Septembar

Disavenđe ko e Isuseso vreme na hine dovoljno odova so ov sikavđa. On rodinđe diso pobuter. Ama, ked ov odbinđa te mothovi lenđe znak ando nebo, on više na manglje te šunen le (Mat. 16:4). So i Biblija phenela? Ando Mesija o prorok Isaija pisinđa: „Na ka pištini niti ka vazdel po glaso, oleso glaso na ka šunđol ko ulice“ (Is. 42:1, 2). Đi o Isus ćerđa pi služba, ov na privucinđa averengi pažnja. Ov na ćerđa bare hramija, na manglja te uravi disave šeja kola uravđe o religiozna vođe niti manglja o manuša te koristinen disave posebna titule đi vaćerđe oleja. Đi trajinđa oleso suđenje, o Isus na manglja te ćerel disavo čudo anglo kralj Irod koleja bi oduševini le, iako oleso đivdipe hine ki opasnost (Luka 23:8-11). Đi hine ki phuv, ov ćerđa disave čudija, ama olesi glavno buti hine te propovedini i šukar vest. Ov phenđa pe učenikonenđe: „Odolese aljum“ (Mar. 1:38; w21.05 4 ¶9-10).

Amen rodaja e manušen kola isi len „ispravno stav premalo večno životi“ (Dela 13:48). Te šaj te oven e Isusese učenikija, amen valjani te pomožina lenđe: (1) te haljon, (2) te primeninen hem (3) te ićeren pe ko odova so sikljona andi Biblija (Kol. 2:6, 7; 1. Sol. 2:13). Sare ki skupština šaj te pomožinen okolenđe kola proučinena, ađahar so ka mothoven lenđe mangipe hem so vilestar ka pozdravinen len ked avena ko sastankija (Jov. 13:35). Te šaj te pomožini e studentese te borini pe „protiv odova soj tano hor“ ano leste, o objavitelj kova vodini o kurs valjani te odvojini vreme hem snaga (2. Kor. 10:4, 5). Valjani vreme te šaj neko te menjini pe hem te resel đi o krštenje. Ama, ma bistri, to trud nane uzaludno (w21.07 3 ¶6).

But tano važno te đana sose hijam uverime so odova so e Jehovase svedokija sikavena tano ćaćipe hem so on služinena e Devlese ko ispravno način. O apostol Pavle hine uverimo so arakhlja o ćaćipe (1. Sol. 1:5). Ov na verujinđa ko odova samo sose o ćaćipe pomožinđa lese te osetini pe pošukar. Ov hor proučinđa e Devleso Lafi hem verujinđa so „celo Lil avela ando Devel“ (2. Tim. 3:16). So o Pavle haljilo đi proučinđa e Devleso Lafi? Ov haljilo so o Isus hine o obećimo Mesija. Odova hine jekh važno ćaćipe ko kova o religiozna vođe ko odova vreme na manglje te verujinen. On hine dujemujenge sose umesto te sikaven e manušen ando Devel, on ćerđe but buća kola o Devel mrzini (Titu 1:16). Ama, o apostol Pavle na hine sar olende. Ov na birinđa ko kova deo ando e Devleso Lafi ka verujini, a ko kova na. Ov hine spremno te sikavi averen ando „sa odova so o Devel mangela“ hem te ićeri pe ko odova (Dela 20:27; w21.10 18 ¶1-2).

Iako amen sadinaja hem vadinaja, na valjani te bistra so o Devel dela te barjol (1. Kor. 3:6, 7). Anglo e Jehovase jaćha sa o manuša tane dragocena. Ov mothovđa amenđe čast te sarađujina olese Ćhaveja ko odova te ćeda e manušen ando sa o narodija angleder so ka avel o krajo (Ag. 2:7). Amaro propovedibe šaj te uporedini pe e bućaja koja ćerena o spasiocija. Amen hijam sar o članija ki jekh spasilačko ekipa koja tani bićhaldi te oslobodini e manušen kola tane zarobime ko rudniko. Iako samo nekobor spasiocija andi ekipa arakhlje nekas, sarine ćerđe odija važno buti. Isto tano hem amencar ki služba. Amen na đanaja pana kobor manuša ka oven spasime ando e Bengeso sveto. Ama, o Jehova šaj te koristini bilo kas te pomožini lenđe. O Andreas, kova živini ki Bolivija, phenela: „Đanava so ked jekh manuš sikljola o ćaćipe hem krstini pe odova tano odolese so but đene sarađujinđe zajedno te pomožinen lese.“ Hem amen valjani te ovel amen asavko pozitivno stav premali služba. Ako ćeraja odova, o Jehova ka blagoslovini amen hem ka ova poradosna ki služba (w21.05 19 ¶19-20).

