Novembar

But putija dikhljan sar o Jehova pomožini tut. Na primer, pomožinđa tut te aćhove smireno ked neko ki služba hine grubo premalo tute. Ked arakhljan nekas ko mangela te šunel, ov pomožinđa tuće te setine tut kova stih valjani te čitine. Uzo odova, ov hem ponodri dinđa tut snaga te propovedine, iako o manuša šaj na manglje te šunen (Jer. 20:7-9). O Jehova mothovi amenđe kobor tano šukar ađahar so sikavi amen sar te ćera amari služba. Ko sastanko ko radno dive, šaj te šuna šukar pripremime prezentacije kola šaj te koristina ki služba. Ki početka, šaj daraja te koristina odola neve predlogija. Ama, ked koristinaja len, šaj te dikha kobor tane šukar. Ko kongresija hem ko sastankija šunaja govorija kola podstakninena amen te služina e Jehovase ko disavo aver način. Ako daja sa amendar te ćera odova, iako šaj daraja, palo odova ka dikha sar o Jehova ka blagoslovini amen (w21.08 27 ¶5-6).

Ked pisinđa lil e phralenđe ko Korint, o apostol Pavle dinđa len jekh ozbiljno savet. Palo odova, bićhalđa e Tite koro lende sose manglja te đanel sar reagujinđe ko oleso lil. Kobor samo hine bahtalo ked šunđa so prihvatinđe o savet! (2. Kor. 7:6, 7). O starešine šaj te oven sar o Pavle, ađahar so ka arakhen vreme pe phralenđe. Odova šaj te ćeren ađahar so ka aven porano ki dvorana te šaj te vaćeren olencar hem te ohrabrinen len. But putija, na valjani lenđe but vreme te ohrabrinen nekas (Rimlj. 1:12). O starešina kova trudini pe te ovel sar o Pavle ka koristini e Devleso Lafi te ohrabrini pe phralen hem te uverini len so o Devel mangela len. Isto ađahar, ov dikhela sar šaj te pohvalini len. Ked valjani te del savet, koristini e Devleso Lafi. Ov tano phravdo, ama ljubazno sebepi so brinini pe sar olese lafija ka utičinen upro lende (Gal. 6:1; w22.03 28-29 ¶11-12).

Avdije, o Jehova dela pe slugenđe „but bari snaga“ te šaj hem ponodri verno te služinen lese. Jekh način sar dobinaja snaga tano ked molinaja amen. Ko Efešanima 6:18 o apostol Pavle phenđa te molina amen e Devlese „ki svako prilika.“ Ov ka odgovorini ko amare molitve ađahar so ka zorjaćeri amen. Disavo puti, šaj mislinaja so našti te istrajina ko amare problemija hem so na đanaja aso so te molina amen. Ama, o Jehova phenela amenđe te molina amen lese čak hem ako tano amenđe pharo te objasnina lese sar osetinaja amen (Rimlj. 8:26, 27). Aver način sar zorjaćeri amen tano prekali Biblija. O Pavle čitinđa o spisija te šaj te dobini snaga hem uteha. Odova valjani hem amen te ćera (Rimlj. 15:4). Đi čitinaja e Devleso Lafi hem hor razmislinaja ando odova so čitinaja, o Jehova prekalo po sveti duh pomožini amen pošukar te haljova sar šaj odova te primenina (Jevr. 4:12; w21.05 22 ¶8-10).

Amen đanaja soj tano but važno te sikava e manušen. Ama, šaj isi diso so ćhinavi amen te sikava e manušen odobor kobor mangaja. Na primer, disave objaviteljija tane phure ja naborme. Da li hem tu hijan ki asavki situacija? Ako ja, ma bistri so sikljiljam so šaj te proučina nekasa prekalo telefoni ja prekalo avera elektronska uređaja. Disave objaviteljenđe tano polokho te proučinen nekasa ked tane ko po ćher. Ama, isi pana diso so sikljiljam. Disave manuša manglje te proučinen i Biblija, ama šaj na odgovorinđa lenđe o vreme ked amare phralja obično propovedinđe. Olenđe šaj odgovorini te proučinen rano sabalje ja kasno raćate. Da li šaj tu ko odova vreme nekasa te proučine? O Isus sikavđa e Nikodime raćate, sebepi so odova vreme hine najšukar e Nikodimese (Jov. 3:1, 2; w21.07 5 ¶10-11).

