Septembar

Amare lafija šaj averenđe te mothoven so amen služinaja e Jehovase. Ađahar o manuša šaj te dikhen i razlika „maškaro okova kova služini e Devlese hem okova kova na služini lese“ (Mal. 3:18). Te dikha jekh primer. Amari phen i Kimberli hem olaki amalin valjanđe zajedno te ćeren jekh zadatko ki škola. Odija amalin dikhlja so i Kimberli tani averćhane ando avera. Oj nikastar na vaćerđa palo dumo, uvek hine ljubazno hem niked na akošlja. Olaki amalin hine oduševimi hem odolese počminđa te proučini i Biblija. O Jehova tano bahtalo ked sebepi odova sar vaćeraja, o manuša mangena te sikljon olestar. Sare amen mangaja te hvalina e Jehova amare lafencar (w22.04 5-6 ¶5-7).

I Marija Magdalena but patinđa sose ano late hine efta demonija. Odolese šaj samo te zamisline kobor hine zahvalno ked o Isus phenđa odole demonenđe te ikljon olatar. Sebepi odova, oj ulji e Isuseso učeniko hem koristinđa po vreme, pi snaga hem pe materijalna buća te podupirini le ki služba (Luka 8:1-3). Iako i Marija but ceninđa odova so o Isus već ćerđa laće, oj pana na đanđa so o Isus ka ćerel laće ki budućnost. Ov dinđa po životi e manušenđe „te na ovel uništimo nijekh kova mothovi vera ano leste, nego te ovel le večno životi“ (Jov. 3:16). Ama, i Marija mothovđa soj tani zahvalno ađahar so aćhilji verno. Ked o Isus hine kovimo ko stubo, i Marija hine othe te podržini le hem te ohrabrini averen (Jov. 19:25). Palo odova so o Isus mulo, i Marija hem pana duj romnja anđe disavo mirisno ulje ko Isuseso grobo (Mar. 16:1, 2). O Jehova blagoslovinđa e Marija sose aćhilji verno e Isusese. Ked ov uskrsninđa, oj dikhlja le hem vaćerđa oleja, a đanaja so but ando olese učenikija na hine len odija čast (Jov. 20:11-18; w23.01 27 ¶4).

Amen na valjani te mislina so odova so ćerđam angleder tano dovoljno hem so akana na valjani više ništa te ćera. Iako šaj našti te ćera odova so angleder ćerđam, valjani hem ponodri te „ćera buti e Jehovase“ hem te aćhova đangavde đi o krajo (1. Kor. 15:58; Mat. 24:13; Mar. 13:33). Valjani te ova revna hem te služina e Jehovase celone vileja. Odova so o Isus phenđa e hrišćanenđe ki Laodikija mothovi so on hine len jekh aver problemi. Đi služinđe e Jehovase, olengi služba hine „mlako “. Odolese so hine lenđe sa jekh, o Isus phenđa soj tane „jadna hem ćorore“. On valjanđe te oven revna đi služinđe e Jehovase (Otkr. 3:16, 17, 19). So sikljovaja ando odova? Ako našalđam amari revnost, valjani te ćera ko odova te ova pana pobuter zahvalna aso sa o buća kola dela amen o Jehova hem olesi organizacija (Otkr. 3:18). Amenđe na valjani te ovel važno samo te ovel amen šukar životi, već mangaja amari služba e Jehovase te ovel amenđe ko prvo than (w22.05 3-4 ¶7-8).

Beršencar, o Jehova pisini jekh posebno knjiga. Ki odija knjiga tane o anava ando olese verna sluge, počmindoj kotar Avelj (Luka 11:50, 51). Kotar tegani, o Jehova ćhivđa pana anava ki odija knjiga. Avdije, odothe tane pisime milionja anava. Ki Biblija, odija knjiga vićini pe „knjiga ki koja hine o anava ando okola kas o Jehova pamtinđa“, „knjiga ando životi“ hem „svitko ando životi“ (Mal. 3:16; Otkr. 3:5; 17:8). Ki akija knjiga tane pisime o anava ando okola so služinena e Jehovase, ađahar so poštujinena hem mangena oleso anav. On isi len prilika te dobinen o večno životi. Avdije, amaro anav šaj te ovel pisimo ki odija knjiga ako daja sa amendar te ovel amen šukar amalipe e Jehovaja hem ako verujinaja ki Isusesi otkupno žrtva (Jov. 3:16, 36). Sare amen mangaja amaro anav te ovel pisimo ki odija knjiga, bizo obzir da li isi amen nada te živina ko nebo ja ki phuv (w22.09 14 ¶1-2).

