April

O Isus mothovđa but baro mangipe ađahar so hine spremno te merel amenđe (Jov. 15:13). Amen našti te irina e Jehovase hem e Isusese aso odova so ćerđe amenđe. Ama, odoleja sar živinaja svako dive, šaj te mothova so hijam zahvalna olenđe (Kol. 3:15). O pomazanikija ceninena i otkupno žrtva sose sebepi odija žrtva on šaj te dobinen pi nagrada (Mat. 20:28). Odolese so verujinena ki otkupno žrtva, on tane pravedna anglo Jehovase jaćha hem o Jehova usvojinđa len sar pe ćhaven (Rimlj. 5:1; 8:15-17, 23). Isto ađahar, hem o avera bakre tane zahvalna asi otkupno žrtva. Sebepi so verujinena ki Hristesi otkupno žrtva on šaj te oven čista anglo Devlese jaćha hem isi len nada so ka preživinen i bari nevolja (Otkr. 7:13-15). O solduj grupe mothovena pi zahvalnost asi otkupno žrtva ađahar so avena ki Spomen-svečanost svako berš (w22.01 23 ¶14-15).

O Isus brininđa pe aso odova sose hine optužimo. Ov hine optužimo so hine hulnik, neko ko na mothovi poštovanje premalo Devel ja oleso anav (Mat. 26:64-66). Sebepi odova, o Isus hine but uznemirimo hem nadinđa pe so oleso Dad na ka dozvolini te ovel ponizimo ko asavko način (Mat. 26:38, 39, 42). O Isus hine ćhivdo ko stubo te šaj te oslobodini e Jevrejen ando prokletstvo (Gal. 3:10). On anđe upro peste odova prokletstvo sose obećinđe so ka ićeren pe ko e Devleso zakon, ama na ćerđe odova. Odolese, sar e Adamese grešna potomkija hem narodo kova anđa upro peste o prokletstvo, on valjanđe te meren (Rimlj. 5:12). Ko zakon, kova o Devel dinđa pisinđa so ako jekh manuš ćerela greh sebepi kova zaslužini te merel, ov valjani te ovel mudardo. Ko disave situacije, o telo bi palo odova valjanđa te ćhivel pe ko stubo (Pon. zak. 21:22, 23; 27:26). Odolese so hine ćhivdo ko stubo, o Isus phravđa o drumo baš odova narodo kova odbacinđa le, te ovel oslobodimo ando odova prokletstvo (w21.04 16 ¶5-6).

Zamislin so sa desinđa pe ko poslednjo dive angleder te merel o Isus. O rimska vojnikija marđe le (Mat. 26:52-54; Jov. 18:3; 19:1). O bič koleja šibinena le phravela lese rane ko telo. Palo odova, ćhivena lese ko dumo te akhari jekh stubo, ama ko dumo već isi le phravde rane. O Isus pokušini te akhari odova stubo đi o than ko kova valjani te ovel mudardo. Ama, na nakhlo but, o rimska vojnikija naredinena jekhe manušese te akhari odova stubo (Mat. 27:32). Ked o Isus resela ko than ko kova valjani te ovel mudardo, o rimska vojnikija kovinena olese vasta hem olese pre ko stubo. I težina ando oleso telo phravela o rane kola ćerđe o klinija, kola isi le ko vasta hem ko pre. Olese amala tane tužna, olesi daj rovela, ama o jevrejska starešine marena lese muj (Luka 23:32-38; Jov. 19:25). O Isus nekobor satija trpini bari dukh. Oleso vilo hem olese pluća hine opteretime hem odolese jedva dišini. Ov đanela so aćhilo verno hem hari angleder te merel poslednjo puti molini pe e Jehovase. Palo odova, ov teljari po šero hem merela (Mar. 15:37; Luka 23:46; Jov. 10:18; 19:30). O način sar mulo hine sporo, ponižavajućo hem ko bare dukha (w21.04 16 ¶4).

