Avgust

Ked phenđa akala lafija, o Isus verovatno mislinđa upro rimska vojnikija kola kovinđe le ko stubo. Ov na dozvolinđa sebepi i patnja koja doživinđa te ovel ogorčeno ja holjamo (1. Petr. 2:23). Sar o Isus, hem amen valjani te ova spremna te oprostina averenđe (Kol. 3:13). Disave manuša, a odola šaj te oven hem amare rođakija, šaj te protivinen pe amenđe sebepi so na haljona amare verovanja hem amaro način sar živinaja. On šaj te vaćeren hovajbe amendar averenđe, te ponižinen amen anglo avera, te uništinen amare publikacije ja čak šaj te pretinen so ka maren amen. Ama, umesto te ićera i holi ano amende, amen valjani te molina e Jehova te phravel olenge jaćha te šaj hem on jekh dive te prihvatinen o ćaćipe (Mat. 5:44, 45). Disavo puti šaj te ovel amenđe pharo te oprostina lenđe, posebno ako hine but lošna premalo amende. Ama, ako dozvolinaja i ogorčenost hem i holi te mukhel koreno ano amaro vilo, amen odoleja ka ćera lošno samo kokri amenđe (Ps. 37:8). Ked oprostinaja, amen birinaja te na ićera i holi ano amende sebepi o lošno iskustvo kova doživinđam (Ef. 4:31, 32; w21.04 8-9 ¶3-4).

Da li tano neko andi ti porodica isključimo? Ako po, đanaja so odova but dukhala tut. Zamislin samo kobor e Jehovase hine pharo ked disave anđelija irinđe lese po dumo (Jud. 6). Isto ađahar, zamislin sar hine lese ked o Izraelcija but putija buninđe pe protiv oleste (Ps. 78:41). Ov sigurno so te nebesko Dade dukhala ked neko kas mangeja aćhavi le. Ov haljola ti dukh. Odolese, ov dela po lafi so ka pomožini tut hem so ka ohrabrini tut. Ked o ćhavo ja i ćhaj aćhavi e Jehova, but putija o roditeljija mislinena so valjanđe te ćeren diso pobuter te pomožinen pe ćhavenđe te aćhon ko ćaćipe. Jekh phral phenđa: „Krivinđum kokri man. But putija naštinđum te sovav sebepi odova.“ Jekh phen kaso ćhavo tano isključimo, phenela: „Pućljum man kaj pogrešinđum. Mislinđum so na sikavđum le šukar“ (w21.09 26 ¶1-2, 4).

Disave mislinena so e Jehovaso narodo našti te sikavi averen andi Biblija odolese so na završinđe disave bare religiozna škole. Ama, on valjani te proverinen da li odova so šunđe tano tačno. Odova ćerđa hem e biblijako pisco o Luka. Ov „pažljivo istražinđa sa andi početka.“ Ov manglja o manuša te uverinen pe soj tano ćaće odova so šunđe ando Isus (Luka 1:1-4). O Judejcija andi Verija ćerđe isto odova so ćerđa o Luka. Ked prvo puti šunđe i šukar vest ando Isus, on proverinđe ko hebrejska spisija da li odova so šunđe tano ćaće (Dela 17:11). Isto ađahar, hem o manuša valjani te ćeren odova. Odova so šunđe ando e Devleso narodo valjani te uporedinen odoleja so pisini ki Biblija. Uzo odova, on valjani te istražinen so e Jehovase svedokija ćerđe ko amaro vreme. Ako sa odova temeljno istražinena, on na ka dozvolinen o predrasude ja odova so averendar šunđe te korjaćeri len (w21.05 3 ¶7-8).

Da li isi neko ki ti skupština kas šaj te vićine te avel koro tute? Podijekh puti, disave phralenđe hem phenjenđe značini ked avera odvojinena vreme te oven olencar. Disavenđe šaj te ovel pharo te oven ćhere ked olengi porodica slavini nesave praznikija. Avera šaj te oven posebno tužna ko disavo posebno dive ko berš, sar na primer ko dive ked mulo neko kas manglje. Ked provodinaja vreme e phralencar hem e phenjencar kola isi len asavke problemija, amen mothovaja so ćaće brininaja amen olenđe (Fil. 2:20). Isi but razlogija sose dijekh phral ja phen podijekh puti šaj te osetini pe usamljeno. Ama, na valjani te bistra so o Jehova đanela sar osetinaja amen. Ov često koristini amare phralen hem phenjen te del amen odova so valjani amenđe (Mat. 12:48-50). Te bi mothovaja e Jehovase so ceninaja odova so ćerela amenđe, amen valjani te da sa amendar te pomožina amare phralenđe hem phenjenđe. Bizo obzir sar podijekh puti osetinaja amen, amen niked na hijam kokri odolese soj tano o Jehova amencar (w21.06 13 ¶18-20).

