Ked merela tutar neko kas mangljan

„Ked mo phureder phral ando jekhvar mulo, na đanđum so te ćerav. Osetinđum man bespomoćno. Svako puti ked setinđum man upro leste, osetinđum bari dukh, ka phene neko posavi man ćhurikaja. Podijekh puti, čak hijum le holjami. Pućljum man sose mo phral morandilo te merel? Hine maje pharo so na hijum le pobuter vreme oleja đi hine đivdo“ (Vanesa, Australija).

AKO hem tu našalđan nekas kas mangljan, sigurno osetineja tut tužno, usamljeno ja bespomoćno. Isto ađahar, šaj osetineja dar, holi hem osećaj andi krivica. Šaj čak pućeja tut da li vredini te živine.

Čak iako disavo vreme osetineja bari dukh, odova tano normalno. Odova samo mothovi kobor mangljan e osoba kas našalđan. Ama, da li isi diso so barem hari ka pomožini tuće te osetine tut pošukar?

SO POMOŽINĐA DISAVENĐE?

Iako šaj dićhola tuće so ti dukh niked na ka nakhel, šaj ka koristinen tuće disave ando akala predlogija.

DE TUĆE VREME

Svakonesi dukh dukhala averćhane. Koro nekaste i dukh trajini pobuter vreme, a koro nekaste pohari. Ama, o rojbe šaj te pomožini tut te osetine tut pošukar. I Vanesa, kola pominđam angleder, phenela: „Stalno runđum. Morandiljum te ikalav mandar odija dukh.“ I Sofija, kasi phen iznenada mulji, phenela: „Ked razmislinava ando sa so ulo, odova tano ka phene phravava te čistinav jekh inficirimi rana. Iako i dukh tani but bari, odova tano jedino način odija rana te saćol.“

VAĆER NEKASA SOSTAR RAZMISLINEJA HEM SAR OSETINEJA TUT

Naravno, podijekh puti ka mange te ove kokri. Ama, i tuga tani but baro pharipe te akhare le kokri. O Džared, kova isi le 17 berš hem kaso dad mulo, phenela: „Vaćerđum averencar ando me osećanja. Iako hine maje pharo te objasninav sar ćaće osetinava man, uvek hine maje polokho ked nekasa vaćerđum.“ I Dženis, kola pominđam ko prvo članko, pana phenela: „Odova so vaćerđum averencar but utešinđa man. Hine man osećaj so neko haljola man hem više na hijum le odobor usamljeno.“

PRIHVATIN AVERENGI POMOĆ

Jekh psiholog phenela: „Ako o manuša kola našalđe nekas kas manglje mukhena pe amalen hem pe familija te pomožinen len, ka ovel lenđe polokho te izdržinen i dukh.“ Phravdo vaćer te amalenđe sar šaj te pomožinen tut sose on sigurno mangena te pomožinen tut, ama šaj na đanena sar (Poslovice 17:17).

OSLONIN TUT UPRO DEVEL

I Tina phenela: „Mo rom iznenada mulo ando rak. Odolese so više naštine te vaćerav lese sar osetinava man, počminđum e Devlese ki molitva te phenav sa. Svako sabale molinđum man lese te del man snaga te istrajinav odova dive. O Jehova pomožinđa maje ko but načinija.“ I Tarša, koja hine la 22 berš ked olaki daj mulji, phenela: „Odova so svako dive čitinđum i Biblija but utešinđa man hem pomožinđa man te razmislinav ando šukar buća.“

RAZMISLIN ANDO USKRSENJE

I Tina pana phenela: „Ki početka, i nada ko uskrsenje na hine maje disavi bari uteha, sose valjanđa maje mo rom, a me ćhavenđe valjanđa olengo dad. Ama, nakhlje štar berš hem akana odija nada but značini maje. Dela man snaga te đav anglal. Razmislinava ando dive ked palem ka dikhav le hem odova dela man mir hem radost.“

Verovatno ka nakhel but vreme angleder so ka osetine tut pošukar. Ama, šaj te ohrabrini tut okova so i Vanesa phenđa: „Disavo vreme mislineja so niked na ka ovel tuće pošukar, ama sar nakhela o vreme ovela tuće polokho te akhare ti dukh.“

Iako odija osoba uvek ka nedostajini tuće, ipak vredini te živine. Uzi Devlesi pomoć hem ponodri šaj te ovel tut šužo životi hem te uživine uzo te amala kola mangena tut. A pana hari o Devel ka vazdel e mulen. Ov mangela palem te dolen ki angalja tumare manglen hem tegani tumari dukh ka nakhel.