Mart

O bakre ando Matej 25:31-36, predstavinena e pravedno manušen kola živinena ko vreme ando krajo hem kola isi len nada so ka živinen ki phuv. Odola tane o avera bakre. On podupirinena e Hristese phralen ađahar so pomožinena lenđe te propovedinen hem te ćeren učenikonen ko celo sveto (Mat. 24:14; 28:19, 20). Svako berš, nekobor kurće angleder i Spomen-svečanost, o avera bakre mothovena so podupirinena e Hristese phralen, ađahar so vićinena e manušen ki Spomen-svečanost. Isto ađahar, on pripreminena sa so valjani te šaj i Spomen-svečanost te ovel ićerdi ki svako skupština ko celo sveto. O avera bakre tane but bahtale so šaj ko asavko način te podržinen e Hristese phralen. On đanena so o Isus ko odova so ćerena olese phralenđe dikhela samći olese ćerena (Mat. 25:37-40; w22.01 22 ¶11-12).

Amen šaj te oponašina e Isusese osobine hem o način sar ov ponašinđa pe premalo avera. Na primer, ov mothovđa sažaljenje premalo jekh gubavco, samilost premali jekh romni koja hine but nabormi hem saosećanje premalo okola kola našalđe nekas. Ked amen oponašinaja e Isusese osobine, amen ađahar oponašinaja e Jehova (Mar. 1:40, 41; 5:25-34; Jov. 11:33-35). So pobuter oponašinaja e Jehova ka ova sa popaše oleja. Ako đaja palo e Isusese korakija, odova ka pomožini amen te na mukha akava lošno sveto te cidel amen ando Jehova. I rat angleder te merel, o Isus phenđa: „Me pobedinđum o sveto“ (Jov. 16:33). Akale lafencar ov manglja te phenel so na dozvolinđa e manušenge stavija, olenge ciljija hem odova so on ćerđe te utičini upro leste. O Isus niked na bisterđa so ov alo ki phuv te proslavini e Jehovaso anav. Ama, so šaj te phena amendar? Ko akava sveto isi but buća kola šaj te ciden amen ando Jehova. Ako amenđe, sar hem e Isusese, e Jehovasi volja tani ko prvo than, hem amen ka „pobedina“ o sveto (1. Jov. 5:5; w21.04 3-4 ¶7-8).

O apostol Pavle đanđa aso e Isuseso obećanje so „svako ko verujini upro leste ka ovel le večno životi“ (Jov. 3:15; Rimlj. 6:23). O apostol Pavle hine le asavki vera ki otkupnina. Ov hine uverimo so o Jehova tano spremno te oprostini čak hem okolenđe kola ćerđe baro greh, ako kajinena pe (Ps. 86:5). Isto ađahar, o Pavle hine sigurno so o Devel but mangela le, odolese so đanđa so bićhalđa pe Ćhave te merel olese. Zapazin e Pavlese ohrabrujuća lafija ko krajo ando Galatima 2:20: „E Devleso Ćhavo... manglja man hem dinđa po đivdipe maje.“ O Pavle na mislinđa soj tano odobor lošno so o Devel našti te mangel le. Ov na phenđa: „Haljovava sose o Jehova mangela me phralen, ama sose bi mangela man?“ O Pavle pisinđa e hrišćanenđe ko Rim: „O Hrist, đi pana hijam le grešnikija, mulo amenđe“ (Rimlj. 5:8). E Devle ništa našti te ćhinavi te mangel amen! O Pavle hine potpuno uverimo so o Jehova but mangela amen. Ov đanđa kobor o Jehova hine strpljivo premalo Izraelcija (w21.04 22 ¶8-10).

Ked proučineja nekasa, pomožin le te zamangel e Jehova. Sar šaj te ćere odova? Koristin svako prilika te sikave le diso pobuter ando e Jehovase osobine. Pomožin lese te haljol so o Jehova tano bahtalo Devel kova pomožini okolenđe kola mangena le (1. Tim. 1:11; Jevr. 11:6). Mothov lese soj tano olese šukaripase te primenini odova so sikljola hem objasnin lese so odova tano o način sar o Jehova mangela te mothovi lese so mangela le (Is. 48:17, 18). Sar barjola oleso mangipe premalo Jehova, sa pobuter ka mangel te ćerel promene ko poklo životi. Te šaj te napredujini đi o krštenje, o student šaj ka valjani te ćerel disave žrtve. Disave studentija šaj ka valjani te odrekninen pe ando disave materijalna buća. But studentija šaj ka valjani te ćhinaven te družinen pe pekle amalencar kola na mangena e Jehova. A averen šaj odbacinđa olengi porodica sebepi so na mangena e Jehovase svedokonen. O Isus obećinđa so na ka aćhavi okolen kola sledinena le. O Jehova ka nagradini len ađahar so o phralja hem o phenja andi skupština ka oven olengi porodica (Mar. 10:29, 30; w21.06 4 ¶8-9).