O Isus vaćerđa pe 11 apostolencar ando nevo savez hem ando savez aso Kraljevstvo (Luka 22:19, 20, 28-30). Sebepi odola duj savezija, olese apostolija hem jekh tikno broj ando manuša šaj te oven kraljija hem sveštenikija ko nebo (Otkr. 5:10; 14:1). Odolese soj tane deo ando odola duj savezija, o pomazanikija kola tane pana ki phuv šaj te len o maro hem o vino ki Spomen-svečanost. O Jehova dinđa len but šuži nada. On ka ovel len besmrtno životi ko nebo, telo kova na ćirnjola, ka oven e Isuseja hem avere pomazanikonencar. Soj tano najvažno, on ka dikhen e Jehova (1. Kor. 15:51-53; 1. Jov. 3:2). O pomazanikija đanena so valjani te aćhon verna sa đi o meribe (2. Tim. 4:7, 8; w22.01 21 ¶4-5).

Uzo Isus hine pana duj zločincija ko mučeničko stubo (Luka 23:40, 41). Jekh olendar phenđa e Isusese: „Setin tut koro mande ked ka ave ko to Kraljevstvo“ (Luka 23:42). O Isus šajinđa te phenel odola lafija kola dinđe nada akale manušese, sebepi so đanđa so oleso Dad tano milosrdno (Ps. 103:8; Jevr. 1:3). O Jehova tano spremno te oprostini hem te mothovi amenđe milosrđe, ako ćaće kajinaja amen aso grehija kola ćerđam hem ako verujinaja so ov šaj te oprostini amenđe prekali e Isusesi otkupno žrtva (1. Jov. 1:7). Disavenđe šaj te ovel pharo te verujinen so o Jehova šaj čak te oprostini lenđe. Ako disavo puti hem tu ađahar osetineja tut, razmislin akalestar: Hari angleder te merel, o Isus mothovđa milosrđe premalo zločinco kova samo so počminđa te mothovi vera upro leste. Odolese, zamislin samo kobor o Jehova ka mothovi milosrđe pe verno slugenđe (Ps. 51:1; 1. Jov. 2:1, 2; w21.04 9 ¶5-6).

Odoleja so aćhilo verno sa đi o meribe, o Isus ćerđa nekobor buća. Sar prvo, ov mothovđa so o Beng hovavi. Mothovđa so jekh savršeno manuš šaj te aćhol verno ko sa, bizo obzir so o Beng šaj te ćerel lese. Sar dujto, o Isus dinđa po životi sar otkupnina. Sebepi so o Isus mulo, amen sar nesavršena manuša šaj te ova amala e Devleja hem šaj te ovel amen nada ko večno životi. Sar trito, o Isus mothovđa soj tano o Jehova pravedno vladari hem cidinđa i lađ ando pe Dadeso anav. Hajde hem amen svako dive te živina samći odija tani amari poslednjo šansa te mothova so hijam verna! Odolese, čak ako valjani te mera, amen šaj te phena: „Jehova me dinđum sa mandar te aćhovav tuće verno, te mothovav so o Beng tano hovavno, te posvetinav to anav hem te opravdinav to pravo te vladine!“ (w21.04 12 ¶13-14).

O Isus tano nepravedno optužimo hem osudimo aso zločin kova na ćerđa. O manuša asana lese, okrutno mučinena le hem palo odova kovinena le ko mučeničko stubo. Olese vasta hem pre tane kovime. Svako puti ked lela vazduh ja ked vaćeri diso, ov osetini bari dukh. Ama, ov mora te vaćeri sose isi le diso važno te phenel. Kobor važna buća sikljovaja ando e Isusese poslednja lafija! Odola lafija podsetinena amen so valjani te oprostina averenđe hem te verujina so o Jehova ka oprostini amenđe. Amen hijam bahtale so hijam deo andi duhovno porodica ki koja tane amare phralja hem phenja kola tane spremna te pomožinen amen. Ama, ako valjani amenđe pomoć, valjani te roda la. Đanaja so o Jehova ka pomožini amen te istrajina ko bilo kova problemi kova šaj te ovel amen. Isto ađahar, haljovaja kobor tano važno svako dive te živina, ka phene odova tano zadnjo dive te mothova so hijam verna, uverime so amaro životi ko e Jehovase vasta tano ko sigurno (w21.04 8 ¶1; 13 ¶17).

