Oktobar

Odova so sikljovaja hem ko so verujinaja avela andi Biblija. Ama, ipak but manuša odbacinena amari poruka sose mislinena so amaro način sar služinaja e Devlese tano but jednostavno hem so odova so amen sikavaja nane odova so on mangena te šunen. So šaj te pomožini amen te na našala amari vera? O apostol Pavle e hrišćanenđe kola živinđe ko Rim phenđa: „I vera avela palo odova so šunaja i poruka, a i poruka širini pe ked vaćeri pe ando Hrist“ (Rimlj. 10:17). Odolese, amen valjani te zorjaćera amari vera ađahar so ka proučina e Devleso Lafi, a na ađahar so ka učestvujina ko disave religiozna ceremonije aso kola i Biblija vaćeri so nane ispravna, kobor god šaj on te izgledinen šuže hem zanimljiva. Amen valjani te zorjaćera amari vera ađahar so šukar ka penđara e Devleso Lafi sose „bizi vera tano nemoguće te ugodini pe e Devlese“ (Jevr. 11:1, 6). Odolese, amenđe na valjani disavo posebno znak ando nebo kova ka uverini amen so arakhljam o ćaćipe. Ako temeljno proučinaja e Devleso Lafi, amen ka uverina amen so arakhljam o ćaćipe hem ka cida amendar bilo koja sumnja (w21.05 4-5 ¶11-12).

O apostol Pavle hine le but problemija. Posebno valjanđa lese e Jehovasi pomoć ked olese neprijateljija marđe le, ćhivđe le ko phanlipe hem manglje te mudaren le (2. Kor. 11:23-25). Ov na lađandilo te phenel so disavo puti valjanđa te borini pe odoleja soj tano obeshrabrimo (Rimlj. 7:18, 19, 24). Isto ađahar, ov hine le problemi pe sastipaja kova hine lese sar „karo ano telo“ hem molinđa e Devle te cidel lestar odova (2. Kor. 12:7, 8). O Jehova dinđa snaga e Pavlese hem ponodri te ćerel pi služba, iako hine le but pharipa. Te dikha so ćerđa o Pavle. Na primer, đi hine ko phanlipe ko jekh ćher ko Rim, ov revno propovedinđa i šukar vest ked bi legarena le anglo okola kola hine ki vlast (Dela 28:17; Fil. 4:21, 22). Isto ađahar, propovedinđa butenđe andi pretorijansko garda hem sarinenđe kola alje te posetinen le (Dela 28:30, 31; Fil. 1:13). Baš ko odova vreme, o Devel koristinđa e Pavle te pisini o poslanice kola but pomožinena hem amenđe avdije (w21.05 21 ¶4-5).

Odolese so hine ponosno, o kralj Ozija na šunđa o savet hem ćerđa diso so na hine le pravo te ćerel. Ov hine but sposobno manuš. Pobedinđa ko but mariba, gradinđa bare dizja hem hine but uspešno zemljoradniko. O ćaćutno Devel blagoslovinđa le (2. Let. 26:3-7, 10). Ki Biblija pisini: „Ked ulo moćno, oleso vilo odobor ulo oholo so kokri pes igarđa ki propast.“ O Jehova phenđa so samo o sveštenikija šajinđe te prinosinen o kad ko hram. Ama, o kralj Ozija ćerđa diso so na hine le pravo te ćerel. Ov khuvđa ko hram hem prinosinđa o kad. E Jehovase na sviđinđa pe odova hem odolese ćerđa te ovel le guba. Đi o krajo ando poklo đivdipe, o Ozija hine le guba (2. Let. 26:16-21). Da li hem amen šaj te ova ponosna hem te grešina sar o Ozija? Ja šaj, ako mislinaja amendar pobuter nego so valjani. Niko amendar na valjani te bistrel so o sposobnostija kola isi amen hem o zaduženja kola dobinaja ki skupština avena ando Jehova (1. Kor. 4:7). Ako hijam ponosna, o Jehova na ka koristini amen (w21.06 16 ¶7-8).

