Jul

O Jehova dinđa amen sposobnost te vaćera. Ama, odova poklon kova o Devel dinđa amen počminđa te koristini pe ko lošno način. O Beng hovavđa e Eva hem sebepi odova o manuša ulje grešna hem nesavršena (Post. 3:1-4). O Adam krivinđa e Eva pa čak hem e Jehova sebepi odova so ov grešinđa (Post. 3:12). O Kain hovavđa e Jehova palo odova so mudarđa pe phralje, e Avelje (Post. 4:9). Avdije tano pharo te arakha disavo film ko kova na akošena. Čak ki škola hem ki buti o manuša na lađana te koristinen ružna lafija. Ako sikljiljam te šuna ružna lafija, but sigate hem amen ka počmina te koristina len. Sar e Devlese sluge, amen mangaja te ćera e Jehova te ovel bahtalo na samo odoleja so na ka vaćera ružna lafija, već hem odoleja so ka hvalina le (w22.04 4 ¶1-3).

O Isus hine le ispravno stav premalo materijalna buća. Ov uživinđa ko odova te hal hem te pijel pe amalencar (Luka 19:2, 6, 7). Đanaja so oleso prvo čudo hine ked kotar pani ćerđa vino (Jov. 2:10, 11). Ked mulo, odova dive akharđa jekh but skupo fistani (Jov. 19:23, 24). Ama, o Isus na dozvolinđa o materijalna buća te oven lese najvažna ko životi. Ov sikavđa amen ko prvo than te ćhiva o Kraljevstvo, a o Jehova ka del amen odova so valjani amenđe (Mat. 6:31-33). But manuša isi len bare blagoslovija sose o pare nane lenđe ko prvo than. Te dikha o primer ando amaro phral kova vićini pe Danijel. Ov phenela: „Pana ked hijum le terno, najvažno hine maje te služinav e Jehovase.“ O Danijel hine le skromno životi, odolese šaj hine te ćerel but buća ki Jehovasi organizacija. Ov pana phenela: „Nane pare kola šaj te zameninen o blagoslovija kola o Jehova dinđa man“ (w22.05 21-22 ¶6-7).

Ked redovno proučinaja i Biblija hem amare publikacije, ađahar mothovaja so mangaja o ćaćipe. Bizo obzir kobor berš hijam e Jehovase svedokija, isi amen pana but buća te sikljova. Nane uvek lokho te proučine, ama o trud isplatini pe. Na volinena sare te čitinen hem te proučinen. Ama, o Jehova phenela amenđe so valjani hor te proučina te šaj pana pošukar te haljova o ćaćipe (Posl. 2:4-6). Odova but ka pomožini amenđe. Đi čitini e Devleso Lafi, amaro phral o Kori, odvojini jekh stih kova hor istražini. Ov phenela: „Čitinava svako fusnota, svako unakrsno referenca hem dodatno istražinava odova stih. Dikhljum so ked ađahar ćerava, sikljovava but buća.“ Bizo obzir ko savo način proučinaja, amen mothovaja so ceninaja o ćaćipe ked odvojinaja vreme aso odova (Ps. 1:1-3; w22.08 17 ¶13; 18 ¶15-16).

Ked o Isus hine ki phuv, ov prekalo odova soj tano stvorimo sikavđa pe učenikonen ando po Dad. Akana ka dikha jekh andi buti koja sikavđa len. O Jehova mothovi po mangipe svakonese. Ki Propoved ki gora, o Isus vaćerđa pe učenikonenđe ando kham hem ando boršim, buća ando kola but manuša na razmislinena odobor. O solduj buća tane but važna aso amaro životi. O Jehova šaj hine te na del akala duj buća okolenđe kola na služinena lese. Ama, ov sarinenđe dela kham hem boršim (Mat. 5:43-45). O Isus koristinđa akala duj buća te sikavi pe učenikonen so o Jehova mangela te mothovi mangipe sarinenđe. Svako puti ked dikhaja sar o kham ikljola ja sar đala boršim, amen šaj te setina amen ko odova kobor o Jehova mangela amen. Oleso primer šaj te podstaknini amen te mothova mangipe e manušenđe ki služba (w23.03 17 ¶9-10).

