Novembar

Nijekh phral ja phen na ka koristini ružna lafija hem na ka akoši. Ama, isi hem avera načinija sar šaj amare lafencar te povredina averen hem valjani te pazina te na koristina asavke lafija. Na primer, na valjani te vaćera lošno andi nekasi kultura ja nacija. Isto ađahar, na mangaja te povredina averen ađahar so ka mara lenđe muj. Zorjaćer averen te lafencar. De sa tutar te pohvaline nekas umesto te kritikujine ja te žaline tut. Iako o Izraelcija hine len but razlogija te oven zahvalna, on stalno žalinđe pe. Ako amen stalno žalinaja amen hem avera ka počminen te ćeren odova. Setin tut so ulo ked o deš uhodija anđe lošno izveštaj. Sa o Izraelcija počminđe te buninen pe protiv o Mojsije (Br. 13:31–14:4). Ki aver strana, i pohvala šaj te del nekase but bari snaga. Odolese, ked god šaj pohvalin te phralen hem te phenjen (w22.04 8 ¶16-17).

Pana ko purano vreme, o Jehova pomožinđa bute ternenđe te oven olese amala. Ov mangela hem te ćhavenđe te pomožini te oven olese amala ako on odova mangena (1. Kor. 3:6, 7). Čak iako te ćhave na služinena olese celone vileja, ov hem ponodri mangela len (Ps. 11:4). Ako on samo hari mothovena so mangena te služinen olese, o Jehova ka ovel spremno te pomožini lenđe te oven paše oleja (Dela 13:48; 2. Let. 16:9). Ov šaj te pomožini tuće te phene odova so valjani ko pravo vreme – tegani ked te ćhavenđe odova najviše valjani (Posl. 15:23). Isto ađahar, šaj te podstaknini dijekhe phrale ja phenja te pomožini te ćhavenđe. Čak ked te ćhave ka barjon, o Jehova šaj te setinćeri len ko odova so tu sikavđan len angleder (Jov. 14:26). O Jehova ka ovel le razlog te blagoslovini tut, ako hem ponodri sikaveja te ćhaven odoleja so vaćereja hem so ćereja (w22.04 21 ¶18).

Odolese so o Satana više našti te đal ko nebo, ov napadini e pomazanikonen kola tane ki phuv sose on tane predstavnikija ando Devleso Kraljevstvo hem „svedočinena ando Isus“ (2. Kor. 5:20; Ef. 6:19, 20). Ko 1918. berš, ofto phralja kola tegani predvodinđe hine osudime ko phanlipe hem svako olendar dobinđa but bari kazna. But manuša mislinđe so i buti koja o pomazanikija tegani ćerđe hine ćhinavdi (Otkr. 11:3, 7-11). Ko mart, ko 1919. berš, odola phralja ikljilje ando phanlipe hem sa olenge kazne hine poništime. Samo so ikljilje, on počminđe te propovedinen i šukar vest. Ama, odova na ćhinavđa e Benge te ćerel problemija e Devlese narodose. Kotar tegani, o Beng ćerđa e Devleso narodo te ovel le baro progonstvo kova hine sar „reka“ (Otkr. 12:15). Odolese, sarinenđe valjani istrajnost hem vera (Otkr. 13:10; w22.05 5-6 ¶14-16).

O apostol Jovan ki vizija dikhlja duj grupe ando manuša kola tane ki Jehovasi strana hem dobinena večna blagoslovija. Ki prvo grupa hine 144 000 manuša. On hine lende andi phuv te vladinen e Isuseja ko nebo (Otkr. 5:9, 10; 14:3, 4). Isto ađahar, o Jovan ki vizija dikhlja sar terđona e Isuseja ki nebesko gora Sion (Otkr. 14:1). Pana kotar prvo veko, hiljade manuša hine birime te oven deo ando 144 000 (Luka 12:32; Rimlj. 8:17). Ama, e Jovanese hine phendo so samo jekh tikno broj ando pomazanikija ka oven đivde ko poslednja dive (Otkr. 12:17). Đi trajini i bari nevolja, on ka oven lende ko nebo te oven avere pomazanikonencar hem te vladinen e Isuseja ko Devleso Kraljevstvo (Mat. 24:31; Otkr. 5:9, 10; w22.05 16 ¶4-5).

