Decembar

O Isus koristinđa o primer ando pastiri hem ando olese bakre, te šaj te objasnini amenđe kobor tano ov paše pe učenikonencar (Jov. 10:14). Odova primer tano šukar sose o bakre đanena pe pastire hem šunena le. Jekh manuš kokri uverinđa pe ko odova. Ov phenela: „Mangljam te slikina disave bakren. Odolese vićinđam len te aven koro amende. Ama, on na alje sebepi so na penđarđe amaro glaso. Palo odova, alo jekh ćhavo, kova hine olengo pastiri hem samo so vićinđa len, on odmah alje.“ Akale manušeso iskustvo setinćeri amen ko odova so o Isus phenđa kotar pe sledbenikija. Ov phenđa: „On ka šunen mo glaso.“ Ama, o Isus tano ko nebo. Tegani, sar šaj te phena so amen šunaja oleso glaso? Amen šunaja oleso glaso ked ićeraja amen ko odova so ov sikavđa (Mat. 7:24, 25; w21.12 16 ¶1-2).

O apostol Pavle but progoninđa e hrišćanen, ama kasnije haljilo so odova hine pogrešno hem hine spremno te menjini pe (1. Tim. 1:12-16). Uzi Jehovasi pomoć ulo jekh šukar, saosećajno hem ponizno starešina. Ov verujinđa so o Jehova ka oprostini lese (Rimlj. 7:21-25). O Pavle đanđa so našti te ovel savršeno. Umesto odova, dinđa sa pestar te menjini pe hem hine sigurno so o Jehova ka pomožini lese te ćerel po zadatko (1. Kor. 9:27; Fil. 4:13). O starešine nane naimenujime sebepi soj tane savršena. Ki aver strana, o Jehova očekujini olendar te priznajinen pe greške hem te menjinen pe (Ef. 4:23, 24). Đi proučini e Devleso Lafi, o starešina valjani te dikhel so šaj te menjini koro peste hem te ćerel ko odova. Tegani, ka ovel bahtalo hem o Jehova ka pomožini lese te ovel šukar starešina (Jak. 1:25; w22.03 29-30 ¶13-15).

So valjani te ćera ako dikhaja so but putija kritikujinaja amare phralen hem phenjen? Na valjani te bistra so amen valjani te manga jekh jekhe (Jak. 2:8). Odolese, valjani te molina amen e Jehovase te pomožini amen te na kritikujina averen. Šukar tano te odvojina amaro vreme te šaj pana pošukar te penđara e phrale ja e phenja kas kritikujinaja. Šaj te vićina len ki služba ja te ha maro zajedno. Ked daja sa amendar pošukar te penđara len, ka mothova so mangaja te ova sar o Jehova hem o Isus kola uvek rodena odova soj tano šukar koro amende. Ađahar, ka mothova so šunaja o glaso ando amaro šukar pastiri kova phenela amenđe ma sudinen. Sar so jekh bakro šunela o glaso ando po pastiri, isto ađahar hem okola soj tane e Isusese učenikija šunena oleso glaso. Bilo amari nada te ovel večno te živina ko nebo ja ki phuv, mangaja te da sa amendar te šuna o glaso ando amaro šukar pastiri (Luka 12:32; Jov. 10:11, 14, 16; w21.12 19 ¶11; 21 ¶17-18).

Ked o Rovoam ulo kralj ko Izrael, o manuša alje koro leste te pućen le da li šaj te olakšini lenđe o pharipe kova oleso dad, o Solomon, ćhivđa upro lende. Ko početko, ov ćerđa šukar sose pućlja e phure manušen ko Izrael so te ćerel. Odola phure manuša phenđe lese so ako ka ćerel odova so o narodo rodinđa, tegani on uvek ka služinen lese (1. Kralj. 12:3-7). Ama, izgleda so e Rovoamese na sviđinđa pe odova so phenđe lese o phure hem đelo te rodel savet ando pe vrsnikija. On phenđe lese te ćhivel pana pobaro pharipe upro manuša (1. Kralj. 12:9-11). O Rovoam šaj hine te pućel e Jehova so te ćerel. Ama, ov šunđa o savet kova olese vrsnikija phenđe lese te ćerel. Sebepi odova, ni o Rovoam, ni o manuša na nakhlje šukar. Avdije, hem amen šaj te dobina savet kova na sviđini pe amenđe. Ama, ako odova savet avela ando Devleso Lafi, amen valjani te prihvatina le (w22.02 9 ¶6).

