7. ČLANKO PROUČIBASE
O poglavarstvo ki skupština
O Hrist tano poglavari e skupštinaće, koja tani oleso telo hem kaso tano ov spasitelj (EF. 5:23)
ĐILI 137 Bogobojazne žene
SOSTAR KA VAĆERAa
1. Sose ki e Jehovasi porodica isi jekhipe?
AMEN hijam bahtale so hijam deo andi e Jehovasi porodica. Sose ki amari porodica isi mir hem jekhipe? Jekh razlog tano sose svako amendar dela sa pestar te poštujini okolen kase o Jehova dinđa te oven poglavarija. U stvari, so pošukar haljovaja sose o Jehova disavenđe dinđa te oven poglavarija, so pobaro jekhipe ka ovel maškaro amende.
2. Ko kola pućiba ka dobina odgovorija ko akava članko?
2 Ko akava članko ka vaćera ando odova ko isi le autoritet ki skupština. Isto ađahar, ka dobina odgovorija ko akala pućiba: Koja uloga o phenja isi len ki skupština? Da li tano svako phral ćaće poglavari svakona phenjaće? Da li o starešine isi len isto autoritet upro phralja hem o phenja sar o poglavarija ki porodica? Sar prvo, hajde te dikha savo stav valjani te ovel amen premalo phenja.
SAVO STAV VALJANI TE OVEL AMEN PREMALO PHENJA?
3. Sar šaj pana pobuter te cenina odova so amare phenja ćerena?
3 Amen ceninaja amare phenjen kola but trudinena pe te brininen pe šukar pe porodicaće, te propovedinen i šukar vest hem te pomožinen averenđe ki skupština. Pana pobuter ka cenina len ked ka razmislina ando odova savo stav o Jehova hem o Isus isi len premalo lende. Isto ađahar, ka dikha sar o apostol Pavle ponašinđa pe premalo đuvlja hem so amen šaj te sikljova olestar.
4. Sar i Biblija mothovi so o Jehova cenini hem e đuvlen hem e muršen?
4 I Biblija mothovi so o Jehova cenini hem e đuvlen hem e muršen. Na primer, setin tut so ko prvo veko o Jehova dinđa po sveti duh hem e đuvlenđe hem e muršenđe, sebepi kova šajinđe te ćeren čudija, sar soj tano te vaćeren razno ćhibjencar (Dela 2:1-4, 15-18). Isto ađahar, hem o đuvlja hem o murša tane naimenujime sveto duhoja hem ka vladinen e Hristeja (Gal. 3:26-29). Hem o đuvlja hem o murša ka živinen večno ki phuv (Otkr. 7:9, 10, 13-15). Hem o solduj grupe dobinđe zadatko te propovedinen hem te sikaven andi šukar vest (Mat. 28:19, 20). Na primer, ki knjiga Dela apostolska vaćeri pe andi romni koja vićinđa pe Priskila hem koja zajedno pe romeja, e Akilaja, pomožinđa e Apolose, kova hine pobuter školujimo olendar, pana pošukar te haljol o ćaćipe (Dela 18:24-26).
5. Premalo Luka 10:38, 39, 42, savo stav o Isus hine le premalo đuvlja?
5 O Isus poštujinđa e đuvlen. Ov na manglja te ovel sar o fariseija kola mislinđe so o murša tane považna ando đuvlja. On na vaćerđe olencar anglo avera hem niked na vaćerđe olencar ando e Devleso Lafi. Ama, o Isus vaćerđa hem e đuvlencar ando važna ćaćipa.b (Čitin Luka 10:38, 39, 42.) Isto ađahar, o Isus dozvolinđa e đuvlenđe te đan oleja ko razna thana đi propovedinđa i šukar vest (Luka 8:1-3). Uzo odova, o Isus dinđa čast e đuvlenđe te vaćeren e apostolenđe so ov uskrsninđa (Jov. 20:16-18).
