Februar

So značinena o lafija ando avdisutno citati? Sar so o Isus phenđa, odova tano o samopožrtvovano mangipe – mangipe kova podstaknini amen te ova spremna čak hem te mera amare phralenđe ako valjani. Ki Biblija pisini soj tano o mangipe but važno. Butenge omiljena stihija tane: „O Devel tano mangipe“ (1. Jov. 4:8). „Mang te pašutne sar kokri tut“ (Mat. 22:39). „O mangipe ućhari but grehija“ (1. Petr. 4:8). „O mangipe niked na ćhinavđola“ (1. Kor. 13:8). Akala hem avera stihija mothovena kobor tano važno te mothova akija osobina. O mangipe avela ando Jehova. Samo okola so isi len oleso sveti duh hem blagoslov šaj te ovel len mangipe maškaro peste (1. Jov. 4:7). Odolese, o Isus phenđa so samo olese učenikija ka ovel len asavko mangipe. Sar so o Isus prorekninđa, but manuša haljilje koj tane o prava hrišćanija sebepi o mangipe kova mothovđe jekh jekhese (w23.03 27-28 ¶5-8).

Da li valjani pana pobuter te oprostine averenđe? Šaj te čitine hem te razmisline kotar o manuša ando Devleso Lafi kola hine spremna te oprostinen hem okolendar kola na manglje te oprostinen. Razmislin ando Isus. Ov uvek hine spremno te oprostini averenđe (Luka 7:47). O Isus na dikhlja samo averenge mane, već đanđa so on šaj te ćeren. Ki aver strana, o fariseija ko Isuseso vreme mislinđe soj tane pošukar averendar (Luka 18:9). Ked razmislineja ando akala primerija, puć tut: „So me dikhava ko avera? Da li dikhava samo odova soj tano lošno koro lende ja odova soj tano šukar?“ Ako tano tuće pharo te oprostine nekase, pisin ko jekh lil kola šukar osobine odija osoba isi la. Palo odova, puć tut: „Sar o Isus dikhela ki odija osoba? Da li bi o Isus oprostini laće?“ Ako ađahar ćereja, odova šaj te pomožini tuće te menine to način sar razmislineja. Ko početko šaj te ovel tuće pharo te oprostine okolese ko povredinđa tut. Ama, ako deja sa tutar te ćere ki odija osobina, sar đala o vreme ka ovel tuće polokho te oprostine (w22.04 23 ¶6).

Ki knjiga Otkrivenje pisini ando nekobor zverija kola predstavinena e Devlese dušmanen. Na primer, odothe čitinaja „sar ando more ikljola i zver.“ Oj isi la „deš šinga hem efta šere“ (Otkr. 13:1). A jekh aver zver „ikljola andi phuv.“ Oj vaćeri sar zmaj hem mukhela „jag ando nebo“ (Otkr. 13:11-13). Palo odova pisini andi „skerletno zver“ upri koja bešela i bludnica. Akala trin zverija predstavinena e Devlese dušmanen kola beršencar borinena pe protiv o Devel hem oleso Kraljevstvo. Odolese tano važno te đana koj tane on (Otkr. 17:1, 3). Amen valjani te haljova kas predstavinena o zverija hem i bludnica. Najšukar način te haljova odova tano te mukha kokri i Biblija te objasnini amenđe. But simbolična buća andi knjiga Otkrivenje tane već objasnime ko avera knjige andi Biblija (w22.05 8-9 ¶3-4).

Disave e Jehovase sluge tane obeshrabrime sose sebepi po sastipe ja pe berša našti te ćeren sa so angleder ćerđe. Ako podijekh puti hijan obeshrabrimo, puć tut: „So o Jehova rodela mandar?“ O Jehova rodela te da olese amaro najšukar. Zamislin akija situacija: Jekh phen isi la 80 berš hem obeshrabrimi tani sose našti te ćerel ki služba odobor kobor ćerđa ked hine la 40 berš. Iako dela poklo najšukar, oj mislini so o Jehova nane zadovoljno olaja. Ama, da li tano odova ćaće ađahar? Ako akija phen dinđa poklo najšukar ked hine la 40 berš hem akana ked isi la 80 berš hem ponodri ćerela odova, tegani oj niked na ćhinavđa te del e Jehovase poklo najšukar. Ako daja lese amaro najšukar, o Jehova ka phenel amenđe: „But šukar ćerđan!“ (Uporedin e stihonencar ando Matej 25:20-23.) Ka ovel amenđe polokho te aćhova bahtale, ako razmislinaja odolestar so šaj te ćera, a na odolestar so našti te ćera (w22.04 10 ¶2; 11 ¶4-6).

