Avgust

Da li đaneja sose o Jehova ki pi knjiga pisini o anava ando okola kase lafija mothovena so darana olestar hem so razmislinena ando oleso anav? Odova so vaćeraja mothovi soj tano amenđe ko vilo. O Isus phenđa: „O muj vaćeri odova soj tano o vilo pherdo“ (Mat. 12:34). O Jehova mangela te del večno životi e manušenđe kola mangena le. Da li o Jehova ka prihvatini sa odova so ćeraja olese ja na, zavisini odolestar sar koristinaja amari ćhib (Jak. 1:26). Disave manuša kola na mangena e Devle tane holjame, gruba hem ponosna (2. Tim. 3:1-5). Amen na mangaja te ova sar olende, već mangaja amare lafija te ćeren e Jehova te ovel bahtalo. Ama, da li o Jehova ka ovel bahtalo ako ko sastankija hem ki služba hijam ljubazna, a ćhere ked niko na dikhela amen hem na šunela amen hijam neljubazna amare ćherutnencar? (1. Petr. 3:7; w22.04 5 ¶4-5).

O Devel ćhivđa i zamisao ko vilo ando deš šinga hem andi zver te uništinen o Baro Vavilon. O Jehova ka ćhivel e narodon te koristinen i skerletno zver, a odija zver tani o Ujedinjena nacije, te napadini o svetsko carstvo andi hovavni religija hem te uništini la (Otkr. 18:21-24). So akava značini amenđe? Amen valjani hem ponodri „te služina amare Devlese ko način kova ov smatrini soj tano čisto hem kova nane melalo“ (Jak. 1:27). Amen niked na valjani te mukha o hovavne sikljoviba, o običaja, o proslave, odova sar o manuša dikhena ko moral hem o okultizam te utičini upro amende. Valjani hem ponodri te pomožina e manušenđe te ikljon andi hovavni religija te ne bi anglo e Devlese jaćha ovena kriva aso grehija kola oj ćerela (Otkr. 18:4; w22.05 11 ¶17; 14 ¶18).

Roditeljija, ko razna načinija vaćeren tumare ćhavenđe ando Jehova hem ando odova sar ov pomožinđa tumen (Pon. zak. 6:6, 7). Odova tano posebno važno ako to bračno drug na služini e Jehovase hem našti ćhere te proučine te ćhavencar. Jekh phen koja vićini pe Kristin phenela: „Naštine te vaćerav ando Jehova me ćhavencar svako puti ked me mangljum. Odolese koristinđum svako trenutko kova hine man.“ Isto ađahar, vaćer šukar buća andi Jehovasi organizacija hem ando avera phralja hem phenja. Ma vaćer lošno ando starešine sose odolestar zavisini da li te ćhave ka vaćeren olencar ked ka ovel len problemija. De sa tutar te ovel mir ko ćher. Redovno vaćer te romese hem te ćhavenđe kobor mangeja len. Ked vaćereja ando to rom, mothov poštovanje hem sikav te ćhaven te ćeren isto odova. Ked ćereja odova, te ćhavenđe ka ovel polokho te sikljon ando Jehova (Jak. 3:18; w22.04 18 ¶10-11).

O Isus e hrišćanenđe ki skupština Efes phenđa so istrajno služinđe e Jehovase, iako hine len bare pharipa. Ama, o problemi hine so našalđe o mangipe kova hine len ko početko. Te šaj te služinen e Jehovase ko ispravno način, on morandilje palem te ovel len odova mangipe. Slično tano hem avdije, nane dovoljno samo te ova istrajna nego hem te đana sose istrajinaja. E Jehovase tano važno na samo so ćeraja, već hem sose odova ćeraja. Ov mangela te služina lese odolese so mangaja le hem hijam lese zahvalna (Posl. 16:2; Mar. 12:29, 30). Amen valjani hem ponodri te aćhova đangavde. O hrišćanija ki skupština ko Sard hine len jekh aver problemi. On jekh vreme hine but revna, ama više na hine. Odolese o Isus phenđa lenđe te oven „đangavde“ (Otkr. 3:1-3). Naravno, o Jehova niked na ka bistrel odova so ćerđam angleder (Jevr. 6:10; w22.05 3 ¶6-7).