O manuš kova tano ponizno hem skromno, na ka mislini so o terne tane neiskusna hem so isi len but buća te sikljon, već ka cenini len sebepi o buća kola već đanena te ćeren. Ov na ka mislini soj tane on olese suparnikija, već ka dikhel len sar pe saradnikija. O phure phralja hem phenja upro terne dikhena sar poklon ando Jehova hem on tane zahvalna aso odova so o terne ćerena. Akana ked više nane zorale sar angleder, o phure phralja hem phenja tane zahvalna sose o terne tane spremna te ćeren sa so valjani hem te služinen ki skupština. Andi Nojemina šaj te sikljova sose tano šukar ked o phure prihvatinena e ternengi pomoć. Ked olako ćhavo mulo, i Nojemina phenđa pe borjaće, e Rutaće, te irini pe peklenđe. Ama, i Ruta na manglja te mukhel e Nojemina hem pođinđa olaja ko Vitlejem. I Nojemina hine but bahtali sebepi odova hem prihvatinđa e Rutaki pomoć (Ruta 1:7, 8, 18). Odova hine šukar hem e Rutaće hem e Nojeminaće (Ruta 4:13-16). O phure kola tane ponizna, sar i Nojemina, ka prihvatinen averengi pomoć (w21.09 10-11 ¶9-11).

Amaro nebesko Dad đanela so svako amendar šaj te ćerel. Možda tu šaj te ćere pobuter ando avera. Ja možda našti te ćere odobor sar avera, sebepi te berša, to sastipe ja te porodična odgovornostija. Ama, ma obeshrabrin tut (Gal. 6:4). O Jehova na ka bistrel odova so ćereja lese. Ako ando vilo deja to najšukar e Jehovase, ov ka ovel zadovoljno tuvaja. O Jehova čak đanela hem odova so bi tu mangeja te ćere. Ov mangela te ove bahtalo hem zadovoljno odoleja so šaj te ćere olese. Već akana isi amen mir ko vilo sose đanaja so o Jehova pomožini amen te ikljova ko krajo amare problemencar (Is. 41:9, 10). Isto ađahar, već akana šaj te ova bahtale sose služinaja amare Dadese kova tano dostojno „te primini i slava, i čast hem i moć“ (Otkr. 4:11; w22.03 24 ¶16; 25 ¶18).

Amen mangaja te ova sar o Isus, ama na valjani te obeshrabrina amen ako disavo puti našti te ova sar oleste (Jak. 3:2). Jekh učeniko kova sikljola te crtini našti te crtini odobor šukar sar po učitelj. Ama, ako sikljola ando pe greške hem ako dela sa pestar te crtini sar po učitelj, sar đala o vreme ka ovel sa pošukar. Isto ađahar, ked ićeraja amen ko odova so sikljovaja ando amaro lično proučibe, ked daja sa amendar te menjina amen, pana pobuter ka ova sar o Isus (Ps. 119:59). Živinaja ko sveto kuri o manuša dikhena samo kokri pes. Ama, maškaro Jehovaso narodo nane ađahar. O Isus hine samopožrtvovano hem amen mangaja te ova sar oleste (1. Petr. 2:21). Ked daja sa amendar te ova samopožrtvovana sar ov, amen hijam bahtale sose đanaja so ked ćeraja odova amen radujinaja e Jehova (w22.02 24 ¶16; 25 ¶18).

Jekh način sar o Jehova dela smernice pe narodose tano prekalo poklo Lafi, i Biblija. Ako arakhaja vreme te razmislina ando odova so o Jehova sikavi amen, tegani ka ićera amen ko olese smernice hem ka ćera i buti koja o Jehova dinđa amen (1. Tim. 4:15, 16). Pana jekh način sar o Jehova dela amen smernice tano prekalo „verno hem razborito robo“ (Mat. 24:45). Podijekh puti šaj te dobina disave smernice kola na haljovaja. Na primer, šaj te dobina konkretna smernice sar te pripremina amen asi disavi prirodno katastrofa asi koja mislinaja so niked na ka ovel koro amende. So valjani te ćera ako mislinaja so o smernice nane mudra? Šaj te razmislina hem ando avera primerija kola čitinđam ki Biblija. Podijekh puti e Devleso narodo dobinđa disave smernice kola olenđe dićhilje sar nemudra, ama spasinđe olengo životi (Sud. 7:7; 8:10; w22.03 18-19 ¶15-16).

