Jun

O Jov hine paše e Jehovaja. Hine le bari hem bahtali porodica. Isto ađahar, hine barvalo manuš (Jov 1:1-5). Ama, jekhe divese sa našalđa. Najangleder našalđa po barvalipe (Jov 1:13-17). Palo odova, sa olese ćhave mulje. Odolese, nane čudno so o Jov pharavđa pe šeja upro peste hem bešlja ko praho (Jov 1:18-20). Palo odova, o Beng ćerđa o Jov te ovel le but baro nabormipe (Jov 2:6-8). Angleder, o Jov hine but poštujimo maškaro narodo. Čak o manuša avena hine koro leste te roden savet (Jov 31:18). Ama, akana niko više na poštujinđa le. Sare cidinđe pe olestar, olese phralja, olesi familija, pa čak hem olese sluge (Jov 19:13, 14, 16; w22.06 21 ¶5-6).

Palo krštenje, sare amen valjani te ićera amen ko savet kova o apostol Pavle dinđa e hrišćanenđe ko Efes. Ov podstakninđa len te oven zrela hrišćanija (Ef. 4:13). Odova značinđa so valjanđe te napredujinen. Tu već akana but mangeja e Jehova. Ama, to mangipe šaj te ovel pana pobaro. Sar? Ko Filipljanima 1:9 o apostol Pavle pominđa jekh način sar šaj te ćere odova. Ov molinđa pe odole phralengo „mangipe te ovel sa pobaro hem pobaro.“ Sar šaj amaro mangipe te ovel pana pobaro? Valjani te trudina amen „pana pošukar te penđara e Devlesi volja hem te ovel amen pana pobari razboritost.“ So pobuter penđaraja e Jehova, pana pobuter mangaja le, ceninaja olese osobine hem odova so ćerela. Tegani, amari želja te radujina e Jehovaso vilo ovela sa pobari hem niked na mangaja te razočarina le. Amen daja sa amender te haljova so o Jehova rodela amendar hem trudinaja amen te ćera odova (w22.08 2-3 ¶3-4).

Odova so pisini ki knjiga Otkrivenje nane sa e manušenđe, već samo e Devlese slugenđe. Odolese hem amen učestvujinaja ko odova te ispuninen pe o proročanstvija andi odija knjiga. O apostol Jovan phenđa ked odola proročanstvija ka ispuninen pe. Ov phenđa: „Legardo sveto duhoja aljum ko Gospodeso dive“ (Otkr. 1:10). O Jovan akala lafija pisinđa ko 96. berš hem tegani „e Gospodeso dive“ hine but dur (Mat. 25:14, 19; Luka 19:12). Ama, premalo jekh biblijako proročanstvo, akava dive počminđa ko 1914. berš. Tegani, o Isus počminđa te vladini sar Kralj ko nebo. Kotar odova berš, o proročanstvija ando Otkrivenje, kola odnosinena pe upro Devleso narodo, počminđe te ispuninen pe. Akava mothovi so avdije živinaja „ko Gospodeso dive“ (Otkr. 1:3; w22.05 2 ¶2-3).

Đi tane pana đivde, o solduj hem i zver hem o hovavno prorok hine fordime ko jezero andi jag ko kova thabljola o sumpor. Znači, đi pana tane ki vlast, odola e Devlese dušmanija ka oven zauvek uništime. So akava značini amenđe? Sar hrišćanija, amen valjani te ova verna e Devlese hem aso oleso Kraljevstvo (Jov. 18:36). Amen valjani te aćhova neutralna hem te na mešina amen ki politika. Odova šaj te ovel but pharo, odolese so o svetska vlastija rodena amendar te podržina len hem ko lafija hem ko delija. Okola kola podržinena len priminena o žig andi zver (Otkr. 13:16, 17). Ako neko primini akava žig o Jehova na ka prihvatini le hem na ka dobini o večno životi (Otkr. 14:9, 10; 20:4). Odolese tano but važno te aćhova neutralna, iako o vlastija ćhivena amen te podržina len! (w22.05 10-11 ¶12-13).