O Isus sikavđa pe učenikonen sar valjani te dikhen upro peste. Ov phenđa lenđe: „A tumenđe tane hem sa o bala ko šero đende“ (Mat. 10:30). Akava stih tano but utešno, pogotovo ako mislinaja so ništa na vredinaja. O Jehova brinini pe amendar hem amen hijam but vredna anglo olese jaćha. Ako o Jehova mislini so hijam dostojna akana te služina lese hem ki budućnost te ova ko raj, tegani ko hijam amen te phena e Jehovase so nane u pravu. Angleder 15 berš, ki Stražarsko kula pisinđa so valjani te pazina ko odova sar dikhaja upro amende. Odothe pisini: „Amen na valjani te ovel amen baro mišljenje amendar sose tegani šaj te ova ponosna. Ama, na valjani ni te mislina so ništa na vredinaja. Odolese, valjani te ovel amen ispravno mišljenje amendar, te ova svesna so šaj te ćera, a so našti“ (w22.05 24-25 ¶14-16).

So šaj svako amendar te ćerel te šaj te ovel jekhipe ki skupština? Svako amendar šaj te trudini pe te ćerel te ovel mir (Mat. 5:9; Rimlj. 12:18). Svako puti ked daja sa amendar te ova ko mir averencar ki skupština, amen ćeraja amaro duhovno raj te ovel pana pošužo. Na valjani te bistra so sarinen o Jehova anđa ko duhovno raj te služinen lese (Jov. 6:44). Zamislin kobor tano o Jehova bahtalo ked dikhela so daja sa amendar te ova ko mir hem ko jekhipe olese slugencar kolen ov but mangela (Is. 26:3; Ag. 2:7). O Jehova dela amen but šukar buća. Sar šaj te pomožinen amen odola buća? Ađahar so hor ka razmislina ando odova so čitinaja ko Devleso Lafi hem ko amare publikacije. Odova šaj te pomožini amen te oven amen osobine kola ka podstakninen amen „iskreno te manga jekh jekhe“ (Rimlj. 12:10; w22.11 12-13 ¶16-18).

Ked haljovaja so o Jehova oprostinđa amenđe odova zorjaćeri amen, dela amen mir hem isi amen čisto savest. Jedino ked o Jehova oprostini amenđe, šaj te osetina amen ađahar (Dela 3:19). Ked oprostini amenđe, amen palem ovaja paše oleja, ka phene niked na ćerđam greh. Isto ađahar, ov više na irini pe ko amare grehija hem na kaznini amen sebepi odova (Is. 43:25). Ko oleso Lafi pisini: „Kobor o istok tano dur ando zapad, odobor ov cidela amare prestupija amendar“ (Ps. 103:12). Odolese ked razmislinaja ando odova, ćaće hijam but zahvalna (Ps. 130:4). Ked o Jehova odlučini te oprostini, ov na dikhela kobor tano baro amaro greh. Ov lela ko obzir sa so đanela amendar sar amaro Stvoritelj, Sudija hem sar okova kova dinđa o zakon (w22.06 5 ¶12-14).

O Jehova sarinenđe kola mangena le dela jekh but šuži nada. Ov phenela so pana hari na ka ovel nabormipe, muke, rojbe, dukha hem meribe (Otkr. 21:3, 4). Ov ka pomožini e „krotko“ manušenđe te šaj on te ćeren i phuv te ovel raj (Ps. 37:9-11). Ama, odova soj tano pana považno, ko raj ka ćerel amaro amalipe oleja te ovel pana pozoralo. Sose šaj te verujina so o Devel ka ćerel odova? Odolese so o Jehova uvek ćerela odova so phenela. Ćaće isi amen šukar razlog te ovel amen nada ko Jehova (Ps. 27:14). Jedva ađićeraja o vreme ked o Jehova ka ispunini pe obećanja! (Is. 55:10, 11). Amen mangaja te aćhova verna e Jehovase hem te ova uverime so ov nagradini „okolen kola iskreno rodena le“ (w22.06 20 ¶1; 25 ¶18).

