Maj

Sebepi so manglja pošukar te upoznajina olese Ćhave, o Jehova dinđa te pisinen pe ko oleso Lafi o štar jevanđelja. Koro lende pisini ando e Isuseso životi hem andi olesi služba. Akala knjige mothovena amenđe so o Isus phenđa, so ćerđa hem sar razmislinđa. O jevanđelja pomožinena amenđe hor te razmislina ando e Isuseso primer. On mothovena amenđe o korakija kola o Isus aćhavđa palo peste. Đi proučinaja len, amen sa pošukar upoznajinaja e Isuse hem ađahar šaj te đa ko sa palo olese korakija. Te šaj te sikljova ando jevanđelja, na valjani samo te čitina len. Mora te odvojina vreme temeljno te proučina len hem hor te razmislina olendar (Uporedin e stihoja ando Isus Navin 1:8, fusnota). Đi čitineja len ćer tuće slika ki godi. Zamislin so dikheja, šuneja hem osetineja odova so desini pe ko izveštaj. Te šaj te ćere odova, istražin o izveštaj ko publikacije kola dela amen e Jehovasi organizacija (w21.04 4-5 ¶11-13).

Beršencar angleder, o Jehova ko poklo Lafi mothovđa so o Mesija ka ovel izdajimo aso 30 srebrnikija (Zah. 11:12, 13). Ole ka izdajini oleso paše amal (Ps. 41:9). Isto ađahar, o prorok Zaharija pisinđa: „Khuv e pastire hem nek o bakre našen“ (Zah. 13:7). O manuša kola hine iskrena ne bi odbacinena e Isuse sebepi akala događaja. Olengi vera bi valjani te ovel zorjaćerdi ked bi dikhena sar akala proročanstvija ispuninena pe upro Isus. Da li hem avdije dikhaja isto problemi? Ja. Ko amaro vreme, but penđarutne phralja ki amari organizacija mukhlje o ćaćipe hem ulje otpadnikija. Palo odova, hem averen ćhivđe te đan palo lende. Ko radio, ko internet, ki televizija hem ko novine on vaćerena negativna izveštaja amendar, na vaćerena celo ćaćipe hem vaćerena hovajba. Ama, e iskreno manušen na prevarini akava. Umesto odova, on haljona so i Biblija prorekninđa so ka desinen pe asavke buća (Mat. 24:24; 2. Petr. 2:18-22; w21.05 11 ¶12; 12-13 ¶18-19).

E Devleso Lafi mothovi so sar đala o vreme, e Devlese sluge pana pošukar haljona o ćaćipe (Kol. 1:9, 10). O Jehova hari pohari pomožini pe slugenđe te haljon o ćaćipe. Odolese, valjani te ova strpljiva ked diso na haljovaja. Ked o Vodeće telo dikhela so valjani te menjina odova sar angleder haljiljam disave buća, on odova odmah ćerena. Disave crkve avdije menjinena pe sikljoviba sose mangena te ugodinen e manušenđe. Ama, e Jehovase svedokija odova ćerena sebepi so mangena te oven popaše e Devleja hem te služinen olese ađahar sar so o Isus ćerđa (Jak. 4:4). Đi o promene na avela sebepi so menjini pe o način sar o manuša ko sveto razmislinena, već sebepi so pošukar haljovaja e Devleso Lafi. Amen ćaće mangaja o ćaćipe! (1. Sol. 2:3, 4; w21.10 22 ¶12).

So šaj te ćere ako osetineja tut usamljeno? Razmislin ando odova sar o Jehova pomožini tut (Ps. 55:22). Odova ka pomožini tut te dikhe so na hijan kokri. Razmislin hem odolestar sar o Jehova pomožini te phralenđe hem te phenjenđe kola osetinena pe usamljeno (1. Petr. 5:9, 10). O phral Hiroši, kova tano beršencar jedino Svedoko ki pi porodica, phenela: „Amen đanaja so svako amendar dela poklo najšukar e Jehovase hem odova šaj te ohrabrini okolen kasi porodica na služini e Jehovase.“ Isto ađahar, redovno molin tut, čitin i Biblija hem đa ko sastankija. Tu valjani te phene e Jehovase sar tačno osetineja tut. Važno tano redovno te čitine e Devleso Lafi hem te razmisline ando izveštaja kola mothovena kobor o Jehova mangela tut. Disave hrišćanija napamet sikljona o stihija kola but utešinena len, sar soj tane Psalam 27:10 hem Isaija 41:10. Disave šunena o audio-snimkija ando amaro sajt hem odova pomožini len te na osetinen pe usamljeno (w21.06 9-10 ¶5-8).

