Decembar

Da li o Etiopljanin hine spremno te krstini pe? Razmislin, ov „hine ko Jerusalim te poklonini pe e Devlese“ (Dela 8:27). Verovatno prihvatinđa i jevrejsko religija. Isto ađahar, sigurno sikljilo ando Jehova kotar Hebrejska spisija. Ama, ipak manglja te đanel diso pobuter. Ked o Filip reslja le ko drumo, ov čitinđa o svitko ando prorok Isaija (Dela 8:28). Manglja te đanel o pohor buća. Ov putujinđa baro drumo andi Etiopija đi o Jerusalim te šaj te đal ko hram. O Filip sikavđa le disave važna buća. Na primer, haljilo soj tano o Isus, o Mesija (Dela 8:34, 35). Oleso mangipe premalo Jehova hem oleso Ćhavo barilo. Odolese, ov manglja te krstini pe hem te ovel e Isuseso sledbeniko. O Filip dikhlja soj tano spremno hem odmah krstinđa le (w23.03 8-9 ¶3-6).

Amen našti te ugodina e Jehovase ako hovavaja. Ov mrzini svako hovajbe (Posl. 6:16, 17). Iako avdije e manušenđe tano normalno te hovaven, o Jehova mangela ko hovajba te dikha ađahar sar so ov dikhela (Ps. 15:1, 2). Naravno, amen na hovavaja. Ama, ki aver strana na garavaja disave buća samo sose mangaja te ćhiva nekas te mislini diso so nane ćaće. Isto ađahar, ma vaćer averendar palo dumo (Posl. 25:23; 2. Sol. 3:11). Ako anglo tute neko počmini te vaćeri lošno averendar, tegani ćhinav odova razgovor hem počmin te vaćere diso šukar. Amen živinaja ko sveto kuri o manuša koristinena ružna lafija. Odolese, valjani te da sa amendar amare lafencar te ugodina e Jehovase. Ov ka blagoslovini amen ked daja sa amendar amare lafencar te hvalina le ki služba, ko sastankija hem đi vaćeraja averencar. Ked o Jehova ka uništini akava lošno sveto, amenđe ka ovel polokho te hvalina le amare lafencar (Jud. 15; w22.04 9 ¶18-20).

Ked razmislinaja kobor o Jehova hem o Isus mangena amen, odova podstaknini amen hem amen te manga olen (1. Jov. 4:10). Pana pobuter mangaja len ked haljovaja so o Isus mulo amenđe. O apostol Pavle haljilo odova hem ked pisinđa e hrišćanenđe ki Galatija mothovđa kobor tano zahvalno aso odova. Ov phenđa: „E Devleso Ćhavo. . . manglja man hem dinđa po đivdipe maje“ (Gal. 2:20). Sebepi so o Isus mulo, o Jehova šaj te privucini tut koro peste hem te ove oleso amal (Jov. 6:44). Sigurno hem tu hijan but bahtalo ked đaneja so o Jehova dikhlja odova soj tano šukar koro tute hem so platinđa bari cena te šaj te ove oleso amal. Akana pana pobuter mangeja e Jehova hem e Isuse. Odolese, šukar tano te puća amen: „So odova mangipe valjani te podstaknini man te ćerav?“ Amaro mangipe premalo Devel hem o Isus podstaknini amen te mothova mangipe averenđe (2. Kor. 5:14, 15; 6:1, 2; w23.01 28 ¶6-7).

I Biblija tani jekh važno alati kova o Jehova koristini te šaj te služina lese „piko pikeja.“ Ki Biblija isi but stihija kola tane pisime ko asavko način so šaj te haljon len samo o ponizna manuša (Luka 10:21). O manuša ko celo sveto čitinena i Biblija. Ama, samo o ponizna manuša šaj te haljon odova so čitinena ki Biblija hem te primeninen olake savetija (2. Kor. 3:15, 16). Amen dikhaja e Jehovasi mudrost prekali Biblija. O Jehova prekali Biblija sikavi amen na samo sar grupa nego hem sar pojedincija. Ked čitinaja i Biblija, amen dikhaja so o Jehova brinini pe svakonese amendar (Is. 30:21). Kobor putija desinđa pe tuće đi čitineja i Biblija te arakhe disavo stih kova tano ka phene pisimo baš tuće? Odova soj tano pisimo ki Biblija šaj te resel đi ko svakoneso vilo. Ama, oj tani but purani knjiga, sar šaj koro late te pisini baš odova so valjani tuće avdije? Odolese so olako Autor tano i najmudro osoba ko celo svemir (2. Tim. 3:16, 17; w23.02 4-5 ¶8-10).