Amari buti te propovedina hem te sikava e manušen o Pavle uporedinđa odoleja sar ked brininaja amen andi jekh biljka. Nane dovoljno samo te sadina o seme. Ov phenđa e hrišćanenđe ko Korint: „Me sadinđum, o Apolo vadinđa... a tumen hijen e Devlesi njiva“ (1. Kor. 3:6-9). Amen hijam radnikija ki e Devlesi njiva. Odolese, amen sadinaja o seme ked propovedinaja, a vadinaja le ked sikavaja e manušen. Ama, đanaja so o Devel tano okova so dela o seme te barjol. Amen isi amen čast te propovedina hem te sikava e manušen ando ćaćipe. Odova ćaće ćerela amen te ova bahtale. O apostol Pavle pomožinđa bute manušenđe ko Solun te oven e Hristese učenikija. Ov objasninđa sar osetinđa pe ked phenđa: „Sose soj tani amari nada ja radost ja kruna sebepi koja ka ova ponosna anglo amaro Gospod Isus ko vreme andi olesi prisutnost? Zar na hijen tumen odola? Tumen ćaće hijen amari slava hem radost“ (1. Sol. 2:19, 20; Dela 17:1-4; w21.07 3 ¶5; 7 ¶17).

O Jehova cidinđa amen nakro peste (Jov. 6:44). Razmislin so odova značini. Đi posmatrinđa bute manušen ki celo phuv, ov dikhlja diso but šukar koro tute – jekh iskreno vilo kova šaj te mangel le (1. Let. 28:9). O Jehova đanela tut, haljola tut hem mangela tut. Kobor tano samo odova utešno! O Jehova but brinini pe tutar, ama isto hem ando te phralja hem phenja. Te šaj te haljova odova, o Isus uporedinđa e Jehova jekhe pastireja. Ako ando šel bakre jekh našalđola, so ka ćerel o pastiri? Ov ka „mukhel odole 99 bakren ki gora hem ka đal te rodel okole kova našaldilo.“ Ked ka arakhi odole bakre, ov na ka holjani upro oleste sose našaldilo, nego ka radujini pe. So sikljovaja ando odova? Svako amendar tano važno e Jehovase. O Isus phenđa: „Mo Dad kova tano ko nebo na mangela nijekh kotar akala tikne te našalđol“ (Mat. 18:12-14; w21.06 20 ¶1-2).

Ked razmislinaja odolestar, amaro mangipe premalo Jehova ovela pana pobaro hem ovaja pana popaše oleja (Rimlj. 8:38, 39). Podstaknime hijam te oponašina e Isuseso primer (1. Petr. 2:21). Nekobor dive angleder i Spomen-svečanost, ki Biblija čitinaja ando Isusese poslednja dive ki phuv, ando oleso meribe hem uskrsenje. Palo odova, o govor asi Spomen-svečanost setinćeri amen ko mangipe kova o Isus mothovđa amenđe (Ef. 5:2; 1. Jov. 3:16). Ked čitinaja hem ked hor razmislinaja ando odova so o Isus ćerđa, amen hijam podstaknime te živina ađahar sar so ov živinđa (1. Jov. 2:6). Ka ovel amen pana pobari želja te aćhova ko Devleso mangipe (Jud. 20, 21). Amen šaj te aćhova ko Devleso mangipe ađahar so ka ćera sa te šuna le, te posvetina oleso anav hem te ćera le bahtalo (Posl. 27:11; Mat. 6:9; 1. Jov. 5:3). I Spomen-svečanost pomožini amen svako dive te živina ko način kova mothovi e Jehovase so mangaja te aćhova ko oleso mangipe (w22.01 23 ¶17; 25 ¶18-19).