Da li hijan tužno sebepi so mulo tutar neko kas but mangljan? Tegani, odvojin vreme te zorjaćere ti vera ko uskrsenje ađahar so kotar Devleso Lafi ka proučine o izveštaja kola vaćerena okolendar so uskrsninđe. Da li hijan tužno sebepi so neko andi ti porodica tano isključimo? Tegani, proučin e Devleso Lafi hem uverin tut so i disciplina tani uvek aso amaro šukaripe. Savo god problemi te ovel tut, koristin odija prilika te zorjaćere ti vera. Phrav e Jehovase to vilo. Ma cide tut ando avera, već družin tut te phralencar hem te phenjencar (Posl. 18:1). Ćer o buća kola ka pomožinen tuće te istrajine, iako šaj ka valjani odova te ćere rovindoj (Ps. 126:5, 6). Đa redovno ko sastankija, ki služba hem čitin e Devleso Lafi. Razmislin ando buća kola o Jehova pana hari ka ćerel. Ked ka dikhe sar o Jehova pomožini tuće, ti vera ka ovel pana pobari (w21.11 23 ¶11; 24 ¶17).

Ko kova način e Isusese učenikija tane „tikne“? Koj tano anglo akale svetose jaćha važno? O barvale, o penđarutne hem o moćna. Ama, e Isusese učenikija uglavnom nane asavke. Odolese o sveto mislini so on nane važna hem so na vredinena (1. Kor. 1:26-29). Ama, o Jehova na dikhela upro lende ađahar. Sose o Isus vaćerđa ando „tikne“? Odolese so olese učenikija pućlje le: „Koj tano najbaro ko nebesko Kraljevstvo?“ (Mat. 18:1). Ko odova vreme, but Judejcija manglje avera te mislinen soj tane but važna. Jekh izučavalac phenđa: „O manuša živinđe hem mulje te bi dobinena čast, ugled, priznanje hem poštovanje ando avera manuša.“ O Isus đanđa so but Judejcija mislinđe soj tano važno te ove pošukar averendar hem so olese učenikija ka valjani but te trudinen pe te na ovel len asavko stav (w21.06 20 ¶2; 21 ¶6, 8; 22 ¶9).

O apostol Pavle hine but šukar starešina. Na primer, ov dinđa savet e phralenđe ko Solun ked odova valjanđa. Ked pisinđa lenđe, o apostol Pavle najangleder pohvalinđa len asi olengi vera, istrajnost hem aso olengo mangipe. Isto ađahar, ov razmislinđa olendar, đanđa so olenđe nane lokho hem soj tane verna iako tane progonime (1. Sol. 1:3; 2. Sol. 1:4). Ov čak phenđa lenđe soj tane šukar primer averenđe (1. Sol. 1:8, 9). Odola phralja hem phenja sigurno hine but bahtale sebepi so o apostol Pavle ađahar pohvalinđa len. O apostol Pavle but manglja e phralen. Odolese, ov dinđa šukar savet odole phralenđe ko solduj lila (1. Sol. 4:1, 3-5, 11; 2. Sol. 3:11, 12; w22.02 15 ¶6).

O Beng prekalo religiozna vođe sikavi e manušen so o Jehova tano okrutno hem so olestar avena o patnje. Disave čak phenena so ked jekh ćhavoro merela, o Devel ljela le sebepi so valjani lese pana jekh anđeo ko nebo. Odova ćaće lađaćeri e Devle. Amen đanaja so odova nane ađahar. Ked hijam naborme ja ked merela amendar neko, amen niked na phenaja so odova ćerela o Devel. Umesto odova, amen verujinaja so pana hari o Devel ka saćari sa e nabormen hem so ka vazdel e mulen. Odolese, mangaja te vaćera sa e manušenđe kobor o Devel mangela len. Ađahar daja prilika e Devlese te odgovorini okolese kova marela lese muj (Posl. 27:11). O Jehova tano saosećajno Devel. Ov tano tužno ked dikhela so patinaja sebepi so hijam progonime, naborme ja sebepi amare mane (Ps. 22:23, 24). Ov mangela te ćhinavi amari dukh hem ka ćerel odova (Uporedin e stihonencar ando Izlazak 3:7, 8; Is. 63:9; w21.07 9-10 ¶9-10).

