Maj

Palo odova so dikhlja i grupa ando 144 000, o Jovan dikhela jekh aver grupa, „o baro mnoštvo“, kole niko našti te đenel. Aće so ov phenela olendar: „On tane okola so avena andi bari nevolja. On thovđe pe bare fistanja hem parnjaćerđe len ko Bakreso rat“ (Otkr. 7:14). Palo odova so ka preživinen i bari nevolja, o baro mnoštvo ka živini večno ki phuv hem ka ovel le bare blagoslovija (Ps. 37:9-11, 27-29; Posl. 2:21, 22; Otkr. 7:16, 17). Šaj li te zamisline so tu hijan deo ando sa akava so čitinaja ko 7. poglavlje ko Otkrivenje? Pana hari ađićeri amen but šužo vreme, bizo obzir da li ka živina ko nebo ja ki phuv. Odolese so birinđam te ova ki Jehovasi strana, ka ovel amen but blagoslovija (w22.05 16 ¶6-7).

Da li nekad valjanđan te ane disavi važno odluka? Tegani sigurno molinđan tut e Devlese asi mudrost (Jak. 1:5). O kralj Solomon pisinđa: „Rode mudrost sose oj tani najvažno ando sa“ (Posl. 4:7). O Solomon na vaćerđa andi bilo savi mudrost, već andi mudrost koja avela ando Devel. Da li i mudrost koja avela ando Devel šaj avdije te pomožini tuće te ikljove ko krajo te problemencar? Ja, šaj. Jekh način sar šaj te ova mudra tano ako sikljovaja hem primeninaja odova so phenđe duj but mudra manuša. Sar prvo, te dikha savo primer aćhavđa amenđe o Solomon. Ki Biblija pisini: „O Devel e Solomonese dinđa bari mudrost hem razboritost“ (1. Kralj. 4:29). Sar dujto, te dikha savo primer aćhavđa amenđe o Isus. Ov hine najmudro manuš kova živinđa ki phuv (Mat. 12:42). Olestar hine pisimo: „E Jehovaso duho ka ovel upro leste. Odolese ov ka ovel mudro, but šukar ka haljol o buća“ (Is. 11:2; w22.05 20 ¶1-2).

Niked na ka ova odobor phure so našti te ćhiva amenđe disave ciljija hem te ispunina len. Te dikha o primer andi amari phen i Beverli koja isi la 75 berš. Oj hine but nabormi hem sebepi odova našti hine te phirel. Ama, oj manglja te učestvujini ki akcija hem te vićini e manušen ki Spomen-svečanost. Odolese, ćhivđa pese disave konkretna ciljija. Ked i Beverli ispuninđa pe ciljija, oj hine but bahtali. Čak olako primer, podstakninđa averen te ćeren pana pobuter ki služba. O Jehova cenini sa odova so ćerena amare phure phralja hem phenja, čak iako sebepi pe berša ja sebepi po nabormipe našti te ćeren but (Ps. 71:17). Ćhiv tuće ciljija kola šaj te ispunine. Barjaćer o šukar osobine kola ka pomožinen tut te ove pana popaše e Jehovaja. Sikljov te ćere disave neve buća hem ćer ko te veštine te šaj o Jehova hem olesi organizacija pana pobuter te koristinen tut. Dikh sar šaj pana pobuter te pomožine averenđe. Uzi Jehovasi pomoć, sare ka dikhen toklo napredak, sar so dikhlje e Timotejeso (1. Tim. 4:15; w22.04 27 ¶18-19).

O roditeljija šaj te den sa pestar te sikaven pe ćhaven ando Jehova. Ama, podijekh puti šaj jekh ando olenge ćhave na mangela te služini e Jehovase. E roditeljenđe šaj te ovel but pharo sebepi odova. Ama, na valjani pes te krivinen aso odova hem te mislinen so na sikavđe len šukar. Sose? Odolese so o Jehova dela slobodno volja sarinenđe, pa čak hem e ćhavenđe, te odlučinen da li ka služinen lese ja na. Ma našal ti nada so jekh dive ka irini pe lese. Šaj but te ohrabrini tut o primer kotar buntovno ćhavo andi Isusesi priča (Luka 15:11-19, 22-24). Ov ikljilo ando ćher, ćerđa but lošna buća, ama ko krajo irinđa pe ćhere. Tumen sar roditeljija isi tumen jekh posebno čast, te barjaćeren jekh nevi generacija koja ka služini e Jehovase (Ps. 78:4-6). Odija nane lokhi buti. Odolese, mangaja te pohvalina tumen aso tumaro trud. Ako hem ponodri pomožinena tumare ćhavenđe te mangen e Jehova hem te šunen le, oven sigurna so o Jehova ka ovel but zadovoljno odoleja so ćerena (Ef. 6:4; w22.05 30-31 ¶16-18).