Amen but mangaja e Jehova hem odolese mangaja te da olese amaro najšukar. Te šaj te ćera odova, valjani te ćhiva amenđe disave ciljija, sar soj tane: te ćera ko amare osobine, te ćera ko amare veštine hem te dikha sar šaj te pomožina averenđe. Sose valjani hem ponodri te napredujina? Sar prvo, ađahar radujinaja amare nebesko Dade. O Jehova tano bahtalo ked dikhela so amare sposobnostija koristinaja te služina olese. Sar dujto, mangaja pana pobuter te pomožina amare phralenđe hem phenjenđe (1. Sol. 4:9, 10). Kobor god berš te ova ko ćaćipe, sare amen valjani hem ponodri te napredujina (w22.04 22 ¶1-2).

O politička elementija ando akava sveto pana hari ka napadinen o Baro Vavilon, i hovavni religija. Tegani, ka počmini i bari nevolja. Da li ko odova vreme but manuša ka počminen te služinen e Jehovase? Na. Umesto odova, ko 6. poglavlje ko Otkrivenje pisini so o manuša kola na služinena e Jehovase ka roden pomoć ando političko hem trgovačko sistemi kova tano uporedimo e planinencar. Odolese so odola manuša na ka podržinen e Devleso Kraljevstvo, o Jehova upro lende ka dikhel sar upro pe dušmanija (Luka 11:23; Otkr. 6:15-17). Ki bari nevolja, e Jehovase verna sluge ka oven averćhane ando avera. Sose? Odolese so jedino on ka služinen e Jehovase hem na ka podržinen i „zver“ (Otkr. 13:14-17; w22.05 16-17 ¶8-9).

E Devleso narodo na vaćeri samo i šukar vest (Mat. 24:14). On pomožinena hem e anđelenđe te ćeren odova sostar vaćeri pe ko Otkrivenje kotar 8-10. poglavlje. Odola anđelija objavinena nekobor pharipa kola ka aven upro okola kola odbacinena e Devleso Kraljevstvo. E Jehovase Svedokija objavinena i poruka koja tani sar „kukudi hem jag“ hem koja mothovi e Devlesi osuda upro e Bengeso sveto (Otkr. 8:7, 13). O manuša valjani te đanen so o kraj tano paše te šaj te ćeren promene ko po životi hem te oven spasime (Sof. 2:2, 3). Ama, akija poruka na sviđini pe sa e manušenđe. Valjani amenđe hrabrost te vaćera akija poruka. Ki bari nevolja, i završno poruka andi osuda pana pobuter ka holjanćeri e manušen (Otkr. 16:21; w22.05 7 ¶18-19).

Zamislin jekha romnja hem jekhe rome kola valjani te oven roditeljija. Iako on beršencar šunđe but savetija sar valjani te barjaćeren pe o ćhave, akana sa odova dikhena avere jaćhencar. Odolese so akana ka ovel len ćhave hem ka valjani te ićeren pe ko odola savetija. Odija tani ćaće bari odgovornost! Ked o buća meninena pe ko amaro životi, disave načelija ando Devleso Lafi ovena amenđe pana považna. Sebepi odova, e Jehovase sluge čitinena oleso Lafi hem sar so hine phendo e izraelsko kraljenđe, „celo po životi“ hor razmislinena odolestar so čitinena (Pon. zak. 17:19). O roditeljija kola tane e Jehovase svedokija isi len jekh posebno čast, te sikaven pe ćhaven ando Jehova. Ama, te šaj te ćeren odova nane dovoljno samo te vaćeren lenđe ando Devel, već valjani te sikaven len te mangen e Jehova (w22.05 26 ¶2-3).