O Solomon phenđa so i buti šaj te anel bahtalipe hem soj tani „poklon ando Devel“ (Prop. 5:18, 19). Ov đanđa so akava tano ćaće sose hine but bućarno manuš. Ov ćerđa ćhera, bašte, bazenija, sadinđa vinogradija hem gradinđa dizja (1. Kralj. 9:19; Prop. 2:4-6). Akija hine phari buti hem ov hine zadovoljno odoleja so ćerđa. Ama, đanđa so ako mangela ćaće te ovel bahtalo, valjani te ćerel diso pobuter. Ov ćerđa but buća e Jehovase. Na primer, nadgledinđa e manušen đi ćerđe e Jehovaso hram aso kova valjanđa lenđe efta berš (1. Kralj. 6:38; 9:1). Ama, palo sa akala buća kola ćerđa, ov haljilo so i najvažno buti tani te služini e Jehovase. Ov phenđa: „Odolese, so šaj te phena ko krajo? Nek ovel tut dar ando ćaćutno Devel hem ićer tut ko olese zapovestija“ (Prop. 12:13; w22.05 22 ¶8).

Ki Biblija isi but primerija kola mothovena so o Jehova spremno oprostinđa e manušenđe. Da li avela tuće disavo primer ki godi? Šaj razmislineja ando kralj Manasija. Ov hine but lošno manuš hem ćerđa but lošna buća. Služinđa e hovavne devlenđe hem ćhivđa averen te ćeren odova. Čak mudarđa pe ćhaven ađahar so dinđa len sar žrtva e hovavne devlenđe. Ov đelo odobor dur ko po lošnipe so čak ko Jehovaso hram ćhivđa jekhe idole. Ki Biblija pisini so „ćerđa but buća kola hine lošna anglo e Jehovase jaćha hem ađahar marđa lese muj“ (2. Let. 33:2-7). Ama, ked o Manasija ando vilo kajinđa pe aso odova so ćerđa, o Jehova oprostinđa lese (2. Let. 33:12, 13). Šaj razmislineja hem ando kralj David. Ov ćerđa preljuba hem naredinđa te mudari pe jekh manuš. Ama, ked priznajinđa so ćerđa hem ked ando vilo kajinđa pe, o Jehova spremno oprostinđa lese (2. Sam. 12:9, 10, 13, 14). Akala hem avera primerija mothovena so o Jehova spremno oprostini (w22.06 3 ¶7).

Nane uvek lokho amari nada te ovel zorali. Sar đala o vreme, šaj te ova nestrpljiva đi ađićeraja o Devel te ispunini pe obećanja. Sose? Sebepi so amen hem o Jehova na dikhaja isto ko vreme. Odova so šaj amenđe te dićhol so nakhlja but vreme, e Jehovase nane ađahar sose ov oduvek postojini (2. Petr. 3:8, 9). Ov ka ćerel odova so obećinđa, ama na tegani ked amen mislinaja. So šaj te pomožini amenđe amari nada te ovel zorali đi ađićeraja o Devel te ispunini pe obećanja? (Jak. 5:7). Ov paše e Jehovaja. Ama, mora te verujina so ov postojini hem so „nagradini okolen so revno rodena le“ (Jevr. 11:1, 6). Ako verujinaja so o Jehova postojini, amen ka ova sigurna so ov ka ćerel sa so phenđa. Te šaj amari vera hem ponodri te ovel zorali, amen mora te molina amen e Jehovase hem te čitina oleso Lafi. Amen šaj te ova paše e Jehovaja, iako na dikhaja le. Šaj te vaćera oleja ađahar so ka molina amen olese hem sigurna hijam so ka šunel amen (Jer. 29:11, 12; w22.10 26-27 ¶11-13).

Zamislin akija slika. O Jov bešela ko praho hem isi le but bare dukha (Jov 2:8). Olese amala phenena lese soj tano lošno manuš hem so ništa na vredini. O problemija kola isi le tane phare sar bar, a i dukh palo olese ćhave tharela oleso vilo. Ki početka, o Jov ništa na vaćeri (Jov 2:13). Ama, ako olese amala mislinđe so ov ka irini po dumo e Jehovase sebepi sa odova so ulo lese, on but pogrešinđe. Ko jekh trenutko, ov vazdela po šero hem dikhela len pravo ko jaćha hem phenela lenđe: „Sa đi na merava na ka ćhinavav te ovav besprekorno“ (Jov 27:5). So pomožinđa e Jovese te aćhol zoralo? Iako hine obeshrabrimo, ov na našalđa pi nada so o Jehova ka pomožini lese hem so ka del le snaga. O Jov đanđa so čak ako valjani te merel, o Jehova ka uskrsnini le (Jov 14:13-15; w22.06 22 ¶9).

