Jul

O isključenje tano način sar o Jehova mothovi po mangipe. Ađahar, ov pomožini okolese kova grešinđa, ama hem štitini celona skupština. Ked tano neko isključimo, disave amare phralja hem phenja šaj te phenen so o starešine na anđe šukar odluka. Ama, ma bistri so on obično na mangena te phenen o lošna buća kola odija osoba ćerđa. Amen na đanaja sa so ulo. Odolese, mudro tano te ovel amen poverenje upro starešine, sose on ićerena pe ko e biblijake načelija hem sudinena „ko e Jehovaso anav“ (2. Let. 19:6). Ked podržinaja e starešinengi odluka, ađahar pomožinaja odola osobaće te irini pe e Jehovase. „Hine amenđe but pharo te na ovel amen nisavo kontakt amare ćhaveja“, phenela i Elizabeta. „Ama ked irinđa pe e Jehovase, ov phenđa so hine šukar odova so hine isključimo. Kasnije, ov kokri phenđa soj tano zahvalno aso buća kola sikljilo. Haljiljum so e Jehovasi disciplina tani uvek aso amaro šukaripe“ (w21.09 28-29 ¶11-12).

Razmislin andi odija udovica. Oj bi sigurno mangela te del pobuter e Jehovase. Ama, oj dinđa e Jehovase sa so hine la, dinđa le poklo najšukar. O Isus đanđa so o prilog kova dinđa i udovica hine but dragoceno anglo olese Dadese jaćha. Ando akava sikljovaja jekh važno buti: O Jehova tano zadovoljno amencar ked daja olese amaro najšukar, a odija tani amari služba celone vileja hem celona dušaja (Mat. 22:37; Kol. 3:23). O Jehova tano bahtalo ked dikhela so amen ćeraja sa so šaj ki služba. Odova načelo odnosini pe ko vreme hem ki snaga kola daja e Jehovase, na primer ked đaja ki služba hem ked učestvujinaja ko sastankija. Sar šaj te primenine odova so sikljiljan ando akava izveštaj? Pokušin te razmisline ando disavo phral ja andi disavi phen kolen šaj te ohrabrine ađahar so ka phene lenđe so o Jehova cenini olengo trud. Šaj jekh phuri phen osetini pe so više nane korisno odolese soj tani nabormi hem so nane la snaga te ćerel ki služba e Jehovase odova so šajinđa angleder (w21.04 6 ¶17, 19-20).

O Jehova đanela ked tano najšukar vreme te cidel sa o lošnipa kola isi ki phuv. Sebepi soj tano strpljivo, but manuša penđarđe le hem služinena lese. Olenđe tano drago so o Jehova tano odobor strpljivo sose hine len prilika te bijanđon, te sikljon olestar hem te predajinen po životi olese. Ked o Jehova ka nagradini sa odole manušen, tegani ka mothovi pe so hine šukar so o Jehova hine strpljivo sa akava vreme. Ov aćhilo bahtalo, iako o Beng ćerela pharipa ki phuv (1. Tim. 1:11). Hem amen šaj te aćhova radosna đi strpljivo ađićeraja o Jehova te posvetini po anav, te mothovi so isi le pravo te vladini, te cidel sa o lošnipa hem te ćhinavi sa amare problemija. Nek odova so amaro nebesko Dad tano istrajno, dela tut snaga hem tu te aćhove istrajno đi o krajo (w21.07 13 ¶18-19).

But manuša ko prvo veko na verujinđe ko Isus. Olenđe ov hine samo jekhe stolareso ćhavo. Ov hine ando Nazaret, a but đene mislinđe so odija diz na hine odobor važno. Odova mislinđa čak hem o Natanailo kova ulo e Isuseso učeniko. Ov phenđa: „Da li šaj diso šukar te avel ando Nazaret?“ Ov šaj hine le ki godi o proročanstvo ando Mihej 5:2, premalo kova o Mesija valjanđa te bijanđol ko Vitlejem, a na ko Nazaret. O prorok Isaija phenđa so e Isusese neprijateljija na ka obratinen pažnja ko detaljija ando e Mesijaso životi (Is. 53:8). Ako bi o manuša ko e Isuseso vreme istražinena odova, on bi haljona so o Isus hine bijando ko Vitlejem hem hine potomko ando kralj David (Luka 2:4-7). Znači, o Isus bijandilo ko than kova hine prorokujimo ko Mihej 5:2. Tegani, so hine o problemi? O manuša sigate anđe o zaključko. Na lelje ko obzir sa o činjenice. Odolese, on odbacinđe e Isuse (w21.05 2-3 ¶4-6).

