Mart

O apostol Petar podstakninđa e phralen pe sposobnostija te koristinen te zorjaćeren averen. Ov pisinđa: „Služinen jekh jekhese premalo poklon kova svako tumendar dobinđa, sar šukar nastojnikija ando Devleso bizaslužimo šukaripe“ (1. Petr. 4:10). Na valjani te bezdina amen te koristina amare sposobnostija samo sose mislinaja so avera šaj te oven ljubomorna ja obeshrabrime. Ama, valjani te pazina te na hvalina amen sebepi odova (1. Kor. 4:6). Na valjani te bistra so sa amare sposobnostija avena ando Devel. Valjani te koristina len te zorjaćera amare phralen hem phenjen, a na te vazda kokri amen (Fil. 2:3). Ked amari snaga hem amare sposobnostija koristinaja te ćera odova so o Devel mangela, amen ka ova bahtale na sose ćeraja pobuter averendar ja sose mangaja te ova pošukar olendar, već sose koristinaja amare sposobnostija te hvalina e Jehova (w22.04 11-12 ¶7-9).

O Isus manglja e Devleso Lafi. O lafija ando Psalam 40:8 mothovđe so ov ka mislini ando Devleso Lafi. Odothe pisini: „Devla, but hijum bahtalo te ćerav ti volja, hem toklo zakon tano hor ano mande.“ Sebepi so manglja e Devleso Lafi, ov hine bahtalo hem verno služinđa e Jehovase. Amen šaj te ova bahtale hem verno te služina e Jehovase, ako redovno čitinaja oleso Lafi hem mukhaja odova te utičini ko amaro vilo (Ps. 1:1-3). E Isuseso primer hem olese lafija mothovena sar šaj pana pošukar te haljova odova so čitinaja ko Devleso Lafi. Amen valjani te molina amen angleder so čitinaja e Devleso Lafi, te na siđara, te postavina pućiba hem te ćera kratka beleške. Valjani te koristina amari razboritost ađahar so hor ka razmislina odolestar so čitinđam, a ko odova šaj te pomožinen amen amare publikacije. Isto ađahar, valjani te mukha odova so čitinaja te utičini upro amende. Ako daja sa amendar te primenina akava, pana pošukar ka haljova odova so čitinaja hem ka ova pana popaše e Jehovaja (Ps. 119:17; Jak. 4:8; w23.02 13 ¶15-16).

Birin jekh veština ki koja mangeja te ćere hem palo odova de sa tutar te ove pošukar ko odova. Sar šaj te ćere odova? Zamislin so mangeja te ove pana pošukar učitelj. Šaj te proučine i brošura Sikljov pošukar te čitine hem te sikave. Ked dobineja zadatko ko sastanko ko radno dive šaj te puće jekhe iskusno phrale te šunel to govor hem te phenel tuće ko so valjani te ćere. Pripremin te zadatkija ko vreme hem ađahar o manuša ka dikhen so hijan bućarno hem so šaj te osloninen pe upro tute (2. Kor. 8:22). So ako to cilj tano te ove pana pošukar ko diso soj tano tuće pharo? Ma vazde te vasta! Razmislin ando Timotej. O Pavle podstakninđa le pana pobuter te napredujini. Da li ov ulo pana pošukar govornik ja pana pošukar učitelj? Ko Devleso Lafi na pisini odolestar. Ama, sebepi so šunđa e Pavlese savetija, o Timotej pana pošukar ćerđa pe odgovornostija (2. Tim. 3:10; w22.04 24-25 ¶8-11).

Koj tani i zver koja isi la efta šere? Akija zver izgledini sar leopard, ama isi la pre sar medved hem muj sar lav, hem isi la deš šinga. O štar zverija ando kola vaćeri pe ko Danilo 7. poglavlje isto isi len akala karakteristike. Ama, ki knjiga Otkrivenje sa akala karakteristike isi la jekh zver. Odova značini so akija zver na predstavini samo jekh vladavina ili svetsko carstvo. O Jovan vaćerđa so oj vladini „upro sa o plemenija, narodija, ćhibja hem nacije.“ Odolese bi valjani te ovel pobari andi bilo koja aver vlast (Otkr. 13:7). Akija zver predstavini sa o politička sile kola vladinđe upro manuša đi akana (Prop. 8:9). Pana jekh dokaz so i zver koja isi la efta šere predstavini sa o politička sile tano so oj isi la „deš šinga.“ O broj deš ki Biblija često koristini pe te predstavini diso soj tano potpuno (w22.05 9 ¶6).