Pana hari, o poslušna manuša ka ovel len bari čast – te mangen e Jehova hem zauvek te služinen lese. O Isus ka cidel sa o problemija kola ulje sebepi so o Adam hem i Eva na šunđe e Jehova. O Jehova ka vazdel bute manušen kola mulje hem ka del len prilika te živinen večno ko raj ki phuv (Luka 23:42, 43). Ked o manuša kola služinena e Jehovase ka oven savršena, on ka ovel len „slava hem čast“ andi koja o David pisinđa. Ako hijan deo ando „baro mnoštvo“, tu isi tut but šuži nada (Otkr. 7:9). O Devel mangela tut hem mangela te ove deo andi olesi porodica. Odolese, de sa tutar te šune le. Svako dive razmislin ando olese obećanja. Ov zahvalno so isi tut čast te služine amare nebesko Dadese hem cenin odova so šaj te slavine le zauvek! (w21.08 7 ¶18-19).

O prorok Jeremija beršencar propovedinđa e manušenđe kola na manglje te šunen hem kola protivinđe pe olese. Jekh vreme, ov hine odobor obeshrabrimo, sebepi so vređinđe le hem marđe lese muj, so više na manglja te propovedini (Jer. 20:8, 9). Ama, ov hem ponodri propovedinđa. So pomožinđa lese hem ponodri te propovedini hem te aćhol bahtalo? Ov razmislinđa ando duj važna buća. Sar prvo, e Devlesi poruka koja ov propovedinđa valjanđa te pomožini e manušenđe te haljon so ađićeri len diso pošukar (Jer. 29:11). Sar dujto, o Jehova birinđa e Jeremija te vaćeri ko oleso anav e manušenđe (Jer. 15:16). Isto ađahar, hem amen propovedinaja i poruka koja dela nada e manušenđe hem akharaja oleso anav. Ked razmislinaja ando akala duj buća, amen hijam bahtale, čak iako o manuša na mangena te prihvatinen i šukar vest. Odolese, na obeshrabrinaja amen hem na vazdaja amare vasta ando manuš kasa proučinaja ako ov na napredujini sigate. Sar o zemljoradniko, hem amen strpljivo ađićeraja sa đi i osoba kokri na odlučini te služini e Jehovase (Jak. 5:7, 8; w21.10 27 ¶12-13).

Kobor god dugo te služina e Jehovase, valjani te da sa amendar hem ponodri amari vera te aćhol zorali. Odova tano važno, sose ako na hijam oprezna, šaj te našala amari vera. Ma bistri so amari vera temeljini pe ko buća kola tane ćaće, ama kola na dićhona. Odova so na dikhaja, lokho šaj te bistra. O apostol Pavle phenđa so ked neko nane le dovoljno vera odova tano „greh kova lokho šaj te peravi amen.“ Odolese, so valjani te ćera te šaj amari vera hem ponodri te ovel zorali? (2. Sol. 1:3). Najangleder, but putija molin e Jehova te del tut po sveti duh. Odova tano važno sose i vera tani plod ando e Devleso sveti duh (Gal. 5:22, 23). Bizo e Devleso sveti duh našti te ovel amen vera. Ako molinaja e Jehova te del amen po sveti duh, ov ka ćerel odova (Luka 11:13). Čak, đi molinaja amen e Jehovase, šaj te phena: „De amen pobuter vera“ (Luka 17:5). Uzo odova, redovno proučin e Devleso Lafi (Ps. 1:2, 3; w21.08 18-19 ¶16-18).

Ando phure šaj te sikljova but buća. Iako više nane odobor zorale, on isi len baro iskustvo ko po životi. O Jehova hem ponodri koristini len ko razna načinija. E Devleso Lafi vaćeri ando manuša kola iako hine phure, on hem ponodri verno služinđe e Jehovase. Na primer, o Mojsije hine le oko 80 berš ked počminđa te služini sar e Jehovaso proroko hem te ovel vođa andi izraelsko nacija. O Danilo hine le pobuter ando 90 berš hem pana služinđa e Jehovase sar oleso proroko. Isto ađahar, o apostol Jovan hine le pobuter ando 90 berš ked pisinđa i knjiga Otkrivenje. O Simeon hine jekh „pravedno hem pobožno“ manuš. Iako i Biblija na vaćeri but olestar, o Jehova but šukar đanđa koj tano ov. Odolese, hine le čast te dikhel e Isuse ked hine beba hem te vaćeri jekh proročanstvo kova ispuninđa pe beršencar palo odova (Luka 2:22, 25-35; w21.09 3-4 ¶5-7).