O lovco isi le samo jekh cilj – te astari hem te mudari e životinja. Odolese ov koristini razna zamke. Čak hem i Biblija vaćeri odolestar (Jov 18:8-10). Sar ćerela odova? Ov posmatrini odola životinja. Kaj đala? So ćerela? Koja tani najšukar zamka asi odija životinja? O Satana tano sar odova lovco. Ov posmatrini amen. Dikhela kaj đaja hem so ćeraja. Palo odova, ov birini jekh zamka asi koja nadini pe so ka astari amen tegani ked amen na očekujinaja. Ama, iako peljam ki disavi zamka, i Biblija phenela so amen ipak šaj te ikljova olatar. Isto ađahar, sikavi amen so šaj te ćera te na pera ko odola zamke. E Satanase duj najbare zamke tane o ponos hem i pohlepa. Već beršencar o Beng uspešno koristini akala zamke. Ov tano sar o manuš kova astari e ćirikljen ki zamka (Ps. 91:3). Ama, amen šaj te izbegnina e Bengese zamke odolese so o Jehova sikavi amen kola metode ov koristini (2. Kor. 2:11; w21.06 14 ¶1-2).

Amare phure phralja hem phenja tane sar dijamantija. On tane but dragocena. E Devleso Lafi phenela soj tane olenge parne bala sar jekh but šuži kruna (Posl. 20:29). Ama, lokho tano te bistra kobor tane on vredna. O terne kola haljona kobor tane o phure vredna, arakhlje diso povredno nego barvalipe. Amare phure phralja hem phenja tane but dragocena e Jehovase. Ov đanela save tane on hem odolese cenini len. O Jehova tano bahtalo ked o phure vaćerena e ternenđe ando odova so sikljilje ki pi služba (Jov 12:12; Posl. 1:1-4). Isto ađahar, o Jehova but cenini olengi istrajnost (Mal. 3:16). Iako nakhlje but pharipa, on hem ponodri verno služinena e Jehovase. Olengi nada akana tani pobari nego ked penđarđe o ćaćipe. O Jehova mangela len sose, iako tane phure, on pana vaćerena ando oleso anav (Ps. 92:12-15; w21.09 2 ¶2-3).

Podijekh puti, šukar tano te razmislina soj tano ko amaro vilo. Šaj te puća amen: „Da li hijum bahtalo samo ked dikhava so hijum pošukar averendar? Da li dava sa mandar ki skupština sose mangava te ovav najšukar ja barem hari pošukar averendar? Ja ćerava odova sose mangava te dav mo najšukar e Jehovase?“ I Biblija phenela so na valjani te uporedina amen averencar. Sose? Ako mislinaja so hijam pošukar averendar, tegani šaj te ova ponosna. Ki aver strana, ako mislinaja so ništa na vredinaja hem so avera tane ko sa pošukar amendar, amen ka ova obeshrabrime (Rimlj. 12:3). Na valjani te bistra so o Jehova na privucinđa amen koro peste sose hijam šuže, sose đanaja te vaćera šukar, ja sose isi amen but amala, već sebepi so mangaja le hem sose mangaja te šuna olese Ćhave (Jov. 6:44; 1. Kor. 1:26-31; w21.07 14-15 ¶3-4).