Amaro Dad o Jehova dinđa amen jekh but šužo poklon, a odova tano i molitva. Amen šaj te molina amen e Jehovase bilo ked, bilo kaj hem ki bilo koja ćhib. Čak šaj te molina amen e Jehovase ando kreveti ki bolnica ili andi čelija ko zatvori hem šaj te ova sigurna so ka šunel amen. Ćaće hijam but zahvalna so dinđa amen akava šužo poklon. O kralj David ceninđa but i molitva. Ov đilabđa e Jehovase: „Nek mi molitva ovela sar kad kova dela pe anglo tute“ (Ps. 141:1, 2). Ko oleso vreme, o sveštenikija koristinđe o kad ko sveto šatori kova hine pažljivo pripremimo (Izl. 30:34, 35). O David manglja pažljivo te razmislini so ka vaćeri ki molitva isto sar so okola kola pripreminđe o kad ćerđe odova pažljivo. Odova hem amen mangaja te ćera sose mangaja amare molitve te oven ugodna e Jehovase (w22.07 20 ¶1-2; 21 ¶4).

O Jehova ka irini o lošnipe. Ov phenela so amen nane amen pravo te irina o lošnipe nekase (Rimlj. 12:20, 21). Amen hijam nesavršena hem na đanaja sa o buća, odolese našti te sudina pravedno sar o Jehova (Jevr. 4:13). Disavo puti amare osećanja šaj te ćhinaven amen te ćera odova soj tano ispravno. O Jakov pisinđa: „E manušesi holi na legari đi e Devlesi pravednost“ (Jak. 1:20). Amen šaj te ova sigurna so o Jehova ka ćerel odova so valjani hem so ka sudini pravedno. Ked oprostinaja, amen mothovaja so isi amen poverenje upro Jehova so pravedno ka sudini. Ked mukhaja o buća ko Jehovase vasta, ađahar mothovaja so hijam sigurna so ov ka cidel sa o lošnipe kova doživinđam. Ko nevo sveto, sa i dukh koja osetinđam više „na ka avel ki godi niti ka pojavini pe ko vilo“ (Is. 65:17; w22.06 10-11 ¶11-12).

Odova so o manuša mrzinena amen tano dokaz so hijam ki Jehovasi strana (Mat. 5:11, 12). Palo progonstvo bešela o Beng. Ama, ov nane pozoralo ando Isus. Odolese so o Isus pomožini amen, amen šaj te propovedina e manušenđe kotar sa o narodija. Ama, đi propovedinaja šaj te oven amen hem disave pharipa. Jekh pharipe kova šaj te ovel amen đi propovedinaja tano so šaj te arakha manušen kola vaćerena aver ćhib. Ki vizija koja dinđa e Jovanese, o Isus prorekninđa so odova na ka ćhinavi amen te propovedina sa e manušenđe (Otkr. 14:6, 7). Sar ispuninđa pe odova? Avdije propovedinaja bute manušenđe ko celo sveto. Ko amaro sajt, o manuša šaj te čitinen amare publikacije kola tane prevodime ko prekalo 1 000 ćhibja. O Vodeće telo odobrinđa te prevodini pe ko prekalo 700 ćhibja i knjiga Ov bahtalo zauvek! kolaja proučinaja e manušencar (w22.07 9 ¶6-7).

O Isus mothovđa saosećanje premalo manuša. O apostol Matej pisinđa: „Ked dikhlja bute manušen, sažalinđa pe upro lende, sose hine mučime hem našalde sar o bakre bizo pastiri“ (Mat. 9:36). A sar o Jehova osetinđa pe? O Isus phenđa: „Ni mo Dad kova tano ko nebo na mangela nijekh kotar akala tikne te našalđol“ (Mat. 18:14). Akala lafija tane but utešna, odolese so mothovena amenđe kobor o Jehova mangela amen. Ćaće, so pošukar upoznajinaja e Isuse, amaro mangipe premalo Jehova ovela pana pobaro. Ked družineja tut e zrelo phralencar hem e phenjencar, šaj te sikljove sar pana pobuter te mothove mangipe hem te ove zrelo. Tu ka dikhe kobor tane bahtale hem so on na kajinena pe so odlučinđe te služinen e Jehovase. Puć len savo iskustvo isi len e Jehovaja. Ked valjani te ane disavi važno odluka, rode olendar savet. Ma bistri so „ked isi but savetnikija sa ka ovel šukar“ (w22.08 3 ¶6-7).