Te šaj te ovel mir hem jekhipe ki skupština, svako amendar valjani te del poklo najšukar e Jehovase. Te dikha o primer ando prva hrišćanija. On hine len različita zadatkija hem sposobnostija (1. Kor. 12:4, 7-11). Ama, odova na hine razlog te vazden pe ja te ćeren podele ki skupština. Umesto odova, o apostol Pavle podstakninđa sarinen „te zorjaćeren e Hristeso telo.“ Ov pisinđa e hrišćanenđe ko Efes: „Ked svako deo ćerela pi uloga, odova pomožini o telo te barjol, kova kokri pes izgradini ko mangipe“ (Ef. 4:1-3, 11, 12). Okola so šunđe e Pavleso savet ćerđe ki skupština te ovel mir hem jekhipe, a ađahar tano hem avdije ko amare skupštine. Ma uporedin tut averencar. Sikljov ando Isus hem de sa tutar te oponašine olese osobine. Ov sigurno so o Jehova „nane nepravedno te bistrel“ odova so ćerđan (Jevr. 6:10). O Jehova tano bahtalo ked dikhela so deja lese toklo najšukar (w22.04 14 ¶15-16).

But hijam zahvalna so na valjani amen te odlučina da li o Jehova ka oprostini nekase ko ćerđa ozbiljno greh. Ama, isi diso so valjani te odlučina. Šaj neko but povredinđa amen, ama izvininđa pe amenđe hem rodinđa te oprostina lese. Čak hem ako na izvininđa pe amenđe, ovela bi šukar te oprostina lese hem te na ićera i holi ano amende. Disavo puti odova nane lokho, sose odija osoba šaj but povredinđa amen. Ki Stražarsko kula kotar 15. septembar, 1994. berš, pisini: „Ked oprostineja nekase kova grešinđa, odova na značini so tiknjaćereja oleso greh, već odoleja mothoveja so mukheja o buća ko Jehovase vasta. Ov tano najpravedno Sudija hem ka anel i pravda ko pravo vreme“ (w22.06 9 ¶6-7).

Ko amaro vreme o Jehova ka ćedel e manušen ando sa o narodija, plemenija, nacije hem ćhibja te služinen olese. Avdije odija grupa tani o „baro mnoštvo“ (Otkr. 7:9, 10). Iako ki odija grupa isi murša, đuvlja, phure, terne hem ćhavore, on sare služinena e Jehovase sar jekh bari porodica (Ps. 133:1; Jov. 10:16). Isto ađahar, on dena sa pestar te vaćeren e manušenđe i šukar vest (Mat. 28:19, 20; Otkr. 14:6, 7; 22:17). Ako hem tu hijan deo ando baro mnoštvo, sigurno hijan but bahtalo so isi tut nada so o buća ka oven pošukar. O Beng mangela te ćhivel amen te verujina so o Jehova na brinini pe amendar hem so na ka ićeri pe ko po lafi. Ako ka ćhivel amen te našala amari nada, šaj te ova obeshrabrime hem čak te ćhinava te služina e Jehovase (w22.06 20-21 ¶2-3).

