Jun

Akale udovicako životi tano but pharo. Verovatno nane la ni dovoljno pare te ćinel pese o buća kola valjanena laće aso životi. Ama, ipak avela đi i kasa hem bizo te privucini averengi pažnja, oj ćhivela duj tikne novčićija kola verovatno jedva šunđona đi perena ki kasa. O Isus đanela so oj ćhivđa duj tikne novčićija, najtikne novčićija kola koristinđe pe ko odova vreme. Odova nane dovoljno te ćinel pe nijekh vrapco, kova hine jekh ando najjeftina ćiriklja aso habe. O Isus tano but oduševimo odoleja so ćerđa akija udovica. Odolese, vićini pe učenikonen te phenel lenđe odova. Ov phenela: „Akija ćorori udovica ćhivđa pobuter ando sa kola ćhivena pare ki kasica aso prilogija.“ Palo odova, ov phenela: „Sare [posebno o barvale] dinđe ando po viško, a oj ando po ćororipe dinđa sa so hine la aso životi“ (Mar. 12:43, 44). Ked akija verno udovica dinđa o zadnja pare kola hine la odova dive, oj tegani mukhlja po životi ko e Jehovase vasta (Ps. 26:3; w21.04 6 ¶17-18).

O Isus hine pozitivno ki služba hem manglja olese učenikija te oven pozitivna (Jov. 4:35, 36). Đi hine pe učenikonencar, on hine revna ki služba (Luka 10:1, 5-11, 17). Ama, ked astarđe e Isusese hem ked mudarđe le, olese učenikija jekh vreme našalđe pi želja te propovedinen (Jov. 16:32). Palo odova so uskrsninđa, o Isus podstakninđa len te den sa pestar ki služba. Ked đelo ko nebo, on hine odobor revna so olenge neprijateljija phenđe odova so pisini ko avdisutno stih. O Isus usmerinđa e prvo hrišćanen đi propovedinđe hem o Jehova blagoslovinđa len ađahar so but manuša prihvatinđe olengi poruka. Na primer, ki Pedesetnica ko 33. berš ki nevi era, krstinđe pe oko 3 000 manuša (Dela 2:41). Sar nakhlja o vreme, o broj ando učenikija sa pobuter barilo (Dela 6:7). Ama, o Isus prorekninđa so ko poslednja dive pana pobuter manuša ka prihvatinen o ćaćipe (Jov. 14:12; Dela 1:8; w21.05 14 ¶1-2).

Da li setineja tut ko vreme ked prvo puti upoznajinđan i istina? Mislinđan so sare ka mangen odova so tu sikljoveja. Hijan le uverimo so odova so sikljiljan andi Biblija šaj te pomožini averenđe te ovel len šukar životi akana, ama hem šukar nada asi budućnost (Ps. 119:105). Odolese, vaćerđan te amalenđe hem te familijaće odova so sikljiljan. Ama, so ulo? Iznenadinđan tut so but đene na manglje te šunen tut. Niko amendar na valjani te ovel iznenadimo ked avera na mangena te prihvatinen odova so propovedinaja. Ko e Isuseso vreme, but manuša na manglje te šunen, čak iako ov ćerđa čudija kolencar mothovđa so o Devel bićhalđa le. Na primer, o Isus uskrsninđa e Lazare. Odova hine jekh čudo kova hem o protivnikija dikhlje. Ama, o jevrejska vođe na verujinđe soj tano o Isus, o Mesija. Umesto odova, on čak manglje te mudaren hem e Isuse hem e Lazare (Jov. 11:47, 48, 53; 12:9-11; w21.05 2 ¶1-2).

De sa tutar te đa redovno ko sastankija. Uduri pošukar ka penđare te phralen hem te phenjen hem odova so šuneja ka ohrabrini tut. Rode amalen ki skupština kolendar šaj te sikljove, bizo obzir kobor berš isi len ja andi koja kultura avena. I Biblija podsetini amen soj tani i „mudrost maškaro phure manuša“ (Jov 12:12). Ama, hem o phure phralja hem phenja šaj but te sikljon ando terne. O David hine but poterno ando Jonatan, ama odova na ćhinavđa len te oven but paše amala (1. Sam. 18:1). On pomožinđe jekh jekhese te služinen e Jehovase ko phare okolnostija (1. Sam. 23:16-18). I phen, i Irina, koja tani jedino Svedoko ki pi porodica, phenela: „Ki skupština ćaće šaj te arakha amalen kola šaj te oven amenđe sar dada, daja, phralja hem phenja. O Jehova šaj prekalo lende te del amen odova so valjani amenđe.“ Te amala mangena te ohrabrinen tut hem te pomožinen tut, ama tu valjani te phene lenđe so mučini tut (w21.06 10-11 ¶9-11).