Sare ka oven amen problemija. Ama, na valjani kokri te borina amen olencar. Sar jekh dad kova mangela pe ćhaven, o Jehova uvek brinini pe amendar. Ov tano uzo amende, šunela amare molitve hem mangela te pomožini amenđe (Is. 43:2). Sigurna hijam so šaj te istrajina, odolese so o Jehova dela amen sa so valjani amenđe. Ov phenela so šaj te molina amen olese, dinđa amen po Lafi, i duhovno hrana hem e phralen hem phenjen kola ka pomožinen amen ked odova valjani. But hijam zahvalna amare nebesko Dadese so brinini pe amendar. Ki Biblija pisini: „Amaro vilo radujini pe sebepi oleso“ (Ps. 33:21). Ked koristinaja odova so o Jehova dela amen prekali pi organizacija, amen mothovaja so hijam zahvalna so brinini pe amendar. Isto ađahar, ako mangaja hem ponodri te brinini pe amendar, valjani diso te ćera. Avere lafencar, ako šunaja e Jehova hem ćeraja odova soj tano šukar anglo lese jaćha, ov hem ponodri ka brinini pe amendar (w22.08 13 ¶15-16).

Avdije, but manuša na đanena kase te verujinen. On na đanena da li o manuša kas on poštujinena, sar soj tane o političarija, o naučnikija hem avera ćaće mangena te pomožinen len. Uzo odova, on nane len poverenje upro religiozna vođe. On vaćerena so ićerena pe ko odova so pisini ki Biblija, ama olenge delija na mothovena odova. Odolese tano e manušenđe pharo te verujinen so i Biblija tani knjiga ando Devel. Amen hijam e Devlese sluge hem uverime hijam so ov tano „Devel ando ćaćipe“ hem so uvek mangela te ćerel odova soj tano najšukar amenđe (Ps. 31:5; Is. 48:17). Amen verujinaja ko odova so pisini ki Biblija. Isto ađahar, složinaja amen odoleja so jekh biblijako izučavalac phenđa: „O Devel na hovavi hem sa so phenđa ka ispunini pe. E Devleso narodo verujini ko odova so pisini ki Biblija sose odothe tane e Devlese lafija“ (w23.01 2 ¶1-2).

Amen valjani te pomožina amare phralenđe hem phenjenđe te zorjaćeren pi vera ko Jehova. Disavenđe šaj marena muj olengi porodica, o kolege ki buti ja olenge amala ki škola. Avera šaj isi len disavo pharo nabormipe ja neko but povredinđa len. A disave tane već beršencar krstime hem samći dićhola lenđe so o kraj tano but dur. Sebepi akala buća, disavenđe šaj te ovel but pharo te aćhon verna e Jehovase. O hrišćanija ko prvo veko hine len slična problemija. O apostol Pavle koristinđa e Devleso Lafi te šaj te zorjaćeri e phralengi hem e phenjengi vera. Na primer, šaj disave hrišćanija kola hine len jevrejsko poreklo na đanđe so te vaćeren nekase andi pi porodica kova phenđa so o judaizam tano pošukar ando hrišćanstvo. O lil kova o Pavle pisinđa e Jevrejenđe sigurno but zorjaćerđa len (Jevr. 1:5, 6; 2:2, 3; 9:24, 25). On šaj hine te koristinen odova so pisini ko odova lil te šaj te đanen so te odgovorinen lenđe (w22.08 23-24 ¶12-14).

O manuša ko e Satanaso sveto na đanena kase te verujinen. On tane često razočarime upro političarija, religiozna vođe ili trgovačko sistemi. Olenđe tano but pharo te verujinen pe amalenđe, pe komšijenđe pa čak hem pe familijaće. Ama, akava na iznenadini amen. Ki Biblija tano proreknimo: „Ko poslednja dive. . . o manuša ka oven. . . neverna. . . klevetnikija. . . izdajice.“ On tane asavke sose oponašinena e Satana kova tano devel ando akava sveto hem kase našti te verujini pe (2. Tim. 3:1-4; 2. Kor. 4:4). Sar hrišćanija, amen đanaja so šaj te ovel amen potpuno poverenje upro Jehova. Amen hijam sigurna so ov mangela amen hem so „niked na ka [aćhavi]“ amen (Ps. 9:10). Isto ađahar, šaj te ovel amen poverenje hem upro Isus Hrist, odolese so dinđa po životi amenđe (1. Petr. 3:18). A ando lično iskustvo đanaja so šaj te verujina so o savetija andi Biblija šaj te pomožinen amen (2. Tim. 3:16, 17; w22.09 2 ¶1-2).