I knjiga Otkrivenje vaćeri ando „baro zmaj kova hine lolo sar jag“ (Otkr. 12:3). Akava zmaj borini pe protiv o Isus hem o anđelija (Otkr. 12:7-9). Isto ađahar, ov napadini e Devlese narodo hem o manušikane vladavine dobinena moć olestar (Otkr. 12:17; 13:4). Ama, koj tano o zmaj? Ov tano „o najpurano sap, kova vićini pe Beng hem Satana“ (Otkr. 12:9; 20:2). Ov bešela palo sa e Jehovase dušmanija. Savo ka ovel o krajo ando zmaj? Ko Otkrivenje 20:1-3 pisini so jekh anđeo ka fordel e Satana ko bezdan. Odova e Bengese ka ovel samći tano ko phanlipe. Đi ka ovel ko bezdan, o Satana na ka šaj te „prevarini e narodon đi na nakhena 1 000 berš“. Ko krajo, o Beng hem olese demonija ka oven „fordime ko jezero andi jag hem ando sumpor.“ Odova značini so on zauvek ka oven uništime. Zamislin o sveto kuri na ka oven o Satana hem olese demonija. Odova ka ovel but šužo vreme! (w22.05 14 ¶19-20).

O Isus hine but bućarno manuš. Ked hine terno, ov ćerđa buti sar tesari (Mar. 6:3). Olese roditeljija na hine barvale. Odolese sigurno but ceninđe so o Isus pomožinđa lenđe. Sebepi so hine savršeno manuš, ov but šukar ćerđa pi buti hem e manušenđe sviđinđa pe odova so ćerđa. Sa akava mothovi amenđe so o Isus uživinđa ki pi buti. Ama, iako ćerđa but buti, ov ipak odvojinđa vreme e Jehovase (Jov. 7:15). Kasnije, ked počminđa te propovedini, ov phenđa e manušenđe: „Ma ćeren buti aso habe kova ruminđola, nego aso habe kova na ruminđola hem anela večno životi“ (Jov. 6:27). Isto ađahar, ki Propoved ki gora, phenđa: „Ćeden tumenđe o barvalipe ko nebo“ (Mat. 6:20). Ked ićeraja amen ko Jehovase mudra savetija, tegani šaj te ovel amen ispravno stav premali buti. Sar hrišćanija, amen sikljovaja so valjani te ova „bućarne hem poštena“ ki amari buti (w22.05 22 ¶9-10).

I Evnikija hine šukar primer e Timotejese. Ov sigurno dikhlja so sa odova so olesi daj ćerđa hine ando mangipe premalo Jehova. Isto ađahar, ov dikhlja kobor olesi daj hine bahtali sebepi so služini e Jehovase. But daja avdije „bizo lafi“ pomožinđe pe ćherutnenđe te služinen e Jehovase (1. Petr. 3:1, 2). Sar šaj hem tu te ćere odova? Nek to amalipe e Jehovaja ovela tuće najvažno (Pon. zak. 6:5, 6). Sar but daja hem tu odreknineja tut ando but buća. Šaj na odvojineja vreme tuće, na ćineja odova so valjani tuće hem šaj na soveja dovoljno samo te ćhave te ovel len odova so valjani lenđe. Ama, niked ma ov odobor zauzeto te na ovel tut vreme te zorjaćere to amalipe e Jehovaja. Odvojin vreme ked ka moline tut, ked ka proučine hem ov redovno ko sastankija. Ađahar ka ove pana popaše e Jehovaja hem ka ove šukar primer te porodicaće hem averenđe (w22.04 16 ¶1; 19 ¶12-13).

