Januar

Sose o Timotej hine šukar e Jehovaso sluga? Sebepi so hine le but šuže osobine (Fil. 2:19-22). Ando Pavlese lafija, šaj te dikha so o Timotej hine ponizno, verno, bućarno hem pouzdano manuš. Ov manglja e phralen hem brininđa pe olendar. Sebepi odova, o Pavle but manglja le hem šaj hine te del le čak hem disave phare zadatkija. Isto ađahar, ked o Jehova dikhela so ćeraja ko amare osobine, ov pana pobuter mangela amen hem pana pobuter šaj te pomožina averenđe ki skupština (Ps. 25:9; 138:6). Molin tut hem razmislin ko so valjani te ove pana pošukar. Palo odova, birin jekh osobina ki koja mangeja te ćere. Na primer, da li šaj te ove pana pobuter saosećajno, da li šaj te ovel tut pana pobari želja te pomožine averenđe ja da li šaj pana pobuter te ćere ko odova te ove ko mir averencar hem te oprostine? Isto ađahar, šaj te puće jekhe zrelo amale ko so valjani te ćere buti (Posl. 27:6; w22.04 23 ¶4-5).

O Jehova mangela te ova bahtale. Odova đanaja sose i radost tani plod ando oleso sveti duh (Gal. 5:22). Sebepi so „pobuter isi bahtalipe ked dela pe nego ked lela pe“, amen hijam pobahtale ked daja sa amendar ki služba hem ked pomožinaja amare phralenđe (Dela 20:35). Sar so pisini ko avdisutno stih, o apostol Pavle vaćeri ando duj buća kola šaj te pomožinen amen te aćhova bahtale. Sar prvo, valjani te da e Jehovase amaro najšukar. Ked daja e Jehovase amaro najšukar, amen ka ova bahtale (Mat. 22:36-38). Sar dujto, na valjani te uporedina amen averencar. Šaj isi amen šukar sastipe, disave sposobnostija ja šaj sikljiljam disave buća šukar te ćera, ama valjani te ova zahvalna e Jehovase aso sa so šaj te ćera. Ki aver strana, ako avera phralja hem phenja tane pošukar amendar ki služba, valjani te ova bahtale sebepi olengo sose on pe sposobnostija koristinena te hvalinen e Jehova, a na te vazden pe (w22.04 10 ¶1-2).

O politička sile iznenada ka irinen pe protiv o Baro Vavilon hem ka uništinen le, a odova ka iznenadini celo sveto (Otkr. 18:8-10). O uništenje ando Baro Vavilon ka utičini upro sa o manuša hem šaj ka anel bare pharipa. Ama, e Devleso narodo ka ovel le najhari duj razlogija sose te ovel bahtalo. I hovavni religija, koja beršencar hine e Devleso dušmani, više na ka ovel hem pana hari amen ka ova izbavime kotar akava lošno sveto. O Danilo prorekninđa so „o pravo đandipe ka ovel pana pobaro.“ Baš ađahar hem ulo! Amen akana haljovaja o proročanstvija kola vaćerena kotar amaro vreme (Dan. 12:4, 9, 10). Akala proročanstvija tane tačna hem sebepi odova amen pana pobuter ceninaja e Jehova hem oleso Lafi (Is. 46:10; 55:11). Odolese, hajde hem ponodri te zorjaćera amari vera ađahar so hor ka proučina e Devleso Lafi hem ađahar so ka pomožina averenđe te oven e Jehovase amala. O Jehova ka arakhi sa okolen kola osloninena pe upro leste hem ka del len trajno mir (Is. 26:3; w22.07 6-7 ¶16-17).

I knjiga Otkrivenje mothovi so ko nebo vladini e Devleso Kraljevstvo hem so o Satana tano fordimo kotar nebo (Otkr. 12:1-9). Odova anđa mir ko nebo, ama bare pharipa e manušenđe ki phuv. Sose? Odolese soj tano o Satana holjamo hem napadini okolen kola verno služinena e Jehovase ki phuv (Otkr. 12:12, 15, 17). Sar šaj te aćhova verna e Jehovase, iako o Satana napadini amen? (Otkr. 13:10). Šaj te pomožini amen odova so đanaja so ka ovel ki budućnost. Na primer, ko Otkrivenje o apostol Jovan pisinđa kola blagoslovija pana hari ka oven amen. Jekh ando odola blagoslovija tano so e Devlese dušmanija ka oven uništime. Pana ko početko ki knjiga Otkrivenje pisini so odova so odothe čitinaja tano mothovdo ko „znakija“ ja te phena ko simbolično način (Otkr. 1:1; w22.05 8 ¶1-3).