O roditeljija na valjani te uporedinen pekle ćhaven jekh jekheja, niti te roden olendar te ćeren pobuter ando odova so šaj. Ked o roditeljija odova ćerena, on obeshrabrinena pe ćhaven (Ef. 6:4). I phen koja vićini pe Sačiko, phenela: „Mi daj manglja te ćerav o testija bizi greška. Ama, maje odova hine but pharo. Iako angleder but berša završinđum i škola, hem avdije podijekh puti mislinava so o Jehova nane zadovoljno mancar, iako dava lese mo najšukar.“ O kralj David phenđa: „Na rodava okova soj tano maje but baro, niti okova so našti te resav te ćerav“ (Ps. 131:2). So o roditeljija šaj te sikljon ando e Davidese lafija? Ako tane o roditeljija ponizna hem skromna, on na ka roden but pestar, a ni ando pe ćhave. O roditeljija šaj te pomožinen pe ćhavenđe te osetinen soj tane vredna, ako haljona kola buća olenge ćhave šaj šukar te ćeren, a kola buća na. Isto ađahar, on šaj te pomožinen lenđe te ćhiven pese ciljija kola šaj te ispuninen (w21.07 21-22 ¶5-6).

Amen na valjani te bistra so o Jehova svakonese amendar dinđa slobodno volja. Odova značini so svako amendar kokri odlučini da li ka šunel e Jehova ja na. Disave roditeljija na mothovđe šukar primer pe ćhavenđe. Ama, olenge ćhave odlučinđe te služinen e Jehovase hem te aćhon lese verna. Ki aver strana, disave roditeljija but šukar sikavđe pe ćhaven. Ama, o ćhave ipak odlučinđe te aćhaven e Jehova. Akava mothovi so svako amendar valjani kokri te odlučini da li ka služini e Jehovase (Is. Nav. 24:15). Ako hijen tužna sose tumaro ćhavo ja tumari ćhaj više na služini e Jehovase, ma mislinen so tumen hijen kriva sebepi odova. Disavo puti, neko ando roditeljija šaj te aćhavi hem e Jehova hem pe porodica (Ps. 27:10). Odova šaj te ovel but pharo e ćhavenđe, sose o roditeljija hine lenđe but baro primer. Ternalen, amenđe tano but žao ako neko ando tumare roditeljija tano isključimo. Oven sigurna so o Jehova đanela sar tano tumenđe. O Jehova but mangela svakone tumendar. Uzo odova, o Jehova hem te phralja hem te phenja tane but bahtale sose tu aćhiljan verno. Ma bistri, so tu na hijan odgovorno aso odova so te roditeljija ćerena (w21.09 27 ¶5-7).

I isključimi osoba tani sar jekh nabormo bakro. Sebepi so ruminđa po amalipe e Jehovaja, oj tani akana sar neko koj tano nabormo (Jak. 5:14). Sar so o manuša kola tane naborme šaj te zarazinen avere manušen, neko ko ruminđa po amalipe e Jehovaja šaj te ćhivel averen te ćeren lošna buća. Odolese, podijekh puti asavki osoba valjani te ovel isključimi andi skupština. Ađahar, o Jehova mothovi so mangela pe verno slugen. Isto ađahar, odija disciplina šaj te pomožini e osobaće te haljol kobor tano baro olako greh hem te pokajini pe. Đi tani isključimi, šaj te avel ko sastankija kuri šaj te šunel o savetija andi Biblija hem te zorjaćeri pi vera. Isto ađahar, šaj te dobini literatura hem te dikhel amari mesečno emisija. Ked o starešine dikhena so odija osoba ćerđa promene ko po životi, podijekh puti šaj te den la savet kova ka pomožini laće palem te ovel paše e Jehovaja hem te irini pe olese (w21.10 10 ¶9, 11).