Amen isi amen mir odolese so na valjani te odlučina sar valjani te sudini pe nekase. O Jehova sar najbaro Sudija, đanela sar najšukar te ćerel odija buti (Rimlj. 14:10-12). Šaj te ova sigurna so o Jehova uvek ka sudini pravedno sose olese merilija tane savršena (Post. 18:25). Ov niked na ka ćerel diso soj tano nepravedno. Jedva ađićeraja o dive ked o Jehova ka cidel sa o lošnipe kola isi amen sebepi amari nesavršenost hem o greh. Ked ka avel odova vreme, o Jehova ka saćari svako amari rana (Ps. 72:12-14; Otkr. 21:3, 4). Sa odova so hine angleder ni ki godi na ka avel amenđe. Đi ađićeraja te avel odova vreme, o Jehova već akana sikavi amen te oprostina sar oleste (w22.06 13 ¶18-19).

Jekh šukar sudija valjani but šukar te penđari o zakon. Ov valjani najšukar te đanel soj tano šukar, a soj tano lošno. So pana valjani te đanel jekh sudija? Angleder te anel disavi odluka, ov valjani te đanel sa o buća kola tane uključime ki disavi situacija. Amen šaj te phena so o Jehova tano najšukar Sudija, sose sa đanela. O Jehova na sudini sar o manuša. Ov uvek haljola sa o buća kola tane uključime ki disavi situacija (Post. 18:20, 21; Ps. 90:8). Na sudini premalo odova so dikhela ja so šunela. Ov đanela so jekh manuš nasledinđa ando pe roditeljija, kobor tano školujimo, sar barilo, kobor šaj te mothovi pe osećanja hem sar haljola o buća. Đanela soj tano ko olese vilo. Odolese so đanela sose diso ćeraja, amen ništa našti te garava olestar (Jevr. 4:13). Odolese, ked o Jehova nekase oprostini, ov ćerela odova sose but šukar penđari le (w22.06 4 ¶8-9).

Amen valjani te đana kola buća o Satana koristinđa te iskušini e Jove, sose odola ista buća šaj te koristini avdije te šaj amen te iskušini. O Satana mangela te phenel so ked amaro životi ka ovel ki opasnost, amen ka irina amaro dumo e Jehovase. Isto ađahar, ov mangela te phenel so o Jehova na mangela amen hem so odova so ćereja ništa na vredini anglo lese jaćha. Odolese so đanaja kova tano e Satanaso cilj, amen na mangaja te verujina ko akala hovajba. Ked isi amen kušnje, šaj te dikha save ćaće hijam andral. Ked o Jov hine le kušnje, šaj hine te dikhel kola slabostija isi le hem te ispravini len. Na primer, ov tegani sikljilo so valjani te ovel pana pobuter ponizno (Jov 42:3). Isto ađahar, hem amen valjani te sikljova diso ked isi amen kušnje. Ked ka đana kola tane amare slabostija, tegani ka đana so valjani te menina koro amende (w22.06 23 ¶13-14).

O Jehova dela amen po lafi so ka pomožini amenđe. Na primer, hari angleder te phenel „tumen hijen me svedokija“, ov pana phenđa: „Ked nakheja kotar panja, me ka ovav tuvaja. Ked nakheja kotar reke, on na ka poplavinen tut. Ked nakheja kotar jag, na ka thabljove hem o plameno na ka tharel tut“ (Is. 43:2). Đi hijam ki služba, disavo puti amare problemija šaj te oven bare sar reka hem amare kušnje sar jag. Ama, amen ipak propovedinaja sose o Jehova pomožini amenđe (Is. 41:13). But manuša avdije na mangena te šunen i šukar vest. Ama, odova nane sose amen na propovedinaja šukar. Amen đanaja so o Jehova tano zadovoljno amencar ked daja sa amendar te propovedina i šukar vest hem odova dela amen snaga hem ponodri te ćera amaro zadatko. O apostol Pavle phenđa: „Svako ka dobini pi nagrada premalo po trud“ (1. Kor. 3:8; 4:1, 2; w22.11 4 ¶5-6).