Odova so e Jehovase sluge ka aćhon verna olese, but ka holjanćeri olese dušmanen. Sebepi odova, i koalicija ando narodija ka napadini e Devlese narodo ki celo phuv. Ki Biblija odova napad vićini pe napad kotar Gog ando Magog (Jezek. 38:14, 15). Sar o Jehova ka reagujini? Ki Biblija pisini so ov but ka holjani (Jezek. 38:18, 21-23). Ko Otkrivenje ko 19. poglavlje pisini so pana ka ovel. O Jehova ka bićhali pe Ćhave te zaštitini olese narodo hem te uništini olenge dušmanen. Oleja ka oven o anđelija hem o 144 000 pomazanikija (Otkr. 17:14; 19:11-15). Ko krajo ando akava maribe, sa o manuša hem o organizacije ka oven uništime (Otkr. 19:19-21; w22.05 17 ¶9-10).

Sigate palo odova so o Adam hem i Eva grešinđe, o Jehova dinđa jekh proročanstvo kova tano pisimo ko Postanak 3:15: „Ka ćhivav neprijateljstvo maškaro tute hem i đuvli hem maškaro toklo potomstvo hem olako potomstvo. Ov ka zdrobini to šero, a tu ka ranine le ki patum.“ Akava proročanstvo tano pisimo ki prvo knjiga andi Biblija. Ama, sa avera knjige ki Biblija tane ko disavo način povezime oleja. Sar so o lepako spojini sa o listija andi jekh knjiga, ađahar hem o lafija ando Postanak 3:15 povezinena sa e biblijake knjige. Sa odola knjige zajedno prenosinena jekh poruka. A odija poruka tani so o Devel ka bićhali jekhe Spasitelje kova ka uništini e Benge hem okolen kola đana palo leste. Odova ka ovel baro blagoslov okolenđe kola mangena e Jehova. Ako proučinaja i Biblija amen ka haljova sar ispuninđa pe akava proročanstvo hem sar pomožini amenđe avdije (w22.07 14 ¶1-3).

Molin tut e Jehovase te pomožini tut te sikave te ćhaven te mangen e Jehova (Jak. 1:5). Ov šaj te del amen najšukar savetija. Sose? Sar prvo, ov tano roditelj hem isi le baro iskustvo (Ps. 36:9). Sar dujto, o savetija kola ov dela uvek tane amare šukaripase (Is. 48:17). O Jehova prekali pi organizacija dinđa but buća kola šaj te pomožinen e roditeljenđe te sikaven pe ćhaven te mangen le (Mat. 24:45). Na primer, ko časopis Probudite se! beršencar hine dinde but šukar savetija sar šaj o roditeljija te barjaćeren pe ćhaven. Ama, odola ista savetija šaj te arakhen hem ko amaro sajt ko deo serije ando člankija „Saveti za porodicu.“ Isto ađahar, ko amaro sajt isi but videa kola šaj te pomožinen e roditeljenđe te primeninen e Jehovase savetija đi barjaćerena pe ćhaven (Posl. 2:4, 5; w22.05 27 ¶4-5).

Niko našti te oprostini sar o Jehova. Sose šaj odova te phena? Sar prvo, o Jehova tano uvek spremno te oprostini amenđe. Sar dujto, ov đanela sa amendar, sostar hijam ćerde hem šaj najšukar te dikhel da li ćaće kajinaja amen. Sar trito, ked o Jehova oprostini, ov kosela o greh, ka phene niked na grešinđam. Odolese šaj te ovel amen čisto savest hem te ova paše oleja. Naravno, sa đi hijam nesavršena, amen ka grešina. Ama, utešini amen odova so pisini ki jekh amari publikacija: „O Jehova tano milosrdno Devel hem đanela so hijam nesavršena. Odolese, na valjani te obeshrabrini amen o osećaj andi krivica sebepi o greh kova ćerđam (Ps. 103:8-14; 130:3). Ako daja sa amendar te đa ko oleso drumo, ka ova bahtale“ (Fil. 4:4-6; 1. Jov. 3:19-22; w22.06 7 ¶18-19).