O Isus vaćerđa jekh poređenje ando jekh kralj hem ando oleso robo. O kralj oslobodinđa e robo ando baro dugo kova ov niked ne bi šaj te irini lese. Ama, kasnije odova robo na manglja te oslobodini jekhe avere robo ando jekh but potikno dugo. Ko krajo, o kralj ćhivđa akale nemilosrdno robo ko phanlipe. Odova so ćerđa o robo na povredinđa samo ole nego hem averen. Sar prvo, ov hine nemilosrdno premalo aver robo ked „dinđa te forden le ko phanlipe te ovel odothe sa đi na irini lese odova so dugujini lese.“ Sar dujto, avera robija hine povredime ked dikhlje so ćerđa. Ked „avera robija dikhlje so ulo, but hine tužna“ (Mat. 18:30, 31). Isto ađahar, odova so amen ćeraja utičini upro avera. So šaj te ovel ako neko povredini amen hem amen na mangaja te oprostina lese? Sar prvo, amen ole povredinaja ako na mangaja te oprostina lese, ako na obratinaja pažnja upro oleste hem ako na mothovaja lese mangipe. Sar dujto, avera ki skupština na osetinena pe šukar ked dikhena so amen na hijam ko mir odola osobaja (w21.06 22 ¶11-12).

Iako o manuša hine stvorime te oponašinen e Devle, o Beng mangela te rumini len. Ked ko e Nojese dive o Jehova „dikhlja so o manuša ki phuv hine but rumime... olese hine žao so stvorinđa e manušen ki phuv hem osetinđa dukh ko vilo“ (Post. 6:5, 6, fusn., 11). Da li o manuša tane avdije averćhane? Na! O Beng tano bahtalo ked dikhela so o nemoralna buća, maškaro jekh rom hem jekh romni ja maškaro duj murša ja duj đuvlja, o manuša prihvatinena sar diso normalno (Ef. 4:18, 19). Ov tano but bahtalo ked dikhela so o manuša kola služinena e Devlese ćerena greh. Ked o Beng vladini, odova na samo so anela lošnipe e manušese, već hem e phuvjaće hem e životinjenđe aso kola o Jehova phenđa te brinini pe (Prop. 8:9; Post. 1:28). O naučnikija phenena so aso nekobor berš pobuter ando milion vrste ando životinje hem biljke više na ka postojinen (w21.07 12 ¶13-14).

Disave e Devlese sluge, hem beršencar palo odova so pokajinđe pe, isi len osećaj andi krivica. Iako molinđe e Jehova te oprostini lenđe hem više na ćerena odova so angleder ćerđe, on pana mislinena so o Jehova niked na ka oprostini olenđe. Ako hem tu osetineja tut ađahar, but ka pomožini tut odova so đaneja so o Jehova tano spremno te mothovi po verno mangipe tuće hem so šaj radosno te služine lese hem te ovel tut čisto savest. Amen šaj te osetina amen ađahar, sebepi so „o rat olese Ćhaveso, e Isuseso, čistini amen ando svako greh“ (1. Jov. 1:7). Ako hijan obeshrabrimo odolese so ćerđan diso lošno, ma te bistre so o Jehova tano spremno te oprostini tuće ako ćaće kajineja tut. Dikh sar o psalmista David mothovđa so isi veza maškaro verno mangipe hem te oprostini pe. Ov pisinđa: „Sose kobor tano o nebo dur kotar i phuv, odobor tano baro oleso verno mangipe premalo okola so darana olestar. Kobor o istok tano dur ando zapad, odobor ov cidela amare prestupija amendar“ (Ps. 103:11, 12; w21.11 5-6 ¶12-13).