O Jehova dinđa amen slobodno volja. Amaro manglo Dad tano bahtalo ked birinaja te služina olese (Ps. 84:11; Posl. 27:11). Amen šaj te koristina amari slobodno volja te ana šukar odluke ko amaro životi. Ako oponašinaja e Isuse, tegani ka ćhiva avere manušen anglo amende. Jekhvar, o Isus hem olese učenikija hine but umorna. Odolese, on đelje ko jekh than hari te odmorinen pe. Ama, našti hine te ćeren odova. But manuša alje koro lende hem manglje o Isus te sikavi len. Iako o Isus hine umorno, ov na holjanđa, već sažalinđa pe upro odola manuša. Odolese, ov „počminđa te sikavi len ando but buća“ (Mar. 6:30-34). Ked oponašinaja e Isuse, ađahar so koristinaja amaro vreme hem i snaga te pomožina averenđe, tegani radujinaja amare nebesko Dade (Mat. 5:14-16; w21.08 3 ¶7-8).

O Jehova but mangela te ćerel različita buća. Odova dićhola sose ov ćerđa različita vrste ando biljke, ando životinje hem čak stvorinđa različita manušen. Ki phuv, nane duj ista manuša. Odolese, o Jehova niked na uporedini tut averencar. Ov šukar đanela save amen hijam ćaće (1. Sam. 16:7). Isto ađahar, đanela so tu šaj, a so našti te ćere hem đanela sar bariljan. Odolese, niked na rodela tutar te ćere pobuter ando odova so šaj. Amen valjani te dikha upro amende ađahar sar so ov dikhela amen. Tegani, na ka vazda amen, ama ni na ka perava kokri amen (Rimlj. 12:3). Šukar tano te sikljova averendar. Na primer, šaj ki skupština isi dijekh phral ja phen kola tane but šukar ki služba (Jevr. 13:7). Amen šaj te sikljova olendar sar te ova pana pošukar ki služba (Fil. 3:17). Ama, isi but bari razlika maškaro odova te oponašina nekas hem te uporedina amen nekasa (w21.07 20 ¶1-2).

Sa soj tano stvorimo – o životinje, o biljke hem o ćerenja – šaj te pomožini amen te ovel amen pana pobari vera ko odova so postojini o Stvoritelj (Ps. 19:1). So pobuter sikljovaja ando buća soj tane stvorime, pana pobuter ka ova uverime so o Jehova sa stvorinđa. Đi sikljoveja ando odova soj tano stvorimo, razmislin so odova mothovi tuće ando Stvoritelj (Rimlj. 1:20). Na primer, o Kham dela amen sa so valjani te šaj te živina ki phuv. Dela amen svetlost hem taćari amen. Ama, o Kham mukhela o ultraljubičasta zrakija kola tane štetna. Ama, amen hijam zaštitime. Sar? Okolo amari phuv isi o ozonsko omotači kova štitini amen ando odola štetna zrakija. Soj tano o zračenje pozoralo hem i količina ando ozon barjola. So tu mislineja, da li akava mothovi tuće so postojini jekh mudro Stvoritelj kova but mangela e manušen? (w21.08 17 ¶9-10).

Palo odova so o manuš krstini pe, amen valjani hem ponodri te mothova so mangaja le hem so poštujinaja le (1. Jov. 4:20). Odova šaj te ćera ađahar so ka mothova so isi amen poverenje upro leste. Ked ćerela diso so na haljovaja, amen na ka mislina so ov isi le lošno motivi. Umesto odova, valjani te mothova so poštujinaja amare phrale hem so upro leste dikhaja sar pobaro amendar (Rimlj. 12:10; Fil. 2:3). U stvari, amen valjani te ova milosrdna hem šukar premalo sa o manuša. Ako mangaja te ova deo andi e Devlesi porodica, valjani te ićera amen ko e Devleso Lafi. Na primer, o Isus sikavđa amen te ova milosrdna hem šukar premalo sa o manuša, čak hem premalo amare dušmanja (Luka 6:32-36). Podijekh puti odova šaj te ovel pharo. Ama, valjani te sikljova te razmislina hem te postupina sar o Isus. Ked daja sa amendar te šuna e Jehova hem te oponašina e Isuse, tegani mothovaja amare nebesko Dadese so ćaće mangaja zauvek te ova deo andi olesi porodica (w21.08 6 ¶14-15).