I dar ando progonstvo nane jedino oružje kova o Satana koristini. Disave pobuter darana ando odova sar olengi porodica ka reagujini so on ulje e Jehovase svedokija, nego ando progonstvo. On but mangena pe porodica hem mangena te pomožinen len te upoznajinen e Jehova. Ama, but tane tužna ked olengi porodica marela muj e Jehovase hem e phralenđe. Disavo puti, baš odola kola protivinđe pe amenđe, ovena e Jehovase svedokija. Ama, so ako neko andi amari porodica na mangela te ovel le više ništa amencar sose uljam Svedokija? Sar tegani ka osetina amen? Šaj but te pomožinen amen o lafija ando Psalam 27:10. Odolese so odothe pisini so o Jehova but mangela amen, čak iako amare na mangena te ovel len ništa amencar. Šaj te ova sigurna so o Jehova ka blagoslovini amen sebepi amari istrajnost. Ov ka del amen sa odova so valjani amenđe, ka pomožini amen te ovel amen mir, te ova bahtale hem te ova uzo leste (w22.06 16-17 ¶11-13).

Ked o Isus hine ki phuv, o manuša phenđe lese soj tano halano, so but pijela, so o Beng pomožini lese, so na ićeri pe ko Zakon ando sabat hem so na poštujini e Devle (Mat. 11:19; 26:65; Luka 11:15; Jov. 9:16). Ama, o Isus na holjanđa upro lende hem na vaćerđa olencar ko isto način. Sar o Isus, hem amen na valjani te irina e manušenđe ked tane gruba premalo amende (1. Petr. 2:22, 23). So šaj te pomožini amenđe? Ako ki služba tano neko neljubazno premalo tute, ma ov uznemirimo već de sa tutar te haljove sose tano asavko. Amaro phral o Sam, phenela: „Ked hijum ki služba razmislinava odolestar kobor e manušenđe valjani o ćaćipe hem niked na bistrava so svako manuš šaj te menini pe.“ Disavo puti o manuša tane holjame sose aljam ko pogrešno vreme. Šaj kratko te molina e Jehova te pomožini amen te ovel amen mir, te mothova poštovanje hem te na phena diso so ka uvredini e osoba (w22.04 6 ¶8-9).

Jekh način sar šaj o roditeljija te pomožinen pe ćhavenđe te oven paše e Jehovaja tano ađahar so ka proučinen olencar i Biblija (2. Tim. 3:14-17). Ama, i Biblija phenela so isi pana jekh način sar šaj o ćhave te sikljon ando Jehova. Ki knjiga Poslovice, jekh dad setinćeri pe ćhave te na bistrel e Jehovase osobine kola dićhona ko odova soj tano stvorimo (Posl. 3:19-21). Tumen o roditeljija, verovatno uživinena te oven tumare ćhavencar avrijal. Koristinen odova vreme te pomožinen lenđe te dikhen sar tane povezime o „buća kola tane stvorime“ hem e Jehovase osobine (Rimlj. 1:20). Zapazin sar o Isus prekalo odova soj tano stvorimo sikavđa averen. Jekh puti, ov phenđa pe učenikonenđe te dikhen o gavranija hem o ljiljanija (Luka 12:24, 27-30). Ov sikavđa pe učenikonen kobor tano oleso Dad phravde vasteso hem šukar. Prekalo akala duj primerija ov sikavđa len so o Jehova ka parvari hem ka uravi pe slugen sar so odova ćerela e gavranenđe hem e luluđenđe (w23.03 20-21 ¶1-4).

Amen hijam zahvalna e Jehovase so šaj te molina amen prekalo oleso Ćhavo. Ov šunela hem odgovorini ko amare molitve kola bićhalđam ko olese Ćhaveso anav hem oprostini amare greške prekali Isusesi otkupno žrtva (Rimlj. 5:1). Ki Biblija pisini so o Isus tano „prvosvešteniko, kova [bešela] ki desno strana ando presto kotar Svevišnjo ko nebo“ (Jevr. 8:1). „Ko amaro Dad isi amen pomoćniko“, a odova tano o Isus Hrist (1. Jov. 2:1). But hijam zahvalna e Jehovase so isi amen prvosvešteniko kova haljola amare slabostija hem kova „molini e Jehova amenđe“ (Rimlj. 8:34; Jevr. 4:15). Niked na bi šaj te molina amen e Jehovase bizi otkupnina. Zahvalna hijam lese so dinđa pe Ćhave amenđe, ama niked na ka šaj te irina lese aso odova so ćerđa amenđe (w22.07 23 ¶10-12).