I Biblija na vaćeri samo ando manuša kola na prihvatinđe o savet, već hem okolendar kola hine blagoslovime sebepi so prihvatinđe o savet. Te dikha o primer ando Jov. Iako manglja e Devle hem dinđa sa pestar te šunel le, ov na hine savršeno. Ked hine ko bare problemija, phenđa diso so hine pogrešno. Sebepi odova, dobinđa savet ando Elijuj hem ando Jehova. Sar o Jov reagujinđa? Ov hine ponizno hem prihvatinđa o savet. Ov phenđa: „Me vaćerđum, ama na haljiljum . . . Odolese cidava mo lafi hem kajinava man ko praho hem ko pepeo.“ O Jehova blagoslovinđa e Jove sebepi so hine ponizno (Jov 42:3-6, 12-17). O Jov mothovđa soj tano ponizno ađahar so prihvatinđa o savet ando Elijuj, iako ov hine but poterno olestar (Jov 32:6, 7). I poniznost hem amenđe ka pomožini te prihvatina o savet, čak iako mislinaja so odova savet na valjani amenđe ja ked okova kova dela amen savet tano but poterno amendar. Sare amen valjani te ćera ko amare osobine hem ko odova te ova pana pošukar ki služba (w22.02 11 ¶8; 12 ¶12).

Sare isi amen odgovornost ki skupština te ovel mir hem te mothova mangipe jekh premalo jekheste. Ako odova ćeraja, niko na ka osetini pe usamljeno. Odova so ćeraja hem so phenaja šaj ćaće te ohrabrini averen. So šaj te ćere te bi pomožineja okolenđe kasi porodica nane ko ćaćipe te osetinen pe soj tane deo andi skupština? Trudin tut te ove amal okolencar kola tane neve ki skupština. Ki početka, amen valjani vilestar te dočekujina okolen kola tane neve ki skupština (Rimlj. 15:7). Ama, amen mangaja te ćera pana diso. Na mangaja samo te pozdravina len već mangaja te ova paše amala olencar. Odolese, ov ljubazno hem mothov so ćaće brinineja tut ando neve ki skupština. Pokušin te haljove kole problemencar borinena pe, ama pazin te na khuve ki olengi privatnost. Disavenđe šaj te ovel pharo te phenen sar osetinena pe, odolese ma ćhiv len zorjeja te vaćeren tuvaja. Umesto odova, ov taktično đi pućeja len diso hem pažljivo šun len đi vaćerena. Na primer, šaj te puće len sar upoznajinđe o ćaćipe (w21.06 11 ¶13-14).

Amen hijam but zahvalna so šaj te služina e Jehovase amare phralencar hem phenjencar sar „jekh stado jekhe pastireja“. Ki knjiga Organizovano izvršavajmo Jehovinu volju ki 165. strana pisini: „Amen uljam deo ando odova ujedinimo narodo. Sigurno hijam bahtale sebepi odova, ama šukar tano te na bistra so svako amendar isi le odgovornost te arakhi odova jekhipe.“ Odolese valjani te trudina amen „upro amare phralja hem phenja te dikha ađahar sar so dikhela o Jehova.“ E Jehovase sare amen hijam but vredna. Da li hem tu dikheja ađahar te phralen hem te phenjen? O Jehova dikhela hem cenini sa so ćereja te bi pomožineja te phralenđe hem te bi brinineja tut olendar (Mat. 10:42). Amen mangaja amare phralen hem phenjen. Odolese, hijam odlučna te na povredina len (Rimlj. 14:13). Amen upro amare phralja hem phenja dikhaja sar pobare amendar hem ando vilo oprostinaja lenđe. Na ka dozvolina avera te spotakninen amen. Umesto odova, amen hijam odlučna „te da sa amendar te ćera mir hem te zorjaćera jekh jekhe“ (Rimlj. 14:19; w21.06 24 ¶16-17).