Sikljov te oslonine tut upro Jehova. Ov obećini so ka del amen bare blagoslovija ako osloninaja amen upro leste hem ako daja lese amaro najšukar. Ki Biblija isi but primerija ando manuša kola trudinđe pe te služinen e Jehovase. Ando odola primerija sikljovaja so o Jehova blagoslovinđa e manušen tek palo odova so ćerđe diso sova mothovđe so osloninena pe upro leste. Na primer, o Jehova blagoslovinđa e Avrahame, tek palo odova so ov mukhlja po ćher, iako na đanđa kaj valjani te đal (Jevr. 11:8). Isto ađahar, o Jakov dobinđa jekh posebno blagoslov ando Jehova, tek palo odova so borinđa pe e anđeleja (Post. 32:24-30). Ked valjanđe te khuven ki Obećimi phuv, o Izraelcija šaj hine te nakhen i reka, tek palo odova so o sveštenikija khuvđe ko pani (Is. Nav. 3:14-16). Isto ađahar, hem avdije šaj but te sikljova ando amare phralja hem phenja kola osloninđe pe upro Jehova hem ispuninđe pe ciljija (w21.08 29-30 ¶12-14).

Tumen, phure phraljalen hem phenjalen, đanena sar o buća angleder ćerđe pe, ama isto ađahar, tumen haljona hem sose tano važno te sikljova te ćera o buća ko nevo način. Tumen kola akana sigende krstinđen tumen, isi tumen but buća kola šaj te den averenđe. E ternenđe but ka koristini te šunen so nakhljen ko tumaro đivdipe. Ako „dena“ ađahar so vaćerena averenđe ando buća kola sikljiljen, o Jehova but ka blagoslovini tumen (Luka 6:38). Ked o phure phralja hem phenja trudinena pe te oven paše e ternencar, tegani on šaj te pomožinen jekh jekhese (Rimlj. 1:12). Svako olendar isi le diso so okova aver nane le. O phure isi len but bari mudrost hem nakhlje but buća ko po đivdipe. O terne isi len snaga koja o phure nane len. Ked o phure hem o terne sarađujinena, on ađahar slavinena e Jehova hem pomožinena celona skupštinaće (w21.09 8 ¶3; 13 ¶17-18).

But Jevreja odbacinđe e Isuse odolese so hine kovimo ko stubo. Olenđe odova so o Isus mulo ko stubo izgledinđa samći hine zločinco hem grešniko, a na o Mesija (Pon. zak. 21:22, 23). Disave Jevreja odbacinđe e Isuse odolese so mislinđe soj tano krivo, na haljilje soj tano nepravedno optužimo hem na dikhlje so premalo leste hine mothovdi nepravda. Okola kola sudinđe e Isusese na marinđe asi pravda. O članija ando Sinedrion sigate ćedinđe pe, bizo te poštujinen o zakonska procedure (Luka 22:54; Jov. 18:24). O sudije na hine poštena đi šunđe o optužbe hem o dokazija kola avera vaćerđe „protiv o Isus“ (Mat. 26:59; Mar. 14:55-64). Hem palo odova so o Isus hine uskrsnimo, odola nepravedna sudije platinđe but srebrnikija e rimsko vojnikonenđe, kola arakhlje o grobo, te vaćeren hovajbe ando odova sose oleso grobo hine ćućo (Mat. 28:11-15; w21.05 11 ¶12-13).

O Jehova šaj hine pana but berša angleder te cidel o lošnipe. Ama, ov tano strpljivo sebepi amaro šukaripe. Sa e Adamese hem e Evake ćhave bijandilje sar nesavršena manuša. Ama, o Jehova mangela len hem brinini pe olendar hem dinđa po lafi so ka ćhinavi o lošnipe (1. Jov. 4:19). Ov već odredinđa o dive ked ka cidel sa o lošnipe kova isi ki phuv. Odolese, oleso mangipe valjani te podstaknini amen te istrajina đi o krajo. O Jehova tano najšukar primer andi istrajnost. O Isus hine istrajno sar po Dad. Đi hine ki phuv, e Isuse vređinđe, marđe lese muj hem ćhivđe le ko stubo sebepi amaro (Jevr. 12:2, 3). Odova so o Jehova tano istrajno dinđa e Isusese snaga hem ov te istrajini. E Jehovaso primer šaj hem amenđe te del snaga (w21.07 12-13 ¶15-17).