Anglo amare jaćha dikhaja sar ispuninena pe o proročanstvija andi Biblija. O „manuša ando sa o narodija kola vaćerena razna ćhibja“ sikljona te vaćeren i „čisto ćhib“ ando ćaćipe (Zah. 8:23; Sof. 3:9). Prekalo ofto milionija manuša ko 240 phuvja tane deo andi Jehovasi organizacija, hem svako berš nekobor hiljade manuša krstinena pe. Odova tano baro broj, ama o broj nane najbitno. Najvažno tano so odola manuša razvijinena šukar osobine hem uravena i „nevi ličnost“ (Kol. 3:8-10). But olendar više na ćerena nemoral, nane nasilna hem na ćerena razlike maškaro manuša. Upro lende ispunini pe o proročanstvo ando Isaija 2:4 kuri pisini so o manuša više „na ka sikljon te maren pe“. Ked dikhena amaro ponašanje, o manuša tane privucime ki amari organizacija hem dikhena so sledinaja e Isuse (Jov. 13:35). Amenđe šaj na hine lokho te menina amen, ama uzi Isusesi pomoć uspinđam ko odova (w22.07 9 ¶7-8).

Ked molinaja amen e Jehovase, valjani te mothova baro poštovanje. Razmislin ando vizije kola dobinđa o Isaija, o Jezekilj, o Danilo hem o Jovan. Ki svako vizija, o Jehova tano predstavimo sar najbaro Kralj. O Isaija dikhlja „e Jehova sar bešela ko ućo hem ko uzvišeno presto“ (Is. 6:1-3). O Jezekilj dikhlja e Jehova sar bešela ko nebeska kočije, a okolo leste tani bari svetlost sar duga (Jezek. 1:26-28). A o Danilo dikhlja soj tano „o Najpurano“ uravdo ko parne šeja, a oleso presto hine lolo sar jag (Dan. 7:9, 10). A o Jovan dikhlja so o Jehova bešela ko presto, a uzo presto hine i duga šuži sar zeleno dijamanti (Otkr. 4:2-4). Ked razmislinaja andi Jehovasi bari slava, odova setinćeri amen so isi amen bari čast te molina amen olese hem so valjani te mothova poštovanje đi molinaja amen (w22.07 20 ¶3).

Ternalen, o Satana ka trudini pe ko sa o načinija te ćhinavi tumen te mangen e Jehova hem te služinen olese. Jekh način sar ćerela odova tano ađahar so ćhivela tumen te sumnjinen ko odova so pisini ki Biblija. Na primer, disave manuša šaj ka pokušinen te ubedinen tut so o Devel na postojini hem so amen uljam prekali evolucija. Đi hijan le tikno, šaj na razmislinđan odolestar. Ama, sar barjoveja, šaj ka počmine te sikljove andi evolucija ki škola hem odova so vaćerena te nastavnikija šaj ka izgledini tuće logično. Ama, on šaj niked na rodinđe dokazija da li postojini o Stvoritelj. Ma bistri o načelo ando Poslovice 18:17: „Ko prvo vaćeri ki parnica, dićhola pravedno, sa đi na avela aver te rodel lestar te dokažini odova so phenđa.“ Odolese, umesto te verujine ko sa so sikljoveja ki škola, trudin tut pažljivo te istražine so i Biblija phenela odolestar(w22.08 2 ¶2; 4 ¶8).

Amen mangaja te čitina e Devleso Lafi, ama ako na haljovaja le amen nane amen nisavi korist odolestar. Te dikha so o Isus phenđa jekhe manušese kova šukar penđarđa o Zakon (Luka 10:25-29). Ked ov pućlja le so valjani te ćerel te šaj te dobini o večno životi, o Isus pomožinđa lese te arakhi o odgovor ki Biblija. Ov pućlja le: „So pisini ko Zakon? So uduri čitinđan?“ O manuš đanđa o tačno odgovor. Ov phenđa so valjani te manga e Devle hem amare pašutnen (Lev. 19:18; Pon. zak. 6:5). Ama, palo odova pućlja: „A koj tano mo pašutno?“ Znači, akava manuš na haljilo odova so čitinđa. Odolese našti hine te primenini odova so čitini ando Devleso Lafi. Amenđe valjani e Jehovasi pomoć te šaj te haljova odova so čitinaja. Odolese valjani te molina le te del amen po sveti duh te ovel amen koncentracija đi čitinaja hem te molina le te pomožini amenđe te primenina odova so čitinaja (w23.02 9 ¶4-5).