Ako proučinaja hem ako primeninaja o savetija kola dobinaja prekalo e Devleso Lafi hem prekali e Devlesi organizacija, hari pohari ka barjaćera o osobine kola isi le o Hrist. Isto ađahar, pana pošukar ka penđara e Devle. O Isus koristinđa o primer ando tikno seme te šaj te objasnini sar o seme ando ćaćipe hari pohari barjola ko e manušeso vilo. Ov phenđa: „O seme niconi hem barjola, a ov ni na đanela sar. I phuv kokri pestar anela plod – prvo i stabljika, palo odova o klaso ando điv hem ko krajo o zrno kova tano zrelo“ (Mar. 4:27, 28). Sar so i biljka barjola hari pohari, isto ađahar valjani vreme te šaj jekh manuš te menjini pe. Na primer, ked o manuš kova proučini i Biblija ovela popaše e Jehovaja, amen šaj te dikha sar ov hari pohari menjini pe (Ef. 4:22-24). Ama, na valjani te bistra so o Jehova tano okova kova dela odova tikno seme te barjol (w21.08 8-9 ¶4-5).

Amen šaj te ova bahtale. O manuš kova uživini „ko odova so šaj te dikhel pe jaćhencar“ tano zadovoljno odoleja so već isi le akana. Ki aver strana, o manuš kova mangela o buća kola našti te ovel le, niked na ka ovel bahtalo. So sikljovaja? Ako mangaja te ova bahtale, valjani te ćhiva amenđe ciljija kola šaj te ispunina. Da li ćaće šaj te ova zadovoljna odoleja so već akana isi amen? But manuša mislinena so našti, sose amen uvek mangaja te ćera neve buća. Ama, šaj te ova zadovoljna odoleja so već avdije isi amen. Sar šaj odova te ćera? O odgovor tano ko Isuseso poređenje kotar talantija, kova pisini ko Matej 25:14-30. Ando akava poređenje šaj te sikljova sar šaj te ova bahtale sebepi odova so isi amen (w21.08 21 ¶5-6).

O Jehova but brinini pe ando okola „kola tane phage vileja hem kola tane obeshrabrime.“ Na valjani te ađićera samo o starešine te pomožinen akale phralenđe hem phenjenđe. Odova šaj hem amen te ćera, ađahar so ka brinina amen olendar. O Jehova mangela te mothova lenđe so but mangaja len (Posl. 19:17). Isto ađahar, šaj te pomožina amare phralenđe hem phenjenđe ađahar so ka ova ponizna hem so na ka hvalina amen odoleja so amen đanaja te ćera. Tegani na ka ćhiva averen te oven ljubomorna upro amende. Umesto odova, amare sposobnostija hem amaro đandipe ka koristina te zorjaćera jekh jekhe (1. Petr. 4:10, 11). Amen šaj but te sikljova sar valjani te ponašina amen premalo avera ako razmislinaja sar o Isus ponašinđa pe premalo pe učenikija. Iako hine najbaro manuš kova živinđa ki phuv, ov hine „blago hem ponizno ko vilo“ (Mat. 11:28-30). Ked sikavđa e manušen, ov koristinđa o poređenja kola o ponizna manuša šaj hine lokho te haljon. Olese lafija pašljilje e manušenđe ko vilo (Luka 10:21; w21.07 23 ¶11-12).

Trudin tut te vaćere e phure phralencar hem e phenjencar. On šaj na dikhena odobor šukar ja šaj pohari phirena ja vaćerena, ama on tane terne ko vilo hem isi len „šukar anav“ anglo Jehova (Prop. 7:1). Ma bistri so on tane e Jehovase but vredna. Odolese hem ponodri mothov so poštujineja len. Ov sar o Jelisej. Ked alo o vreme o Ilija te đal, o Jelisej trin putija phenđa: „Na ka aćhavav tut“ (2. Kralj. 2:2, 4, 6). Mothov so brinineja tut kotar o phure phralja hem phenja ađahar so ka vaćere olencar (Posl. 1:5; 20:5; 1. Tim. 5:1, 2). Na primer, šaj te puće len: „Ked hijan le poterno, so uverinđa tut so arakhljan o ćaćipe? Sar odova so nakhljan ko to životi pomožinđa tuće te ove pana popaše e Jehovaja? So pomožinđa tuće te aćhove bahtalo ki služba?“ (1. Tim. 6:6-8). Palo odova, pažljivo šun len (w21.09 5 ¶14; 7 ¶15).