O Isus đanđa so olese učenikija na ka ovel len uvek šuže iskustvija ki služba. U stvari, amen ni na đanaja kobor ando odola manuša ulje e Hristese učenikija. On valjanđe te haljon so na valjani te oven bahtale sebepi so o manuša šunena len, već odolese so olengi služba ćerela e Jehova bahtalo. Ako istrajinaja ki amari služba, ka ovel amen večno životi. Ked daja sa amendar te propovedina hem te sikava averen, amen „sejinaja ko duho“ ađahar so dozvolinaja e Devleso duho te utičini upro amaro životi. O Jehova dela amen po lafi so ka dobina večno životi, čak iako nikase na pomožinđam te resel đi o krštenje (Gal. 6:7-9; w21.10 26 ¶8-9).

Jekhvar, sebepi so celo dive propovedinđe, o Isus hem olese učenikija but ćhindilje. On manglje hari te odmorinen pe, ama but manuša alje koro lende. O sažaljenje podstakninđa e Isuse te sikavi len „ando but buća.“ Ov đanđa kobor tano olenđe pharo hem so valjani lenđe nada. Isto ađahar, hem o manuša avdije isi len problemija hem nane len nisavi nada, iako dićhona soj tane bahtale hem zadovoljna pe đivdipaja. On tane sar o bakre kola našaldilje hem nane len pastiri kova ka brinini pe olendar. O apostol Pavle phenđa so asavke manuša na penđarena e Devle hem so nane len nada (Ef. 2:12). Ked razmislinaja ando odova kobor tano e manušenđe potrebno te penđaren e Devle, o mangipe hem o saosećanje ka podstaknini amen te pomožina lenđe. Najšukar način sar šaj te ćera odova tano ađahar so ka proučina i Biblija olencar (w21.07 5 ¶8).

So šaj nekas te ćhivel te mangel te mothovi soj tano pošukar averendar? Jekh buti šaj te ovel sose neko mangela te vazdel kokri pes. Asavki osoba tani ponosno hem sebično. O zavidno manuš na samo so mangela te lel averendar odova so isi len, već hem mangela on te aćhon bizo odova. U stvari, o zavidno manuš mrzini averen. Ked neko vazdela pe hem ked tano zavidno, odova šaj te uporedini pe odoleja sar ked ko avioni ćhivela pe lošno gorivo. Jekh vreme o avioni šaj te letini. Ama, sebepi so isi le lošno gorivo ko krajo o avioni ka perel. Isto ađahar, neko šaj te služini e Jehovase jekh vreme, ama ako tano zavidno hem mangela te vazdel pe, ov ka perel (Posl. 16:18). Ov ka ćhinavi te služini e Jehovase hem ađahar ka povredini kokri pes hem averen. Ama, so šaj te ćera ako dikhaja so vazdaja amen? Tegani, šukar tano te ićera amen ko savet kova o apostol Pavle dinđa: „Ma ćeren ništa andi holi ja sose mangena te vazden tumen, nego oven ponizna hem dikhen averen sar pobare tumendar“ (Fil. 2:3; w21.07 15-16 ¶6-8).

Disave manuša mislinena so i pravo religija valjani te del odgovorija ko sa amare pućiba, čak iako i Biblija na vaćeri odolestar. Ama, da li odova ćaće šaj te ovel ađahar? Te dikha o primer ando apostol Pavle. Ov phenđa pe phralenđe: „Sa proverinen te šaj te uverinen tumen so odova tano o ćaćipe.“ Ama, isto ađahar, ov phenđa so isi but buća kola ni ov kokri na haljola (1. Sol. 5:21). Ov pisinđa: „Amen đanaja samo disave buća... sose akana dikhaja ko ogledalo kuri na dićhona jasno sa o buća“ (1. Kor. 13:9, 12). Sar o apostol Pavle, ni amen našti sa te haljova. O Pavle haljilo o osnovna e biblijake sikljoviba. Ov đanđa odobor kobor valjanđa lese te šaj te ovel sigurno so arakhlja o ćaćipe. Amen šaj te uverina amen so arakhljam o ćaćipe ađahar so ka dikha sar o Isus služinđa e Devlese hem sar e Jehovase svedokija odova avdije ćerena (w21.10 18-19 ¶2-4).

