja (Jov. 8:44). O Devel mangela ando po narodo te mrzinen o lošnipe, a te ićeren pe ko odova soj tano šukar, sar so o Isus ćerđa (Rimlj. 12:9; Jevr. 1:9; w21.05 10 ¶10-11).

So valjani te ćera ako primetinaja so uljam ponosna ja pohlepna? Valjani te menjina amen. O apostol Pavle phenđa so okolen kas o Beng „đivde astarđa“ ki pi zamka šaj te ikljon olatar (2. Tim. 2:26). Niked ma bistri soj tano o Jehova pozoralo ando Satana. Ako prihvatinaja e Jehovasi pomoć, amen šaj te naša andi bilo koja zamka koja o Beng šaj te ćhivel anglo amende. Naravno, ovela bi najšukar niked te na pera ki nijekh e Bengesi zamka. Odova šaj te ćera samo odolese so o Jehova pomožini amen. Odolese, molin tut e Jehovase svako dive te pomožini tut te dikhe da li odola osobine utičinena upro to način sar razmislineja ja upro odova so ćereja (Ps. 139:23, 24). De sa tutar niked te na dozvoline te ove ponosno ja pohlepno. Već hiljade berša, o Satana mangela te astari e Devlese slugen ki zamka. Ama, pana hari ka ovel phanlo hem ko krajo uništimo (Otkr. 20:1-3, 10). Jedva ađićeraja odova dive. Ama, đi na avela odova dive, pazin tut ando e Satanase zamke. Ov odlučno te suprostavine tut e Bengese hem „ov ka našel“ tutar (w21.06 19 ¶15-17).

O Jehova tano but bahtalo ked dikhela sar jekh manuš prihvatini o ćaćipe hem palo odova vaćeri averencar ando odova so sikljilo (Posl. 23:15, 16). Kobor tano o Jehova bahtalo ked dikhela sar olese sluge avdije revno propovedinena hem sikavena e manušen. Na primer, ko 2020. berš, ko period andi pandemija kotar koronavirus, 7 705 765 manuša proučinđe i Biblija. Sebepi odova, 241 994 manuša predajinđe po đivdipe e Jehovase hem krstinđe pe. Odola neve phralja hem phenja akana proučinena i Biblija averencar hem ćerena pana pobuter učenikija (Luka 6:40). Sigurna hijam so o Jehova tano but bahtalo ked dikhela sar sikavaja e manušen. Nane uvek lokho te ćera učenikonen, ama uzi e Jehovasi pomoć amen šaj te sikava e manušen te mangen amare nebesko Dade. Šaj li te ćhive tuće cilj te proučine barem jekhe manušeja? Ako koristineja svako prilika te puće e manušen da li mangena te proučinen i Biblija, šaj ka iznenadine tut sar o manuša ka reagujinen (w21.07 6-7 ¶14-16).

Ando kralj David sikljovaja so o phure phralja hem phenja valjani te oven phravde vastese. Ked valjanđa te ćerel pe o hram, ov dinđa but buća, sar soj tane o zlato hem o srebro (1. Let. 22:11-16). Isto ađahar, šaj hem amen više našti te učestvujina ki gradnja ando amare objektija, sebepi so nane amen snaga. Ama, i gradnja šaj te podupirina ađahar so ka da amare prilogija, odobor kobor šaj. Uzo odova, šaj te pomožina e ternenđe ađahar so ka sikava len te ćeren o buća kola amen sikljiljam. Isto ađahar, hem o apostol Pavle mothovđa soj tano phravde vasteso. Ov vićinđa e Timoteje te đal oleja ko misionarska putovanja hem sikavđa le sar te propovedini hem te sikavi e manušen (Dela 16:1-3). Ađahar, o Timotej sikljilo pana pošukar te propovedini hem te sikavi averen (1. Kor. 4:17). Odova so o Pavle sikavđa le, o Timotej koristinđa te sikavi averen (w21.09 12 ¶14-15).