Ko ka ovel len akala blagoslovija? Najangleder, o baro mnoštvo kova ka preživini i bari nevolja hem o ćhave kola ka bijanđon ko nevo sveto. Ama, ko 20. poglavlje ko Otkrivenje pisini so ka uskrsninen okola so mulje (Otkr. 20:11-13). Ka uskrsninen „o pravednikija“ kola mulje angleder, ama hem o „nepravednikija“ kola na hine len prilika te sikljon ando Jehova (Dela 24:15; Jov. 5:28, 29). Da li akava značini so ki Hiljadaberšengi vladavina sare ka uskrsninen? Na. Okola kola hine lošna hem na manglje te služinen e Jehovase angleder te meren, na ka oven uskrsnime. On hine len prilika, ama mothovđe so na zaslužinena te živinen ko raj (Mat. 25:46; 2. Sol. 1:9; Otkr. 17:8; 20:15; w22.05 18 ¶16-17).

O Isus prekalo „verno hem razborito robo“ organizujinđa pe sledbenikonen (Mat. 24:45). On tane deo andi jekh organizacija koja pomožini e manušenđe te služinen e ćaćutne Devlese. So tu mislineja andi odija organizacija? Šaj ki godi perena tuće o lafija ando avdisutno stiho kola o Petar phenđa e Isusese. Savo bi amaro životi ovela ked ne bi ovaja deo andi Jehovasi organizacija? Prekali odija organizacija, o Isus Hrist dinđa amen sa so valjani amenđe te šaj te aćhova verna e Jehovase. Isto ađahar, prekalo late sikavi amen sar šaj pana pošukar te ćera amari služba. Uzo odova, ov pomožini amenđe te urava „i nevi ličnost“ te šaj pana pobuter te ugodina e Jehovase (Ef. 4:24). Ko akava pharo vreme, o Isus dela amen but šukar smernice. Odova šaj hine te dikha ki pandemija kotar koronavirus. O manuša ko sveto na đanđe so te ćeren, ama o Isus prekali amari organizacija dinđa amen jasna smernice sar te arakha amen (w22.07 12 ¶13-14).

Ko purano vreme, o Jehova phenđa e Izraelcenđe so valjani redovno te vaćeren pe ćhavenđe olestar (Pon. zak. 6:6, 7). O Izraelcija prekalo dive hine len but prilike te vaćeren pe ćhavencar hem te sikaven len te mangen e Jehova. Na primer, jekh tikno Izraelco šaj hine pe dadeja ki njiva kuri sadinđe diso ja ćedinđe odova so barilo. Isto ađahar, olesi phen šaj hine ćhere pe dajaja kuri zajedno sivđe hem ćerđe avera buća ko ćher. Tegani šaj hine te vaćeren ando but buća. Na primer, kobor tano o Jehova šukar hem sar pomožini lenđe. Avdije, o životi tano averćhane. Ko but phuvja, o porodice našti te oven zajedno prekalo dive sose o roditeljija tane ki buti, a o ćhave ki škola. Odolese, o roditeljija valjani te odvojinen vreme ked ka vaćeren pe ćhavencar (Ef. 5:15, 16; w22.05 28 ¶10-11).

O manuš kova grešinđa valjani te molini e Jehova te oprostini lese. Ama, valjani te phenel hem e starešinenđe so ćerđa (Ps. 32:5; Jak. 5:14). Samo o Jehova šaj te oprostini amenđe sose o Isus dinđa po životi amenđe. Ama, sose ipak valjani te vaćeri pe e starešinenđe? Odolese so o Jehova dinđa len odgovornost te odlučinen da li neko ko ćerđa greh valjani te aćhol ki skupština. Đi ćerena odova, on valjani te ićeren pe ko načelija ando Devleso Lafi (1. Kor. 5:12). Te šaj te ćeren odova, valjani te razmislinen ando akala pućiba: Da li odova manuš planirinđa te ćerel odova greh? Da li garavđa averendar odova? Da li beršencar ćerđa odova greh? Soj tano najvažno, da li isi disavo dokaz kova mothovi so kajini pe hem so o Jehova oprostinđa lese? (Dela 3:19; w22.06 9 ¶4).