E Jovanese učenikija hine zbunime odolese so e Isusese učenikija na postinđe. O Isus phenđa lenđe so nane len razlog te postinen đi tano ov pana đivdo (Mat. 9:14-17). O fariseja hem avera protivnikija osudinđe e Isuse odolese so ov na ićerđa pe ko olenge običaja hem tradicije. On holjanđe ked ov saćarđa e nabormen ko Sabat (Mar. 3:1-6; Jov. 9:16). Ki jekh strana, on hine ponosna ko odova te phenen so ićerena o Sabat, a ki aver strana na hine lenđe problemi te dozvolinen e manušenđe te biknen ko hram. On hine but holjame ked o Isus osudinđa len sebepi odova (Mat. 21:12, 13, 15). Isto ađahar, ked o Isus propovedinđa disavenđe ki sinagoga, ko Nazaret, on hine but holjame odolese so o Isus koristinđa disave primerija andi e Izraelcengi istorija kola mothovđe soj tane sebična hem so nane len vera (Luka 4:16, 25-30). But manuša odbacinđe e Isuse odolese so ov na ćerđa o buća kola on manglje (Mat. 11:16-19; w21.05 5-6 ¶13-14).

O Jehova prekalo averenge primerija upozorini amen kobor tane o ponos hem i pohlepa opasna. Ked razmislinaja andi pohlepa, verovatno prvo ko perela amenđe ki godi tano o Satana, o Beng. Ov hine e Jehovaso anđeo hem sigurno hine le but zadatkija. Ama, ov manglja diso pobuter. Ov manglja o manuša te služinen olese, a na e Jehovase. O Satana mangela hem amen te ova sar oleste. Odolese, ov ćhivela amen te na ova zadovoljna odoleja so isi amen, već te manga pobuter. Prvo puti odova ćerđa ked vaćerđa e Evaja. O Jehova e Adamese hem e Evaće dinđa sa so valjanđa lenđe aso habe. On šajinđe te han „kotar svako kaš ko vrt“, ama samo kotar jekh naštinđe te han (Post. 2:16). Ama, o Beng ćhivđa e Eva te razmislini so valjani te hal kotar o kaš kova hine zabranimo. I Eva na ceninđa odova so hine la, oj manglja diso pobuter. Ko krajo đanaja so ulo, oj grešinđa hem mulji (Post. 3:6, 19; w21.06 14 ¶2-3; 17 ¶9).

O Adam hem i Eva valjanđe te ovel len ćhave hem te brininen pe andi phuv. Ked bi šunena hine e Devle, on hem olenge ćhave zauvek bi ovena deo andi e Jehovasi porodica. O Adam hem i Eva hine len but važno than ki e Jehovasi porodica. Sar so pisini ko Psalam 8:5, ked o David vaćerđa ando odova sar o Jehova ćerđa e manuše, ov phenđa: „Ćerđan le te ovel hari potikno ando anđelija, mothovđan lese slava hem čast.“ O Jehova na dinđa e manušenđe isto moć, godi hem sposobnostija sar e anđelenđe (Ps. 103:20). Ama, o manuša tane samo „hari potikne“ ando moćna anđelija. O Adam hem i Eva na šunđe e Jehova hem odolese više na hine deo andi olesi porodica. Sebepi odova, olenge ćhave hine len but bare problemija. Ama odova so o Jehova kotar početko manglja te ćerel e manušenđe, na menjinđa pe. Ov mangela o manuša kola šunena le, zauvek te oven olese ćhave (w21.08 2-3 ¶2-4).