Ako đaja palo e Isusese korakija, ka dobina večno životi. Ked jekh barvalo terno manuš pućlja e Isuse so valjani te ćerel te šaj zauvek te živini, ov odgovorinđa lese: „Ov mo učeniko“ (Mat. 19:16-21). Disave Jevrejenđe kola na verujinđe soj tano ov o Hrist, o Isus phenđa: „Mekle bakre [...] đana palo mande. Me ka dav len večno đivdipe“ (Jov. 10:24-29). Amen mothovaja vera ko Isus ađahar so primeninaja odova so ov sikavđa hem oponašinaja odova so ov ćerđa. Ako ćeraja odova, ka aćhova ko drumo kova legari ko večno životi (Mat. 7:14). Te bi šaj te đa ko sa palo e Isusese korakija, amen prvo mora šukar te upoznajina le. Odova tano jekh proces kova trajini. Amen mora sa pošukar te upoznajina e Isuse. Odova značini te upoznajina olese osobine, oleso način sar razmislini hem olese merilija. Bizo obzir kobor berš hijam ko ćaćipe, sare mora hem ponodri te trudina amen pošukar te upoznajina e Jehova hem olese Ćhave (w21.04 4 ¶9-10).

O apostol Pavle verovatno osetinđa pe but lošno ked razmislinđa odolestar so angleder ćerđa. Odolese na iznenadini amen so kokri pese phenđa soj tano „najbaro grešniko“ (1. Tim. 1:15). Angleder te upoznajini o ćaćipe, o Pavle progoninđa e hrišćanen kotar jekh diz ki aver. Disaven ćhivđa ko phanlipe, a aso disave složinđa pe te oven mudarde (Dela 26:10, 11). Šaj li te zamisline sar o Pavle osetinđa pe ako ko sastanak reslja dijekhe terne hrišćane kase roditeljija hine mudarde sebepi oleste? Iako o Pavle pokajinđa pe aso odova so ćerđa angleder, ov đanđa so našti te menjini i prošlost. Prihvatinđa so o Isus mulo olese hem odolese pisinđa: „Sebepi e Devleso bizaslužimo šukaripe, me hijum apostol“ (1. Kor. 15:3, 10). So amen sikljovaja akalestar? Tu valjani te uverine tut ko odova so o Hrist mulo tuće hem ađahar phravđa o drumo te šaj tu te ove paše amal e Jehovaja (Dela 3:19). E Devlese tano važno so tu ćereja akana hem so ka ćere ki budućnost, a na o greške kola ćerđan ki prošlost (Is. 1:18; w21.04 23 ¶11).

Iako but Jevreja ko e Isuseso vreme na mislinđe so o Mesija valjani te merel, zapazin so hine prorokujimo olestar: „Kokri pes predajinđa ko meribe hem hine računimo maškaro prestupnikija. Ov akharđa o grehija ando but manuša hem borinđa pe aso prestupnikija“ (Is. 53:12). Odolese, o Jevreja na hine len nijekh razlog te odbacinen e Isuse ked hine mudardo sar grešniko. Avdije, amen valjani te haljova o ćaćipe te na našala amari vera. Ki Propoved ki gora, o Isus upozorinđa okolen kola šunđe le so disave ka vaćeren „but bare hovajba“ olendar (Mat. 5:11). Akala hovajba avena ando Satana. Ov utičini upro amare protivnikija te vaćeren hovajba amendar (Otkr. 12:9, 10). Amen na valjani te šuna odova. Niked na valjani te dozvolina odola hovajba te ciden amen ando Jehova ja te slabonćeren amari vera (w21.05 11 ¶14; 12 ¶16).

Pomožin te studentese te ovel le poverenje upro o Jehova. O Isus phenđa pe učenikonenđe so o Jehova ka pomožini len odolese so mangela len (Mat. 10:19, 20, 29, 30). Vaćer te studentese so o Jehova hem olese ka pomožini. Tu šaj te pomožine lese te ovel le poverenje upro Jehova ađahar so ki molitva ka pomine olese ciljija. O Franćišek, kova živini ki Poljska, phenela: „O phral kova proučinđa mancar često pominđa me ciljija đi molinđa pe. Ked dikhljum sar o Jehova odgovorinđa ko olese molitve sigate palo odova počminđum te molinav man. Osetinđum sar o Jehova pomožinđa maje ked valjanđum te lav slobodna dive ki mi nevi buti te šaj te đav ko sastankija hem ko kongresija.“ O Jehova but brinini pe ando amare studentija. Ov đanela kobor jekh učitelj trudini pe te pomožini e manušenđe te oven paše oleja. O Jehova but mangela len sebepi olengo trud (Is. 52:7). Ako akana nane tut nijekh kurs, tu šaj te pomožine e studentenđe te napredujinen đi o krštenje ađahar so ka đa avere objaviteljencar ko olenge kursija (w21.06 7 ¶17-18).