Jekh cilj kova šaj te ovel tut tano te sikljove disave neve veštine. Ako ćeraja ko amare veštine, odova ka pomožini amen te ćera pana pobuter ki Jehovasi organizacija. Razmislin samo kobor manuša valjani te šaj te ćeren pe Betelija, kongresna dvorane ja amare dvorane. But phralja hem phenja sikljilje te ćeren disave buća kotar iskusna phralja hem phenja. Avdije, hem o phralja hem o phenja šaj te sikljon te ćeren disave buća ki dvorana ja ki kongresno dvorana. Ađahar, o Jehova „o Kralj andi večnost“ hem o Isus Hrist „o Kralj upro kraljija“, prekalo akala sposobna phralja hem phenja ćerena but šuže buća (1. Tim. 1:17; 6:15). Amen mangaja te ova bućarne hem te koristina amare sposobnostija te slavina e Jehova, a na te vazda kokri amen (Jov. 8:54; w22.04 24 ¶7; 25 ¶11).

O Solomon hine but barvalo hem hine le but šužo ćher (1. Kralj. 10:7, 14, 15). Ki aver strana, o Isus na hine le ni po šero kaj te ćhivel (Mat. 8:20). Ama, o solduj hine len ispravno stav premalo materijalna buća odolese so o Jehova dinđa len mudrost. O Solomon phenđa so parencar šaj te ćina odova so valjani amenđe, ama hem odova so mangaja. Kobor god hine barvalo, o Solomon haljilo so o pare nane najvažna. Odolese phenđa: „Pošukar tano te birini pe šukar anav, nego baro barvalipe“ (Posl. 22:1). O Solomon dikhlja so o manuša kola but mangena o pare, but putija nane zadovoljna odoleja so isi len (Prop. 5:10, 12). Ov phenđa so amaro bahtalipe na valjani te zavisini ando odova da li isi amen pare, sose o pare sigate đana (Posl. 23:4, 5; w22.05 21 ¶4-5).

Ked razmislinaja ando blagoslovija kola isi amen akana, odova zorjaćeri amaro amalipe e Jehovaja. A ked razmislinaja ando blagoslovija kola o Jehova ka del amen ki budućnost, odova zorjaćeri amari nada. Sa akava pomožini amen te ova pana poradosna đi služinaja e Jehovase. O Jehova „ka mothovi amenđe milost“ ked ka uništini akava lošno sveto. Amen đanaja soj tano o Jehova pravedno Devel hem ov na ka mukhel e Satanaso sveto te postojini ni jekh dive pobuter nego so valjani (Is. 25:9). Amen hijam strpljiva đi ađićeraja o Jehova te oslobodini amen ando akava lošno sveto. Đi odova na avela, hem ponodri ceninaja odova so šaj te molina amen olese hem te proučina oleso Lafi. Isto ađahar, daja sa amendar te primenina odova so sikljovaja hem te razmislina ando blagoslovija kola isi amen. Ked ćeraja odova, o Jehova ka pomožini amenđe te istrajina ko pharipe hem te služina lese radosno (w22.11 13 ¶18-19).

Iako i Biblija na vaćeri sar hine e Timotejeso krštenje, nane amenđe pharo te zamislina kobor olesi daj hine bahtali odova dive (Posl. 23:25). Iako na hine laće lokho, oj sikavđa pe ćhave te mangel e Jehova hem e Isuse. E Timotejese roditeljija na hine ki isto religija. Oleso dad hine Grko, a olesi daj hem olesi baba hine Jevrejke (Dela 16:1). O Timotej verovatno hine tinejdžer ked olesi daj hem olesi baba ulje hrišćanke. Ama, oleso dad na ulo hrišćanin. Kole drumoja ka đal o Timotej? Avdije, o daja kola služinena e Jehovase mangena pe porodica. Olenđe tano najvažno te pomožinen pe ćhavenđe te oven e Jehovase amala. Amaro Devel but cenini odova so on ćerena (Posl. 1:8, 9). O Jehova pomožinđa bute dajenđe te sikaven pe ćhaven te mangen le hem te služinen olese (w22.04 16 ¶1-3).