Avdije, but e Jehovase sluge doživinena progonstvo. Na primer, disave amare phralja hem phenja živinena ko phuvja kuri amare aktivnostija tane zabranime hem but putija tane phanle hem odothe šaj te svedočinen e manušenđe kola tane ki vlast (Mat. 10:17, 18). Podijekh puti, sebepi so i vlast menjini pe ja sebepi disavo pošteno sudija, amare phralja šaj slobodno te služinen e Jehovase. Avera phralja hem phenja tane progonime hem ko aver način. On šaj živinena ko phuvja kuri šaj slobodno te služinen e Jehovase, ama šaj neko kotar olengi familija mangela te ćhinavi len te služinen olese (Mat. 10:32-36). But putija, amare ćherutne više na protivinena pe amenđe ked dikhena so našti te ćhinaven amen te služina e Jehovase. Podijekh puti, baš okola so hine bare protivnikija kasnije ulje revna Svedokija. Odolese, ked doživineja progonstvo ma ćhinav te služine e Jehovase, već ov hrabro. O Jehova hem oleso moćno sveti duh tane tuvaja. Odolese, nane sostar te dara! (w22.03 16 ¶8).

Ki Biblija pisini so o Jehova mrzini „o ohola jaćha, i hovavni ćhib hem o vasta kola ćhorena e nedužno manušengo rat“ (Posl. 6:16, 17). Isto ađahar, ov mrzini hem „e nasilno manušen hem okolen kola ćerena dalavere“ (Ps. 5:6). O Jehova odobor mrzini ked o manuša tane asavke so ko Nojese dive odlučinđa te uništini sa e nasilno manušen (Post. 6:13). Isto ađahar, prekalo prorok Malahija, o Jehova phenđa so mrzini e manušen kola razvodinena pe iako nane len disavo opravdano razlog. O Devel na prihvatini olengi služba hem ka sudini lenđe aso odova so ćerena (Mal. 2:13-16; Jevr. 13:4). O Jehova mangela „te mrzina odova soj tano lošno“ (Rimlj. 12:9). I mržnja tani jekh zorali emocija hem ked diso mrzinaja odova tano amenđe gadno. Sar bi osetineja tut ked bi neko phenela tuće te has disavo rumimo habe? Šaj ćhadela pe tuće samo ked razmislineja odolestar. Odolese, valjani te ovel amenđe gadno hem samo ako ki godi avela amenđe te ćera diso soj tano lošno (w22.03 4-5 ¶11-12).

Pana hari, amaro nebesko Dad prekalo po Kraljevstvo ka del but bare blagoslovija e manušenđe. Okola kola ađićerena upro Jehova, već akana isi len bare blagoslovija, a ko nevo sveto ka ovel len pana pobare blagoslovija. E Devlese sluge ko nevo sveto više na ka ovel len pharipa hem brige kola isi len akana. Više na ka ovel nepravda, ni dukha (Otkr. 21:4). Na ka brininen pe nisose, sose ka ovel len sa so valjani lenđe (Ps. 72:16; Is. 54:13). Odova vreme ćaće ka ovel but šukar! O Jehova već akana pripremini amen aso nevo sveto. Ov odova ćerela ađahar so pomožini amen te ćhinava te ćera o buća kola na sviđinena pe olese hem te ovel amen šukar osobine. Odolese, savo god pharipe te ovel tut, ma ćhinav te služine e Jehovase. O blagoslovija tane anglo amende! Đi na avela odova vreme, mangaja te aćhova bahtale hem strpljivo te ađićera o Jehova te ćerel odova so phenđa (w21.08 13 ¶17-19).

Hari palo odova so dobinđe akava lil ando apostol Pavle, o hrišćanija ki Judeja morandilje te mukhen po ćher, pi buti, pe rođakonen hem „te našen ko gore“ (Mat. 24:16). Tegani hine but važno te pomožinen jekh jekhese. Ako angleder sikljilje sar te ićeren pe ko Pavleso savet, te delinen averencar odova so hine len, tegani hine lenđe polokho te živinen ko odova nevo than, iako na hine len but buća. Amare phralja hem phenja šaj na ka phenen amenđe uvek so valjani lenđe. Odolese, de sa tutar averenđe te ovel lokho te roden tutar pomoć. Sigurno ki ti skupština isi phralja hem phenja kola tane uvek spremna te pomožinen averenđe. On niked na ka ćeren te osetina amen neprijatno sose rodinđam olendar pomoć. Amen đanaja so on tane uvek spremna te pomožinen amenđe hem amen bi mangaja te ova sar olende (w22.02 23-24 ¶13-15).