Avdije, amen služinaja e Devlese sar o hrišćanija ando prvo veko. Na primer, amen hijam organizujime ko isto način sar on. Isi amen pokrajinska nadglednikija, starešine hem sluge pomoćnikija (Fil. 1:1; Titu 1:5). Sar on, hem amen poštujinaja e Jehovase zakonija ando moral, ando brak, ando rat hem štitinaja i skupština okolendar so na mangena te ićeren pe ko e Devlese zakonija (Dela 15:28, 29; 1. Kor. 5:11-13; 6:9, 10; Jevr. 13:4). I Biblija phenela so isi samo „jekh vera“ ja religija koja o Devel prihvatini (Ef. 4:4-6). Ćaće tani but bari čast te ova deo ando e Devleso narodo hem te đana o osnovna e biblijake sikljoviba. Odolese, de sa tutar hem ponodri te uverine tut so arakhljan o ćaćipe (w21.10 22-23 ¶15-17).

O kralj Josafat hine ko jekh baro problemi. O Amoncija, o Moavcija hem o manuša ando Sir phenđe so ka napadinen le (2. Let. 20:1, 2). So ov ćerđa? Ov molinđa e Jehova te pomožini le hem te del le snaga. Olesi molitva koja tani pisimi ki 2. Letopisa 20:5-12, mothovi kobor baro poverenje hine le upro Jehova. O Jehova odgovorinđa e Josafatese prekalo Levit kova vićinđa pe Jazilo. O Josafat hine le but baro poverenje upro Jehova hem ćerđa sa so o Jehova phenđa lese. Ked pođinđe ko maribe, ov ko prvo redo ćhivđa e manušen te đilaben, a na pe iskusno vojnikonen. O Jehova ćerđa odova so obećinđa e Josafatese hem pobedinđa olenge dušmanen (2. Let. 20:18-23; w21.11 15-16 ¶6-7).

Ked isi amen pharipa, šaj te ova sigurna so o Jehova hem ponodri ka pomožini amen te aćhova verna olese (2. Kor. 4:7-9). Amen šaj te ova sigurna so o Jehova hem ponodri ka mothovi amenđe po verno mangipe, sose ki Biblija pisini: „E Jehovase jaćha tane upro okola so darana olestar, upro okola so osloninena pe ko oleso verno mangipe“ (Ps. 33:18-22). Angleder so počminđam te služina e Jehovase, ov mothovđa amenđe o mangipe kova mothovi premalo sa o manuša. Ama, okolenđe so služinena lese mothovi po verno mangipe. Sebepi po verno mangipe, o Jehova arakhi amen. Ov ka pomožini amen hem ponodri te aćhova verna olese hem ka ispunini sa so obećinđa amenđe. Ov mangela zauvek te ova olese amala (Ps. 46:1, 2, 7). Odolese, kola god pharipa te ovel amen, o Jehova ka del amen snaga te aćhova verna olese (w21.11 7 ¶17-18).

But amendar đanena nekas ko šaj već beršencar tano holjamo upro po kolega, po amal ja upro nekaste andi pi porodica. Setin tut so e Josifese phralja hine but holjame upro leste hem so sebepi odija holi ćerđe diso but lošno (Post. 37:2-8, 25-28). Ama, o Josif na hine sar olende. Ked šaj hine te irini lenđe aso odova so ćerđe lese, ov mothovđa lenđe milosrđe. O Josif na ićerđa i holi. Umesto odova, ov ćerđa premalo odova so kasnije hine pisimo ki Levitska 19:18 (Post. 50:19-21). O Josif na ićerđa i holi već oprostinđa pe phralenđe. Ako mangaja o Devel te ovel zadovoljno amencar hem amen valjani te oprostina averenđe. Hem o Isus podstakninđa amen te oprostina okolenđe kola povredinđe amen (Mat. 6:9, 12). Diso slično hem o apostol Pavle phenđa e hrišćanenđe: „Ma irinen o lošnipe, me mangle“ (Rimlj. 12:19; w21.12 11 ¶13-14).

Kasno raćate, ko 14. nisan ko 33. berš ki nevi era, o Isus đelo ko getsimansko vrt hem odothe phravđa po vilo e Jehovase (Luka 22:39-44). Tegani, „bare dukhaja hem asvencar ando vilo molinđa pe“ e Jehovase (Jevr. 5:7). Aso kola buća o Isus molinđa pe odija rat? Ov molinđa pe o Jehova te del le snaga te aćhol lese verno hem te ćerel olesi volja. O Jehova šunđa odija molitva hem bićhalđa jekhe anđele te zorjaćeri le. O Isus đanđa so isi le bari odgovornost – te posvetini pe Dadeso anav. O Jehova šunđa pe Ćhavesi molitva sose olese hine najvažno te aćhol verno pe Dadese hem te posvetini oleso anav. Ako hem amenđe tano najvažno te aćhova verna e Jehovase, ov ka šunel amare molitve hem ka pomožini amenđe (Ps. 145:18; w22.01 18 ¶15-17).