Te šaj te ćera odova, valjani te molina amen, te proučina e Devleso Lafi hem hor te razmislina ando odova. Ićer tut ko odova so sikljoveja hem rode e Jehovastar te del tut snaga. Oleso sveti duh ka pomožini tut te sikljove te na uporedine tut averencar. Isto ađahar, ako i zavist hem o ponos mukhlje po koreno ano to vilo, o Jehova ka pomožini tut te haljove odova hem sigate e korenoja te ikale odola osobine ando to vilo (2. Let. 6:29, 30). O Jehova najšukar đanela soj tano ko amaro vilo. Ov đanela so borinaja amen te na ćera o lošna buća kola ćerena o manuša ko akava sveto hem so borinaja amen amare manencar. Ked o Jehova dikhela so daja sa amendar te borina amen asavke bućencar, oleso mangipe premalo amende ovela sa pobaro. O mangipe kova o Jehova isi le premalo amende, šaj te uporedini pe e mangipaja kova jekh daj isi la premali pi beba (Is. 49:15). But hijam bahtale te đana so o Jehova mangela amen pana pobuter ked dikhela kobor trudinaja amen te da amaro najšukar olese (w21.07 24-25 ¶17-19).

Pana pobahtale ka ova, ako daja sa amendar te ćera amare zadatkija. De sa tutar ki služba hem ko odova so ćereja ki skupština (Dela 18:5; Jevr. 10:24, 25). Pripremin tut šukar aso sastankija hem de komentarija. Ćer celone vileja o učenička zadatkija kola dobineja. Ako o starešine pućena tut te ćere dijekh buti ki skupština, ov tačno hem odgovorno. Ma mislin so i buti koja ćereja ki skupština nane važno hem so našaleja to vreme. De sa tutar te ćere pana pošukar odija buti (Posl. 22:29). Ako deja sa tutar đi ćereja te zadatkija, tegani ka ove pana popaše e Jehovaja hem ka ove pana pobahtalo (Gal. 6:4). Isto ađahar, na ka ovel tuće pharo ked avera dobinena o odgovornostija kola tu mangljan (Gal. 5:26; w21.08 22 ¶11).

Ma ov ponosno hem mukh e Jehova te sikavi tut. Sar so sebepi o nabormipe amaro vilo na ka ćerel šukar, isto ađahar, sebepi o ponos amenđe ka ovel pharo te šuna e Jehova. Iako o fariseija hine len jasno dokaz so o Devel dinđa e Isusese po duh hem so ov tano e Devleso Ćhavo, on na manglje te verujinen ko odova sose hine ponosna (Jov. 12:37-40). Ađahar, on našalđe i prilika te živinen večno (Mat. 23:13, 33). Odolese, but tano važno hem ponodri te mukha e Devleso Lafi hem oleso duh te pomožinen amen te menjina amen hem te utičinen ko odova sar razmislinaja hem save odluke anaja. Odolese so hine ponizno, o Jakov mukhlja e Jehova te sikavi le hem ulo but šukar učitelj (w22.01 10 ¶7).

Ked hijam „istrajna ki molitva“, šaj te ova sigurna so amaro nebesko Dad ka šunel amen (Kol. 4:2). Iako šaj te dićhol amenđe so o odgovor ko amare molitve harini, o Jehova dela po lafi so „ked valjani amenđe pomoć“ ov ka odgovorini ko amare molitve hem so odova ka ovel ko pravo vreme (Jevr. 4:16). Odolese, na valjani te holjana upro Jehova ako na odgovorini amenđe odobor sigate kobor bi amen mangaja. Na primer, šaj beršencar molinaja amen te avel e Devleso Kraljevstvo hem te cidel sa o lošna buća kola isi ko akava sveto. Čak hem o Isus phenđa so valjani te molina amen aso odova (Mat. 6:10). Ama, nane mudro te našala amari vera ko Devel samo sebepi so o kraj na alo tegani ked amen mislinđam (Avak. 2:3; Mat. 24:44). Amen ka mothova so hijam mudra, ako ađićeraja upro Jehova hem ako hijam uverime so ov ka odgovorini ko amare molitve. O Jehova već odredinđa o dive ked ka avel o kraj hem šaj te ova sigurna so odova dive na ka harini. Ov sigurno so odova dive ka ovel najšukar aso sa o manuša (Mat. 24:36; 2. Petr. 3:15; w21.08 10 ¶10-11).