Ko palune nekobor berša, but skupštine hem pokrajine hine hari averćhane organizujime. Ako hem tu morandiljan te nakhe ki aver skupština šaj hine tuće but pharo te mukhe te amalen ja te familija. Da li o Jehova dinđa disavo uputstvo e starešinenđe ki koja skupština te ćhiven svakone objavitelje? Na. Sebepi odova, šaj te ovel amenđe pharo te šuna o smernice kola dobinaja prekalo lende. Ama, o Jehova dinđa len odgovornost te anen asavke odluke hem odolese valjani te ovel amen poverenje upro lende. Sose valjani te podržina o odluke kola o starešine anena, čak iako odola odluke na sviđinena pe amenđe? Ked ćeraja odova, amen arakhaja o jekhipe maškaro amende. O skupštine šaj te napredujinen ked sare hijam ponizna hem ked podržinaja o odluke kola o starešine anđe (Jevr. 13:17). Soj tano pana považno, ked spremno sarađujinaja okolencar kas o Jehova ćhivđa te brininen pe amendar, amen mothovaja e Jehovase so verujinaja olese (Dela 20:28; w22.02 4-5 ¶9-10).

Ako hijan krstimo phral, tu šaj te ćere ko odova te ove pošukar govorniko ja te sikave averen pošukar. Sose tano važno odova te ćere? Sose averenđe ka pomožine ako deja sa tutar te čitine pošukar, te ove pošukar govorniko ja te sikave pošukar (1. Tim. 4:15). Ćhiv tuće cilj te proučine svako lekcija hem te primenine o savetija andi brošura Sikljov pošukar te čitine hem te sikave. Proučin jekh po jekh lekcija, vežbin ćhere hem de sa tutar te primenine odola savetija ked ićereja te zadatkija. Puć aso savet e phrale kova služini sar pomoćno savetniko ja avere starešinen „kola but trudinena pe te vaćeren hem te sikaven e Devleso Lafi“ (1. Tim. 5:17). To cilj na valjani te ovel samo te primenine o savetija andi lekcija, već te zorjaćere averen ja te podstaknine len te ćeren odova so šunena. Đi ćereja odova hem tu hem on ka oven pana pobahtale (w21.08 24 ¶17).

Ako upro avera dikhaja sar pobare amendar, tegani ka ova svesna so avera tane ko but buća pošukar amendar hem posposobna amendar hem na ka manga te mothova so hijam pošukar olendar. Umesto odova, ka ova bahtale sebepi olengo, posebno ako on pe sposobnostija koristinena te služinen e Jehovase pana pobuter. Sebepi odova, sare ka ćera te ovel mir hem jekhipe ki skupština. Ako na mangaja i zavist te mukhel po koreno ko amaro vilo, valjani te ova skromna. Odova značini so valjani te haljova so disave buća našti te ćera. Ako hijam skromna, amen na ka manga te mothova so hijam pošukar averendar. Umesto odova, ka dikha so šaj te sikljova ando okola kola tane pošukar amendar. Na primer, ako jekh phral ićeri but šuže govorija, amen šaj te puća le sar pripremini pe aso pe govorija. Ako jekh phen ćerela šužo habe, amen šaj te puća la te sikavi amen te ćera odova habe (w21.07 16 ¶8-9).

Ko Brojevi šaj te čitina so o Jehova osudinđa jekhe Izraelco ko meribe sose ćedinđa kašta ko sabat. Ki Dujto Samuilova šaj te čitina so beršencar palo odova o Jehova oprostinđa e Davidese, iako ćerđa preljuba e Vitsavejaja hem mudarđa olake rome (Br. 15:32, 35; 2. Sam. 12:9, 13). Šaj pućaja amen: „Sose o Jehova oprostinđa e Davidese asavke ozbiljna grehija, a odole manuše osudinđa ko meribe, iako na ćerđa odobor baro greh?“ I Biblija na vaćeri amenđe uvek sa o detaljija ando disavo izveštaj. Na primer, amen đanaja so o David celone vileja pokajinđa pe aso odova so ćerđa (Ps. 51:2-4). Ama, savo hine o manuš kova na ićerđa pe ko zakon ando sabat? Da li ov celone vileja kajinđa pe aso odova so ćerđa? Da li hem angleder na manglja te ićeri pe ko Jehovase zakonija? Da li hine zorale šereso? I Biblija na vaćeri odolestar hem premalo informacije kola isi amen našti te đana sose o Jehova anđa asavki odluka. Ama, amen đanaja dovoljno te ova sigurna so o Devel tano pravedno ko sa so ćerela (Ps. 145:17; w22.02 2-3 ¶3-4).