Amen šaj te mothova so hijam zahvalna asi Biblija, ako čitinaja la svako dive. Valjani te ovel amen raspored ked ka čitina la hem ked ka proučina la, a na te ćera odova samo ked isi amen vreme. Ako ćeraja ađahar, amari vera hem ponodri ka aćhol zorali. Amari vera hem e manušengi vera but razlikujini pe. Amari vera temeljini pe ko dokazija ando e Devleso Lafi (Mat. 11:25, 26). E Devleso Lafi mothovi amenđe sose isi odobor lošnipe ki phuv hem so ka ćerel o Devel pana hari. Odolese, mangaja hem ponodri te ćera ki amari vera hem mangaja te pomožina averenđe te uverinen pe so postojini o Stvoritelj (1. Tim. 2:3, 4). Jedva ađićeraja o dive ked sarine ki phuv ka hvalinen e Jehova e lafencar ando Otkrivenje 4:11: „Jehova, Devla amaro, dostojno hijan te primine i slava, i čast hem i moć, sose tu sa stvorinđan hem te voljaja sa ulo hem stvorimo tano“ (w21.08 19 ¶18-20).

Sar pastirija, o starešine tane odgovorna te den savet ked odova valjani. On valjani te den savet kova ka pomožini averenđe hem ka zorjaćeri len (Posl. 27:9). O starešine mangena pe phralen hem pe phenjen. Podijekh puti, on odova mothovena ađahar so dena savet nekase koj tano ko drumo te ćerel greh (Gal. 6:1). Angleder te vaćeren odola osobaja, šukar tano o starešine te razmislinen ando disave buća kola o Pavle vaćerđa ando mangipe: „O mangipe tano strpljivo hem šukar... Sa podnosini, sa verujini, uvek nadini pe, sa trpini“ (1. Kor. 13:4, 7). Ked jekh starešina hor razmislini ando akala stihija, odova ka pomožini lese te haljol da li o savet dela odolese so mangela odole phrale ja odola phenja. Ked o phralja hem o phenja osetinena so o starešina brinini pe olendar, olenđe ka ovel but polokho te prihvatinen odova savet (w22.02 14 ¶3; 15 ¶5).

Ked o Jehova ćerđa e anđelen hem e prvo manušen, e Adame hem e Eva, on hine savršena, bizi mana. Ama, jekh buntovno anđeo, o Satana (so značini „protivnik“) ćhivđa e savršeno manušen, e Adame hem e Eva, te irinen po dumo e Jehovase. Isto ađahar, avera anđelija hem disave manuša pobuninđe pe protiv o Devel (Jud. 6). Sa akava but dukhavđa e Jehova. Ama, ov istrajinđa hem pana ka istrajini sa đi na uništini okolen kola pobuninđe pe protiv oleste. Palo odova, o Jehova hem olese verna sluge ka oven bahtale hem na ka valjani više te trpinen o lošnipe kova isi ko akava sveto. Ov optužinđa e Jove hem sa e Jehovase verna slugen so služinena e Devlese samo te ovel olenđe šukar (Jov 1:8-11; 2:3-5). Hem avdije, o Beng optužini e Jehovase slugen (Otkr. 12:10). Amen šaj te mothova so o Beng hovavi, ađahar so ka istrajina ko amare problemija hem so ka da sa amendar te aćhova verna e Jehovase, odolese so mangaja le (w21.07 9 ¶7-8).

O apostol Pavle koristinđa jekh primer te sikavi amen kobor tano važno te menjina amen. Ov phenđa so amen valjani te kovina amari purani ličnost „ko stubo“ (Rimlj. 6:6). O Isus hine spremno te ovel kovimo ko stubo te šaj te ćerel odova so o Jehova mangela. Isto ađahar, ako mangaja te ćera odova so o Jehova mangela, amen valjani te ova spremna te cida amendar sa odova so o Jehova mrzini. Jedino ađahar šaj te ovel amen čisto savest hem nada so ka živina večno (Jov. 17:3; 1. Petr. 3:21). O Jehova na ka menjini pe zakonija samo te bi ćerela amen te ova bahtale. Umesto odova, amen valjani te menjina amen hem te ićera amen ko olese zakonija (Is. 1:17, 18; 55:9). Čak hem palo odova so ka krstine tut, valjani te borine tut protiv o lošna želje. Molin e Jehova te pomožini tut hem oslonin tut ko oleso duh, a na upro tute (Gal. 5:22; Fil. 4:6). Ako mangaja te huljava i purani ličnost, valjani but te trudina amen (w22.03 6 ¶15-17).