O pouzdano manuš ispunini pe obećanja hem vaćeri o ćaćipe (Ps. 15:4). Avera đanena so šaj te osloninen pe upro leste. Amen mangaja amare phralja hem phenja ađahar te mislinen hem amendar. Amen našti te ćhiva averen silaja te verujinen amenđe. O poverenje valjani te zaslužini pe. Phenela pe so o poverenje tano sar o pare – pharo tano te ovel tut, ama lokho šaj te našalji pe. O Jehova zaslužini amaro poverenje. Ki Biblija pisini so „sebepi sa odova so ćerela šaj te ovel amen poverenje upro leste“ (Ps. 33:4). Ov očekujini amendar te oponašina le (Ef. 5:1). Amen hijam but zahvalna e Jehovase so hijam deo andi organizacija kuri isi pouzdana manuša. Sare valjani te da sa amendar te šaj avera te ovel len poverenje upro amende. Ked svako amendar mothovi mangipe, poniznost, razboritost, iskrenost hem samokontrola, tegani ka ovel amen poverenje jekh upro jekheste. Odolese, valjani te da sa amendar te oponašina amare Dade, e Jehova, hem te ova manuša upro kaste šaj te verujini pe (w22.09 8 ¶1-2; 13 ¶17).

Ki skupština isi amen but phralja hem phenja, ama ipak šaj te osetina amen so hijam kokri. O Jehova niked na mangela te osetina amen ađahar. Razmislin sar pomožinđa pe prorokose e Ilijase. O Jehova podstakninđa le te phenel lese sar osetini pe hem odolese duvar pućlja le: „So ćereja othe?“ (1. Kralj. 19:9, 13). Svako puti, o Jehova pažljivo šunđa le hem odgovorinđa ko olese molitve, ađahar so mothovđa lese soj tano uzo leste hem so isi le bari moć. Isto ađahar, o Jehova uverinđa le so isi pana manuša kola služinena lese ko Izrael (1. Kralj. 19:11, 12, 18). Palo odova, e Ilijase sigurno hine but polokho. Odolese, o Jehova dinđa le nekobor zadatkija. Na primer, phenđa lese te pomazini e Azailo te ovel kralj ki Sirija, o Juj te ovel kralj ko Izrael, a o Jelisej te ovel prorok (1. Kralj. 19:15, 16). Odoleja so dinđa le akala zadatkija hem jekhe amale, e Jeliseje, o Jehova pomožinđa lese te razmislini ando šukar buća (w22.08 8 ¶3; 9 ¶5).

Da li ko than kaj živineja gradinđa pe ili renovirinđa pe i dvorana? Ako ja, verovatno našti te bistre sar hine tuće ko prvo sastanko. Sigurno hijan le but zahvalno e Jehovase. Đi đilabđan i prvo đili, šaj čak khuvđa tut o rojbe. Amare dvorane dena hvala e Jehovase. Ama, amen šaj te hvalina e Jehova ked ćeraja hem jekh aver buti. A odija buti tani te izgradina ili te zorjaćera jekh jekhe. Odolestar o apostol Pavle pisinđa ko avdisutno stiho. O apostol Pavle tano but šukar primer, odolese so đanđa sar te zorjaćeri e phralen hem e phenjen. Ov haljilo len ked hine len problemija. Amen šaj te oponašina le hem te zorjaćera jekh jekhe (1. Kor. 11:1; w22.08 20 ¶1-2).

O hrišćanija kola mangena te oven pravedna anglo Devlese jaćha valjani te ćeren odova soj tano ispravno hem te oven poštena ki pi buti. Isto ađahar, o pravedno manuš mangela i pravda hem mrzini ked dikhela nekas ko ćerela odova soj tano nepravedno. O manuš kova tano ćaće pravedno razmislini sar olese odluke ka utičinen upro Jehova, odolese so mangela te ćerel le „te ovel bahtalo“. Ki Biblija pisini so e Jehovastar „avela i pravednost“ (Jer. 50:7). Sar amaro Stvoritelj, o Jehova jedino isi le pravo te odlučini soj tano šukar, a soj tano lošno. Amen hijam nesavršena hem našti te đana soj tano šukar, a soj tano lošno. Ama, o Jehova tano savršeno, odolese ov šaj te đanel odova (Posl. 14:12; Is. 55:8, 9). Odolese so hijam ćerde premali Jehovasi slika, amen šaj hem mangaja te ćera odova soj tano ispravno anglo olese jaćha (Post. 1:27). Amen mangaja e Jehova hem odolese daja sa amendar te oponašina le najšukar so šaj (Ef. 5:1; w22.08 27 ¶5-6).