Svako dive o Jehova oprostini amenđe (Ps. 103:10-14). E Isusese učenikija but putija grešinđe, ama ov mothovđa soj tano milosrdno ađahar so spremno oprostinđa lenđe. Ov čak hine spremno te del po životi te šaj amare grehija te oven oprostime (1. Jov. 2:1, 2). Ked „ando vilo oprostinaja jekh jekhese“, tegani amaro mangipe ovela pobaro (Ef. 4:32). Naravno, podijekh puti šaj te ovel amenđe but pharo te oprostina. Ađahar osetinđa pe hem jekh amari phen. Ama, olaće but pomožinđa odova so čitinđa ko članko „Spremno opraštajte jedni drugima.“ Oj pisini: „Akava članko phenela so ked oprostinaja nekase, odova na značini so tiknjaćeraja olenge greške ja so ćeraja amen ka phene ništa na ulo. Ama, ked oprostinaja averenđe, odova značini so na ićeraja i holi ano amende hem so isi amen mir ko vilo.“ Ked spremno oprostinaja amare phralenđe hem phenjenđe, tegani mothovaja so mangaja len hem so oponašinaja amare Dade, e Jehova (w21.09 23-24 ¶15-16).

O Isus but manglja o ćaćipe ando Devel hem kotar sa odova so ov mangela te ćerel. Odoleja sar živinđa, o Isus mothovđa so verujini ko odova ćaćipe hem odolestar vaćerđa averenđe (Jov. 18:37). Isto ađahar, e Isusese učenikija manglje o ćaćipe (Jov. 4:23). Ked vaćerđa ando hrišćanstvo, o apostol Petar vaćerđa sar ando „drumo e ćaćipaso“ (2. Petr. 2:2). Sebepi so but manglje o ćaćipe, o hrišćanija ando prvo veko na prihvatinđe o verska sikljoviba, o običaja hem o način sar o manuša ko odova vreme razmislinđe (Kol. 2:8). Isto ađahar, hem o prava hrišćanija avdije dena sa pestar te živinen premalo ćaćipe, ađahar so verujinena ko odova so pisini ko e Devleso Lafi hem ćerena odova so o Devel rodela olendar (3. Jov. 3, 4). Avdije, e Devlese sluge na phenena so sa đanena kotar e Devleso Lafi hem so sa haljona. Disavo puti pogrešno haljilje disave e biblijake sikljoviba hem na haljilje sar valjani te organizujini pe i skupština. Ked diso pošukar haljona, odova so valjani menjinena (w21.10 21-22 ¶11-12).

Sar so ko purano vreme e dizjake zidija arakhlje e manušen, ađahar e Jehovaso verno mangipe arakhi amen kotar sa o buća kola lošno šaj te utičinen ko amaro amalipe oleja. Uzo odova, sebepi po verno mangipe, o Jehova privucini amen koro peste (Jer. 31:3). O psalmista David koristinđa pana jekh primer te mothovi sar o Devel arakhi pe slugen. Ov phenđa: „Tu Devla hijan than kuri šaj te garavav man, o Devel kova mothovi maje po verno mangipe.“ O David pana phenđa ando Jehova: „Ov mothovi maje po verno mangipe, ov tano mi tvrđava, ov tano than kuri šaj te garavav man hem mo spasitelj, mo štit hem mo zaklon“ (Ps. 59:17; 144:2). Sose o David phenđa so e Jehovaso verno mangipe tano sar than kuri šaj te garava amen? Kuri god te živina, o Jehova arakhi pe verno slugen hem pomožini len te aćhon amala oleja (w21.11 6 ¶14-15).

Ked o Isus hem olese učenikija putujinđe čamcoja, hine jekh bari oluja. O Isus odova događaj koristinđa te pomožini pe učenikonenđe te haljon so valjani lenđe pobari vera (Matej 8:23-26). Odija oluja hine odobor zorali so o pani khuvđa ko čamco, ama tegani o Isus suća. O učenikija but darandilje, vazdinđe le ando sojbe hem pućlje le te pomožini lenđe. Ov phenđa lenđe: „Sose odobor darandiljen? Pana li nane tumen vera?“ Da li isi tut disavi „bari oluja“ ko to životi? Šaj doživinđan disavi prirodno katastrofa. Ja šaj hijan but nabormo hem odolese hijan obeshrabrimo hem na đaneja so te ćere. Iako podijekh puti brinineja tut, ma mukh sebepi odova te našale to poverenje upro Jehova. Vaćer e Jehovase sa so isi tut ko vilo. Razmislin sar o Jehova pomožinđa tuće angleder hem ađahar ka zorjaćere ti vera (Ps. 77:11). Ov sigurno so o Jehova niked na ka aćhavi tut (w21.11 22 ¶7, 10).