O Isus hine le poverenje upro Jehova hem odolese šaj hine te phenel o lafija ando avdisutno citati. Ov đanđa so oleso životi zavisini ando Jehova hem hine sigurno so oleso Dad na ka bistrel le. So šaj te sikljova ando e Isusese lafija? Ov spremno te mukhe to životi ko e Jehovase vasta. Te šaj te ćere odova, valjani te „uzdajine tut upro Jehova celone vileja“ (Posl. 3:5). Te dikha o primer ando Džošua kova ked hine le 15 berš hine but nabormo. Ov odbinđa te prihvatini disavo medicinsko lečenje sebepi so bi odoleja mothovi so na šunela e Devleso zakon. Hari angleder te merel, ov phenđa pe dajaće: „Mi daj, me hijum ano e Jehovase vasta [...] Šaj te phenav tuće, mi daj, sose hijum potpuno sigurno: đanava so o Jehova ka uskrsnini man. Ov đanela soj tano maje ko vilo hem me but mangava le.“ Bi ovela šukar svako amendar te pućel pe: „Ako tani mi vera ispitimi, odolese so hijum ki disavi situacija ki koja šaj te našalav mo životi, da li tegani ka mukhav mo životi ko e Jehovase vasta hem da li ka verujinav lese so ov ka setini pe upro mande?“ (w21.04 12-13 ¶15-16).

E Jehovase slugenđe i služba dela snaga. Ked đaja ki služba, bizo obzir da li o manuša šunena ja na, amen hijam bahtale. Disave šaj mislinena so sebepi pe okolnostija našti te ćeren odobor but ki služba. Ako hem tu osetineja tut ađahar, ma bistri so o Jehova tano zadovoljno ked deja toklo najšukar. O Jehova dikhela so disave amendar isi len želja te propovedinen, ama našti te ikljon ando ćher. Odolese o Jehova pomožini lenđe te propovedinen okolenđe kola brininena pe olendar ja e doktorenđe hem e medicinsko sestrenđe. Ako uporedinaja odova so ćerđam angleder odoleja so ćeraja akana, odova šaj te obeshrabrini amen. Ama, ako haljovaja sar o Jehova pomožini amenđe akana, odova šaj te zorajćeri amen hem te pomožini amenđe te istrajina ko amare problemija hem te ovel amen radost. Amen na đanaja kuri o seme ando ćaćipe kova sadinđam ka astari koreno hem ka barjol (Prop. 11:6; w21.05 24-25 ¶14-17).

O Jehova but blagoslovinđa e Davide. Dinđa le šukar sastipe, baro položaj hem pomožinđa lese but putija te pobedini pe neprijateljen. O David hine zahvalno aso odola buća kola o Jehova dinđa le hem phenđa so našti ni te đenel len kobor tane (Ps. 40:5). Ama, ko jekh trenutko, ov ulo pohlepno hem bisterđa sa so dinđa le o Jehova. Iako već hine le nekobor romnja, ov manglja tuđona romnja iako đanđa so odova nane šukar. Odija romni hine i Vitsaveja, a olako rom vićinđa pe Urija Hetejin. O David hine sebično hem odolese suća e Vitsavejaja hem oj aćhilji khamni. Ka phene so odova na hine dovoljno so ćerđa, nego hem naredinđa o Urija te ovel mudardo (2. Sam. 11:2-15). Sostar o David razmislinđa? Da li mislinđa so o Jehova na dikhela so ćerela? Iako o David beršencar služinđa e Jehovase, ov ulo pohlepno hem sebepi odova hine le but bare dukha. Ama, ov kasnije priznajinđa so grešinđa hem pokajinđa pe. Kobor samo hine zahvalno so o Jehova oprostinđa lese (2. Sam. 12:7-13; w21.06 17 ¶10).

Šaj mislineja so na đaneja sar te proučine nekasa. Šaj mislinaja so valjani pobuter te đana ja te ova pošukar objaviteljija angleder so proučinaja nekasa. Ako hem tu osetineja tut ađahar, dikh trin buća kola ka uverinen tut so šaj te proučine nekasa. Sar prvo, o Jehova mislini so hijan sposobno te sikave averen. Sar dujto, o Isus kase „tani dindi sa i vlast ko nebo hem ki phuv“, phenđa tuće te sikave e manušen sose isi le poverenje upro tute (Mat. 28:18). Sar trito, o Jehova hem avera phralja hem phenja šaj te pomožinen tut. Sar so o Jehova pomožinđa e Isusese, ađahar so sikavđa le sar te sikavi averen, ov sigurno so ka pomožini hem tuće (Jov. 8:28; 12:49). Uzo odova, šaj te puće te nadgledniko andi grupa ja jekhe iskusno pionire ja objavitelje te sikavi tut sar te počmine hem te vodine o kurs. Ked neko olendar vićini tut ko kurs, but ka sikljove ako dikheja sar on proučinena averencar (w21.07 6 ¶12).