So o apostol Jovan dikhlja? Jekha romnja koja hine la skerletno boja. Oj izgledinđa sar „bari bludnica“ hem olako anav hine „Baro Vavilon“. Oj ćerđa „blud“ e „kraljencar andi phuv“ (Otkr. 17:1-5). Koj tano o „Baro Vavilon“? Akija romni našti te predstavini o politička organizacije. Sose? Odolese so ko Otkrivenje pisini so oj hem o politička vođe ćerena blud (Otkr. 18:9). Odova soj tani mothovdi so bešela upri zver značini so mangela te kontrolišini e vladaren. Isto ađahar, oj našti te predstavini ni o trgovačko sistemi, odolese so on na pominena pe zajedno ki Biblija. O trgovačko sistemi ko Otkrivenje tano opisujimo sar „o trgovcija ando celo sveto“ (Otkr. 18:11, 15, 16). O purano Vavilon hine centar andi hovavni religija. Odolese šaj te phena so o Baro Vavilon predstavini sa o hovavne religije. U stvari, ov tano o svetsko carstvo andi hovavni religija (Otkr. 17:5, 18; w22.05 11 ¶14-16).

Naravno, disavo puti o daja pućena pe da li olenge ćhave ka služinen e Jehovase. O roditeljija but šukar đanena kobor tano pharo olenge ćhavenđe ko akava lošno sveto. Bute dajenđe tano pharo te barjaćeren pe ćhaven sose tane kokri ja sose olengo rom na služini e Jehovase. O roditeljija kaso bračno drug nane e Jehovaso svedoko nane jedina kolenđe tano pharo te sikaven pe ćhaven te mangen e Jehova. Čak ked o solduj roditeljija tane e Jehovase svedokija, but tano pharo o mangipe premalo Jehova te ćhiven ko pe ćhavengo vilo. Ako tano ađahar hem ki ti porodica, ma brinin tut. O Jehova ka pomožini tut. Šaj te puće avere roditeljen sar on koristinena odola publikacije aso po porodično proučibe (Posl. 11:14). Isto ađahar, o Jehova šaj te pomožini tuće te vaćere te ćhavencar. Molin tut olese te pomožini tuće te haljove sar osetinena pe te ćhave hem sostar razmislinena (Posl. 20:5; w22.04 17 ¶4, 7; 18 ¶9).

O Isus savršeno oponašinđa pe Dade. Odolese, so pobuter upoznajinaja e Isuse pana pobuter ka manga e Jehova (Jevr. 1:3). Najšukar način te upoznajina e Isuse tano te čitina o jevanđelja. Ako nane tut navika te čitine i Biblija svako dive, sose na bi počmineja akana? Đi čitineja o izveštaja ando Isus, posebno obratin pažnja ko olese osobine. Na primer, ka dikhe so ov hine pristupačno hem so but manglja e ćhavoren, čak ićerđa len ki angalja (Mar. 10:13-16). O Isus hine šukar manuš hem šukar amal. Odolese, olese učenikija na darandilje te vaćeren lese sar osetinena pe (Mat. 16:22). Ov but šukar oponašinđa pe Dade, sebepi odova amen đanaja so o Jehova tano pristupačno. Odolese, šaj te molina amen e Jehovase hem te phrava lese amaro vilo. Amen hijam uverime, so god te phena lese ki molitva, ov na ka osudini amen. Ov mangela amen hem brinini pe amendar (1. Petr. 5:7; w22.08 3 ¶4-5).

O Jehova stvorinđa amen, odolese najšukar đanela save hijam. Ov đanela svako detalji amendar (Ps. 139:15-17). Dikhela sa o mane kola nasledinđam ando amare roditeljija. Isto ađahar, đanela sar bariljam hem sar odova utičinđa upro amende. So o Jehova ćerela odolese so đanela save hijam? Ov spremno oprostini amenđe sose tano milosrdno (Ps. 78:39; 103:13, 14). O Jehova mothovđa so mangela te oprostini amenđe. Ov đanela so ando Adam nasledinđam o greh hem o meribe (Rimlj. 5:12). Amen kokri našti ništa te ćera te oslobodina amen ando odova niti aver manuš šaj te oslobodini amen (Ps. 49:7-9). Ama, odolese o Jehova ćerđa diso te šaj te oslobodini amen. Ko Jovan 3:16 pisini so bićhalđa pe Ćhave, e Isuse, te del po životi amenđe (Mat. 20:28; Rimlj. 5:19; w22.06 3 ¶5-6).