Ko Otkrivenje ko 21. poglavlje o 144 000 tane uporedime jekha šužja dizja koja vićini pe „Nevo Jerusalim.“ Odija diz isi la „12 bara ko po temelji“ upro kola tane pisime „o 12 anava ando Bakrese 12 apostolija“ (Otkr. 21:10-14; Ef. 2:20). Nijekh diz nane sar akija diz. Olaki glavno ulica tani ćerdi ando zlato. Isi la 12 udara ando biserija. Olake zidija hem o temelji isi len dijamantija. Olaki dužina, širina hem visina tane ista (Otkr. 21:15-21). Ama, nešto falinđa laće. Dikh so o Jovan phenela: „Ki diz na dikhljum o hram sose olako hram tano o Jehova, o Devel, o Svemoćno, hem o Bakro. E dizjaće na valjanđe ni o kham ni o mesec te ćeren laće svetlo, sose olako svetlo hine e Devlesi slava, a olaki svetiljka hine o Bakro“ (Otkr. 21:22, 23). Okola kola tane deo ando „Nevo Jerusalim“ ka oven e Jehovaja (Jevr. 7:27; Otkr. 22:3, 4; w22.05 17-18 ¶14-15).

Iako tano o Jehova amaro Stvoritelj, Sudija hem okova kova dinđa o zakon, ov tano hem amaro Dad kova but mangela amen (Ps. 100:3; Is. 33:22). Ked ćeraja disavo greh hem ked ando vilo kajinaja amen, ov na samo so šaj te oprostini amenđe, već hem mangela te ćerel odova (Ps. 86:5). Prekalo prorok Isaija, o Jehova phenđa amenđe: „Ako tane tumare grehija sar i loli boja, ka oven parne sar o iv“ (Is. 1:18). Sare amen hijam nesavršena, odolese but putija phenaja ja ćeraja diso sova povredinaja averen (Jak. 3:2). Ama, da li odova značini so našti te ova šukar amala amare phralencar hem phenjencar? Na, amen ka ova šukar amala olencar ako sikljovaja te oprostina (Posl. 17:9; 19:11; Mat. 18:21, 22). Ako amare phralja povredinena amen ko disave tikne buća, o Jehova ađićeri amendar te oprostina lenđe. Sose? Odolese so ov amenđe spremno oprostini but pobare buća (Is. 55:7; w22.06 8 ¶1-2).

Na valjani te uporedina amen averencar, ama šukar tano te sikljova averendar. Najšukar primer kastar šaj te sikljova tano o Isus. Amen na hijam savršena sar oleste, ama but šaj te sikljova ando olese šuže osobine hem ando buća kola ov ćerđa (1. Petr. 2:21). Ked daja sa amendar te ova sar oleste, pana pošukar ka služina e Jehovase hem ka ova pana pošukar ki služba. Ko Devleso Lafi isi but manuša kolen šaj te oponašina iako hine nesavršena. Razmislin ando kralj David. O Jehova phenđa olestar soj tano manuš palo oleso vilo (Dela 13:22). Iako ćerđa but ozbiljna grehija ov tano ipak šukar primer amenđe. Sose? Ov na rodinđa opravdanje, već prihvatinđa o savet hem celone vileja kajinđa pe aso odova so ćerđa. Sebepi odova, o Jehova oprostinđa lese (Ps. 51:3, 4, 10-12; w22.04 13 ¶11-12).