O krajo ando akava sveto tano but paše. Odolese, sar niked angleder valjani te ova uverime so sa odova so o Jehova ćerela tano ispravno. Odova tano važno sose ki bari nevolja šaj ka dobina disave smernice kola šaj na ka haljova. Tegani, o Jehova na ka vaćeri lično amencar, već ka del amen uputstvija prekalo manuša kolen ćhivđa te predvodinen ki phuv. Ko odova vreme na valjani te puća amen da li odola smernice ćaće avena ando Jehova ja ando manuša. Da li ko odova najvažno period ka ovel tut poverenje ko Jehova hem ki olesi organizacija? Ako mangeja te đane odgovor ko odova pućibe, razmislin sar već avdije dikheja ko smernice kola dobinaja andi Jehovasi organizacija? Ako već avdije isi tut poverenje ki Jehovasi organizacija hem spremno šuneja sa o smernice kola dobinaja, verovatno isto odova ka ćere hem ki bari nevolja (w22.02 6 ¶15).

Uzi e Jehovasi pomoć, o Gedeon hem olese 300 manuša pobedinđe ko jekh maribe. On šaj hine te oven but ponosna sebepi odova. O manuša ando e Jefremeso pleme alje ko Gedeon, ama na te pohvalinen le, već te svađinen pe oleja (Sud. 8:1). O Gedeon setinćerđa len ko odova sar o Jehova pomožinđa lenđe te ćeren bare buća. Ked šunđe odova „on smirinđe pe“ (Sud. 8:3). O Gedeon hine ponizno hem sebepi odova hine mir maškaro e Devleso narodo. Amenđe valjani te ovel považno te proslavini pe o Jehova, a na amen. Ako hijam poglavarija hem starešine, ando Gedeon šaj te sikljova so valjani te ćera ako neko holjanđa upro amende sebepi diso so ćerđam. Najangleder, valjani te da sa amendar te haljova sose holjanđa. Isto ađahar, valjani te pohvalina le aso šukar buća kola ćerela. Te šaj te ćera odova, valjani te ova ponizna. Ama, o mir tano považno nego te mothova so odija osoba grešinđa (w21.07 16-17 ¶10-12).

O Jehova mothovđa so o manuša tane važna olese ađahar so ćerđa amen premali pi slika. Odolese so hijam ćerde premali e Devlesi slika, šaj te mothova olese but šuže osobine, sar soj tane mangipe, saosećanje, vernost hem pravednost (Ps. 86:15; 145:17). Ked daja sa amendar te mothova akala osobine, amen slavinaja e Jehova hem mothovaja so hijam zahvalna olese (1. Petr. 1:14-16). Ako ćeraja odova so amaro nebesko Dad rodela amendar, tegani ka ova bahtale. Isto ađahar, odolese so ćerđa amen premali pi slika, amen šaj te ova asavke manuša save o Jehova mangela ki pi porodica. O Jehova dinđa amen than kaj te živina. But berša angleder so ćerđa e prvone manuše, o Jehova ćerđa i phuv e manušenđe (Jov 38:4-6; Jer. 10:12). Odolese soj tano šukar hem phravde vasteso, o Jehova dinđa amen but šukar buća kola ćerena amen bahtale (Ps. 104:14, 15, 24). Ked dikhlja sa odova so ćerđa ki phuv, ov hine zadovoljno (Post. 1:10, 12, 31; w21.08 3 ¶5-6).

Sare amen isi amen zadatak te propovedina hem te ćera učenikonen (Mat. 28:19, 20; Rimlj. 10:14). Da li mangeja pana pošukar te ćere odova zadatko? Đi proučineja i brošura Te čitine hem te sikave, ćhiv tuće ciljija kola ka pomožinen tut te ove pana pošukar ki služba. Ma bistri so toklo najvažno cilj valjani te ovel te ćere ko te osobine (Kol. 3:12; 2. Petr. 1:5-8). Sare amen mangaja te služina e Jehovase pana pobuter. Avdije, podijekh puti našti te ćera e Jehovase odobor kobor mangaja. Ama, ko nevo sveto, ništa na ka ćhinavi amen te ćera e Jehovase odova so mangaja. Đi na avela odova vreme, mangaja te da e Jehovase amaro najšukar, sose ađahar ka aćhova bahtale hem na ka ova obeshrabrime. Soj tano najvažno, ka ana čast e Jehovase, amare Devlese, kova tano bahtalo Devel (1. Tim. 1:11). Odolese, ov bahtalo sebepi o buća kola šaj te ćere e Jehovase (w21.08 25 ¶18-20).