Jekh rom valjani te poštujini pe romnja (1. Petr. 3:7). Odova značini so samo olaće valjani te mothovi posebno pažnja. Na primer, o rom kova poštujini pe romnja, ka mothovi so oj tani but važno olese. Ov na ka rodel olatar pobuter nego so oj šaj te ćerel hem na ka uporedini la avere romnjencar. Ako jekh rom ćerela odova, sar ka osetini pe jekh romni? Amari phen, i Rosa doživinđa olako rom, kova nane e Jehovaso svedoko, but putija te uporedini la avere romnjencar. Olese gruba lafija but dukhavđe la hem ćhivđe la te mislini so ola niko našti te mangel. Oj phenela: „Stalno valjani kokri man te uverinav so o Jehova mangela man.“ Ama, o rom kova mangela e Jehova, poštujini pe romnja. Ov đanela so odova so ćerela utičini hem ko olengo brako hem ko oleso amalipe e Jehovaja. O rom kova poštujini pe romnja na ka vaćeri lošno olatar anglo avera manuša. Ka mothovi laće so mangela la hem ka pohvalini la (w21.07 22 ¶7-8).

Da li brinineja tut ked ađićereja disavo važno paketi, ama ov nisar te resel? Ama, so ako šunđan so isi šukar razlog sose o paketi pana na reslja? Tegani, verovatno ka ove strpljivo hem ka ađićere te resel. O lafija ando Poslovice 13:11 sikavena amen sose valjani te ova strpljiva. Odothe pisini: „O barvalipe kova sigate ćedela pe, sar đala o vreme ka našalđol, a o barvalipe kova ćedela pe hari pohari, ka ovel pana pobaro.“ So sikljovaja ando akava načelo? O manuš kova tano mudro na siđari ked diso ćerela, već tano strpljivo hem ćerela o buća hari pohari. Ko Poslovice 4:18 pisini: „Ama, o drumo ando pravednikija tano sar i svetlost koja avela sabale, koja svetlini sa pobuter đi na phravđola o dive.“ Akava stih mothovi so o Jehova hari pohari pomožini pe narodose te haljol so ov mangela te ćerel e phuvjaja hem e manušencar. Ama, akava stih mothovi hem sar olese sluge ćerena promene ko po životi hem sar ovena popaše oleja. Te šaj neko te ovel paše e Jehovaja, valjani vreme (w21.08 8 ¶1, 3-4).

Sar o krajo ando akava sveto avela sa popaše, isi amen pana pobari buti ki amari služba (Mat. 24:14; Luka 10:2; 1. Petr. 5:2). Sare amen mangaja te da amaro najšukar e Jehovase. But objaviteljija mangena pana pobuter te služinen e Jehovase. Disave isi len želja te oven pionirija. Avera mangena te služinen ko Betel ja ki gradnja. But phralja isi len cilj te služinen sar sluge pomoćnikija ja starešine (1. Tim. 3:1, 8). Kobor tano bahtalo o Jehova ked dikhela so oleso narodo mangela te služini lese! (Ps. 110:3). Ama, da li hijan obeshrabrimo sebepi so pana na ispuninđan te ciljija? Ako ja, vaćer odova e Jehovase (Ps. 37:5-7). Uzo odova, puć disave zrelo phralen sar šaj pana pošukar te ćere ti služba hem palo odova de sa tutar te primenine odova. Ako ćereja ađahar, jekh dive šaj ka ispunine te ciljija (w21.08 20 ¶1; 21 ¶4).

I Ana hine udovica hem služinđa sar proročica. Iako hine la 84 berš, oj „uvek đelji ko hram.“ Odolese, o Jehova blagoslovinđa la hem oj šaj hine te dikhel e Isuse ked hine beba (Luka 2:36-38). Ama, hem ko amaro vreme isi but phure phralja hem phenja kola tane šukar primer e ternenđe. Ako odvojinaja amaro vreme olenđe, ako pućaja len diso hem ako pažljivo šunaja đi vaćerena, olengo primer but ka ohrabrini amen. Amare phure phralja hem phenja tane but važna e Jehovase hem amenđe. But putija, on dikhlje sar o Jehova blagoslovini pi organizacija hem sar olen lično blagoslovini. Isto ađahar, on sikljilje but buća ando greške kola ćerđe angleder. On tane but mudra. Odolese, sikljov olendar (Posl. 18:4). Ako odvojineja to vreme šukar te penđare len, ti vera ka ovel pana pobari (w21.09 3 ¶4; 4 ¶7-8; 5 ¶11, 13).