O Jehova phenđa so ked oprostinaja averenđe, ov ka oprostini amenđe. Odova phenđa pe slugase e Jovese. O Elifas, o Vildad hem o Sofar but povredinđe e Jove pe lafencar. Ama, o Jehova phenđa e Jovese te molini pe olenđe. Ked odova ćerđa, o Jehova but blagoslovinđa le (Jov 42:8-10). Ked ićeraja i holi ano amende, odoleja samo povredinaja kokri amen. I holi tani sar jekh teret, a o Jehova mangela te cida amendar odova teret te šaj te ovel amen mir (Ef. 4:31, 32). Ov phenela: „Cide tutar o gnev hem mukh i holi“ (Ps. 37:8). Ako ka ićera amen ko akava savet, odova ka ovel šukar aso amaro sastipe (Posl. 14:30). Ked ićeraja i holi ando amende, odoleja samo amenđe ćeraja lošnipe. Odova tano isto sar ked bi amen pijaja otrov, a mislinaja so neko aver ka otrujini pe. Odolese, ked amen oprostinaja odova tano aso amaro šukaripe. Ađahar isi amen mir hem šaj radosno te služina e Jehovase (w22.06 10 ¶9-10).

Amari nada tani sar kaciga koja štitini amare mislija hem pomožini amen te na razmislina samo amendar sose odova šaj te rumini amaro amalipe e Jehovaja (1. Kor. 15:33, 34). Amari nada šaj te zaštitini amen ando pogrešno razmišljanje. Na primer, disave mislinena so niked našti te ugodinen e Jehovase. Setin tut so diso slično hem o Elifas phenđa e Jovese. Ov phenđa: „Sar šaj o manuš te ovel čisto anglo Devlese jaćha? Sar šaj neko kas i đuvli bijanđa te ovel pravedno? Dikh, o Devel na verujini pe sveto slugenđe, čak ni o nebo nane čisto anglo lese jaćha“ (Jov 15:14, 15). Ama, odova hine baro hovajbe. Okova kova mangela te ćhivel amen te mislina ađahar tano o Beng. Ov đanela so ako razmislinaja ađahar, amen ka našala amari nada. Odolese, cide tut ando odola hovajba hem razmislin ando Devlese obećanja. O Jehova mangela zauvek te živine hem ov ka pomožini tuće te rese đi odova cilj (1. Tim. 2:3, 4; w22.10 25-26 ¶8-10).

O Satana manglja te ćhivel e Jove te mislini so o Jehova holjanđa upro leste. Na primer, o Beng mukhlja te phudel jekh bari bavlal. Sebepi odija bavlal, o ćher ko kova hine e Jovese deš ćhave rušinđa pe hem on mulje (Jov 1:18, 19). Isto ađahar, ćerđa te perel jag kotar nebo. Odija jag uništinđa e Jovese životinjen hem e manušen kola brininđe pe olendar (Jov 1:16). Odolese so i bavlal hem i jag alje kotar nebo, o Beng manglja te ćhivel e Jove te mislini so olese pharipa avena ando Devel. Sebepi odova, o Jov šaj mislinđa so ćerđa diso sovaja holjanćerđa e Jehova. Ama, ipak na odrekninđa pe ando po Devel. O Jov phenđa so na bisterđa so o Jehova beršencar dinđa le but šukar buća. Odolese razmislinđa, ako prihvatinđa o šukar buća kola o Jehova dinđa le, sose akana te na prihvatini hem o lošna buća. Sebepi odova phenđa: „Nek e Jehovaso anav ovela hvalimo“ (Jov 1:20, 21; w22.06 21 ¶7).

O Isus vaćerđa pe učenikonenđe slično upozorenje ko Jovan 17:14. Amen avdije dikhaja sar ispunini pe akava proročanstvo, pogotovo ko zadnja 100 berš. Sar odova? Hari palo odova so o Isus ulo Kralj ko nebo, ko 1914. berš, ov fordinđa e Benge ki phuv. Pana hari, o Beng ka ovel uništimo (Otkr. 12:9, 12). Ama, o Beng na bešela phanle vastencar. Sebepi soj tano but holjamo, ov odija holi ikali upro Devlese sluge (Otkr. 12:13, 17). Odolese, o manuša ko sveto but mrzinena amen. Ama, amen nane sose te dara ando Beng hem ando olese manuša. Šaj te phena isto odova so o apostol Pavle phenđa: „Ako tano o Devel amencar, ko ka ovel protiv amende?“ (Rimlj. 8:31). Amen šaj te ovel amen potpuno poverenje upro Jehova (w22.07 18 ¶14-15).