Nane važno da li hijen ki punovremeno služba ja na, tumen phure phraljalen hem phenjalen, šaj te pomožinen averenđe ko but načinija. Sar? Oven bahtale ked dobinena neve zadatkija, ćhiven tumenđe neve ciljija hem umesto te žalinen aso buća kola našti te ćeren, dikhen so šaj te ćeren. O kralj David manglja te ćerel hram e Jehovase. Ama, ked o Jehova phenđa so oleso ćhavo ka ćerel o hram, o David prihvatinđa odija odluka hem pripreminđa sa so valjani aso hram (1. Let. 17:4; 22:5). O David na mislinđa so bi ovela pošukar ov te ćerel o hram, sose oleso ćhavo, o Solomon, tano „terno hem neiskusno“ (1. Let. 29:1). O David đanđa so i gradnja ando hram zavisinđa ando Jehova, a na ando odova kobor tane iskusna o manuša kola ćerena le. Sar o David, hem amare phure phralja dena sa pestar te služinen e Jehovase, iako olenge zadatkija menjinena pe. On đanena so o terne phralja šukar ka ćeren o zadatkija kola on angleder ćerđe, sebepi so o Jehova ka pomožini lenđe (w21.09 9 ¶4; 10 ¶5, 8).

Ako mangaja te ova bahtale hem te đana sose živinaja, važno tano te ćhiva amenđe ciljija. Ama, odova valjani te ćera premalo amare sposobnostija hem okolnostija, a na premalo averenge. Tegani na ka ova razočarime hem obeshrabrime (Luka 14:28). Sar e Jehovaso sluga, tu hijan olese posebno. Nijekh phral hem nijekh phen nane sar tute. O Jehova na cidinđa tut koro peste odolese so hijan le pošukar ando sa avera manuša. Ov dikhlja so isi tut ko vilo hem dikhlja so hijan ponizno manuš kova tano spremno te mukhe le te oblikujini tut. Ov sigurno so o Jehova tano bahtalo ked dikhela so deja sa tutar te služine olese. Ti istrajnost hem vernost mothovena so isi tut „čisto hem šukar vilo“ (Luka 8:15). Odolese hem ponodri de e Jehovase toklo najšukar. Tegani ka ovel tut razlog te ove bahtalo sebepi odova so tu ćereja (Gal. 6:4; w21.07 24 ¶15; 25 ¶20).

But putija valjani te ova strpljiva đi ađićeraja o Jehova te ispravini svako nepravda. Na primer, ked o starešine šunena so neko ki skupština ćerđa ozbiljno greh, on molinena pe hem rodena mudrost ando Jehova (Jak. 3:17). On ćerena odova sose ki odija situacija mangena te dikhen ađahar sar so o Jehova dikhela (Jak. 5:19, 20). Olengo cilj tano te pomožinen odole manušese. Isto ađahar, on dena sa pestar te arakhen i skupština hem te utešinen okolen kola tane povredime (2. Kor. 1:3, 4). Ked o starešine šunena so neko ćerđa ozbiljno greh, najangleder on mangena te haljon so ćaće ulo. Ama, aso odova valjani vreme. On molinena pe, dena savet ando e Devleso Lafi hem ukorinena odole manuše „odobor kobor valjani“ (Jer. 30:11). O starešine na mangena te siđaren, niti but te ađićeren. Ked ićerena pe ko smernice kola avena ando Jehova, tegani odova ka koristini sarinenđe ki skupština (w21.08 11 ¶12-13).

Odolese so hine bari bokh ko Izrael, i Nojemina, olako rom hem olenge duj ćhave đelje te živinen ko Moav. Đi hine uduri, e Nojeminako rom mulo, a olake duj ćhave ženinđe pe e ćhajencar ando Moav. Ama, hari palo odova hem olake ćhave mulje (Ruta 1:3-5). Sebepi sa odova so ulo, i Nojemina hine la but bari dukh ko vilo. Oj hine odobor obeshrabrimi so mislinđa so o Jehova aćhavđa la. Aće, so phenđa ando Devel: „O Jehova uštindilo protiv mande... O Svemoćno mukhlja mo životi te ovel but ćerko.“ Isto ađahar phenđa: „O Jehova irinđa pe protiv mande... o Svemoćno ćerđa maje pharipa“ (Ruta 1:13, 20, 21). O Jehova haljola so „o pharipa šaj e mudro manuše te našalen andi godi“ (Prop. 7:7). Ov podstakninđa e Ruta te mothovi laće verno mangipe. I Ruta hine spremno te mothovi laće verno mangipe, te pomožini laće te na ovel odobor obeshrabrimi hem te haljol so o Jehova tano uzo late (w21.11 9 ¶9; 10 ¶10, 13).