„Sar upoznajinđan o ćaćipe?“ Sigurno but putija odgovorinđan ko akava pućibe. Odova tano diso prvo so pućaja ked mangaja pana pošukar te upoznajina dijekhe phrale ili phenja. Amen volinaja te šuna sar amare phralja hem phenja upoznajinđe o ćaćipe hem sar zamanglje e Jehova. Ama, uživinaja hem te vaćera lenđe kobor hem amen ceninaja o ćaćipe (Rimlj. 1:11). Ked vaćeraja odolestar, tegani setinaja amen kobor tano o ćaćipe važno. Isto ađahar, ovaja pana poodlučna te živina premalo ćaćipe, a odova značini te živina ko način kova tano ugodno e Jehovase hem kova ka anel amenđe oleso blagoslov. Isi amen but razlogija te manga o ćaćipe. O najvažno razlog tano so mangaja e Jehova, kastar avela o ćaćipe. Ki Biblija na pisini samo soj tano o Jehova moćno Devel kova ćerđa sa so isi ko nebo hem ki phuv, nego hem soj tano amaro Dad kova but mangela amen hem brinini pe amendar (1. Petr. 5:7; w22.08 14 ¶1, 3).

O apostol Pavle podstakninđa e phralen hem e phenjen te mothoven mangipe ađahar so ka ćeren „šukar delija“ (Jevr. 10:24). Ov pomožinđa lenđe na samo odoleja so vaćerđa, već hem odoleja so ćerđa. Na primer, ked ki Judeja hine baro bokhalipe, ov anđa e phralenđe disave buća kola valjanđe lenđe (Dela 11:27-30). Uzo odova so dinđa sa pestar te propovedini, o Pavle uvek razmislinđa hem sar šaj te pomožini okolenđe kase valjani materijalno pomoć. Ađahar, ov zorjaćerđa e phralengi vera ko odova so o Jehova ka brinini pe olendar. Avdije, amen šaj te zorjaćera amare phralen ked koristinaja amaro vreme, snaga hem sposobnostija te pomožina len ked isi disave prirodna katastrofe. Isto ađahar, šaj te ćera odova ked daja amare dobrovoljna prilogija. Ađahar pomožinaja amare phralenđe hem phenjenđe te ovel len pana pobaro poverenje upro Jehova so niked na ka aćhavi len (w22.08 24 ¶14).

I Biblija vaćeri ando but proročanstvija kola već ispuninđe pe, disave olendar čak beršencar angleder so hine pisime. Kasnije, i istorija potvrdinđa so odola proročanstvija ispuninđe pe. Akava na iznenadini amen sose đanaja so sa e biblijake proročanstvija avena ando Jehova. Razmislin andi purani diz Vavilon. Ko 8. veko angl. n. e., o prorok Isaija phenđa so odija bari diz ka ovel osvojimi. Čak phenđa ko ka osvojini la hem sar ka ćerel odova (Is. 44:27–45:2). Uzo odova, o Isaija phenđa so odija diz ka ovel uništimi hem so ka aćhol pusto (Is. 13:19, 20). Ađahar hem hine. Ko 539. berš angl. n. e., o Medijancija hem o Persijancija osvojinđe i diz Vavilon. Ko than kaj hine odija diz akana tane samo ruševine (w23.01 4 ¶10).

O Jehova birinđa amen ando celo sveto te ova deo andi olesi porodica. Odija tani bari čast koja anela amenđe but blagoslovija (Mar. 10:29, 30). Ko celo sveto, isi amen phralja hem phenja kola sar amen mangena e Jehova hem dena sa pestar te živinen ađahar sar so ov mangela. Šaj na vaćeraja isto ćhib, na akharaja ista šeja hem na avaja andi isto kultura, ama amen mangaja jekh jekhe čak iako niked angleder na dikhljam amen. Amen hijam but bahtale ked zajedno olencar hvalinaja amare Dade, e Jehova (Ps. 133:1). On tane othe te pomožinen amen ked isi amen pharipa (Rimlj. 15:1; Gal. 6:2). Isto ađahar, ohrabrinena amen te ćera poviše ki služba e Jehovase hem te aćhova paše uzo leste (Jevr. 10:23-25). Zamislin sar bi osetinaja amen ked amare phralja na bi pomožinena amenđe te borina amen protiv amaro dušmani o Beng hem oleso lošno sveto (w22.09 2-3 ¶3-4).

