April

Puć kokri tut: „Sar reagujinava ked dobinava savet? Da li priznajinava mi greška ja rodava opravdanje aso odova so ćerđum? Da li krivinava averen?“ Ked čitineja kotar avera manuša kotar Devleso Lafi, razmislin sar on ikljilje ko krajo pe problemencar. Svako puti, puć tut: „Sar šaj te ovav sar akava e Jehovaso verno sluga?“ Isto ađahar, but šaj te sikljova ando terne hem phure phralja hem phenja ki skupština. Na primer, da li avela tuće ki godi neko andi skupština koj tano verno iako doživini pritisak ando pe vrsnikija, iako avera protivinena pe lese ja iako tano nabormo? Da li neko olendar isi le disave šuže osobine ko kola tu mangeja pana pobuter te ćere? Ked razmislinaja ando olengo šukar primer, šaj te sikljova sar te istrajina ko amare kušnje. But hijam zahvalna so isi amen asavke verna phralja hem phenja kola dena amen šukar primer (Jevr. 13:7; w22.04 13 ¶13-14).

Ked tano amenđe pharo, but hijam zahvalna ked jekh starešina šunela amen hem dela amen uteha. Ked valjani amenđe pomoć ko biblijako kurs, but hijam bahtale ked jekh iskusno pioniri ovela amencar ko odova kurs hem phenela amenđe so šaj pana pošukar te ćera. Sa akala phralja hem phenja tane bahtale so šaj te pomožinen amen. Sare amen šaj te ova bahtale ako pomožinaja averenđe. So šaj te pomožini amenđe te ćera pobuter e Jehovase? Ma ćhiv tuće cilj kova nane konkretno. Šaj pheneja kokri tuće: „Mangava te ćerav diso pobuter ki skupština.“ Ama, but tano pharo te ispunine asavko cilj hem našti te đane da li ispuninđan le. Odolese, ćhiv tuće jasno, konkretno cilj. Čak šaj te pisine odova cilj hem te ćere tuće jekh plan sar ka ispunine le (w22.04 25 ¶12-13).

Avdije, o Jehova ćedela o „baro mnoštvo“ ando manuša hem sikavi len save valjani te oven ked ka avel oleso Kraljevstvo (Otkr. 7:9, 10). Sebepi o maribe hem i mržnja, o manuša ko akava sveto nane ko jekhipe. Ama, amen daja sa amendar te na ova sar olende. Odolese ka phene, ando mačija ćeraja raonikija (Mih. 4:3). E Devlese sluge na đana ko maribe, već pomožinena e manušenđe te dobinen o pravo đivdipe, ađahar so sikavena len ando Devel hem andi olesi namera (1. Tim. 6:19). Disavo puti, šaj olengi porodica protivini pe lenđe ja isi len finansijska problemija sose podupirinena e Devleso Kraljevstvo. Ama, o Jehova niked na aćhavi len hem uvek dela len odova so valjani lenđe (Mat. 6:25, 30-33; Luka 18:29, 30). Sebepi sa akala buća, amen hijam uverime so e Devleso Kraljevstvo ćaće ka avel hem so o Devel prekalo leste ka ispunini pi namera (w22.12 5 ¶13).

Palo 1 000 berš, sa o manuša kola ka živinen ki phuv ka oven savršena. O greh kova nasledinđam ando Adam, više na ka ovel (Rimlj. 5:12). Isto ađahar, o Jehova ka cidel o prokletstvo ando Adameso greh. Odova značini so sa o manuša kola tegani ka živinen ki phuv ka dobinen pravo životi sose ka oven savršena (Otkr. 20:5). Amen đanaja so o Isus aćhilo verno e Jehovase ked o Beng iskušinđa le. Ama, da li sa o savršena manuša ka aćhon verna e Jehovase ked o Beng ka iskušini len palo 1 000 berš? Svako amendar ka ovel le prilika te mothovi pi poslušnost e Jehovase (Otkr. 20:7). Okola kola ka aćhon lese verna, ka dobinen večno životi hem konačno ka uživinen ki pravo sloboda (Rimlj. 8:21). A okola kola ka pobuninen pe ka oven zauvek uništime (Otkr. 20:8-10; w22.05 19 ¶18-19).