Šaj već avdije daja amaro najšukar e Jehovase. Ama, da li odova značini so našti pana pobuter te ćera e Jehovase? Na. Amen valjani te ćhiva amenđe ciljija, sar soj tane te ova pana pošukar ki služba hem te pomožina amare phralenđe. Ked averen ćhivaja ko prvo than, ka ispunina amare ciljija (Posl. 11:2; Dela 20:35). Kola ciljija šaj te ovel tut? Molin tut e Jehovase te šaj te haljove kola ciljija ćaće šaj te ispunine (Posl. 16:3). Da li šaj te ćhive tuće cilj te ove pomoćno ja stalno pioniri, te služine ko Betel, ki gradnja, te sikljove dijekh nevi ćhib ja te služine ko than kuri valjani pobuter objaviteljija? (w21.08 23 ¶14-15).

E Jehovase tano but važno o verno mangipe (Os. 6:6). Prekalo prorok Mihej, o Devel podstaknini amen te manga o verno mangipe (Mih. 6:8, fusn). Ama, te šaj te ćera odova, valjani te đana soj tano o verno mangipe. Soj tano o verno mangipe? O lafija „verno mangipe“ pominena pe prekalo 200 putija ko prevod Novi svet, ki srpsko ćhib. Premalo Rečnik pojmova o verno mangipe značini „te ova potpuno predana, verna, privržena hem odana. Odola lafija mothovena kobor o Jehova mangela e manušen, ama hem o mangipe kova o manuša mothovena jekh jekhese.“ O Jehova tano najbaro primer ko odova sar mothovi pe o verno mangipe. O kralj David phenđa: „Jehova, to verno mangipe resela đi ko nebo... Kobor tano šukar to verno mangipe, Devla!“ (Ps. 36:5, 7). Da li hem tu cenineja e Devleso verno mangipe sar o David? (w21.11 2 ¶1-2; 3 ¶4).

O Isus kova tano „prvo kotar sa soj tano stvorimo“ hem o anđelija tane deo andi e Jehovasi porodica (Kol. 1:15; Ps. 103:20). Ked hine ki phuv, o Isus pomožinđa e manušenđe te dikhen upro Jehova sar upro po Dad. Đi vaćerđa pe učenikonencar, o Isus objasninđa lenđe so o Jehova tano hem oleso hem olengo Dad (Jov. 20:17). Ked predajinđam amaro životi e Jehovase hem ked krstinđam amen, amen uljam deo andi e Jehovasi porodica (Mar. 10:29, 30). O Jehova tano Dad kova but mangela amen. O Isus mangela te dikha upro Jehova ađahar sar so ov dikhela le – sar jekh roditelj kova but mangela amen, kasa šaj te vaćera bilo ked, a na sar jekh strogo Devel kova samo vaćeri amenđe so te ćera. Ov phenđa lenđe: „Molinen tumen ađahar: ’Dade amareja.‘“ O Isus šaj hine te phenel amenđe, đi molinaja amen e Jehovase te koristina o titule sar soj tane Svemoćno, Stvoritelj ili Kralj andi večnost. Sa akala titule tane šukar, sose ki Biblija on koristinena pe te mothoven savo tano o Jehova (Post. 49:25; Is. 40:28; 1. Tim. 1:17). Ama, o Isus phenđa so ked molinaja amen šaj te phena e Jehovase „Dade“ (w21.09 20 ¶1, 3).

O kralj Manasija na manglja te šunel o savetija kola o Jehova dinđa lese prekalo pe prorokija. Odolese „o Jehova anđa [upri Juda] o vojna zapovednikija ando asirsko kralj hem on astarđe e Manasija. On arakhlje le ki jekh pećina, phanlje le ko lancija hem legarđe le ko Vavilon.“ Odothe, o Manasija verovatno počminđa te razmislini kotar sa o lošna buća kola ćerđa. Ov „but ponizinđa pe anglo Devel kotar pe phure.“ Ama, odova na hine sa. Ov „celone vileja molinđa e Jehova, pe Devle, te smilujini pe upro leste.“ O Manasija na ćhinavđa te molini pe e Devlese (2. Let. 33:10-12). Sar đelo o vreme, o Jehova odgovorinđa ko e Manasijase molitve. Kotar olese molitve, o Jehova dikhlja so ov ćaće menjinđa pe. Odolese, o Jehova oprostinđa lese odova so ćerđa hem ćhivđa le palem te ovel kralj. O Manasija dinđa sa pestar te mothovi so ćaće kajini pe (w21.10 4 ¶10-11).