But manuša avdije na mangena te šunen amen sebepi so na mešinaja amen ki politika. On ađićerena amendar te glasina. Ama, amen haljiljam so premalo e Jehovase merilija ako bi glasinaja disave manušese, amen ađahar odbacinaja e Jehova, sar amare vladare (1. Sam. 8:4-7). Isto ađahar, o manuša mislinena so amen valjani te gradina škole, bolnice ja diso aver te šaj te mothova so mangaja te pomožina e manušenđe. Odolese, on na mangena te šunen odova sostar amen vaćeraja sose amen trudinaja amen te propovedina i šukar vest, a na te rešina o problemija kola isi ko sveto. So šaj te pomožini amen te na našala amari vera? (Mat. 7:21-23). Amen daja sa amendar te ćera o zadatko kova o Isus dinđa amen. Na valjani te trudina amen te rešina o politička problemija ko sveto. Amen mangaja e manušen hem brininaja amen sebepi so isi len problemija. Ama, đanaja so najšukar način sar šaj te pomožina len tano ađahar so ka vaćera lenđe ando e Devleso Kraljevstvo hem so ka pomožina len te oven šukar amala e Jehovaja (w21.05 7 ¶19-20).

Iako o vladarija avdije phenena so služinena e Devlese, on na mangena te odrekninen pe kotar pi vlast. Odolese, sar so ćerđe o vladarija ko e Isuseso vreme, hem avdije o vladarija suprotstavinena pe e Jehovase pomazanikose, ađahar so protivinena pe olese narodose (Dela 4:25-28). Sar o Jehova reagujini ked o manuša na mangena te šunen i šukar vest? Ko Psalam 2:10-12 pisini: „Odolese, tumen so hijen kraljija, oven gođale! Šunen o upozorenje, tumen so hijen sudije ki phuv! Daran ando Jehova, poštujinen le hem radosno služinen olese. Mothoven poštovanje e ćhavese te na holjani o Devel upro tumende hem te na meren ko tumaro drumo, sose ov šaj sigate te holjani. Bahtale tane sare kase ov tano than kuri šaj te garaven pe.“ O Jehova tano šukar hem dela e manušenđe dovoljno vreme te anen ispravno odluka. On pana šaj te menjinen pe hem te prihvatinen e Jehovasi vlast. Ama, na aćhilo lenđe pana but vreme (Is. 61:2). Akana tano but važno o manuša te šunen i šukar vest hem te odlučinen te služinen e Jehovase (w21.09 15-16 ¶8-9).

O apostol Pavle manglja te phenel so valjani te ova zadovoljna odoleja so isi amen (Fil. 4:12). I najvredno buti koja isi amen avdije tani amaro amalipe e Jehovaja, a na o materijalna buća (Avak. 3:17, 18). Te dikha so o Mojsije phenđa e Izraelcenđe palo odova so 40 berš hine ki pustinja. Ov phenđa: „O Jehova, tumaro Devel blagoslovinđa tumen ko sa so ćerđen... Akala 40 berš o Jehova, tumaro Devel, hine tumencar. Hine tumen sa“ (Pon. zak. 2:7). O Jehova 40 berš dinđa e Izraelcenđe mana. O šeja kola hine len pana ked ikljilje ando Egipat, na pharavdilje (Pon. zak. 8:3, 4). Avdije, o Jehova mangela hem amen te ova zadovoljna odoleja so isi amen, te cenina čak hem o tikne buća kola ov dela amen hem te dikha len sar blagoslov kova avela olestar (w22.01 5 ¶10-11).