Ćaće tano odova so o Isaija pisinđa, so e Jehovaso narodo ka koristini o „thud ando narodija“ (Is. 60:5, 16). O manuša kola prihvatinena o ćaćipe isi len različita sposobnostija, odolese i šukar vest ando Kraljevstvo propovedini pe ko prekalo 240 phuvja hem amari literatura ikljola ko prekalo 1 000 ćhibja. Ko akala poslednja dive, đi trajini o tresibe ando narodija, o manuša valjani te birinen da li ka podržinen e Devleso Kraljevstvo ja o manušikane vladavine. Sare amen valjani te birina ki kasi strana ka ova. Iako e Jehovase sluge poštujinena o zakonija ki phuv ki koja živinena, on tane neutralna hem na mešinena pe ki politika (Rimlj. 13:1-7). On đanena so jedino e Devleso Kraljevstvo ka rešini sa e manušenge problemija. Odova Kraljevstvo nane deo ando akava sveto (Jov. 18:36, 37; w21.09 17-18 ¶13-14).

Ked neko aćhavi e Jehova, but tano važno hem ponodri te ovel tut zorali vera hem te pomožine te porodicaće. Sar šaj te ćere odova? Svako dive čitin e Devleso Lafi hem hor razmislin ando odova so čitinđan. Isto ađahar, de sa tutar te ove redovno ko sastankija. Amari phen i Džoana, kaso dad hem i phen aćhavđe e Jehova, phenela: „Ked ki Biblija čitinava andi Avigeja, andi Jestira, ando Jov, ando Josif hem ando Isus, odova pomožini man te ovel man mir ko vilo. Olengo primer but ohrabrini man hem pomožini man hem ponodri te ovav bahtali.“ Ked hijan but tužno, ma ćhinav te moline tut e Jehovase. Rode ando Jehova te pomožini tut ki ti situacija te dikhe ađahar sar so ov dikhela hem „te pomožini tut te haljove o buća hem te sikavi tut kole drumoja valjani te đa“ (Ps. 32:6-8). Iako šaj te ovel pharo te phene e Jehovase sar ćaće osetineja tut, ov sigurno so ov haljola ti dukh. O Jehova phenela tuće te phrave lese to vilo (Izl. 34:6; Ps. 62:7; w21.09 28 ¶9-10).

Pali Pasha ko 32. berš ki nevi era, o apostolija, o Petar, o Jakov hem o Jovan dikhlje jekh but šuži vizija. Odija vizija mothovđa lenđe savi moć hem slava o Isus ka ovel le ko po Kraljevstvo. Ki Biblija pisini: „Oleso muj sjajinđa sar o kham, a olese šeja ulje blistava sar i svetlost“ (Mat. 17:1-4). O apostolija šunđe e Devle sar phenđa: „Akava tano mo manglo Ćhavo, kova tano pali mi volja. Ole šunen!“ Odoleja so ćerđe ko po životi, on mothovđe so šunđe e Isuse. Amen mangaja te ćera odova so on ćerđe. Amen hijam but zahvalna e Jehovase so prekalo Isus Hrist ov sikavi amen so te ćera (Ef. 5:23). Mangaja te šuna e Isuse, sar o Petar, o Jakov hem o Jovan. Sebepi odova, ka ova bahtale hem ka ovel amen bare blagoslovija (w21.12 22 ¶1; 27 ¶19).

Jekh hrišćanin ko Korint živinđa pe dadese romnjaja. O apostol Pavle phenđa e hrišćanenđe ko Korint so odova manuš valjani te ovel isključimo. Odova so ćerđa, lošno utičinđa upro avera ki skupština. Disave čak mislinđe so odova nane odobor baro greh (1. Kor. 5:1, 2, 13). Disavo vreme palo odova, o Pavle šunđa so odova manuš ćaće pokajinđa pe! Iako odova manuš lađaćerđa e skupština, o Pavle phenđa: „Spremno oprostinen lese hem utešinen le.“ O Pavle odova phenđa sose na manglja te „peravi le odija bari dukh.“ Ov hine saosećajno premalo leste. Na manglja i dukh odobor te peravi odole manuše so na ka ovel le snaga te rodel ando Jehova te oprostini lese (2. Kor. 2:5-8, 11). Sar o Jehova, hem o starešine mangena te mothoven soj tane milosrdna. On dena disiplina ked odova valjani, ama ko isto vreme tane milosrdna kobor god šaj. Ked o starešine na bi dena disciplina, on na bi mothovena soj tane milosrdna već soj tane popustljiva (w21.10 11-12 ¶12-15).