O ponizna manuša haljona so, sar đana o berša, on našti te ćeren sa odova so angleder ćerđe. Na primer, ked o pokrajinska nadglednikija pherena 70 berš, on tane zamolime te prihvatinen avera zaduženja. Odova šaj te ovel lenđe pharo sose hine bahtale te pomožinen e phralenđe. Ama, on haljona soj tano pošukar o poterne phralja te ćeren odija služba. On mothovena slično stav kova hem o Levitija ko purano vreme hine len. Ked pherđe 50 berš, on više naštinđe te služinen ko sveto šatori. Ama, odola Levitija aćhilje bahtale. Olenđe na hine važno kova zadatko ćerena. On ćerđe odova so šaj hem pomožinđe e ternenđe (Br. 8:25, 26). Avdije, o pokrajinska nadglednikija kola isi len 70 berš, šaj te pomožinen hem te ohrabrinen e phralen hem e phenjen ki skupština ki koja služinena (w21.09 8-9 ¶3-4).

O Isus vaćerđa jekh but šuži priča ando našaldo ćhavo, koja tani pisimi ko Luka 15:11-32. Jekh terno ćhavo na manglja te šunel pe dade, ikljilo kotar ćher hem đelo te živini „ki jekh phuv koja hine but dur.“ Uduri živinđa nemoralno hem trošinđa sa po barvalipe. Ked hine lese pharo, ov počminđa te razmislini kotar po životi. Tegani haljilo so hine lese but pošukar ko pe dadeso ćher. Sar so o Isus phenđa, odova terno ćhavo alo ki godi. Ov odlučinđa te irini pe ćhere hem te molini pe dade te oprostini lese. Ked haljilo so grešinđa, odova hine but važno. Ama, odova na hine dovoljno. Ov morandilo diso te ćerel. O našaldo ćhavo mothovđa so ćaće kajini pe. Akava nane samo jekh but šuži priča. O starešine šaj but te sikljon olatar ked valjani te odlučinen da li jekh phral ja phen ćaće kajini pe palo odova so ćerđa ozbiljno greh (w21.10 5 ¶14-15).

So na ka ovel tresimo ja uništimo? O apostol Pavle pisinđa: „Odolese so valjani te dobina o Kraljevstvo kova našti te ovel tresimo, hajde te da sa amendar te ovel amen dar hem strahopoštovanje đi služinaja e Devlese premali olesi volja“ (Jevr. 12:28). Palo odova so ka završini pe o poslednjo tresibe, samo e Devleso Kraljevstvo večno ka aćhol (Ps. 110:5, 6; Dan. 2:44). Na aćhilo pana but vreme! O manuša mora te odlučinen so ka ćeren. Ako hem ponodri ka oven deo ando akava sveto, on ka oven uništime. Ama, ako odlučinena te služinen e Jehovase hem ako menjinena disave buća ko po životi, on šaj večno te živinen (Jevr. 12:25). Ked propovedinaja, amen pomožinaja e manušenđe te anen odija važno odluka. Isto ađahar, na mangaja te bistra o lafija ando amaro Gospod, o Isus kova phenđa: „Akija šukar vest ando Kraljevstvo ka propovedini pe ko celo sveto sar svedočanstvo sa e narodonđe, hem tegani ka avel o kraj“ (Mat. 24:14; w21.09 19 ¶18-20).

Tumen phraljalen, kola služinena sar starešine, koristinen svako prilika te ohrabrinen okolen kase tano neko isključimo. Odija tani tumari odgovornost (1. Sol. 5:14). Odova šaj te ćeren ako vaćerena olencar angleder hem palo sastanko. Posetinen len hem molinen tumen olencar. Vićinen len te đan tumencar ki služba ja te aven ko tumaro porodično proučibe. O starešine valjani te mothoven so brininena pe ando okola kola tane ko pharipa, so mangena len hem so haljona len (1. Sol. 2:7, 8). O Jehova „na mangela nijekh te merel, nego sare te pokajinen pe“ (2. Petr. 3:9). Iako neko ćerđa greh, oleso životi tano hem ponodri vredno anglo e Jehovase jaćha. Ma bistri so o Jehova but skupo platinđa amen. Ov dinđa pe Ćhave te šaj te ova oslobodime ando greh hem ando meribe. O Jehova mangela te pomožini okolenđe kola aćhavđe le te irinen pe olese. Kotar e Isuseso poređenje ando našaldo ćhavo sikljovaja so o Jehova na našali pi nada so jekh dive on ka irinen pe olese (Luka 15:11-32; w21.09 30-31 ¶17-19).