Sar so o sidro pomožini e brodose te aćhol stabilno, ađahar amari nada pomožini amenđe te aćhova uzo Jehova hem te aćhova smirime ked isi amen problemija sose verujinaja so o buća ka oven pošukar. Ama, na valjani te bistra so o Isus phenđa so ka ova progonime (Jov. 15:20). Odolese, ked razmislinaja ando Jehovase obećanja, odova pomožini amen hem ponodri te služina lese. Te dikha sar i nada pomožinđa e Isusese te aćhol verno, iako đanđa so ka merel. Ki Pedesetnica, ko 33. berš ki nevi era, o apostol Petar citirinđa jekh proročanstvo ando Psalam kova phenela so o Isus ka aćhol smireno hem so ka ovel le baro poverenje upro Jehova. Ov phenđa: „Me ka živinav ki nada, sose tu na ka aćhave man ko grobo, niti ka mukhe o telo ando toklo verno sluga te ćirnjol. . . but hijum bahtalo ked terđovava anglo tute“ (Dela 2:25-28; Ps. 16:8-11). Iako đanđa so ka merel, o Isus hine le nada so ka uskrsnini hem so palo odova ka ovel pe Dadeja ko nebo (Jevr. 12:2, 3; w22.10 25 ¶4-5).

Jekh puti, o apostolija, o Jakov hem o Jovan, phenđe pe dajaće te rodel ando Isus te ovel len posebno than ko Kraljevstvo (Mat. 20:20, 21). On mothovđe soj tane ponosna hem so mangena te oven považna averendar (Posl. 16:18). Ki odija situacija na mothovđe samo o Jakov hem o Jovan lošna osobine. Dikh sar o apostolija reagujinđe: „Ked odova šunđe okola deš đene, holjanđe upro odola duj phralja“ (Mat. 20:24). Šaj samo te zamislina sar o Jakov hem o Jovan svađinđe pe akale deše apostolencar. So o Isus tegani ćerđa? Ov na holjanđa. Na phenđa so ka rodel avere apostolen, kola tane pobuter ponizna hem kola uvek ka mothoven mangipe maškaro peste. Umesto odova, o Isus strpljivo vaćerđa olencar (Mat. 20:25-28). O Isus hem ponodri hine šukar premalo lende (w23.03 28-29 ¶10-13).

Šaj nekobor berš proučinđan i Biblija. Đi proučinđan, uverinđan tut soj tani oj e Devleso Lafi. Počminđan te upoznajine e Jehova hem te mange le. To mangipe premalo Jehova odobor barilo, so odlučinđan te predajine to životi olese hem te krstine tut. Ćaće, đi akana ćerđan but šukar buća. Angleder te krstine tut, sigurno hine tut disave kušnje sebepi kola hine tuće pharo te aćhove verno e Jehovase. Ama, sar đala o vreme, ka ovel tut avera kušnje. O Satana ka trudini pe ko sa o načinija te ćhinavi tut te mange e Jehova hem te služine lese (Ef. 4:14). Ama, tu ma mukh le te ćerel odova. So šaj te pomožini tuće te aćhove verno e Jehovase? Valjani te de sa tutar te ove zrelo hrišćanin (Jevr. 6:1; w22.08 2 ¶1-2).

Sare valjani te pazinen save buća andi pi porodica ka vaćeren averenđe, a save na. Na primer, zamislin so jekh romni isi la disavi navika koja olake romese tani hari smešno. Da li ov ka vaćeri averenđe odolestar hem ađahar te marel laće muj? Sigurno na! Ov mangela pe romnja hem niked ne bi ćerela diso sovaja bi povredini la (Ef. 5:33). O tinejdžerija isi len potreba avera te poštujinen len. O roditeljija na valjani te bistren odova. Odolese on na valjani anglo avera te vaćeren olenge greške, sose ađahar šaj te ponizinen len (Kol. 3:21). O ćhave valjani te pazinen te na vaćeren averenđe diso so šaj te povredini nekas andi olengi porodica. Ked svako pazini te na vaćeri o privatna buća andi pi porodica, tegani sare ka oven popaše jekh jekheja (w22.09 10 ¶9).

Đi vaćerđa e Joveja, o Jehova setinćerđa le kobor tano mudro hem so brinini pe ando odova so stvorinđa. Ov vaćerđa lese ando disave životinje (Jov 38:1, 2; 39:9, 13, 19, 27; 40:15; 41:1, 2). Isto ađahar, o Jehova prekalo jekh terno manuš kova vićinđa pe Elijuj ohrabrinđa hem utešinđa e Jove. O Elijuj uverinđa e Jove so o Jehova uvek nagradini pe verno slugen odolese soj tane istrajna. Ama, o Jehova prekalo Elijuj dinđa e Jovese hem disave savetija. O Elijuj pomožinđa e Jovese ađahar so setinćerđa le kobor amen hijam tikne ked uporedinaja amen e Jehovaja kova tano Stvoritelj hem kova ćerđa o nebo hem i phuv. Isto ađahar, o Jehova phenđa e Jovese so valjani te molini pe aso odola trin manuša kola grešinđe (Jov 42:8-10). Sar o Jehova amenđe avdije pomožini te istrajina ked isi amen pharipa? Avdije, o Jehova na vaćeri amencar sar e Joveja, ama vaćeri amencar prekalo po Lafi, i Biblija (Rimlj. 15:4; w22.08 11 ¶10-11).