Ked isi amen disave pharipa ja hijam obeshrabrime, tegani razmislinaja so valjani diso te ćera te šaj te rešina odova. Normalno tano te razmislina odolestar, ama valjani te pazina te na ćera diso so o Jehova mrzini (Ef. 5:10-12, 15, 16). Ko lil kova pisinđa e hrišćanenđe ko Filipi, o apostol Pavle podstakninđa len te razmislinen ando odova soj tano „pravedno. . . čisto. . . so ćhivela len te mothoven mangipe. . . hem soj tano pristojno“ (Fil. 4:8). Iako o Pavle na pisinđa andi disavi konkretno zabava, odova so pisinđa šaj te pomožini amenđe te birina šukar zabava. Probin umesto o lafi „sa“, kova pojavini pe ko akava stih, te ćhive o lafi „đilja“, „filmija“, „serije“ ja „video-igrice“. Odova ka pomožini amenđe te dikha soj tano šukar anglo Jehovase jaćha, a so nane. Amen mangaja te ićera amen ko Jehovase merilija (Ps. 119:1-3. w22.10 9 ¶11-12).

Angleder te meren, o „nepravedna manuša“ na sikljilje ando Jehova hem na đanđe sar te ićeren pe ko olese merilija. Te šaj te ćeren odova, ked ka vladini e Devleso Kraljevstvo ka organizujini pe jekh baro obrazovno program kova niked angleder na hine. Ko ka sikavi e nepravedno manušen? Olen ka sikaven o baro mnoštvo hem o pravedna manuša kola ka uskrsninen. Te šaj o anava ando nepravedna manuša te oven pisime ki knjiga ando životi, on ka valjani te oven šukar amala e Jehovaja hem te predajinen lese po životi. O Isus Hrist hem o pomazanikija kotar nebo pažljivo ka posmatrinen sar o nepravedna manuša ka reagujinen ko odova so sikljona (Otkr. 20:4). Ako neko olendar na ićeri pe ko odova so sikljola, olese na ka ovel dozvolimo te živini, čak hem ako ka ovel le šel berš (Is. 65:20). O Jehova hem o Isus đanena soj tano ko svakoneso vilo hem na ka mukhen niko te ćerel lošna buća ko nevo sveto (Is. 11:9; 60:18; 65:25; w22.09 17 ¶11-12).

Ko akava stih o lafi „vlastija“ odnosini pe ko manuša kola isi len moć hem kola vladinena upro avera. O hrišćanija valjani te oven podložna odole manušenđe. On ćerena te ovel mir, dena sa pestar o manuša te šunen o zakonija hem čak podijekh puti zaštitinena e Jehovase narodo (Otkr. 12:16). Odolese valjani te platina o porezija hem te poštujina o vlastija (Rimlj. 13:7). Ama, o vlastija isi len autoritet samo odolese so o Jehova dozvolini lenđe odova. O Isus odova phenđa ked ispitinđa le o rimsko namesnik, o Pontije Pilat. Ked o Pilat phenđa so ov isi le vlast te zaštitini oleso životi ili te mudari le, o Isus phenđa lese: „Tu ne bi ovela tut nisavi vlast upro mande ako nane tuće dindi ando nebo“ (Jov. 19:11). O vladarija hem o političarija avdije isi len ograničeno vlast isto sar so hine le hem o Pilat (w22.10 14 ¶6).

O Jehova phenđa e kraljese e Davidese te pisini savo ka ovel o životi ked ki budućnost ka vladini o mudro hem o verno kralj (Ps. 37:10, 11, 29). Ked vaćeraja e manušencar ando raj, but putija čitinaja lenđe o lafija ando Psalam 37:11, sebepi so hem o Isus citirinđa akala lafija hem phenđa so ka ispuninen pe ki budućnost (Mat. 5:5). Ama, akala lafija mothovena amenđe hem savo hine o životi ked o Solomon vladinđa. Tegani, e Devleso narodo hine le baro mir, hine len sa so valjanđa lenđe. Ki odija phuv samći thavdinđa „thud hem avđin.“ O Devel phenđa: „Ako ka živinen premalo me odredbe. . . ka ćerav te ovel mir ki tumari phuv, ked ka đan ko sojbe na ka daran nikastar“ (Lev. 20:24; 26:3, 6). Akala lafija ispuninđe pe ked o Solomon vladinđa (1. Let. 22:9; 29:26-28). Odova so pisini ko Psalam 37:10, 11, 29 ispuninđa pe ko purano vreme. Ama, odola lafija ka ispuninen pe hem ki budućnost (w22.12 10 ¶8).