Ked neko povredini amen, odova tano sar ked isi amen jekh rana. Disave rane šaj te oven tikne, a disave bare. Na primer, ked ćeraja diso ki kuhinja šaj hari te ćhina amen. Odova šaj ćaće te dukhal, ama palo jekh ja duj dive ni na ka setina amen so ćhinđam amen. Isto ađahar, podijekh puti neko šaj hari te povredini amen. Na primer, amaro amal šaj te ćerel ja te phenel diso bizo te razmislini hem ađahar šaj te povredini amen. Tegani, šaj lokho nakhljam prekalo odova. Ama, podijekh puti i rana šaj te ovel but bari. Tegani, o doktori šaj ka valjani te sivel odova than hem te paćari i rana. Ako stalno zadinaja odija rana, oj na ka saćol hem pana pobuter ka dukhal amen. Diso slično šaj te ćerel hem o manuš kova tano but povredimo. Ov šaj stalno te mislini kobor tano olese pharo hem kobor avera povredinđe le. Ama, ađahar samo kokri pes povredini. But tano pošukar te ćerel odova so pisini ko avdisutno citati (w21.12 12 ¶15).

Zamislin so jekh starešina mangela te del savet jekhe phralese ja jekha phenjaće ando urajbe. Odova starešina šaj te pućel pe: „Da li isi man biblijako razlog te dav savet?“ Ov đanela so na valjani te vaćeri poklo lično mišljenje. Odolese, šaj te pućel avere starešina ja jekhe zrelo objavitelje so ov mislini. On šaj zajedno te dikhen kova savet o apostol Pavle dinđa ando urajbe (1. Tim. 2:9, 10). O apostol Pavle dinđa disave načelija kola mothovena so amaro urajbe valjani te ovel pristojno, skromno hem te na lađaćeri e Devle. Ama, ov na ćhivđa pravilija so neko šaj, a so našti te uravi. Ov đanđa so o phralja hem o phenja šaj te uraven odova so mangena sa đi odova tano premalo biblijake načelija. Odolese o starešine najangleder valjani te razmislinen da li o urajbe andi odija osoba mothovi soj tani skromno hem razborito. Na valjani te bistra so duj hrišćanija šaj te anen duj različita odluke hem odova na značini so jekhesi tani šukar, a averesi tani lošno. Na valjani te ćhiva averen te ćeren odova so amen mislinaja soj tano šukar (w22.02 16 ¶9-10).

Sose tano šukar te mothova verno mangipe jekh jekhese? Ko odova pućibe ka odgovorinen amenđe o lafija ando Poslovice. Odothe pisini: „Niked ma ćhinav te mothove mangipe hem vernost... Tegani hem o Devel hem o manuša ka mangen tut hem ka ove penđarutno sar razborito manuš“... „O šukar manuš ćerela šukaripe kokri pese“... „Ko god dela sa pestar te ćerel odova soj tano šukar hem te mothovi verno mangipe... ov ka dobini večno životi“ (Posl. 3:3, 4; 11:17, fusn.; 21:21). Ando akala lafija dikhaja trin razlogija sose valjani te mothova verno mangipe. Sar prvo, ked mothovaja verno mangipe, anglo e Devlese jaćha hijam but vredna. Sar dujto, ked mothovaja verno mangipe, odova tano aso amaro šukaripe. Na primer, isi amen but šukar amala. Sar trito, sebepi so mothovaja verno mangipe, amen ka ovel amen bare blagoslovija. Jekh olendar tano so ka živina večno. Ćaće isi amen but šukar razlogija „jekh jekhese te mothova verno mangipe hem milosrđe“ (w21.11 8 ¶1-2).

Ako o pharipa kola hine tut angleder ja kola isi tut akana, mothovena so ti vera nane odobor zorali, ma obeshrabrin tut. Dikh ko odova sar prilika te zorjaćere ti vera. Vilestar molin tut e Jehovase, posebno ked isi tut bare pharipa. De sa tutar te dikhe sar o Jehova pomožini tut prekali ti porodica hem prekalo te amala. Ked dikheja sar o Jehova pomožini tuće akana, ka ove sigurno so o Jehova ka pomožini tuće hem ko avera problemija kola ka ovel tut. O Isus pomožinđa pe učenikonenđe te dikhen kuri valjani lenđe pobari vera. Ov hine sigurno so o Jehova ka pomožini len te nakhen bilo kova pharipe kova ka ovel len (Jov. 14:1; 16:33). Ov hine sigurno so o baro mnoštvo ka preživini i bari nevolja sebepi so isi len zorali vera (Otkr. 7:9, 14). Tu ka ove jekh olendar ako uzi e Jehovasi pomoć akana ćereja sa so šaj te zorjaćere ti vera (Jevr. 10:39; w21.11 25 ¶18-19).