O manuš kova tano skromno na očekujini pestar te ćerel pobuter ando odova so šaj. Odolese, ov ka aćhol bahtalo hem ka del poklo najšukar e Jehovase. Jekh skromno osoba tani sar o manuš kova vozini vorda ko brego. Te šaj te nakhel o brego, o vozači mora te menjini i brzina hem te vozini pohari. Iako akana vozini pohari, ov tano hem ponodri ko drumo. Isto ađahar, jekh skromno osoba đanela ked tano o vreme „te menjini i brzina hem te vozini pohari“, te šaj hem ponodri te služini e Jehovase hem te pomožini averenđe (Fil. 4:5). Razmislin ando Varzelaj kova hine le 80 berš ked o kralj David vićinđa le te đal oleja ko Jerusalim te ovel oleso savetnik. Sebepi so hine skromno, o Varzelaj na prihvatinđa e kraljeso poziv. Ov đanđa so but buća našti te ćerel. Odolese phenđa te đal jekh poterno manuš, o Himam (2. Sam. 19:35-37). Sar o Varzelaj, hem amare phure phralja tane bahtale ked o poterne phralja šaj te ćeren disave buća ki skupština (w21.09 10 ¶6-7).

Da li tano tuće pharo te dikhe upro Jehova sar upro to Dad? Disavenđe tano pharo te zamislinen jekhe dade kova mangela len sose olengo dad na mothovđa lenđe mangipe. Ama, o Jehova najšukar đanela sar osetinaja amen hem sose osetinaja amen ađahar. Ov mangela te ovel paše amencar. Odolese, ko oleso Lafi pisini: „Oven popaše e Devleja, hem ov ka ovel popaše tumencar“ (Jak. 4:8). O Jehova mangela amen hem ov tano najšukar Dad kova šaj te ovel amen. O Isus pomožini amen te ova popaše e Jehovaja. Ov but šukar penđari e Jehova hem odobor hine slično olese so šaj hine te phenel: „Ko dikhlja man, dikhlja hem e Dade“ (Jov. 14:9). Sar jekh phureder phral, o Isus sikavi amen sar te poštujina hem te šuna amare Dade. Isto ađahar, sikavi amen so valjani te ćera te šaj o Jehova te ovel zadovoljno amencar. Ama, e Isusese hine najvažno te pomožini amen te haljova kobor tano o Jehova šukar hem kobor mangela amen (w21.09 21 ¶4-5).

E Jehovaso narodo tano ko jekhipe hem služini jekhe ćaćutne Devlese. O Jehova e starešinenđe dinđa but bari odgovornost, a odija tani te arakhen e skupština te ovel čisto. Ako neko ćerđa jekh ozbiljno greh, o Jehova rodela ando starešine te dikhen da li odija osoba šaj te aćhol deo andi skupština. On valjani te dikhen da li odija osoba ćaće kajini pe aso odova so ćerđa. Neko šaj te phenel soj tano olese žao, ama da li ćaće mrzini odova so ćerđa? Da li mothovi soj tano odlučno te na ćerel palem odova greh? Ako jekh razlog sose ćerđa odova greh hine o lošno društvo, da li tano spremno te ćhinavi te družini pe odole manušencar? O starešine molinena pe e Jehovase, pokušinena te haljon so ćaće ulo, dikhena so i Biblija vaćeri odolestar hem sar odija osoba dikhela ko odova so ćerđa. Palo odova, on odlučinena da li odija osoba šaj te aćhol ki skupština. Disavo puti, oj mora te ovel isključimi (1. Kor. 5:11-13; w22.02 5 ¶11-12).