O Akila hem i Priskila morandilje te mukhen po than, te đan te živinen ko aver than hem uduri te počminen te ćeren pi buti. Čim reslje ko Korint, on duj ćerđe sa so šaj te pomožinen e skupštinaće hem zajedno e Pavleja ohrabrinđe bute phralen hem phenjen. Kasnije, on đelje hem ko avera dizja te propovedinen (Dela 18:18-21; Rimlj. 16:3-5). On duj ćerđe but buća hem odova anđa lenđe baro bahtalipe! O bračna parija avdije šaj te oven sar i Priskila hem o Akila ako ćhivena o Kraljevstvo ko prvo than. Đi tane ki veza, šukar bi ovela jekh ćhavo hem jekh ćhaj te vaćeren kotar pe ciljija. Ked ćhivena pese ciljija hem ked dena sa pestar te ispuninen len, on pana pošukar ka dikhen sar o Jehova pomožini lenđe (Prop. 4:12; w21.11 17 ¶11-12).

But tano važno te ićera amen ki akija zapovest hem te poštujina amare roditeljen. Ma bistri so o lafija andi Levitska 19:3, te poštujina amare dade hem amare daja, avena odmah palo lafija: „Oven sveta sose me o Jehova, tumaro Devel, hijum sveto“ (Lev. 19:2). Ked razmislineja so o Jehova phenđa so valjani te poštujina amare roditeljen, šaj pućeja tut: „Da li me poštujinava me roditeljen?“ Šaj ki godi avena tuće o situacije ked valjanđan te ćere diso pobuter olenđe. Ama, ma mislin so akana tano kasno. O vreme našti te irine, ama akana šaj te de sa tutar te ćere lenđe diso pobuter. Šaj te odvojine to vreme olenđe, te đa te pazarine olenđe, te pomožine len te aćhon paše e Jehovaja, te ohrabrine len hem te utešine len. Ked ćereja ađahar, tu mothoveja so ićereja tut ko odova so pisini ki Levitska 19:3 (w21.12 4-5 ¶10-12).

O kralj David ćerđa but bare greške. Na primer, ov ćerđa preljuba e Vitsavejaja hem mudarđa olake rome (2. Sam. 11:2-4, 14, 15, 24). Sebepi odova, o David, olesi porodica hem olese romnja but patinđe (2. Sam. 12:10, 11). Jekh aver puti o David phenđa te đenen olese vojska, iako o Jehova na phenđa lese te ćerel odova. Odoleja mothovđa so nane le poverenje ko Jehova. Ama, so ulo sebepi odova? Oko 70 000 Izraelcija tegani mulje (2. Sam. 24:1-4, 10-15). Da li bi osudineja e Davide? Da li bi pheneja so na zaslužini o Jehova te oprostini lese? O Jehova na mislinđa ađahar. Ov na bisterđa so o David celo po životi hine lese verno hem so kajinđa pe celone vileja aso lošna buća kola ćerđa. Sebepi odova, o Jehova oprostinđa lese. Ov đanđa so o David mangela le celone vileja hem so manglja te ćerel odova soj tano ispravno. But hijam zahvalna sose amaro Devel rodela odova soj tano šukar koro amende (1. Kralj. 9:4; 1. Let. 29:10, 17; w21.12 19 ¶11-13).

O Isus mothovđa soj tano saosećajno premalo hendikepirana manuša. Ked o učenikija ando Jovan Krstitelj alje ko Isus, ov phenđa lenđe te phenen e Jovanese: „O korore dikhena, o sakatija phirena, o gubava čistinena pe, o kašuke šunena, o mule uštena.“ Ked o manuša dikhlje o čudija kola o Isus ćerđa, on „hvalinđe e Jehova“ (Luka 7:20-22). Amen mangaja te ova sar o Isus hem mangaja te mothova saosećanje premalo asavke manuša. Odolese, amen hijam šukar hem strpljiva premalo lende. Avdije, našti te ćera čudija sar o Isus. Ama, olenđe hem okolenđe so na penđarena o ćaćipe šaj te vaćera i šukar vest so o Devel pana hari ka cidel sa odova soj tano lošno hem so zauvek ka živinen ko raj ki phuv (Luka 4:18). Sebepi odova, već akana but manuša hvalinena e Devle (w21.12 9 ¶5).