Ako ćhivaja o Kraljevstvo ko prvo than hem ako šunaja e Jehova, ov dela po lafi so ka ovel amen so te ha, so te urava hem kaj te živina (Mat. 6:33). Ako ćaće verujinaja lese, tegani na ka mislina so o materijalna buća ka zaštitinen amen hem so ka ćeren amen bahtale. Amen đanaja so mir šaj te ovel amen samo ako ćeraja odova so o Jehova rodela amendar (Fil. 4:6, 7). Šaj isi amen pare te ćina but buća, ama valjani te razmislina da li ka ovel amen vreme te sikljova te koristina odola buća hem te brinina amen olendar. Valjani te puća amen: „Kobor tane maje važna o buća kola isi man?“ Na valjani te bistra so o Jehova već dinđa amen jekh važno buti koja valjani te ćera. Odolese, na valjani te dozvolina nikase hem nisose te cidel amen andi amari najvažno buti. Na mangaja te ova sar o barvalo ćhavo, kova odobor manglja odova so hine le, so odbinđa te ovel e Isuseso učeniko. Odolese, ov našalđa i prilika te služini e Jehovase hem ađahar te ovel jekh ando e Devlese usvojime ćhave (Mar. 10:17-22; w21.08 6 ¶17).

Ked proučineja e Devleso Lafi, odova ka pomožini tut te haljove save osobine o Jehova isi le. Ista odola osobine ka dikhe ked razmislineja ando buća soj tane stvorime. Đi sikljoveja ando olese osobine, ka uverine tut so ov ćaće postojini (Izl. 34:6, 7; Ps. 145:8, 9). So pošukar penđareja le, ti vera ka ovel pana pobari, pana pobuter ka mange le hem ka ove pana popaše oleja. Vaćer averencar ando Devel. Ama, so ako neko phenela tuće so na verujini so o Devel postojini? So ako na đaneja so te phene ko odova? Ko amare publikacije šaj te dikhe so i Biblija vaćeri odolestar. Odova so arakhljan, koristin đi vaćereja e manušeja. Isto ađahar, šaj te puće jekhe iskusno phrale, ja jekha phenja te pomožini tut te odgovorine ko odova pućibe. Ama, čak iako odova manuš na prihvatini o odgovor andi Biblija, tuće ka ovel korisno so istražinđan odija tema. Ti vera ka ovel pana pozorali (w21.08 18 ¶14-15).

Na valjani te odreknina amen ando sa o buća te šaj te služina e Jehovase (Prop. 5:19, 20). Ama, ako na ćeraja pobuter ki služba e Jehovase sose na hijam spremna te odreknina amen ando disave buća, tegani šaj te ćera isto greška koja ćerđa o manuš ando e Isuseso poređenje. Ov ćedinđa baro barvalipe, ama anglo Devel na hine barvalo (Luka 12:16-21). Ked isi amen problemija, molinaja amen e Jehovase te pomožini amen hem pažljivo razmislinaja so te ćera (Posl. 3:21). O Jehova blagoslovini amen ko but načinija. Amen ka mothova so hijam zahvalna aso buća kola ov dela amen ađahar so ka da sa amendar te hvalina le (Jevr. 13:15). Ako ćeraja diso pobuter ki amari služba e Jehovase, ov ka blagoslovini amen pana pobuter. Svako dive, sarine valjani te „probinen hem te dikhen kobor tano o Jehova šukar“ (Ps. 34:8). Tegani, ka ova sar o Isus kova phenđa: „Mo habe tano te ćerav okova soj tano pali volja okolesi kova bićhalđa man hem te završinav i buti koja dinđa man“ (Jov. 4:34; w21.08 30-31 ¶16-19).