Akava proročanstvo ispuninđa pe ked o Beng ćhivđa e Jevrejen hem e Rimljanen te mudaren e Devlese Ćhave (Luka 23:13, 20-24). Sar so o manuš kova isi le rana ki patum našti jekh vreme te phirel, ađahar ni o Isus našti hine trin dive ništa te ćerel sose hine ko grobo (Mat. 16:21). O proročanstvo ando Postanak 3:15 mothovđa so o Isus našti hine te aćhol ko grobo. Sose? Odolese so o proročanstvo vaćeri so e đuvljako potomstvo ka zdrobini e sapeso šero. Odova značinđa so o Isus valjanđa te uskrsnini. Ađahar hem hine. Trin dive palo odova so mulo, o Isus uskrsninđa sar besmrtno duhovno biće. Ko vreme kova o Jehova odredinđa, o Isus ka uništini e Benge (Jevr. 2:14). O Isus hem okola kola ka vladinen oleja, zauvek ka uništinen e Devlese dušmanen – o potomstvo ando sap (Otkr. 17:14; 20:4, 10; w22.07 16 ¶11-12).

Roditeljija, pomožinen tumare ćhavenđe te ovel len šukar amala. E Devleso Lafi phenela so o amala šaj te utičinen upro amende ko lošno ja ko šukar način. Da li đanena kasa družinena pe tumare ćhave? So šaj te ćeren te šaj te pomožinen tumare ćhavenđe te ovel len šukar amala? (1. Kor. 15:33). But tano važno zajedno tumare ćhavencar te družinen tumen okolencar kola tane paše e Jehovaja (Ps. 119:63). Jekh dad kova vićini pe Toni, phenela: „Beršencar, mi romni hem me vićinđam koro amende bute phralen hem phenjen. Na dikhljam da li tane terne ja phure. Družinđam amen olencar, haljam maro zajedno hem hine amencar ko amaro porodično proučibe. Tegani, najšukar penđarđam len. Olengi revnost, odova so nakhlje ko po životi hem kobor žrtvujinđe pe sebepi i služba, but šukar utičinđa upro amare ćhave hem pomožinđa len te aćhon paše e Jehovaja“ (w22.05 29-30 ¶14-15).

Ked o starešine vaćerena nekasa kova ćerđa greh te dikhen da li ka aćhol ki skupština ili na, on mangena te anen isto odluka koja već anđa pe ko nebo. Sar odova pomožini e skupštinaće? I skupština tani zaštitimi ando lošno uticaj kova šaj te ćerel okova kova grešini (1. Kor. 5:6, 7, 11-13; Titu 3:10, 11). Isto ađahar, o starešine mangena te pomožinen okolese kova ćerđa disavo greh te haljol kobor tano važno te kajini pe hem te rodel ando Jehova te oprostini lese (Luka 5:32). On molinena pe olese hem rodena ando Jehova te pomožini lese palem te ovel paše oleja (Jak. 5:15). Ako o starešine dikhena so o manuš kova ćerđa greh na kajini pe, ov ka ovel isključimo. Ama, ako palo disavo vreme odova manuš kajini pe hem na ćerela više odova so angleder ćerđa, o Jehova ka oprostini lese (Luka 15:17-24). Ov ka ćerel odova čak ako odova greh hine but ozbiljno (2. Let. 33:9, 12, 13; 1. Tim. 1:15; w22.06 9 ¶5-6).

Ko celo sveto, e Jehovase svedokija isi len bare pharipa. Ama sebepi so o Jehova pomožini lenđe, on šaj te pobedinen e Benge (1. Petr. 5:9). Pana hari, o Devel ka phenel pe Ćhavese hem okolenđe kola ka vladinen oleja te „uništinen e Bengese delija“ (1. Jov. 3:8). Palo odova, sa e Jehovase sluge kola ka oven ki phuv na ka ovel len sostar te daran (Is. 54:14; Mih. 4:4). Ama, đi na avela odova vreme, de sa tutar te pobedine i dar. Valjani hem ponodri te uverina amen ko odova so o Jehova mangela amen hem so brinini pe amendar. Amen šaj te ćera odova ako hor razmislinaja odolestar sar o Jehova pomožinđa pe slugenđe angleder hem sar pomožinđa lično amenđe. Uzi Jehovasi pomoć, amen šaj te pobedina i dar (Ps. 34:4; w22.06 19 ¶19-20).