Bizo obzir da li krstinđam amen angleder nekobor dive ja već beršencar hijam krstime, sare mangaja te ova asavke manuša save o Jehova mangela. Ama, te šaj te ova asavke, valjani te pazina sostar razmislinaja. Sose? Odolese so odova sostar razmislinaja utičini ko odova so vaćeraja hem ćeraja. Ako uvek razmislinaja ando odova sar amenđe te ovel šukar, tegani ka phena ja ka ćera lošna buća (Ef. 4:17-19). Ki aver strana, ako razmislinaja ando šukar buća, verovatno ka vaćera hem ka ćera o buća kola ka radujinen amare Dade, e Jehova (Gal. 5:16). Disavo puti ka khuvel amenđe ki godi dijekh lošno misao. Ama, amen odlučinaja da li ka ćera odova ja na. Angleder te krstina amen, valjani te ćhinava te vaćera hem te ćera odova so o Jehova mrzini. Odija tani prvo hem najvažno buti koja valjani te ćera ked mangaja te huljava i purani ličnost. Ako mangaja te šuna e Jehova ko sa, valjani te urava i nevi ličnost (w22.03 8 ¶1-2).

E starešinenđe nane lokho te dikhen da li neko ko ćerđa ozbiljno greh ćaće kajini pe. Odova tano ađahar sose on našti te đanen soj tano ko e manušeso vilo. Odolese, on trudinena pe te dikhen da li odova phral ja odija phen ćaće mrzini odova so ćerđa. O starešine valjani te dikhen da li odova phral ćaće menjinđa o način sar razmislini hem sar ponašini pe. Te šaj te mothovi da li ćaće kajini pe, valjani te nakhel disavo vreme. Isto ađahar, valjani redovno te avel ko sastankija, te molini pe e Jehovase, te čitini hem te proučini i Biblija. Valjani hem te cidel pe ando buća kola šaj te ćhiven le palem te ćerel odova greh. Ako trudini pe palem te ovel paše e Jehovaja, šaj te ovel sigurno so o Jehova ka oprostini lese hem so o starešine ka pomožinen le palem te ovel deo andi skupština (w21.10 6 ¶16-18).

Sebepi so manglja e Jehova, o Isus služinđa samo olese. Odova ćerđa hem ked hine ko nebo hem ked hine ki phuv (Luka 4:8). Ov sikavđa pe učenikonen te ćeren isto odova. O Isus hem olese verna učenikija na koristinđe o idolija. Sebepi so e Devle niko na dikhlja, nijekh manuš našti te ćerel diso so ličini upro Devel (Is. 46:5). Ama, da li o ikone šaj te pomožinen amen te ova popaše e Devleja hem da li valjani te molina amen e sveconenđe? Ki jekh ando Deš zapovestija, o Jehova phenđa odova so pisini ko avdisutno stiho. O manuša kola mangena te šunen e Devle haljona so ov na mangela te koristina o idolija. Disave istoričarija ando prvo veko phenđe so o prva hrišćanija služinđe samo e Devlese. Ki jekh istorijsko knjiga pisinđa so e hrišćanenđe ko odova vreme ni ki godi na alo te ovel len idolija. Sar on, hem e Jehovase svedokija avdije na koristinena o idolija (w21.10 19-20 ¶5-6).

O Isus upozorinđa e hrišćanen ando prvo veko kola živinđe ki Judeja so ka avel o vreme ked „i vojska ka ćedel pe oko Jerusalim“ (Luka 21:20-24). Tegani, on valjanđe te „našen ko bregija.“ Sebepi so našlje, on aćhilje đivde. Ama, morandilje te mukhen but buća. Angleder nekobor berš, ki Stražarsko kula pisinđa: „On morandilje te mukhen pe njive, po ćher hem sa so hine len. Odola hrišćanija ćhivđe e Jehova ko prvo than sose verujinđe so ov ka arakhi len hem so ka pomožini lenđe.“ Isto ađahar phenđa: „O kušnje kola ka ovel amen ka mothoven amenđe sar dikhaja ko materijalna buća hem soj tano amenđe považno – o materijalna buća ja amaro životi? Ked ka avel o kraj, šaj hem amen ka ovel amen disave pharipa ja ka valjani diso te aćhava. Amen valjani te ova spremna ko sa“ (w22.01 4 ¶7-8).