O Jehova tano poglavari andi porodica, odolese šaj te ova sigurna so ov kokri ka ićeri pe ko načelo andi 1. Timoteju 5:8. Ked hijam uverime so o Jehova mangela amen hem amare porodica, ka ova sigurna so ka del amen sa so valjani amenđe (Mat. 6:31-33). O Jehova tano phravde vasteso hem dela amen sa so valjani amenđe. Ked ćerđa i phuv, ov na ćerđa samo o osnovna buća kola valjanena amenđe te preživina, nego pherđa i phuv but šuže bućencar ko kola šaj te uživina (Post. 2:9). Čak iako disavo puti jedva ikljovaja ko krajo, na valjani te bistra so amen ipak uspinaja ko odova. O Jehova niked na ka aćhavi amen bizo ništa (Mat. 6:11). Amen na valjani te bistra so ako žrtvujinaja diso sebepi o Jehova, ov pana akana ka del amen pobuter ando odova so žrtvujinaja, a ki budućnost ka del amen o večno životi (Is. 65:21, 22; w22.06 15 ¶7-8).

I duhovno hrana na valjani samo e manušenđe kola mangena te penđaren o ćaćipe, već sarinenđe. O apostol Pavle pisinđa so ako primeninaja odova so sikljovaja, odova ka pomožini amenđe te penđara „soj tano šukar, a soj tano lošno“. Šaj te ovel amenđe but pharo te ićera amen ko Jehovase merilija, odolese so avdije živinaja ko vreme kuri o manuša nane len nisave merilija. Ama, o Isus phenđa so i duhovno hrana šaj te zorjaćeri amen. Odija hrana avela ando Devleso Lafi. Sar o Isus, hem amen mothovđam so but ceninaja e Devleso anav (Jov. 17:6, 26). Na primer, ko 1931. berš dobinđam anav e Jehovase svedokija. Odoleja mothovđam soj tano amenđe važno e Devleso anav hem so mangaja te ova vićime palo oleso anav (Is. 43:10-12). Uzo odova, ko prevod Novi svet hine ćhivdo e Devleso anav ko svako than kuri hine ikaldo (w22.07 11 ¶11-12).

Ki Biblija pisini andi šukar vest kotar Devleso Kraljevstvo. O Isus uporedinđa o ćaćipe ando Kraljevstvo e barvalipaja kova tano garavdo. Premalo Matej 13:44, o Isus phenđa: „O nebesko Kraljevstvo šaj te uporedini pe e barvalipaja kova tano garavdo ko polje, kova o manuš arakhlja hem palem garavđa le. Palo odova radosno đelo hem bikinđa sa so hine le hem ćinđa odova polje.“ Sar so dikhaja ko stih, akava manuš na rodinđa odova barvalipe. Ama ked arakhlja le, ov hine spremno te ćerel bare žrtve te šaj te dobini le. U stvari, ov bikinđa sa so hine le. Sose? Odolese so đanđa so odova barvalipe hine but vredno. Amen đanaja so ništa ko sveto nane povredno ando odova radosno te služina e Jehovase akana hem te ovel amen nada so ka živina večno. Amaro amalipe e Jehovaja tano povredno ando bilo so sostar valjani te odreknina amen. Amari najbari radost tani te ćera e Jehova „te ovel bahtalo“ (Kol. 1:10; w22.08 15 ¶8-9; 17 ¶12).

Sar o Josif đanđa so i preljuba tani „baro lošnipe“ anglo e Devlese jaćha? Ko Mojsijeso zakon pisinđa: „Ma ćer preljuba“ (Izl. 20:14). Odova zakon hine pisimo oko 200 berš palo e Josifeso meribe. Ama, o Josif đanđa so o Jehova na mangela i preljuba. Na primer, ov sigurno đanđa so o Jehova ćerđa o brak te ovel maškaro jekh rom hem jekh romni. Ov šunđa sar o Jehova duj putija zaštitinđa olese parababa e Sara te na ovel silujimi hem te aćhol verno pe romese e Avrahamese. O Jehova ko slično način zaštitinđa hem olese baba e Rebeka, e Isakese romnja (Post. 2:24; 12:14-20; 20:2-7). O Josif šaj razmislinđa ando akala buća hem ađahar haljilo soj tano šukar, a soj tano lošno anglo e Jehovase jaćha. Odolese so manglja e Jehova, o Josif manglja olese pravedna merilija hem hine odlučno te ićeri len (w22.08 26 ¶1-2).