O bahtalipe nane diso so samo trenutno osetinaja, već šaj te trajini celo životi. Ki Propoved ki gora, o Isus phenđa: „Bahtale tane okola soj tane svesna so valjani lenđe o Devel [ando pe duhovna potrebe]“ (Mat. 5:3). O Isus đanđa so o manuša tane stvorime te ovel len želja te penđaren e Devle hem te služinen lese. Odola tane amare duhovna potrebe. O Jehova tano „bahtalo Devel“, odolese okola so služinena lese šaj te oven bahtale (1. Tim. 1:11). Da li valjani te ovel amenđe sa šukar ko životi te šaj te ova bahtale? Na. Ki Propoved ki gora, o Isus phenđa so čak hem „okola soj tane tužna“, šaj te oven bahtale. Isto ađahar, phenđa so šaj te oven bahtale hem okola kola tane „progonime sebepi i pravednost“ ili okola kas avera „vređinena“ odolese soj tane e Isusese učenikija (Mat. 5:4, 10, 11). O Isus phenđa so o bahtalipe na zavisini ando amare okolnostija, već kobor hijam paše e Devleja (Jak. 4:8; w22.10 6 ¶1-3).

I razboritost ka pomožini amenđe te haljova so „isi vreme ked trajini pe hem vreme ked vaćeri pe“ (Prop. 3:7). Jekh poslovica phenela so o ćutibe tano sar zlato. Odova značini so podijekh puti tano pošukar te ćutini pe nego te phenel pe diso. Razmislin ando jekh primer. Jekhe iskusno starešina avera skupštine često pućena aso savet ked valjani te rešinen disavo problemi. Olestar jekh aver starešina phenđa: „Ov uvek pazini te na vaćeri disave poverljiva informacije ando avera skupštine.“ Odolese soj tano mudro, o starešine andi olesi skupština but poštujinena le. On tane sigurna so ov na ka vaćeri disave poverljiva buća averenđe. I iskrenost tani pana jekh važno osobina koja ka pomožini amen te ova penđarde sar pouzdana manuša. Amen verujinaja jekhe manušese kova tano iskreno, odolese so đanaja so uvek ka vaćeri o ćaćipe (Ef. 4:25; Jevr. 13:18; w22.09 12 ¶14-15).

But manuša ćerena pe kašuke ked „i ćaćutni mudrost glasno vaćeri ki ulica“ (Posl. 1:20). Premali Biblija, isi trin vrste ando manuša kola odbacinena e Devlesi mudrost: okola soj tane „neiskusna“, okola so „marena muj“ hem okola soj tane „bigođake“ (Posl. 1:22-25). O „neiskusna“ tane okola kola verujinena ko sa so šunena hem lokho šaj te oven prevarime (Posl. 14:15, fusn.). Razmislin ando milionija manuša kolen hovavđe o religiozna hem o politička vođe. On tane šokirime ked haljona so odola vođe hovavđe len. Ama, okola kola pominena pe ko Poslovice 1:22 kokri birinena te aćhon neiskusna sose sviđini pe lenđe odova (Jer. 5:31). On na mangena te đanen odova sostar i Biblija vaćeri niti mangena te šunen e Devlese zakonija. Amen na mangaja te ova sar o manuša kolen šaj lokho te hovavi pe (Posl. 1:32; 27:12; w22.10 19 ¶5-7).