So šaj te sikljova ando Apolo hem ando apostol Pavle? On solduj but šukar penđarđe o spisija. Hem o Apolo hem o Pavle hine penđarde maškaro phralja hem đanđe but šukar te sikaven e manušen. On solduj pomožinđe bute manušenđe te oven e Hristese učenikija. Ama, nijekh olendar na hine ljubomorno jekh upro avereste (Dela 18:24). U stvari, disavo vreme palo odova so o Apolo đelo ando Korint, o Pavle podstakninđa le te irini pe uduri (1. Kor. 16:12). O Apolo hine sposobno manuš, ama ov pe sposobnostija koristinđa te propovedini i šukar vest hem te zorjaćeri pe phralen. Isto ađahar, šaj te ova sigurna so o Apolo hine ponizno manuš. Na primer, ked o Akila hem i Priskila vićinđe le koro peste te objasninen lese pošukar e Devleso drumo, ov na holjanđa (Dela 18:24-28). O apostol Pavle đanđa kola šukar buća o Apolo ćerđa. Ama, o Pavle na sikirinđa pe so o manuša šaj ka phenen so o Apolo tano pošukar olestar. Ked pisinđa e phralenđe ko Korint, but šukar dićhilo kobor o apostol Pavle hine ponizno hem skromno manuš (1. Kor. 3:4-6; w21.07 18-19 ¶15-17).

Sebepi so o Adam hem i Eva svesno birinđe te na šunen e Devle, on više naštinđe te oven deo andi Jehovasi porodica. Ama, so ulo olenge ćhavencar? Sebepi so mangela e manušen, o Jehova dinđa pe Ćhave te šaj okola kola šunena le te oven deo andi olesi porodica (Jov. 3:16). Ađahar, o Jehova šaj hine te usvojini 144 000 manuša te oven olese ćhave (Rimlj. 8:15-17; Otkr. 14:1). Uzo odova, isi milionija avera manuša kola tane verna hem šunena e Devle. On isi len nada so pali završno kušnja ko krajo andi Hiljadaberšengi vladavina, ka oven deo andi e Jehovasi porodica (Ps. 25:14; Rimlj. 8:20, 21). On već avdije dikhena e Jehova sar pe Dade (Mat. 6:9). Isto ađahar, okola kola ka uskrsninen ka ovel len prilika te sikljon ando Jehova. Okola so ka šunen le ka oven deo andi olesi porodica (w21.08 5 ¶10-11).

O apostol Pavle kokri ićerđa pe ko odova savet hem odolese hine šukar ki služba. Ov dobinđa zadatko te propovedini hem beršencar odova hine lese ko prvo than. O Pavle propovedinđa „javno hem kotar ćher ko ćher“ (Dela 20:20). Ov na propovedinđa samo nekobor satija ko dive ja samo jekhvar ko kurko, već koristinđa svako prilika te propovedini! Na primer, đi ađićerđa disave phralen ki Atina, ov propovedinđa disave bare manušenđe kola šukar reagujinđe (Dela 17:16, 17, 34). Čak ked hine phanlo, o Pavle propovedinđa e manušenđe kola hine odothe (Fil. 1:13, 14; Dela 28:16-24). O apostol Pavle koristinđa po vreme ko najšukar način. But putija vićinđa averen te đan oleja ki služba. Na primer, ko po prvo misionarsko putovanje lelja peja e Marko, a ko dujto e Timoteje (Dela 12:25; 16:1-4). Sigurno o Pavle dinđa po najšukar te sikavi len sar te organizujinen o buća ki skupština, sar te brininen pe ando phralja hem phenja hem sar te oven pana pošukar učiteljija (1. Kor. 4:17; w22.03 27 ¶5-6).

Disave manuša na verujinena so postojini o Stvoritelj, sose on phenena so šaj te verujinen samo ko buća kola šaj te dikhen pe jaćhencar. Ama, isi disave buća kola na dikhena pe, a sare amen verujinaja so postojinena. Na primer, i bavlal, iako na dikhaja la, verujinaja so postojini sose osetinaja la ked phudela. Isto ađahar, i vera andi koja i Biblija vaćeri valjani te temeljini pe ko buća kola tane „ćaće, iako na dićhona“ (Jevr. 11:1). Te šaj te arakha dokazija aso odova ko so verujinaja, valjani te odvojina hari vreme. Ama, but manuša na mangena te roden dokazija. Odolese, šaj te mislinen so o Stvoritelj na postojini. Palo odova so ispitinđe o dokazija, disave naučnikija uverinđe pe so o Devel tano okova kova sa ćerđa. Disave olendar na verujinđe so postojini o Stvoritelj, sose ki škola na sikavđe len odolestar. Ama, on akana penđarđe e Jehova hem ulje paše oleja. U stvari, sare amen valjani te zorjaćera amari vera ko Devel, bizo obzir da li hijam školujime ja na (w21.08 14 ¶1; 15-16 ¶6-7).