Pana hari, o Jehova ka ćhivel o politčka sile „te ćeren olesi zamisao“. So ka ovel sebepi odova? Odola politička sile, o „deš kraljija“, ka napadinen i hovavni religija hem ka uništinen la (Otkr. 17:1, 2, 12, 16). Sar đanaja soj tano paše o kraj ando Baro Vavilon? Te šaj te dobina odgovor ko odova pućibe, šukar tano te razmislina andi purani diz Vavilon. O panja andi bari reka Eufrat zaštitinđe jekh deo andi odija diz. Ko Otkrivenje pisini so o manuša kola podupirinena i hovavni religija tane uporedime „panjencar“ (Otkr. 17:15). Ama, ko Otkrivenje isto pisini so odola panja ka „šućon“. Odova značini so o manuša kola podupirinena i hovavni religija ka ciden pe olatar (Otkr. 16:12). Avdije ispunini pe akava proročanstvo, sose dikhaja so but manuša cidena pe andi hovavni religija hem rodena rešenje aso pe problemija ko aver than (w22.07 5-6 ¶14-15).

Ked oprostinaja, amen mothovaja so hijam zahvalna e Jehovase aso oleso milosrđe. Ko jekh poređenje, o Isus uporedinđa e Jehova jekhe gospodareja kova oprostinđa pe robose jekh baro dugo kova naštinđa te irini. Ama, odova isto robo na manglja te oprostini jekhe avere robose jekh but potikno dugo (Mat. 18:23-35). So o Isus manglja te phenel akaleja? Ako ćaće hijam zahvalna e Jehovase aso milosrđe kova mothovđa amenđe, odova ka podstaknini amen te oprostina averenđe (Ps. 103:9). Angleder nekobor berš, ki jekh Stražarsko kula pisinđa: „Iako šaj ka valjani but putija te oprostina averenđe, amen niked na ka oprostina odobor kobor o Jehova oprostinđa amenđe prekali Isusesi otkupno žrtva.“ Ked oprostinaja averenđe, o Jehova ka oprostini amenđe. O Jehova tano milosrdno premalo okola kola tane milosrdna (Mat. 5:7). O Isus phenđa odova ked sikavđa pe učenikonen sar te molinen pe (Mat. 6:14, 15; w22.06 10 ¶8-9).

Ked o Isus hine ki phuv, ov savršeno oponašinđa pe Dade (Jov. 14:9). Odolese, ked sikljovaja ando Isus amen šaj pana pošukar te penđara e Jehova hem te manga le. Isto ađahar, šaj but te pomožini amen odova so o Isus sikavi hem sar vodini i skupština. Uzo odova, ov sikavđa amen so valjani te ćera te šaj o Jehova te ovel zadovoljno amencar. Sarinenđe pomožini odova so o Isus dinđa po životi. Palo odova so o Isus uskrsninđa hem đelo ko nebo, o Jehova prihvatinđa oleso rat sar savršeno žrtva kova „čistini amen ando svako greh“ (1. Jov. 1:7). Ov tano akana moćno, besmrtno Kralj. Pana hari ka zdrobini e sapeso šero (Post. 3:15). E Devlese sluge tane but bahtale so o Beng ka ovel uništimo. Ama, đi na avela odova vreme, valjani te ova zorale hem te ovel amen poverenje upro Jehova. Ov ka anel bare blagoslovija aso „sa o narodija ki phuv“ (w22.07 18 ¶13; 19 ¶19).

Ked ćhivaja amenđe ciljija važno tano te ova razumna. Sose? Odolese so na đanaja so ka ovel tajsa. Aće jekh primer. O apostol Pavle pomožinđa te osnujini pe i skupština ko Solun. Ama, sebepi o protivnikija morandilo te mukhel odija diz (Dela 17:1-5, 10). Te aćhol hine odothe, ov bi ćhivela e phralen ki opasnost. Ama, odova na ćhinavđa le te pomožini len. Ov hine razumno manuš hem dikhlja so šaj te ćerel. O Pavle bićhalđa e Timoteje te zorjaćeri odole phralen (1. Sol. 3:1, 2). Kobor hine bahtale o phralja hem o phenja ko Solun. But šaj te sikljova odolestar so o Pavle nakhlja ko Solun. Šaj ćhivđam amenđe disavo cilj, ama šaj amare okolnostija meninđe pe hem akana našti te ispunina le (Prop. 9:11). Ako odova hem tuće desinđa pe, ov spremno te ćhive tuće disavo aver cilj kova šaj te ispunine (w22.04 25-26 ¶14-15).