Ki skupština ko Rim hine hrišćanija kola hine len jevrejsko poreklo, ama hine hem okola kola na hine len. Tegani, e Mojsijeso zakon više na važinđa. E Jehovase sluge više na valjanđe te pazinen savi hrana ka han (Mar. 7:19). Odolese disave hrišćanija kola hine len jevrejsko poreklo mislinđe so šaj te han svako vrsta andi hrana. Ama, avera hrišćanija na mislinđe ađahar. Sebepi odova, ki skupština hine podele. O apostol Pavle istakninđa kobor tano važno te ovel len mir maškaro peste. O Pavle pomožinđa e phralenđe hem e phenjenđe te dikhen kobor bari šteta odova šaj te anel olenđe, ama hem celona skupštinaće (Rimlj. 14:19, 20). Isto ađahar, ov čak hine spremno te ćerel disave promene koro peste te na bi spotaknini averen (1. Kor. 9:19-22). Ako mangaja te ovel amen mir maškaro amende, na valjani te raspravina amen ando lična stavija (w22.08 22 ¶7).

Ako mangaja te ispunina disavo cilj, amen mora te trudina amen. Isto ađahar, ako mangaja te đa pali pravednost tegani valjani te trudina amen te ćera odova. O Jehova tano strpljivo amencar đi pomožini amenđe te napredujina hem hari pohari amen ka ova sa pošukar (Ps. 84:5, 7). Ov phenela amenđe so nane pharo te ićera amen ko olese pravedna merilija (1. Jov. 5:3). Odolese so odova tano amare šukaripase hem zaštitini amen. Setin tut so o Pavle phenđa andi duhovno ratno oprema (Ef. 6:14-18). Kova deo andi oprema zaštitinđa e vojnikoso vilo? Odova hine o oklop. Ki amari duhovno oprema „o oklop andi pravednost“ predstavini e Jehovase pravedna merilija. Sar so o oklop zaštitini o doslovno vilo, ađahar hem e Jehovase pravedna merilija šaj te zaštitinen amaro simbolično vilo. Odolese, but tano važno te akhara i duhovno oprema, a posebno o oklop andi pravednost (Posl. 4:23; w22.08 29 ¶13-14).

E Devleso Lafi beršencar pomožinđa bute manušenđe. Sar? Amen đanaja so o materijalija ko kola hine pisime o sveta spisija propadinđe. Odolese, avdije nane amen nijekh originalno dokumenti ando odova vreme. Ama, o Jehova pobrininđa pe o manuša te prepisinen oleso Lafi. Iako o manuša kola ćerđe odova hine nesavršena, on ipak trudinđe pe pažljivo te prepisinen odova tekst. Na primer, jekh izučavalac aso hebrejska spisija phenđa: „Nijekh dokumenti nane odobor tačno prepisimo sar soj tano o deo ando Hebrejska spisija.“ Odolese, amen šaj te ova sigurna so odova so avdije čitinaja ki Biblija tane e Jehovase mislija. Ando Jehova avela „svako šukar hem savršeno poklon“ (Jak. 1:17). I Biblija tani jekh ando najšukar poklonija kova o Jehova dinđa amen. Ked jekh osoba dela amen jekh poklon, odova poklon mothovi amenđe kobor oj penđari amen hem đanela so valjani amenđe. O Jehova dinđa amen i Biblija sar poklon. Ked razmislinaja ando odova poklon, amen šaj te dikha kobor o Jehova penđari amen hem đanela so valjani amenđe (w23.02 2-3 ¶3-4).