Ked daja sa amendar te ićera amen ki zapovest te propovedina hem te ćera učenikonen, amen mothovaja kobor tano baro amaro mangipe premalo Jehova (1. Jov. 5:3). Razmislin akalestar: O mangipe premalo Jehova podstakninđa tut te propovedine kotar ćher ko ćher. Da li hine tuće lokho te šune akija zapovest? Verovatno na. Sar osetinđan tut ked prvo puti propovedinđan kotar ćher ko ćher? Sigurno hine tut bari trema. Ama, tu đanđan so o Isus rodela tutar te ćere odova hem ićerđan tut ki odija zapovest. Sar nakhlja o vreme, tuće hine sa polokho te propovedine kotar ćher ko ćher. Ama, sar osetineja tut ked valjani te proučine i Biblija nekasa? Da li isi tut bari trema? Ako tano ađahar, molin tut e Jehovase, hem ov ka del tut hrabrost te puće nekas te proučini i Biblija. O Jehova ka pomožini tut ađahar so ka zorjaćeri ti želja te ćere učenikonen (w21.07 3 ¶7).

O robija ko purano vreme hine len znak te šaj te đanel pe koj tano olengo gospodari. Isto ađahar, ando sare ađićeri pe te mothoven ki kasi strana tane. O način sar razmislinena hem odova so ćerena ka mothovi kas podržinena. Da li amen ka prihvatina o žig hem ka podržina e manušenge vlastija? Okola kola na mangena te priminen o žig ka ovel len pharipa hem olengo životi ka ovel ki opasnost. Ki knjiga Otkrivenje pisini: „Niko našti ni te ćinel ni te biknel, osim okova kova isi le žig“ (Otkr. 13:17). Ama, e Devlese sluge đanena so ka ćerel o Devel okolenđe kola isi len o žig ando kova vaćeri pe ko Otkrivenje 14:9, 10. Umesto te prihvatinen odova žig, on ko po vas simbolično ka pisinen: „Me hijum e Jehovaso“ (Is. 44:5). Akana tano o vreme te trudina amen te ovel amen pana pobari vera. Tegani, o Jehova ka ovel bahtalo te phenel so hijam olese (w21.09 18 ¶15-16).

Te šaj te ćera amari služba, amenđe šaj avera but te pomožinen. O apostol Pavle sikavđa e Timoteje sar te propovedini hem te sikavi averen. Palo odova, ohrabrinđa e Timoteje te pomožini averenđe (1. Kor. 4:17). Sar o Timotej, hem amen šaj te sikljova ando iskusna objaviteljija. Isto ađahar, amen valjani te molina e Jehova te pomožini amen. Svako puti ked đaja ki služba, molin tut e Jehovase. Bizo oleso sveti duh amen našti ništa te ćera (Ps. 127:1; Luka 11:13). Ked molineja tut e Jehovase te pomožini tut, ov konkretno ko te molitve. Na primer, šaj te moline e Jehova te usmerini tut đi i osoba koja ćaće mangela te sikljol olestar hem koja tani spremno te šunel le. Uzo odova, valjani te odvojina vreme lično te proučina. E Devleso Lafi phenela: „Uverinen tumen soj tani e Devlesi volja – soj tano šukar, prihvatljivo olese hem savršeno“ (Rimlj. 12:2). So pobuter hijam uverime ko odova so đanaja o ćaćipe ando Devel, ka ovel amen sa pobaro uverenje đi vaćeraja e manušencar ki služba (w21.05 18 ¶14-16).

So ako proučineja nekasa ko na ćerela promene ko po životi, iako but trudineja tut hem molineja tut e Jehovase te pomožini lese? Hem so ako valjani te ćhinave o kurs? Ja so ako niked na proučinđan nekasa ko reslja đi o krštenje? Da li valjani te misline so tu hijan krivo hem so o Jehova nane zadovoljno odoleja so ćereja? So mothovi so amari služba tani uspešno? O Jehova dikhela to trud hem ti istrajnost. Anglo e Jehovase jaćha amari služba tani uspešno ked revno propovedinaja, odolese so mangaja le, čak iako o manuša na mangena te šunen amen. O Pavle phenđa: „O Devel nane nepravedno te bistrel odova so ćerđen hem o mangipe kova mothovđen premalo oleso anav, ađahar so služinđen okolenđe kola tane sveta hem so pana služinena olenđe“ (Jevr. 6:10). Odova so o Pavle pisinđa ko avdisutno stiho e hrišćanenđe ko Korint odnosini pe hem upro tute (w21.10 25 ¶4-6).

