Sar o Jehova štitini tut?

1. Sose o Isus rodinđa ando po Dad te zaštitini olese učenikonen?

KI POSLEDNJO rat ando oleso životi ki phuv, o Isus razmislinđa ando problemija kola olese učenikija ka ovel len. Sebepi so manglja pe amalen, o Isus rodinđa ando Jehova „te zaštitini len ando Lošno“ (Jov. 17:14, 15). O Isus đanđa so ked ka irini pe ko nebo, o Beng hem ponodri ka progonini okolen kola ka mangen te služinen e Jehovase. Ćaće, e Devlese narodose ka valjani zaštita.

2. So uverini amen so o Jehova ka odgovorini ko amare molitve?

² O Jehova odgovorinđa ki e Isusesi molitva sose manglja pe Ćhave. Ako daja sa amendar te ugodina e Devlese, ov ka mangel hem amen, hem ka šunel amen ked molinaja le asi pomoć hem asi zaštita. Sar so jekh poglavari brinini pe asi pi porodica, isto ađahar o Jehova hem ponodri ka brinini pe aso pe ćhave. Ako ne bi ćerela odova, oleso anav bi ovela lađaćerdo.

3. Sose valjani amenđe e Jehovasi zaštita avdije?

³ Amenđe valjani e Jehovasi zaštita sar niked angleder. O Beng tano fordimo ando nebo „but holjamo“ (Otkr. 12:12). Ov ćhivđa disave manušen te mislinen so ked progoninena amen on „ađahar služinena e Devlese“ (Jov. 16:2). Avera kola na verujinena ko Devel progoninena amen sebepi so hijam averćhane ando manuša ko sveto. Bizo obzir sose o manuša progoninena amen, amen na valjani te dara. Sose? Odolese so e Devleso Lafi phenela: „O Gospod tano verno hem ov ka zorjaćeri tumen hem ka štitini tumen ando Lošno“ (2. Sol. 3:3). Sar o Jehova štitini amen? Hajde te dikha duj načinija sar ćerela odova.

O JEHOVA DELA AMEN I RATNO OPREMA

4. Premalo Efešanima 6:13-17, so o Jehova dinđa amen te šaj te zaštitini amen?

⁴ O Jehova dinđa amen i ratno oprema te šaj te zaštitini amen ando e Satanase napadija. (Čitin Efešanima 6:13-17.) Odija duhovno oprema tani zorali hem korisno. Ama, amen valjani te koristina svako deo andi odija oprema te šaj te ova zaštitime. So predstavini svako deo andi odija duhovno oprema? Akana ka razmotrina jekh po jekh.

5. So predstavini o pojas ando ćaćipe hem sose mora te akhara le?

⁵ O pojas ando ćaćipe predstavini sa o ćaćipa kola tane ko e Devleso Lafi, i Biblija. Sose mora te akhara odova pojas? Odolese so o Beng tano „o dad ando hovajbe“ (Jov. 8:44). Ov već hiljade berša vaćeri hovajba hem prevarinđa „celo sveto“ (Otkr. 12:9). Ama, o ćaćipa kola tane ki Biblija zaštitinena amen ando odova te na ova prevarime. Sar ćhivaja odova simbolično pojas? Ađahar so sikljovaja o ćaćipe ando Jehova, služinaja olese „e duhoja hem e ćaćipaja“ hem ked trudinaja amen te ova poštena ko sa (Jov. 4:24; Ef. 4:25; Jevr. 13:18).

6. So predstavini o oklop andi pravednost hem sose mora te akhara le?

⁶ O oklop andi pravednost predstavini e Jehovase pravedna merilija. Sose mora te akhara o oklop? Sar so o oklop zaštitini o vilo ando jekh vojniko, ađahar hem o oklop andi pravednost zaštitini amaro simbolično vilo ando lošna buća ko akava sveto (Posl. 4:23). O Jehova očekujini te manga le hem te služina lese celone vileja (Mat. 22:36, 37). Odolese, o Beng ka pokušini te podelini amaro vilo, ađahar so ka ćhivel amen te manga o buća ko akava sveto, kola o Jehova mrzini (Jak. 4:4; 1. Jov. 2:15, 16). Hem ako odova na uspini lese, tegani ka pokušini te ćhivel amen te ćera o buća kola na sviđinena pe e Jehovase.

7. Sar amen akharaja o oklop andi pravednost?

⁷ Amen akharaja o oklop andi pravednost ađahar so prihvatinaja e Jehovase merilija ando odova soj tano šukar, a soj tano lošno hem ked ićeraja amen ko odola merilija (Ps. 97:10). Disave šaj te mislinen so sebepi e Jehovase merilija našti te ćeren sa so bi mangena. Ama, ked amen na primeninaja e biblijake načelija ko amaro đivdipe, amen šaj te ova sar o vojniko kova ikali po oklop đi trajini o maribe sose mislini soj tano but pharo. Odova šaj te ovel but nemudro. Okola kola mangena e Jehova mislinena so olese zapovestija „nane phare.“ On đanena so odola zapovestija šaj te spasinen olengo životi (1. Jov. 5:3).