E Devlesi organizacija uvek dela amen smernice kola šaj te zaštitinen amen. Na primer, svako puti ked meninaja amaro broj ando telefoni, amen hijam podstaknime te bićhala odova broj amare starešinenđe te šaj te pomožinen amenđe ked tano diso hitno. Da li ćerđan odova? Uzo odova, šaj te dobina smernice aso odova kuri šaj te garava amen ja kaj šaj te la diso hajbase, ja sar hem ked šaj te pomožina averenđe. Ako na šunaja odola smernice, šaj te rizikujina amaro hem e starešinengo životi. Niked ma bistri so odola verna phralja brininena pe amendar (Jevr. 13:17). But amare phralja hem phenja morandilje te aćhaven po ćher sebepi disavi prirodno katastrofa ja o maribe. Ama, on dena sa pestar te prilagodinen pe ko neve okolnostija hem ćerena pana pobuter ki služba e Jehovase. Sar o hrišćanija ko prvo veko, kola morandilje te aćhaven pe ćhera sebepi o progonstvo, hem akala phralja dena sa pestar te vaćeren i šukar vest (Dela 8:4). I služba pomožini lenđe te razmislinen ando Kraljevstvo, a na ando pe pharipa. Sebepi odova, on tane bahtale hem isi len mir (w22.12 19 ¶12-13).

E Jehovase tano svako manuš vredno. Angleder te bićhali e apostolen te propovedinen, o Isus pomožinđa lenđe te na daran ando okola so ka protivinen pe lenđe (Mat. 10:29-31). Ov vaćerđa lenđe andi jekh but penđardi ćirikli ko Izrael, ando vrapco. Ked o Isus hine ki phuv, odola ćiriklja hine najjeftina. Ama, ov phenđa pe učenikonenđe: „Nijekh olendar na perela ki phuv, a tumaro Dad te na đanel odolese.“ Pana phenđa: „Tumen vredinena pobuter ando but vrapcija.“ O Isus uverinđa pe učenikonen so e Jehovase tano važno svako oleso sluga, odolese nane sose te daran ando progonstvo. E Isusese učenikija sigurno setinđe pe ko odova so o Isus sikavđa len ked dikhlje odole ćiriklen ki služba. Ked god dikheja odole tikne ćiriklen, setin tut so o Jehova but cenini tut odolese so hem tu „vredineja pobuter ando but vrapcija.“ Odolese, nane sose te dara ked avera protivinena pe tuće (w23.03 18 ¶12).

Sare podijekh puti isi amen problemija. Nekase protivinena pe olengi porodica, a avera našalđe pi buti. Ked amare problemija but vreme trajinena, odova šaj but te obeshrabrini amen. O Satana koristini baš asavke prilike te ćhivel amen te mislina so o Jehova na mangela amen. Ov mangela te ćhivel amen te mislina so o Jehova hem olesi organizacija tane kriva aso odova so desini pe amenđe. Diso slično desinđa pe disave Izraelcenđe ko Egipat. Ko početko, on verujinđe so o Jehova ćhivđa e Mojsije hem e Arone te oslobodini len ando ropstvo (Izl. 4:29-31). Ama, kasnije, ked o faraon ćerđa olengo životi te ovel pana popharo, on krivinđe e Mojsije hem e Arone aso pe problemija (Izl. 5:19, 20). On krivinđe e Devlese verna slugen aso pe problemija. Ako ka ovel tut disavo problemi kova but vreme trajini, phrav e Jehovase to vilo ki molitva hem rode lestar te pomožini tut (w22.11 15 ¶5-6).

E Jehovastar avela o đivdipe hem ov isi le moć te irini e manušen ko životi. Asavki moć dinđa hem e prorokose e Ilijase te uskrsnini jekhe udovicake ćhave (1. Kralj. 17:21-23). Uzi Jehovasi pomoć hem o prorok Jelisej uskrsninđa jekhe Sunamkake ćhave (2. Kralj. 4:18-20, 34-37). Akala hem avera primerija mothovena amenđe so o Jehova isi le moć te irini e manušen ko đivdipe. Đi hine ki phuv, o Isus mothovđa so oleso Dad dinđa le asavki moć (Jov. 11:23-25, 43, 44). Akana, o Isus tano ko nebo hem olese tani „dindi sa i vlast ko nebo hem ki phuv.“ Odolese, ov šaj te ispunini o obećanje kova phenela so „sare kola tane ano grobo“ ka uskrsninen hem večno ka živinen (Mat. 28:18; Jov. 5:26-29; w22.12 5 ¶10).