O Jakov koristinđa e Devleso Lafi ked sikavđa e phralen. Ađahar, ov pomožinđa lenđe te haljon so o Jehova uvek ka nagradini okolen soj tane verna olese, sar o Jov. Ked sikavđa e phralen, ov na koristinđa disave phare lafija. Ađahar, ov vazdinđa e Jehova, a na pes. So sikljovaja? Ov jednostavno hem koristin e Devleso Lafi. Ked sikavaja averen, amen na valjani te mothova kobor amen đanaja, već valjani te mothova kobor o Jehova đanela hem kobor brinini pe olendar (Rimlj. 11:33). Odova šaj te ćera ađahar so ka koristina e Devleso Lafi đi vaćeraja olencar. Umesto te phena lenđe so bi amen ćeraja ko olengo than, amen valjani te pomožina len te razmislinen ando biblijake primerija hem te haljon sar o Jehova razmislini hem sar osetini pe. Tegani, on ka ovel len želja te ćeren odova so o Jehova mangela, a na odova so amen mangaja (w22.01 11 ¶9-10).

O Devel na rodela ando pe sluge samo te na povredinen avere manušen. Te manga amare pašutnen sar kokri amen tano but važno ako mangaja o Devel te ovel zadovoljno amencar. O Isus mothovđa so i zapovest andi Levitska 19:18 tani but važno. Jekhvar, jekh fariseji pućlja e Isuse: „Koja tani i najbari zapovest ko Zakon?“ O Isus phenđa so „i najbari hem i prvo zapovest“ tani so valjani te mangel e Jehova sa pe vileja, sa pe dušaja hem sa pe gođaja. Palo odova, citirinđa o lafija andi Levitska 19:18, kuri pisini: „I dujto, slično sar akija, tani: ’Mang te pašutne sar kokri tut‘“ (Mat. 22:35-40). Isi but načinija sar šaj te mothova so mangaja e manušen. Jekh način tano te ićera amen ko savet kova pisini ki Levitska 19:18. Odothe pisini: „Ma irin o lošnipe hem ma ićer holi“ (w21.12 10-11 ¶11-13).

O Isus dinđa le po vas hem spasinđa e Petare. Ma bistri so o Petar phirđa upro pani sa đi dikhlja ko Isus. Ama, ked o Petar cidinđa pe jaćha kotar Isus hem ked počminđa te dikhel kobor tani i oluja zorali, ov darandilo hem počminđa te tasljol (Mat. 14:24-31). Amen avdije šaj but te sikljova ando apostol Petar. Ked ikljilo ando čamco hem ked počminđa te phirel upro pani, ov na mislinđa so ka daral andi oluja hem so ka tasljol. Ov manglja te phirel upro pani sa đi na avela đi o Isus. Ama, umesto te dikhel ko Isus, ov dikhlja ko odova kobor tani i oluja zorali hem darandilo. Amen avdije našti te phira upro pani. Ama, sar so e Petarese valjanđa vera te šaj te phirel upro pani hem amenđe valjani vera te šaj te istrajina ko amare problemija. Ako bistraja upro Jehova hem upro olese obećanja, amari vera ka slaboni hem amare problemija sigate ka ućharen amen. Odolese, kobor god bare problemija te ovel amen, valjani te razmislina ando Jehova hem ando odova so ov šaj te pomožini amen (w21.12 17-18 ¶6-7).

Ked molinaja amen vaćeraja amare nebesko Dadeja, kova but mangela amen. Ked proučinaja i Biblija, sikljovaja ando Devel, kastar avela i mudrost (Posl. 2:1-5). Ked hor razmislinaja, pana pošukar haljovaja savo tano o Jehova hem so ka ćerel e manušenđe. Nane pošukar način te koristina amaro vreme. Ama, sar šaj pana pošukar te koristina o vreme kova isi amen? Trudin tut te arakhe mirno than kuri šaj te moline tut. Te dikha so o Isus ćerđa. Angleder te počmini pi služba ki phuv, o Isus 40 dive hine ki pustinja (Luka 4:1, 2). Uduri ov šaj hine te molini pe hem hor te razmislini ando odova so o Jehova rodela olestar te ćerel. Odova pomožinđa le te ovel spremno aso pharipa kola ađićerđe le (w22.01 27-28 ¶7-8).