Avdije na ađićeraja o Jehova prekalo disavo čudo te arakhi amen. Ama, okola so isi len poverenje ko Jehova na ka doživinen nisavo lošnipe kova ka trajini zauvek. Pana hari, hem amen ka valjani te mothova kobor tano baro amaro poverenje ko Jehova. Ked o Gog ando Magog ja i koalicija ando narodija ka napadini e Devlese narodo, amen šaj ka mislina so ka mudaren amen. Tegani ka ovel potrebno te verujina so o Jehova šaj te spasini amen hem so ka ćerel odova. Olenđe amen ka dićhova sar o bakre bizo pastiri (Jezek. 38:10-12). Amen na ka ovel amen oružje hem na ka branina amen. Odolese, on ka mislinen so šaj lokho te pobedinen amen. Ama, on na ka đanen odova so amen đanaja, so but anđelija ka oven spremna te braninen amen. On na đanena odova sebepi so na verujinena ko Devel. Odova dive on ka oven but iznenadime sose e Devlese anđelija ka borinen pe amenđe (Otkr. 19:11, 14, 15; w22.01 6 ¶12-13).

Sa amare phralja hem phenja tane važna e Jehovase. Odolese, on valjani te oven važna hem amenđe. Valjani te da sa amendar te zaštitina len hem te brinina amen olendar. Ako primetinaja so nekas povredinđam, amen na valjani te ćera amen ka phene ništa na ulo hem te mislina so odija osoba na valjani te ovel odobor osetljivo hem so valjani te bistrel odova so ulo. Sose neko šaj te uvredini pe? Sebepi o okolnostija kuri barilje, disave phralja hem phenja mislinena so na vredinena. A okola kola tane neve ko ćaćipe šaj pana na sikljilje so valjani te oprostinen averenđe ked grešinena. Bizo obzir so amen povredinđa ja so averen povredinđa, amen valjani te da sa amendar palem te ovel mir maškaro amende. Ki aver strana, ako neko stalno uvredini pe valjani te haljol so mora te del sa pestar te na ovel odobor osetljivo. Tegani ka ovel poradosno hem ka ovel le mir pe phralencar (w21.06 21 ¶7).

O Isus haljola sar tano amenđe. Ked isi amen disavo pharipe, but tano šukar ked uzo amende tano amaro šukar amal, posebno ako hem ov nakhlja disave slična buća. O Isus tano asavko amal. Ov đanela sar tano tuće ked isi tut pharipa hem ked valjani tuće pomoć. Ov haljola amare slabostija hem ka pomožini amen ko pravo vreme (Jevr. 4:15, 16). Ked e Isusese hine pharo, o Jehova bićhalđa jekhe anđele te zorjaćeri le. Isto ađahar, o Jehova mangela hem amenđe te pomožini prekalo publikacije, videa, govorija, starešine ja avera phralja hem phenja (Luka 22:39-44). O Jehova ka del amen mir. Ked molinaja amen, dobinaja mir „kova tano upreder odova so o manuš šaj te haljol“ (Fil. 4:6, 7; w22.01 18-19 ¶17-19).

O Jehova uvek ćerela odova soj tano najšukar. Ama, šaj te ovel amenđe pharo te ovel amen poverenje upro okola kas o Jehova ćhivđa te predvodinen ki phuv. Podijekh puti šaj pućaja amen da li odola phralja ćaće ćerena premalo Jehovase smernice ja ćerena odova so on mangena. O Jehova isi le poverenje upro okola kas ćhivđa te predvodinen ki olesi organizacija hem ki skupština. Ako nane amen poverenje ko akala manuša, našti te phena so isi amen poverenje ko Jehova. Avdije, o Jehova vodini pi organizacija ki phuv prekalo „verno hem razborito robo“ (Mat. 24:45). Sar o vodeće telo ko prvo veko, akava robo brinini pe ando Devleso narodo ki celo phuv hem dela smernice e starešinenđe ko sa o skupštine. Palo odova, o starešine dena odola smernice e phralenđe ki skupština. Ked šunaja o smernice kola dobinaja prekali Jehovasi organizacija hem prekalo starešine, amen mothovaja so isi amen poverenje ko Jehova (w22.02 4 ¶7-8).