O Isus vaćerđa i priča ando našaldo ćhavo, te šaj te pomožini amen te haljova kobor tano o Jehova milosrdno. Odova ćhavo mukhlja po ćher, „trošinđa sa po nasledstvo hem ćerđa but lošna buća“ (Luka 15:13). Kasnije, ov pokajinđa pe sebepi o lošna buća kola ćerđa, ponizinđa pe hem irinđa pe ćhere. Sar oleso dad reagujinđa? O Isus phenđa: „Đi pana hine dur, oleso dad dikhlja le hem sažalinđa pe upro leste, prastandoj đelo anglo leste, zagrlinđa le hem ćumudinđa le.“ Oleso dad na ponizinđa le. Umesto odova, spremno oprostinđa lese hem hine bahtalo so irinđa pe ćhere. Odova ćhavo but grešinđa, ama ov pokajinđa pe hem oleso dad oprostinđa lese. O milosrdno dad andi e Isusesi priča predstavini e Jehova. Ked o Isus vaćerđa akija priča, ov manglja te pomožini amenđe te haljova so o Jehova spremno oprostini okolenđe kola iskreno kajinena pe (Luka 15:17-24; w21.10 8 ¶4; 9 ¶6).

Avdije, but religiozna vođe dinđe sa pestar te garaven e Devleso anav. On ikalđe le ando but prevodija andi Biblija hem ko verska službe na mukhena te koristini pe e Devleso anav. Avdije, nijekh manuš našti te phenel so e Jehovase svedokija na poštujinena e Devleso anav. Amen vaćeraja kotar e Devleso anav pobuter andi bilo koja aver religija. Amen daja sa amendar te ova odova so amaro anav mothovi, te ova Svedokija aso Jehova (Is. 43:10-12). Štampinđam pobuter ando 240 milionija primerkija andi Biblija prevod Novi Svet ko kova e Devleso anav tano irimo ko sa o thana. Isto ađahar, ko amare publikacije, kola ikljona ko prekalo hiljada ćhibja, terđola e Devleso anav (w21.10 20-21 ¶9-10).

Amen služinaja e Jehovase ked pomožinaja amare phralenđe hem phenjenđe. Ked o Izraelcija hine phravde vastese premalo ćorore, o Jehova dinđa po lafi so ka irini lenđe aso olengo šukaripe (Pon. zak. 15:10). Svako puti ked pomožinaja amare phralese ja phenjaće, o Jehova ko odova dikhela samći olese diso ćerđam (Posl. 19:17). Na primer, ked o Pavle hine ko phanlipe, o phralja ando Filipi bićhalđe lese sa so valjanđa lese. Ov phenđa so odova hine sar „žrtva koja o Jehova prihvatini sose tani pali olesi volja“ (Fil. 4:18). Razmislin te phralendar hem te phenjendar hem puć tut: „Kase šaj te pomožinav?“ O Jehova tano bahtalo ked dikhela so amaro vreme, snaga, sposobnostija hem materijalna buća koristinaja te pomožina amare phralenđe. Ov ko odova dikhela sar deo andi amari služba (Jak. 1:27). Te šaj te služina e Jehovase valjani amenđe vreme hem snaga. Ama, amenđe nane pharo te služina lese sose mangaja le (1. Jov. 5:3; w22.03 24 ¶14-15).

Ako mangaja te ova saosećajna premalo amare phralja hem phenja, valjani te razmislina kola problemija on isi len. Na primer, šaj jekh phen tani but nabormi. Iako na žalini pe, odova na značini so na valjani laće pomoć. Šaj te puća amen: „Da li valjani laće pomoć te ćerel o habe ja te čistini o ćher?“ Ja šaj jekh phral našalđa pi buti. Razmislin da li šaj te pomožine lese ađahar so ka de le hari pare, bizo te đanel kastar tane. Ako mangaja te ova saosećajna, amen na valjani te ađićera amare phralja hem phenja te roden amendar pomoć. Amen valjani te ova sar o Jehova. Iako amen na rodaja olestar odova, ov svako dive dela amen kham. O kham taćari sa e manušen, bizo obzir da li on tane zahvalna ja na. O Jehova mothovi so mangela amen, ađahar so dela amen sa so valjani amenđe. Amen but mangaja e Jehova, sose ov tano šukar hem phravde vasteso! (w21.09 22-23 ¶12-13).