So ako sebepi to sastipe našti te propovedine sar angleder? Tu šaj te ove bahtalo sebepi o buća kola šaj te ćere. Te dikha so ćerđe o David hem olese manuša ked đelje te spasinen pe porodicen hem te len pe buća ando Amaličanija. Dušel manuša hine but ćhinde hem odolese aćhilje te arakhen o buća. Ama, o David hem avera manuša đelje ko maribe. On pobedinđe hem lelje but vredna buća. Palo odova, o David phenđa so odova so lelje valjani te del pe hem okolenđe so đelje te borinen pe hem okolenđe so aćhilje te arakhen o buća (1. Sam. 30:21-25). Ando akava izveštaj sikljovaja diso andi amari služba. Šaj akana sebepi to sastipe našti te propovedine sar angleder. Ama, ako ćereja sa so šaj hem tu šaj te radujine tut ked neko krstini pe. O Jehova dikhela kobor trudinaja amen hem kobor mangaja le hem odolese ka nagradini amen. Sikavi amen sar te ova bahtale bizo obzir kobor šaj te ćera ki amari služba (Jov. 14:12). Šaj te ova sigurna so o Jehova ka ovel zadovoljno amencar ako na ćhinavaja te ćera odova soj tano šukar (w21.10 28 ¶15-17).

Sar đana o berša, šaj daraja so na ka ova korisna e Jehovase sar ked hijam le poterne. Iako nane amen snaga sar angleder, ipak isi amen iskustvo hem sposobnostija, kola šaj te koristina te pomožina e ternenđe te služinen e Jehovase hem te prihvatinen disave zaduženja ki e Jehovasi organizacija. Ako mangena te pomožinen e ternenđe, o phure phralja hem phenja valjani te oven ponizna. O manuš kova tano ponizno upro avera dikhela sar pobare pestar (Fil. 2:3, 4). O phure phralja hem phenja đanena so ked ićeraja amen ko e biblijake načelija o buća šaj te ćera ko različita načinija. Odolese, on na mislinena so sare valjani te ćeren o buća ađahar sar so on ćerđe len angleder (Prop. 7:10). On mangena te pomožinen e ternenđe ađahar so ka vaćeren lenđe ando odova so nakhlje, ama on haljona so „i scena ando akava sveto menjini pe“ hem so on valjani te sikljon te ćeren o buća ko aver način (1. Kor. 7:31; w21.09 8 ¶1, 3).

O Jehova niked kotar pe sluge na bi rodela te ćeren diso lošno. Ov tano sveto ko sa. Te šaj te setinćeri e Izraelcen ko odova, ko turban ando prvosveštenik hine jekh zlatno pločica ki koja hine pisimo: „O Jehova tano sveto“ (Izl. 28:36-38). O lafija kola pisinđe ki odija pločica valjanđe te setinćeren sarinen so o Jehova tano sveto. Ama, so ako jekh Izraelac hine but dur ando prvosveštenik hem našti hine te dikhel so pisini ki odija pločica? Da li sebepi odova ov na đanđa so o Jehova tano sveto? Naravno so na. O Zakon čitinđa pe anglo sa o manuša hem tegani svako šaj hine te šunel odolese (Pon. zak. 31:9-12). Ked bi tu oveja hine odothe, sigurno bi šuneja akala lafija: „Me hijum o Jehova, tumaro Devel. Oven... sveta, sose me hijum sveto.“ „Oven mo sveto narodo, sose me, o Jehova hijum sveto“ (Lev. 11:44, 45; 20:7, 26; w21.12 3 ¶6-7).

Disave manuša but brininena pe ando odova so ka han, so ka uraven ja kaj ka živinen. Avera šaj živinena ko phuvja kaj tano baro ćororipe hem kaj tano but pharo te arakhen buti. Odolese, olenđe šaj te ovel but pharo te zaradinen dovoljno pare pe porodicaće. Ja šaj okova so anela pare ko ćher mulo hem i porodica akana nane la sostar te živini. Amare šukaripase tano te na brinina amen but, već te ovel amen poverenje ko Jehova. Ma bistri so amaro Dad, o Jehova, dinđa po lafi so ka brinini pe amendar ako ćhivaja le ko prvo than (Mat. 6:32, 33). O Jehova mothovđa so ićeri pe ko poklo lafi (Pon. zak. 8:4, 15, 16; Ps. 37:25). Ako ov brinini pe kotar ćiriklja hem kotar luluđa, tegani nane amen nijekh razlog but te brinina amen odolestar so ka ha ja so ka urava (Mat. 6:26-30; Fil. 4:6, 7). Sar so o mangipe podstaknini e roditeljen te brininen pe kotar pe ćhave, isto ađahar o mangipe podstaknini amare Dade te del amen odova so valjani amenđe (w21.12 17 ¶4-5; 18 ¶8).