O Isus aćhilo pozitivno ki služba hem nastavinđa te propovedini, iako disave manuša na manglje te šunen olesi poruka. Ov đanđa so e manušenđe valjani o ćaćipe hem odolese dinđa sa pestar te pomožini so pobuter manušenđe. Isto ađahar, ov đanđa so disave manuša ki početka na ka mangen te šunen, a kasnije ka prihvatinen o ćaćipe. Te dikha so desinđa pe ki olesi porodica. Đi trin tekvaš berš propovedinđa, niko ando olese phralja na ulo oleso učenik (Jov. 7:5). Ama, palo oleso uskrsenje, on ulje hrišćanija (Dela 1:14). Amen na đanaja ko krajo ko ka ovel e Jehovaso sluga. Disave manušenđe valjani pobuter vreme te sikljon o ćaćipe. Ama, čak hem okola kola na mangena te šunen, ked dikhena amaro šukar ponašanje hem amaro pozitivno stav, on šaj te počminen „te slavinen e Devle“ (w21.05 18 ¶17-18).

Ked hine ki phuv, o Isus zapovedinđa pe učenikonenđe te ćeren duj buća. Ov phenđa lenđe te propovedinen i šukar vest ando Kraljevstvo hem sikavđa len sar te ćeren odova (Luka 8:1). Na primer, o Isus sikavđa pe učenikonen sar valjani te reagujinen ked o manuša šunena i šukar vest hem ked na šunena (Luka 9:2-5). Ked o Isus phenđa so ka del pe „svedočanstvo sa e narodonđe“, ov mislinđa so olese učenikija ka propovedinen bute manušenđe hem ko but thana (Mat. 24:14; Dela 1:8). Uzo odova, ov phenđa lenđe te sikaven e manušen te ićeren pe ko sa o zapovestija kola ov dinđa. O Isus phenđa so akija važno buti ka ćerel pe sa „đi o svršetko ando akava poretko“ (Mat. 28:18-20). Hem ko otkrivenje kova dinđa e Jovanese, o Isus phenđa so sa olese učenikija valjani te pomožinen averenđe te sikljon ando Jehova (Otkr. 22:17; w21.07 2-3 ¶3-4).

But manuša avdije, mangena te mothoven soj tane pošukar averendar hem na razmislinena sar odova so ćerena utičini upro avera. Na primer, jekh poslovno manuš mangela te ovel pošukar averendar. Odolese, ov tano spremno te ćerel razna lošna buća samo te mothovi soj tano pošukar averendar. Jekh sportista šaj namerno te povredini avere igrače samo te pobedini. Jekh terno ćhavo mangela te upisini pe ko jekh šukar fakultet. Odolese, ov tano spremno te ćerel razna prevare ko test, samo te uspini. Amen haljovaja so akala buća nane šukar. On tane „delija ando telo“ (Gal. 5:19-21). Ama, da li šaj te desini pe so jekh e Jehovaso sluga nane svesno so mangela te mothovi soj tano pošukar averendar? Amen valjani te razmislina akalestar sose ako neko ki skupština mangela te ovel pošukar averendar, tegani i skupština na ka ovel ko jekhipe. Šukar bi ovela te razmislina ando e Devlese verna sluge kola na manglje te mothoven soj tane pošukar averendar (w21.07 14 ¶1-2).

O verno mangipe podstaknini amen te pomožina okolenđe kola tane obeshrabrime. O phralja hem o phenja pomožinena okolenđe kola tane obeshrabrime. On mangena pe phralen hem pe phenjen hem spremna tane te ćeren sa so šaj te pomožinen lenđe (Posl. 12:25; 24:10). O apostol Pavle ohrabrinđa amen te ćera odova. Ov phenđa: „Tešinen okolen soj tane obeshrabrime, pomožinen okolenđe soj tane slaba hem oven strpljiva sarinencar“ (1. Sol. 5:14). But putija šaj te pomožina nekase koj tano obeshrabrimo ađahar so ka šuna le hem ađahar so ka mothova lese so mangaja le. O Jehova na ka bistrel odova so tu ćereja. Ko Poslovice 19:17 pisini: „Ko mothovi milost e ćororenđe, e Jehovase pozajmini, hem Ov ka irini olese aso olese delija“ (w21.11 10 ¶11-12).