Ako tane te roditeljija e Jehovase svedokija, on sigurno pana kotar tiknipe sikavđe tut ando Jehova. On sikavđe tut so o Jehova tano okova kova sa ćerđa, so isi le but šuže osobine hem so mangela te ćerel i phuv te ovel raj (Post. 1:1; Dela 17:24-27). But manuša na verujinena so postojini o Devel hem so ov sa ćerđa. On verujinena so sa ulo slučajno hem so kotar jekh jednostavno životno oblik ulje sa avera životna oblikija. Čak disave but školujime manuša verujinena ko akava. On phenena so i nauka mothovđa so odova so pisini ki Biblija nane tačno hem so samo o manuša kola nane but školujime hem kolen šaj lokho te hovave verujinena so postojini o Stvoritelj. Kobor god dugo te služina e Jehovase važno tano hem ponodri te ćera ko odova te ovel amen zorali vera. Tegani, na ka prevarinen amen o manuša kola phenena so odova so pisini ko e Devleso Lafi nane tačno (Kol. 2:8; w21.08 14 ¶1-3).

O Avelj, o Noje, o Avraham hem o Jov mothovđe so poštujinena e Jehova hem so mangena le, ađahar so šunđe e Jehova, hine len vera ano leste hem hine spremna te aćhaven but buća. On dinđe po najšukar e Jehovase hem ov prihvatinđa sa odova so ćerđe olese. Palo odova, prekalo Mojsije o Jehova dinđa o Zakon e Izraelcenđe. Odova Zakon mothovđa lenđe sar o Jehova mangela te služinen olese. Palo odova so o Isus mulo hem so uskrsninđa, o Jehova više na rodinđa ando manuša te ićeren pe ko Mojsijeso zakon (Rimlj. 10:4). Okola so služinđe lese valjanđe te ićeren pe ko nevo zakon, ko „Hristeso zakon“ (Gal. 6:2). On šaj hine te ićeren pe ko odova „zakon“, na ađahar so bi ćerena pese jekh spisko so šaj, a so našti te ćeren. On valjanđe te den sa pestar te oven sar o Isus hem te ićeren pe ko olese sikljoviba. Amen avdije daja sa amendar te ova sar o Isus te šaj te ugodina e Jehovase hem te dobina „nevi snaga“ (Mat. 11:29; w22.03 20-21 ¶4-5).

O Jehova šunela pe ćhaven. Ked o Isus hine ki phuv, o Jehova but putija šunđa le sar molini pe. O Jehova šunđa le ked molinđa pe angleder te anel disave važna odluke. Na primer, ked birinđa o dešuduj apostolija (Luka 6:12, 13). Isto ađahar, ked e Isusese hine but pharo, o Jehova šunđa olese molitve. Hari angleder o Juda te izdajini le, ov ki molitva phenđa pe Dadese kobor tano lese pharo, sebepi o buća kola ka nakhel. O Jehova na samo so šunđa pe Ćhave, već hem bićhalđa jekhe anđele te ohrabrini le (Luka 22:41-44). O Jehova hem avdije šunela amare molitve hem odgovorini amenđe ko pravo vreme hem ko pravo način (Ps. 116:1, 2). Jekh phen andi Indija dikhlja sar o Jehova odgovorinđa ko olake molitve. Oj hine depresivno hem odolese molinđa pe e Jehovase. Oj pisinđa: „E masekosi emisija aso maj 2019. berš vaćerđa ando odova so šaj te ćera ked but brininaja amen. Baš odova valjanđa maje te šunav. Odija emisija hine odgovor ko me molitve“ (w21.09 21-22 ¶6-7).