I poslednjo svetsko sila koja tani predstavimi sar o „stopala kola hine mešime sastroneja hem glinaja“ već vladini. Oj počminđa te vladini đi trajinđa o Prvo svetsko rat, ked i Velika Britanija hem o Sjedinjena Države ulje saveznikija. Isto ađahar, o kip ando Navuhodonosoreso suno prorekninđa disave buća ko kola akija sila tani averćhane ando avera. O Danilo ki vizija dikhlja so avera svetska sile tane predstavime disave zorale materijalencar, sar soj tano o zlato ja o srebro. Ama, asi angloameričko svetsko sila phenela pe soj tani mešimi sastroneja hem glinaja. I glina predstavini o obično narodo (Dan. 2:43, fusn.). Avdije jasno dikhaja kobor baro uticaj isi len o manuša ko izborija, sar borinena pe aso pe pravija prekalo razna kampanje, protestija hem radnička sindikatija. Sebepi sa akava, odija svetsko sila našti te ćerel odova so mangela (w22.07 4-5 ¶9-10).

Da li ka krstine tut? Samo tu šaj te odgovorine ko akava pućibe. Šaj te pomožini tuće ako pućeja tut: „Sose te ađićerav?“ (Dela 8:36). E Isusese hine but važno te ćerel pe Dadesi volja hem odova uporedinđa e hranaja. Sose? I hrana tani šukar amenđe. O Isus đanđa so odova so o Jehova rodela amendar te ćera tano aso amaro šukaripe. O Jehova na mangela te ćera diso so ka povredini amen. Da li o Jehova mangela te krstine tut? Ja (Dela 2:38). Odolese, šaj te ove sigurno so ako šuneja odija zapovest ka ove bahtalo. Ked anglo tute isi disavo šužo habe, tu jedva ađićereja te ha le, sose onda ađićereja te krstine tut? Sose disave ađićerena? But đene phenena: „Pana na hijum spremno.“ I odluka te predajine to životi e Jehovase hem te krstine tut tani i najvažno odluka ko to životi. Odolese, valjani te le tuće vreme hem pažljivo te razmisline da li hijan spremno (w23.03 7 ¶18-20).

Ked hine pomazimo e Devlese sveto duhoja, o Isus ulo o potomko andi đuvli, kova ka ovel le but važno uloga. Palo odova so o Isus mulo hem uskrsninđa, o Jehova „dinđa le slava hem čast“ hem dinđa le „sa i vlast ko nebo hem ki phuv“ hem dinđa le vlast te „uništini e Bengese delija“ (Jevr. 2:7; Mat. 28:18; 1. Jov. 3:8). Uzo Isus hem avera ka oven deo ando đuvljako potomstvo. O apostol Pavle mothovđa koj tane on ked aso pomazime Jevreja hem neznabožcija phenđa: „A ako hijen e Hristese, tegani hijen e Avrahameso potomstvo, naslednikija premalo obećanje“ (Gal. 3:28, 29). Ked o Jehova pomazini nekas pe sveto duhoja, ov tegani ovela deo ando đuvljako potomstvo. Znači e đuvljako potomstvo tano o Isus hem o 144 000 kola ka vladinen oleja (Otkr. 14:1). Sare on dena sa pestar te oponašinen pe Dade, e Jehova (w22.07 16 ¶8-9).

Ko akala poslednja dive šaj te oven amen bare pharipa (2. Tim. 3:1). Tegani šaj te osetina amen so ućharđe amen o problemija, pogotovo ako on avena jekh palo jekh ili nekobor kotar jekhvar. Ama, ma bistri so o Jehova đanela save problemija isi amen hem šaj te del amen snaga te istrajina ko bilo kova problemi. Razmislin ando odova sar o Jehova pomožinđa pe slugase, e Jovese. Aso kratko vreme, o Jov doživinđa but bare pharipa. Jekhe divese, ov našalđa sa so hine le. Našalđa po barvalipe, pe stoka, olese sluge hine mudarde, čak sa olese ćhave mulje (Jov 1:13-19). Palo odova, đi pana patinđa palo pe ćhave, ov but naborsalo (Jov 2:7). O Jehova brininđa pe ando po sluga o Jov. Odolese so manglja le, ov pomožinđa lese te ovel istrajno hem te aćhol lese verno (w22.08 11 ¶8-10).