Angleder mislinđam so o Danilo 12:2 vaćeri ando simbolično uskrsenje ja andi pobari aktivnost ando Devleso narodo palo odova so o protivnikija ko 1918. berš skoro ćhinavđe o propovedanje. Ama, akana haljovaja so akava stih odnosini pe ko uskrsenje kova ka ovel ko nevo sveto. Sose šaj te phena odova? O lafi „praho“ kova koristini pe ko Jov 17:16 značini isto so hem o lafi „grobo.“ Odolese, o lafija ando Danilo 12:2 odnosinena pe ko doslovno uskrsenje kova ka ovel palo odova so ka završinen pe o poslednja dive hem palo Armagedon. So značini odova ked ko Danilo 12:2 phenela pe so disave ka oven uskrsnime aso „večno životi“? Odova značini so okola kola ka uskrsninen hem ka nastavinen te sikljon ando Jehova hem ando Isus hem ka oven lenđe poslušna đi trajini i Hiljadaberšengi vladavina, ko krajo ka dobinen o večno životi (Jov. 17:3; w22.09 21 ¶6-7).

Akava na značini so o Jehova rodela amendar sarinenđe lokho te verujina. Amen verujinaja amare phralenđe odolese so olenge delija mothovđe so šaj te verujina lenđe. Te šaj te ovel tut poverenje upro nekaste, valjani te nakhel vreme. So šaj te pomožini tut te ovel tut poverenje upro phralja? Upoznajin len šukar. Vaćer olencar ko sastankija. Đa olencar ki služba. Ov strpljivo olencar hem sar ka nakhel o vreme, ka dikhe so šaj te ovel tut poverenje upro lende. Ako nekas na penđareja šukar, verovatno ki početka na ka vaćere lese but buća tutar. Ama, sar pošukar upoznajineja le, šaj ka mange te vaćere diso poviše tutar (Luka 16:10). Ama, so šaj te ćere ako disavo phral razočarinđa tut? Ma cide tut odmah olestar, nego de le vreme. Isto ađahar, ma sebepi jekh manuš te našalje to poverenje upro sa o phralja (w22.09 4 ¶7-8).

Te dikha o iskustvo ando amaro phral kova vićini pe Mikejas. Ov setini pe ked jekh phral kova hine le bare odgovornostija ki organizacija, povredinđa le. Ama, o Mikejas hine trezveno hem na mukhlja olese emocije te peraven le. Ov često molinđa pe hem rodinđa e Jehovastar sveti duh hem snaga te istrajini. Ov istražinđa ko amare publikacije odova so valjanđa lese. So sikljovaja olestar? Ako dijekh phral ja phen povredinđa amen, valjani te aćhova smirena hem te trudina amen te kontrolišina amare negativna emocije. Amen na đanaja save okolnostija anđe đi odova neko te vaćeri ja te ćerel diso. Odolese, valjani te molina e Jehova te pomožini amen te haljova sar odija osoba dikhela ko problemi. Ako ćeraja odova, tegani na ka mislina so amare phralja namerno manglje te povredinen amen hem ka ovel amenđe polokho te oprostina lenđe (Posl. 19:11). Ma bistri, o Jehova dikhela so desini pe tuće hem ov ka del tut snaga te istrajine (Prop. 5:8; w22.11 21 ¶5).