O Jehova utešini amen hem dela amen nada asi budućnost. Te dikha samo nekobor stihija kola šaj te ohrabrinen amen ked isi amen pharipa. Ko po Lafi, o Jehova uverini amen so ništa „našti te ulavi amen“ ando oleso mangipe (Rimlj. 8:38, 39). Isto ađahar, uverini amen soj „tano paše uzo sa okola so rodena le“ (Ps. 145:18). O Jehova phenela amenđe so ako ka oslonina amen upro leste, šaj te istrajina ko bilo kova pharipe hem čak te aćhova bahtale (1. Kor. 10:13; Jak. 1:2). E Devleso Lafi phenela amenđe soj tane amare pharipa samo privremena ked uporedinaja len odoleja kobor bare blagoslovija ka oven amen ki budućnost (2. Kor. 4:16-18). O Jehova obećini amenđe so ka uništini e Benge, kastar avena sa o problemija hem sa okolen kola đana palo leste (Ps. 37:10). Da li đaneja disave stihija kola šaj te utešinen tut ked ka oven tut pharipa? (w22.08 11 ¶11).

Sare amen mangaja te ićera amen ko Jehovase pravedna merilija. Ama, disavo puti pućaja amen: „Da li šaj uvek te ćera odova?“ Te dikha jekh primer kova o Jehova koristini ko Isaija 48:18. Odothe o Jehova dela po lafi so amari pravednost ka ovel „sar o morska talasija.“ Zamislin sar terđoveja ki jekh obala hem dikheja sar o talasija đana jekh palo jekh. Da li bi pućeja tut, da li odola talasija jekh dive ka terđon? Sigurno na! Tu đaneja so o talasija ki odija plaža postojinena već hiljada berša hem đaneja so on niked na ka terđon. Ti pravednost šaj te ovel sar o morska talasija. Sar odova? Ked valjani te ane disavi odluka, najangleder razmislin so bi o Jehova mangela te ćere. Palo odova, ćer odova so odlučinđan. Kobor god te ovel phari odija odluka, to Dad o Jehova uvek ka del tut snaga hem uvek ka pomožini tuće te živine premalo olese pravedna merilija (Is. 40:29-31; w22.08 30 ¶15-17).

Ked ka nakhen odola 1 000 berš, ov ka ovel oslobodimo hem ka mangel te ćhivel e manušen te đan ki olesi strana. Tegani, sa o savršena manuša kola ka živinen ki phuv ka ovel len prilika te mothoven da li poštujinena e Jehovaso anav hem da li priznajinena so ov jedino isi le pravo zauvek te vladini (Otkr. 20:8-10). Odova so tegani ka ćeren, ka utičini ko odova da li olenge anava ka oven zauvek pisime ki knjiga ando životi. I Biblija phenela so disave manuša ka oven sar o Adam hem i Eva, odolese so ka odbacinen e Jehova sar pe vladare. So ka ovel olencar? Ko Otkrivenje 20:15 pisini: „Svako kaso anav na hine pisimo ki knjiga ando životi, hine fordimo ko jagako jezero.“ Okola so ka pobuninen pe, ka oven zauvek uništime. Ama, ked ka ovel i završno kušnja, but manuša ka aćhon verna e Jehovase (w22.09 23-24 ¶15-16).

Ki skupština ko prvo veko, disave phenđe so o hrišćanija kola na hine len jevrejsko poreklo, valjani te obrezinen pe. On šaj odova phenđe te ne bi o Jevreja kritikujinena len (Gal. 6:12). O apostol Pavle na složinđa pe odoleja. Ama, umesto te iznesini samo po mišljenje, ov hine ponizno hem rodinđa savet ando apostolija hem starešine ando Jerusalim (Dela 15:2). Odolese so ađahar rešinđa akava problemi, ov pomožinđa e hrišćanenđe te ovel len mir hem radost ki skupština (Dela 15:30, 31). Podijekh puti, ki skupština šaj te ovel disavo ozbiljno problemi. Tegani amen šaj te ćera mir ađahar so ka roda savet okolendar kas o Jehova ćhivđa te brininen pe andi skupština. But putija, ko amare publikacije ja ko smernice kola dela amari organizacija šaj te arakha načelija sar te rešina disave problemija. Ako ićeraja amen ko odola načelija, a na insistirinaja ko amaro mišljenje, amen ka ćera te ovel mir ki skupština (w22.08 22 ¶8-9).