Ked dobinaja ukor, odova šaj but te dukhal amen. Ama, ako razmislinaja samo odolestar sar amen osetinaja amen, tegani šaj te mislina so odova ukor na hine ko than, so nane amenđe hem soj tano but strogo. Ako ađahar razmislinaja, tegani na ka haljova diso but važno — so o Jehova ukorini amen odolese so mangela amen (Jevr. 12:5, 11). Odolese, prihvatin o ukor hem ćer o potrebna promene. O Isus nekobor putija ukorinđa e Petare anglo avera apostolija (Mar. 8:33; Luka 22:31-34). Odova sigurno hine bari lađ e Petarese. Ama, ov aćhilo verno e Isusese. Prihvatinđa o ukor hem sikljilo ando pe greške. Sebepi odova, o Jehova blagoslovinđa le hem dinđa le but bare odgovornostija ki skupština (Jov. 21:15-17; Dela 10:24-33; 1. Petr. 1:1). Amen na valjani samo te razmislina odolestar kobor tano amenđe pharo, nego valjani te prihvatina o ukor hem te ćera o potrebna promene. Ađahar o ukor šaj te pomožini hem amenđe hem averenđe. Tegani, šaj te ćera but buća e Jehovase hem amare phralenđe (w22.11 21-22 ¶6-7).

O Avraham đanđa so o Jehova isi le pherdo mangipe hem so niked ne bi ćerela diso so nane pravedno. O apostol Pavle phenđa so o Avraham haljilo so o Jehova šaj te uskrsnini olese ćhave (Jevr. 11:17-19). O Jehova obećinđa so ando Isak ka avel baro potomstvo, ama tegani o Isak na hine le ćhave. O Avraham manglja e Jehova hem hine le poverenje upro Jehova so ka ćerel odova soj tano šukar. Iako na hine lese lokho, o Avraham šunđa e Jehova (Post. 22:1-12). Sar šaj te ova sar o Avraham? Sar oleste hem amen valjani te sikljova pana pobuter ando Jehova, sose odova ka pomožini amen te ova pana popaše oleja hem pana pobuter te manga le (Ps. 73:28). Amari savest ka ovel oblikujimi premalo olese merilija (Jevr. 5:14). Sebepi odova, na ka mukha nisose hem nikase te ćhivel amen te ćera odova soj tano pogrešno. Čak ni ki godi na ka avel amenđe te ćera diso sova ka dukhava amare Dade ja ka rumina amaro amalipe oleja (w22.08 28-29 ¶11-12).

Ked palem đelje ki Listra, ki Ikonija hem ki Antiohija, o apostol Pavle hem o Varnava ki „svako skupština ćhivđe lenđe starešinen“ (Dela 14:21-23). Odola starešine sigurno but ohrabrinđe e phralen. Isto odova ćerena hem o starešine avdije. Phraljalen kola služinena sar starešine, oven spremna te pomožinen okolenđe kase valjani dijekh „šužo lafi“ hem ohrabrenje. O Pavle setinćerđa e phralen so e Jehovase sluge ko purano vreme istrajinđe ko pharipa odolese so o Jehova dinđa len snaga (Jevr. 12:1). Ov haljilo so o primerija ando Devlese sluge kola angleder istrajinđe ko pharipa, šaj te ohrabrini e phralen hem e phenjen hem te pomožini lenđe te razmislinen kotar „diz ando đivdo Devel“ (Jevr. 12:22). Isto tano ađahar hem avdije. Sare amen hijam but ohrabrime ked čitinaja ando odova sar o Jehova pomožinđa e Gedeonese, e Varakese, e Davidese, e Samuelese hem avere slugenđe (Jevr. 11:32-35; w22.08 21-22 ¶5-6).