Romalen, tumen hijen odgovorna te brininen tumen tumare porodicaće. Ked hijan ko problemija, šaj mislineja so kokri šaj te rešine len. Ama, ma oslonin tut upro tute. Umesto odova, molin tut e Jehovase te pomožini tut. Isto ađahar, celone vileja molin tut te romnjaja. Rode pomoć ando Jehova ađahar so ka proučine oleso Lafi hem amare publikacije hem ićer tut ko savetija kola o Devel dela tut. Avera šaj na ka složinen pe odoleja so ićereja tut ko savetija andi Biblija. Šaj ka phenen tuće so o materijalna buća šaj te zaštitinen hem tut hem te porodica. Ama, tegani setin tut ko primer ando kralj Josafat (2. Let. 20:1-30). Ov hine le poverenje ano Jehova hem odova mothovđa odoleja so ćerđa. Sar so o Jehova na aćhavđa e Josafate, ov sigurno so na ka aćhavi ni tut (Ps. 37:28; Jevr. 13:5; w21.11 15 ¶6; 16 ¶8).

O Devel ćerđa amen premali pi slika hem odolese niko amendar na mangela ked tano neko nepravedno premalo avera (Post. 1:26). Ama, sebepi so hijam nesavršena, amen šaj pogrešno te haljova disave buća iako mislinaja so sa đanaja. Setin tut sar o Jona holjanđa ked o Jehova odlučinđa te ovel milosrdno premalo manuša ki Niniva (Jona 3:10–4:1). Ama, so ulo sebepi odova? Prekalo 120 000 manuša aćhilje đivde! Sar so dikhaja, o Jona valjanđa averćhane te dikhel ko manuša, a na o Jehova. O Jehova nane dužno te objasnini e manušenđe sose anđa disavi odluka. Ćaće tano so o Jehova angleder mukhlja pe slugen te phenen so mislinena ando disave olese odluke (Post. 18:25; Jona 4:2, 3). Podijekh puti, ov objasninđa sose mangela diso te ćerel (Jona 4:10, 11). Ama, o Jehova na valjani te pućel amen angleder diso te ćerel ja palo odova (Is. 40:13, 14; 55:9; w22.02 3-4 ¶5-6).

Amen ponašinaja amen sar „najtikne“ ked averen dikhaja „sar pobare amendar“ (Fil. 2:3). Ked trudinaja amen te ovel amen asavko stav, tegani retko ka arakha amen ki situacija te povredina averen. Sa amare phralja hem phenja tane ko disavo način pošukar amendar. Nane pharo te dikha odova ked trudinaja amen te dikha olenge šukar osobine. Amen valjani te primenina o savet kova o apostol Pavle dinđa e hrišćanenđe ko Korint: „So ćerela tut pošukar ando aver? Hem so isi tut, a so na priminđan? A ako priminđan, sose hvalineja tut samći na priminđan?“ (1. Kor. 4:7). Amen niked na valjani te manga avera te vazden amen ja te mislina so hijam pošukar averendar. Na primer, ako jekh phral šaj te ićeri šukar govorija ja jekh phen šaj lokho te počmini biblijake kursija, on valjani te den i slava e Jehovase aso odova so ćerena (w21.06 22 ¶9-10).

But tano pharo te arakha e manušen ćhere. Disave objaviteljija živinena ko područja kuri našti te aven đi o manuša sose živinena ko zgrade kola tane phanle ja ko naselja kuri šaj pharo te avel pe đi o manuša. Odothe isi stražarija kola na mukhena e manušen te khuven andre ako neko ando stanarija na dozvolinđa lenđe. Ko disave thana, o objaviteljija na arakhena bute manušen ćhere ja isi len područja kaj živinena but hari manuša. Podijekh puti, on šaj valjanena but dur te putujinen te bi resena đi samo jekh manuš. A ked resena othe, ov nane ćhere. Ako hem tu isi tut asavke pharipa, na valjani te odustajine. Đa ko različito vreme. Amen ka arakha pobuter manušen ko amaro područje ako đaja ko vreme ked tane on ćhere. Ko krajo ando dive, svako mora te irini pe ko po ćher. But phralja hem phenja propovedinena palo pladne ja uveče sose tegani šaj te arakhen pobuter manušen ćhere. Tegani, o manuša tane spremna hem opuštena te vaćeren (w21.05 15 ¶5, 7).