O Isus na brininđa pe odolestar da li ka oven dovoljno manuša kola ka propovedinen i šukar vest ko poslednja dive. Ov đanđa so o proročanska lafija ando jekh psalmista ka ispuninen pe. Odova psalmista phenđa: „To narodo spremno ka pođini tuvaja ko dive ked e vojska ka legare ko maribe“ (Ps. 110:3). Ako hem tu propovedineja i šukar vest, tu podržineja e Isuse hem e verno hem razborito robe hem pomožineja te ispuninen pe o lafija ando akava proročanstvo. Ama, ki služba šaj te oven amen disave pharipa. Đi propovedinena, e Devlese sluge šaj te ovel len protivljenje. O otpadnikija, o religiozna vođe hem o političarija vaćerena hovajbe amendar. Ko odola hovajba šaj te verujinen amare amala, amari familija ili amare kolege ki buti. On šaj ka mangen te ćhinaven amen te služina e Jehovase. Ko disave phuvja, o protivnikija maltretirinena, napadinena hem čak ćhivena ko phanlipe amare phralen hem phenjen (w22.07 8 ¶1; 9 ¶5-6).

O Jehova phenela amenđe so valjani redovno te čitina oleso Lafi hem hor te razmislina odolestar so čitinđam. Ako ićeraja amen ko odova so sikljovaja, amari vera ka ovel pana pobari hem ka ova pana popaše e Devleja. Sebepi odova, ka ovel amen snaga te istrajina ko amare pharipa. Isto ađahar, o Jehova phenela so ka del po sveti duh okolenđe kola osloninena pe upro oleso Lafi. O sveti duh šaj te del amen „but bari snaga“ te šaj te istrajina ko bare pharipa (2. Kor. 4:7-10). O Jehova prekalo verno hem razborito robo dela amen but člankija, videa hem đilja kola šaj te pomožinen amenđe amari vera te ovel zorali hem te aćhova lese verna (Mat. 24:45). O Jehova sikavi pe slugen sar te mangen hem te utešinen jekh jekhe ked isi len pharipa (2. Kor. 1:3, 4; 1. Sol. 4:9). Amare phralja hem phenja mangena te pomožinen amen te aćhova verna ked isi amen problemija (w22.08 12 ¶12-14).

Ked vaćeraja ando šukar osobine kotar amare phralja hem phenja, amen zorjaćeraja amaro amalipe olencar hem barjaćeraja o mangipe maškaro amende. Podijekh puti, o zrela hrišćanija šaj te na složinen pe jekh jekheja hem čak te avel đi i svađa. Odova desinđa pe e Pavlese hem e Varnavase. O Varnava manglja te len e Marko ko aver misionarsko putovanje, ama o Pavle na složinđa pe odoleja. Sebepi odova, but svađinđe pe hem razdvojinđe pe (Dela 15:37-39). Ama, o Pavle, o Varnava hem o Marko, kasnije pomirinđe pe hem ađahar mothovđe kobor tano lenđe važno o mir hem o jekhipe ki skupština. O Pavle kasnije vaćerđa šukar buća ando Varnava hem ando Marko (1. Kor. 9:6; Kol. 4:10). Isto ađahar, hem amen valjani te da sa amendar te rešina bilo savo problemi kova isi amen nekasa ki skupština hem te razmislina ando šukar osobine kola isi le. Ked ađahar ćeraja, amen mothovaja so mangaja te ovel mir hem jekhipe ki skupština (w22.08 23 ¶10-11).

Amen nane amen pravo te sudina averenđe premalo amare merilija, već valjani te ićera ki godi so o Jehova tano „Sudija andi celo phuv“ (Post. 18:25). O Jehova na dinđa amen pravo amen te sudina. Te dikha e Josifeso primer. O Josif na sudinđa averenđe, čak ni okolenđe kola hine but lošna premalo leste. Olese phralja hine gruba premalo leste, bikinđe le te ovel robo hem čak phenđe pe dadese so o Josif mulo. Beršencar palo odova, ked o Josif reslja pe pekle porodicaja, ov hine baro manuš ko Egipat. Tegani, ov šaj hine te ovel grubo premalo pe phralja hem te irini lenđe aso sa so ćerđe lese. Olese phralja darandilje so o Josif baš odova ka ćerel, iako phenđe soj lenđe žao. Ama, o Josif phenđa lenđe: „Ma daran. Me na hijum o Devel te sudinav tumenđe“ (Post. 37:18-20, 27, 28, 31-35; 50:15-21). Ov hine ponizno hem haljilo so samo o Jehova isi le pravo te sudini (w22.08 30 ¶18-19).