Šaj samo te zamisline kobor hine pharo e hrišćanenđe ko prvo veko te mukhen sa so hine len hem te živinen ko nevo than kuri ništa na hine len. On valjanđe te verujinen so o Jehova ka del len odova so valjanđa lenđe. Ama, hine pana diso so šaj hine te pomožini len. Panđ berš angleder i rimsko vojska te ćedel pe oko Jerusalim, o apostol Pavle dinđa jekh but šukar savet e Jevrejenđe. Ov phenđa: „Ko tumaro životi ma te ovel mangipe premalo pare, nego oven zadovoljna odoleja so isi tumen. Sose o Devel phenđa: ’Niked na ka aćhavav tut hem niked na ka irinav tuće mo dumo.‘ Odolese šaj hrabro te phena: ’O Jehova tano mo pomoćniko, na ka darav. So šaj te ćerel maje o manuš?‘“ (Jevr. 13:5, 6). Okolenđe kola ićerđe pe ko akava savet angleder te avel i rimsko vojska, na hine pharo te oven zadovoljna, iako na hine len but buća uduri kaj đelje. On hine sigurna so o Jehova ka brinini pe olendar (w22.01 4 ¶7, 9).

Ked razmislineja ando manuš kova tano milosrdno, šaj ki godi avela tuće neko koj tano šukar, saosećajno ja phravde vasteso. Ja šaj avela tuće ki godi e Isusesi priča ando milosrdno Samarićanin. Odova manuš „sažalinđa pe“ upro jekh Jevrejin kas o ćora marđe hem lelje lestar sa so hine le. Ov paćarđa olese rane hem brininđa pe olestar (Luka 10:29-37). Akija priča sikavi amen so značini te ove milosrdno. O milosrđe tano jekh ando e Jehovase najšuže osobine. O Devel tano milosrdno premalo amende sose mangela amen. Ov odija osobina mothovi premalo amende svako dive. Ama, isi pana jekh način sar šaj te mothovi pe milosrđe. Jekh manuš kova tano milosrdno na mangela te kaznini e osoba koja odova zaslužini. Baš asavko tano o Jehova premalo amende. Jekh psalmista pisinđa: „Na postupini amencar premalo amare grehija“ (Ps. 103:10). Ama, disavo puti tano potrebno o Jehova te ukorini nekas ko ćerđa greh (w21.10 8 ¶1-2).

Sar so phenđam, o Jehova mothovi po verno mangipe okolenđe soj tane paše oleja. Odova dićhola ando lafija kola phenđe o kralj David hem o prorok Danilo. Na primer, o David phenđa: „Nek to verno mangipe zauvek aćhola upro okola so penđarena tut.“ A ko aver than, phenđa: „E Jehovaso verno mangipe zauvek ka ovel okolencar kola darana olestar.“ O prorok Danilo phenđa: „Jehova, tu hijan pravo Devel... hem mothoveja verno mangipe okolenđe kola mangena tut hem kola ićerena pe ko te zapovestija“ (Ps. 36:10; 103:17; Dan. 9:4). Sar so mothovena akala lafija, o Jehova mothovi po verno mangipe pe slugenđe odolese so penđarena le, darana olestar, mangena le hem ićerena pe ko olese zapovestija. O Jehova mothovi po verno mangipe samo okolenđe so služinena lese ko ispravno način. Angleder so počminđam te služina e Jehovase, amen osetinđam o mangipe kova o Devel mothovi sa e manušenđe (Ps. 104:14). Ama, akana ked služinaja olese, amen osetinaja oleso verno mangipe (w21.11 4 ¶8-9).

Save god pharipa te ovel amen, amen ićeraja amen ko akala e Isusese lafija. Avdije, but manuša đana palo religiozna vođe. Disave manuša odobor uživinena te šunen len, so samći obožavinena len. O manuša đana ko olenge crkve, ćinena olenge knjige, dena len pare ja podupirinena olenge organizacije. Disave verujinena ko svako olengo lafi. Ked dikhena len, odobor tane bahtale, ka phene dikhlje e Isuse. Ama, okola kola služinena e Jehovase na dikhena nijekhe manuše sar pe vođa. Iako poštujinaja okolen kola predvodinena, amen ićeraja amen ko e Isusese lafija: „Tumen sare hijen phralja“ (Mat. 23:8-10). Amen na obožavinaja e manušen, bilo on te oven vođe andi disavi religija ja vladarija ki disavi phuv. Isto ađahar, na podržinaja olenge ideje. Umesto odova, amen hijam neutralna hem na hijam deo ando akava sveto. Ko sa akala buća amen razlikujinaja amen ando but religije kola phenena soj tane hrišćanska (Jov. 18:36; w21.10 20 ¶6-7).