Sar ka sudini pe okolenđe kola ka uskrsninen? Da li ka sudini pe lenđe premalo odova so ćerđe angleder te meren? Na. Setin tut so ked on mulje hine oslobodime ando greh. Odolese šaj te phena so olenđe na ka ovel sudimo premalo odova so ćerđe angleder. Umesto odova, olenđe ka sudini pe premalo odova sar ka reagujinen ja da li ka ićeren pe ko odova so ka pisini ko neve svitkija. Čak hem o verna manuša sar soj tane o Noje, o Samuilo, o David hem o Danilo ka valjani te sikljon ando Isus Hrist hem te mothoven vera ki olesi otkupno žrtva. Ako odola verna manuša ka valjani te sikljon sa odola buća, šaj samo te zamislina kobor ka valjani te sikljon o nepravedna manuša. So ka ovel okolencar kola na ka mangen te ićeren pe ko odova so ka sikljon? Ko Otkrivenje 20:15 pisini: „Svako kaso anav na hine pisimo ki knjiga ando životi, hine fordimo ko jagako jezero.“ On ka oven zauvek uništime. Odolese, but tano važno te da sa amendar amaro anav te ovel pisimo ki knjiga ando životi hem te aćhol odothe (w22.09 19 ¶17-19).

But amare odluke kola anaja ando amaro sastipe hem sar ka lečina amen temeljinena pe ki amari savest koja tani oblikujimi premalo biblijake načelija (1. Tim. 3:9). Ked anaja disavi odluka hem ked vaćeraja averencar ando odova, šukar bi ovela te primenina o načelo kova pisini ko Filipljanima 4:5, odothe pisini: „Tumari razumnost nek ovel penđardi sa e manušenđe.“ Ked hijam razumna, na ka brinina amen but so ka ovel amare sastipaja niti ka ćhiva averen te ćeren odova so amen odlučinđam. Amen mangaja hem poštujinaja amare phralen hem phenjen, čak iako olenge odluke tane averćhane ando amare (Rimlj. 14:10-12). Amen mothovaja so hijam zahvalna e Jehovase, kastar avela o životi, ađahar so arakhaja amaro životi hem ađahar so daja olese amaro najšukar (Otkr. 4:11). Akana hijam naborme hem isi amen pharipa. Ama, amaro Stvoritelj na manglja te ovel amen asavko životi. Pana hari, ov ka del amen večno životi, kuri na ka oven dukha ni meribe (Otkr. 21:4). Ama, đi na avela odova vreme valjani te uživina đi služinaja amare nebesko Dadese, e Jehovase! (w23.02 25 ¶17-18).

O Jehova mothovđa so isi le najbari vlast (Rimlj. 13:1). Akana ka dikha trin primerija kola mothovena odova. O egipatsko faraon zarobinđa e Jehovase narodo hem na manglja te oslobodini le. Ama, o Jehova oslobodinđa le hem ćerđa o faraon te tasljol ko Crveno more (Izl. 14:26-28; Ps. 136:15). O Vavilonsko kralj, o Valtasar, „uštinđa protiv o Gospodari ando nebo“ hem ćerđa jekh proslava kuri „hvalinđa e devlen ando srebro hem ando zlato“ umesto e Jehova (Dan. 5:22, 23). Ama, o Devel ponizinđa odole ponosno manuše. Ki „odija isto rat“, o Valtasar hine mudardo hem oleso kraljevstvo dinđa pe jekhe avere kraljese kova vladinđa upri Medija hem Persija (Dan. 5:30, 31). O Irod Agripa I, mudarđa e Jakove, a palo odova ćhivđa ko phanlipe hem e Petare sose manglja hem ole te mudari. Ama, o Jehova ćhinavđa e Irode te ćerel odova. E Jehovaso anđeo „bićhalđa upro leste jekh baro nabormipe“ hem ov mulo (Dela 12:1-5, 21-23; w22.10 15 ¶12).

Đi čitinaja ando odova sar o Jehova pomožinđa pe verno slugenđe ko purano vreme, amari nada ovela pana pozorali. Sa odova soj tano pisimo ko Devleso Lafi „pisimo tano te sikavi amen hem te del amen snaga te istrajina te bi ovela amen nada“ (Rimlj. 15:4). Razmislin ando odova sar o Jehova ićerđa pe ko po lafi. Te dikha so o Devel ćerđa e Avrahamese hem e Saraće. On duj hine but phure te ovel len ćhave. Ama, o Jehova obećinđa lenđe so ka ovel len jekh ćhavo (Post. 18:10). Sar o Avraham reagujinđa? Ki Biblija pisini: „Ov verujinđa so ka ovel dad ando but narodija“ (Rimlj. 4:18). Iako o Avraham na đanđa sar o Jehova ka ćerel odova so phenđa lese, ov ipak verujinđa so o Jehova ka ićeri pe ko po lafi. Odova verno manuš na razočarinđa pe (Rimlj. 4:19-21). Asavke izveštaija pomožinena amen te haljova so o Jehova ka ispunini odova so obećinđa kobor god odova te dićhol soj tano nemoguće (w22.10 27 ¶13-14).