Aver način sar dobinaja savet tano ked jekh starešina ja disavo aver zrelo phral phenela amenđe ko so valjani te ćera. Ako neko odobor mangela amen soj tano spremno te del amen savet, valjani te da sa amendar te ićera amen ko odova savet. Šaj te ovel amenđe but pharo ked dobinaja savet, čak šaj te uvredina amen. Sose? Iako hijam spremna te phena so hijam nesavršena, šaj te ovel amenđe but pharo te prihvatina o savet ked neko phenela amenđe kaj pogrešinđam (Prop. 7:9). Tegani, šaj te opravdina amen hem te puća amen sose dinđa amen odova savet ja te holjana sebepi o način ko kova dinđa amen savet. Čak šaj te kritikujina le hem te phena: „Kotar lese pravo te phenel maje odova? Nek dikhel kokri pes!“ Isto ađahar, ako na sviđini pe amenđe odova savet, šaj na ka šuna le ja ka puća nekas avere aso savet sose mislinaja so ov ka phenel amenđe odova so amen mangaja te šuna (w22.02 8-9 ¶2-4).

Da li hem ko nevo sveto ka ovel amen disave pharipa ko kola ka dićhol kobor tano baro amaro poverenje ko Jehova? Razmislin so hine sigate palo odova so o Izraelcija ikljilje ando Egipat. Disave počminđe te žalinen pe sebepi so na hine len hrana koja hine len ko Egipat hem na hine zadovoljna odoleja so o Jehova dinđa len mana (Br. 11:4-6; 21:5). Da li hem amen ađahar ka razmislina pali bari nevolja? Amen na đanaja kobor bari buti ađićeri amen hem kobor dugo valjani te čistina i phuv te šaj hari pohari te ovel raj. Tegani ka ovel amen but buti hem ko početko amaro životi na ka ovel lokho. Da li ka žalina amen ko odova so o Jehova tegani ka del amen? Jekh buti tani sigurno: Ako avdije hijam zahvalna aso sa o buća kola o Jehova dela amen, verovatno hem tegani ka ova zahvalna (w22.02 7 ¶18-19).

Ko proročanstvo ando Zaharija 8:23 o lafija „Judejco“ hem „tumencar“ odnosinena pe ki isto grupa – upro pomazanikija kola tane pana ki phuv (Rimlj. 2:28, 29). „O deš manuša ando sa o narodija“ predstavinena avere bakren. On „dolena“ e pomazanikonen ađahar so zajedno olencar verno služinena e Devlese. Isto ađahar, o proročanstvo ando Jezekilj 37:15-19, 24, 25 o Jehova ispuninđa ađahar so ćerđa o pomazanikija hem o avera bakre zajedno te služinen olese ko jekhipe. Ko proročanstvo pominena pe duj kašta. Okola so isi len nada te živinen ko nebo tane sar o kaš „aso Juda“ (o pleme kotar kova o izraelska kraljija hine birime), a okola so isi len nada te živinen ki phuv tane sar o kaš „aso Jefrem.“ Te šaj te oven „jekh kaš“, o Jehova ćerđa odola duj grupe te oven ko jekhipe. Odova značini so sare on služinena ko jekhipe hem so olengo kralj tano o Isus Hrist (Jov. 10:16; w22.01 22 ¶9-10).

O Isus phenđa so disave ko oleso vreme ćaće pomožinđe e ćororenđe, ama odova ćerđe te šaj avera te dikhen len hem te hvalinen len. Iako odova so ćerđe hine šukar, anglo Jehovase jaćha na hine odobor vredno (Mat. 6:2-4). Amen šaj te mothova šukaripe samo ako ando vilo ćeraja odova soj tano šukar. Odolese, puć tut: „Da li samo đanava soj tano šukar ili ćerava odova? Ked mangava te ćerav diso soj tano šukar, sose ćerava odova? O sveti duh tano e Devlesi aktivno sila koja podstaknini amen diso te ćera (Post. 1:2). Svako osobina valjani te podstaknini amen te ćera diso. Na primer, o učenik Jakov pisinđa: „I vera bizo delija tani muli“ (Jak. 2:26). Odova šaj te phena hem aso sa avera osobine. Svako puti ked mothovaja o osobine kola tane plod ando sveti duh, amen mothovaja so e Devleso duho pomožini amen (w22.03 11-12 ¶14-16).