Šaj te ovel amenđe pharo te mothova samokontrola ked hijam ko društvena mreže. Ako na pazinaja šaj nenamerno te ćhiva diso ko društvena mreže hem ađahar but manuša te dikhen odova. Na valjani te bistra so ako jekh puti ćhivaja diso ko društvena mreže, amen na đanaja so o manuša ka ćeren odoleja hem save problemija odova šaj te ćerel. Podijekh puti šaj te desini pe so o protivnikija ka roden te phena lenđe disave poverljiva buća ando phralja hem phenja, tegani valjani te mothova samokontrola. Ko phuvja kaj tano amaro delo ili disave ando amare aktivnostija zabranime, i policija šaj te rodel amendar disave poverljiva informacije ando phralja. Tegani valjani te da sa amendar te kontrolišina amari ćhib (Ps. 39:1). Amen valjani te ova pouzdana đi vaćeraja averencar, bizo obzir da li tane on amare amala ili tane deo andi amari porodica ili skupština. A te šaj te ova pouzdana, valjani te mothova samokontrola (w22.09 13 ¶16).

Ako mangaja te ova bahtale, amen valjani redovno te la i duhovno hrana. Odolese, o Isus phenđa: „O manuš na živini samo ando maro, nego hem ando svako lafi kova ikljola ando Jehovaso muj“ (Mat. 4:4). Sebepi odova, na valjani te mukha jekh dive te nakhel, a te na čitina e Devleso Lafi, i Biblija. Ko po Lafi, ov phenela amenđe sose živinaja, sar šaj te ova paše oleja hem so valjani te ćera te šaj te oven oprostime amare grehija. Isto ađahar, phenela amenđe hem savo životi ađićeri amen ki budućnost (Jer. 29:11). Odova so sikljovaja andi Biblija ćaće ćerela amen but bahtale! Odolese, ked hijam obeshrabrime sebepi amare problemija, amen valjani pana pobuter te čitina e Jehovaso Lafi hem te razmislina ando odova so čitinđam (w22.10 7 ¶4-6).

I Biblija podstaknini amen te na ova neiskusna, već te „razmislina sar zrela manuša“. Amen šaj te ova zrela manuša, ako primeninaja o načelija andi Biblija ko amaro životi. Ako ka ćera odova, tegani ka dikha sar i Biblija pomožini amen te cida amen ando problemija hem te ana šukar odluke. Odolese, but tano šukar hor te razmislina angleder te ana disavi odluka. Ako već disavo vreme proučineja i Biblija hem aveja redovno ko sastankija, puć tut: „Sose đi akana na predajinđum mo životi e Jehovase hem na krstinđum man? Ako hijan krstimo, tegani sar šaj pana pošukar te ćere ti služba hem te sikave averen? Da li o odluke kola aneja mothovena so ićereja tut ko načelija andi Biblija? Da li premalo avera hijan asavko sar so bi o Isus ovela premalo lende?“ Ako dikheja so šaj te menine diso koro tute, tegani valjani hor te razmisline ando „Jehovase opomene kola dena mudrost okolese kova tano neiskusno“ (Ps. 19:7; w22.10 20 ¶8).

Ki jekh vizija, o Jezekilj dikhlja kobor tano moćno e Jehovaso duho. Ov dikhlja sar odova duho pomožini e moćno anđelenđe hem sar odova duho gurini o bare točkija andi nebesko kočija (Jezek. 1:21). Sar o Jezekilj reagujinđa? Ov phenela so ulo: „Ked odova dikhljum, peljum ki phuv.“ Ov hine le odobor baro strahopoštovanje premalo Devel so pelo ki phuv (Jezek. 1:28). Kasnije, ked god razmislinđa andi akija vizija, odova zorjaćerđa le hem pomožinđa lese te na bistrel so e Jehovaso duho ka pomožini lese te ćerel po zadatko. O Jehova phenđa e Jezekiljese: „Tu so hijan o manušikano ćhavo, ušti te vaćerav tuvaja.“ Odija zapovest hem e Devleso duho dinđe e Jezekiljese snaga koja valjanđa lese te šaj te uštel (Jezek. 2:1, 2). Sa đi o Jezekilj ćerđa pi služba, o Jehova pomožinđa lese prekalo po duho (Jezek. 3:22; 8:1; 33:22; 37:1; 40:1; w22.11 4 ¶7-8).