6. Sar o apostol Pavle mothovđa so ceninđa e đuvlen?
6 O apostol Pavle podstakninđa e Timoteje te poštujini e đuvlen. O Pavle phenđa lese te dikhel „e phure romnjen sar dajen, a e terne romnjen sar phenjen“ (1. Tim. 5:1, 2). Iako o Pavle but pomožinđa e Timotejese te ovel le zorali vera, ov priznajinđa so e Timotejesi daj hem i baba hine prva kola sikavđe le ando ćaćipe (2. Tim. 1:5; 3:14, 15). Ked pisinđa po lil e Rimljanenđe, o Pavle pozdravinđa e phenjen ađahar so spominđa olengo anav. O Pavle na samo so zapazinđa so odola phenja ćerđe, već hem hine zahvalno aso sa so on ćerđe (Rimlj. 16: 1-4, 6, 12; Fil. 4:3).
7. Sostar ka vaćera akana?
7 Sar so đi akana dikhljam, i Biblija na mothovi so o phralja tane považna ando phenja. Amare mangle hem velikodušna phenja tane pravo blagoslov ki skupština. O starešine osloninena pe upro lende so on ka pomožinen lenđe ki skupština te ovel mir hem jekhipe. Ama, ko disave pućiba valjani te odgovorina. Na primer, sose ko disave situacije o Jehova rodela andi phen te ućhari po šero? Sebepi so samo o phralja tane naimenujime te služinen sar starešine hem sluge pomoćnikija, da li odova značini so svako phral tano poglavari svakona phenjaće ki skupština?
DA LI SVAKO PHRAL TANO POGLAVARI SVAKONA PHENJAĆE?
8. Premalo Efešanima 5:23, da li tano svako phral poglavari svakona phenjaće? Objasnin.
8 O odgovor tano na! Nane o phral poglavari sa e phenjenđe ki skupština, već o Hrist. (Čitin Efešanima 5:23.) Ki porodica o rom tano poglavari pe romnjaće. O ćhavo kova tano krstimo, nane pe dajako poglavari (Ef. 6:1, 2). Hem ki skupština, o autoritet kova o starešine isi len upro phenja hem phralja tano ograničimo (1. Sol. 5:12; Jevr. 13:17). Ama, soj tano e phenjaja koja više na živini pe roditeljencar? Oj hem ponodri ka poštujini pe roditeljen, ama olako dad više nane olako poglavari. Oj poštujini hem e starešinen, ama sar sa e phralenđe ki skupština hem olaće o poglavari tano o Isus.
O phralja hem o phenja kola tane kokri hem kola više na živinena pe roditeljencar, isi len pe poglavare, e Isuse (Dikh o 8. odlomko)
9. Sose o phenja ko disave situacije valjanena te ućharen po šero?
9 O Jehova ćhivđa e muršen te predvodinen ki skupština. E đuvlenđe na dinđa asavko autoritet (1. Tim. 2:12). Sose? Ando isto razlog sebepi kova e Isuse ćhivđa te ovel poglavari e muršese – te šaj i skupština te ovel šukar organizujimi. Ako ki disavi situacija i phen mora te ćerel jekh zadatko kova obično ćerela jekh phral, tegani o Jehova rodela olatar te ućhari po šeroc (1. Kor. 11:4-7). O Jehova odova rodela ando phenja na sebepi so mangela te ponizini len, već sebepi so mangela te del len prilika te mothoven so poštujinena o poglavarstvo kova ov ćhivđa. Ked sa akava đanaja, hajde te odgovorina ko pućibe: Savo autoritet o poglavarija ki porodica hem o starešine isi len?
KOJA ULOGA ISI LEN O POGLAVARIJA, A KOJA O STAREŠINE?