Ko Devleso Lafi pisini so o meribe tano amaro dušmani (1. Kor. 15:25, 26). Ked razmislinaja ando meribe, šaj but te sekirina amen pogotovo ked amen ja neko andi amari porodica tane but naborme. Ama, sose daraja ando meribe? Odolese so ked o Jehova ćerđa amen, ov ano amende ćhivđa i želja te živina večno (Prop. 3:11). Disavo puti tano šukar te ovel amen asavki dar. Odolese so odija dar šaj te podstaknini amen pošukar te brinina amen ando amaro sastipe, te pazina so haja, te đa redovno ko doktori, te la redovno amare lekija hem te cida amen ando buća kola šaj amaro životi te ćhiven ki opasnost. O Satana đanela kobor ceninaja o životi. Odolese, ov phenela so amen ka da sa, čak ka irina amaro dumo e Jehovase, samo te šaj te aćhova đivde (Jov 2:5). Naravno so o Satana nane u pravu. Ama, sebepi so „isi le moć te prouzrokujini o meribe,“ ov šaj te iskoristini amari dar ando meribe te irina amaro dumo e Jehovase (Jevr. 2:14, 15; w22.06 18 ¶15-16).

Đi trajini i zabrana, amen šaj te ćeda amen ko tikne grupe amare phralencar. Odolese, sar niked angleder, valjani te da sa amendar te ova ko mir amare phralencar. Borinen tumen protiv o Beng, a na jekh protiv aver. Nakhen prekalo greške hem sigate rešinen o problemi kova isi tumen maškar tumende (Posl. 19:11). Spremno pomožinen jekh jekhese (Titu 3:14). Ked o phralja andi jekh grupa asi služba pomožinđe jekha phenjaće, odova but šukar utičinđa upro sa avera. On ulje pana popaše, ulje sar porodica (Ps. 133:1). But phralja hem phenja služinena e Jehovase, iako amaro delo ko olenge phuvja tano zabranimo ja ograničimo. Disave olendar tane ćhivde ko phanlipe sebepi pi vera. Amen šaj te molina amen olenđe hem aso olenge porodice. Isto ađahar, šaj te molina amen hem okolenđe kola rizikujinena pi sloboda sose mangena te pomožinen len. On ohrabrinena len te verujinen so o Jehova ka pomožini lenđe te ovel len sa odova so valjani lenđe hem braninena len anglo sudo (Kol. 4:3, 18). Odolese, niked ma bistri kobor ti molitva šaj te pomožini okolenđe kola tane ko phanlipe (2. Sol. 3:1, 2; 1. Tim. 2:1, 2; w22.12 26-27 ¶15-16).

But putija o ćhave ćerena odova so dikhena ando pe roditeljija. Naravno, o roditeljija nane savršena (Rimlj. 3:23). Ama, ipak valjani te mothoven šukar primer pe ćhavenđe. Jekh roditelj phenela: „O ćhave tane sar sunđeri, on sa upijinena. On ka phenen tuće ked na ćereja odova so sikaveja len.“ Odolese, ako amen mangaja amare ćhave te mangen e Jehova, on valjani te dikhen kobor amen mangaja le. O roditeljija šaj ko but načinija te sikaven pe ćhaven te mangen e Jehova. O Endru kova isi le 17 berš, phenela: „Amare roditeljija sikavđe amen soj tano but važno te molina amen. Svako rat me bi molinava man e Jehovase. Ama, palo odova hem mo dad bi molini pe zajedno mancar. Odolese akana isi man navika redovno te molinav man e Jehovase hem upro leste te dikhav sar upro mo Dad.“ Roditeljija, niked ma bistren so ako tumen mangena e Jehova, odoleja ka podstakninen hem tumare ćhaven te mangen le (w22.05 28 ¶7-8).

Ako mangeja te krstine tu, najangleder valjani te kajine tut aso te grehija (Dela 2:37, 38). Ako ando vilo kajinaja amen, tegani ka ćera o potrebna promene. Da li ćhinavđan te ćere o buća kola o Jehova na mangela sar soj tane o nemoral, o cigare ili i melali ćhib? (1. Kor. 6:9, 10; 2. Kor. 7:1; Ef. 4:29). De sa tutar te menine tut. Puć e osoba koja proučini tuvaja ili e starešinen te pomožinen tut hem te den tut savet. Ako hijan terno hem živineja te roditeljencar, puć olen te pomožinen tut te cide tutar o lošna navike kola šaj te sprečinen tut te krstine tut. Isto ađahar, valjani te oven amen šukar duhovna navike. Odova značini so valjani te đa redovno ko sastankija hem te učestvujina koro lende (Jevr. 10:24, 25). Ked ka pođine ki služba, uvek trudin tut te ove redovno (w23.03 10-11 ¶14-16).