O prorok Isaija akate phenđa so o Jehova tano sar jekh pažljivo učitelj kova phirela palo pe učenikija hem phenela lenđe kole drumoja valjani te đan. Avdije, hem amen šunaja e Jehovaso glaso palo amende. Sar? But berša angleder, ki Biblija hine pisime e Jehovase lafija. Odolese, ked čitinaja i Biblija, odova tano ka phene šunaja e Jehovaso glaso palo amende (Is. 51:4). So valjani te ćera te šaj te pomožini amen odova so o Jehova sikavi amen prekali pi organizacija hem po Lafi? O Isaija pominđa duj buća. Sar prvo, ov phenđa „odova tano o drumo“, a sar dujto „đan odole drumoja.“ Nane dovoljno samo te đana odova „drumo“, amen valjani hem te „đa odole drumoja“. Amen sikljovaja so o Jehova rodela amendar prekalo oleso Lafi hem o objašnjenja kola dobinaja andi olesi organizacija. Isto ađahar, amen sikljovaja sar šaj te primenina odova so sikljiljam. Te šaj te istrajina hem te ova radosna đi služinaja e Jehovase, amen valjani te sikljova ando Jehova hem te primenina odova so sikljiljam. Tegani, o Jehova ka blagoslovini amen (w22.11 11 ¶10-11).

Palo odova so e Isusese učenikija mulje, ki skupština pojavinđe pe o hovavne hrišćanija (Mat. 13:24-27, 37-39). On vaćerđe „hovavne sikljoviba te šaj te ciden palo peste e učenikonen“ (Dela 20:30). Jekh andi buti koja sikavđe tani so o Isus na dinđa po telo jekhvar zauvek te šaj te akhari o grehija ando but manuša, nego so olesi žrtva valjani te del pe stalno (Jevr. 9:27, 28). Avdije, but manuša verujinena ko akava hovajbe. Na primer, o manuša ko disave crkve svako kurko, podijekh puti čak hem svako dive ćedena pe hem ćerena jekh svečanost. Tegani, on mislinena so o maro hem o vino, ovena e Isuseso doslovno telo hem rat. On verujinena so svako puti ked učestvujinena ki odija svečanost, e Isuseso telo hem rat žrtvujini pe. O manuša ko avera religije na setinena pe odobor često ko Isuseso meribe. But manuša na haljona so tačno značini e Isusesi žrtva (w23.01 21 ¶5).

Đi ka trajini e Isusesi hiljadaberšengi vladavina, o mule ka uskrsninen hem okola kola ka šunen e Jehova ka oven savršena. Pali završno kušnja, sa okola kolen o Jehova ka proglasini soj tane pravedna „ka nasledinen i phuv hem zauvek ka živinen upro late“ (Ps. 37:10, 11, 29). Ko krajo, „o poslednjo dušmani. . . o meribe“ ka ovel „uništimo“ (1. Kor. 15:26). Amari nada pomožini amen te aćhova verna ko akala phare dive. Ama, amen na služinaja e Jehovase samo sebepi o večno životi. Amaro glavno razlog sose hijam verna e Jehovase hem e Isusese tano sose but mangaja len (2. Kor. 5:14, 15). Sebepi odova, amen mangaja te oponašina len hem averenđe te vaćera andi odija nada (Rimlj. 10:13-15). O Jehova ka ovel amaro amal ako daja sa amendar te na ova sebična, već velikodušna (w22.12 6-7 ¶15-16).