10. So šaj te podstaknini jekhe starešina te ćhivel pravilija ki skupština?
10 O starešine mangena e Hriste hem e bakren kolen dinđe len o Jehova hem o Isus te brininen pe olendar (Jov. 21:15-17). Odolese so isi le šukar namera, jekh starešina šaj te mislini soj tano sar dad e phralenđe hem e phenjenđe ki skupština. Ov šaj te mislini so sar so jekh dad isi le pravo te ćhivel o pravilija ki pi porodica te bi zaštitini la, hem ov sar starešina isi le pravo te ćhivel disave pravilija te bi zaštitini e Devlese bakren. Disave phralja hem phenja šaj te podstakninen le te ćerel odova, odoleja so pućena le so bi tu ćereja ked bi oveja ko mo than. Ama, da li o starešine ki skupština isi len isto autoritet sar o poglavarija ki porodica?
O starešine brininena pe aso e phralenge hem e phenjenge duhovna hem emocionalna potrebe. O Jehova dinđa len odgovornost te ciden andi skupština okolen kola na kajinena pe (Dikh o 11. hem o 12. odlomko)
11. Sose tano slično o autoritet kova isi len o poglavarija ki porodica hem o starešine?
11 O apostol Pavle vaćerđa so o autoritet kova o starešine isi len ki skupština hem o poglavarija ki porodica, tano slično ko disave načinija (1. Tim. 3:4, 5). Na primer, o Jehova mangela sare ki porodica te šunen e poglavare (Kol. 3:20). Hem ov mangela o phralja hem o phenja ki skupština te šunen e starešinen. O Jehova očekujini hem ando poglavarija ki porodica hem ando starešine te sikaven okolen kolendar on brininena pe te mangen e Jehova. Isto ađahar, hem o starešine hem o poglavarija ki porodica brininena pe ando emocionalna potrebe ando okola kolendar brininena pe. Hem sar so ćerena o šukar poglavarija ki porodica, hem o starešine ki skupština pomožinena okolenđe kola isi len problemija (Jak. 2:15-17). Uzo odova, o Jehova očekujini ando starešine hem ando poglavarija ki porodica te pomožinen averenđe te ićeren pe ko olese merilija. Isto ađahar, ov upozorini len: „Ma đan prekalo odova soj tano pisimo“ (1. Kor. 4:6).
E poglavarenđe o Jehova dinđa autoritet te predvodinen ki pi porodica. Angleder te anel odluke, o poglavari kova mangela pe porodica, ka vaćeri odolestar pe romnjaja (Dikh o 13. odlomko)
12-13. Premalo Rimljanima 7:2, sar o autoritet kova o poglavarija ki porodica isi len hem o autoritet kova o starešine isi len tano averćhane?
12 Ama, o autoritet kova o starešina ki skupština isi le tano but averćhane ando autoritet kova o poglavari ki porodica isi le. Na primer, o Jehova ćhivđa e starešinen ko disave situacije te oven sar sudije hem dinđa len odgovornost te ciden andi skupština okolen kola na kajinena pe (1. Kor. 5:11-13).
13 Ki aver strana, o Jehova e poglavarenđe ki porodica dinđa disavo autoritet kova na dinđa e starešinenđe. Na primer, ov dinđa autoritet e poglavarese ki porodica te ćhivel pravilija pe porodicaće hem te pobrinini pe sare te ićeren pe ko odola pravilija. (Čitin Rimljanima 7:2.) Jekh poglavari isi le pravo te odlučini ked olese ćhave valjani te irinen pe ćhere. Isto ađahar, ov isi le autoritet te kaznini pe ćhaven, ako on na šunena le (Ef. 6:1). Naravno, o poglavari kova mangela pe porodica ka vaćeri pe romnjaja angleder so ćhivela disave pravilija ko ćher, sose ipak on duj tane „jekh telo“d (Mat. 19:6).