O Isus podstakninđa pe učenikonen te roden i pravednost (Mat. 5:6). Odova značini so valjani te ovel amen bari želja te ćera okova soj tano pravedno, šukar hem čisto anglo Devlese jaćha. Da li mangeja o ćaćipe hem i pravednost? Ja, ama sigurno mrzineja o hovajba hem okova soj tano pogrešno hem lošno (Ps. 119:128, 163). O manuš kova hovavi oponašini e Satana, kova tano vladari ando akava sveto (Jov. 8:44; 12:31). E Satanaso cilj tano te klevetini e Jehovaso anav. Pana ko edensko vrt, ov počminđa te vaćeri hovajba ando Devel. Ov mangela te mislina so o Jehova tano sebično hem nepošteno Vladari kova garavi amendar o šukar buća (Post. 3:1, 4, 5). O Satana hem ponodri ćhivela e manušen te mislinen lošno ando Jehova. Ako o manuša na „mangena o ćaćipe“, o Satana šaj te utičini upro olende te počminen te ćeren o lošna buća (Rimlj. 1:25-31; w23.03 2 ¶3).

Đi napredujineja premalo krštenje, ka oven tut disave pharipa. Šaj našalđan to strpljenje hem hijan holjamo odolese so dićhola tuće so to cilj tano but dur. So šaj tegani te pomožini tuće? I najvažno osobina tani o mangipe premalo Jehova. Odija tani najšukar osobina koja šaj te ovel tut (Posl. 3:3-6). Odova mangipe šaj te pomožini tuće te ikljove ko krajo te problemencar. Ki Biblija ko but thana pisini so o Jehova mothovi verno mangipe pe slugenđe. Odova značini so ov niked na ka aćhavi pe slugen hem niked na ka ćhinavi te mangel len. Tu hijan ćerdo premali Devlesi slika (Post. 1:26). Sar šaj te mothove asavko mangipe? Ov zahvalno (1. Sol. 5:18). Svako dive puć tut: „Sar o Jehova mothovđa maje so mangela man?“ Palo odova, zahvalin tut e Jehovase ki molitva aso konkretna buća kola ćerđa tuće. Dikh sar o Jehova direktno tuće dela šukar buća odolese so mangela tut (w23.03 12 ¶17-19).

O Isus hine šukar premalo sa o apostolija. So sikljovaja odolestar? Nane bitno samo so avera ćerena, nego sar me reagujinava ko olenge greške. Ked disavo phral povredinđa amen, šaj te puća amen: „Sose odobor povredinđa man odova so akava phral ćerđa? Da li odova mothovi ko so me valjani te ćerav buti? Da li odova phral isi le disave problemija? Čak hem ako isi man opravdana razlogija te holjanav, da li šaj te mothovav mangipe hem te oprostinav lese?“ Ked mothovaja mangipe maškaro amende, tegani mothovaja so hijam e Isusese prava učenikija. E Isuseso primer podstaknini amen hem te haljova amare phralen (Posl. 20:5). O Isus šaj hine te čitini e manušengo vilo, a amen našti. Ama, amen šaj te ova strpljiva amare phralencar hem phenjencar ked ćerena disave greške (Ef. 4:1, 2; 1. Petr. 3:8). Amenđe ka ovel polokho te haljova len ako šukar penđaraja len (w23.03 30 ¶14-16).

O Satana šaj te ćhivel amen te na ićera amen ko Jehovase načelija. Na primer, o doktorija ja amari porodica koja na služini e Jehovase šaj te ćhivel amen te la rat. Ja neko šaj te ćhivel amenđe ki godi te razmislina odolestar te prihvatina disavo lečenje kova nane premalo Jehovase načelija. Niko amendar na mangela te merel. Ama, amen đanaja so o Jehova na ka ćhinavi te mangel amen ako odova ka desini pe (Rimlj. 8:37-39). Ked oleso amal merela, e Jehovase tano ov pana đivdo ki godi (Luka 20:37). Ov jedva ađićeri te vazdel le (Jov 14:15). O Jehova platinđa bari cena te šaj amen te ovel amen večno životi (Jov. 3:16). Ov mangela amen hem brinini pe amendar. Odolese, ked hijam naborme, umesto te irina lese amaro dumo, amen valjani te roda olestar te zorjaćeri amen, te del amen snaga, te utešini amen hem te del amen mudrost (Ps. 41:3; w22.06 18 ¶16-17).