Ked hijam progonime, našti te ćera but buća kola anena amenđe mir. Amen šaj te brinina amen hem te dara so ka ovel ponodri. Nane pogrešno te razmislina akalestar. Ama, mora te pazina. O Isus phenđa so sebepi o progonstvo disave šaj te spotakninen pe (Jov. 16:1, 2). O Isus na phenđa samo so ka ovel amen progonstvo nego hem so ka pomožini amen te aćhova verna (Jov. 15:20; 16:33). Ked amaro delo tano zabranimo ja ograničimo, amen šaj te dobina disave smernice andi podružnica hem ando starešine. Odola smernice šaj te zaštitinen amen, te pomožinen amen te ovel amen duhovno hrana hem te nastavina te propovedina kobor god šaj. De sa tutar te ićere tut ko odola smernice, čak iako disavo puti šaj na ka haljove len (Jak. 3:17). Isto ađahar, niked ma vaćer o poverljiva informacije ando amare phralja hem phenja ja disave buća andi skupština okolenđe kola nane len pravo te đanen (Prop. 3:7; w22.12 20-21 ¶14-16).

Avdije, o Isus vodini amen đi propovedinaja ando Devleso Kraljevstvo. Ov phenđa so ka pomožini amen hem ićeri pe ko po lafi. Prekali organizacija, o Isus sikavi amen sar te propovedina hem dela amen sa so valjani amenđe asi služba (Mat. 28:18-20). Amen šunaja e Isuse ađahar so daja sa amendar te propovedina hem te sikava e manušen. Isto ađahar, trudinaja amen te ova đangavde đi na avela o krajo kotar akava sveto. Primeninaja o savet ando Jevrejima 6:11, 12 hem hijam sigurna so amari „nada ka ispunini pe“. O Jehova odlučinđa ked ka uništini e Satanaso sveto. Ked ka ovel odova, o Jehova ka ispunini sa pe obećanja andi Biblija. Ama, podijekh puti šaj te mislina so o krajo harini. Tegani, na valjani te bistra so e Jehovaso dive „na ka harini“ (Avak. 2:3). Amen valjani te ova odlučna te ova „đangavde hem te ađićera e Jehova [amare] Spasitelje“ (Mih. 7:7; w23.02 19 ¶15-16).

E manušese kova mangela te ukljel ki planina, jedino cilj tano te resel đi o vrh. Ama đi ukljela, ov terđola te odmorini pe hem te dikhel kobor tani i priroda šuži. Isto ađahar hem amen valjani te terđova hem te razmislina ando odova kobor o Jehova pomožini amen ked isi amen disavo pharipe. Ko krajo ando svako dive, puć tut: „Da li dikhava sar o Jehova avdije blagoslovinđa man? Iako mo problemi pana trajini, da li haljovava sar o Jehova pomožini maje te istrajinav?“ Probin te setine tut barem jekh buti ki koja o Jehova pomožinđa tuće. Svako amendar molini pe e Jehovase te nakhel oleso problemi hem odova tano normalno (Fil. 4:6). Ama, isto ađahar valjani te razmislina kola blagoslovija o Jehova dela amen avdije. Ov dela po lafi so ka zorjaćeri amen hem so ka pomožini amenđe te istrajina. Odolese, mothov so hijan zahvalno e Jehovase. Ka dikhe so o Jehova ka pomožini tuće te ove uspešno hem te istrajine ko svako pharipe (Post. 41:51, 52; w23.01 19 ¶17-18).

Puć kokri tut: „Da li mo način sar živinava mothovi so haljovava kobor tano paše o krajo ando akava sveto? Da li me odluke ando odova savo obrazovanje ka ovel man hem savi buti ka ćerav mothovena soj tani maje i služba e Jehovase ko prvo than? Da li verujinava so o Jehova ka del sa so valjani maje hem me porodicaće ili but brininava man ando materijalna buća?“ O Jehova tano but bahtalo ked dikhela so ćeraja olesi volja ko sa (Mat. 6:25-27, 33; Fil. 4:12, 13). Amen valjani redovno te proverina sostar razmislinaja hem palo odova ako valjani te ćera disave promene. O Pavle phenđa e hrišćanenđe ko Korint: „Ispitinen tumen da li hijen ki vera, proverinen kokri tumen“ (2. Kor. 13:5). Amen valjani te menina amaro način sar razmislinaja ađahar so ka čitina e Devleso Lafi, ka razmislina sar o Devel hem ka ćera o buća kola radujinena le (1. Kor. 2:14-16; w23.01 9 ¶5-6).