Amen hijam but bahtale so hijam e Jehovase svedokija. But bahtale hijam ked šaj te pomožina nekase ko isi le „ispravno stav premalo večno životi“ te ovel e Isuseso učenik (Dela 13:48). Osetinaja amen sar o Isus kova hine but bahtalo ked olese učenikija irinđe pe andi služba hem ked phenđe lese so hine len but šuže iskustvija (Luka 10:1, 17, 21). O apostol Pavle phenđa e Timotejese: „Pazin šukar sar živineja hem sar sikaveja... sose ked ćereja odova ka spasine hem tut hem okolen so šunena tut“ (1. Tim. 4:16). Amari služba šaj te spasini e manušengo životi. Amen birinđam o Devel te ovel amaro vladari hem odolese pazinaja sar živinaja. Na mangaja te lađaćera e Devleso anav odoleja so ćeraja hem ićeraja amen ko odova so sikavaja averen (Fil. 1:27). Amen mothovaja so pazinaja sar sikavaja ađahar so šukar pripreminaja amen asi služba hem angleder te đa ki služba molinaja e Jehova te pomožini amen (w21.10 24 ¶1-2).

I osoba koja uravi i „nevi ličnost“ razmislini sar o Jehova hem ćerela o buća sar oleste. Ako mukhela e Devleso sveti duh te vodini la, oj ka ovel la o osobine ando sveti duh. Na primer, asavki osoba mangela e Jehova hem olese narodo (Mat. 22:36-39). Oj tani radosno čak iako isi la pharipa (Jak. 1:2-4). Dela sa pestar te ćerel mir (Mat. 5:9). Oj tani strpljivo hem ljubazno averencar (Kol. 3:13). Uzo odova so mangela odova soj tano šukar, oj hem ćerela odova (Luka 6:35). O buća kola ćerela ko po životi mothovi so isi la zorali vera ko Jehova (Jak. 2:18). Ked avera holjanćerena la, oj tani blago hem mothovi samokontrola (1. Kor. 9:25, 27; Titu 3:2). Te šaj te urava i nevi ličnost, valjani te barjaćera sa o osobine kola pominena pe ko Galatima 5:22, 23 hem ko avera stihija (w22.03 8-9 ¶3-4).

O starešine šaj te oven sar o apostol Pavle na samo ked propovedinena kotar ćher ko ćher, već hem ked koristinena svako prilika te propovedinen (Ef. 6:14, 15). Sar o Pavle, ked tane ki služba o starešine šaj te koristinen po vreme te sikaven averen hem e phralen kola služinena sar sluge pomoćnikija sar šaj pana pošukar te propovedinen hem te oven pana pošukar učiteljija (1. Petr. 5:1, 2). Ama, o starešine niked na valjani te prihvatinen odobor odgovornostija ki skupština ja ki pokrajina hem sebepi odova te na ovel len vreme asi služba (Mat. 28:19, 20). Te šaj te ovel len vreme aso sa o buća, podijekh puti on valjani te đanen ked na valjani te prihvatinen disave odgovornostija. Ako razmislinena hem molinena pe, šaj ka haljon so ako ka prihvatinen disave odgovornostija na ka ovel len vreme aso najvažna buća, sar soj tane te ovel len porodično proučibe, redovno te propovedinen hem te sikaven pe ćhaven sar te propovedinen. Disavenđe tano pharo te odbinen disave odgovornostija, ama on šaj te oven sigurna so o Jehova haljola so on mangena te ćeren pe odgovornostija najšukar so šaj (w22.03 27 ¶4, 7; 28 ¶8).