Ko Postanak 3:14, 15 pomini pe o „sap“ hem oleso „potomstvo“. O doslovno sap našti hine te haljol so o Jehova vaćerđa ko edensko vrt. Odolese, ked ko proročanstvo phenela pe so o Jehova ka osudini e sape sigurno na mislini pe ko doslovno sap. Kas tegani predstavini akava sap? Ando Otkrivenje 12:9 jasno haljovaja so ov tano „o najpurano sap“, o Satana, o Beng. Ki Biblija, o lafi potomstvo šaj te predstavini okolen kola odobor oponašinena jekhe manuše so šaj te phena lenđe soj tane olese ćhave. Odolese, e sapeso potomstvo tane o anđelija kola sar o Satana na hine verna e Jehovase hem disave olendar, ko Nojese dive, huljilje ando nebo tele. Isto ađahar, e sapeso potomstvo tane hem o lošna manuša kola protivinena pe e Jehovase hem olese narodose hem ponašinena pe sar po dad, o Beng (Post. 6:1, 2; Jov. 8:44; 1. Jov. 5:19; Jud. 6; w22.07 14-15 ¶4-5).

O apostol Pavle but manglja e phralen hem e phenjen. Ov šaj hine šukar te haljol len odolese so hem kokri hine le but bare problemija. Jekh puti, aćhilo bizo pare hem valjanđa te arakhi pese buti te šaj te izdržini pes hem pe amalen (Dela 20:34). Oleso zanati hine te ćerel šatorija. Ked reslja ko Korint, ov ćerđa buti e Akilaja hem e Priskilaja kola isto ćerđe šatorija. Ama „svako sabat“, ov propovedinđa e Judejcenđe hem e Grkonđe. Ked o Sila hem o Timotej alje koro leste, o Pavle „pana pobuter propovedinđa e Devleso lafi“ (Dela 18:2-5). Ov niked na bisterđa so i najvažno buti tani te služini e Jehovase. Sebepi so hine but bućarno, ov hine šukar primer hem šaj hine te ohrabrini e phralen hem e phenjen. Iako o hrišćanija hine len problemija hem valjanđe te brininen pe andi pi porodica, o Pavle setinćerđa len so na valjani te ćhinaven te ćeren o buća „kola tane ćaće važna“, te služinen e Jehovase (w22.08 20 ¶3).

E Jehovasi volja avdije tani te propovedini pe i šukar vest ko celo sveto (1. Tim. 2:3, 4). O Jehova ćhivđa e Isuse te nadgledini o propovedibe. Odolestar haljovaja kobor tano odova važno e Jehovase. Šaj te ova sigurna so o Isus šukar ćerela pi buti hem so angleder te avel o krajo, ov ka ćerel odova so o Jehova mangela (Mat. 24:14). Sose šaj te ova sigurna ko odova? Hari angleder te đal ko nebo, ov disave pe učenikoncar đelo ki gora, ki Galileja. Tegani phenđa lenđe: „Maje tani dindi sa i vlast ko nebo hem ki phuv.“ Pana phenđa lenđe: „Odolese, đan hem ćeren učenikonen ando manuša kotar sa o narodija“ (Mat. 28:18, 19). Akatar dikhaja so o Isus dobinđa i vlast te vodini o propovedibe. Ov hem avdije pana nadgledini o propovedibe (w22.07 8 ¶1, 3; 9 ¶4).