Odola lafija ispuninđe pe ked o Izraelcija hine oslobodime ando ropstvo. O Jehova hine olengo Veličanstveno Učitelj hem odolese so ov vodinđa len on šaj hine te služinen lese ko ispravno način. Avdije, amen hijam but bahtale soj tano o Jehova hem amaro Veličanstveno Učitelj. Ko akala stihija, o Isaija phenđa so amen hijam sar učenikija kolen o Jehova sikavi. O Isaija phenđa: „Te jaćhencar ka dikhe te Veličanstveno Učitelje.“ Ko akava poređenje, o Veličanstveno Učitelj bešela anglo pe učenikija. Isi amen bari čast so o Jehova sikavi amen avdije. Ov odova ćerela prekali pi organizacija hem but hijam zahvalna so dobinaja jasna smernice. Prekalo sastankija, kongresija, publikacije, amare masekose emisije hem ko avera načinija, amen dobinaja smernice kola pomožinena amen te istrajina ko amare problemija hem te ova radosna (w22.11 10 ¶8-9).

Kotar vreme ando krajo ko kova amen avdije živinaja, o Isus phenđa: „Niko na đanela ked ka avel odova dive hem o sati, ni o anđelija ko nebo ni o Ćhavo, nego samo o Dad.“ Palo odova, ov phenđa pe učenikonenđe so valjani te den sa pestar te „oven đangavde“ hem te „pazinen“ (Mar. 13:32-37). O hrišćanija ko prvo veko valjanđe te oven đangavde, sose olengo životi zavisinđa kotar odova. O Isus phenđa pe učenikonenđe so ka desini pe angleder te ovel uništimo o hram hem o Jerusalim. Ov phenđa: „Ked ka dikhen so i vojska ćedinđa pe oko Jerusalim, te đanen soj tano oleso kraj but paše.“ Ked odova ulo, on valjanđe te „našen ko bregija“, sar so o Isus phenđa lenđe (Luka 21:20, 21). Okola kola šunđe e Isusese lafija, aćhilje đivde ked o Rimljanija uništinđe o Jerusalim. Pana hari, akava lošno sveto ka ovel uništimo. Odolese but tano važno hem amen te pazina hem te ova đangavde (w23.02 14 ¶1-2; 16 ¶3).

O Jehova sikavi pe slugen te oven poštena hem pravedna. Odova pomožini lenđe te ovel len samopoštovanje hem unutrašnjo mir (Posl. 13:5, 6). Da li hem tu osetinđan sar o Jehova pomožinđa tut ked počminđan te proučine i Biblija? Tu haljiljan so i najšukar odluka koja jekh manuš šaj te anel tani te đal e Jehovase drumoja (Ps. 77:13). Odolese mangeja te ćere odova soj tano šukar anglo Jehovase jaćha (Mat. 6:33). Isi tut bari želja te branine o ćaćipe hem te dokažine so o Satana vaćeri hovajba e Jehovastar. Sar šaj te ćere odova? Tu šaj te životoja te mothove so na verujineja ko Satanase hovajba, nego so mangeja o ćaćipe. Isto ađahar, šaj te mothove so mangeja o Jehova te ovel to Vladari hem so mangeja te ćere okova soj tano šukar. Sar šaj te mothove odova? Ađahar so ka predajine to životi e Jehovase ki molitva hem palo odova ka krstine tut. Ako mangeja o ćaćipe hem i pravednost, odova ka podstaknini tut te krstine tut (w23.03 3 ¶4-5).