Kobor o Isus hine šukar manuš hem kobor baro mangipe hine le, dikhlja pe ko odova sar ponašinđa pe pekle učenikonencar. Ov đanđa so isi len različita sposobnostija hem okolnostija. Odolese đanđa so našti sare te ovel len ista odgovornostija, niti šaj te ćeren ista buća ki služba. Ama, ov ceninđa odova so on dinđe poklo najšukar. Kobor o Isus haljilo len, dićhilo ked vaćerđa i priča ando talantija. Ki odija priča, o gospodari dinđa svakone robese odobor buti kobor ov šaj te ćerel. Duj robija ćerđe sa so šaj hem hine but bućarne. Iako jekh olendar ćerđa pobuter nego okova aver, o gospodari pohvalinđa soldujen, isto lafencar: „Tu kova hijan šukar hem verno robo, but šukar ćerđan!“ (Mat. 25:14-23). O Isus tano šukar premalo amende hem uvek mothovi so mangela amen. Ov đanela so amare sposobnostija hem okolnostija razlikujinena pe. But tano bahtalo ked daja amaro najšukar đi služinaja e Jehovase. Amen valjani te ponašina amen premalo avera sar o Isus (w21.07 23 ¶12-14).

O David na hine uvek milosrdno. Na primer, ked o Naval vređinđa le hem na dinđa lese hem olese manušenđe diso hajbase, o David odobor holjanđa so manglja te đal te mudari hem ole hem sa olese ćherutnen. Ama, e Navalesi romni, i Avigeja, koja hine šukar hem strpljivo, legarđa e Davidese but buća hajbase. Ađahar, ćhinavđa e Davide te mudari e Navale hem olese manušen (1. Sam. 25:9-22, 32-35). Zapazin so ked o David hine holjamo, ov manglja te mudari hem e Navale hem sa olese ćherutnen. Isto ađahar, phenđa so o manuš kova ćorđa e bakre andi Natanesi priča valjani te merel. Ama, o David hine but šukar manuš. Tegani, sose odobor strogo osudinđa odole manuše? Razmislin so tegani desinđa pe ko e Davideso životi. Ko odova vreme, olesi savest na hine čisto. Ako tano neko strogo premalo avera, odova mothovi so oleso amalipe e Jehovaja nane zoralo (w21.10 12 ¶17-18; 13 ¶20).

Kotar lafija ando avdisutno citati, sikljovaja so amen šaj te oponašina e Jehova, kastar i svetost avela. Amen valjani te ova sveta ko sa so ćeraja. Sebepi so hijam nesavršena, šaj mislinaja so amen našti te ova sveta. O apostol Petar ćerđa disave greške ko po životi, ama oleso primer mothovi so amen šaj te ova sveta. Ked šunena o lafi „sveto“ bute manušenđe ki godi avela neko ko niked na asala, ko uravi pe averćhane averendar hem koj tano but ozbiljno. Ama, odova nane ađahar. I Biblija vaćeri so o Jehova, kova tano sveto, tano „bahtalo Devel“ (1. Tim. 1:11). Isto ađahar, hem okola so služinena lese tane bahtale (Ps. 144:15). Ked hine ki phuv, o Isus osudinđa okolen so uravđe pe averćhane averendar hem kola ćerđe šukar buća samo te dikhen len avera manuša (Mat. 6:1; Mar. 12:38). I Biblija šaj te pomožini amen te haljova soj tani svetost. Uverime hijam so o Devel kova but mangela amen niked na bi rodela amendar diso so amen našti te ćera (w21.12 2 ¶1, 3).

O Jehova dinđa amen but poklonija. Najbaro olendar tano odova so šaj te služina olese. Amen mothovaja so mangaja e Jehova ađahar so „ićeraja amen ko olese zapovestija“ (1. Jov. 5:3). Prekalo po Ćhavo, o Jehova zapovedinđa amenđe te ćera učenikonen hem te krstina len (Mat. 28:19). Isto ađahar, ov zapovedinđa amenđe te manga jekh jekhe (Jov. 13:35). Okola so šunena e Jehova ka oven deo andi olesi porodica (Ps. 15:1, 2). Mothov so mangeja averen. O mangipe tano jekh ando e Jehovase najvažna osobine (1. Jov. 4:8). O Jehova mothovđa so mangela amen angleder so penđarđam le (1. Jov. 4:9, 10). Ked mothovaja so mangaja averen, tegani oponašinaja e Jehova (Ef. 5:1). Najšukar način te mothova so mangaja e manušen tano te sikava len ando Jehova, đi pana isi vreme (Mat. 9:36-38). Ađahar pomožinaja lenđe te oven deo andi e Jehovasi porodica (w21.08 5-6 ¶13-14).