Podijekh puti, isi amen potreba te vaćera amare amalese sar osetinaja amen. Ama, nane uvek lokho te vaćera averenđe ando amare problemija. Odolese, ako kasnije šunaja so amaro amal vaćerđa averenđe odova so phenđam lese, odova šaj but te povredini amen. Ćaće hijam but bahtale ked isi amen „šukar amal“ kase šaj te vaćera amare problemija hem ked hijam sigurna so na ka vaćeri len averenđe. O starešine kola tane pouzdana tane „sar zaklon andi bavlal [hem] sar zaklon andi oluja“ (Is. 32:2). Amen šaj sa te vaćera e starešinenđe, odolese so đanaja so on na ka vaćeren odova averenđe. Isto ađahar, na mangaja te ćhiva len te vaćeren amenđe disave poverljiva informacije. Amen but ceninaja e starešinenge romnjen odolese so on na ćhivena pe romen te vaćeren lenđe disave poverljiva buća e phralendar hem e phenjendar. But tano šukar ked e starešinenge romnja na đanena o poverljiva buća ando phralja (w22.09 11 ¶10-11).

Amen šaj te ova sigurna so o Jehova ka spasini pe verno slugen ked ka avel i „bari nevolja“ (Mat. 24:21; Dan. 12:1). Odova ka ćerel ked i koalicija ando narodija ja o Gog ando Magog ka napadini olese narodo. Čak ako ki odija koalicija ka oven uključime sa o 193 članice ando Ujedinjena nacije, on na ka pobedinen e Najbare hem olese nebesko vojska. O Jehova dela po lafi: „Ka mothovav mi moć hem so hijum sveto Devel hem ka mothovav man anglo bute manušenge jaćha, hem tegani ka priznajinen so me hijum o Jehova“ (Jezek. 38:14-16, 23). Ked o Gog ando Magog ka napadini e Devlese narodo, odova ka legari đi o Armagedon kuri o Jehova ka uništini e „kraljen ando celo sveto“ (Otkr. 16:14, 16; 19:19-21). Tegani, „ov [ka] arakhi o životi ando okola kola tane olese verna“ hem samo on ka živinen ki phuv (Posl. 2:21; w22.10 16-17 ¶16-17).

Amen na valjani te mislina so đanaja sose amare phralja hem phenja diso ćerena, sebepi so samo o Jehova đanela soj tano ko olengo vilo hem samo ov šaj te ispitini olenge „motivija“ (Posl. 16:2). O Jehova mangela sa e manušen, bizo obzir ando kova than ili kultura avena. Ov phenela amenđe te ovel amen pana „pobuter mangipe“ premalo olende (2. Kor. 6:13). Amen valjani te manga amare phralen hem phenjen, a na te osudina len. Isto ađahar, amen na ka sudina ni e manušenđe kolenđe propovedinaja. Da li bi neko amendar nekase andi pi familija phenela: „Ov niked na ka ovel e Jehovaso svedoko“? Na, sose tegani bi mothovaja so hijam ponosna hem previše pravedna. O Jehova sa e manušenđe pana dela prilika te pokajijnen pe (Dela 17:30). Ma bistri so okola kola mislinena soj tane popravedna ando avera, anglo Jehovase jaćha tane nepravedna. Sare valjani te da sa amendar te ićera amen ko Jehovase pravedna merilija, odolese so ađahar ka pomožina averenđe te oven pana popaše amencar hem e Jehovaja (w22.08 31 ¶20-22).