Sar šaj akana te pripremina amen aso odova so ka ovel? Amen valjani te ova zadovoljna hem te ova bahtale sose o Jehova tano amaro amal. So pošukar penđaraja e Devle, pana pobuter ka ova uverime so ov ka arakhi amen ked ka napadini amen o Gog ando Magog. O lafija kola tane ko avdisutno stiho phenena amenđe sose o David hine sigurno so o Jehova ka pomožini lese. But putija osloninđa pe upro Jehova hem ov niked na mukhlja le. Ked hine terno, o David borinđa pe e Golijateja hem phenđa odole zorale vojnikose: „O Jehova avdije ka del tut ko me vasta“ (1. Sam. 17:46). Disavo vreme palo odova, đi o David služinđa e kralje, e Saule, ov nekobor putija manglja te mudari le. Ama, „o Jehova hine e Davideja“ (1. Sam. 18:12). Sebepi so dikhlja sar o Jehova angleder pomožinđa lese, o David hine sigurno so o Jehova hem akana ka pomožini lese (w22.01 6 ¶14-15).

Ked diso ćerela, o Jehova na siđari. Ov ađahar ćerela sebepi po anav hem sebepi so mangela te pomožini averenđe. Na primer, ked ćerđa i phuv, ov ćerđa la hari pohari. I Biblija vaćeri so ked o Jehova ćerđa i phuv, ov „odredinđa olake mere“, ćhivđa „olako temelji“ hem „olako glavno ugaono bar“ (Jov 38:5, 6). Ov čak odvojinđa vreme te dikhel odova so stvorinđa (Post. 1:10, 12). Zamislin samo sar osetinđe pe o anđelija đi dikhlje sar o Jehova sa stvorini. Kobor hine bahtale! Čak počminđe „te hvalinen le“. So sikljovaja ando akava? Nakhlje hiljade berša đi o Jehova na stvorinđa i phuv, o zvezde hem sa soj tano đivdo. Ama, ked o Jehova dikhlja sa odova so stvorinđa, ov phenđa soj tano sa šukar (Post. 1:31; w21.08 9 ¶6-7).

Ko jekh poređenje, o Isus vaćerđa ando jekh manuš kova pođinđa ko drumo. Ama, angleder te đal, ov svakone robose dinđa talantija. Ov đanđa so svako oleso robo šaj te ćerel. Odolese, e prvonese dinđa panđ talantija, e dujtonese duj, a e tritonese jekh. Prva duj robija hine bućarne hem ćerđe e gospodareso barvalipe te ovel pana pobaro. Ama, o trito robo ništa na ćerđa odoleja so dobinđa. Odolese, oleso gospodari uspudinđa le. Sar o prvo robo, ađahar hem o dujto robo haljilo so oleso gospodari dinđa le but važno buti. On but trudinđe pe hem ćerđe e gospodareso barvalipe te ovel pobaro. Odolese so hine but bućarne, o gospodari nagradinđa len. Na samo so o gospodari hine zadovoljno olencar, već dinđa len pana pobari buti te ćeren (w21.08 21 ¶7; 22 ¶9-10).

Ko akala poslednja dive, o Jehova mothovi soj tano but strpljivo. Ov na mangela nijekh manuš te merel (2. Petr. 3:9). Ov dela e manušenđe dovoljno vreme te pokajinen pe. Ama, ov na ka ovel zauvek strpljivo. Okola kola na mangena te podržinen oleso Kraljevstvo ka nakhen sar o faraon ko e Mojsijeso vreme. O Jehova phenđa e faraonese: „Đi akana već šajinđum te mukhav mo vas hem tut hem te narodo te mudarav, hem ađahar šajinđum te cidav tut kotar i phuv. Ama, aćhavđum tut te živine te mothovav tuće kobor hijum moćno hem te vaćeri pe kotar mo anav ki celo phuv“ (Izl. 9:15, 16). Tegani, sa o manuša ki phuv ka đanen so o Jehova tano jedino ćaćutno Devel (Jezek. 38:23). O tresibe ando kova vaćeri pe ko avdisutno stiho značini so okola kola, sar o faraon, na mangena te prihvatinen e Jehova sar pe vladare, ka oven uništime (w21.09 18-19 ¶17-18).