Nane dovoljno o manuš samo te phenel so kajini pe. Ov mora diso te ćerel. O Jehova dikhela da li odova manuš cidela pe ando lošna buća hem da li živini ađahar sar so ov rodela (Is. 55:7). Avere lafencar, valjani te menjini po način sar razmislini hem te počmini te razmislini sar o Jehova (Rimlj. 12:2; Ef. 4:23). Isto ađahar, valjani palo peste te mukhel sa odova lošno so angleder ćerđa hem sar razmislinđa (Kol. 3:7-9). Ama, te šaj o Jehova te oprostini amenđe, mora te mothova vera ki Isusesi otkupno žrtva. O Jehova ka oprostini amenđe sebepi odija žrtva ked ka dikhel so daja sa amendar te menjina amen (1. Jov. 1:7; w22.06 6 ¶16-17).

Pana ando vreme sar o Adam hem i Eva pobuninđe pe protiv o Jehova, o manuša ćerena lošnipe jekh jekhese (Prop. 8:9). Na primer, o manuša kola tane ki vlast lošno ponašinena pe premalo avera manuša. O kriminalcija ćerena baro nasilje. O ćhave maltretirinena jekh jekhe ki škola, čak hem o manuša ki pi porodica ponašinena pe lošno jekh jekheja. Odolese nane čudno so o manuša darana jekh jekhestar. Sar o Satana koristini i dar ando manuš protiv amende? O Satana dela sa pestar te ćhivel amen te dara ando manuša, odolese so sebepi odija dar amen šaj te ćhinava te propovedina. Ov utičini upro manuša kola tane ki vlast te zabraninen amare aktivnostija hem te progoninen amen (Luka 21:12). Isto ađahar, but manuša vaćerena hovajbe ando Devleso narodo. Okola so šunena odola hovajba marena amenđe muj hem čak pretinena so ka maren amen (Mat. 10:36). Akala buća o Satana na ćerela prvo puti. Ov pana ko prvo veko koristinđa ista buća te daravi e Devlese narodo (Dela 5:27, 28, 40; w22.06 16 ¶10-11).

Kas o pomazanikija ka anen đi i pravednost? E manušen kola ka uskrsninen, okolen kola ka preživinen o Armagedon hem e ćhaven kola najverovatno ka bijanđon ko nevo sveto. Ko krajo andi Hiljadaberšengi vladavina, sare ki phuv ka oven savršena. Amen na valjani te bistra so ked ka ova savršena odova na ka značini so sigurno ka dobina o večno životi. Razmislin ando Adam hem andi Eva. On hine savršena, ama te šaj te dobinen o večno životi morandilje te mothoven so šunena e Jehova. Ama, nažalost, on na šunđe le (Rimlj. 5:12). Da li sa o savršena manuša zauvek ka aćhon ki Jehovasi strana? Da li disave ka oven sar o Adam hem i Eva, kola iako hine savršena na aćhilje verna e Jehovase? Ko akala pućiba ka valjani te dobini pe odgovor (w22.09 22-23 ¶12-14).

Avdije o sveto ovela sa pološno. Odolese, disavo puti tano amenđe pharo te ova pozitivna. O ćherutne na mangena jekh jekhe sar angleder. O manuša tane but nasilna hem sebična. Butenđe tano pharo te verujinen okolenđe kola tane ki vlast. Ama, ko sa akava isi diso šukar. Odoleja sar o manuša ponašinena pe, ispunini pe o proročanstvo ando „poslednja dive“ (2. Tim. 3:1-5). Odova so ispunini pe akava proročanstvo tano dokaz so o Isus Hrist vladini sar Kralj ko Devleso Kraljevstvo. Nijekh iskreno manuš našti te phenel so na ispunini pe akava proročanstvo. Ama, akava nane jedino proročanstvo kova vaćeri ando Devleso Kraljevstvo. Sa o proročanstvija tane povezime sar o delovija andi jekh slagalica hem dena amen jasno slika te šaj te haljova ko kova vreme amen živinaja (w22.07 2 ¶1-2).

Ko period andi pandemija kotar koronavirus, dobinđam jasna smernice sar te ićera amare sastankija hem sar te đa ki služba. Samći prekali rat, počminđam prekalo video-poziv te ićera amare sastankija, pokrajinska sastankija hem kongresija. Isto ađahar, počminđam te svedočina prekalo lila hem prekalo telefoni. O Jehova ćaće blagoslovinđa amaro trud. Disave podružnice phenđe so o broj ando objaviteljija ko olenge phuvja but barilo. Isto ađahar, but objaviteljija hine len šuže iskustvija ki služba. Disave mislinđe so e Jehovasi organizacija hine previše oprezno ki pandemija. Ama, svako puti o smernice kola dobinđam hine but mudra. Ked razmislinaja ando odova sar o Isus legari pe narodo, amen hijam sigurna so bizo obzir so te ovel, o Jehova hem oleso Ćhavo ka oven uvek amencar (Jevr. 13:5, 6; w22.07 13 ¶15-16).