Zamislin kobor ka ovel radosno odova dive ked o manuša kola mulje ka počminen te uskrsninen ki phuv đi ka trajini e Isusesi hiljadaberšengi vladavina. O Jehova jedva ađićeri odova dive. Tegani sare ka oven but bahtale sose ka dikhen pe manglen kola mulje (Jov 14:15). O „pravedna“ manuša kase anava tane pisime ki knjiga ando životi, ka ušten ko „uskrsenje ando životi“ (Dela 24:15; Jov. 5:29). Amare manglje kola mulje verovatno ka oven uskrsnime sigate palo Armagedon. A o „nepravedna“ manuša kola na hine len prilika te penđaren e Jehova hem te služinen lese angleder so mulje, on ka ušten ko „uskrsenje ando suđenje.“ Sare kola ka uskrsninen ka valjani diso te sikljon (Is. 26:9; 61:11). Sebepi odova, ka ovel jekh baro obrazovno program ki phuv (Is. 11:10; w22.09 20 ¶1-2).

O Jehova mothovđa pi moć upri jekh bari grupa ando vladarija. Ov borinđa pe e Izraelcenđe hem pomožinđa lenđe te pobedinen 31 kralje andi phuv Hanan hem te osvojinen jekh pobaro deo andi Obećimi phuv (Is. Nav. 11:4-6, 20; 12:1, 7, 24). O Jehova uvek mothovđa soj tano Najbaro. Umesto te hvalini e Devle, o vavilonsko kralj, o Navuhodonosor, hvalinđa pe kobor tano moćno hem zoralo. Odolese, o Jehova ćerđa te ikljol andi godi. Ama ked saćilo, ov hvalinđa e „Najbare“ Devle hem phenđa so „olesi vlast tani večno hem so ov zauvek ka vladini.“ Isto ađahar, phenđa so „nane niko ko šaj te ćhinavi le“ (Dan. 4:30, 33-35). O psalmista phenđa: „Bahtalo tano o narodo kaso Devel tano o Jehova, o narodo kole ov birinđa te pripadini samo olese“ (Ps. 33:12). Akava tano but šukar razlog sose valjani te aćhova verna e Jehovase! (w22.10 15-16 ¶13-15).

But proročanstvija kola već ispuninđe pe, zorjaćerena amari vera ko odova so o Jehova ka ćerel sa odova so phenđa asi budućnost. Amen osetinaja amen sar o psalmista kova ki molitva e Jehovase phenđa: „Jedva ađićerava o spasenje kova tu deja, sose uzdajinava man ko to lafi“ (Ps. 119:81). Ki Biblija pisini so o Jehova phenđa so ka del amen „šuži budućnost hem nada“ (Jer. 29:11). Amari nada na zavisini ando odova so o manuš ka ćerel, već ando Jehovase obećanja. Odolese, sare valjani te zorjaćera amari vera ađahar so šukar ka proučina e biblijake proročanstvija. Jekh aver dokaz sose šaj te verujina so i Biblija avela ando Devel tano ked dikhaja sar olake savetija utičinena upro manuša (Ps. 119:66, 138). Na primer, disave bračna parija kola manglje te razvodinen pe akana tane bahtale sose primeninđe o savetija ando Devleso Lafi. Olenge ćhave akana tane bahtale sose uzo lende tane olenge roditeljija kola brininena pe olendar hem but mangena len (Ef. 5:22-29; w23.01 5 ¶12-13).

Razmislin odolestar so o Jehova ćerđa tuće. Da li šaj te setine tut sar o Jehova đi akana pomožinđa tuće? Na primer, o Isus phenđa so oleso Dad ka del amen sa so valjani amenđe aso životi (Mat. 6:32, 33). Isto ađahar, phenđa so o Jehova ka del amen po sveti duh ked ka molina amen aso odova (Luka 11:13). Verovatno đi akana o Jehova već dinđa amen akala buća. Ama, šaj akana ki godi avena tuće pana disave obećanja kola o Jehova ispuninđa. Na primer, ov obećinđa so ka oprostini te grehija, so ka utešini tut hem so ka del tut sa so valjani te šaj te ove paše oleja (Mat. 6:14; 24:45; 2. Kor. 1:3). Ked razmislinaja ando odova sar o Devel pomožinđa amenđe, odova šaj te zorjaćeri amari nada so ka ispunini sa odova so phenđa asi budućnost. Amen hijam sigurna so o Jehova ka ispunini sa so obećinđa. Sar so o psalmista pisinđa: „Bahtalo tano o manuš. . . kasi nada tani ko Jehova. . . o Devel kova tano uvek verno“ (Ps. 146:5, 6; w22.10 27 ¶15; 28 ¶17).