Da li setineja tut sar osetinđan tut ked razmislinđan odolestar te ove e Jehovaso svedoko? Možda mislinđan so niked na ka propovedine kotar ćher ko ćher. Šaj darandiljan so ti porodica ja te amala ka protivinen pe tuće. Ako iked osetinđan tut ađahar, šaj te haljove sar osetini pe to studenti. O Isus phenđa so disave manuša šaj ka daran. Ama, ov podstakninđa pe učenikonen te na dozvolinen i dar te ćhinavi len te služinen e Jehovase (Mat. 10:16, 17, 27). Hari pohari sikav te studente te propovedini. E Isusese učenikija šaj darandilje ked ov bićhalđa len te propovedinen. Ama, o Isus pomožinđa len ađahar so phenđa lenđe kaj te propovedinen hem sostar te vaćeren (Mat. 10:5-7). Sar šaj tu te oponašine e Isuse? Pomožin te studentese te dikhel ked šaj te propovedini. Na primer, puć le da li đanela nekas kase posebno ka značini disavo konkretno ćaćipe andi Biblija. Palo odova, pomožin lese te spremini so ka vaćeri, ađahar so ka mothove lese sar ko jednostavno način te vaćeri ando ćaćipe (w21.06 6 ¶15-16).

„Aso nekobor minutija, o prodavnice hem o purane zgrade počminđe te peren.“ „O manuša but darandilje... But olendar phenđe so odova trajinđa samo nekobor minutija. Maje dićhilo so niked na ka ćhinavđol.“ Akala lafija phenđe disave manuša kola preživinđe o zemljotres, ko Nepal, kova hine ko 2015. berš. O tresibe kova amen akana doživinaja tresini e manušen ko celo sveto. O prorok Agej pisinđa: „Sose ađahar phenela o Jehova, o Komandanti upro sa o vojske: ’Pana jekh puti, hem odova pana hari ka ćerav, ka tresinav o nebo hem i phuv‘“ (Ag. 2:6). O tresibe ando kova o Agej vaćeri na odnosini pe ko doslovno zemljotres, palo kova tano sa uništimo. Akava tresibe anela diso šukar. Kokri o Jehova phenela: „Ka tresinav sa e narodon hem ka ćedel pe o blago ando sa o narodija hem akava ćher ka pherav slavaja“ (w21.09 14 ¶1-3).

Ked mangeja nekasa te ove amal, tu često vaćereja oleja hem pheneja lese sostar razmislineja. Ađahar tano hem ked mangeja te ove amal e Jehovaja. Ked ki molitva vaćereja lese sar osetineja tut, sostar razmislineja hem so brinini tut ađahar mothoveja so isi tut poverenje upro leste hem so đaneja so ov mangela tut (Ps. 94:17-19; 1. Jov. 5:14, 15). Družin tut e zrelo phralencar, sose on tane sar poklon ando Jehova (Jak. 1:17). Amaro nebesko Dad mothovi so ćaće brinini pe amendar sose dinđa amen phralen hem phenjen ki skupština kola „uvek mothovena mangipe“ (Posl. 17:17). Ko lil kova pisinđa e Koloskonenđe o apostol Pavle pominđa disave hrišćanen kola pomožinđe lese hem kola but utešinđe le (Kol. 4:10, 11). Čak hem e Isusese valjanđa pomoć. Odolese, hine zahvalno asi pomoć koja dobinđa hem ando anđelija hem ando manuša (Luka 22:43). Ked amen vaćeraja jekhe zrelo amaleja ando amare problemija, odova na značini so amari vera nane zorali. Odova šaj but te zaštitini amen (w21.04 24-25 ¶14-16).

So valjani te ćere ako neko but povredinđa tut? De sa tutar te arakhe o mir. Vaćer e Jehovase sar osetineja tut. Molin le te blagoslovini odole osoba koja povredinđa tut hem te pomožini tut koro late te dikhe o šukar osobine – odola osobine sebepi kola o Jehova mangela la (Luka 6:28). Ako našti te oprostine te phralese, razmislin kova tano najšukar način te vaćere oleja. Uvek tano najšukar te misline so to phral niked ne bi namerno povredini tut (Mat. 5:23, 24). Ked vaćereja oleja, mothov lese so verujineja so na hine le lošno namera. A so ako ov na mangela te pomirinen tumen? Tegani, valjani te „podnosina jekh jekhe“. De le vreme, ma vazde te vasta olestar (Kol. 3:13). Soj tano najvažno, ma ićer i holi ano tute sose odova šaj te rumini to amalipe e Jehovaja. Niked ma dozvolin nisose hem nikase te spotaknini tut. Ako ćereja odova, ka mothove so mangeja e Jehova pobuter ando bilo so aver (Ps. 119:165; w21.06 23 ¶15).