Da li dijekh phen ja phral but povredinđa tut? Razmislin ando e Josifeso primer. Ole olese phralja but povredinđe. Ov dinđa e Jehovase po najšukar hem o Jehova blagoslovinđa le sose hine strpljivo hem istrajno. Sar đelo o vreme, o Josif šaj hine te oprostini pe phralenđe hem te dikhel sar o Jehova blagoslovinđa le (Post. 45:5). Hem amenđe, sar e Josifese, ka ovel šukar ako aćhovaja paše e Jehovaja hem ako mukhaja olese te rešini o problemi (Ps. 7:17; 73:28). Ako doživineja disavi nepravda ja ako neko but povredinđa tut, ma bistri so o Jehova tano paše okolencar kola tane „phage vileja“ (Ps. 34:18). Ov mangela tut sose hijan strpljivo hem sose fordeja to pharipe upro leste (Ps. 55:22). Ov tano Sudija andi celo phuv hem sa dikhela (1. Petr. 3:12). Odolese, ked isi tut disavo baro problemi kova našti te rešine, but tano važno te ađićere upro Jehova (w21.08 11 ¶14; 12 ¶16).

Šukar bi ovela te ćera o buća kola ka ćeren e Jehova te ovel bahtalo. Amen valjani o najvažna buća te ćhiva ko prvo than. Iako disave buća nane pogrešna, te šaj šukar te koristina amaro vreme, valjani te birina kola buća ka ćera. Te dikha so hine ked o Isus đelo ki Marija hem ki Marta. I Marta sigurno hine but bahtali sose o Isus alo koro late hem spreminđa but buća hajbase. Ama, olaki phen, i Marija, bešlja uzo Isusese pre hem šunđa odova so sikavđa la. Odova so i Marta ćerđa na hine ništa lošno, ama o Isus phenđa so i Marija birinđa o pošukar deo (Luka 10:38-42, fusn). Palo disavo vreme, i Marija šaj bisterđa so sa hine spremimo hajbase odova dive, ama sigurna hijam so niked na bisterđa odova so o Isus sikavđa la. Sar so i Marija ceninđa odova kratko vreme kova hine e Isuseja, ađahar hem amen valjani te cenina amaro vreme kova isi amen e Jehovaja (w22.01 27 ¶5-6).

Iako o Ahav tegani ponizinđa pe anglo Jehova, odova so ćerđa kasnije mothovđa so na pokajinđa pe ćaće. Ko Izrael, o manuša hem ponodri služinđe e hovavne devlese, e Valese. Ov na pomožinđa e manušenđe te irinen pe e Jehovase. Palo odova so o Ahav mulo, o Jehova mothovđa so ćaće mislinđa olestar. E Devleso proroko o Juj phenđa so ov hine „lošno“ (2. Let. 19:1, 2). Da li o Ahav ćaće pokajinđa pe? Ked bi ovela ađahar, e Jehovaso proroko niked na bi phenela so ov tano lošno manuš kova mrzini e Jehova. Akava mothovi so iako e Ahavese hine žao, ov niked na mothovđa so kajini pe celone vileja. So sikljovaja ando Ahav? Ked o Ilija phenđa lese so ov hem olesi porodica ka oven kaznime, ov ponizinđa pe. Odova hine šukar, ama sa so ćerđa palo odova mothovđa so na pokajinđa pe celone vileja. Olestar sikljovaja so o pokajanje nane samo ked phenaja soj tano amenđe žao aso odova so ćerđam (w21.10 3 ¶4-5, 7-8).