Sigate palo odova so o Izraelcija ikljilje ando Egipat, o Jehova phenđa e Mojsijese diso pestar. Ov phenđa: „Jehova, Jehova, o Devel soj tano milosrdno hem samilosno, strpljivo, pherdo verno mangipaja hem ćaćipaja, kova mothovi o verno mangipe e hiljadenđe, oprostini o prestupija, i krivica hem o grehija“ (Izl. 34:6, 7). Odole šuže lafencar o Jehova mothovđa e Mojsijese diso ando po verno mangipe. So o Jehova phenđa lese? O Jehova na phenđa samo so ov isi le verno mangipe, već so ov tano „pherdo verno mangipaja.“ Akala lafija pominena pe ko nekobor thana ki Biblija (Br. 14:18; Nem. 9:17; Ps. 86:15; 103:8; Joilo 2:13; Jona 4:2). Svako puti, odola lafija odnosinena pe samo upro leste, a na upro manuša. Ađahar o Jehova mangela te mothovi amenđe savo tano. O verno mangipe tano but važno olese (w21.11 2-3 ¶3-4).

O bračna parija šaj but te sikljon ando apostol Petar hem andi olesi romni. Šov masek đi o berš dive palo odova so upoznajinđa e Isuse, o apostol Petar valjanđa te anel jekh važno odluka. Ov brininđa pe kotar pi porodica ađahar so hine ribari. Ama, ked o Isus vićinđa le te đal oleja, o Petar morandilo te razmislini kotar pi romni (Luka 5:1-11). Ov anđa odluka te đal e Isuseja hem te propovedini. Ama, šaj te phena so e Petaresi romni podržinđa odija odluka. I Biblija mothovi so palo odova so o Isus uskrsninđa, disavo vreme hem oj putujinđa e Petareja (1. Kor. 9:5). Sebepi so hine šukar romni, o apostol Petar šaj hine te pisini odolestar sar o roma hem o romnja valjani te ponašinen pe (1. Petr. 3:1-7). O Petar hem olesi romni verujinđe e Jehovase so ov ka brinini pe olendar sa đi o Kraljevstvo ćhivena ko prvo than (Matej 6:31-34; w21.11 18 ¶14).

O apostol Pavle but manglja pe phralen hem dinđa sa pestar te pomožini lenđe (Dela 20:31). Sebepi odova, o phralja hem o phenja but manglje le. Jekh puti, ked o starešine ando Efes šunđe so niked više na ka dikhen le, on „sare but runđe“ (Dela 20:37). Isto ađahar, hem amare bućarne starešine but mangena pe phralen hem pe phenjen hem dena sa pestar te pomožinen len (Fil. 2:16, 17). Ama, podijekh puti e starešinenđe nane lokho te ćeren sa odova so valjani te ćeren. Tegani, so šaj te pomožini lenđe? E Pavleso primer šaj but te pomožini len. Ov na ćerđa pe so šaj sa te ćerel. O Pavle hine nesavršeno manuš hem disavo puti hine lese pharo te ćerel odova soj tano ispravno (Rimlj. 7:18-20). Isto ađahar, ov hine le hem disave bare problemija. Ama, ov na ćhinavđa sebepi odova te pomožini pe phralenđe hem na našalđa pi radost. Ako o starešine dena sa pestar te oven sar o apostol Pavle, on hem ponodri ka služinen e Jehovase hem ka oven bahtale iako isi len problemija (w22.03 26 ¶1-2).

Ki Levitska 19:3 vaćeri pe ando sabat. Amen avdije na ićeraja amen ko Mojsijeso zakon hem odolese na valjani te ićera o sabat. Ama, but šaj te sikljova ando odova sar o Izraelcija ićerđe o sabat hem sar o sabat pomožinđa olenđe. O sabat hine vreme ked valjanđe te odmorinen pe kotar pi buti hem te odvojinen vreme e Devlese. Odolese, ked o Isus hine ki phuv, ko odova dive ov đelo ki sinagoga koja hine ki olesi diz hem odothe čitinđa e Devleso Lafi (Izl. 31:12-15; Luka 4:16-18). O lafija „ićeren o sabatija“ andi Levitska 19:3 valjani te podstakninen amen svako dive te odvojina vreme e Devlese. Da li mislineja so valjani diso te menjine te šaj te ćere odova? Ako deja sa tutar te odvojine vreme e Devlese, tegani tu ka ove pana popaše e Jehovaja, a odova tano but važno te šaj te ova sveta (w21.12 5 ¶13).