Sar hrišćanija, amen valjani te ićera amen ko smernice. Ki Biblija pisini jekh but šukar savet: „Prekalo mudro vođstvo vodini pe o maribe, i pobeda tani ked isi but savetnikija“ (Posl. 24:6, fusn). Sar akava stih šaj te pomožini amen pana pošukar te ćera amari služba hem te sikava averen? Umesto te propovedina hem te sikava averen ađahar sar so amen mislinaja soj tano šukar, amen trudinaja amen te šuna o predlogija kola dobinaja. Ko amare sastankija šaj but te sikljova ando prezentacije kola dikhaja hem ando govorija kola ićerena o iskusna phralja. Uzo odova, e Jehovasi organizacija dela amen šukar alatija sar soj tane amare publikacije hem videa kola šaj te pomožinen e manušenđe te haljon odova so pisini ki Biblija. But hijam zahvalna aso savetija kola isi amen ko Devleso Lafi. So bi ovela amencar ked na bi ovena amen odola savetija! Odolese, hajde sare te da sa amendar uvek te primenina i mudrost koja avela andi Biblija (Posl. 3:13-17; w22.10 23 ¶18-19).

Ked redovno haja maro, amen ovaja pana pozorale. Isto ađahar, ked redovno proučinaja e Devleso Lafi hem hor razmislinaja olestar, amari vera ovela pana pozorali. Ama, sar šaj te ćera odova? Najangleder, molinaja amen te šaj te pripremina amaro vilo aso odova so o Jehova mangela te phenel amenđe. Palo odova, čitinaja e Devleso Lafi, i Biblija. Ko krajo, terđovaja hem hor razmislinaja odolestar so čitinđam. So ovela palo odova? So pobuter haljovaja e Devleso Lafi, amari vera ovela pana pozorali. Sose tano važno te čitina e Devleso Lafi hem hor te razmislina odolestar so čitinđam? Odolese so odova ka del amen snaga te propovedina i šukar vest akana hem te objavina i poruka andi osuda ko vreme kova avela. Isto ađahar, ked razmislinaja ando odova savo tano o Jehova, amen šaj te ova pana popaše oleja (w22.11 6-7 ¶16-17).

O Isus phenđa so sare ka penđaren olese učenikonen premalo mangipe, na samo olese sledbenikija. O mangipe kova isi ko Jehovaso narodo tano diso posebno. Ama, e Jehovase svedokija nane savršena (1. Jov. 1:8). So pošukar upoznajinaja e phralen hem e phenjen, verovatno sa poviše dikhaja olenge mane (Rimlj. 3:23). Nažalost, disave čak ćhinavđe te služinen e Jehovase sebepi averengi nesavršenost. Sar o Isus mothovđa mangipe premalo pe apostolija? Sar šaj avdije te đa palo Isuseso primer? Šukar tano te razmislinen ando akala pućiba čak hem okola soj tane krstime. Odova ka podstaknini amen pana pobuter te mothova mangipe, pogotovo ked dikhaja averenge greške (Ef. 5:2; w23.03 26-27 ¶2-4).

Sar o krajo kotar akava sveto tano sa popaše, amen šaj te očekujina so ka oven amen problemija ki skupština. Odola problemija šaj te oven ispit asi amari vera. Ama, amen valjani te ova trezvena. Ako povredinena amen o phralja ja o phenja, na valjani te ićera i holi ano amende. Ako dobinaja ukor, na valjani te razmislina samo ando odova kobor tano amenđe pharo, nego valjani te prihvatina o savet hem te ćera o potrebna promene. A ked ovena promene ki Jehovasi organizacija kola utičinena ko amaro zadatko, tegani valjani celone vileja te prihvatina odola promene hem te šuna o smernice. Tu šaj te ovel tut poverenje ko Jehova hem ki olesi organizacija, čak hem ked tani ti vera ko ispit. Ama, tu valjani te ove trezveno, avere lafencar valjani te aćhove smirimo, te ove razumno hem te dikhe ko buća sar o Jehova. Valjani te moline tut e Jehovase te pomožini tut hem niked ma cide tut andi skupština. Tegani, bizo obzir so te desini pe, o Satana na ka uspini te cidel tut ando Jehova hem andi olesi organizacija (Jak. 4:7; w22.11 24-25 ¶14-16).