E Isaijase hem olese romnjaće hine najvažno te služinen e Jehovase. O Isaija hine prorok. Verovatno hem olesi romni hine la poklo proročko zadatko, sose oj hine vićimi proročica (Is. 8:1-4). Sar bračno par, on ćhivđe e Jehova ko prvo than. Isto ađahar, tumen kola hijen ko brako šaj te oven sar o Isaija hem olesi romni ako dena sa tumendar te služinen e Jehovase. Pana pobaro poverenje upro Jehova ka ovel tumen ako proučinena e biblijake proročanstvija hem odova sar ispuninđe pe (Titu 1:2). Šaj te razmislinen so šaj tumen te ćeren te šaj te ispunini pe disavo proročanstvo kotar Biblija. Na primer, o Isus phenđa so i šukar vest ka propovedini pe ki celo phuv angleder te avel o kraj. Razmislinen sar tumen pomožinena te ispuninen pe odola lafija. Ked hijen uverime so e biblijake proročanstvija ispuninena pe, tumen ka den sa tumendar te služinen e Jehovase pana pobuter (w21.11 16 ¶9-10).

O Isus brininđa pe andi pi daj koja verovatno hine udovica. Ov manglja e Marija hem odolese phenđa e Jovanese te brinini pe olatar, sose đanđa so ov ka brinini pe ando olake duhovna potrebe. Kotar odova dive, o Jovan ulo e Marijaće sar ćhavo hem brininđa pe olatar sar pe dajatar. Kobor baro mangipe o Isus mothovđa premali akija romni koja sar bijandilo brininđa pe olestar hem aćhilji uzo leste sa đi na mulo! So šaj te sikljova ando e Isusese lafija? Amen šaj te ova popaše amare phralencar hem phenjencar nego amare porodicaja. Amare rođakija šaj te protivinen pe amenđe ja šaj te vazden pe vasta amendar, ama sar so o Isus obećinđa amenđe, ako aćhovaja paše uzo Jehova hem olesi organizacija, amen ka dobina „100 putija poviše“ ando odova so našalđam. But phralja hem phenja andi amari organizacija ka oven amenđe sar ćhavo, ćhaj, daj ja dad (Mar. 10:29, 30). Sar osetineja tut sebepi odova so isi tut phralja hem phenja kola tane ko jekhipe odolese so isi len vera, mangena e Jehova hem jekh jekhe? (Kol. 3:14; 1. Petr. 2:17; w21.04 9-11 ¶7-8).

Sebepi o verno mangipe amen ćeraja pobuter nego so valjani. Avdije, sar angleder, but phralja hem phenja mothovena verno mangipe pe phralenđe, čak hem okolenđe kolen na penđarena. Na primer, ked šunena so ulji disavi prirodno katastrofa, on odmah pućena sar te pomožinen. Isto ađahar, ked neko ki skupština isi le finansijska problemija, o phralja mangena te pomožinen odola osobaće. Sar o Makedoncija ando prvo veko, on ćerena pobuter nego so rodela pe olendar. Te šaj te pomožinen pe phralenđe, on „dena pobuter ando odova so šaj te den“ (2. Kor. 8:3). O starešine pohvalinena e phralen hem e phenjen ked dikhena sar pomožinena averenđe ki skupština. Asavki pohvala šaj te del len snaga hem ponodri te pomožinen averenđe (Is. 32:1, 2; w21.11 11 ¶14; 12 ¶21).

Podijekh puti, sarinenđe amenđe valjani savet. Disavo puti šaj amen ka puća dijekhe phrale kole poštujinaja aso savet. A disavo puti dijekh phral kova brinini pe amenđe šaj te del amen savet sebepi so dikhela so pođinđam ko lošno drumo (Gal. 6:1). Isto ađahar, savet šaj te dobina hem palo odova so ćerđam disavi ozbiljno greška. Nane važno sose dobinđam savet, važno tano te šuna le. Ked ićeraja amen ko odova savet odova tano aso amaro šukaripe hem šaj te spasini amaro životi (Posl. 6:23). Amaro avdisutno stiho phenela amenđe te šuna „o lafija ando mudra manuša.“ Nijekh manuš ki phuv na đanela sa, uvek isi neko ko đanela pobuter hem kova nakhlja diso pobuter ko životi (Posl. 12:15). Odolese ked šunaja o savet amen mothovaja so hijam ponizna, skromna hem so haljovaja so valjani amenđe averengi pomoć te ispunina amare ciljija. O kralj Solomon pisinđa: „O planija propadinena ked nane dogovor, a uspinena ked isi but savetnikija“ (Posl. 15:22; w22.02 8 ¶1-2).