O Satana mangela te ova ponosna. Ov đanela so ako ovaja ponosna, amen ka ova sar oleste hem ka našala o večno životi. Odolese, o apostol Pavle upozorinđa so jekh manuš šaj te ovel ponosno hem te ovel osudimo isto sar o Beng (1. Tim. 3:6, 7). Akava šaj te desini pe svakonese amendar, bizo obzir da li hijam neve ko ćaćipe ja beršencar služinaja e Jehovase. O ponosna manuša tane sebična. O Satana mangela te mislina pobuter amendar nego ando Jehova, posebno ked hijam ko pharipa. Na primer, da li neko nekad phenđa hovajbe tutar? Da li doživinđan disavi nepravda? O Satana bi mangela, ked odova desini pe, te holjane upro Jehova ja upro te phralja. Uzo odova, ov mangela te misline so jedino način sar šaj te rešine odova problemi tano te le o problemi ko tekle vasta, a na te ćere ađahar sar so o Jehova sikavi amen prekalo poklo Lafi (Prop. 7:16, 20; w21.06 15 ¶4-5).

O Jehova dinđa e Agejese te ćerel jekh važno zadatko. Ov verovatno hine maškaro manuša kola ko 537. berš angl. n. e. irinđe pe ando Vavilon, ko Jerusalim. Sigate palo odova so reslje, odola verna manuša ćhivđe o temelji ando hram (Jezd. 3:8, 10). Ama, sigate palo odova, sebepi o protivljenje, on obeshrabrinđe pe hem ćhinavđe te ćeren o hram (Jezd. 4:4; Ag. 1:1, 2). Odolese, ko 520. berš angl. n. e., o Jehova phenđa e Agejese te ohrabrini e narodo te nastavinen te ćeren o hram (Jezd. 6:14, 15). E Agejesi poruka valjanđa te pomožini e Judejconenđe te ovel len pana pobari vera upro Jehova. O lafija „o Jehova, o Komandanti upro sa o vojske“ sigurno but ohrabrinđe len. O Jehova isi le vlast upro but bari vojska ando anđelija. Odolese, ako o manuša manglje te završinen o hram, on morandilje te osloninen pe upro leste (w21.09 15 ¶4-5).

Avdije, e Jehovase svedokija tane penđarutne premalo mangipe hem jekhipe kova isi len maškaro peste. Amen hijam averćhane ando sa avera religije, sose iako živinaja ko razna phuvja hem avaja ando različita kulture, amen hijam sar jekh porodica. Odova dićhola ked ćedaja amen ko amare sastankija hem ko bare skupija. Odolese, šaj te ova uverime so amen služinaja e Devlese ađahar sar so ov mangela (Jov. 13:34). E Devleso Lafi podstaknini amen te manga jekh jekhe (1. Petr. 4:8). Ked spremno oprostinaja jekh jekhese hem ked podnosinaja jekh jekhe, amen mothovaja so mangaja amen. Isto ađahar, šaj te mothova so mangaja jekh jekhe ked hijam phravde vastese hem gostoljubiva, čak hem premalo okola kola povredinđe amen (Kol. 3:12-14). Asavko mangipe mothovi so hijam prava hrišćanija (w21.10 22 ¶13-14).

Da li o isključenje šaj te pomožini nekase te menjini pe hem te pokajini pe? Šaj. But phralja hem phenja kola ćerđe ozbiljno greh phenđe so o isključenje hine baš odova so valjanđa lenđe. Odova pomožinđa len te haljon so ozbiljno grešinđe, te menjinen pe, te pokajinen pe hem te irinen pe e Jehovase (Jevr. 12:5, 6). Razmislin ando jekh primer. Jekh pastiri dikhela so oleso bakro tano but nabormo. Ov đanela so ako mangela te pomožini odole bakrese te saćol, ov mora te odvojini le ando avera bakre. Ama, o bakre tane asavke životinje so našti te oven kokri. Odolese, on šaj te oven but uznemirime ked tane odvojime ando stado. Da li odova značini so o pastiri tano grubo sose odvojinđa odole naborme bakre ando stado? Naravno so na. Ov đanela so ako bi mukhela odole naborme bakre te ovel zajedno avere bakrencar, tegani sa o bakre šaj te oven naborme. Odoleja so izdvojini odole naborme bakre, ov štitini celo stado (w21.10 10 ¶9-10).