Birin amalen kola mangena e Jehova. O šukar amala šaj te pomožinen tut te ove zrelo (Posl. 13:20). O Džulijen, kova akana služini sar starešina, phenela: „Ked hijum le terno, o phralja kasa đeljum ki služba ulje maje šukar amala. On hine but revna hem pomožinđe man te haljovav so hem me šaj te uživinav ki služba. Angleder, rodinđum amalen maškaro okola kola hine me berša hem odolese na hine man but amala.“ Ama, so ako dikheja so neko ki skupština nane tuće šukar društvo? O Pavle đanđa so disave hrišćanija ko prvo veko na živinđe ađahar sar so o Jehova mangela. Odolese phenđa e Timotejese te cidel pe olendar (2. Tim. 2:20-22). Amaro amalipe e Jehovaja tano amenđe but dragoceno. Amen but trudinđam amen o Jehova te ovel amaro amal. Odolese, na valjani nikase hem nisose te mukha te rumini odova amalipe (w22.08 5-6 ¶13-15).

Amen na mangaja te ova sar o manuša kola mrzinena e Devlese savetija. Umesto odova, amen sikljovaja te manga o način sar o Devel razmislini, avere lafencar olese moralna merilija. Razmislin ando odova save problemija isi len o manuša kola odbacinena e Devlese mudra savetija. Palo odova, razmislin kova šukaripe isi tut sebepi so šuneja e Devle (Ps. 32:8, 10). O Jehova sarinenđe dela pe mudra savetija hem nikas na mangela silaja te ćhivel te prihvatinen odola savetija. Ama, ipak vaćeri amenđe so ka ovel okolencar kola na mangena te šunen olesi mudrost (Posl. 1:29-32). Okola kola na šunena e Jehova „ka trpinen o posledice ando odova so ćerđe.“ Sar đala o vreme, on ka osetinen i dukh kola anena o lošna posledice hem ko krajo ka oven uništime. Ki aver strana, okolenđe kola šunena e Jehovase mudra savetija hem ićerena pe ko odova so sikljona, o Jehova phenela: „Ko man šunela ka ovel le mir hem ka živini mirno, na ka daral ando lošnipe“ (Posl. 1:33; w22.10 21 ¶11-13).

Te ovel amen dar ando Jehova značini so odobor poštujinaja le so cidaja amen ando sa so šaj te povredini le (Posl. 16:6). Odolese, valjani te da sa amendar te ićera amen ko Jehovase merilija aso odova soj tano šukar, a soj tano lošno sar so pisini ki Biblija (2. Kor. 7:1). Amen ka ova bahtale, ako ćeraja odova so o Jehova mangela hem cidaja amen ando odova so ov mrzini (Ps. 37:27; 97:10; Rimlj. 12:9). Jekh manuš šaj đanela so o Jehova isi le pravo te odlučini soj tano šukar, a soj tano lošno. Ama, ov mora hem te ićeri pe ko Devlese merilija (Rimlj. 12:2). Amen odoleja so ćeraja mothovaja da li ćaće verujinaja so e Jehovase merilija tane aso amaro šukaripe (Posl. 12:28). O David ćaće verujinđa hem odolese phenđa: „Mothoveja maje o drumo kova legari ko životi. But hijum bahtalo ked terđovava anglo tute, ko to desno vas isi večno bahtalipe“ (Ps. 16:11; w22.10 8 ¶9-10).

O Isus mothovđa soj tano ponizno manuš. Angleder te avel ki phuv, ov pe Dadeja ćerđa but buća. Ki Biblija pisini so prekalo oleste „sa avera buća hine stvorime, sa soj tano ko nebo hem sa soj tano ki phuv“ (Kol. 1:16). Ked alo ki phuv hem ked krstinđa pe, ov setinđa pe ko sa odova so ćerđa đi hine ko nebo (Mat. 3:16; Jov. 17:5). Ama, ov na dozvolinđa sebepi odova te ovel ponosno. Iako đanđa but buća, ov na mislinđa soj tano pošukar averendar. O Isus phenđa pe učenikonenđe so „na alo te služinen lese, nego alo te služini hem te del po đivdipe sar otkupnina butenđe“ (Mat. 20:28). Isto ađahar, ov hine but skromno manuš. Odolese hem phenđa so na ćerela ništa kokri pestar. Ćaće, ov hine but ponizno hem amen šaj but te sikljova olestar (w22.05 24 ¶13).