Da li osetineja dukh ko vilo sebepi so neko kas mangljan tano isključimo? So šaj te ćere ako neko vaćeri diso so dukhavi tut? Ma ađićer so svako ka đanel sar te reagujini hem so te phenel ki odija situacija (Jak. 3:2). Sare amen hijam nesavršena. Odolese, ma iznenadin tut ako neko na đanela so te phenel ja ako neko, iako odova na manglja, phenela diso so dukhala tut. Tegani, setin tut so o Pavle phenđa: „Podnosinen jekh jekhe hem ando vilo oprostinen jekh jekhese, čak hem ked neko uvredini tumen“ (Kol. 3:13). Ohrabrin hem pomožin okolen kase neko tano isključimo. Posebno akana valjani te ohrabrine len hem te mothove lenđe so mangeja len (Jevr. 10:24, 25). Podijekh puti, disave phralja hem phenja ki skupština na vaćerena okolencar kase tano neko isključimo hem ponašinena pe premalo lende ka phene on tane isključime. Amen na mangaja amare phralja hem phenja te osetinen pe ađahar. Posebno valjani te pohvalina hem te ohrabrina e ternen kase roditeljija tane isključime (w21.09 29 ¶13-14; 30 ¶16).

Ked o phure hem o terne vaćerena, on šaj te ohrabrinen jekh jekhe (Rimlj. 1:12). Đi vaćerena e phure phralencar hem phenjencar, o terne pana pobuter ka uverinen pe so o Jehova brinini pe ando pe sluge, a o phure ka osetinen kobor avera mangena len. O phure phralja hem phenja ćaće uživinena te vaćeren sar o Jehova blagoslovinđa len ko olengo životi. Sar đana o berša, o šužipe nakhela. Ama, okola kola tane verna e Jehovase, olese tane svako berš pana pošuže (1. Sol. 1:2, 3). Sose tano odova ađahar? Odolese so on beršencar mukhlje e Jehova te sikavi len hem te pomožini len te ovel len pana pošuže osobine. So pobuter penđaraja amare phure phralen hem phenjen, so pobuter poštujinaja len hem sikljovaja olendar, pana pobuter ka haljova kobor tane on vredna. Te šaj i skupština te ovel zorali, važno tano o terne te mothoven so poštujinena e phuren, ama hem o phure te mothoven soj tane o terne važna olenđe (w21.09 7 ¶15-18).

Valjani te da sa amendar te na ova stroga premalo avera, već te ova milosrdna sar o Devel (Ef. 2:4). Te ova milosrdna na značini samo te phena soj tano amenđe žao ked neko isi le disave pharipa. O milosrdna manuša valjani te ćeren diso te pomožinen averenđe. Sare amen šaj te razmislina sar te pomožina amare porodicaće, e phralenđe hem e phenjenđe ki skupština hem averenđe. Ko but načinija šaj te mothova so hijam milosrdna. Na primer, da li nekase valjani uteha? Da li nekase šaj te pomožina ađahar so ka pazarina lese ja diso aver te ćera? Da li nekase ko hine isključimo valjani amal te ohrabrini le? Da li šaj te vaćera i šukar vest averenđe? (Jov 29:12, 13; Rimlj. 10:14, 15; Jak. 1:27). Ako razmislinaja ando odova sar te pomožina averenđe, ka dikha so isi but načinija te ova milosrdna. Ked ćeraja odova, radujinaja amare Dade kova tano but milosrdno (w21.10 13 ¶20-22).