Uzo odova so hvalinaja e Jehova ko amare molitve, valjani hem te zahvalina amen olese aso buća kola dela amen. Na primer, šaj te zahvalina amen lese aso but šuže luluđa kola ćerđa ko razna boje, asi raznovrsno ukusno hrana hem so dinđa amen but šukar amalen. Ama, amaro Dad o Jehova dela amen pana pobuter buća kola ćerena amen bahtale (Ps. 104:12-15, 24). A soj tano najvažno, valjani te zahvalina amen e Jehovase asi duhovno hrana koja dela amen hem so dinđa amen nada asi budućnost. Šaj lokho te desini pe te bistre te zahvaline tut aso buća kola o Jehova dinđa tut. So šaj te pomožini tuće te na bistre? Šaj ko jekh lil te pisine aso kola buća molinđan tut e Jehovase hem palo disavo vreme dikh kola buća o Jehova već dinđa tut hem zahvalin tut lese aso odova (Kol. 3:15; w22.07 22 ¶8-9).

Amen đanaja so nane dovoljno samo te proučina. Ako mangaja o ćaćipe te koristini amenđe, valjani te živina premalo ćaćipe. Odova značini so valjani te ićera amen ko odova so sikljovaja. Samo tegani šaj ćaće te ova bahtale (Jak. 1:25). Ama, sar šaj te đana da li živinaja premalo ćaćipe? Jekh phral phenela so valjani te razmislina da li ćaće ićeraja amen ko odova so sikljovaja hem te dikha kuri šaj te ova pana pošukar. O apostol Pavle phenđa: „Kobor god đi akana napredujinđam, valjani hem ponodri te napredujina, te đa odole isto drumoja“ (Fil. 3:16). Ćaće šaj but te pomožini amen odova so „živinaja premalo ćaćipe.“ Na samo so isi amen šukar životi sebepi odova, već hem radujinaja e Jehova hem amare phralen hem phenjen (Posl. 27:11; 3. Jov. 4). Akala tane but šukar razlogija sose hem ponodri valjani te manga o ćaćipe hem te živina premalo ćaćipe (w22.08 18-19 ¶16-18).

Sar šaj o starešine te mothoven po mangipe e Jehovase hem e Isusese? Ađahar so ka brininen pe ando odova so valjani e Isusese bakrenđe (1. Petr. 5:1, 2). O Isus istakninđa odova ked vaćerđa e Petareja. Palo odova so trin putija odrekninđa pe ando Isus, o Petar hine le bari želja te mothovi lese kobor mangela le. Palo odova so uskrsninđa, o Isus pućlja e Petare: „Simone, e Jovaneso ćhavo, da li mangeja man?“ Šaj te ova sigurna so bi o Petar ćerela sa so šaj te mothovi po mangipe pe Gospodese. O Isus phenđa lese: „Parvar me tikne bakren“ (Jov. 21:15-17). Palo odova, o Petar celo po životi brininđa pe ando pe Gospodese bakre hem ađahar mothovđa kobor manglja le. Phraljalen kola služinena sar starešine, sar šaj ko period andi Spomen-svečanost te mothoven so hem tumenđe tano važno odova so o Isus phenđa e Petarese? Ađahar so redovno ka odvojinen vreme te ohrabrinen e phralen hem ađahar so ka pomožinen okolenđe kola tane neaktivna te irinen pe e Jehovase (Jezek. 34:11, 12; w23.01 29 ¶10-11).