Da li đanđan so o Jehova šaj prekalo tute te odgovorini ki nekasi molitva? Tu šaj te pomožine averenđe bilo te ove starešina, sluga pomoćnik, pioniri ja samo objavitelj. Odova šaj te ćere iako hijan terno, phuro, phral ja phen. Ked neko ando Jehova rodela te pomožini lese, amaro Devel but putija prekalo starešine ja avera verna sluge „utešini“ odola osoba (Kol. 4:11). Amen hijam but bahtale so šaj ađahar te služina e Jehovase hem te pomožina amare phralenđe. Amen šaj te pomožina amare phralenđe hem te utešina len ked isi disavi epidemija, prirodno katastrofa ja progonstvo. Disavo puti šaj mangaja te pomožina len, ama pharo tano te ćera odova sose neko amarendar tano nabormo. Ama, ipak mangaja te pomožina amare phralenđe hem o Jehova tano bahtalo ked dikhela so daja sa amendar te pomožina len (Posl. 19:17; w22.12 22 ¶1-2).

O mangipe šaj te pomožini amen avera te ovel len poverenje upro amende. O Isus phenđa so o duj najbare zapovestija tane te manga e Jehova hem te manga amare pašutnen (Mat. 22:37-39). Amen mangaja e Jehova hem mangaja te ova pouzdana sar oleste. Mangaja hem amare phralen hem phenjen, odolese na vaćeraja averenđe o buća kola on phenđe amenđe ko poverenje. Niked na mangaja te phena diso so ka povredini ili ka lađaćeri amare phralen. I poniznost ka pomožini amen te ova penđarde sar pouzdana manuša. Jekh hrišćanin kova tano ponizno na ka mangel uvek prvo te vaćeri averenđe diso so desinđa pe (Fil. 2:3). Ov na vazdela kokri pes ađahar so ćhivela averen te mislinen so ov đanela disave poverljiva buća kola na ismini te vaćeri. O ponizno manuš na ka širini po lično mišljenje ando buća kolendar na vaćeri pe ki Biblija hem ko publikacije (w22.09 12 ¶12-13).

Jekh anđeo phenđa e Danilose so e Devleso narodo ka haljol o proročanstvija kola tane pisime ki Danilosi knjiga, ama „niko koj tano lošno na ka haljol“ (Dan. 12:10). Akana tano o vreme te mothove ki kasi strana hijan (Mal. 3:16-18). O Jehova ćedela okolen kola tane olese posebna, avere lafencar, okolen kola tane vredna anglo olese jaćha. Sigurno hem tu mangeja te ove maškaro lende. Amen ćaće živinaja ko uzbudljivo vreme. Pana but buća valjani te oven. Pana hari, ka dikha sar o Devel ka cidel e lošnonen. Palo odova, ka dikha sar ispuninena pe o lafija kola o Jehova phenđa e Danilose: „Ka ušte te dobine to nasledstvo ko krajo ando dive“ (Dan. 12:13). Da li jedva ađićereja te dikhe e Danilo hem okolen kola mulje tutar? Ako ja, tegani de sa tutar te aćhove verno e Jehovase hem to anav te aćhol pisimo ki Jehovasi knjiga ando životi (w22.09 24 ¶17; 25 ¶19-20).

Akala lafija sigurno zorjaćerđe e Jezekilje. Sose? Odolese so sigurno setinđe le so o Jehova koristinđa ista lafija ked ćhivđa e Mojsije hem e Isaija te oven prorokija (Izl. 3:10; Is. 6:8). Isto ađahar, đanđa sar o Jehova pomožinđa lenđe te ćeren pe zadatkija, iako na hine lokhe. Odolese, ked o Jehova duvar phenđa lese: „Me bićhalava tut“, ov hine le šukar razlog te verujini so o Jehova ka pomožini lese. Uzo odova, ki pi knjiga, o Jezekilj nekobor putija pisinđa: „Alo maje e Jehovaso lafi“ (Jezek. 3:16; 6:1). Akava mothovi so ov hine uverimo so o Jehova bićhalđa le. Isto ađahar, oleso dad hine svešteniko hem sigurno phenđa lese so o Jehova uvek pomožinđa pe prorokonenđe. Na primer, e Isakese, e Jakovese hem e Jeremijase o Jehova phenđa: „Me hijum tuvaja“ (Post. 26:24; 28:15; Jer. 1:8; w22.11 2 ¶3).