O pravedna manuša kola ćerđe šukar buća angleder te meren, ka ušten ko „uskrsenje ando životi“, odolese so olenge anava tane već pisime ki knjiga ando životi. Odova značini so o uskrsenje ando „okola kola ćerđe šukar buća“, kolendar vaćeri pe ko Jovan 5:29, tano isto sar o uskrsenje ando „pravedna“ manuša, kolendar vaćeri pe ko Dela apostolska 24:15. Akava objašnjenje tano u skladu odoleja sostar vaćeri pe ko Rimljanima 6:7, kuri pisini: „Ko mulo, oslobodimo tano ando po greh.“ Odolese, ked akala pravedna manuša merena, o Jehova kosela olenge grehija. Ama, na bistrela sa o šukar buća kola ćerđe đi hine đivde (Jevr. 6:10). Naravno, akala pravedna manuša kola uskrsninđe ka valjani te aćhon verna e Jehovase sa đi o krajo te šaj olenge anava te aćhon ki knjiga ando životi (w22.09 18 ¶13, 15).

O prorok Danilo hine pouzdano manuš. Iako hine legardo ko ropstvo ko Vavilon, uduri but sigate mothovđa soj tano pouzdano manuš. O manuša pana pobuter verujinđe lese ked uzi e Jehovasi pomoć tumačinđa o suno kova dikhlja o vavilonsko kralj o Navuhodonosor (Dan. 4:20-22, 25). Palo nekobor berš, o Danilo palem mothovđa soj tano pouzdano manuš ađahar so tačno tumačinđa i poruka koja pojavinđa pe ko zido ki vavilonsko palata (Dan. 5:5, 25-29). Kasnije, o Darije Međanin hem o poglavarija primetinđe so o Danilo tano but mudro. On haljilje so o Danilo „hine pouzdano hem našti hine ki olesi buti te arakhi pe nisavi mana niti diso nepošteno“ (Dan. 6:3, 4). Ked razmislinaja ando Danilo, šaj pućaja amen: „Da li hijum penđardo sar odgovorno hem pouzdano manuš?“ Odolese so ako hijam pouzdana, ka ana slava e Jehovase (w22.09 8-9 ¶2-4).

Amenđe pomožini ked ićeraja amen ko Jehovase merilija ando odova soj tano šukar, a soj tano lošno. Sose phenaja odova? Zamislin ked bi svako banka kokri pese odlučini kobor bi ovela i vrednost andi disavi valuta ili ked bi svako građevinsko firma koristini pe merna jedinice. Tegani bi ovela haos. Ako bi o doktorija hem o medicinska sestre odlučinena te ovel len pe standardija sar te lečinen e pacijenten, tegani but pacijentija bi merena. Dikhaja so disave razumna merilija kola isi ko sveto tane zaštita. Isto ađahar, e Devlese merilija aso odova soj tano šukar, a soj tano lošno tane amenđe zaštita. O Jehova blagoslovini okolen kola dena sa pestar te živinen ađahar sar so ov mangela. Ov obećini so „o pravednikija ka nasledinen i phuv hem zauvek ka živinen upro late“ (Ps. 37:29). Pana hari, o manuša kola šunena e Jehovase pravedna merilija ka živinen ko jekhipe, ka ovel len mir hem ka oven bahtale. O Jehova mangela hem tu te ovel tut asavko životi. Svako amendar isi le but šukar razlogija te mangel e Jehovase pravedna merilija (w22.08 27-28 ¶6-8).

Ked isi amen problemija, šaj te ovel pharo te aćhova uzo Jehova hem olesi organizacija. So tegani šaj te pomožini amen? Amen valjani te ova trezvena hem te aćhova „verna“. Amen hijam trezvena ked aćhovaja smirime, hijam razumna hem daja sa amendar ko buća te dikha sar o Jehova. Tegani, na ka mukha amare osećanja te utičinen ko odova sar razmislinaja. Da li nekad povredinđa tut dijekh phral ili phen, šaj neko ko isi le bare odgovornostija? Verovatno, odova phral na manglja namerno te povredini tut (Rimlj. 3:23; Jak. 3:2). Ama, šaj razočarinđan tut sebepi odova. Šaj pućljan tut: „Ako jekh phral šaj te ćerel ađahar, da li tani akija ćaće e Devlesi organizacija?“ O Satana baš ađahar mangela te razmislina (2. Kor. 2:11). Ako ađahar razmislinaja, amen šaj te ćhinava te služina e Jehovase hem te cida amen andi olesi organizacija. Odolese, ma ićer i holi ano tute (w22.11 20 ¶1, 3; 21 ¶4).