Neko šaj te mislini so na ćorela sose niked na lelja diso so nane oleso. Ama, ov šaj ćorela ko disavo aver način. Na primer, o pazardžija kova koristinđa i vaga koja na merini tačno hovavđa e manušen hem ađahar ćorđa olendar. Ki Levitska 19:13 pisini: „Ma prevarin te pašutne.“ Odolese ked neko nane pošteno ki buti odova značini so ćorela. I oftoto zapovest phenela so na valjani te ćora. Ama, odova so pisini ki Levitska pomožini amen te haljova sar šaj te ićera amen ko načelo ando akava zakon, te ova poštena ko sa so ćeraja. Šukar tano te đana sar o Jehova dikhela ked neko nane pošteno hem ked ćorela. Odolese, valjani te puća amen: „Ked razmislinava andi Levitska 19:11-13, da li valjani te ćerav disave promene ko mo životi ja ko odova sar ćerava mi buti?“ (w21.12 9-10 ¶6-8).

Ked tu kokri molineja tut, razmislin ando konkretna greške kola ćerđan odova dive hem rode e Jehovastar te oprostini tuće. Ama, ako ćerđan dijekh ozbiljno greh, ka valjani te rode pomoć ando starešine. On ka šunen tut hem ka den tut savet ando e Devleso Lafi. Isto ađahar, ka molinen pe tuvaja hem ka molinen e Jehova te oprostini tuće te šaj palem te ove ko šukar odnos oleja (Jak. 5:14-16). Isto ađahar, ka ovel šukar hor te razmisline andi otkupnina. Šaj tano tuće pharo ked razmislineja ando odova kobor o Isus patinđa. Ama, so pobuter razmislineja andi žrtva koja o Isus ćerđa, pana pobuter ka barjol to mangipe premalo oleste hem oleso Dad. Svako berš pana pobuter ceninaja i otkupnina ked đaja ki Spomen-svečanost hem ked daja sa amendar te vićina averen te aven amencar. Kobor bari čast o Jehova mothovđa amenđe so šaj te sikava averen ando oleso Ćhavo! (w21.04 18-19 ¶13-16).

Razmislin so ćerđa o Isus ked o narodo alo koro leste ked hine ki gora. Sebepi so celo rat molinđa pe e Jehovase, ov hine but umorno. Ama, ked dikhlja e manušen, ov sažalinđa pe upro okola so hine ćorore hem naborme. Ov na samo so saćarđa len, već hem ićerđa jekh govor kova but ohrabrinđa len, kova tano penđardo sar Propoved ki gora (Luka 6:12-20). Čak hem ked manglja te ovel kokri, o Isus hine spremno te ovel averencar. Šaj li te zamisline sar hine e Isusese ked šunđa so oleso amal, o Jovan Krstitelj, hine mudardo? I Biblija phenela so ked „šunđa odova čamcoja đelo ko jekh pusto than te ovel kokri“ (Mat. 14:10-13). Ama, o manuša angleder oleste već reslje ko odova than (Mar. 6:31-33). Ov haljilo so valjani lenđe pomoć hem uteha ando Devel hem dinđa sa pestar te pomožini lenđe (Luka 9:10, 11; w22.02 21 ¶4, 6).

So valjani te ćere ako povredinđan te phrale ja te phenja? Ando vilo molin tut e Jehovase te pomožini tuće te pomirine tut te phraleja. Isto ađahar, valjani te beša hem te razmislina save amen hijam. Šaj te puće kokri tut: „Da li hijum spremno te phenav so pogrešinđum, te izvininav man hem te pomirinav man odola osobaja? Sar o Jehova hem o Isus ka osetinen pe ako dava sa mandar te ovav ko mir me phraleja ja me phenjaja?“ O odgovor ko akala pućiba šaj te podstaknini amen te šuna e Isuse, te đa te vaćera amare phraleja ja phenjaja hem te pomirina amen. Ked valjani te vaćera amare phraleja, valjani te ova ponizna (Ef. 4:2, 3). Valjani te đa hem te vaćera amare phraleja ja phenjaja hem te da sa amendar te pomirina amen. Ma bistri soj tano najvažno te pomirine tut te phraleja, a na te mothove koj tano u pravu (1. Kor. 6:7; w21.12 26 ¶13-16).