Đi hine ki phuv, o Isus družinđa pe sarinencar. Ov halja maro e barvale manušencar, okolencar kola hine ko položaj, ama isto ađahar hem e ćororencar hem e obično manušencar. Uzo odova, ov hine saosećajno hem premalo okola kola hine penđarutne sar grešnikija. O ponosna manuša odbacinđe e Isuse sebepi odova so ov ćerđa. On pućlje olese učenikonen: „Sose hana hem pijena okolencar kola tane poreznikija hem grešnikija?“ A o Isus odgovorinđa lenđe odova so pisini ko avdisutno stih (Luka 5:29-31). But berš angleder o Mesija te avel, o prorok Isaija phenđa so o manuša ko sveto na ka prihvatinen le. Ov phenđa: „O manuša mrzinđe le hem izbegninđe le [...] Oleso muj samći hine garavdo amendar. Hine mrzimo hem smatrinđam so na vredini ništa“ (Is. 53:3). O proročanstvo phenela so o manuša na ka prihvatinen e Mesija hem odolese o Jevreja ko prvo veko valjanđe te očekujinen so o Isus ka ovel odbacimo (w21.05 8-9 ¶3-4).

Disave phralja ko prvo veko na primeninđe odmah o savetija kola dobinđe (Jak. 1:22). Avera hine pošukar premalo barvale manuša (Jak. 2:1-3). Disavenđe hine pharo te kontrolišinen pi ćhib (Jak. 3:8-10). Odola phralja hem phenja hine len bare problemija. Ama, o Jakov na vazdinđa pe vasta olendar. Ov hine ljubazno, ama phravdo dinđa len savet hem podstakninđa len te roden pomoć ando starešine (Jak. 5:13, 14). So sikljovaja? Ma ađićer but ando manuša hem dikh odova soj tano šukar koro lende. Bute manušenđe kolencar proučinaja nane lokho te ićeren pe ko odova so sikljona (Jak. 4:1-4). Olenđe valjani vreme te ćhinaven te ćeren disave lošna buća hem te menjinen pe. Amen valjani te ova hrabra hem te phena lenđe ko so valjani te ćeren. Isto ađahar, na valjani te našala amari nada hem te bistra so o Jehova tano okova kova privucini e manušen koro peste hem kova dela len snaga te menjinen pe (Jak. 4:10; w22.01 11 ¶11-12).

Sare amen valjani te ova milosrdna sar o Jehova. Sose? Odolese so o Jehova na ka šunel amare molitve ako na hijam milosrdna premalo avera. Niko amendar na bi mangela odova. Odolese, valjani te pazina te na ova stroga premalo avera. Umesto te ćera amen kašuke ked jekh phral ja phen isi len dukh, amen valjani uvek te ova spremna te šuna len. Odolese, mangaja te ićera amen ko odova so pisini ko e Devleso Lafi: „E manušese kova na hine milosrdno premalo avera na ka mothovi pe milosrđe“ (Jak. 2:13). Ako hijam ponizna hem ako na bistraja so hem amenđe tano potrebno avera te oven milosrdna premalo amende, tegani hem amen ka ova milosrdna premalo avera. Posebno valjani te ova milosrdna premalo okola kola irinena pe ki skupština. Disave primerija andi Biblija mothovena amenđe sar te ova milosrdna hem te na ova stroga (w21.10 12 ¶16-17).

I rat angleder te merel, o Isus rodinđa jekh mirno than. Ov đelo ko getsimansko vrt hem odothe hor razmislinđa hem molinđa pe. Tegani sikavđa pe učenikonen jekh but važno buti andi molitva. Ked đelje ko getsimansko vrt, šaj već nakhlja o 12 raćate. O Isus phenđa pe učenikonenđe „te oven đangavde“ hem đelo te molini pe (Mat. 26:37-39). Ama, đi ov molinđa pe, on zasuće. Ked irinđa pe, ov arakhlja len sar sovena hem palem phenđa lenđe: „Oven đangavde hem molinen tumen“ (Mat. 26:40, 41). Ov haljilo so on but sikirinđe pe hem soj tane but ćhinde. Haljilo sar tano olenđe hem odolese phenđa so „o telo tano slabo.“ Ama, o Isus pana duj putija đelo te molini pe hem o solduj putija ked irinđa pe, ov arakhlja len sar sovena (Mat. 26:42-45; w22.01 28 ¶10-11).