Amen đanaja so ka ovel amen progonstvo ki služba. Sar đala o vreme, đanaja so ka ovel sa pobaro (Dan. 11:44; 2. Tim. 3:12; Otkr. 16:21). Ama, hijam sigurna so o Jehova ka pomožini amenđe. Sose? Odolese so ko purano vreme o Jehova uvek pomožinđa pe slugenđe te ćeren disavo zadatko, bizo obzir kobor hine pharo. Razmislin ando Jezekilj kova propovedinđa e Izraelcenđe kola hine ko Vavilon. Save hine o manuša kolenđe o Jezekilj valjanđa te propovedini? O Jehova phenđa so hine „buntovna“ hem „zorale vilese.“ On hine sar o kare kola posavena hem opasna sar o škorpije. Odolese, o Jehova nekobor putija phenđa e Jezekiljese: „Ma dara!“ (Jezek. 2:3-6). O Jezekilj šaj hine te ćerel po zadatko odolese so (1) o Jehova bićhalđa le, (2) e Devleso duho dinđa le snaga hem (3) e Devlese lafija zorjaćerđe olesi vera (w22.11 2 ¶1-2).

O Jehova stvorinđa e životinjen te živinen jekh vreme hem palo odova te meren. Ama, samo e manušen stvorinđa te živinen večno. O Jehova stvorinđa amen te ovel amen bari želja te živina večno. I Biblija phenela so o Jehova i „večnost e manušenđe ko vilo ćhivđa“ (Prop. 3:11). Odova tano pana jekh razlog sose ko meribe dikhaja sar ko amaro dušmani (1. Kor. 15:26). Ako bi jekh dive ovaja naborme, da li bi samo ađićeraja te mera? Na. Tegani, đaja ko doktori hem laja disave tablete te šaj te ovel amenđe pošukar. U stvari, amen ćeraja sa so šaj te ne bi meraja. A ked neko kas mangljam merela, bizo obzir da li hine phuro ili terno, amenđe tano but pharo (Jov. 11:32, 33). O Devel ne bi stvorini amen večno te živina hem te del amen odija želja ako na hine le namera večno te živina (w22.12 3 ¶5; 4 ¶7).

Ko akala phare dive but ando amare phralja hem phenja tane šaj naborme, šaj darana ja tane kokri. De sa tutar te družine tut e phralencar hem e phenjencar. Disavo puti, sebepi i epidemija šaj ka valjani te ova ki distanca čak kotar amare phralja. Tegani, šaj te osetina amen sar o apostol Jovan. Ov manglja te dikhel pe pekle amaleja kova vićinđa pe Gaj (3. Jov. 13, 14). Ama, o Jovan haljilo so jekh vreme na ka šaj te dikhen pe. Odolese, pisinđa lese lil. Ako našti te dikhe tut te phralencar hem te phenjencar, tegani šaj te ove olencar ko kontakt ko avera načinija. Ked deja sa tutar te aćhove ko kontakt te phralencar, na ka osetine tut so hijan kokri hem ka ovel tut mir. Isto ađahar, ked tano tuće but pharo, vićin e starešinen hem mukh len te pomožinen tut (Is. 32:1, 2; w22.12 17-18 ¶6-7).

I Biblija mothovi so o Josif ko pre hem ki men hine le lancija (Ps. 105:17, 18). E Josifesi situacija hine sa pološno. Ko jekh trenutko, ov hine robo kolese šaj hine te verujini pe, a akana tano ko phanlipe. Da li dijekhvar te problemija hine sa pobare, iako ando vilo molinđan tu e Jehovase? Odova šaj te ovel sose o Jehova na štitini amen kotar pharipa ko sveto kuri vladini o Beng (1. Jov. 5:19). Ama, jekh buti niked ma bistri: O Jehova na phanela pe jaćha anglo te pharipa, ov brinini pe tutar (Mat. 10:29-31; 1. Petr. 5:6, 7). Ov čak dela po lafi: „Niked na ka aćhavav tut hem niked na ka irinav tuće mo dumo“ (Jevr. 13:5). O Jehova šaj te pomožini amenđe te istrajina čak iako amen mislinaja so amaro problemi našti te rešini pe (w23.01 16 ¶7-8).