Odolese so but manglja e Jehova, o Isus hine spremno te ćerel disave žrtve sebepi po Dad hem sebepi amaro (Jov. 14:31). Odoleja sar živinđa ked hine ki phuv, o Isus mothovđa kobor mangela e manušen. Svako dive, mothovđa so mangela len hem hine saosećajno premalo lende, čak hem ked disave protivinđe pe olese. Jekh važno način sar mothovđa lenđe so mangela len tano ađahar so sikavđa len ando Devleso Kraljevstvo (Luka 4:43, 44). Isto ađahar, o Isus mothovđa so mangela e Devle hem e manušen ađahar so hine spremno te patini hem te merel amenđe. Ađahar phravđa amenđe o drumo te šaj večno te živina. Amen predajinđam amaro životi e Jehovase hem krstinđam amen sose mangaja le. Sar o Isus, odoleja save hijam premalo manuša ka mothova kobor mangaja e Jehova. O apostol Jovan pisinđa: „Ako neko na mangela pe phrale, kas dikhela, našti te mangel e Devle, kas na dikhela“ (1. Jov. 4:20; w22.03 10 ¶8-9).

Iako uživinaja te molina amen hem te proučina, disavo puti nane amenđe lokho te ćera odova. Sebepi so isi amen but buća kola valjani te ćera, šaj te ovel amenđe pharo te arakha vreme aso odova. Šaj đala amenđe but vreme ki buti, ki amari porodica ja ko avera buća hem odolese šaj te mislina so nane amen vreme te molina amen, te proučina ja hor te razmislina. Ama, isi pana diso so šaj te lel amaro vreme. Ako na pazinaja, disave buća kola nane pogrešna šaj te len amaro vreme kova šaj te koristina te ova pana popaše e Jehovaja. Na primer, šukar tano te odvojina hari vreme te opustina amen. I rekreacija hem i zabava šaj te oven but šukar, ama ako but vreme đala amenđe ko odova, tegani na ka ovel amen vreme e Jehovase. Na valjani te bistra so i rekreacija nane najvažno buti ko amaro životi (Posl. 25:27; 1. Tim. 4:8; w22.01 26 ¶2-3).

Ked o Jehova phenđa e Izraelcenđe te mangen pe pašutnen, ov na mislinđa so on valjani te mangen samo avere Izraelcen. Ov phenđa lenđe te mangen e manušen kola živinđe maškaro lende. Odova hine jasno mothovdo ki Levitska 19:33, 34. O Jehova manglja o Izraelcija te ponašinen pe premalo odola manuša samći hem on tane Izraelcija. Na primer, ko oleso Zakon pisinđa so o strancija hem o Izraelcija kola hine ćorore šaj hine te ćeden odova so aćhilo ki njiva (Lev. 19:9, 10). Avdije, hem amen valjani te ićera amen ko odova načelo (Luka 10:30-37). Sar šaj te ćera odova? But manuša morandilje te mukhen pi phuv hem disave olendar alje te živinen ki amari phuv. But tano važno te mothova so poštujinaja odole manušen (w21.12 12 ¶16).

So pobuter osloninaja amen upro Jehova, pana pobuter ka ova uverime so o Jehova hem tajsato dive ka pomožini amen. Amen valjani te ovel amen vera hem te oslonina amen upro Jehova ked valjani te puća amare šefe te del amen slobodna dive te đa ko kongres ja te ćera aver smena sose mangaja te đa ko sa o sastankija hem te đa pana pobuter ki služba. Ama, zamislin so to šef na dela tut slobodna dive hem na mukhela tut te ćere aver smena hem čak fordela tut andi buti. Da li ka verujine e Jehovase so niked na ka aćhavi tut hem so uvek ka brinini pe te ovel tut odova so valjani tuće? (Jevr. 13:5). But amare phralja hem phenja kola tane ki punovremeno služba šaj te phenen amenđe sar o Jehova pomožinđa lenđe. Ando odova šaj te dikha kobor tano o Jehova verno premalo pe sluge. Ked tano o Jehova amencar, nane amen sostar te dara. Sa đi ćhivaja o Kraljevstvo ko prvo than ko amaro životi, o Jehova niked na ka aćhavi amen (w22.01 7 ¶16-17).