Ki Biblija pisini: „I dar ando Jehova tani prvo so e manušese valjani te šaj te ovel le mudrost, a o đandipe ando Najsveto legari đi i razboritost“ (Posl. 9:10). Odolese, ked valjani te ana disavi važno odluka, amen valjani te haljova so o Jehova mislini odolestar. Odova šaj te ćera ađahar so ka proučina i Biblija hem amare publikacije. Ked ađahar ćeraja, amen mothovaja so ćaće hijam mudra (Posl. 2:5-7). Jedino o Jehova šaj te del amen i ćaćutni mudrost (Rimlj. 16:27). Sose šaj te phena odova? Sar prvo, o Jehova tano Stvoritelj hem đanela sa ando odova so stvorinđa (Ps. 104:24). Sar dujto, sa odova so stvorinđa mothovi olesi mudrost (Rimlj. 11:33). Sar trito, e Jehovase mudra savetija uvek pomožinena okolenđe kola primeninena len (Posl. 2:10-12). Ako mangaja ćaće te ova mudra, tegani valjani te mukha akala buća te legaren amen đi anaja disavi odluka (w22.10 19 ¶3-4).

O Satana na pobedinđa ko maribe kolestar pisini ko Otkrivenje 12. poglavlje hem odolese hine fordimo ki phuv pe demonencar. Kotar tegani, ov tano but holjamo hem pi holi ikali upro manuša (Otkr. 12:9-12). O buća kola isi ko sveto hem odova so o manuša ovena sa pološna, tano dokaz so o Isus već vladini sar Kralj. Ked dikhaja so o manuša tane okrutna hem sebična, šaj te ova uznemirime. Ama, na valjani te bistra so odoleja ispuninena pe o proročanstvija. Isto ađahar, odova tano dokaz so o Kraljevstvo vladini (Ps. 37:1). Sar tano o Armagedon sa popaše, šaj te očekujina so o stanje ko sveto ka ovel sa pološno (Mar. 13:8; 2. Tim. 3:13). Amen hijam but zahvalna e Jehovase so pomožini amen te haljova sose ovena o lošna buća ko sveto (w22.07 3-4 ¶7-8).

Šaj te molina amen e Jehovase te pomožini amare phralenđe hem phenjenđe te istrajinen ked tane naborme, ked isi disave prirodna katastrofe, maribe, progonstvo ja avera pharipa. Isto ađahar, valjani te molina amen amare phralenđe hem phenjenđe kola pomožinena okolenđe kola tane ko pharipa. Da li penđareja nekas ando odola phralja hem phenja? Ako ja, tegani sose na bi pomineja olengo anav ki molitva? Amen mothovaja so mangaja amare phralen ked molinaja amen olenđe te istrajinen. O phralja kola predvodinena tane but zahvalna ked pominaja len ko amare molitve, sose odola molitve dena len but bari snaga. O apostol Pavle đanđa so ka pomožinen lese averenge molitve hem odolese phenđa: „Molinen tumen hem maje, o Devel te pomožini manđe, ked valjani te vaćerav, te arakhav prava lafija te šaj hrabro te propovedinav i sveto tajna andi šukar vest“ (Ef. 6:19). Avdije, hem amen isi amen but bućarne phralja kola predvodinena. Ked molinaja amen e Jehovase te blagoslovini len, mothovaja so but mangaja len (w22.07 23-24 ¶14-16).