Andi Biblija haljovaja so o Jehova niked na ka aćhavi amen ako ćerđam disavo greh. O Izraelcija but putija grešinđe e Jehovase, ama ked kajinđe pe ov uvek oprostinđa lenđe. Isto ađahar, hem o hrišćanija ko prvo veko đanđe so o Jehova but mangela len. O apostol Pavle phenđa lenđe te oprostinen jekhe phralese jekh but ozbiljno greh kova ćerđa hem te utešinen le, sose ov ando vilo kajinđa pe (2. Kor. 2:6, 7; 1. Kor. 5:1-5). Ćaće tano but utešno so đanaja so o Jehova na aćhavđa pe slugen samo sebepi so grešinđe. Umesto odova, pomožinđa len, ukorinđa len hem palem lelja len ki pi angalja. Ov dela po lafi so hem avdije ka ćerel odova sarinenđe kola ando vilo kajinena pe (Jak. 4:8-10). I Biblija vaćeri andi Devlesi mudrost, pravda hem ando oleso mangipe. Isto ađahar, koro late pisini so o Jehova mangela te penđara le hem te ova olese amala (w23.02 7 ¶16-17).

Amen valjani te đana sar o događaja ko sveto ispuninena e biblijake proročanstvija. Sose? Na primer, o Isus vaćerđa kola buća ka oven ko vreme ando krajo (Mat. 24:3-14). O apostol Petar podstakninđa amen te dikha sar ispuninena pe e biblijake proročanstvija, sose odova šaj te zorjaćeri amari vera (2. Petr. 1:20, 21). Ov pomožini amenđe te haljova sose valjani te razmotrina e biblijake proročanstvija. Ov phenđa so valjani te ovel amen „ki godi e Jehovaso dive“ (2. Petr. 3:11-13). Sose? Na odolese so mangaja te otkrijina o tačno „dive hem o vreme“ ked ka avel o Armagedon, nego odolese so mangaja te koristina o vreme kova aćhilo amen amare delija „te oven sveta hem premalo lende te dićhol so hijam odana e Devlese“ (Mat. 24:36; Luka 12:40). Amen mangaja te pazina ko odova so ćeraja hem te da sa amendar ki služba e Jehovase odolese so but mangaja le. Te šaj te ćera odova, amen valjani te pazina ko amaro vilo (w23.02 16 ¶4, 6).

O „avera bakre“ već akana valjani te ćeren diso te šaj te živinen ko raj. Amen isi amen prilika te mothova e Isusese kobor mangaja le. Na primer, ađahar so ka pomožina e Isusese phralenđe. O Isus phenđa so amenđe ka ovel sudimo premalo odova sar amen ponašinaja amen premalo olende (Mat. 25:31-40). Amen šaj te pomožina len ađahar so zajedno olencar ka vaćera i šukar vest averenđe hem ka pomožina e manušenđe te oven e Isusese učenikija (Mat. 28:18-20). Amen na valjani te ađićera te avel o raj pa te ova manuša save o Jehova mangela. Već akana šaj te pazina ko odova so vaćeraja, so ćeraja hem save navike isi amen. Isto ađahar, šaj te mothova so hijam verna amare romese ja romnjaće ja amare phralenđe ki skupština. Ako akana, ko akava lošno sveto, daja sa amendar te ićera amen ko Jehovase moralna merilija, ko nevo sveto ka ovel amenđe polokho te ćera odova. Isto ađahar, već akana šaj te razvijina disavi veština koja ka koristina ked ka avel o raj (w22.12 11-12 ¶14-16).

Amen hijam but bahtale soj tano o Isus amaro Kralj, odolese soj tano ov najšukar vladari. O Jehova lično sikavđa e Isuse hem ćhivđa le te vladini (Is. 50:4, 5). Isto ađahar, o Isus mothovđa baro mangipe (Jov. 13:1). Odolese soj tano amaro Kralj, o Isus zaslužini te manga le. Ov phenđa so okola so ćaće mangena le tane olese amala hem so on po mangipe mothovena ađahar so ićerena pe ko olese zapovestija (Jov. 14:15; 15:14, 15). Isi amen bari čast so šaj te ova e Jehovase Ćhavese amala. Đanaja soj tano ov ponizno hem so savršeno oponašini pe Dade. Isto ađahar, đanaja so ov parvarđa e bokhalen, utešinđa okolen so hine obeshrabrime hem saćarđa e nabormen (Mat. 14:14-21). Avdije, šaj te dikha sar vodini i skupština (Mat. 23:10). Odolese, hijam sigurna so ki budućnost sar Kralj ko Devleso Kraljevstvo ka ćerel but šukar buća. Sar šaj te mothova so mangaja le? Ađahar so ka đa palo oleso primer. A odova šaj te ćera ađahar so ka predajina amaro životi e Jehovase hem ka krstina amen (w23.03 4 ¶8, 10).