POŠTUJIN E HRISTE SOSE OV TANO POGLAVARI ANDI SKUPŠTINA
O Isus kaso poglavari tano o Jehova, dela smernice e skupštinaće (Dikh o 14. odlomko)
14. (a) Premalo Marko 10:45, sose tano prikladno so o Jehova ćhivđa e Isuse te ovel poglavari andi skupština? (b) Savi uloga isi le o Vodeće telo? (Dikh o okvir „Savi uloga isi le o Vodeće telo?“)
14 Prekali otkupno žrtva, o Jehova na samo so ćinđa o životi ando svako manuš ki skupština, već hem o životi ando manuša kola verujinena upro Isus (Čitin Marko 10:45; Dela 20:28; 1. Kor. 15:21, 22). Odolese tano prikladno so ov ćhivđa e Isuse kova dinđa po đivdipe amenđe, te ovel poglavari andi skupština. Odolese, o Isus isi le autoritet te phenel so valjani te ćeren o manuša, o porodice hem i skupština hem ov isi le pravo te sprovodini odola pravilija (Gal. 6:2). Ama, o Isus na ćhivela amenđe samo pravilija. Ov šukar brinini pe amendar hem mangela amen (Ef. 5:29).
15-16. So sikljiljan ando odova so phenđe i phen Marli hem o phral Benjamin?
15 O phenja mothovena so poštujinena e Hriste ađahar so trudinena pe te ićeren pe ko uputstvija kola tane dinde ando okola kola tane ćhivde te brininen pe olendar. But phenja slažinena pe odoleja so phenela i Marli, i phen koja živini ki Amerika. Oj phenela: „But ceninava o than kova isi man sar romni hem sar phen ki skupština. Uvek trudinava man te poštujinav o autoritet kova o Jehova dinđa me romese hem e starešinenđe ki skupština. Ama, mo rom hem o starešine ki skupština pomožinena maje te poštujinav len ađahar so on poštujinena man hem mothovena soj tane zahvalna aso sa so ćerava.“
16 O phralja mothovena so haljona o poglavarstvo ađahar so mothovena so poštujinena e phenjen. O Benjamin, o phral kova živini ki Engleska, phenela: „But sikljiljum ando e phenjenge komentarija ko sastankija hem ando olenge predlogija ando odova sar te proučinav hem sar te ovav pana pošukar ki služba. Mislinava so i buti koja on ćerena tani but vredno.“
17. Sose valjani te poštujina o poglavarstvo kova o Jehova ćhivđa?
17 Ked sare ki skupština – o murša, o đuvlja, o poglavarija hem o starešine – haljona hem poštujinena o poglavarstvo kova o Jehova ćhivđa, ki skupština ka ovel mir. Hem soj tano najvažno, ađahar ka da čast amare mangle nebesko Dadese, e Jehovase (Ps. 150:6).
ĐILI 123 Verno se podložimo teokratskom redu
a Koja uloga o phenja isi len ki skupština? Da li tano svako phral poglavari svakona phenjaće? Da li o starešine hem o poglavarija andi porodica isi len isto autoritet? Ko akava članko, o odgovorija ko akala pućiba ka dobina kotar disave primerija kotar e Devleso Lafi.
b Ki Stražarsko kula ando septembar 2020. berš, dikh o 6. odlomko ando članko „Podržin e phenjen ki ti skupština.“
c Dikh o okvir „Ked jekh phen valjani te ućhari po šero?“
d Ako mangeja te đane pobuter odolestar ko valjani te odlučini ki koja skupština i porodica ka služini, dikh i Stražarsko kula ando avgust 2020. berš, o članko „Poštujin svakone ki skupština“, kotar 17-19 odlomko.
e Ako mangeja te đane diso pobuter andi akija tema dikh i knjiga Održite se u Božjoj ljubavi, ko str. 209-212, ki srpsko ćhib.
f Ako mangeja te đane so sa ćerela o Vodeće telo, dikh i Stražarsko kula ando 15. jul 2013. berš, ko str. 20-25, ki srpsko ćhib.