Ko 23. psalam o David vaćerđa ando but šukar buća kola o Jehova dinđa le sebepi so mukhlja ov te ovel oleso Pastiri. O Jehova legarđa le ki „staza andi pravednost“ hem hine oleja hem ked hine lese šukar hem ked hine lese lošno. Ked o David phenđa so o Jehova legarđa le ki „zeleno poljana“, odova na značinđa so na hine le problemija. Disavo puti, ov hine obeshrabrimo, samći phirđa „ki dolina kuri isi bari tomina“, hem hine le dušmanija. Ama, sebepi so o Jehova hine oleso Pastiri, ov na hine le sostar te daral. Ko so o David mislinđa ked phenđa „sa ka ovel man?“ Ov hine le sa so valjanđa lese te aćhol paše e Jehovaja. Olese na valjanđe but buća te ovel bahtalo. O David hine zadovoljno odoleja so o Jehova dinđa le. Najvažno hine lese odova so o Jehova blagoslovinđa le hem arakhlja le. Ando Davidese lafija šaj te dikha kobor tano važno o materijalna buća te na oven amenđe ko prvo than (w22.01 3-4 ¶5-7).

Ko purano vreme, e Jehovase sluge propovedinđe e manušenđe kola na manglje te šunen. Na primer, o Noje beršencar hine „propovednik andi pravednost“ (2. Petr. 2:5). Ov nadinđa pe so o manuša ka šunen, ama o Jehova na phenđa so ka ovel ađahar. Umesto odova, ked vaćerđa lese te ćerel i arka, o Devel phenđa lese: „Khuv ki arka te ćhavencar, te romnjaja hem e romnjencar ando te ćhave“ (Post. 6:18). Ked phenđa lese kobor i arka valjani te ovel bari, o Noje šaj haljilo so na ka šunen le but manuša (Post. 6:15). Sar so đanaja, nijekh manuš na šunđa le (Post. 7:7). Da li o Jehova mislinđa so o Noje na propovedinđa dovoljno? Naravno so na. Anglo e Devlese jaćha, o Noje but šukar ćerđa pi buti sose ćerđa sa so o Jehova phenđa lese te ćerel (Post. 6:22; w21.10 26 ¶10-11).

Zamislin samo sar hine e Rutaće ked šunđa odova! I Ruta ćerđa sa so šaj te pomožini e Nojeminaće. Runđa olaja, utešinđa la hem phirindoj đelji olaja sa odova drumo. Iako i Ruta ćerđa sa odova, i Nojemina phenđa: „O Jehova ćerđa te irinav man ćuće vastencar.“ Odoleja so phenđa, i Nojemina na mothovđa soj tani zahvalno aso sa odova so ćerđa i Ruta. Odova sigurno dukhavđa e Ruta, ama oj ipak aćhilji e Nojeminaja (Ruta 1:3-18). Jekh phen koja tani obeshrabrimi šaj te phenel diso so šaj te dukhavi amen, iako daja sa amendar te pomožina la. Ama, amen na mangaja te ćhiva odola lafija ko amaro vilo. Amen hem ponodri ka aćhova uzo late hem ka molina e Jehova te pomožini amen te đana sar te utešina la (Posl. 17:17). Ki početka, jekh phen šaj na ka prihvatini amari pomoć. Ama, o verno mangipe ka podstaknini amen te da sa amendar te pomožina laće (Gal. 6:2; w21.11 11 ¶17-19).

Ki Biblija, o lafija „sveto“ hem „svetost“ odnosinena pe ki moralno hem ki religiozno čistoća. Isto ađahar, odola lafija odnosinena pe upro nekaste koj tano odvojimo te služini e Devlese. Avere lafencar, amen šaj te ova sveta ako hijam moralno čista, ako služinaja e Devlese ađahar sar so ov rodela hem ako hijam paše oleja. Iako amen hijam samo grešna manuša, amaro Devel kova tano sveto mangela te ovel paše amencar. Odova ćaće takini amen ko vilo. O Jehova tano sveto hem čisto ko sa. Odova dićhola kotar lafija kola o serafimija, o anđelija kola služinena paše uzo Jehovaso presto, phenđe: „Sveto, sveto, sveto tano o Jehova, o Komandanti upro sa o vojske“ (Is. 6:3). O anđelija šaj te oven paše e Devleja kova tano sveto sebepi so hem on tane sveta (w21.12 3 ¶4-5).