Phraljalen kola služinena sar starešine, pomožinen e phralenđe angleder te pripreminen pe asi prirodno katastrofa. Trudinen tumen sa o objaviteljija te đanen sar te oven ko kontakt tumencar hem so valjani te ćeren te šaj te oven bezbedna. So avera šaj te ćeren? Ako uzo tute hine disavi prirodno katastrofa, tegani puć e starešinen sar šaj te pomožine. Šaj jekh vreme ko to ćher te oven o phralja kola našalđe po ćher ja o phralja kola alje te pomožinen. Ja šaj te spremine diso hajbase hem te legare odole objaviteljenđe. Ako i katastrofa hine dur ando to than, šaj te pomožine ađahar so ka moline tut odole phralenđe (2. Kor. 1:8-11). Isto ađahar, šaj te pomožine ađahar so ka de dobrovoljno prilog (2. Kor. 8:2-5). Ako šaj te đa odothe kuri hine i katastrofa, puć e starešinen sar šaj te pomožine. Ako ka ove vićimo te pomožine, verovatno o phralja ka den tut obuka te šaj te sikljove sar šaj ko najšukar način te pomožine e phralenđe (w22.12 24 ¶8; 25 ¶11-12).

Jekh aver prevod aso avdisutno stiho phenela: „Na desinđa pe tumenđe ni jekh aver iskušenje kova nane uobičajeno e manušenđe.“ Akala lafija hine pisime e phralenđe hem e phenjenđe kola živinđe ki diz Korint. Disave olendar angleder hine preljubnikija, homoseksualcija hem pijanice (1. Kor. 6:9-11). So mislineja, da li palo odova so krstinđe pe on niked na hine len disavi neispravno želja? Pa, verovatno hine len. Iako hine pomazana hrišćanija, on hine nesavršena manuša. Disavo puti, verovatno hem on hine len disave neispravna želje. Odova valjani te ohrabrini amen. Sose? Sebepi so odova mothovi so hem avera hine len disave neispravna želje hem pobedinđe len. Odolese, sare amen šaj te aćhova „zorale ki vera“ sose đanaja so „odola ista patnje doživinena hem amare phralja ko celo sveto“ (1. Petr. 5:9; w23.01 12 ¶15).

I rat angleder te merel, o Isus molinđa e Jehova te pomožini olese učenikonenđe (Jov. 17:11). Sose akava šaj te ohrabrini amen? Odolese so o Jehova tano but pozoralo ando bilo kova amaro dušmani (1. Jov. 4:4). O Jehova sa dikhela. Amen hijam uverime so ako ka oslonina amen upro leste, ov ka pomožini amenđe te na dara, već te mothova so hijam hrabra. Da li podijekh puti lađaja te phene so hijan e Jehovaso svedoko? Da li tano tuće pharo te odlučine te ove nekršteno objavitelj ja te krstine tut sose daraja so avera ka mislinen tutar? Ma mukh asavke buća te ćhinaven tut te ćere odova soj tano ispravno. Phrav to vilo e Jehovase. Molin le te del tut hrabrost te ćere olesi volja. Ked ka dikhe sar o Jehova odgovorini ko te molitve, odova ka pomožini tuće te ove hrabro (Is. 41:10, 13; w23.01 29 ¶12; 30 ¶14).

O Isus pućlja e farisejen: „Na čitinđen li odova?“ Ađahar manglja te mothovi so hine len pogrešno stav ando Devleso Lafi (Mat. 12:1-7). Tegani, o fariseja phenđe so e Isusese učenikija na ićerena pe ko Zakon ando sabat. Ama, o Isus koristinđa duj primerija ando Devleso Lafi hem citirinđa jekh stih kotar Osija te šaj te mothovi lenđe so on na haljilje sose hine dindo o Zakon ando sabat hem so na mothovđe milosrđe. Ama, sose upro akala manuša na utičinđa odova so čitinđe ko Devleso Lafi? On hine ponosna hem čitinđe e Devleso Lafi samo te šaj te arakhen greške ko avera. Sebepi so hine len asavko stav, on na haljilje odova so čitinđe (Mat. 23:23; Jov. 5:39, 40). Zapazin so hem ko Matej 19:4-6 o Isus pućlja isto pućibe e farisejen: „Na čitinđen li odova?“ On čitinđe so o Jehova stvorinđa e prvo manuše hem e đuvlja, ama ipak na manglje te prihvatinen so o Jehova mislini ando brak. Kotar Isusese lafija dikhaja so đi čitinaja e Devleso Lafi, amen valjani te ovel amen ispravno stav. O fariseja hine ponosna. Ama, amen na mangaja te ova sar olende, već mangaja te ova ponizna hem spremna te sikljova (w23.02 12 ¶12-13).