Amen hijam zahvalna so ko celo sveto isi amen phralja hem phenja kola mangena jekh jekhe. Odolese, na mangaja te ćera ništa so ka ćhivel averen te mislinen lošno ando Jehova hem ando oleso narodo. Mangaja te da sa amendar te ponašina amen šukar sose sebepi amaro o manuša šaj ka mangen te sikljon ando Jehova hem te služinen lese. Podijekh puti, disave šaj te maren amenđe muj ja te progoninen amen sebepi so šunaja amare nebesko Dade. So valjani te ćera ako daraja te vaćera averencar ando amare verovanja? Amen šaj te ova sigurna so o Jehova hem oleso Ćhavo ka pomožinen amen. O Isus phenđa pe učenikonenđe so na valjani te brininen pe ando odova so ka phenen hem sar ka phenen. O Isus phenđa: „Ko odova trenutko ka đanen so te vaćeren. Sose na ka vaćeren samo tumen, nego tumare Dadeso duho ka vaćeri prekalo tumende“ (Mat. 10:19, 20; w21.09 24 ¶17-18).

O Mojsije koristinđa slična lafija (Ps. 90:1). Hari angleder te merel, o Mojsije phenđa pana diso kotar Jehova. Ov pisinđa: „O Devel tano to zaklon ando purane vremenija, olese večna vasta akharena tut“ (Pon. zak. 33:27). Ked đanaja so o Jehova ka arakhi amen, tegani osetinaja amen sigurno. Ama, disavo puti hijam odobor obeshrabrime, so nane amen snaga te borina amen. Tegani, sar o Jehova ka pomožini amen? (Ps. 136:23). Ov ka akhari amen ko pe vasta ja ka del amen po vas te šaj te ušta ko amare pre (Ps. 28:9; 94:18). Ka ova sigurna so uvek šaj te oslonina amen upro Devel. Odova ka pomožini amen ko duj načinija. Sar prvo, kuri god te ova, ka ova sigurna so o Devel uvek ka arakhi amen. Sar dujto, šaj te ova sigurna so o Devel brinini pe amendar (w21.11 6 ¶15-16).

O Isus đanđa so ked olese učenikija ka doživinen nepravda, tegani ka dićhol kobor tani olengi vera zorali. Te šaj te pomožini lenđe te istrajinen, o Isus vaćerđa o poređenje kova tano pisimo ko Luka. Ov vaćerđa lenđe i priča andi udovica koja molinđa e nepravedno sudija te pomožini laće. Oj hine sigurno so ako na ćhinavi te molini le, ov ka pomožini laće. Ko krajo, ov ćerđa odova so oj rodinđa olestar. So sikljovaja? O Jehova nane nepravedno. Odolese, o Isus phenđa: „Da li tegani o Devel na ka ćerel i pravda te dobinen olese izabrana, kola dive hem rat rodena olestar pomoć?“ (Luka 18:1-8). Isto ađahar, o Isus phenđa: „Ked ka avel o manušikano Ćhavo, da li ka arakhi asavki vera ki phuv?“ Ked doživinaja nepravda, odoleja so hijam strpljiva hem istrajna ka mothova so isi amen vera sar i udovica. Ked isi amen asavki vera, šaj te ova sigurna so o Jehova ka pomožini amen. Isto ađahar, valjani te ova uverime so i molitva isi la but bari snaga (w21.11 23 ¶12; 24 ¶14).

Ako hijan terno, da li podijekh puti mislineja so sebepi o Jehova našti te ćere sa odova so mangeja? O Beng mangela baš ađahar te misline. Ov mangela te dikhe so avera manuša ćerena ko buvlo drumo hem sar uživinena. Ked razmislineja ando odova so ćerena o terne ki škola ja ked ko internet dikheja sar avera uživinena ko životi, šaj avela tuće ki godi so tu na uživineja sar sa avera terne. O Beng mangela te misline so sebepi o Jehova našti te ćere odova so mangeja. Ama, ma bistri so o Beng na mangela o manuša kola đana ko buvlo drumo te đanen so ađićeri len (Mat. 7:13, 14). Ki aver strana, o Jehova mangela te đane kobor šukar životi ađićeri tut ako aćhoveja ko tesno drumo (Ps. 37:29; Is. 35:5, 6; 65:21-23; w21.12 23 ¶6-7).