Ked odlučini da li nekase ka oprostini, o Jehova razmislini da li odova manuš đanđa so odova so ćerđa tano pogrešno. Odolestar vaćerđa o Isus ko Luka 12:47, 48. Ako jekh manuš planirini te ćerel odova so o Jehova na mangela, tegani ćerela ozbiljno greh. Ki asavki situacija, o Jehova šaj te odlučini te na oprostini odole manušese (Mar. 3:29; Jov. 9:41). Ama, da li šaj te nadina amen so o Jehova ka oprostini? Ja, odolese so o Jehova dikhela da li odova manuš ćaće kajini pe. Ked neko kajini pe, odova značini so „menjini po način sar razmislini hem po stav.“ Ov mothovi soj tano olese but žao sebepi odova so ćerđa. Ama, žao lese hem sose na ćerđa o šukar buća kola valjanđa te ćerel. Odija osoba tani tužno na samo sebepi so ćerđa odova soj tano lošno, već hem so dozvolinđa olako amalipe e Jehovaja odobor te slaboni so ćerđa greh (w22.06 5-6 ¶15-17).

Amare dušmanija prekalo medije hem društvena mreže širinena hovajbe hem pogrešna informacije ando phralja kola predvodinena ki organizacija (Ps. 31:13). Disave phralja tane ćhivde ko phanlipe hem optužime soj tane kriminalcija. Ko prvo veko, o hrišćanija hine len isto problemi ked o apostol Pavle hine nepravedno optužimo hem phanlo. Disave hrišćanija ko prvo veko na pomožinđe e Pavlese ked hine ko phanlipe ko Rim (2. Tim. 1:8, 15; 2:8, 9). Zamislin sar tegani o Pavle osetinđa pe. Ov hine le but problemija hem čak rizikujinđa po životi sebepi olende (Dela 20:18-21; 2. Kor. 1:8). Amen na valjani te ova sar okola so aćhavđe e Pavle ked najviše valjanđe lese. Odolese, na iznenadini amen so o Satana posebno napadini e phralen kola predvodinena. Ov na mangela odola phralja te oven verna e Jehovase hem odoleja mangela amen te daravi (1. Petr. 5:8). Pomožin te phralenđe hem ov uzo lende (2. Tim. 1:16-18; w22.11 16-17 ¶8-11).

O zločinco kova kajinđa pe verovatno hine Jevrejin. O Jevreja služinđe jekhe Devlese. Ama, o manuša ando aver narodija služinđe bute devlenđe (Izl. 20:2, 3; 1. Kor. 8:5, 6). Ked bi akava zločinco ovela ando aver narodo, tegani o pućibe ando avdisutno stiho bi ovela: „Na daraja li ando devela?“ Isto ađahar, o Isus na hine bićhaldo e manušenđe ando avera narodija, već „e našalde bakrenđe ando izraelsko narodo“ (Mat. 15:24). O Jehova phenđa e Izraelcenđe so ka vazdel e mulen. Akava zločinco verovatno razmislinđa odolestar so o Jehova ka uskrsnini e Isuse hem so ka ćhivel le te ovel Kralj ko oleso Kraljevstvo. Odolese nadinđa pe so hem ole ka vazdel. Sar Jevrejin, ov đanđa ko hine o Adam hem i Eva hem so o Jehova ćhivđa len te živinen ko raj ki phuv. Odolese ked o Isus vaćerđa lese ando raj kova pomini pe ko Luka 23:43, ov verovatno haljilo so odova tano jekh šužo vrt akate ki phuv (Post. 2:15; w22.12 8-9 ¶2-3).

Amen šaj te propovedina samo sebepi so e Jehovaso duho pomožini amenđe. Sose phenaja odova? Odolese so o Beng borini pe protiv amende hem mangela te ćhinavi amen te propovedina (Otkr. 12:17). O manuša mislinena so o Beng tano odobor zoralo so amen našti te borina amen oleja. Ama, ked propovedinaja, amen odoleja pobedinaja e Benge (Otkr. 12:9-11). Sar odova? Ked đaja ki služba, amen mothovaja so na daraja e Bengestar hem ađahar pobedinaja le. Ando akava haljovaja so amen šaj te propovedina, čak iako isi amen progonstvo, odolese so o Jehova zorjaćeri amen prekalo po duho hem odolese so ov tano ki amari strana (Mat. 5:10-12; 1. Petr. 4:14). E Jehovaso sveti duh šaj te pomožini hem amenđe, bizo obzir savo problemi isi amen ki služba (2. Kor. 4:7-9). So valjani te ćera te šaj te dobina e Jehovaso sveti duh? Valjani te molina amen hem te ovel amen poverenje so o Jehova ka šunel amare molitve (w22.11 5 ¶10-11).