E Jehovaso verno mangipe podstaknini le te oprostini amenđe. Ked o Jehova dikhela so neko kajini pe hem so više na ćerela odova so angleder ćerđa, ov tano spremno te oprostini lese sebepi po verno mangipe. O psalmista David ando Jehova phenđa: „Na postupini amencar premalo amare grehija, niti irini amenđe premalo amare greške“ (Ps. 103:8-11). O David đanđa kobor dukhala ked mučini tut o osećaj andi krivica. Ama, ov isto đanđa so o Jehova tano spremno te oprostini. Sose tano o Jehova spremno te oprostini amenđe? O odgovor šaj te arakha ko avdisutno stih. Sar so o David phenđa ki molitva, o Jehova tano spremno te oprostini amenđe sebepi po verno mangipe. Ked grešinaja, šukar tano, ako tano amenđe pharo sebepi odova so ćerđam. Odova osećaj šaj te podstaknini amen te pokajina amen hem te ćera diso te ispravina amare greške (w21.11 5 ¶11-12).

O Jehova mangela po anav hem mangela amen te poštujina oleso anav (Is. 42:8). Već šov hiljade berš odova anav meljaćeri pe (Ps. 74:10, 18, 23). Odova počminđa ko edensko vrt ked o Beng (so značini „klevetnik“) optužinđa e Devle so na mangela te del e Adamese hem e Evaće odova so valjani lenđe (Post. 3:1-5). Kotar tegani, o Jehova tano nepravedno optužimo so na mangela te del e manušenđe odova so ćaće valjani lenđe. Ked hine ki phuv, o Isus but brininđa pe sose olese Dadeso anav meljaćeri pe. Jedino o Jehova isi le pravo te vladini upro nebo hem upri phuv hem oleso način sar vladini tano najšukar (Otkr. 4:11). Ama, o Beng pokušinđa te ćhivel e anđelen hem e manušen te mislinen so o Jehova nane le pravo te vladini. Odolese pana hari, zauvek ka rešini pe odova. Sare ka đanen so o Jehova tano najšukar vladari hem so jedino oleso Kraljevstvo ka anel mir hem sigurnost ki phuv (w21.07 9 ¶5-6).

Normalno tano o murš te brinini pe andi pi porodica hem ando odova te ovel len so te han, so te uraven hem kaj te živinen. But tano pharo ked nane tut dovoljno pare te ćine odova so valjani te porodicaće. Ama, baš tegani šaj te ćere ko odova te ovel tut pana pobari vera. Molin tut hem čitin e Isusese lafija ando Matej 6:25-34 hem palo odova hor razmislin ando odova so čitinđan. Isto ađahar, razmislin ando iskustvija kola mothovena so o Jehova pomožini okolenđe kola ćhivena o Kraljevstvo ko prvo than (1. Kor. 15:58). Odova ka pomožini tuće te haljove sar so o Jehova pomožinđa olenđe, ađahar ka pomožini hem tuće. Ov đanela so valjani tuće hem sar te del tut odova. Ked ka dikhe sar o Jehova brinini pe tutar, ti vera ka ovel pana pobari hem odova ka pomožini tuće te istrajine ko pana pobare kušnje (w21.11 20 ¶3; 21 ¶6).

But hrišćanija zorjaćerđe pi vera ked sikljilje andi otkupnina. On nastavinđe te propovedinen, iako hine len protivljenje hem istrajinđe ko razna kušnje. Hajde te dikha o primer ando apostol Jovan. Ov verno propovedinđa o ćaćipe ando Isus hem andi otkupnina, verovatno pobuter ando 60 berš. Ked hine le skoro 100 berš, o manuša kola hine ki rimsko vlast mislinđe so o apostol Jovan tano opasno manuš. Odolese ćhivđe le ko phanlipe ko ostrvo Patmos. Kova lošnipe ov ćerđa? Ov vaćerđa „ando Devel hem svedočinđa ando Isus“ (Otkr. 1:9). O apostol Jovan aćhavđa amenđe but šukar primer andi vera hem andi istrajnost! Ko e biblijake knjige kola o apostol Jovan pisinđa, ov mothovđa kobor manglja e Isuse hem kobor ceninđa olesi žrtva koja ov dinđa. Ko odola knjige, o apostol Jovan prekalo 100 putija vaćeri andi otkupnina hem ando but šukar buća kola isi amen sebepi i otkupnina (1. Jov. 2:2). Ćaće dićhola so ov but ceninđa i otkupnina (w21.04 17 ¶9-10).