Svako ko mangela te ovel sveto na ismini te mukhel nikase hem nisose te ovel lese považno ando Jehova. Amen akharaja anav e Jehovase svedokija hem odolese mangaja te cida amen kotar sa so šaj te meljaćeri oleso sveto anav (Lev. 19:12; Is. 57:15). O Izraelcija mothovđe so prihvatinđe e Jehova sar pe Devle ađahar so ićerđe pe ko olese zakonija. Ki Levitska 18:4 pisini: „Ićeren tumen ko me zakonija hem ko me smernice hem živinen premalo lende. Me hijum o Jehova, tumaro Devel.“ Ko 19. poglavlje vaćeri pe hem ando disave smernice kola hine dinde e Izraelcenđe. Na primer, kotar 5. đi o 8. stiho, hem ko 21. hem ko 22. stiho vaćeri pe ando životinje kola valjanđe te den pe sar žrtva. Ked valjanđe te den žrtve, o Izraelcija valjanđe te pazinen te na meljaćeren „odova soj tano sveto e Jehovase.“ Odola stihija valjani te podstakninen amen te ćera odova so o Jehova mangela hem amare žrtve ja amare lafija kolencar hvalinaja le te oven ugodna olese, sar so pisini ko Jevrejima 13:15 (w21.12 5-6 ¶14-15).

Okola kola akana sigende lelje pe šaj te sikljon ando avera bračna parija kola sikljilje te osloninen pe upro Jehova. Odola bračna parija šaj tane beršencar ki punovremeno služba. Sose na rodena olendar savet ked mangena te ćhiven tumenđe disave ciljija? Ađahar šaj te mothoven so isi tumen poverenje upro Jehova (Posl. 22:17, 19). Ma bistri so o brako tano poklon ando Jehova (Mat. 19:5, 6). Ov mangela o bračna parija te uživinen ko po brako. Tumen so akana sigende leljen tumen, razmislinen so ka ćeren ko tumaro životi. Da li mothovena so hijen zahvalna aso sa o poklonija kola o Jehova dinđa tumen? Molinen tumen e Jehovase. Ko oleso Lafi roden o savetija kola odnosinena pe upro tumende. Palo odova, ićeren tumen ko savetija kola o Jehova dela tumen. Ako tano tumenđe o Jehova ko prvo than, šaj te oven sigurna so ka ovel tumen bahtalo životi (w21.11 19 ¶16, 18).

O Jakov na mislinđa soj tano pošukar averendar. Ov na mislinđa soj tano považno averendar sose hine e Isuseso phral ja sose hine le disave važna zaduženja. Ov avere hrišćanen vićinđa „me manglje phralja“ (Jak. 1:16, 19; 2:5). O Jakov na ćerđa pe soj tano savršeno manuš. So sikljovaja? Ma bistri so sare hijam grešna manuša. Na valjani te mislina so hijam pošukar ando manuša kolencar proučinaja. Sose? Ako ćeraja amen so niked na grešinaja, on šaj te obeshrabrinen pe hem te mislinen so niked na ka ćeren odova so o Devel rodela olendar. Ama, ked iskreno phenaja lenđe so hem amenđe na hine lokho te ićera amen ko odova so sikljiljam hem ked vaćeraja lenđe sar o Jehova pomožinđa amenđe te menjina amen, tegani ka haljon so hem on šaj te služinen e Jehovase (w22.01 11-12 ¶13-14).

So pobuter razmislinaja sar o Isus, pana pobuter ka ćera o buća sar oleste hem pana pošukar ka mothova olese osobine (Jevr. 1:3). Šaj phenaja kokri amenđe: „O Isus hine savršeno! Me niked na ka ovav sar oleste!“ Ako osetineja tut ađahar, ma bistri akala buća. Sar prvo, tu hijan ćerdo te ove sar o Jehova hem sar o Isus. Odolese, tu šaj te ove sar olende, barem đi ki jekh mera (Post. 1:26). Sar dujto, e Devleso sveti duh tani najzorali sila ko svemir. Ked oleso sveti duh pomožini tut, tu šaj te ćere odova so mislinđan so niked našti te ćere. Sar trito, o Jehova na očekujini tutar akana savršeno te mothove o osobine kola tane plod ando sveti duh. Okola so ka živinen večno ki phuv ka ovel len 1 000 berš te oven savršena (Otkr. 20:1-3). Odova so o Jehova akana rodela amendar tano te trudina amen hem te oslonina amen upro leste (w22.03 9 ¶5-6).