Da li hem avdije dikhaja isto problemi? Ja. But manuša avdije tane holjame sose e Jehovase svedokija na slavinena olencar disave buća, sar soj tane o rođendanja ja o Božić. Avera tane holjame sose o Svedokija na učestvujinena ko disave državna praznikija ja na ićerena disave običaja aso parujbe sose i Biblija phenela soj tane pogrešna. On holjanena odolese so verujinena so olengo način sar služinena e Devlese tano ispravno. Ama, on našti te ugodinen e Devlese ako tane olenđe považna o tradicije, nego li odova so i Biblija sikavi (Mar. 7:8, 9). So šaj te pomožini amen te na našala amari vera? Amen valjani te barjaćera amaro mangipe premalo e Jehovase zakonija hem načelija (Ps. 119:97, 113, 163-165). Ako mangaja e Jehova, amen ka odbacina svako običaj kova nane pali olesi volja. Amen na ka mukha ništa te ovel amenđe považno ando amaro mangipe premalo Jehova (w21.05 6 ¶15-16).

Sar šaj te ićera amen ko akava savet kova dinđa o apostol Pavle? Amari vera valjani hem ponodri te ovel zorali ađahar so redovno ka proučina, često ka molina amen hem ka da sa amendar te ćera o zadatko kova o Jehova dinđa amen (2. Tim. 4:4). Ako isi amen zorali vera, tegani na ka daraven amen o lošna izveštaja kola šunaja (Is. 28:16). Amaro mangipe premalo Jehova, premalo oleso Lafi hem premalo phralja ka pomožini amen te na našala amari vera ked avera mukhena o ćaćipe. Ko prvo veko, but manuša odbacinđe e Isuse. Ama, ki aver strana, but manuša hem prihvatinđe le. Maškaro olende hine jekh član ando jevrejsko Sinedrion hem čak „but sveštenikija“ (Dela 6:7; Mat. 27:57-60; Mar. 15:43). Isto ađahar, hem avdije but manuša prihvatinđe e Isuse odolese so đanena hem mangena o ćaćipe kova sikljilje ando e Devleso Lafi. E Devleso Lafi phenela: „Baro mir isi len okola kola mangena to zakon, ništa našti te ćhivel len te spotakninen pe“ (Ps. 119:165; w21.05 13 ¶20-21).

O apostol Pavle hine svesno so sa so ćerđa ki e Jehovasi služba na ćerđa pe snagaja, nego e Devlese snagaja. O Jehova prekalo po sveti duh dinđa e Pavlese snaga te ćerel potpuno pi služba, iako hine progonimo, ko phanlipe hem hine le avera problemija kolencar borinđa pe. O Timotej, e Pavleso terno saradniko, isto ađahar uzdajinđa pe ko odova so o Jehova šaj te del le snaga te ćerel pi služba. Ov hine e Pavleja ko misionarska putovanja. Uzo odova, o Pavle bićhalđa le te posetini hem te ohrabrini e skupštinen (1. Kor. 4:17). O Timotej šaj mislinđa so nane sposobno aso odova zadatko. Odolese šaj o Pavle phenđa lese: „Nijekh manuš ma te mislini so na hijan vredno odolese so hijan terno“ (1. Tim. 4:12). Ko odova vreme, o Timotej hine le hem po problemi. Ov hine „često nabormo“ (1. Tim. 5:23). Ama, đanđa so e Jehovaso sveti duh šaj te del le snaga koja valjanđa lese te propovedini i šukar vest hem te služini pe phralenđe (2. Tim. 1:7; w21.05 21 ¶6-7).

O načelo kova pisini ki Jakovljeva 1:19 šaj but te pomožini okolese kova dela savet. O Jakov pisinđa: „Svako nek ovel sigutno te šunel, a pohari te vaćeri hem pohari te holjani.“ Jekh starešina šaj te mislini so sa đanela kotar odija osoba. Ama, da li tano odova ćaće ađahar? Ko Poslovice 18:13 pisini: „Ko vaćeri angleder te šunel, odova tano olese dilinipe hem lađaćeri kokri pes.“ Pošukar tano te puća e osoba sar tano olaće. Odova značini so valjani te šuna angleder diso te vaćera. Jekh starešina šaj te pućel: „So isi koro tute? Sar šaj te pomožinav tut?“ Ako o starešine odvojinena vreme te šunen kola problemija o phralja hem o phenja isi len, verovatno ka ohrabrinen len hem ka pomožinen len. Te šaj o starešine te den šukar savet, on na valjani samo te čitinen nekobor stihija ja te den disave predlogija. Amare phralja hem phenja valjani te osetinen so on brininena pe olendar, so haljona len hem so ćaće mangena te pomožinen lenđe (w22.02 17 ¶14-15).