O Isus osetinđa bari dukh sose đanđa so o manuša na ka mangen te šunen i šukar vest. Sebepi odova, o Jerusalim hine uništimo hem o manuša hine legarde ko ropstvo (Luka 21:20-24). Nažalost, sar so phenđa, but manuša odbacinđe le. Sar reagujinena o manuša odothe kaj tu bešeja ked šunena i šukar vest? Ako samo disave manuša šunena, tegani so šaj te sikljove ando odova so o Isus runđa? O Jehova brinini pe e manušenđe. Odova so o Isus runđa mothovi amenđe kobor o Jehova brinini pe ando manuša. Ki Biblija pisini: „Ov na mangela nijekh te merel, nego sare te pokajinen pe“ (2. Petr. 3:9). Avdije, amen mothovaja so mangaja e manušen ađahar so daja sa amendar te vaćera lenđe i šukar vest (Mat. 22:39; w22.01 16 ¶10-12).

Ti vera ka ovel pana pozorali ako razmislineja sar o Jehova pomožinđa pe narodose hem sar pomožinđa tuće lično. Soj tano najvažno, to mangipe premalo Jehova ka ovel pana pozoralo. O mangipe, pobuter andi bilo koja aver osobina, ka podstaknini tut te šune e Jehova, te ove spremno te aćhave disave buća hem te istrajine ko bilo kova pharipe (Mat. 22:37-39; 1. Kor. 13:4, 7; 1. Jov. 5:3). Ništa našti te ovel amenđe povredno ando amaro amalipe e Jehovaja (Ps. 63:1-7). I molitva, o proučibe hem o hor razmislibe tane deo andi amari služba e Jehovase. Sar o Isus hem tu rode mirno than kuri šaj te moline tut e Jehovase. Ma mukh diso te lel ti pažnja. Molin tut e Jehovase te ovel tut koncentracija ked hijan ko sastankija hem ked čitineja oleso Lafi. Ako akana šukar koristineja to vreme, o Jehova ka blagoslovini tut hem ka uživine ko raj ki phuv (Mar. 4:24; w22.01 31 ¶18-20).

Odova sostar razmislinaja utičini ko odova so ćeraja. Odolese o Isus sikavđa amen te cida amendar o mislija kola šaj te legaren amen đi odova te ćera greh (Mat. 5:21, 22, 28, 29). Amen sigurno mangaja te radujina amare nebesko Dade. Odolese, ked ki godi avela amenđe disavi neispravno misao, but tano važno odmah te ikala la andi amari godi. O Isus phenđa: „Odova so ikljola ando muj, ikljola ando vilo“ (Mat. 15:18). Odova so vaćeraja mothovi save hijam andral. Odolese puć tut: „Da li vaćerava o ćaćipe čak iako sebepi odova ka ovel man problemija ja hovavava? Ako hijum ko brako, da li pazinava te na flertujinav nekasa? Da li pana isi man melali ćhib? Ked neko holjanćeri man, da li pištinava ja mirno vaćerava?“ Šukar bi ovela te razmislina ando akala pućiba. Amare lafija tane sar o kopče ko gad. Ako phraveja o kopče, tegani polokho ka ovel tuće te huljave o gad. Isto ađahar, ako deja sa tutar te cide i melali ćhib, te na akoše hem te na hovave, ka ovel tuće polokho te huljave i purani ličnost (w22.03 5 ¶12-14).

Okola kola pućena aso savet, a na ađićerena neko te avel te del len savet, but posigate napredujinena ando okola kola na rodena savet. Odolese, đa hem puć aso savet. Ked šaj te roda savet ando amare phralja hem phenja? Te dikha nekobor situacije: (1) Jekh phen pućela jekhe iskusno objavitelje te đal olaja ko olako kurs hem palo odova pućela sar šaj pana pošukar te sikavi. (2) Jekh phen koja nane ko brako mangela te ćinel pese disave šeja hem odolese pućela jekha zrelo phenja so oj mislini odolestar. (3) Jekh phral prvo puti ićeri javno predavanje. Ov pućela jekhe iskusno phrale pažljivo te šunel oleso govor hem palo odova te phenel lese so šaj pošukar te ćerel. Čak hem jekh iskusno phral kova beršencar ićeri govorija, šaj te pućel avere iskusno phralen aso savet hem te prihvatini o savet (Posl. 19:20; w22.02 13 ¶15-17).

