Ked to bračno partneri prevarini tut
NANE but buća ko životi kola dukhana odobor sar ked prevarini tut to bračno partneri. Disave odlučinena te oprostinen pe bračno partnerese kova kajini pe hem te den sa pestar te zorjaćeren po brako.a Ama, bizo obzir da li ka aćhove ko brako ja na, but dukhala ked šuneja so to bračno partneri prevarinđa tut. So šaj te pomožini tuće te izdržine odija bari dukh?
E BIBLIJAKE STIHIJA KOLA BUT KA POMOŽINEN TUT
Iako hine len but bari dukh ked šunđe so olengo bračno partneri prevarinđa len, but manuša arakhlje uteha ki Biblija. Othe sikljilje so o Devel dikhela olenge asva hem osetini olengi dukh (Malahija 2:13-16).
„Ked ki mi godi isi but brige, tu utešineja man hem deja man mir“ (Psalam 94:19).
O Bil phenela: „Ked čitinđum akava stih zamislinđum e Jehova sar jekh dad kova utešini man.“
„E verno manušeja postupineja verno“ (Psalam 18:25).
„Mo rom na hine maje verno,“ phenela i Karmen, kaso rom hine averaja nekobor masekija. „Ama, o Jehova tano verno hem đanava so ov niked na ka aćhavi man.“
„Ma brininen tumen nisose, nego sa tumare brige vaćeren e Devlese ki molitva, celone vileja molinen tumen olese [...] Hem e Devleso mir, kova tano upreder odova so o manuš šaj te haljol, ka arakhi tumaro vilo hem tumari godi prekalo Hrist Isus“ (Filipljanima 4:6, 7).
Jekh romni koja vićini pe Saša, phenela: „Na đanava ni me kobor putija čitinđum odola stihija. So pobuter molinđum man, O Devel dinđa man pobaro mir.“
Sa akala manuša kolendar vaćerđam hine len trenutkija ked više na đanđe sose živinena. Ama, on uzdajinđe pe upro Devel hem dobinđe snaga kotar oleso Lafi. Aće sar o Bil odova objasnini: „Ked mislinđum so našti više te izdržinav, i vera ko Devel dinđa man snaga. Iako disavo vreme phirđum ’ki dolina kuri isi bari tomnina‘, o Devel uvek hine mancar“ (Psalam 23:4).
a Pobuter andi akija tema vaćeri pe ki serija ando člankija „Kad je bračni drug neveran“ ko Probudite se! ando 22. april 1999. „Neverstvo - njegove tragične posledice“, „Da li pomirenje dolazi u obzir?“, „Pravo na razvod.