Amen mothovaja mangipe amare phralenđe hem phenjenđe hem ked daja sa amendar te ova ko mir olencar. Mangaja te oponašina e Jehova ađahar so spremno ka oprostina. Ako o Jehova hine spremno te del pe Ćhave te merel amenđe, tegani hem amen valjani spremno te oprostina amare phralese kova povredinđa amen. Amen na mangaja te ova sar o lošno robo ando Isuseso poređenje. Iako oleso gospodari oprostinđa lese o dugo kova hine but baro, ov na manglja te oprostini jekh but potikno dugo avere robose (Mat. 18:23-35). Odolese, ako isi tut disavo problemi te phraleja ja te phenjaja, da li bi šaj tu prvo te đa hem te vaćere te phraleja ja te phenjaja angleder i Spomen-svečanost? (Mat. 5:23, 24). Ađahar šaj te mothove kobor ćaće mangeja e Jehova hem e Isuse (w23.01 29 ¶8-9).

Jekh način sar šaj te đane so valjani e phralenđe tano ađahar so ka ove taktično (Posl. 20:5). Da li isi len tablete, so te han ja diso aver so valjani lenđe? Da li isi mogućnost te aćhon bizi buti ja da li isi len dovoljno pare te platinen i kirija? Da li valjani te pomožine len te ćeren o lila asi disavi materijalno pomoć? O Jehova phenela so sare amen valjani te ohrabrina hem te pomožina jekh jekhese (Gal. 6:10). Disavo puti šaj te ćera disavi tikni buti okolese kova tano nabormo, ama ole odova šaj but te ohrabrini. Na primer, amare tikne šaj te crtinen ja te pisinen diso so ka ohrabrini jekhe phrale. Jekh terni osoba šaj te pazarini ja te ćerel diso ko ćher jekha phenjaće. Avera šaj te pripreminen diso hajbase hem te legaren odova okolese kova tano nabormo. Disave starešinenđe, kola sebepi i epidemija hine len pana pobari buti ki skupština, o objaviteljija bićhalđe jekh tikno lil kuri pisinđe soj tane zahvalna aso sa odova so ćerena. Kobor tano šukar ked svako amendar „tešini hem ohrabrini jekh jekhe“! (1. Sol. 5:11; w22.12 22 ¶2; 23 ¶5, 6).

O sadukeja but šukar đanđe so pisini ko prva panđ knjige ando Devleso Lafi, ama na manglje te prihvatinen odova. Na primer, zapazin sar o Isus odgovorinđa e sadukejenđe ked pućlje le diso ando uskrsenje. Ov pućlja len: „Na čitinđen li ki Mojsijesi knjiga ko izveštaj ando grm, sar o Devel phenđa lese: ’Me hijum e Avrahameso Devel, e Isakeso Devel hem e Jakoveso Devel‘?“ (Mar. 12:18, 26). Iako o sadukeja but putija čitinđe akava izveštaj, e Isuseso pućibe mothovi so on na prihvatinđe odova so e Devleso Lafi sikavi ando uskrsenje (Luka 20:38). So sikljovaja akalestar? Ked čitinaja, amen mangaja te đana so odova stih ja izveštaj mangela te sikavi amen. Amen na mangaja te haljova samo o osnovna buća, već hem o hor buća hem o načelija. On tane garavde sar soj tano garavdo o biser (w23.02 11 ¶9-10).