Jekh vojniko akhari i kaciga te šaj te zaštitini po šero ando strele kola fordena o dušmanija. Ko amaro duhovno maribe, amen valjani te zaštitina amari godi ando Bengese napadija. Ov koristini but buća te rumini amare mislija. Ama, sar so i kaciga zaštitini e vojnikoso šero, amari nada štitini amare mislija te šaj te aćhova verna e Jehovase. Ama, ako amari nada nane zorali, amen šaj te počmina te razmislina samo ando amare želje hem ađahar te našala amari nada. Te dikha so ulo disave hrišćanenđe ki skupština Korint. Disave olendar našalđe pi vera ko jekh važno obećanje – ki nada ando uskrsenje (1. Kor. 15:12). O apostol Pavle phenđa so živinđe samo aso odova te ispuninen pe želje (1. Kor. 15:32). Avdije, but manuša kola na verujinena ko Devlese obećanja dena sa pestar te šaj akana te oven bahtale. Ama, amen hijam averćhane olendar sose isi amen nada so o Devel ka ispunini pe obećanja (w22.10 25-26 ¶8-9).

O Jehova podstaknini tut te moline tut olese, sose dikhela save problemija isi tut hem uverini tut so uvek ka šunel tut. Ov uživini te šunel pe slugen sar molinena pe (Posl. 15:8). Aso so šaj te moline tut ked osetineja tut so hijan kokri? Šaj te phene lese so brinini tut (Ps. 62:8). Molin tut e Jehovase te pomožini tut te đane so te ćere ked osetineja tut so hijan kokri ili ked hijan tužno. Na primer, ako daraja te vaćere te amalencar ki škola ando odova ko so verujineja, tegani molin tut e Jehovase te del tut hrabrost te vaćere olencar. Čak šaj te rode lestar mudrost te šaj ko šukar način te vaćere te amalencar (Luka 21:14, 15). Ako hijan uznemirimo ili obeshrabrimo, rode e Jehovastar te pomožini tut te vaćere dijekhe zrelo phraleja ili phenjaja. Šaj te moline e Jehova te pomožini okolese kova ka šunel tut te haljol tut. Odolese, vaćer e Jehovase sar osetineja tut, dikh sar ka odgovorini ki ti molitva, prihvatin olesi pomoć hem ka dikhe so na hijan kokri (w22.08 10 ¶6).

Sigate palo odova so osnujinđa pe i skupština ko Solun, o phralja hem o phenja hine len baro progonstvo. Jekh grupa manuša andi odija diz „silaja legarđe disave phralen anglo dizjake poglavarija“ hem vićinđe: „Sare on buninena pe protiv e carese odredbe“ (Dela 17:6). Šaj li te zamisline kobor darandilje o phralja hem o phenja ko Solun ked haljilje so disave manuša ki diz hine protiv olende? Sebepi odova, on šaj hine te našalen pi revnost. Ama, o apostol Pavle na manglja te desini pe odova. Ov bićhalđa nekas ko ka brinini pe andi skupština. O Pavle e hrišćanenđe ko Solun phenđa: „Bićhalaja tumenđe amare phrale e Timoteje. . . te zorjaćeri tumen hem te utešini tumen te šaj tumari vera te ovel zorali. . . hem niko te na obeshrabrini pe sebepi odola nevolje“ (1. Sol. 3:2, 3). O Timotej dikhlja sar o Pavle ohrabrinđa e phralen hem sar o Jehova pomožinđa e phralenđe ki Listra. Odolese šaj hine te zorjaćeri e phralen ko Solun hem te uverini len so o Jehova hem olenđe ka pomožini (Dela 14:8, 19-22; Jevr. 12:2; w22.08 21 ¶4).

Ko 1870. berš, jekh grupa, kaj hine hem o Čarls Tejz Rasel, počminđe hor te istražinen i Biblija. On manglje te haljon so ćaće značini e Isusesi žrtva hem sar valjani te setina amen ko oleso meribe. Odova so haljilje odola hrišćanija hem amenđe avdije pomožini. Sar? Uzi Jehovasi pomoć, amen akana đanaja so značini e Isusesi žrtva hem so ov ka ćerel ki budućnost (1. Jov. 2:1, 2). Isto ađahar, andi Biblija haljiljam so disave manuša isi len nada so ka živinen večno ki phuv, a avera so ka živinen ko nebo. Ked razmislinaja ando odova kobor o Jehova mangela amen hem sar e Isusesi žrtva pomožini amenđe, amen ovaja sa popaše oleja (1. Petr. 3:18). Isto sar amare phralja kola živinđe angleder, hem amen vićinaja e manušen te aven amencar ki Spomen-svečanost koja ićeri pe ađahar sar so o Isus sikavđa pe učenikonen (w23.01 21 ¶6-7).