O Jehova dinđa amen but šuži nada. Disave amendar nadinena pe so zauvek ka živinen ko nebo sar besmrtna duhovna stvorenja (1. Kor. 15:50, 53). A but amendar nadinena pe so zauvek ka živinen ki phuv kuri ka ovel len savršeno sastipe hem kuri ka oven but bahtale (Otkr. 21:3, 4). Bizo obzir kaj ka živina, sare amen but ceninaja i nada koja isi amen. Amen hijam sigurna so ka ispunini pe odova so nadinaja amen sebepi so o Jehova obećini odova (Rimlj. 15:13). Amen đanaja so obećinđa hem so uvek ićeri pe ko po lafi (Br. 23:19). Isto ađahar, amen hijam uverime so isi le moć hem želja te ćerel odova so phenđa so ka ćerel. Odolese, amari nada nane samo suno, već diso so ćaće ka ovel. Amaro nebesko Dad mangela amen hem mangela te ovel amen poverenje upro leste. Ked amari nada tani zorali, save god problemija te oven amen, amen šaj te ova hrabra hem bahtale (w22.10 24 ¶1-3).

Odolese so o manuša hine neposlušna, o Isaija prorokujinđa so o Jehova ka dozvolini te ovel len pharipe (Is. 30:5, 17; Jer. 25:8-11). Odova hem ulo ked o Vaviloncija legarđe len ko ropstvo. Ama, maškaro lende hine hem verna manuša. O Isaija phenđa so olenđe isi nada hem so o Jehova jekh dive ka irini len ko Jerusalim (Is. 30:18, 19). Ađahar hem hine. O Jehova irinđa len ko Jerusalim, ama na odmah, nego palo nekobor berš. O lafija „o Jehova strpljivo ađićeri te mothovi tumenđe šukaripe“ mothovđe so valjani te nakhel disavo vreme đi o verna manuša na ovena spasime. U stvari, o Izraelcija hine 70 berš ko ropstvo ko Vavilon angleder so disave olendar irinđe pe ko Jerusalim (Is. 10:21; Jer. 29:10). Ked đelje ko Vavilon, on runđe andi tuga. Ama, ked irinđe pe ko Jerusalim, on runđe andi radost (w22.11 9 ¶4).

Avdije, ko but phuvja, amare phralja hem phenja doživinena slično progonstvo sar o apostolija ko prvo veko odolese so propovedinđe ando Isus. Nekobor putija, o sudije ando jevrejsko vrhovno sudo, „naredinđe lenđe više te na vaćeren ando Isuseso anav“ (Dela 4:18-20; 5:27, 28, 40). Ama, on đanđe so okova kova isi le pobaro autoritet „zapovedinđa lenđe te propovedinen e narodose“ hem temeljno te svedočinen ando Isus (Dela 10:42). Odolese, o Petar hem o Jovan hrabro vaćerđe so on ka šunen e Devle, a na e sudijen hem so na ka ćhinaven te vaćeren ando Isus (Dela 5:29). Palo odova so hine marde, on ikljilje ando jevrejsko vrhovno sud hem „radujinđe pe so hine dostojna te trpinen i lađ sebepi e Isuseso anav“ hem nastavinđe te propovedinen (Dela 5:41, 42; w22.10 12-13 ¶2-4).

Ked počminaja te sikljova ando Jehova, amen sikljovaja prvo o osnovna biblijake sikljoviba. Ko po lil e Jevrejenđe, o apostol Pavle phenđa so odola sikljoviba tane „o osnovna buća“. Ov na phenđa so on nane važna, nego phenđa soj tane sar thud (Jevr. 5:12; 6:1). Ov podstakninđa e hrišćanen te sikljon hem o pohor buća ando Devleso Lafi, na samo o osnovna sikljoviba. Da li isi tut želja pohor te istražine i Biblija? Da li mangeja te đane pana pobuter ando Jehova hem andi olesi namera? Butenđe tano pharo te proučinen. Sar tano tuvaja? Da li đelji tuće šukar i škola? Da li volinđan te čitine hem te učine? Ili mislinđan so odova na đala tuće baš? But manuša mislinena ađahar. Ama, o Jehova šaj te pomožini tut. Ov tano savršeno hem najšukar Učitelj (w23.03 9-10 ¶8-10).