Ked posebno šaj te dićhol da li isi amen poverenje ko starešine? Zamislin soj tano isključimo amaro amal ja neko kotar amari porodica? Tegani šaj pućaja amen da li o starešine ćaće anđe šukar odluka hem da li bi o Jehova anela asavki odluka. So šaj te pomožini amen ispravno te dikha ki odluka koja on anđe? Na valjani te bistra so o isključenje tano disciplina ando Jehova hem so odija disciplina šaj te pomožini hem averenđe ki skupština hem e osobaće koja grešinđa. Ako i osoba koja na kajini pe hem ponodri aćhola deo andi skupština, oj šaj lošno te utičini upro avera (Gal. 5:9). Uzo odova, oj na ka haljol kobor tano ozbiljno odova so ćerđa, na ka menjini po način sar razmislini hem odova so ćerela te šaj palem te ovel paše e Jehovaja (Prop. 8:11). Šaj te ova uverime so ked o starešine valjani te anen odluka da li neko ka ovel isključimo, on but ozbiljno dikhena ki odija odgovornost (w22.02 5-6 ¶13-14).

Posebno tano važno te ova strpljiva hem ljubazna ked okova so dobinđa o savet ko početko na mangela te prihvatini le. O starešine na valjani te holjanen ked o phral ja i phen na prihvatini odmah odova savet ja na primenini le. Odolese, ked o starešina ka ovel kokri hem ked ka molini pe e Jehovase, ov ka rodel olestar te pomožini odola osobaće te haljol sose tano odova savet dindo hem te ićeri pe ko odova savet. Odola osobaće šaj ka valjani vreme te razmislini ando savet kova tano olaće dindo. Ako tano o starešina strpljivo hem ljubazno, tegani o phral ja i phen na ka razmislini ando način ko kova tano o savet dindo, već odolestar soj tano vaćerdo. Naravno, o savet uvek valjani te avel kotar Devleso Lafi. Ma bistri so amaro cilj nane samo te da šukar savet, već hem te ovel lokho amare phralenđe hem e phenjenđe te prihvatinen le (Posl. 27:9; w22.02 18 ¶17; 19 ¶19).

Šaj isi amen disavi mana hem molinaja e Jehova te pomožini amen te cida la amendar. Tegani, šaj te dićhol amenđe so valjani lese but vreme te odgovorini ko amare molitve. Odolese, šaj pućaja amen: „Sose odmah na odgovorini ko me molitve?“ Ked molinaja amen ando vilo, ađahar mothovaja so verujinaja lese (Jevr. 11:6). Isto ađahar, ov mangela te dikhel kobor hijam odlučna te ćera odova aso so molinđam amen (1. Jov. 3:22). Odolese, ked molinaja le te pomožini amen te ćhinava te ćera diso so na sviđini pe olese, valjani te ova strpljiva hem te da sa amendar te menjina amen. O Isus pomožini amen te haljova so ko disave amare molitve o Jehova na ka odgovorini odmah. Ov phenđa: „Molinen tumen hem ka ovel tumenđe dindo. Roden hem ka arakhen. Khuven hem ka ovel tumenđe phravdo. Sose svako ko molini, dobini. Svako ko rodela, arakhi. Svakonese kova khuvela, ka phravđol“ (Mat. 7:7, 8; w21.08 8 ¶1; 10 ¶9-10).

Te šaj te ovel tut pana pobari vera, valjani hem ponodri te proučine i Biblija (Is. Nav. 1:8). Dikh sar ispuninđe pe o proročanstvija andi Biblija hem sar odova so e biblijake piscija pisinđe, slažini pe jekh jekheja. Odova ka pomožini tut te uverine tut so jekh mudro Stvoritelj ćerđa amen hem so i Biblija tani oleso Lafi (2. Tim. 3:14; 2. Petr. 1:21). Đi proučineja i Biblija, dikh kobor tane šukar olake savetija. Na primer, beršencar angleder ki Biblija hine vaćerdo so o mangipe premalo pare na anela ništa šukar (1. Tim. 6:9, 10; Posl. 28:20; Mat. 6:24). Akava mothovi kobor tano mudro odova so i Biblija vaćeri ando mangipe premalo pare. Da li šaj te setine tut ko pana disave savetija andi Biblija kola pomožinđe tuće? Ked razmislinaja ando savetija kotar i Biblija, ka dikha so amaro Stvoritelj đanela soj tano najšukar amenđe hem uvek ka roda savet olestar (Jak. 1:5). Sebepi odova, ka ova pana pobahtale (Is. 48:17, 18; w21.08 17-18 ¶12-13).