Da li akava proročanstvo so o manuša palem ka služinen e Jehovase ko ispravno način primenini pe hem upro amende? Ja. Sar? Ando 1919. berš ki n. e., milionija manuša više nane ko ropstvo ando Baro Vavilon, kova tano o svetsko carstvo andi hovavni religija. On hine legarde ko jekh pošukar than andi Obećimi phuv. On hine legarde ko duhovno raj (Is. 51:3; 66:8). Ando 1919. berš ki n. e., o pomazanikija živinena ko duhovno raj. Sar nakhlja o vreme hem okola so isi len nada so ka živinen ki phuv, o „avera bakre“, isto tane ko duhovno raj hem o Jehova blagoslovini len (Jov. 10:16; Is. 25:6; 65:13). Avdije, e Jehovaso narodo živini ki celo phuv. Odolese, o duhovno raj tano ki celo phuv. Bizo obzir kaj živinaja, amen šaj te ova deo ando duhovno raj ako ko ispravno način služinaja e ćaćutne Devlese, e Jehovase (w22.11 11-12 ¶12-15).

Da li tano tuće pharo te haljove so o Jehova „večno“ postojini? (Is. 40:28). Butenđe tano odova pharo te haljon. O Elijuj ando Devel phenđa: „O broj ando olese berša amen našti te đena“ (Jov 36:26). Ako amen našti te haljova diso, odova na značini so odova nane tačno. Na primer, šaj našti te haljova sar ćerela buti jekh sijalica, ama odova na značini so oj na postojini. Isto ađahar, amen o manuša našti potpuno te haljova odova so o Jehova oduvek postojinđa hem so uvek ka postojini. Ama, odova so amen diso našti te haljova na značini so o Jehova našti te ćerel odova (Rimlj. 11:33-36). Ov hine angleder so o svemir postojinđa hem angleder te oven bilo save buća ko svemir, sar soj tane o kham hem o ćerenja. Amen hijam sigurna so o Jehova „pe silaja ćerđa i phuv“ hem so ov postojinđa angleder so „phravđa o nebo“ (Jer. 51:15; w22.12 2-3 ¶3-4).

Disavo puti, amen ka valjani te molina amen anglo avera. Na primer, jekh phen koja vićinđa avera phenja te ovel olaja ko kurs, šaj te pućel la te molini pe. Ama, odija phen šaj na đanela but odola osoba hem šaj ka mangel te molini pe ko kraj. Sose? Odolese so tegani ka đanel aso so te molini pe. Jekh phral šaj te ovel zamolimo te molini pe ko sastanko asi služba ja ko disavo aver skupštinsko sastanko. O phralja kola isi len akava zadatko na valjani te bistren aso so tano o sastanko. Tegani ki molitva on na valjani te den savetija, te sikaven ili te den disavo obaveštenje. Aso but skupštinska sastankija panđe minutenđe valjani hem te molina amen hem te đilaba i đili. Odolese, o phral kova molini pe na valjani te koristini „but lafija“, posebno ako valjani te molini pe ko početko ando sastanko (Mat. 6:7; w22.07 24 ¶17-18).

O Isus phenđa so ko poslednja dive ka oven zarazna nabormipa ko „razna thana“ (Luka 21:11). Sar odova so đanaja akava šaj te anel amenđe mir? Amen na hijam iznenadime ked negde ovela disavi epidemija. Haljovaja so ispunini pe odova so o Isus phenđa. Odolese ićeraja amen ko Isuseso savet kova dinđa okolenđe kola živinena ko poslednja dive: „Pazinen te na daran“. Ked ovela disavi epidemija, našti uvek te ćera sa so angleder ćerđam. Ama, ma dozvolin sebepi odova te na ovel tut to lično proučibe ja te na đa ko sastankija. O iskustvija ko amare publikacije ja videa mothovena amenđe kobor amare phralja hem phenja trudinena pe verno te služinen e Jehovase, iako isi len bare problemija (w22.12 17 ¶4, 6).