Iako o Adam hem i Eva grešinđe hem sebepi odova sare amen meraja, o Jehova na meninđa pi namera (Is. 55:11). Ov pana mangela amen večno te živina. Ked razmislinaja ando odova so o Jehova phenđa hem so ćerđa, amen hijam sigurna so ov ka ispunini pi namera. O Jehova obećinđa so ka vazdel okolen kola mulje hem so on večno ka živinen (Dela 24:15; Titu 1:1, 2). O verno manuš o Jov phenđa so o Jehova jedva ađićeri te vazdel okolen so mulje (Jov 14:14, 15). Isto ađahar, o prorok Danilo đanđa so o Jehova šaj te uskrsnini e manušen hem so šaj te živinen večno (Ps. 37:29; Dan. 12:2, 13). O Judejcija ko Isuseso vreme isto đanđe so o Jehova pe verno slugenđe šaj te del o „večno životi“ (Luka 10:25; 18:18). Nekobor putija hem o Isus Hrist vaćerđa ando akava obećanje, a đanaja so o Jehova hem ole uskrsninđa (Mat. 19:29; 22:31, 32; Luka 18:30; Jov. 11:25; w22.12 4-5 ¶8-9).

O Jehova vićini amen te ova paše oleja (Jak. 4:8). Ov mangela te ovel amaro Devel, Dad hem Amal. Uzo odova, ov odgovorini ko amare molitve hem pomožini amen ked isi amen pharipa. Prekali pi organizacija, sikavi amen hem štitini amen. Ked molinaja amen e Jehovase, čitinaja oleso Lafi hem hor razmislinaja odolestar so čitinđam, amen ovaja paše e Jehovaja. Tegani, amaro mangipe premalo leste ovela sa pobaro hem pana pobuter ceninaja le. Odova podstaknini amen te šuna le hem te hvalina le sose ov odova zaslužini (Otkr. 4:11). So pobuter upoznajinaja e Jehova, isi amen pana pobaro poverenje upro leste hem upri olesi organizacija. O Beng mangela te cidel amen ando Jehova, pogotovo ked isi amen pharipa. Sar ćerela odova? Ov mangela hari pohari te ćhivel amen te našala amaro poverenje upro Jehova hem olesi organizacija. Ama, amen šaj te zaštitina amen ando Satanase zamke. Ked tani amari vera zorali hem isi amen baro poverenje upro Jehova, amen na ka cida amen olestar hem andi olesi organizacija (Ps. 31:13, 14; w22.11 14 ¶1-3).

But hrišćanija rizikujinđe pi sloboda čak hem po životi sose manglje e Jehova, e Vrhovno Vladare. On tane odlučna te aćhon verna e Jehovase sar o trin Jevreja kola aćhilje verna, iako hine fordime ki jag. O psalmista David pisinđa kobor tano važno te aćhova verna e Jehovase: „Ov vićini o nebo hem i phuv sar svedokija te šaj te sudini pe narodose: ’Ćeden koro mande okolen kola tane maje verna‘ “ (Ps. 50:4, 5). Ko jekh aver psalam o David pisinđa: „O Jehova mangela i pravda hem na ka mukhel pe verno slugen. Ov zauvek ka arakhi len“ (Ps. 37:28). So god te ovel, najšukar tano te aćhova verna e Jehovase. Tegani, hem amen ka osetina amen isto sar o psalmista kova phenđa: „Nek te verna sluge ovena bahtale“ (Ps. 132:9; w22.10 17 ¶18-19).