O Jehova ando pe sluge ađićeri te oven šukar premalo hendikepirana manuša. Na primer, o Izraelcija na isminđe te den arman nekas ko hine kašuko. Odova značinđa so na valjanđe te vaćeren diso lošno olestar. Odova hine diso but lošno sose ov našti hine te šunel odova so on vaćerđe olestar hem našti hine te branini pe. Isto ađahar, ki Levitska 19:14 dikhaja so o manuša na valjanđe te „ćhiven anglo kororo manuš diso te perel.“ Ki jekh knjiga, koja vaćeri ando odova sar o manuša ponašinđe pe premalo okola so hine hendikepirana, pisini: „Ko purano vreme, ko Blisko Istok, o manuša hine but okrutna hem nepravedna premalo olende.“ Disave šaj namerno ćhivđe anglo korore diso te peren hem te povredinen pe ja te asan olencar. Odova ćaće hine but lošno! Ked dinđa akija zapovest, o Jehova manglja te pomožini pe narodose te oven saosećajna premalo okola so na dikhena hem na šunena (w21.12 8-9 ¶3-4).

O Jakov but brininđa pe so oleso phral tano pana holjamo upro leste. Odolese, ov ando vilo molinđa pe e Jehovase te pomožini lese. Palo odova, ov bićhalđa baro poklon e Isavese (Post. 32:9-15). Ked reslje pe, ov mothovđa lese baro poštovanje ađahar so pelo lese ko koćja na jekhvar, na duvar već efta putija. Sebepi so hine ponizno hem so mothovđa lese poštovanje, o Jakov šaj hine te ovel ko mir oleja (Post. 33:3, 4). Ando Jakov šaj pana diso te sikljova. Ov najangleder pripreminđa po vilo hem razmislinđa sar te vaćeri pe phraleja. Molinđa e Jehova te pomožini lese. Na samo so molinđa pe te ovel mir maškaro olende, već hem ćerđa diso. Ked reslja pe phrale, o Jakov na vaćerđa oleja koj tano u pravu, a ko na. O Jakov manglja te pomirini pe pekle phraleja. Sar šaj tu te ove sar o Jakov? (Mat. 5:23, 24; w21.12 25 ¶11-12).

Ked razmislinaja odolestar so o Isus mulo te šaj amare grehija te oven oprostime, šaj te phena: „Me na hijum odobor vredno neko te ćerel maje odova.“ Sose šaj ađahar te razmislina? Sebepi so amaro nesavršeno vilo šaj te hovavi amen ađahar so ćhivela amen te mislina so na hijam vredna hem so avera našti te mangen amen (1. Jov. 3:19). Ked počminaja ađahar te razmislina, valjani te setina amen soj tano „o Devel pobaro ando amaro vilo.“ Amare Dadeso mangipe hem olesi spremnost te oprostini amenđe tane pobare andi bilo koja negativno misao koja šaj te pojavini pe ko amaro vilo. Valjani te uverina kokri amen so o Devel mangela amen. Te šaj te ćera odova, valjani redovno te proučina oleso Lafi, uvek te molina amen hem te družina amen e Devlese narodoja. Sose tano važno te ćera akala buća? Ađahar sa pošukar ka penđare e Jehovase šuže osobine. Isto ađahar, ka haljove kobor o Jehova mangela tut. Ked svako dive hor proučinaja e Devleso Lafi, odova ka pomožini amen te ispravina o pogrešna buća kola isi amen ki amari godi hem ko amaro vilo (2. Tim. 3:16; w21.04 23-24 ¶12-13).

Te šaj amari vera te ovel zorali, na valjani samo te šuna, već valjani pana diso te ćera. Amen valjani hor te razmislina ando odova so sikljiljam. Te dikha so nakhlja o pisco ando 77. psalam. Ov hine uznemirimo sose mislinđa so ov hem avera Izraelcija našalđe e Jehovaso mangipe. Sebepi so ađahar osetinđa pe, ov naštine raćate te sovel (2-8. stiho). So ćerđa? Ov phenđa e Jehovase: „Hor ka razmislinav ando sa odova so ćerđan, hem ka razmislinav ando te postupkija“ (12. stiho). Naravno, ov đanđa sar o Jehova angleder pomožinđa pe narodose, ama ipak pućlja pe: „Da li o Devel bisterđa te mothovi amenđe milost? Da li sebepi pi holi na mangela te mothovi amenđe milosrđe?“ (9. stiho). O psalmista hor razmislinđa ando odova so o Jehova angleder ćerđa hem sar mothovđa milosrđe pe narodose (11. stiho). So hine sebepi odova? O psalmista hine uverimo so o Jehova na ka aćhavi pe narodo (15. stiho) (w22.01 30-31 ¶17-18).