O terne but putija pućena pe so te ćeren pe životoja. O učiteljija ki škola hem disave rođakija, kola nane e Jehovase svedokija, šaj te phenen lenđe so valjani te đan ko fakulteti, te šaj palo odova te arakhen pese šukar buti hem te zaradinen but pare. Ama, odija škola šaj te lel lendar but vreme. Ki aver strana, o roditeljija hem o phralja ki skupština šaj te ohrabrinen len te koristinen po životi te služinen e Jehovase. Ako tu hijan ki asavki situacija, so šaj te pomožini tuće te ane šukar odluke? Šukar bi ovela te čitine hem hor te razmisline ando lafija kotar Efešanima 5:15-17. Palo odova šaj te puće tut: „Soj tani e Jehovasi volja? Kola odluke šaj te ćeren e Jehova bahtalo? Kola odluke ka pomožinen man šukar te koristinav mo vreme?“ Ma bistri so akava sveto kuri vladini o Beng pana hari ka ovel uništimo (w22.01 27 ¶5).

Ked o Jakov ulo e Isuseso učenik? Palo odova so uskrsninđa, o Isus „pojavinđa pe e Jakovese, hem kasnije sa e apostolenđe“ (1. Kor. 15:7). Odova odobor utičinđa upro Jakov so ulo e Isuseso učenik. Ov hine odothe ked o apostolija dobinđe o sveti duh ked hine ki jekh soba ko Jerusalim (Dela 1:13, 14). Palo odova, o Jakov služinđa sar član ando vodeće telo (Dela 15:6, 13-22; Gal. 2:9). Hari angleder o 62. berš ki nevi era, ov pisinđa jekh lil e pomazano hrišćanenđe. Odova lil šaj hem amenđe avdije te pomožini bilo te ovel amen nada so ka živina ko nebo ja ki phuv (Jak. 1:1). Premalo odova so o jevrejsko istoričar, o Josif Flavije, pisinđa o jevrejsko prvosveštenik o Ananija, e Anaso ćhavo, naredinđa te mudaren e Jakove. O Jakov verno služinđa e Jehovase sa đi na završinđa po životi ki phuv (w22.01 8 ¶3; 9 ¶5).

Jekh buti koja šaj te sikljova ando akala lafija tani te na očekujina so o Jehova ka zaštitini amen ando izazovija kola ispitinena amari vera. Sar so o Isus hine iskušimo đi o meribe, hem amen valjani te ova spremna te mothova so hijam verna đi o meribe (Mat. 16:24, 25). Ama, amen šaj te ova sigurna so o Devel na ka mukhel te ova iskušime pobuter odolestar so šaj te izdržina (1. Kor. 10:13). Isto ađahar, sikljovaja so hem amen sar o Isus šaj te doživina bari nepravda (1. Petr. 2:19, 20). Okola kola protivinena pe amenđe na ćerena odova sose ćerđam diso lošno, već odolese so na hijam deo ando akava sveto hem so propovedinaja i šukar vest (Jov. 17:14; 1. Petr. 4:15, 16). O Isus haljilo sose o Jehova mukhlja le te patini. Ama, disave e Jehovase verna sluge podijekh puti pućena pe sose o Jehova dozvolini te desinen pe lenđe lošna buća (Avak. 1:3). Amaro milosrdno hem strpljivo Dad haljola so odova na značini so olengi vera tani slabo, već so valjani lenđe uteha koja samo ov šaj te del len (2. Kor. 1:3, 4; w21.04 11 ¶9-10).

O Jehova ka prihvatini odova so ćeraja ako daja sa amendar te ćera odova so ov rodela, ako mangaja le hem ako poštujinaja le. Amen but mangaja e Jehova hem đanaja so ov zaslužini te služina samo olese. Ki Biblija pisini so amare molitve tane sar o pažljivo pripremimo kad kova dinđa pe e Jehovase ko sveto šatori, a palo odova hem ko hram. I miriš ando odova kad hine ugodno e Jehovase. Isto ađahar, ked ando vilo molinaja amen e Jehovase, odova tano ugodno olese, čak iako amare lafija tane jednostavna (Posl. 15:8; Pon. zak. 33:10). O Jehova tano bahtalo ked ki molitva phenaja lese kobor mangaja le hem kobor hijam lese zahvalna. Ov mangela te phena lese so mučini amen, sostar daraja hem so mangaja jekh dive te ovel. Angleder te moline tut, razmislin so bi mangeja te phene lese. Ako ćereja ađahar, tu ka de te nebesko Dadese najšukar „kad“ (w22.03 20 ¶2; 21 ¶7).