O Jehova mothovi so brinini pe amendar hem so mangela amen, isto sar so mothovđa so mangela pe Ćhave, e Isuse, đi hine ki phuv (Jov. 5:20). Ov pomožinđa e Isusese te ovel le zorali vera, ohrabrinđa le ked hine lese pharo hem dinđa le sa so valjani te šaj te živini. O Jehova phenđa pe Ćhavese so mangela le hem soj tano zadovoljno oleja (Mat. 3:16, 17). Odolese, o Isus đanđa so oleso Dad uvek ka pomožini lese hem so niked na ka aćhavi le. Sar o Isus, sare amen ko razna načinija osetinđam kobor o Jehova mangela amen. Razmislin akalestar: O Jehova pomožinđa amen te ova olese amala hem dinđa amen but phralja hem phenja kola ćerena amen bahtale hem kola ohrabrinena amen ked tano amenđe pharo (Jov. 6:44). Isto ađahar, o Jehova dela amen sa so valjani amenđe te šaj amari vera te ovel zorali. Uzo odova, o Jehova dela amen sa so valjani amenđe te šaj te živina (Mat. 6:31, 32). Ked razmislinaja ando odova kobor o Jehova mangela amen, amaro mangipe premalo leste barjola (w21.09 22 ¶8-9).

Savo hine to životi angleder te počmine te proučine e Devleso Lafi? But amendar na mangena ni te setinen pe ko odova vreme. Tegani, upro amende utičinđa o sveto hem odova so e manušenđe ko sveto hine šukar ja lošno hine hem amenđe. Odolese, „hijam le bizi nada hem bizo Devel“ (Ef. 2:12). Đi proučinđan, sikljiljan so isi tut nebesko Dad kova but mangela tut. Haljiljan so disave buća valjani te menjine ako mangeja te služine e Jehovase hem te ove deo kotar olesi porodica, sar soj tane sar živineja, sar izgledineja hem sar razmislineja. Sikljiljan te živine premalo odova so o Jehova phenela soj tano šukar, a soj tano lošno (Ef. 5:3-5). Sar amaro Stvoritelj hem amaro Dad, o Jehova isi le pravo te phenel amenđe so valjani te ćera. Ov rodela amendar „te huljava i purani ličnost hem olake delija“ angleder te krstina amen (w22.03 2 ¶1-3).

O avera bakre tane bahtale ked avena ki Spomen-svečanost hem but ceninena pi nada. On jedva ađićerena te šunen o govor asi Spomen-svečanost kova setinćeri len ko odova so o Hrist hem o pomazanikija ka ćeren ki Hiljadaberšengi vladavina. Ked o Isus ka ovel Kralj, ov hem o pomazanikija ka ćeren i phuv te ovel raj hem ka pomožinen e manušenđe te oven savršena. Milionija manuša tane bahtale ked razmislinena sar ka ovel jekh dive ked ka ispuninen pe o lafija ando Isaija 35:5, 6; 65:21-23; hem ando Otkrivenje 21:3, 4. Ked zamislinena pes hem pe manglen ko nevo sveto, odova pomožini len te ovel len pana pozorali nada hem te oven odlučna te aćhon verna e Jehovase (Mat. 24:13; Gal. 6:9; w22.01 21 ¶5-7).

Soj tani i otkupnina? I otkupnina tani cena koja o Isus platinđa te šaj te lel napalal odova so o Adam našalđa (1. Kor. 15:22). Sose valjani amenđe i otkupnina? Premalo e Jehovase merilija asi pravda kola tane pisime ko oleso Zakon, valjanđa te del pe životi aso životi (Izl. 21:23, 24). O Adam našalđa po savršeno životi. Te šaj te zadovoljini e Devlesi pravda, o Isus žrtvujinđa po savršeno životi (Rimlj. 5:17). Ađahar ulo „Večno Dad“ aso sa okola kola mothovena vera ki otkupno žrtva (Is. 9:6; Rimlj. 3:23, 24). O Isus hine spremno te del po đivdipe odolese so manglja pe nebesko Dade hem e manušen (Jov. 14:31; 15:13). Odova mangipe podstakninđa le te aćhol verno celo po životi hem te ćerel pe Dadesi volja. Sebepi odova, e Devlesi namera asi phuv hem aso manuša ka ispunini pe (w21.04 14 ¶2-3).