Ma mislin so niko našti te haljol sova borineja tut. Ako ađahar razmislineja, tegani šaj te našalje ti nada hem na ka ovel tut snaga te borine tut odoleja soj tano neispravno. Ki Biblija pisini: „O Devel. . . ka pomožini tumen ked ka avel o iskušenje, te šaj te izdržinen.“ Odolese, čak hem ked odija želja tani but bari amen šaj te aćhova verna e Jehovase. Uzi e Jehovasi pomoć, šaj te cida amen odolestar te ćera odova soj tano neispravno. Niked ma bistri akava: Sar nesavršena manuša, uvek ka pojavinen pe amenđe ki godi nesave neispravna želje. Ama, ked ka pojavinen pe, valjani odmah te cida len andi amari godi sar so o Josif sigate našlja kotar Petefrijesi romni (Post. 39:12). Tu šaj te pobedine te neispravna želje! (w23.01 12-13 ¶16-17).

I pravda tani e Jehovasi osobina (Pon. zak. 32:4). Ked jekh manuš tano pravedno but putija tano hem nepristrasno, avere lafencar, na ćerela razlika maškaro manuša (Dela 10:34, 35). Ked razmislinaja ko kola ćhibja hine prvo puti pisimo e Devleso Lafi, šaj te dikha so o Jehova tano baš asavko. Prekalo prorok Danilo, o Jehova obećinđa so ko vreme ando krajo „o pravo đandipe ka ovel pana pobaro“ hem but manuša ka haljon o ćaćipe (Dan. 12:4). Jekh način sar o pravo đandipe ovela sa pobaro tano ađahar so prevedini pe hem štampini pe i Biblija hem amare publikacije. E Jehovase sluge đi akana prevedinđe celo Biblija ili disave delovija ko prekalo 240 ćhibja hem sare šaj te dobinen la bizo pare. Sebepi odova, o manuša ko celo sveto šaj te šunen i „šukar vest ando Kraljevstvo“ angleder te avel o kraj (Mat. 24:14). O Jehova, amaro Devel andi pravda, but mangela e manušen hem odolese mangela so pobuter manuša te penđaren le ađahar so ka čitinen oleso Lafi (w23.02 5 ¶11-12).

Da li mangeja i pravednost? Sigurno mangeja! Ama, sare hijam nesavršena hem upro amende lokho šaj te utičinen e svetose merilija ando odova soj tano šukar, a soj tano lošno (Is. 5:20). O religiozna vođe ko Isuseso vreme mislinđe so ćerena odova soj tano šukar. Ama o Isus osudinđa len, odolese so kritikujinđe averen hem hine len pe merilija aso odova soj tano šukar, a soj tano lošno. Disave manuša avdije tane sar olende. On phenena so na ćerena ništa lošno, ama odova so ćerena proceninena premalo pe merilija. Često tane ponosna, kritikujinena averen hem mislinena soj tane pošukar averendar (Prop. 7:16; Luka 16:15). Ama, asavke buća o Jehova na mangela hem olenge delija tane dur ando odova soj tano pravedno. I pravednost tani but šukar osobina. Odija osobina značini te ćere odova soj tano ispravno anglo e Jehovase jaćha. Ki Biblija o lafi „pravednost“ značini te ićere tut ko Jehovase merilija (w22.08 27 ¶3-5).

O Isus hine le poverenje upro pe učenikija, iako on grešinđe (Jov. 15:16). Ked o Jakov hem o Jovan pućlje le te ovel len posebno than ko Kraljevstvo, ov na sumnjinđa ko odova sose služinena e Jehovase hem na mislinđa so on na zaslužinena te oven apostolija (Mar. 10:35-40). Kasnije, ked o vojnikija astarđe le, sa olese učenikija aćhavđe le (Mat. 26:56). Ipak, ov na našalđa po poverenje upro lende. Ov đanđa soj tane nesavršena, ama „mothovđa lenđe mangipe sa đi o krajo“ (Jov. 13:1). Palo po uskrsenje, o Isus pe 11 apostolenđe dinđa bare odgovornostija. On valjanđe te predvodinen ko propovedibe hem te brininen pe ando phralja hem phenja (Mat. 28:19, 20; Jov. 21:15-17). O Isus hine le šukar razlogija te verujini akale nesavršeno manušenđe. Sare on aćhilje verna e Jehovase sa đi na mulje. Ćaće, o Isus aćhavđe amenđe but šukar primer so valjani te ovel amen poverenje upro nesavršena manuša (w22.09 6 ¶12).