Sar o Jehova osetini pe ked neko ando olese sluge merena? Ov jedva ađićeri palem te dikhel len (Jov 14:15). Šaj samo te zamisline kobor nedostajini lese oleso amal, o Avraham (Jak. 2:23). Zamislin samo kobor nedostajini lese o Mojsije hem kobor mangela palem te vaćeri oleja (Izl. 33:11). Isto ađahar, ov jedva ađićeri te šunel sar o David hem avera psalmistija đilabena o đilja kolencar hvalinena le (Ps. 104:33). Iako o Jehova našalđa pe amalen, ov na bisterđa len (Is. 49:15). Ov pana đanela sa olendar. Pana hari, ov ka irini len ko đivdipe hem palem ka šunel len sar molinena pe olese hem ka dikhel sar služinena olese. Ako hem tu našalđan nekas, akava šaj but te ohrabrini tut. Ked hine i pobuna ko Eden, o Jehova đanđa so o buća ki phuv ka oven but lošna. Ov mrzini ked dikhela so ki phuv isi lošnipe, nepravda hem nasilje (w21.07 10 ¶11; 12 ¶12).

Ked mothovaja asavko mangipe, amen mothovaja so ceninaja i otkupnina. Sose? Odolese so o Isus na mulo samo amenđe, nego hem amare phralenđe hem phenjenđe. Ako ov hine spremno te merel olenđe, odova značini soj tane on but vredna anglo olese jaćha (1. Jov. 3:16-18). Odoleja sar ponašinaja amen premalo amare phralja hem phenja, amen mothovaja amaro mangipe (Ef. 4:29, 31–5:2). Na primer, amen pomožinaja len ked tane naborme ja ked isi len disavo pharipe, sar soj tane o prirodna katastrofe. Ama, so valjani te ćera ked dijekh phral ja phen ćerela ja vaćeri diso so povredini amen? Da li tano tuće podijekh puti pharo te oprostine? (Lev. 19:18). Ako ja, tegani šun akava savet: „Podnosinen jekh jekhe hem ando vilo oprostinen jekh jekhese čak hem ked neko uvredini tumen. Sar so o Jehova ando vilo oprostinđa tumenđe, ađahar ćeren hem tumen“ (Kol. 3:13). Svako puti ked oprostinaja amare phralese ja phenjaće, amen mothovaja amare Dadese so ćaće ceninaja i otkupnina (w21.04 18 ¶12-13).

Šaj isi amen but odgovornostija ki e Jehovasi organizacija hem šaj pomožinaja bute manušenđe te aven đi o krštenje. Ama, amen haljovaja so sa odova šaj te ćera samo odolese so o Jehova pomožini amen. Ando Apolo hem ando apostol Pavle šaj te sikljova pana diso. So pobuter odgovornostija isi amen, pana pobuter šaj te ćera te ovel mir ki skupština. But hijam zahvalna ked o starešine hem o sluge pomoćnikija pomožinena amen te ova ko jekhipe hem ko mir jekh jekheja. On odova ćerena ađahar so koristinena e Devleso Lafi ked dena amen savetija. On na mangena te ćeren pe važna, već te pomožinen sarinenđe ki skupština te šunen e Isuse hem te ićeren pe ko odova so ov vaćerđa (1. Kor. 4:6, 7). O Jehova svakonese amendar dinđa disave sposobnostija. Ama, šaj mislineja so odova so ćereja nane važno. Ma bistri so o šeja tane šuže sebepi so o thava povezinena len. Isto ađahar, svako buti koja ćereja, kobor god te ovel tikni, pomožini e skupštinaće te aćhol ko jekhipe. Odolese, svako amendar valjani te del sa pestar ando po vilo te ikali i želja te ovel pošukar averendar. Hem de sa tutar ki skupština te ovel mir hem jekhipe (Ef. 4:3; w21.07 19 ¶18-19).