O Isus vaćerđa e manušenđe kola šukar buća ka oven amen ked ka avel e Devleso Kraljevstvo. Amen but hijam zahvalna asi otkupnina sose oj phravđa o drumo te šaj te ova e Jehovase hem e Isusese amala. Okola so mothovena vera ki Isusesi otkupno žrtva, isi len nada so ka živinen večno hem so palem ka dikhen pe manglen kola mulje (Jov. 5:28, 29; Rimlj. 6:23). Amen na ćerđam ništa sova bi zaslužinaja odola blagoslovija niti šaj te irina e Devlese hem e Isusese aso sa odova so ćerđe amenđe (Rimlj. 5:8, 20, 21). Ama, šaj te mothova kobor hijam zahvalna aso odova so ćerđe amenđe. Sar šaj te ćera odova? Ađahar so koristinaja amare materijalna buća te podupirina o Kraljevstvo. Na primer, amen šaj te pomožina te gradinen pe amare objektija ja dvorane (w23.01 26 ¶3; 28 ¶5).

O Isus hem o 144 000 pomazanikija zajedno ka brininen pe ando Devlese sluge hem ka ispuninen e Jehovasi namera. Sar o Isus hem o 144 000 ka oven kraljija hem ka služinen sar sveštenikija (Otkr. 5:10). Ko purano vreme, ked o Izraelcija valjanđe te ićeren pe ko Mojsijeso zakon, o sveštenikija pomožinđe e narodose te oven saste hem te oven popaše e Jehovaja. Odova zakon hine „samo senka ando blagoslovija kola valjani te aven“ (Jevr. 10:1). Amen na đanaja sar tegani odola kraljija hem sveštenikija ka vaćeren e Devlese narodoja. Ama, šaj te ova uverime so e Jehovaso narodo tegani ka dobini vođstvo kova ka valjani lese (Otkr. 21:3, 4; w22.12 11 ¶11-13).

Jekh razlog sose vićinaja e manušen te aven ki Spomen-svečanost tano sose mangaja te pomožina len te haljon so o Jehova hem o Isus ćerđe e manušenđe (Jov. 3:16). Nadinaja amen so odova so ka dikhen hem ka šunen ka pomožini lenđe te sikljon pana pobuter ando Jehova hem so odova ka podstaknini len te služinen lese. Ki Spomen-svečanost vićinaja hem okolen kola tane neaktivna, sose mangaja te setinćera len so o Jehova pana mangela len. But olendar avena ki Spomen-svečanost hem amen hijam bahtale ked dikhaja len. Odova so alje setinćeri len kobor angleder hine bahtale đi služinđe e Jehovase (Ps. 103:1-4). Ama, bizo obzir da li o manuša ka aven ja na, amen hem ponodri ka delina o pozivnice hem ka vićina len te aven, sose đanaja so e Jehovase nane bitna o broja, već o manuša (Luka 15:7; 1. Tim. 2:3, 4; w23.01 20 ¶1; 22-23 ¶9-11).

Ki rat angleder te merel, o Isus molinđa pe Dade te brinini pe ando olese učenikija (Jov. 17:15, 20). O Jehova uvek brininđa pe ando po narodo, ama o Isus đanđa so o Satana but ka protivini pe e Devlese slugenđe hem so ka valjani lenđe e Jehovasi pomoć te šaj te pobedinen e Benge. O manuša ko akava sveto, ko kova vladini o Satana, ćerena bare problemija e Isusese učenikonenđe. Odova so on ćerena šaj but te obeshrabrini amen hem sebepi odova šaj te ovel amenđe pharo te aćhova verna e Jehovase. Ama nane amen sostar te dara. E Jehovase jaćha tane upro amende. Odova značini so ov dikhela amare problemija hem mangela te pomožini amenđe. Ja, o Jehova brinini pe ando pe sluge (Ps. 33:18-20; w22.08 8 ¶1-2).