Ako hijam blaga, tegani ka mukha e Devleso Lafi te mukhel koreno ko amaro vilo. Samo ako hijam ponizna amen ka mukha e Devleso milosrđe, saosećajnost hem mangipe te oblikujinen amen te šaj te ova pana pošukar manuša. Sar ponašinaja amen premalo avera mothovi kobor mukhljam e Devleso Lafi te utičini upro amende. Sebepi so o fariseja na mukhlje e Devleso Lafi te resel đi olengo vilo, on osudinđe averen kola na hine kriva (Mat. 12:7). Isto ađahar, odova so amen mislinaja averendar ja sar ponašinaja amen premalo avera, mothovi kobor mukhljam e Devleso Lafi te oblikujini amen. Na primer, da li uvek dikhava odova soj tano šukar ko avera ja često vaćerava ando olenge mane? Ked neko povredini man, da li hijum spremno te oprostinav ili ićerava i holi ano mande? O odgovorija ko akala pućiba šaj te mothoven amenđe kobor mukhaja e Devleso Lafi te utičini ko amaro način sar razmislinaja, so osetinaja hem ko odova so ćeraja (1. Tim. 4:12, 15; Jevr. 4:12; w23.02 12 ¶13-14).

Te dikha o primer ando Josif kotar Arimateja. Ole o Jevreja but poštujinđe. Ov hine član ando Sinedrion, kova hine jevrejsko vrhovno sudo. Ama, ked o Isus hine ki phuv, o Josif ki početka na hine odobor hrabro. O Jovan pisinđa so ov hine „e Isuseso učeniko, ama odova garavđa ando Judejcija sose darandilo“ (Jov. 19:38). Iako o Josif manglja te šunel odova sostar o Isus vaćerđa, ov ipak garavđa averendar so verujinđa ko odova so šunđa. Verovatno darandilo so o manuša više na ka poštujinen le ako ka šunen so hem ov ulo e Isuseso učeniko. Ama, ipak i Biblija phenela so ked o Isus mulo, o Josif ko krajo „ćedinđa hrabrost hem đelo ko Pilat te rodel lestar e Isuseso telo“ (Mar. 15:42, 43). Tegani, o Josif na manglja te garavi soj tano e Isuseso učenik. Da li hem tu sar o Josif nekad daraja? (w23.01 30 ¶13-14).

I kraljica andi Sava šunđa kobor baro mir hem šukaripe isi len o Izraelcija sebepi so vladini o kralj Solomon. Odolese, oj nakhlja baro drumo hem alji ko Jerusalim te dikhel sar bešena o buća (1. Kralj. 10:1). Palo odova so dikhlja o baro šukaripe ko Solomoneso kraljevstvo, oj phenđa o lafija kola čitinaja ko avdisutno stiho. Ama, o šukaripe kova hine ko Solomoneso kraljevstvo tano samo jekh primer so ka ćerel o Jehova ked o Isus ka vladini. O Isus tano but pošukar vladari ando Solomon. Sose? O Solomon hine nesavršeno manuš, ćerđa bare greške hem sebepi odova e Devleso narodo hine le bare pharipa. Ki aver strana, o Isus tano savršeno vladari hem niked na grešinđa (Luka 1:32; Jevr. 4:14, 15). O Isus mothovđa so ov niked na ka grešini hem na ka ćerel diso sova ka povredini e Devlese slugen. Ćaće, o Isus tano najšukar Kralj kova šaj te ovel amen (w22.12 11 ¶9-10).