Amen đanaja so valjani te oprostina hem soj tano ispravno te ćera odova. Ama, nane uvek lokho te ćera odova. O apostol Petar šaj podijekh puti osetinđa pe ađahar (Mat. 18:21, 22). So šaj te pomožini amenđe? Sar prvo, razmislin ando odova kobor o Jehova oprostini tuće (Mat. 18:32, 33). Iako na zaslužinaja te oprostini amenđe, ov ipak spremno ćerela odova (Ps. 103:8-10). Isto ađahar, amen hijam „dužna te manga jekh jekhe.“ Odolese, te oprostina nane diso so amen odlučinaja da li ka ćera ja na. Amen hijam dužna te oprostina amare phralenđe hem phenjenđe (1. Jov. 4:11). Sar dujto, razmislin ando odova so ovela ked oprostinaja. Ađahar pomožinaja e osobaće koja povredinđa amen, ćeraja te ovel mir ki skupština, arakhaja amaro amalipe e Jehovaja hem cidaja amendar jekh baro teret ando amare pike (2. Kor. 2:7; Kol. 3:14). Ko krajo, molin tut okolese kova rodela te oprostine. Ma mukh o Satana te rumini to amalipe kova isi tut te phralencar hem te phenjencar (Ef. 4:26, 27). Amenđe valjani e Jehovasi pomoć te bi ovela amen mir ki skupština (w21.06 22 ¶11; 23 ¶14).

O David morandilo te našel, sose o Saul, o kralj ando Izrael, manglja te mudari le. Sebepi so na hine le so te hal, o David đelo ki diz Nov hem ando sveštenik Ahimeleh rodinđa samo panđ mare (1. Sam. 21:1, 3). Kasnije, ov hem olese manuša arakhlje jekh pećina kuri garavđe pe (1. Sam. 22:1). Ama, sar o David alo ki akija situacija? O Saul hine ljubomorno upro David, sose o manuša manglje le hem sose pobedinđa ko but mariba. Isto ađahar, o Saul đanđa so o Jehova odbacinđa le hem so e Davide birinđa te ovel kralj (1. Sam. 23:16, 17). O Saul hine kralj ko Izrael hem hine le bari vojska hem but manuša hine ki olesi strana. Odolese, o David morandilo te našel. Da li o Saul ćaće mislinđa so šaj te ćhinavi e Jehova te ćhivel e Davide te ovel kralj? (Is. 55:11). I Biblija na vaćeri odolestar. Ama, ko jekh šaj te ova sigurna: Odoleja so ćerđa, o Saul ulo protiv o Jehova, a okola kola borinena pe protiv o Devel niked na ka pobedinen (w22.01 2 ¶1-2).

O Isus dinđa sa pestar te propovedini. Ov mothovđa so mangela e manušen ađahar so koristinđa svako prilika te vaćeri lenđe i šukar vest (Luka 19:47, 48). So podstakninđa le te ćerel odova? O Isus hine saosećajno premalo lende. Disavo puti, o manuša odobor manglje te šunen e Isuse so ov hem olese učenikija „na hine len vreme ni maro te han“ (Mar. 3:20). O Isus hine spremno čak hem raćate te propovedini jekhe manušese. But manuša kola šunđe odova sostar o Isus vaćerđa, na ulje olese učenikija. Ama, sare hine len prilika te šunen i šukar vest. Avdije, hem amen mangaja te vaćera i šukar vest sarinenđe (Dela 10:42). Odolese, valjani te ova spremna te vaćera i šukar vest ko razna načinija. Umesto te đa ki služba ked amenđe odgovorini, valjani te ova spremna te menjina amaro raspored hem te đa tegani ked šaj te arakha e manušen ćhere. Ako ka ćera odova, šaj te ova sigurna so o Jehova ka ovel bahtalo (w22.01 17 ¶13-14).

Avdije butenđe tano pharo te verujinen e manušenđe kola tane ki vlast. But putija on dikhlje sar o vlastija hem o zakonija arakhena e barvalen, a na pomožinena e ćororenđe. Uzo odova, disave verska vođe ćerena but lošna buća. Sebepi odova, disave manuša više na verujinena ko Devel. Odolese, ked počminaja te proučina olencar amen valjani te pomožina lenđe te ovel len poverenje ko Jehova hem ko okola kas ov ćhivđa te predvodinen ki phuv. Ama, na valjani samo o manuša kola proučinena te ovel len poverenje ko Jehova hem ki olesi organizacija. Čak hem okola soj tane beršencar ko ćaćipe niked na valjani te našalen pi vera so odova so o Jehova ćerela tano uvek ispravno. Podijekh puti, ka ovel potrebno te mothova kobor baro poverenje isi amen ko Jehova (w22.02 2 ¶1-2).