Ko Zakon kova o Jehova dinđa e Izraelcenđe pisinđa so valjanđe te ćeren te šaj te oven bezbedna ćhere ja ki buti (Izl. 21:28, 29; Pon. zak. 22:8). Ako jekh manuš slučajno mudarđa avere manuše, tegani o posledice hine but bare (Pon. zak. 19:4, 5). Ko Zakon pisinđa so čak hem okola kola bi nenamerno povredinena e beba koja pana na bijandilji, valjanđe te oven kaznime (Izl. 21:22, 23). Ki Biblija jasno pisini so o Jehova mangela te pazina ko amaro hem ko averengo životi. Amen mothovaja so ceninaja o životi ađahar so pazinaja o buća ko amaro ćher ja ki buti te oven ko bezbedno than. Na primer, o oštra buća, o otrovna hemikalije ja o lekija, valjani te ćhiva ko than kaj našti te doljen o ćhave. Valjani but te pazina ako valjani te thara jag, te ćera buti tate panjeja ja te koristina disavo alati. Isto ađahar, na valjani te vozina ako leljam disave lekija palo kola sovela pe amenđe, ako piljam alkohol ja ako na sućam šukar. Uzo odova, na ka ićera o telefoni ko vas đi vozinaja (w23.02 21-22 ¶7-9).

O Jehova tano strpljivo, šukar hem haljola amen. Ov dikhela o šukar buća ko pe učenikija (Ps. 130:3). Niked na očekujini amendar pobuter ando odova so šaj te ćera. Ma bistri, ov stvorinđa ti godi, koja tani jekh but šukar poklon (Ps. 139:14). Amen isi amen prirodno želja te sikljova. Amaro Stvoritelj mangela zauvek te sikljova hem te uživina ko odova. Akana valjani te „manga“ o ćaćipe andi Biblija (1. Petr. 2:2). Ćhiv tuće razumna ciljija hem svako dive čitin hem proučin i Biblija (Is. Nav. 1:8). O Jehova ka pomožini tut te uživine đi čitineja hem đi sikljoveja pana pobuter olestar. Nane dovoljno samo te ovel amen đandipe. O đandipe valjani amenđe te šaj pobuter te sikljova ando Jehova hem te razvijina šukar osobine, sar soj tane o mangipe hem i vera (1. Kor. 8:1-3). Đi sikljoveja, molin tut e Jehovase te pomožini tut te ovel tut pobuter vera (Luka 17:5). Ov uslišini asavke molitve (w23.03 10 ¶11, 13).

O Isus manglja olese učenikija te ćeren diso đi ađićerena te avel o krajo ando akava sveto. Odolese, ov phenđa lenđe te propovedinen i šukar vest „ko Jerusalim, ki celo Judeja hem ki Samarija hem sa đi o najdur thana ki phuv“ (Dela 1:6-8). Odija hine bari buti. Te šaj te ćeren odova, on valjanđe mudro te koristinen po vreme. Ako mangaja te pazina ko amaro vilo, amen mora mudro te koristina amaro vreme. „O događaja kola na očekujinaja“ šaj te desinen pe svakonese amendar (Prop. 9:11). Šaj iznenada te desini pe te našala amaro životi. Amen šaj mudro te koristina amaro vreme ako zorjaćeraja amaro amalipe e Jehovaja hem ćeraja olesi volja (Jov. 14:21). Valjani te ova „zorale hem istrajna, uvek te ćera buti e Jehovase“ (1. Kor. 15:58). Ako ađahar ćeraja, amen na ka žalina kaj đelo amaro vreme ako desini pe te našala amaro životi ili ako alo o krajo ando akava sveto (Mat. 24:13; Rimlj. 14:8; w23.02 18 ¶12-14).