Iako služinaja e Jehovase hem ćeraja šukar buća averenđe, o apostol Petar podstakninđa amen te ćera pana jekh važno buti. Angleder te phenel so valjani te da sa amendar te ova sveta, ov phenđa: „Pripreminen tumari godi asi bari buti“ (1. Petr. 1:13). Koja tani odija buti? O Petar phenđa so e Isusese pomazana phralja ka „objavinen e Devleso šukaripe“ (1. Petr. 2:9). Avdije, sare amen ćeraja odija važno buti, koja but pomožini e manušenđe. Sar e Devleso sveto narodo, amen isi amen čast te vaćera i šukar vest e manušenđe (Mar. 13:10). Ked daja sa amendar te ćera odova, amen mothovaja so mangaja amare Devle hem e manušen hem so mangaja „te ova sveta“ ko sa so ćeraja (w21.12 13 ¶18).

O apostol Pavle uvek mislinđa najšukar ando pe phralja hem phenja. Ov šukar đanđa kola mane isi len, sose podijekh puti on ćerđe diso so dukhavđa le. Ama, ov đanđa so ako neko grešini, odova na značini soj tano lošno manuš. Ov manglja pe phralen hem razmislinđa ando olenge šukar osobine. Ako olenđe hine pharo te ćeren odova soj tano ispravno, ov uvek verujinđa so on mangena te ćeren odova soj tano šukar, ama samo valjani lenđe pomoć. Te dikha sar o Pavle pomožinđa duje phenjenđe ki skupština ko Filipi (Fil. 4:1-3). I Evodija hem i Sintihija hine len disavo problemi maškaro peste hem više na hine amalinja. O Pavle na kritikujinđa len, već razmislinđa ando olenge šukar osobine. On hine verna phenja kola beršencar služinđe e Jehovase. O Pavle đanđa so o Jehova mangela len. Ov mislinđa najšukar olendar hem odova podstakninđa len te rešinen po problemi. Sebepi so o Pavle dikhlja odova soj tano šukar ko avera, ov hine bahtalo hem hine amal averencar ki skupština (w22.03 30 ¶16-18).

O mir kova o Jehova dela amen pomožini amenđe te na sikirina amen odobor hem ispravno te dikha ko problemija. Te dikha o primer andi amari phen i Luz. Oj phenela: „But putija osetinava man so hijum kokri. Podijekh puti, mislinava so o Jehova na mangela man. Ama, ked ađahar osetinava man, odmah molinava man e Jehovase hem phenava lese sar tano maje. I molitva pomožini man pošukar te osetinav man.“ Kotar akava iskustvo dikhaja so prekali molitva šaj te ovel amen mir (Fil. 4:6, 7). Amen đanaja so o Jehova hem o Isus ka pomožinen amenđe ked našalaja nekas kas mangljam. Amen hijam podstaknime ked propovedinaja hem ked sikavaja averen te mothova saosećanje, sar o Jehova hem o Isus. Utešini amen odova so o Jehova hem oleso Ćhavo đanena save slabostija isi amen hem mangena te pomožinen amen te istrajina. Amen jedva ađićeraja o dive ked o Jehova ka „kosel svako asvi kotar [amare] jaćha“ (Otkr. 21:4; w22.01 15 ¶7; 19 ¶19-20).

Ando akala stihija dikhaja so o Isus phenđa so isi duj različita udara kola legarena ko duj različita drumija, ko „buvlo“ drumo hem ko „tesno“ drumo (Mat. 7:14). Nane trito drumo. Odolese, amen kokri valjani te odlučina ko kova drumo ka đa. Odija tani but važno odluka sose odolestar zavisini da li ka živina zauvek. O „buvlo“ drumo tano popularno odolese soj tano lokho te đal pe oleja. Nažalost, but manuša đana ko odova drumo hem ćerena odova so avera ćerena. On na haljona so odova tano e Bengeso drumo hem so ov legari ko meribe (1. Kor. 6:9, 10; 1. Jov. 5:19). O Isus phenđa so aver drumo tano o „tesno“ drumo hem so hari manuša ka arakhen odova drumo. Sose? Ko aver stih o Isus phenđa pe učenikonenđe so ka pojavinen pe o hovavne prorokija (Mat. 7:15; w21.12 22-23 ¶3-5).