O Jakov but manglja pe najtikne ćhave, e Josife (Post. 37:3, 4). Odolese, e Josifese phralja hine ljubomorna upro leste. Jekh dive, on bikinđe le disave manušenđe ando Madijan. Odola manuša legarđe e Josife but dur, ko Egipat. Ked reslje othe, on bikinđe le e Petefrijese kova hine e faraoneso dvoranin. Šaj samo te zamislina kobor meninđa pe e Josifeso životi. Ko jekh trenutko, ov hine pe dadeso najmanglo ćhavo, a ko aver hine robo ko Egipat (Post. 39:1). Amen šaj te oven amen pharipa kola isi len hem avera manuša (1. Kor. 10:13). Ja šaj te oven amen problemija odolese so hijam e Isusese učenikija. Na primer, neko šaj te marel amenđe muj, te protivini pe amenđe ja šaj čak te ova progonime sebepi amari vera (2. Tim. 3:12). Ama, ko sa odola pharipa, o Jehova šaj te pomožini amenđe te ova uspešna (w23.01 14-15 ¶3-4).

Ko disave situacije šaj mislinaja so valjani te vaćera okoleja kova povredinđa amen. Tegani, valjani te puća amen: „Da li šukar haljiljum so ulo? (Posl. 18:13). Da li šaj nenamerno povredinđa man? (Prop. 7:20). Da li me nekad ćerđum slično greška? (Prop. 7:21, 22). Ako ka vaćerav oleja, da li o problemi ka ovel pana pobaro?“ Ked razmislinaja ando akala pućiba, o mangipe šaj te podstaknini amen te na razmislina odolestar so hine. Svako amendar mothovi soj tano e Isuseso učeniko ađahar so mangela pe phralen, iako dikhela olenge greške. Ked mothovaja mangipe, avera šaj te haljon so amari religija tani pravo hem te počminen te služinen e Jehovase. Odolese, hajde te da sa amendar te mothova mangipe sose premalo odova penđarena pe o prava hrišćanija (w23.03 31 ¶18-19).

Ked čitinaja i Biblija, amen haljovaja so e Jehovasi najbari osobina tani o mangipe. Odolese so mangela amen, ov ko po Lafi na vaćerđa amenđe o informacije kola nane amenđe potrebna te šaj te služina lese (Jov. 21:25). E Jehovaso mangipe dikhaja hem ko odova so ov mothovi amenđe poštovanje đi vaćeri amencar. Ki Biblija, o Jehova na dinđa jekh spisko kaj pisini so šaj, a so našti te ćera ki svako situacija. Umesto odova, prekalo biblijake primerija, proročanstvija hem savetija, ov pomožini amen te ana šukar odluke. Odolese, amen but mangaja le hem šunaja le. I Biblija mothovi so o Jehova but brinini pe amendar. Sar odova? Ko Devleso Lafi isi but izveštaija kola mothovena sar disave manuša osetinđe pe ki disavi situacija. Amen šaj te haljova len odolese so on hine obična manuša sar amen (Jak. 5:17). Soj tano najvažno, ked dikhaja sar o Jehova pomožinđa lenđe, amen haljovaja kobor tano ov samilosno hem milosrdno (Jak. 5:11; w23.02 6 ¶13-15).

I zadnjo knjiga ki Biblija počmini e lafencar: „O Otkrivenje ando Isus Hrist, kova dinđa le o Devel, te mothovi pe robonenđe odova so pana hari ka desini pe“ (Otkr. 1:1). Odolese, amen mangaja te đana so desini pe ko sveto hem te dikha sar ispuninena pe e biblijake proročanstvija. Isto ađahar, šaj jedva ađićeraja te vaćera e phralencar odolestar. Amen valjani te vaćera ando biblijake proročanstvija, ama na valjani te pretpostavina so on značinena. Sose? Odolese so na mangaja te vaćera diso so ka rumini o jekhipe ki skupština. Na primer, amen šaj te šuna sar o politička vođe vaćerena so on šaj te rešinen o problemija hem te anen mir hem sigurnost ko sveto. Amen na valjani te pretpostavina so odoleja ispunini pe o proročanstvo andi 1. Solunjanima 5:3. Umesto odova, valjani te dikha so ko amare najneve publikacije pisini ando odova. Ked amare razgovorija temeljinena pe ko najneve informacije kola avena andi amari organizacija, amen ka ćera ki skupština „te ovel jekhipe hem sare te razmislinen ko isto način“ (1. Kor. 1:10; 4:6; w23.02 16 ¶4-5).