Ko Armagedon, na ka ovel amaro te odlučina kase o Jehova valjani te mothovi milosrđe, a kase na (Mat. 25:34, 41, 46). Da li ko odova vreme ka verujina so e Jehovase odluke tane ispravna ja ka ćhinava te služina olese? Već akana valjani te zorjaćera amaro poverenje ko Jehova te šaj te ovel amen poverenje upro leste hem ki budućnost. Zamislin samo sar ka ovel amenđe ko nevo sveto. O religije kola o Devel na prihvatini više na ka oven. Isto ađahar, o političko hem o trgovačko sistemi, sebepi kola o manuša beršencar patinđe više na ka oven. O manuša više na ka oven naborme, na ka phurjon hem više niko na ka merel. O Beng hem o demonija hiljada berš ka oven phanlje. Sa o lošna buća kola ulje sebepi i pobuna više na ka oven (Otkr. 20:2, 3). Tegani ka ova but bahtale sose verujinđam so o Jehova uvek ćerela odova soj tano ispravno! (w22.02 6-7 ¶16-17).

O Isus na ađićerđa averendar te ćeren mir, već ov prvo ćerđa odova hem ohrabrinđa averen te rešinen o problemija kola hine len maškaro peste. Na primer, ov sikavđa e manušen so valjani prvo te pomirinen pe pekle phraleja ako mangena o Jehova te prihvatini olengi služba (Mat. 5:23, 24). Isto ađahar, but putija pomožinđa e apostolenđe te haljon so na valjani te svađinen pe sebepi odova koj tano najbaro maškaro lende (Luka 9:46-48; 22:24-27). Te šaj te ćera te ovel mir, nane dovoljno samo te arakha amen te na khuva ko problemija nekasa. Valjani te da sa amendar te ćera te ovel mir hem te podstaknina amare phralen hem phenjen ked isi len problemi te rešinen le (Fil. 4:2, 3; Jak. 3:17, 18). Šaj te puća amen: „So hijum spremno te ćerav te šaj te ovav ko mir averencar? Ked jekh phral ja phen povredini man, da li ićerava i holi ano mande? Da li ađićerava averendar te aven te pomirinen pe mancar ja me prvo ćerava diso te ovel mir, čak iako me na ćerđum o problemi?“ (w22.03 10 ¶10-11).

Beršencar angleder ki Biblija hine pisimo so e Jehovaso narodo spremno ka služini olese hem so oleso Ćhavo ka vodini len (Ps. 110:3). Odova proročanstvo ispunini pe avdije. Svako berš, e Jehovase verna sluge milionija satija propovedinena i šukar vest. On odova ćerena sose mangena hem na lena pare odolese. On tane spremna te pomožinen pe phralenđe, te ohrabrinen len hem te pomožinen len te ovel len pana pobari vera ko Jehova. O starešine hem o sluge pomoćnikija odvojinena but vreme te pripreminen pe aso sastankija hem te đan ko phralja hem ko phenja te ohrabrinen len. Sose ćerena sa odova? Odolese so mangena e Jehova hem e manušen (Mat. 22:37-39). O Isus tano but baro primer sose pobuter brininđa pe averendar nego pestar. Amen daja sa amendar te ova sar oleste (Rimlj.15:1-3). Okola kola ćerena odova so o Isus ćerđa ka ovel len bare blagoslovija (w22.02 20 ¶1-2).

Ko Izrael, but manuša ćerđe sar zemljoradnikija. Ko krajo ando dive, on valjanđe te priminen pi plata. Ako jekh radniko na dobinđa pi plata ko krajo ando dive, ov na bi ovela le sova te parvari pe porodica. O Jehova objasninđa sar tano odole manušese: „Ov tano ćororo hem oleso životi zavisini andi olesi plata“ (Pon. zak. 24:14, 15; Mat. 20:8). Avdije, but radnikija dobinena pi plata jekhvar ja duvar ko masek, a na svako dive. Ama, o načelo andi Levitska 19:13 pana važini. Disave poslodavcija na mothovena so poštujinena pe radnikonen sose na platinena len odobor kobor on zaslužinena. On đanena so on našti te arakhen aver buti hem so mora te ćeren buti odothe. Ko asavko način, on samći „ićerena e radnikosi plata koro peste.“ O hrišćanija kola isi len radnikija valjani ozbiljno te razmislinen akalestar (w21.12 10 ¶9-10).