O verno manuš o Jov vaćerđa bute manušencar. Ama, jekh razgovor but utičinđa upro leste – o razgovor kova hine le e Jehovaja. Tegani, o Jehova phenđa lese te posmatrini o buća kola ov stvorinđa. Odova šaj hine te pomožini e Jovese te đanel kobor tano o Jehova mudro hem te zorjaćeri oleso poverenje so ov uvek ka del pe slugenđe odova so valjani lenđe. Na primer, o Jehova phenđa lese so sar brinini pe ando životinje, ađahar šaj te brinini pe hem olestar (Jov 38:39-41; 39:1, 5, 13-16). Đi posmatrinđa odova so o Jehova stvorinđa, o Jov sikljilo but buća ando odova savo tano o Devel. Sar o Jov, hem amen šaj but buća te sikljova ando Devel ked dikhaja odova so stvorinđa. Ama, disavo puti nane lokho te ćera odova. Ako živinaja ki diz, našti svako dive te dikha but buća kola o Jehova stvorinđa. Čak iako živinaja ko gav, šaj nane amen uvek vreme te ćera odova, ama bi ovela šukar te arakha vreme te šaj pana pobuter te sikljova andi priroda (w23.03 15 ¶1-2).

O Isus phenđa so angleder te avel o krajo, ki phuv ka ovel „bare zemljotresija“ hem avera katastrofe (Luka 21:11). Isto ađahar, phenđa so „o lošnipe ka barjol“ hem odolese isi baro kriminal, nasilje hem teroristička napadija (Mat. 24:12). O Isus niked na phenđa so akala pharipa ka ovel len samo okola kola na služinena e Jehovase. But e Jehovase verna sluge isi len baš odola pharipa (Is. 57:1; 2. Kor. 11:25). Avdije, o Jehova na ćerela čudija te zaštitini amen, ama šaj te del amen mir. Ked ovela disavi katastrofa, amen šaj te arakha amaro mir ako angleder pripreminaja amen aso odova. Da li odova značini so amari vera ko Jehova nane zorali? Na. U stvari, ako angleder pripreminaja amen, ađahar mothovaja so verujinaja so ov ka pomožini amenđe. Sar? Ko Devleso Lafi pisini so valjani angleder te pripremina amen aso odova so šaj te ovel (w22.12 18 ¶9-10).

Đi o Josif hine ko phanlipe, o faraon dikhlja duj sune. Ov manglja te đanel so značinena odola duj sune. Ked šunđa so o Josif šaj te phenel lese odova, ov odmah phenđa pe manušenđe te anen le koro leste. Uzi Jehovasi pomoć, o Josif šaj hine te phenel lese so značinena odola sune. Isto ađahar, e faraone oduševinđe o savetija kola o Josif dinđa le. Odolese, ov ćhivđa le te ovel upravniko ando oleso dvoro (Post. 41:38, 41-44). Kasnije, ko Egipat hine baro bokhalipe. Ama, hem ki diz Hanan, ko than kaj živinđa e Josifesi porodica. O Josif akana šaj hine te pomožini pe porodicaće hem ađahar te arakhi i loza prekali koja valjanđa te avel o Isus Hrist, o Mesija. Amen đanaja so o Jehova pomožinđa e Josifese. Iako e Josifese phralja manglje te mudaren le, o Jehova promeninđa odija situacija ko diso šukar hem ađahar ispuninđa pi namera (w23.01 17 ¶11-12).

O manuš kova pazini ko po vilo dela sa pestar te cidel pe ando buća kola šaj te ruminen oleso amalipe e Devleja. Ađahar, ov aćhola ko Devleso mangipe (Posl. 22:3; Juda 20, 21). O apostol Pavle phenđa e hrišćanenđe te pazinen ko po vilo. Na primer, e hrišćanenđe ko Efes phenđa: „Pazinen sar živinena, ma živinen sar okola so nane gođale, nego sar okola soj tane gođale“ (Ef. 5:15, 16). E Satanaso najbaro cilj tano te cidel amen ando Jehova. Odolese, i Biblija podstaknini amen: „Trudinen tumen te haljon soj tani e Jehovasi volja“ (Ef. 5:17). Te šaj te ana mudra odluke, valjani te dikha so o Jehova mangela te ćera. Ko odova šaj te pomožini amen ako redovno proučinaja i Biblija hem hor razmislinaja odolestar so čitinđam. Ked haljovaja soj tani e Jehovasi volja hem ked daja sa amendar te „razmislina sar o Hrist“, tegani ka đana sar te ana mudra odluke, iako ki Biblija na vaćeri pe direktno odolestar (1. Kor. 2:14-16; w23.02 16-17 ¶7-9).