So valjani te ćera ako ovela disavo zarazno nabormipe? Valjani te šuna odova so o vlastija phenena te ćera. Na primer, te thova amare vasta, te ova ki distanca, te akhara maska hem te ova ko karantin. Ked ćeraja akala buća, amen ađahar mothovaja so ceninaja o životi kova dinđa amen o Devel. Ked isi disavi vanredno situacija, podijekh puti ko vestija ja ando amare amala hem komšije šaj te šuna disave buća kola nane ćaće. Umesto te verujina ko sa odova so šunaja, amen valjani te šuna okolen kola isi len tačna informacije sar soj tane o vlastija ja o doktorija (Posl. 14:15). O phralja ando Vodeće telo hem ando podružnice dena sa pestar te dobinen tačna informacije angleder so dena disavi smernica aso sastankija ja asi služba. Ked ićeraja amen ko odola smernice, amen zaštitinaja amen hem averen. Ađahar pomožinaja hem avera te ovel len šukar mišljenje ando Jehovaso narodo (1. Petr. 2:12; w23.02 23 ¶11-12).

Ked o Izraelcija khuvđe ki Obećimi phuv, on đelje te živinen ko razna thana. O Izraelcija kola živinđe ko odola thana lokho šaj hine te bistren upro Izraelcija kola živinđe ko avera thana. Ama, o Jehova phenđa lenđe so nekobor putija ko berš valjani sare te ćeden pe te šaj te šunen sar čitini pe hem objasnini pe e Devleso Lafi (Pon. zak. 31:10-12; Nem. 8:2, 8, 18). Zamislin sar osetinđa pe jekh Izraelco ked alo ko Jerusalim hem dikhlja avere Izraelcen! Ađahar o Jehova pomožinđa pe narodose te aćhol ko jekhipe. Kasnije, ked osnujinđa pe i hrišćansko skupština, o phralja hem o phenja vaćerđe but ćhibja. Disave olendar hine len baro položaj hem hine barvale manuša, a disave hine skromna hem ćorore. Ama, sebepi so manglje e Devleso Lafi, on aćhilje ko jekhipe hem služinđe e pravo Devlese. Okola kola počminđe te sikljon ando Devel šaj hine te haljon e Devleso Lafi jedino ako bi o phralja pomožinena lenđe hem ako bi redovno đana ko sastankija (Dela 2:42; 8:30, 31; w23.02 3 ¶7).

O Jehova obećinđa so ka del „večno životi“ okolenđe kola šunena le (Rimlj. 6:23). Ked razmislinaja odolestar, amaro mangipe premalo leste ovela pana pobaro. Amaro nebesko Dad but mangela amen hem odolese mangela te živina večno hem zauvek te služina lese. E Devleso obećanje so ka živina večno, pomožini amen te istrajina ked isi amen pharipa. Čak hem ako amare dušmanija phenena so ka mudaren amen, amen na ćhinavaja te služina e Jehovase. Sose? Odolese so đanaja so ako aćhovaja verna e Jehovase, ov ka uskrsnini amen hem ka ovel amen prilika te živina večno (Jov. 5:28, 29; 1. Kor. 15:55-58; Jevr. 2:15). O Jehova šaj te del amen o večno životi odolese so olestar avela o životi hem ov živini večno (Ps. 36:9). Ki Biblija pisini so o Jehova oduvek postojinđa hem so uvek ka postojini. Na primer, ko Psalam 90:2 pisini so o Jehova postojini „oduvek hem zauvek“ (Ps. 102:12, 24, 27; w22.12 2 ¶1-3).

Sar e Jehovase sluge, amen avdije na iznenadini amen so isi amen odobor bare pharipa. Amen haljovaja so ki Biblija pisini so „mora te nakha bare pharipa, angleder so ka khuva ko Devleso Kraljevstvo“ (Dela 14:22). Isto ađahar, đanaja so disave amare problemija ka rešinen pe tek ked ka avel o nevo sveto kuri „na ka ovel više meribe, ni muke, ni rojbe, ni dukha“ (Otkr. 21:4). O Jehova na zaštitini amen ando pharipa, ama dela amen snaga te šaj te istrajina. Palo odova so phenđa kobor bare pharipa hine len ov hem o phralja ko Rim, o apostol Pavle phenđa: „Ama ko sa odova pobedinaja sose pomožini amen okova kova manglja amen“ (Rimlj. 8:36, 37). Odova značini so o Jehova šaj te pomožini amenđe čak hem đi trajini amaro pharipe (w23.01 14 ¶1-2).