Sa o svedokija kola pominena pe ko avdisutno stiho hine len bare pharipa, ama ipak aćhilje verna e Jehovase (Jevr. 11:36-40). Da li odova so hine verna hem istrajna hine uzaludno? Naravno so na! Iako na hine len prilika te dikhen sar o Jehova ispunini pe proročanstvija, on na našalđe pi nada. Odolese so hine sigurna soj tano o Jehova ki olengi strana, on hine uverime so jekh dive ka dikhen sar o Jehova ispunini pe obećanja (Jevr. 11:4, 5). Olengo primer šaj te zorjaćeri hem amen te na našala amari nada. O sveto ko kova živinaja ovela sa pološno (2. Tim. 3:13). O Satana pana na ćhinavđa te iskušini e Devlese narodo. Ama, save god pharipa te oven amen, amen hijam odlučna te ćera buti e Jehovase hem te na našala amari nada (1. Tim. 4:10; w22.06 25 ¶17-18).

Jekh razlog sose valjani te arakha amaro sastipe tano sose mangaja te služina e Jehovase najšukar so šaj (Mar. 12:30). Odolese, na ćeraja o buća sebepi kola šaj te našala amaro sastipe (Rimlj. 12:1). Amen đanaja so našti uvek te ova saste, ama valjani te da sa amendar te arakha amaro sastipe sose ađahar ka mothova e Jehovase so ceninaja o poklon kova dinđa amen – amaro životi. O nabormipe hem o phuripe šaj te ćhinaven amen te ćera odova so angleder ćerđam. Odolese šaj te osetina amen tužna hem so ništa na vredinaja. Ama, na valjani sebepi odova te vazda amare vasta ando amaro sastipe. Sose? Odolese so kobor god te ova phure ja naborme, amen pana šaj te hvalina e Jehova, sar so ćerđa o David. But ohrabrini amen odova so đanaja so anglo Jehovase jaćha amen hijam but vredna, iako hijam phure ja naborme (Mat. 10:29-31). Čak ako jekh dive ka mera, o Jehova ka uskrsnini amen (Jov 14:14, 15). Đi pana hijam đivde, mangaja te ćera sa so šaj te arakha amaro sastipe hem amaro životi (w23.02 20-21 ¶3-5).

Da li o anava kotar baro mnoštvo tane već akana pisime ki knjiga ando životi? Ja. Da li olenge anava ka aćhon ki knjiga ando životi hem palo Armagedon? Ja (Otkr. 7:14). O Isus phenđa so o avera bakre ka dobinen „o večno životi“ (Mat. 25:46). Ama, okola so ka preživinen o Armagedon na ka dobinen odmah o večno životi. Olenge anava ka aćhon pisime ki knjiga ando životi olovkaja, sar soj tano akana. Ama, ki Hiljadaberšengi vladavina, o Isus „ka legari len ko thana kotar avela o pani ando životi.“ Okola kola ka šunen e Isuse hem ka aćhon verna e Jehovase hem ki završno kušnja, olenge anava ka oven zauvek pisime ki knjiga ando životi (Otkr. 7:16, 17). Ama, o simbolična jarcija ka oven uništime ko Armagedon. O Isus phenđa so on „ka đan ko večno meribe“ (Mat. 25:46). O apostol Pavle phenđa so on „ka oven kaznime ađahar so ka oven večno uništime“ (2. Sol. 1:9; 2. Petr. 2:9; w22.09 16 ¶7-8).

Ked o porodice uživinena ko buća kola o Jehova ćerđa, on tane opuštena hem bahtale. Odova pomožini lenđe pana pobuter te mangen jekh jekhe. O Jehova ćerđa but šuže thana ki phuv kuri šaj te ćera o buća kola mangaja. But porodice volinena zajedno te đan negde ki priroda, ko gav, ko planine ja ko more. Ko nevo sveto, o roditeljija hem o ćhave ka uživinen ko sa odova so avdije našti. Akana daraja ando disave životinje, ama tegani na ka dara olendar niti on ka daran amendar (Is. 11:6-9). Ka ovel amen vreme kobor god mangaja te uživina ko odova so o Jehova stvorinđa (Ps. 22:26). Đi sikavena tumare ćhaven ando Jehova, verovatno hem on ka složinen pe odoleja so o kralj David phenđa: „Jehova, nane asavke delija sar soj tane tekle“ (Ps. 86:8; w23.03 25 ¶16-17).