Ako sebepi te berša akana našti te ćere odova so angleder ćerđan, ov sigurno so o Jehova na bistrela odova so ćerđan. Revno propovedinđan i šukar vest. Istrajinđan ko kušnje, čak iako disave olendar hine but phare. Ićerđan tut ko e biblijake načelija, dinđan sa tutar te ćere sa te zadatkija hem sikavđan averen. Spremno prihvatinđan sa o promene kola hine ki e Jehovasi organizacija. Ohrabrinđan averen te aćhon ki punovremeno služba. O Jehova but mangela tut sebepi so hijan lese verno. Ov dela po lafi so „na ka mukhel pe verno slugen“ (Ps. 37:28). Isto ađahar, ov phenela: „Ked tumare bala ka parnjon me ka pomožinav tumen“ (Is. 46:4). Odolese, ma mislin so sebepi so akana phuriljan, tu više nane tut than ki e Jehovasi organizacija. E Jehovase hem amenđe tu uvek hijan vredno (w21.09 3 ¶4).

O Jehova tano milosrdno sose tano but mudro. I Biblija phenela: „I mudrost so avela upral najangleder tani... pherdi milosrđe hem šukar plodija“ (Jak. 3:17). O Jehova tano sar jekh dad kova but mangela amen. Ov đanela so amenđe valjani oleso milosrđe (Is. 49:15). Odolese so oprostini amare grehija, amen šaj večno te živina. Sebepi soj tano but mudro, ov mothovi milosrđe ked god šaj. Ama, odova soj tano milosrdno na značini so uvek ka nakhel prekalo amare greške. Ov tano mudro hem odolese uvek ićeri pe ko pe pravedna načelija. So ako jekh e Devleso sluga ćerela ozbiljno greh? So tegani valjani te ćera? O Jehova prekalo Pavle phenđa: „Ćhinaven te družinen tumen“ oleja (1. Kor. 5:11). Ked neko ćerela greh hem na kajini pe, ov ovela isključimo andi skupština. Ađahar štitini pe i skupština ando lošno uticaj hem e Devleso anav nane meljaćerdo (w21.10 9-10 ¶7-8).

Amen služinaja e Jehovase ked daja amare dobrovoljna prilogija. O Izraelcija na valjanđe te aven anglo Jehova ćuće vastencar (Pon. zak. 16:16). On valjanđe te anen odova so šaj hine te den. Ađahar mothovđe soj tane zahvalna aso sa odova so o Jehova ćerđa olenđe. Sar šaj te mothova so mangaja e Jehova hem so hijam zahvalna aso odova so ov ćerela amenđe? Jekh način tano ađahar so ka da dobrovoljno prilog odobor kobor šaj. O apostol Pavle phenđa: „Ako neko dela ando vilo, odova tano ugodno e Devlese, sose ov mangela te da odova so šaj, a na odova so našti“ (2. Kor. 8:4, 12). E Jehovase nane važno kobor tano baro amaro prilog, već te da le ando vilo (Mar. 12:42-44; w22.03 24 ¶13).

O starešine našti te rešinen sa amare problemija. Ama, o Jehova mangela on te den sa pestar te ohrabrinen hem te arakhen e Devlese narodo. Sar šaj o starešine, kola već isi len but buća te ćeren, te arakhen vreme te pomožinen pe phralenđe hem phenjenđe. On ćerena odova so ćerđa o apostol Pavle. Ov uvek hine spremno te pohvalini pe phralen hem te ohrabrini len. Šukar tano o starešine te oven sar ov, te mangen pe phralen hem te oven šukar premalo lende (1. Sol. 2:7). O Pavle pomožinđa pe phralenđe te haljon so o Jehova hem ov mangena len (2. Kor. 2:4; Ef. 2:4, 5). Ov hine olengo amal, družinđa pe olencar hem mothovđa so isi le poverenje ano lende ađahar so phravdo vaćerđa lenđe ando pe brige hem mane (2. Kor. 7:5; 1. Tim. 1:15). Ama, o Pavle na razmislinđa samo ando pe problemija, već manglja te pomožini pe phralenđe (w22.03 28 ¶9-10).