Da li ćaće šaj te ovel amen mir? Ja. Ama, but manuša na đanena kova tano odova mir hem kastar avela. Ki Biblija pisini so odova tano „e Devleso mir“ hem šaj te dobina le ako hijam olese amala. Ked isi amen mir kova avela ando Devel, tegani osetinaja amen sigurno (Fil. 4:6, 7). Amen uživinaja te ova paše e Devleja kastar avela o mir hem okolencar kola mangena le (1. Sol. 5:23). Ked šukar penđaraja e Devle, isi amen poverenje upro leste hem šunaja le, ov šaj te pomožini amen te ovel amen mir iako isi amen bare pharipa. Disavo puti, ko than kaj živinaja kotar jekhvar šaj te ovel disavi epidemija, građanska nemirija, prirodno katastrofa ja progonstvo. Sebepi odova šaj te osetina bari dar. But amare phralja hem phenja ićerena pe ko savet kova tano dindo ko avdisutno stiho. Uzi Jehovasi pomoć, on ikljona ko krajo pe problemencar hem isi len mir (w22.12 16 ¶1-2).

Amen našti te đana so ka ovel tajsa, niti šaj te utičina ko odova. Odolese, na valjani te mislina so hijam vredna e Jehovase samo sebepi amare odgovornostija niti valjani te uporedina amen okolencar kola isi len odgovornostija kola amen nane amen (Gal. 6:4). Važno tano te dikha sar šaj te pomožina averenđe hem te služina e Jehovase. Šaj te ćere pana pobuter e Jehovase ako trudineja tut skromno te živine hem te na khuve ko dugija. Ćhiv tuće disave potikne ciljija te šaj te ispunine disave pobare ciljija. Na primer, ako tano to cilj te ove stalno pioniri, sose na bi već akana počmineja te služine sar pomoćno pioniri? Odova so akana ćereja ka pomožini tut tajsato dive te ćere avera odgovornostija. Ov odlučno ko svako zadatko te de to najšukar (w22.04 26 ¶16-17).

O Jehova šaj te pomožini amenđe te istrajina ko amare problemija hem te ova radosna đi služinaja lese. Ked molinaja amen e Jehovase hem phenaja lese so mučini amen, ov najangleder šaj te del amen snaga te istrajina. Ako amare problemija na nakhena odobor sigate sar so nadinđam amen, šaj valjani nekobor putija te molina amen e Jehovase te del amen snaga te istrajina. Ov podstaknini amen te ćera odova sar so hem pisini ko Isaija 62:7: „Ma aćhaven [e Jehova] ki mira.“ So značinena akala lafija? Amen valjani odobor često te molina amen e Jehovase, so ka phene na aćhavaja le ki mira. E Isaijase lafija setinćerena amen ko Isuseso poređenje andi molitva kova tano pisimo ko Luka 11:8-10, 13. Othe o Isus podstakninđa amen te ova uporna đi molinaja amen hem te roda sveti duh. Isto ađahar, šaj te molina amen e Jehovase te pomožini amenđe te ana šukar odluke (w22.11 8 ¶1; 9 ¶6-7).

Tu hem ti porodica šaj već akana te pripreminen tumen aso progonstvo. Ma razmislin ando lošna buća kola šaj te oven. Umesto odova, zorjaćer to amalipe e Jehovaja hem pomožin te ćhavenđe te ćeren odova. Ako disavo puti but brinineja tut, ćućar to vilo e Jehovase (Ps. 62:7, 8). Sar porodica, vaćeren ando odova sose šaj te ovel amen baro poverenje upro Jehova. Sar so tumare ćhavenđe ka pomožini odova so ka pripreminen tumen asi prirodno katastrofa ađahar ka pomožini lenđe hem ako pripreminena tumen aso progonstvo. On ka oven hrabra hem ka ovel len mir sose tu angleder sikavđan len te ovel len poverenje upro Jehova. O mir kova avela ando Devel šaj te arakhi amen (Fil. 4:6, 7). Ov dela amen mir ked hijam naborme, ked doživinaja disavi prirodno katastrofa ja progonstvo. Ov pomožini amen hem prekalo starešine kola but brininena pe amendar. Uzo odova, sare amen šaj te pomožina jekh jekhese. Akana valjani te da sa amendar te pripremina amen asi „bari nevolja“ (Mat. 24:21; w22.12 27 ¶17-18).