Odoleja so na manglje te šunen e Jezekilje, on odbacinđe e Jehova. O lafija ando avdisutno citati uverinđe le so ov šukar ćerela po zadatko, iako o manuša na manglje te šunen. Isto ađahar, o Jehova pomožinđa lese te haljol so ked ka ispunini pe odova sostar ov vaćeri, o manuša „ka đanen so o proroko hine maškaro olende“ (Jezek. 2:5; 33:33). Akala lafija sigurno but ohrabrinđe e Jezekilje hem ponodri te ćerel o zadatko kova o Jehova dinđa le. Avdije, hem amen šaj te ova hrabra odolese so đanaja so o Jehova bićhali amen te propovedina. Ov čak phenela amenđe so hijam olese svedokija (Is. 43:10). Odija tani ćaće bari čast! Sar so phenđa e Jezekiljese hem amenđe avdije phenela so nane amen sostar te dara (Jezek. 2:6). Sose na valjani te dara ando progonstvo? Odolese so hem amen o Jehova bićhali te propovedina hem isi amen olesi pomoć đi ćeraja odova (Is. 44:8; w22.11 3-4 ¶4-5).

Avdije, amen ceninaja but e phralen kola služinena sar starešine hem sluge pomoćnikija, odolese soj tane on pouzdana manuša. Amen hijam but zahvalna e Jehovase so dinđa amen akale phralen kola but šukar brininena pe amendar. Ama, sar šaj te mothova so amen hijam pouzdana manuša? Amen mangaja amare phralen hem phenjen. Odolese mangaja te đana sar tane. Ama, amen valjani te poštujina olengi privatnost. Disave hrišćanija ko prvo veko „mešinena pe [hine] ko tuđa buća hem vaćerena odova so na bi isminena“ (1. Tim. 5:13). Amen sigurno na mangaja te ova sar olende. Ama, zamislin so jekh phen phenđa tuće so isi la disavo zdravstveno problemi ili disavo aver problemi hem zamolinđa tut te na vaćere nikase odolestar. Tu valjani te ćere odova so zamolinđa tut (w22.09 10 ¶7-8).

O grčko izraz kova tano prevedimo sar „meninen o način sar razmislinena“ šaj te prevedini pe hem sar „obnovinen o način sar razmislinena.“ Na primer, ked obnovinaja ja renovirinaja o ćher, odova na značini so ko ćher ka ćhiva samo nekobor ukrasija. Ked diso renovirinaja odova značini so ćeraja bare promene. Isto ađahar, ako mangaja te menina amaro način sar razmislinaja nane dovoljno samo te ćera nekobor šukar buća. Amen valjani te razmislina save hijam hor andral hem te ćera promene te šaj te živina premalo Jehovase merilija. A odova valjani te ćera stalno, na samo jekhvar. Ked ka ova savršena, amen uvek ka ćera odova so o Jehova mangela. Ama, đi odova vreme na avela valjani te da sa amendar te ćera odova soj tano šukar anglo Jehovase jaćha. Ko Rimljanima 12:2, o Pavle phenđa so valjani te menina amaro način sar razmislinaja te šaj te đana soj tani e Devlesi volja. Ked valjani te ana disavi odluka ili te ćhiva amenđe disavo cilj amen na valjani te dozvolina akava sveto te utičini upro amende, nego valjani te dikha so o Devel mangela te ćera (w23.01 8-9 ¶3-4).

Ked hijam ko pharipa, da li odova značini so Jehova uvek ka ćerel diso te rešini amare problemija? Da li ov utičini ko sa so desini pe ko amaro životi hem da li sebepi odova šaj te phena so aso sa o lošna buća kola desinena pe amenđe isi šukar razlog? Na, i Biblija na vaćeri odolestar (Prop. 8:9; 9:11). Ama, jekh buti đanaja: Ked god isi amen pharipa, o Jehova šunela amare molitve (Ps. 34:15; Is. 59:1). Uzo odova, ov mangela te pomožini amenđe te ikljova ko krajo amare problemencar. Ama, sar ćerela odova? Jekh način sar o Jehova pomožini amen tano ađahar so dela amen uteha hem ohrabrenje hem odova baš tegani ked amenđe valjani (2. Kor. 1:3, 4). Da li šaj te setine tut ked o Jehova tuće pomožinđa ađahar so dinđa tut uteha hem ohrabrenje baš tegani ked valjanđa tuće? But putija, tek ked nakhela amaro problemi, amen haljovaja sar o Jehova pomožinđa amenđe (w23.01 17-18 ¶13-15).