Ked hijam uverime so o Jehova mangela amen hem soj tano ki amari strana, amen na ka dara ando Satana. Na primer, e manušese kova pisinđa o 118. psalam hine but pharo ko životi. Hine le but dušmanija, a disave olendar hine ko baro položaj (9. hem 10. stih). Disavo puti, hine le but bare problemija (13. stih). Čak o Jehova ukorinđa le (18. stih). Ama, iako sa odova desinđa pe lese, ov phenđa: „Na ka darav.“ Ov đanđa so iako o Jehova ukorinđa le, ov tano oleso Dad kova mangela le. Ov hine sigurno savo god problemi te ovel le, oleso Dad tano uvek othe te pomožini lese (Ps. 118:29). Amen valjani te ova uverime so o Jehova mangela amen. Odova šaj te pomožini amen te pobedina amari dar ko najhari trin buća: (1) dar so na ka šaj te brinina amen andi amari porodica, (2) dar ando manuš hem (3) dar ando meribe (w22.06 15 ¶3-4).

Amen valjani te da sa amendar o Jehova te ovel amenđe ko prvo than ko životi. Sebepi so stvorinđa amen, o Jehova zaslužini te služina lese (Otkr. 4:11; 14:6, 7). Odolese, i najvažno buti ko amaro životi valjani te ovel te služina lese ađahar sar so ov mangela (Jov. 4:23, 24). Amen mangaja e Devleso sveti duh te pomožini amenđe te služina lese ađahar sar so pisini ko oleso Lafi. O Jehova valjani te ovel amenđe ko prvo than, čak iako živinaja ki phuv kuri tane amare aktivnostija ograničime ja amaro delo tano zabranimo. Trenutno, prekalo 100 phralja hem phenja tane ko phanlipe sebepi soj tane e Jehovase svedokija. Ama, on tane bahtale so šaj te molinen pe, te proučinen e Devleso Lafi hem te vaćeren averenđe ando Devel hem ando oleso Kraljevstvo! Ked o manuša progoninena amen ja vređinena amen, šaj te ova bahtale sose đanaja so o Jehova ka pomožini amen te istrajina hem so ka blagoslovini amen (1. Petr. 4:14; w22.10 9 ¶13).

Ki knjiga Poslovice, o Jehova dela amen but savetija kola šaj te pomožinen amen te ovel amen pošukar životi. Te dikha samo duj olendar. Sar prvo, ov zadovoljno odoleja so isi tut. Ko Poslovice 23:4, 5, pisini: „Ma trudin tut te ovel tut barvalipe. . . Samo so dikheja premalo leste, ov našalđola, sose dobini phakha hem sar orao odletini ko nebo.“ Iako o barvalipe šaj but lokho te našalji pe, ipak hem o barvale hem o ćorore dikhena sar pobuter te zaradinen. Odolese, but putija ćerena o buća sebepi kola ovena ko lošno glaso, ruminena po amalipe averencar hem naborsaljona (Posl. 28:20; 1. Tim. 6:9, 10). Sar dujto, razmislin angleder te vaćere. Ako na pazinaja, amen šaj amare lafencar te dukhava averen. Ko Poslovice 12:18, pisini: „Ked na razmislineja so vaćereja, te lafija šaj te posaven sar mač, a o lafija ando mudra manuša tane sar leko.“ Amen šaj te ćera te ovel mir, ako na vaćeraja averencar ando nekase mane (Posl. 20:19; w22.10 21 ¶14; 22 ¶16-17).

So značinđa akava deo andi vizija? Odova značinđa so o Jezekilj valjanđa te haljol i poruka koja valjani te objavini. Ov valjanđa te verujini ki odija poruka hem odova te podstaknini le te vaćeri olatar. Palo odova, desinđa pe diso but zanimljivo. Ked halja o svitko, o Jezekilj dikhlja soj tano „gudlo sar avđin“ (Jezek. 3:3). Sose? Odolese so i čast koja o Jezekilj hine le te predstavini e Jehova hine gudli sar avđin (Ps. 19:8-11). Ov hine but zahvalno e Jehovase so šaj hine te služini sar oleso proroko. Kasnije, o Jehova phenđa e Jezekiljese: „Šun šukar sa o lafija kola ka phenav tuće hem ćhiv len ko to vilo“ (Jezek. 3:10). Avere lafencar, o Jehova phenđa lese te del sa pestar te na bistrel odova soj tano pisimo ko svitko hem hor te razmislini ando odola lafija. Ked o Jezekilj ćerđa odova, olesi vera hine pana pozorali. Isto ađahar, ko svitko hine pisimo so valjani te vaćeri odole narodose (Jezek. 3:11). Ked haljilo hem verujinđa ki Jehovasi poruka, o Jezekilj hine spremno te počmini te propovedini hem odova ćerđa sa đi oleso zadatko na hine završimo (w22.11 6 ¶12-14).