Ked neko ćerđa ozbiljno greh, nane dovoljno samo te phenel soj tano olese žao. Ov valjani te menjini o način sar razmislini hem odoleja so ćerela te mothovi so ćaće kajini pe. Na valjani te ćerel o lošna buća kola angleder ćerđa hem valjani te ćerel o buća kola o Jehova mangela (Jezek. 33:14-16). Soj tano najvažno, ov valjani te del sa pestar palem te ovel paše e Jehovaja. So ka ćere ako to amal ćerđa ozbiljno greh? Ako garavaja o greh kova amaro amal ćerđa, tegani amen na pomožinaja lese. O greh našti te garavi pe sose o Jehova sa dikhela (Posl. 5:21, 22). Amen šaj te pomožina lese ađahar so ka podstaknina le te vaćeri e starešinencar. Ako ov na mangela te phenel e starešinenđe so ćerđa, tegani amen valjani te vaćera olencar ando odova. Ađahar ka pomožina lese (w21.10 7 ¶19-21).

Sare amen valjani te sikljova te ova samopožrtvovana sar o Isus, a na samo o starešine. Ki Biblija pisini so o Isus „ulo sar robo“ (Fil. 2:7). Jekh šukar robo ja sluga, dela sa pestar oleso gospodari te ovel zadovoljno oleja. Odolese so hijam e Jehovase robija hem so služinaja amare phralenđe, amen mangaja pana pobuter te ćera e Jehovase hem te pomožina amare phralenđe. Puć tut: „Da li hijum spremno te dav sa mandar te pomožinav averenđe? Da li hijum spremno te čistinav o than kuri ka ićeri pe o kongres ja te pomožinav ked ćerela pe diso ki dvorana?“ Šaj haljiljan so valjani te ove pana pobuter samopožrtvovano, ama nane tut želja te menjine tut. Phen e Jehovase sar osetineja tut hem rode olestar te del tut hem „želja hem snaga te ćere odova soj tano pali olesi volja“ (Fil. 2:13; w22.02 22-23 ¶9-11).

O Isus mothovđa soj tano obzirno ađahar so hine blago hem razumno (Mat. 11:29, 30). Na primer, ked i Feničanka molinđa le te saćari olake ćhaja, ov ko početko na manglja te ćerel odova, ama ked oj mothovđa so isi la bari vera, ov saćarđa olake ćhaja (Mat. 15:22-28). Iako hine obzirno, odova na ćhinavđa le te del savet. Disavo puti, ov phravdo dinđa savet pe učenikonenđe. Na primer, ked o Petar phenđa lese te ovel šukar premalo peste, o Isus ukorinđa le anglo avera učenikija (Mar. 8:32, 33). Ov na ćerđa odova sose manglja te ponizini e Petare, već te sikavi le. Isto ađahar, ov manglja avera učenikija te haljon so valjani te podržinen le, a na te ćhinaven le te ćerel e Devlesi volja. O Petar sigurno osetinđa bari lađ, ama hem sikljilo diso odolestar. Odova so hijam obzirna na značini so na valjani te da savet okolenđe kas mangaja. Ked ćereja odova, valjani te oponašine e Isuse ađahar so ka de len savet ando Devleso Lafi (w22.03 11 ¶12-13).

Amen služinaja e Jehovase ked vaćeraja olestar (Ps. 34:1). Amen hvalinaja e Jehova ked vaćeraja averenđe kola olese osobine hem o buća kola ov ćerđa posebno mangaja. Ked hijam zahvalna e Jehovase, amen šaj te hvalina le. Ako razmislinaja ando sa o šukar buća kola o Jehova ćerđa amenđe, ka ovel amen but razlogija te hvalina le. Ked propovedinaja, amen „daja e Devlese i žrtva andi hvala, avere lafencar o plod ando muj kova objavini oleso anav“. Sar so angleder te molina amen e Jehovase valjani te razmislina so ka phena, ađahar valjani te razmislina hem sostar ka vaćera e manušencar ki služba. Amen mangaja amari „žrtva andi hvala“ te ovel amaro najšukar so šaj te da olese. Odolese amen pherde vileja vaćeraja e manušencar (w22.03 21 ¶8).