I molitva nane jedino način sar šaj te zorjaćera amaro amalipe e Jehovaja. Ked proučinaja oleso Lafi ja ked đaja ko sastankija, odova šaj te pomožini amenđe te ova pana popaše e Jehovaja. Sar šaj pana pobuter te koristini tuće o vreme ked proučineja ja ked hijan ko sastankija? Puć tut: „Kuri tani mi godi đi proučinava ja đi hijum ko sastankija? Da li uvek dikhava ko telefoni ko vićinđa man ja da li neko bićhalđa maje poruka?“ Ako dikheja so ked proučineja ja ked hijan ko sastankija ti godi nane ko jekh than, tegani molin tut e Jehovase te pomožini tut. Šaj na ka ovel tuće lokho te mukhe te brige ki strana hem te razmisline ando Devleso Lafi. Ama, baš tegani valjani te ćere odova. Molin tut e Jehovase te del tut mir kova ka arakhi, na samo to vilo, već hem ti godi (Fil. 4:6, 7; w22.01 29-30 ¶12-14).

O kralj Ozija na manglja te šunel o savet. Ov khuvđa ko Jehovaso hram ko deo ko kova šaj hine samo o sveštenikija te khuven hem manglja te prinosini o kad. E Jehovase sveštenikija phenđe lese: „Na ismineja tu, Ozija, te thare o kad e Jehovase! Odova valjani te ćeren samo o sveštenikija.“ Sar o Ozija reagujinđa? Ked bi ovela ponizno hem ked bi prihvatini o savet hem odmah ikljola ando hram, možda bi o Jehova oprostini lese. Umesto odova, o Ozija holjanđa. Sose na prihvatinđa o savet? Ov mislinđa so sar kralj isi le pravo te ćerel sa so mangela. Ama, o Jehova na mislinđa ađahar. Sebepi so ćerđa odova so na hine le pravo te ćerel, o Ozija dobinđa guba hem odija „guba hine le sa đi na mulo“ (2. Let. 26:16-21). Ando Ozija sikljovaja so nane važno ko hijam, ako na prihvatinaja o savet andi Biblija, amen više na ka ova paše e Jehovaja (w22.02 9 ¶7).

O manuš kova pana na huljavđa i purani ličnost razmislini ko pogrešno način hem ćerela o buća kola tane lošna (Kol. 3:9). Ov šaj tano sebično, nezahvalno, ponosno hem sigate holjani. Šaj dikhela pornografija hem nemoralna ja nasilna filmija. Sigurno isi le disave šukar osobine hem šaj isi le o osećaj andi krivica sebepi o lošna buća kola phenela ja ćerela. Ama, nane le dovoljno bari želja te menjini pe (Gal. 5:19-21; 2. Tim. 3:2-5). Amen hijam nesavršena hem odolese niko amendar našti potpuno te cidel o lošna mislija andi amari godi hem o lošna želje ando amaro vilo. Podijekh puti, sare amen ka ćera ja ka phena diso so na ka ovel baš najmudro (Jer. 17:9; Jak. 3:2). Ama ked huljavaja i purani ličnost, amen više na razmislinaja ko pogrešno način hem više na mukhaja amare želje te legaren amen. Amen ovaja averćhane manuša (Is. 55:7; w22.03 3 ¶4-5).

Starešine, dikhen o šukar osobine kola tumare phralja hem phenja isi len. Svako olendar tano nesavršeno, ama svako olendar isi le hem šukar osobine sebepi kola poštujinaja len. Ćaće tano so o starešine podijekh puti valjani te den savet jekhe phralese ja jekha phenjaće. Ama, sar o apostol Pavle, on trudinena pe te dikhen so bešela palo nekase lafija hem postupkija. On đanena so odija osoba mangela e Jehova, soj tani verno hem so mangela te ćerel odova soj tano šukar. O starešine kola dikhena odova soj tano šukar ko avera pomožinena e phralenđe hem e phenjenđe te osetinen pe soj tane mangle ki skupština. Ma bistren so o Jehova na rodela tumendar te oven savršena, već te oven verna (1. Kor. 4:2). O Jehova hine bahtalo sebepi odova so o Pavle ćerđa hem so hine lese verno. Ov sigurno so o Jehova cenini odova so tu ćereja ki olesi služba. O Jehova niked na ka „bistrel odova so ćerđen hem o mangipe kova mothovđen premalo oleso anav, ađahar so služinđen okolenđe kola tane sveta hem so pana služinena olenđe“ (Jevr. 6:10; w22.03 31 ¶19, 21).