So šaj te ćere ked tano tuće pharo te prihvatine disavi promena ki organizacija? Spremno prihvatin o promene ki organizacija. Đi o Izraelcija hine ki pustinja, disave murša andi Katesi porodica hine len but važno zadatko. Svako puti ked o izraelsko logor valjanđa te selini pe, on đelje anglo narodo hem akharđe o kovčeg ando savez (Br. 3:29, 31; 10:33; Is. Nav. 3:2-4). Odija hine bari čast! Ama, ked o Izraelcija alje ki Obećimi phuv, on više na hine len odova zadatko. Odolese so o kovčeg na valjanđa više te selini pe. Sebepi odova, o murša andi Katesi porodica dobinđe aver zadatko (1. Let. 6:31-33; 26:1, 24). Nigde na čitinaja so on žalinđe pe ili rodinđe pošukar zadatko. So sikljovaja olendar? Ked ovela disavi promena ki organizacija, celone vileja prihvatin odija promena bizo obzir da li odija promena utičini ko to zadatko. Savo god zadatko te ćere, trudin tut te ove radosno. O Jehova na cenini amen samo odolese so ćeraja ki organizacija. Olese tani považno amari poslušnost ando amare zadatkija (w22.11 23 ¶10-11).

O Onisifor rodinđa e Pavle hem ked arakhlja le, manglja te pomožini le hem te obezbedini lese sa so valjani. Odoleja rizikujinđa po životi. So sikljovaja odolestar? Na valjani te mukha i dar te sprečini amen te pomožina amare phralenđe kola tane progonime. Umesto odova, valjani te da sa amendar te pomožina len (Posl. 17:17). Olenđe valjani amaro mangipe hem amari pomoć. Razmislin sar o phralja hem o phenja andi Rusija pomožinena pe phralenđe hem phenjenđe kola tane ko phanlipe. Ked disave phralja hem phenja ikljona ko sudo, but đene avena te podržinen len. So sikljovaja olendar? Ked neko klevetini e phralen kola predvodinena, progonini len ili ćhivela len ko phanlipe, amen na valjani te dara. Valjani te molina amen olenđe, te brinina amen andi olengi porodica hem te roda avera načinija sar šaj te pomožina len (Dela 12:5; 2. Kor. 1:10, 11; w22.11 17 ¶11-12).

O starešine isi len odgovornost te ohrabrinen e objaviteljen ađahar so ka koristinen e Devleso Lafi hem te pomožinen okolenđe kola tane depresivna (1. Petr. 5:2). Ked ovela disavi katastrofa, o starešine valjani te dikhen da li svako objavitelj tano smestimo ko bezbedno than, da li isi le so te hal, so te uravi hem kaj te ovel. Ama, masekoncar palo odova, odole phralenđe ka valjani neko ko ka ohrabrini len hem utešini len (Jov. 21:15). Amaro phral, o Harold, kova služini sar član ando Odbor hem kova vaćerđa bute phralencar hem phenjencar kola doživinđe disavi prirodno katastrofa, phenela: „Valjani but vreme te nakhel đi na uštena ko pe pre. On šaj ka nastavinen te živinen sar angleder, ama ki olengi godi pana ka oven olenge mangle kola mulje, sa odova so našalđe hem so morandilje te nakhen. Sebepi odova, šaj te osetinen bari tuga hem dukh ko vilo. Ama, odova na značini so olengi vera nane zorali, već soj tane on samo manuša.“ Amare starešine primeninena o savet kova phenela te „roven okolencar kola rovena“ (Rimlj. 12:15; w22.12 22 ¶1; 24-25 ¶10-11).