Amen na valjani te osetina krivica sebepi o grehija kola angleder ćerđam. Naravno, amen ka pazina te na grešina hem te na phena so o Jehova ka oprostini amenđe sebepi e Isusesi otkupno žrtva (Jevr. 10:26-31). Ama, šaj te ova uverime so ako ćaće kajinaja amen, ako rodinđam pomoć ando Jehova hem ando starešine hem promeninđam amen, o Jehova spremno ka oprostini amenđe (Is. 55:7; Dela 3:19). I otkupno žrtva tani dovoljno zorali te šaj te ućhari sa amare grehija hem ka omogućini amenđe te živina ko raj. Uduri niked na ka ovel dosadno. Uvek ka ovel amen so te ćera hem ka upoznajina neve manušen. Najšukar kotar sa tano so svako dive ka ovel amen prilika pošukar te upoznajina amare nebesko Dade hem te uživina ko odova so ka del amen. Uvek ka ovel amen prilika te sikljova ando odova so ov stvorinđa (w22.12 13 ¶17, 19).

„I đuvli“ našti te predstavini e Eva. Ko proročanstvo pisini so e đuvljako potomstvo ka „zdrobini“ e sapeso šero. O sap tano o lošno anđeo, o Satana, a nijekh nesavršeno manuš ando Evako potomstvo nane le odija sposobnost te uništini le. Tegani, ko šaj te uništini le? Ki zadnjo knjiga andi Biblija pisini koj tani i đuvli ando proročanstvo (Otkr. 12:1, 2, 5, 10). Akija nane obično đuvli! Oj talo pre isi la o mesec, upro šero kruna ando 12 zvezde hem bijani jekhe neobično ćhave, e Devleso Kraljevstvo. Odova Kraljevstvo tano ko nebo odolese hem i đuvli valjani te ovel ko nebo. I đuvli predstavini o nebesko deo andi Jehovasi organizacija kuri tane o verna anđelija (Gal. 4:26). E Devleso Lafi pomožini amen te haljova upro kaste najangleder odnosinena pe o lafija e đuvljako potomstvo. Odova potomko mora te avel andi e Avrahamesi loza (w22.07 15-16 ¶6-8).

Ki Biblija, ko poklon kova o Jehova dinđa amen, isi but mudra savetija. Odola savetija pomožinđe bute manušenđe te meninen pe. Ked pisinđa i prvo knjiga, o Mojsije e Devlese narodose phenđa: „Odola nane ćuće lafija, nego on tumenđe značinena životi“ (Pon. zak. 32:47). Okola so ićerđe pe ko odova so hine pisimo, šaj hine te oven bahtale (Ps. 1:2, 3). O savetija ando Devleso Lafi tane večna sose pomožinena bute manušenđe bizo obzir ko kova period živinena. Ked čitinaja odija sveto knjiga hem hor razmislinaja ando odova, olako Autor prekalo po sveti duh pomožini amen te haljova sar šaj te primenina o savetija kola tane ki odija knjiga (Ps. 119:27; Mal. 3:16; Jevr. 4:12). O Jehova jedva ađićeri te pomožini amen. Odolese valjani te čitina oleso Lafi svako dive (w23.02 3 ¶5-6).

Ko Otkrivenje 13. poglavlje pisini so o eftato šero andi zver, i angloameričko svetsko sila, tani sar i zver koja isi la „duj šinga sar bakro, ama vaćerđa sar zmaj.“ Akija zver ćerela „bare čudija“, čak mukhela „i jag ando nebo ki phuv anglo sa o manuša“ (Otkr. 13:11-15). Ko Otkrivenje ko 16. hem ko 19. poglavlje pisini so akija zver tani „o hovavno prorok“ (Otkr. 16:13; 19:20). O Danilo pomini diso slično, a odova tano so i angloameričko svetsko sila „ka uništini odobor but buća so o manuša ka čudinen pe“ (Dan. 8:19, 23, 24). Baš odova desinđa pe ko Dujto svetsko rat. O duj atomska bombe kola hine fordime utičinđe ko odova te završini pe o maribe ko Tiho okeani. Odola atomska bombe ćerđe o naučnikija andi Britanija hem Amerika. Odoleja so ćerđe akala bombe i angloameričko svetsko sila u stvari „mukhlja i jag ando nebo ki phuv“ (w22.05 10 ¶9).