Akija zver izgledini skoro isto sar i zver koja isi la efta šere, samo so akija zver isi la skerletno (loli) boja. Oj vićini pe „kip andi zver“ hem olatar vaćeri pe sar ando „oftoto kralj“ (Otkr. 13:14, 15; 17:3, 8). Odova „kralj“ pojavinđa pe jekh vreme, palo odova više na hine, a kasnije palem pojavinđa pe. Akava ispuninđa pe upro Ujedinjena nacije, i organizacija koja podupirini o političko sistemi. Oj prvo pojavinđa pe sar Društvo naroda. Palo odova prestajinđa te postojini đi trajinđa o Dujto svetsko rat. Ama, kasnije palem pojavinđa pe sar Ujedinjena nacije. Prekali propaganda, o zverija kola predstavinena o politička vlastija, ka ćhiven e manušen te protivinen pe e Jehovase hem olese narodose. O Jovan phenđa so odova ka ovel sar ka phene on „đana ko kraljija ando celo sveto“ te ćeden len aso maribe kova vićini pe Armagedon, o „baro dive ando Svemoćno Devel“ (Otkr. 16:13, 14, 16; w22.05 10 ¶10-11).

Ked o Isus sikljilo kokri te čitini e Devleso Lafi, ov na samo so haljilo so pisini odothe nego manglja odova so čitini hem mukhlja odova te utičini upro leste. Na primer, setinaja amen so hine ko hram ked o Isus hine le 12 berš. O učiteljija kola šukar đanđe e Mojsijeso zakon „hine oduševime odoleja sar [o Isus] odgovorini hem kobor buća haljola“ (Luka 2:46, 47, 52). Ako redovno čitinaja e Devleso Lafi, amen šaj te đana so pisini odothe hem ka manga le. But šaj te sikljova kotar odova so o Isus phenđa okolenđe kola šukar penđarđe o Zakon, e farisejenđe hem e sadukejenđe. On često čitinđe e Devleso Lafi, ama na hine len nisavi korist odolestar. Odova so o Isus vaćerđa olenđe, šaj te pomožini hem amenđe (1) pana pošukar te haljova odova so čitinaja, (2) te arakha biserija ko e Devleso Lafi hem (3) te mukha e Devleso Lafi te utičini upro amende (w23.02 8-9 ¶2-3).

Amen valjani te pazina te na flertujina, te na maćova hem te na vaćera diso so ka povredini averen. Isto ađahar, valjani te cida amen andi zabava kaj isi nasilje, pornografija ili avera lošna buća (Ps. 101:3). Amaro dušmani, o Beng, samo dikhela sar te rumini amaro amalipe e Jehovaja (1. Petr. 5:8). Ako na hijam đangavde, o Satana šaj ki amari godi hem ko amaro vilo te sejini zavist, pohlepa, mržnja, ponos hem ogorčenost (Gal. 5:19-21). Ako na trudinaja amen te cida len ando amaro vilo, on ka barjon sar disavi otrovno biljka hem odova ka anel amenđe problemija (Jak. 1:14, 15). Jekh zamka koja ki početka na dićhola kobor tani opasno tani o lošno društvo. Amen na valjani te bistra so amare amala šaj but te utičinen upro amende (1. Kor. 15:33). Ako pazinaja ko amaro vilo, amen na ka družina amen e manušencar kola na ićerena pe ko Jehovase merilija (Luka 21:34; 2. Kor. 6:15). Amenđe ka ovel jasno so odija tani bari opasnost hem ka cida amen (w23.02 16 ¶7; 17 ¶10-11).

So pobuter sikljiljan ando Jehova to mangipe premalo oleste hine sa pobaro. Tu sigurno mangeja te ove paše oleja akana hem zauvek. Odova tano moguće. O Jehova podstaknini amen te radujina oleso vilo (Posl. 23:15, 16). Tu šaj te ćere odova na samo te lafencar, nego hem odoleja so ćereja. To način sar živineja ka mothovi kobor mangeja e Jehova. A odova valjani te ovel tuće najvažno cilj ko životi. Sar šaj te mothove so mangeja e Jehova? Najangleder ađahar so kokri ki jekh posebno molitva ka predajine to životi e jedino ćaćutne Devlese (Ps. 40:8). Palo odova, javno ka mothove so predajinđan tut e Jehovase ađahar so ka krstine tut. Odova tano o najradosno hem najvažno trenutko ko životi. Tegani, tu ka počmine te živine jekh nevo životi. Više na ka živine tuće, nego e Jehovase (Rimlj. 14:8; 1. Petr. 4:1, 2). Sa akava šaj izgledini tuće pharo, sose tani but važno odluka. Ama, ma bistri so o krštenje phravela tuće udara aso najšukar životi (w23.03 5-6 ¶14-15).