Te šaj te pomožini amenđe te borina amen protiv o neispravna želje, o Jehova dela amen po sveti duh. Ked čitinaja oleso Lafi amen mukhaja e Devleso duho te utičini upro amende. Isto ađahar, e Devleso duho šaj te dobina ked hijam ko sastankija. Ko odola sastankija, hijam amare phralencar hem phenjencar kola isto sar amende trudinena pe te ćeren odova soj tano ispravno hem odova šaj but te ohrabrini amen (Jevr. 10:24, 25; 13:7). Ked ando vilo molinaja amen e Jehovase te pomožini amen te pobedina i slabost koja isi amen, ov ka del amen po sveti duh te zorjaćeri amen te šaj te borina amen. Ked ka ćera akala buća, odova na značini so više na ka oven amen neispravna želje, ama odova ka pomožini amen te borina amen olencar (w23.01 11 ¶13-14).

Iako i Biblija nane knjiga koja phenela amenđe sar te brinina amen ando amaro sastipe ja so valjani te ha, oj ipak vaćeri amenđe so o Jehova mislini ando odola buća. Na primer, ov phenela so valjani te „cida amen ando lošnipe“ sebepi kova šaj te našala amaro sastipe (Prop. 11:10). I Biblija phenela so na valjani but te ha ja te maćova, sose odola buća šaj lošno te utičinen upro amaro sastipe hem ko krajo čak šaj te mera (Posl. 23:20). O Jehova ađićeri amendar te mothova samokontrola ked valjani te odlučina so hem kobor ka ha hem ka pija (1. Kor. 9:25). Amen šaj te mothova so hijam zahvalna e Jehovase so dinđa amen o životi ađahar so ka razmislina angleder diso te ćera (Ps. 119:99, 100; Posl. 2:11). Na primer, valjani te pazina so haja. Ako đanaja so disavi hrana nane šukar aso amaro sastipe, tegani valjani te izbegina odova. Isto ađahar, valjani dovoljno te sova, redovno te vežbina, te ova čista hem te čistina amaro ćher (w23.02 21 ¶6-7).

Sar šaj te arakha biserija ko Devleso Lafi? Razmislin so pisini ki 2. Timoteju 3:16, 17. Othe pisini: „Celo Lil avela ando Devel hem korisno tano“ (1) te sikavi e manušen, (2) te mothovi soj tano pogrešno, (3) te ispravini sa o buća hem (4) te sikavi amen sar te živina. Čak hem e biblijake knjige kola na koristineja odobor često šaj te pomožinen tuće ki svako andi akija buti. Đi čitineja disavo izveštaj andi Biblija, razmislin so ov sikavi tut ando Jehova, andi olesi namera hem ando biblijake načelija. Razmislin hem sar odova izveštaj mothovi tuće odova soj tano pogrešno. Dikh sar odova so čitinđan šaj te pomožini tut te aćhove verno e Jehovase hem te haljove da li tano disavo stav pogrešno. Isto ađahar, trudin tut te koristine odova so čitinđan te šaj te ispravine disave pogrešna stavija. Na primer, diso pogrešno so šunđan ando manuša ki služba. Dikh hem so šaj te sikljove te šaj ko buća te dikhe sar so o Jehova dikhela. Ked ko asavko način čitineja i Biblija, tegani šaj te arakhe biserija (w23.02 11 ¶11).

O proročanstvo andi knjiga Danilo vaćeri so o Isus ka ovel Kralj ked ka završini pe o period kova vićini pe efta vremenija. Da li šaj te đana ked o Isus ulo Kralj? (Dan. 4:10-17). O „efta vremenija“ predstavinena o period ando 2 520 berš. Odova period počminđa ko 607. berš angl. n. e., ked o Vaviloncija cidinđe e zadnjo kralje kotar Jehovaso presto ko Jerusalim. A završinđa pe ko 1914. berš n. e., ked o Jehova ćhivđa e Isuse, „okova kova isi le zakonsko pravo“, te ovel Kralj ko Devleso Kraljevstvo (Jezek. 21:25-27). Sar šaj te pomožini amen akava proročanstvo? O proročanstvo ando „efta vremenija“ uverini amen so o Jehova ispunini pe obećanja ko pravo vreme. Ov tačno odredinđa o vreme ked o Isus ka ovel Kralj. Ked alo odova vreme, o Jehova ćhivđa le te vladini. Odolese šaj te ova sigurna so o Jehova ka ispunini hem sa avera proročanstvija ko vreme kova ov odredinđa. Ćaće, e Jehovaso dive „na ka harini“ (Avak. 2:3; w22.07 3 ¶3-5).