Svako berš, ko period andi Spomen-svečanost, amen mothovaja so hijam zahvalna e Isusese ađahar so hor razmislinaja ando odova so ov ćerđa hem molinaja amen. Isto ađahar, vićinaja e manušen te aven ki odija svečanost. A soj tano najvažno, amen na mukhaja nikase hem nisose te ćhinavi amen te ava ki odija svečanost. Svako berš šunaja sose e manušenđe valjani i otkupnina hem sar jekh manuš šaj te platini bute manušenge grehija. Isto ađahar, podsetinaja amen so predstavinena o maro hem o vino hem ko šaj te lel odola simbolija (Luka 22:19, 20). Razmislinaja hem andi but šuži budućnost koja ka ovel len okola kola isi len nada so ka živinen ki phuv (Is. 35:5, 6; 65:17, 21-23). Amen hijam zahvalna so đanaja o ćaćipe (w23.01 20 ¶2; 21 ¶4).

Odoleja so dinđa pe Ćhave sar žrtva amenđe, o Devel phravđa o udara te šaj amen večno te živina (Mat. 20:28). O apostol Pavle phenđa: „Sose o meribe alo prekalo manuš, hem o uskrsenje ando mule avela prekalo manuš. Sar so sare merena sebepi o Adam, ađahar sebepi o Hrist sare ka uskrsninen“ (1. Kor. 15:21, 22). O Isus sikavđa pe učenikonen te molinen pe e Devleso Kraljevstvo te avel hem te ćerel pe olesi volja ki phuv (Mat. 6:9, 10). E Jehovasi namera tani o manuša zauvek te živinen ki phuv. Te šaj te ispunini pe odova, o Jehova ćhivđa pe Ćhave te ovel Kralj ando oleso Kraljevstvo. Isto ađahar, birinđa 144 000 manušen te vladinen olese Ćhaveja (Otkr. 5:9, 10; w22.12 5 ¶11-12).

Ked merela amendar neko kas but mangljam, odija osoba but falini amenđe. Ki početka, osetinaja bari dukh, pogotovo ako but mučinđa pe angleder te merel. Ama, sar đala o vreme, ked god setinaja amen ko odova so odija osoba sikavđa amen, sar pomožinđa amen, sar ohrabrinđa amen ja sar asaćerđa amen, amen hijam but bahtale. Isto ađahar, amen hijam but tužna ked čitinaja kobor o Isus patinđa hem sar mulo. Ko period andi Spomen-svečanost, amen odvojinaja vreme te razmislina ando odova so ov ćerđa amenđe (1. Kor. 11:24, 25). Tegani, hijam but bahtale, sose ki godi avela amenđe sa odova so o Isus ćerđa hem phenđa ked hine ki phuv. Odova podstaknini amen te razmislina hem odolestar so o Isus akana ćerela hem so ka ćerel ki budućnost (w23.01 26 ¶1-2).

Ked o Isus mulo, olese učenikija hine but tužna. On našalđe pe mangle amale hem osetinđe pe soj tane bizi nada (Luka 24:17-21). Ama, ked pojavinđa pe lenđe, o Isus odvojinđa vreme te pomožini lenđe te haljon sar ov ispuninđa e biblijake proročanstvija. Isto ađahar, dinđa len te ćeren jekh but važno zadatko (Luka 24:26, 27, 45-48). Ked o Isus đelo ko nebo, on više na hine tužna već hine but bahtale. Sose? On đanđe so o Isus tano đivdo hem so ka pomožini lenđe te ćeren o zadatko kova dinđa len. O bahtalipe podstakninđa len hem ponodri te služinen e Jehovase (Luka 24:52, 53; Dela 5:42). Sar šaj hem amen te ova sar e Isusese učenikija? Valjani e Devleso Kraljevstvo te ćhiva ko prvo than ko amaro životi. Iako valjani amenđe istrajnost te šaj hem ponodri te služina e Jehovase, amen hijam sigurna so ov ka blagoslovini amen hem ka del amen odova so valjani amenđe (Posl. 10:22; w23.01 30-31 ¶15-16).