O Jehova ćerđa but buća ko nebo, ki phuv hem ko more kolendar šaj te sikljova savo tano ov (Ps. 104:24, 25). Razmislin samo sar ćerđa amen. Amen hijam stvorime te uživina ki priroda hem te ova zahvalna aso sa odova so dikhaja. Isto ađahar, ov ćerđa amen te dikha, te šuna, te pipina, te osetina razna ukusija hem te mirišina. Sa akala buća pomožinena amen te uživina ko razna buća kola ov stvorinđa. Isi pana jekh važno razlog sose valjani te posmatrina odova soj tano stvorimo. Ko sa soj tano stvorimo dikhaja e Jehovase osobine (Rimlj. 1:20). Na primer, posmatrin o buća kola o Jehova ćerđa hem dikh kobor tane šukar ćerde. Odova sikavi amen kobor tano o Jehova mudro. Isto ađahar, razmislin andi razno ukusno hrana ki koja šaj te uživina. Akava jasno mothovi amenđe kobor o Jehova mangela amen. Ked ko odova sar ćerđa diso dikhaja e Jehovase osobine, amen pana pošukar šaj te penđara le hem odova podstaknini amen te ova pana popaše oleja (w23.03 16 ¶4-5).

O buća ko sveto ovena sa pološna. Odolese ka ovel amenđe sa popharo te verujina so odova so pisini ko Devleso Lafi tano ćaće. O manuša ko sveto ka mangen te ćhiven amen te sumnjina ko Devleso Lafi ja ko odova so o Jehova na vodini pe narodo prekalo Vodeće telo. Ama, ako hijam uverime ko odova so e Jehovaso Lafi tano tačno, amari vera ka ovel pana pozorali. Tegani, hem amen šaj te phena: „Odlučinđum te ićerav man ko te propisija celo đivdipe, đi o krajo“ (Ps. 119:112). Na ka lađa te vaćera averenđe ando ćaćipe hem te pomožina lenđe te ićeren pe ko savetija ando Devleso Lafi (Ps. 119:46). Ka ovel amen snaga te istrajina hem ko najbare pharipa, sar soj tano o progonstvo hem te na našala amari radost (Kol. 1:11; Ps. 119:143, 157). Amen hijam but zahvalna e Jehovase so haljiljam o ćaćipe. Odova pomožini amenđe te ovel amen mir, iako ko sveto tano baro lošnipe. Isi amen nada so ked e Devleso Kraljevstvo ka vladini, amaro životi ka ovel but pošukar (w23.01 7 ¶16-17).

Ki rat angleder te merel, o Isus dugo molinđa pe pekle učenikonenđe hem rodinđa pe Dadestar te arakhi len „ando Lošno“ (Jov. 17:15). Akava mothovđa kobor o Isus manglja len. Iako đanđa so pana hari ađićeri le, ov ipak brininđa pe ando pe apostolija. Sare amen mangaja te oponašina e Isuse. Odolese, na mislinaja samo odolestar so amenđe valjani. Amen molinaja amen amare phralenđe hem phenjenđe. Ked ćeraja odova, amen šunaja e Isusesi zapovest te manga jekh jekhe hem ađahar mothovaja e Jehovase so mangaja le. Amare molitve šaj but te pomožinen amare phralenđe hem phenjenđe. E Devleso Lafi phenela so „e pravednikosi molitva koja avela ando vilo isi la bari snaga“ (Jak. 5:16). Amen valjani te molina amen amare phralenđe hem phenjenđe sose nakhena bare pharipa (w22.07 23-24 ¶13-15).