Palo sa odova so o Isus doživinđa hem i dukh koja osetinđa đi hine ko mučeničko stubo, ov sigurno hine but trošalo. Valjanđa lese diso te pijel. O Isus na mislinđa soj tano slabo ako mothovi averenđe sar osetini pe. Ni amen na valjani te osetina amen ađahar. But putija ko amaro životi, mislinaja so na valjani te roda pomoć averendar. Ama, ako valjani amenđe pomoć, na valjani te lađa te roda la. Na primer, ako hijam phure ja naborme, šaj te puća disave phrale ja phenja te vozinen amen đi o doktori ja đi i prodavnica. Isto ađahar, ako hijam obeshrabrime, šaj te puća jekhe starešina ja jekhe zrelo phralje ja phenja te odvojinen vreme te šunen amen ja te phenen amenđe disavo „šužo lafi“ kova ka ohrabrini amen (Posl. 12:25). Ma bistri so amare phralja hem phenja mangena amen hem mangena te pomožinen amen ked avena o „phare dive“ (Posl. 17:17). Ama, on našti te đanen soj tano amenđe ki godi. On našti te đanen so valjani amenđe sa đi amen na phenaja lenđe odova (w21.04 11-12 ¶11-12).

Normalno tano te ova tužna ked o promene desinena pe amenđe. Šaj na haljovaja sose anđa pe asavki odluka ja šaj tano pharo amenđe te prihvatina la. Šaj mislinaja so angleder hine amenđe pošukar. Šaj te ova obeshrabrime hem te mislina so akana našti te ćera e Jehovase odobor sar angleder. Ka ovel amenđe polokho te prihvatina o promene ako ko buća dikhaja sar o Jehova. Avdije, ov ćerela but buća hem amen isi amen čast te ova olese saradnikija (1. Kor. 3:9). E Jehovaso mangipe premalo amende niked na ćhinavđola. Ako disavi promena utičini upro tute, ma razmislin but sose alo đi odija promena. Umesto samo te mange to životi te ovel sar angleder, molin e Jehova te pomožini tut te dikhe sose tani odija promena šukar (Prop. 7:10). Ma razmislin samo kola buća akana našti te ćere, već razmislin so akana šaj te ćere. Ađahar ka aćhova radosna hem verna iako ovena disave promene ko amaro životi (w22.03 17 ¶11-12).

Kase o Jehova mothovi po verno mangipe? Ki Biblija pisini so o manuša šaj te mangen but buća. Na primer, vino, ulje, disciplina, đandipe, mudrost hem te ćeren buti e phuvjaja (2. Let. 26:10; Posl. 12:1; 21:17; 29:3). O verno mangipe našti te mothovi pe premalo buća kola nane đivde. Odija osobina šaj te mothovi pe samo e manušenđe. Ama, o Jehova na mothovi po verno mangipe premalo sare. O verno mangipe mothovi okolenđe soj tane paše oleja. Ov tano verno pe amalenđe. O Devel mangela te del amen but šužo životi hem niked na ka aćhavi amen. O Jehova mothovi mangipe premalo sa o manuša. O Isus phenđa e Nikodimese: „O Devel odobor manglja o sveto so dinđa pe jedinobijande Ćhave, te na ovel uništimo nijekh kova mothovi vera ano leste, nego te ovel le večno životi“ (Jov. 3:1, 16; Mat. 5:44, 45; w21.11 2 ¶3; 3 ¶6-7).

O životi ko akava sveto tano pharo. Ama, sar đala o vreme, ka ovel pana popharo (Mat. 24:21). Amen jedva ađićeraja te avel o dive ked sa akala problemija ka oven palo amende hem ked ka bistra sa odola lošna buća kola hine (Is. 65:16, 17). Sose tano važno hem ponodri te ova istrajna? Odolese so o Isus phenđa: „Ako ka istrajinen đi o krajo, tumen ka arakhen tumaro đivdipe“ (Luka 21:19). Ked razmislinaja ando odova sar avera istrajinena, odova šaj te del amen snaga te istrajina ko amare problemija. Koj tano najšukar primer andi istrajnost? O Jehova, o Devel. Šaj hijan iznenadimo akaleja. Ama, ako hari razmislineja, ka haljove sose tano odova ađahar. Akale svetoja vladini o Beng hem odolese isi but problemija. O Jehova isi le moć te cidel sa akava lošnipe kova isi ki phuv (Rimlj. 9:22). Ama, o Devel tano istrajno hem ađićeri po vreme te cidel sa akala lošnipa kotar i phuv (w21.07 8 ¶2-4).