Kobor putija čistineja to ćher? Ked selinđan tut, tu sigurno čistinđan svako ćoši ko ćher. Ama, so bi ovela ked palo odova više niked ne bi čistineja le? O ćher sigate meljarđola hem ćedela pe but prašina. Odolese ako mangaja te ovel sa ko po than, valjani redovno te čistina le. Isto ađahar, valjani te pazina da li amaro razmišljanje tano čisto hem da li koro amende aćhilje disave buća andi purani ličnost. Angleder te krstina amen, trudinđam amen „te cida svako melalipe kotar amaro telo hem duho“ (2. Kor. 7:1). Akana, amen valjani te šuna o savet ando apostol Pavle kova phenđa: „Hem ponodri meninen o način sar razmislinena“ (Ef. 4:23). Sose tano odova važno? Odolese so akava sveto šaj sigate te meljaćeri amen. Te šaj te ćera odova soj tano šukar anglo e Jehovase jaćha, redovno valjani te dikha save hijam, sostar razmislinaja hem kola tane amare želje (w23.01 8 ¶1-2).

Zamislin so šuneja e Isuse sar sikavi. Ov često citirinđa o stihija ando Sveta spisija. Ked o Isus krstinđa pe hem hine pomazimo e sveto duhoja, ov setinđa pe sa so ćerđa pe Dadeja đi hine ko nebo. Olese prva lafija palo krštenje hem olese zadnja lafija angleder te merel hine disave citirime stihija ando Devleso Lafi (Pon. zak. 8:3; Ps. 31:5; Luka 4:4; 23:46). Đi hine ki phuv, ov često citirinđa hem čitinđa disave stihija kotar Devleso Lafi hem objasninđa so on značinena (Mat. 5:17, 18, 21, 22, 27, 28; Luka 4:16-20). But berš angleder o Isus te počmini pi služba, ov često čitinđa e Devleso Lafi hem šunđa sar avera čitinena le. O Josif hem i Marija ko pe svakodnevna razgovorija sigurno često citirinđe e Devleso Lafi (Pon. zak. 6:6, 7). O Isus pe porodicaja sigurno svako sabat đelo ki sinagoga (Luka 4:16). Uduri ov but pažljivo šunđa đi čitinđa pe e Devleso Lafi (w23.02 8 ¶1-2).

Isi amen but razlogija te manga e Jehova. Na primer, amen đanaja so olestar „avela o životi“ hem so ov dela amen „svako šukar hem savršeno poklon“ (Ps. 36:9; Jak. 1:17). Sa o šukar buća ko životi avena ando Jehova. I otkupnina tani jekh but šukar poklon kova o Jehova dinđa amen. Sose šaj te phena odova? Razmislin kobor hine paše o Jehova hem o Isus. O Isus phenđa: „O Dad mangela man“ hem me „mangava me Dade“ (Jov. 10:17; 14:31). On hine zajedno milijarde berša hem ulje sa popaše jekh jekheja (Posl. 8:22, 23, 30). Zamislin samo kobor hine pharo e Jehovase te mukhel pe Ćhave te patini hem ko krajo te merel. Odolese so o Jehova mangela tut hem e manušen, ov dinđa pe Ćhave sar žrtva te šaj tu hem sa avera manuša te živinen večno (Jov. 3:16; Gal. 2:20). Odova tano o najbaro razlog sose mangaja e Jehova (w23.03 4-5 ¶11-13).

Amen valjani te cida amen ando sikljoviba kola avena ando otpadnikija. O Isus ukorinđa disave hrišćanen ki skupština Pergam sose ćerđe podele maškaro phralja (Otkr. 2:14-16). Ov pohvalinđa e hrišćanen ki Tijatira sose cidinđe pe kotar sikljoviba kola avena ando Beng hem podstakninđa len te aćhon „zorale“ ko ćaćipe (Otkr. 2:24-26). O hrišćanija kolengi vera na hine zorali hem kola ićerđe pe ko hovavne sikljoviba, valjanđe te pokajinen pe. So sikljovaja ando odova? Valjani te cida amen ando sikljoviba kola na avena ando Jehova. O otpadnikija šaj samo te „dićhon so mangena e Devle, ama na živinena ađahar“ (2. Tim. 3:5). Ako hor proučinaja e Devleso Lafi, ka ovel polokho te penđara kola tane odola hovavne sikljoviba hem te cida amen olendar (2. Tim. 3:14-17; Jud. 3, 4). But tano važno te služina e Jehovase ko ispravno način. Ako dikhaja so diso na ćeraja šukar, odmah valjani te menina odova (Otkr. 2:5, 16; 3:3, 16; w22.05 4 ¶9; 5 ¶11).