Amen na mangaja te ćera isto greška sar o Adam hem i Eva. Odolese, valjani hem ponodri te sikljova ando Jehova, te cenina olese osobine hem te trudina amen te haljova sar razmislini. Ako ćeraja odova, amaro mangipe premalo Jehova ka ovel sa pobaro. Razmislin ando Avraham. Ov ćaće manglja e Jehova. Čak ked hine lese pharo te haljol sose o Jehova anđa disavi odluka, ov na buninđa pe protiv oleste. Ov koristinđa odija situacija pana pošukar te penđari e Jehova. Na primer, ked šunđa so o Jehova odlučinđa te uništini i Sodoma hem i Gomora, ov prvo darandilo so „o Sudija andi celo phuv“ ka uništini e pravedno manušen zajedno e lošnonencar. Ov naštine te verujini ko odova, odolese ponizno pućlja e Jehova nekobor pućiba. O Jehova strpljivo šunđa le hem odgovorinđa lese. Ko krajo, o Avraham haljilo so o Jehova đanela so isi ko svakoneso vilo hem so niked na ka uništini e šukar manušen zajedno e lošnonencar (Post. 18:20-32; w22.08 28 ¶9-10).

Palo odova so o Nemija obnovinđa o zidija ko Jerusalim ko 455. berš, ov rodinđa disave odgovorna manušen kola šaj te brininen pe andi diz. Maškaro sa odola manuša, ov birinđa e Ananija kova hine knez andi Tvrđava. Ki Biblija pisini so ov „hine but pouzdano manuš hem darandilo ando ćaćutno Devel pobuter ando avera“ (Nem. 7:2). O Ananija but manglja e Jehova hem darandilo olestar. Odolese, dinđa sa pestar svako zadatko te ćerel šukar. Ako hijam sar o Ananija hem amen ka ova pouzdana manuša. Razmislin ando Tihik, upro kova o Pavle hine le baro poverenje. Ked o Pavle hine ko phanlipe, ov osloninđa pe upro Tihik hem phenđa so verno služini e Jehovase (Ef. 6:21, 22). O Pavle dinđa le na samo te legari o lila e phralenđe ki skupština Efes hem Kolos, nego hem te ohrabrini len hem te utešini len. Avdije, hem amen isi amen phralja kola brininena pe ando amare duhovna potrebe. On tane sar o Tihik, odolese soj tane verna hem pouzdana (Kol. 4:7-9; w22.09 9-10 ¶5-6).

O Josif 13 berš hine le but problemija. Tegani, ov šaj hine te pućel pe da li o Jehova ćaće mangela le hem sose aćhavđa le baš ked najviše valjani lese. Ama, o Josif na ićerđa i holi ano peste. Umesto odova, ov hine trezveno ađahar so aćhilo smirimo. Ked hine le prilika te osvetini pe pekle phralenđe, ov na ćerđa odova. Umesto odova, ov mothovđa so mangela len hem oprostinđa lenđe (Post. 45:4, 5). O Josif ćerđa odova odolese so hine razumno. Umesto te razmislini samo ando pe problemija, ov razmislinđa so o Jehova mangela (Post. 50:19-21). So sikljovaja olestar? Ako neko povredinđa amen, na valjani te ova holjame upro Jehova hem te mislina so ov aćhavđa amen. Umesto odova, valjani te razmislina sar o Jehova pomožini amen ko amaro problemi. Isto ađahar, valjani te da sa amendar te manga amare phralen, sose „o mangipe ućhari but grehija“ (w22.11 21 ¶4).

O prorok Danilo dikhlja vizije kola mothovđe so o Jehova isi le pobari vlast ando bilo kova aver vladari. O Danilo prvo dikhlja štar zverija kola predstavinena o svetska sile kola vladinđe angleder, a odola tane o Vavilon, i Medo-Persija, i Grčka, o Rim hem i svetsko sila koja akana vladini, i Anglo-amerika (Dan. 7:1-3, 17). Palo odova, o Danilo dikhlja sar o Jehova bešela ko presto ko nebesko sudo (Dan. 7:9, 10). O Devel ka lel sa i moć hem i vlast ando manušikane vladarija hem ka del okolenđe kola odova pobuter zaslužinena hem kola isi len pobari moć. Kase ka del? Nekase koj tano sar „o manušikano ćhavo“, o Isus Hrist hem e „sveta slugenđe ando Najbaro“, o 144 000 kola ka vladinen „zauvek hem ki sa i večnost“ (Dan. 7:13, 14, 18). Kotar akava dikhaja so o Jehova tano o „Najbaro.“ O Danilo pana phenđa: „O Najbaro Devel vladini upro manušikano kraljevstvo hem dela le kase mangela“ (Dan. 2:19-21; w22.10 14-15 ¶9-11).