Sose mangaja e Isuse? O Isus manglja o ćaćipe, i pravednost hem i poniznost. Amen isto mangaja odola osobine, odolese mangaja hem e Isuse. Razmislin kobor o Isus hine hrabro ked braninđa o ćaćipe (Jov. 18:37). Ama, sar o Isus sikavđa amen te ova ponizna? O Isus sikavđa amen te ova ponizna pe primereja. Na primer, ov niked na lelja i slava pese nego uvek dinđa la e Jehovase (Mar. 10:17, 18; Jov. 5:19). Sar odova utičini upro tute? Odova sigurno podstaknini tut te mange e Devlese Ćhave hem te đa palo oleso primer. Sose tano o Isus ponizno? Odolese so mangela hem oponašini pe Dade kova tano ponizno (Ps. 18:35; Jevr. 1:3). O Isus savršeno mothovi e Jehovase osobine hem odolese amen but mangaja le (w23.03 3-4 ¶6-7).

I Biblija vaćeri kotar duj grupe ando manuša kola ka uskrsninen hem kola ka ovel len prilika zauvek te živinen ki phuv. Odola tane o „pravednikija“ hem o „nepravednikija.“ O „pravednikija“ tane okola kola verno služinđe e Jehovase đi hine đivde. A o „nepravednikija“ tane okola kola na služinđe e Jehovase angleder te meren. Sebepi so solduj grupe ka uskrsninen, da li šaj te phena so olenge anava tane pisime ki knjiga ando životi? Angleder te meren, o anava ando „pravednikija“ tane pisime ki knjiga ando životi. Ama, da li olenge anava kosena pe andi odija knjiga ked merena? Na, sebepi soj tane on pana „đivde“ ko Jehovaso sećanje. O Jehova „nane Devel ando mule, nego ando đivde, sose olese tane on sare đivde“ (Luka 20:38). Odova značini so ked on ka uskrsninen ki phuv, olenge anava tane pisime ki knjiga ando životi. Ama, ki početka, olenge anava tane pisime obično „olovkaja“ (Luka 14:14; w22.09 16 ¶9-10).

O Jehova manglja o prva manuša te uživinen ko odova so ov stvorinđa. Ked ćerđa e Adame, ov ćhivđa le te živini ko raj hem phenđa lese te brinini pe olestar (Post. 2:8, 9). Zamislin sar o Adam osetinđa pe đi dikhlja sar cvetonena o luluđa. Savi bari čast hine le te brinini pe ando edensko vrt! O Jehova phenđa lese te del anava e životinjenđe (Post. 2:19, 20). Iako šaj hine kokri te ćerel odova, ov ipak odova zadatko dinđa e Adamese. Angleder te ćerel odova, o Adam šukar posmatrinđa sar o životinje izgledinena hem so ćerena. Sigurno uživinđa đi ćerđa odova. Sa akava pomožinđa lese te haljol kobor tano o Jehova mudro hem kobor tane zanimljiva hem šuže o buća kola ov stvorinđa (w23.03 15 ¶3).

I angloameričko svetsko sila predstavini o stopala ando kip, odolese oj tani i poslednjo svetsko sila koja tani proreknimi ki Biblija (Dan. 2:31-33). Palo late više na ka ovel aver sila. Ked ka avel o Armagedon, e Devleso Kraljevstvo ka uništini hem ola hem sa avera manušikane vladavine (Otkr. 16:13, 14, 16; 19:19, 20). Sar šaj te pomožini amen akava proročanstvo? Ko Daniloso proročanstvo isi pana disave dokazija kola mothovena so živinaja ko vreme ando krajo. Pobuter ando 2 500 berš angleder, o Danilo prorekninđa so palo Vavilon ka aven pana štar svetska sile kola posebno ka utičinen upro Devleso narodo. Uzo odova, ov phenđa so i Anglo-Amerika ka ovel i poslednjo svetsko sila. Odova šaj but te utešini amen hem te del amen nada so e Devleso Kraljevstvo pana hari ka uništini sa o manušikane vladavine hem ka vladini upri celo phuv (w22.07 4 ¶9; 5 ¶11-12).