Šaj te ove sigurno so hem tu palem ka ove okolencar kola mulje tutar. Odova so o Isus runđa ked oleso amal o Lazar mulo mothovi so ov jedva ađićeri te vazdel te manglen kola mulje (Jov. 11:35). Pomožin okolenđe kola našalđe nekas. O Isus na samo so runđa e Martaja hem e Marijaja, već hem pažljivo šunđa len hem ohrabrinđa len (Jov. 11:25-27). Hem tu šaj te ćere odova. O Dan, jekh starešina kova bešela ki Australija, phenela: „Ked mulji mi romni, valjanđa maje pomoć. Nekobor phralja hem olenge romnja dive-rat hine spremna te šunen man. On mukhlje man te rovav hem na hine lenđe neprijatno sebepi odova. Isto ađahar, pomožinđe man hem ko avera buća. Ked me naštine te thovav me vorda, te pazarinav ja te ćerav maje diso hajbase, on ćerđe odova. Uzo sa odova, but putija hem molinđe pe mancar. On ćaće mothovđe maje so o šukar amal ’ko phare dive phral ovela‘“ (Posl. 17:17; w22.01 16 ¶8-9).

O Jehova mangela odova soj tano najšukar amenđe (Posl. 4:20-22). Ked dela amen savet prekalo po Lafi, prekalo publikacije ja prekalo disavo zrelo phral ja phen, ov ađahar mothovi so mangela amen (Jevr. 12:9, 10). Razmislin ando savet, a na ando odova sar tano dindo. Disavo puti, amen šaj te mislina so o savet na hine dindo ko najšukar način. Ki aver strana, okova kova dela savet valjani te pazini sar ćerela odova (Gal. 6:1). Ama, ako amen dobinđam savet, tegani šukar bi ovela te dikha so šaj te sikljova ando odova savet, čak iako mislinaja so okova kova dinđa amen savet na ćerđa odova ko najšukar način. Valjani te puća amen: „Čak iako na sviđini pe maje o način ko kova tano o savet dindo, da li isi barem jekh razlog sose dobinđum odova savet? Da li isi diso so šaj te sikljovav ando odova savet, a na te dikhav o mane ando okova kova dinđa man savet?“ Mudro tano te dikha so šaj te sikljova ando svako savet kova dobinaja (w22.02 12 ¶13-14).

O Jehova đanela so valjani amenđe vreme hem so valjani but te trudina amen te šaj te cida amendar o lošna mislija hem o lošna navike (Ps. 103:13, 14). Ama, o Jehova prekalo po Lafi, po duho hem prekali pi organizacija sikavi amen sar te ćera odova, zorjaćeri amen hem pomožini amen te menjina amen. Mukh e Devleso Lafi te mothovi tuće savo hijan. E Devleso Lafi tano sar ogledalo hem šaj te pomožini tut te dikhe savo manuš hijan — sostar razmisineja, so vaćereja hem so ćereja (Jak. 1:22-25). O Jehova tano uvek odothe te pomožini tuće hem ov najšukar đanela sar te ćerel odova. Ov đanela soj tano ko to vilo (Posl. 14:10; 15:11). Odolese, svako dive molin tut hem proučin oleso Lafi. Ov sigurno so e Jehovase zakonija tane najšukar. Sa odova so o Jehova rodela amendar te ćera tano amare šukaripase. Okola kola ićerena pe ko olese zakonija poštujinena kokri pes, đanena sose živinena hem but tane bahtale (Ps. 19:8-11; w22.03 4 ¶8-10).

Amen služinaja e Jehovase ked gradinaja hem održinaja amare dvorane. I Biblija phenela so ked ćerđa pe o sveto šatori hem i oprema aso sveto šatori so odija hine „sveto buti“ (Izl. 36:1, 4). Ked avdije gradinena pe amare dvorane hem avera objektija, o Jehova ko odova dikhela sar sveto služba. But phralja hem phenja koristinena po vreme te gradinen amare objektija. Amen but ceninaja odova so on ćerena. Naravno, on hem propovedinena. Disave olendar čak mangena te oven pionirija. Ked odola phralja hem phenja dena i molba te oven pionirija, o starešine ka mothoven so podržinena len ađahar so ka odobrinen olenge molbe. Bilo te đana te ćera disavi buti ki gradnja ja na, sare šaj te pomožina ked valjani diso te popravini pe ko amare objektija ja ked valjani te čistina len (w22.03 22 ¶11-12).