8. So značini te urava ko amare pre i spremnost te propovedina i šukar vest?

⁸ O Pavle podstakninđa amen te urava ko amare pre i spremnost te propovedina i šukar vest ando mir. Avere lafencar, amen valjani uvek te ova spremna te propovedina i šukar vest. Ked delinaja la averencar, amari vera ovela pozorali. Ćaće ohrabrini amen ked dikhaja so e Jehovase sluge ko celo sveto koristinena svako prilika te bi propovedinena i šukar vest. Na primer, on odova ćerena ki buti, ki škola, ko poslovna područja, ked propovedinena kotar ćher ko ćher, ked đana te pazarinen, ked posetinena e rođakonen kola nane e Jehovase svedokija, hem ked vaćerena okolencar kas penđarena. Ako bi daraja hem ćhinavaja te propovedina, amen bi ovaja sar jekh vojniko kova huljavi pe sandale đi trajini o maribe. Tegani bi šaj but lokho te povredini pe pre. Odolese, na bi ovela spremno te borini pe hem te šunel o naređenja kola dela lese oleso zapovedniko.

9. Sose valjani te akhara o baro štit andi vera?

⁹ O baro štit andi vera predstavini i vera koja isi amen upro Jehova. Amen hijam uverime so o Jehova ka ispunini sa pe obećanja. Odija vera ka pomožini amenđe „te aćhava sa e Lošnonese strele kola thabljona.“ Sose valjani te akhara odova baro štit? Odolese so ov štitini amen te na prevarinen amen o sikljoviba kola širinena o otpadnikija hem te na ova obeshrabrime ked o manuša marena amenđe muj sebepi amare verovanja. Bizi vera, amen na ka uspina te cida amen ked avera pokušinena te ćhiven amen te na šuna e Jehovase merilija. Ki aver strana, svako puti ked braninaja amari vera ki buti ja ki škola, amen akharaja odova štit (1. Petr. 3:15). Isto ađahar, ked odbinaja te ćera i buti koja tani pošukar platimi, sebepi koja na bi uspinaja te da e Jehovase amaro najšukar, amen akharaja odova štit (Jevr. 13:5, 6). Isto ađahar, ked služinaja e Jehovase iako avera protivinena pe amenđe, amaro štit zaštitini amen (1. Sol. 2:2).

10. Soj tani i kaciga ando spasenje hem sose mora te akhara la?

¹⁰ I kaciga ando spasenje tani i nada koja o Jehova dela amen – i nada so ov ka spasini amen ando meribe hem so ka nagradini okolen kola ćerena olesi volja (1. Sol. 5:8; 1. Tim. 4:10; Titu 1:1, 2). Sar so i doslovno kaciga štitini o šero ando jekh vojniko, isto ađahar hem i nada ando spasenje štitini amare mislija. Ko kova način? Odija nada pomožini amen te ićera ki godi e Devlese obećanja hem te dikha upro problemija ko ispravno način. Sar akharaja odija kaciga? Odova ćeraja ked razmislinaja sar so o Devel razmislini. Na primer, amen na uzdajinaja amen ko barvalipe kova sigate našalđola, nego upro Devel (Ps. 26:2; 104:34; 1. Tim. 6:17).

11. Soj tano o mač ando duh hem sose valjani te koristina le?

¹¹ O mač ando duh tano e Devleso Lafi, i Biblija. Odova mač isi le moć te mothovi sa o hovajba, te oslobodini amen ando hovavne sikljoviba hem ando štetna navike (2. Kor. 10:4, 5; 2. Tim. 3:16, 17; Jevr. 4:12). Amen sikljovaja ispravno te koristina odova mač đi lično proučinaja hem đi dobinaja i obuka andi e Devlesi organizacija (2. Tim. 2:15). Uzi odija ratno oprema, o Jehova dela amen pana jekh moćno zaštita. Soj tano odova?

AMEN NA BORINAJA AMEN KOKRI

12. So pana valjani amenđe hem sose?

¹² Jekh iskusno vojniko đanela so našti kokri te borini pe jekha bare vojskaja hem te pobedini la. Umesto odova, olese valjani pomoć ando avera vojnikija. Isto ađahar, amen našti kokri te pobedina e Benge hem okolen kola tane ki olesi strana. Amenđe valjani podrška ando amare phralja hem phenja. O Jehova dinđa amenđe e phralen hem e phenjen ko celo sveto, kola tane odothe te pomožinen amenđe (1. Petr. 2:17).

13. Premalo Jevrejima 10:24, 25, sar o sastankija pomožinena amen?

¹³ Jekh način sar o Jehova podržini amen tano prekalo amare sastankija. (Čitin Jevrejima 10:24, 25.) Ked hijam obeshrabrime, sar so svako amendar osetini pe podijekh puti, amare sastankija ohrabrinena amen. Isto ađahar, hijam ohrabrime ked šunaja o komentarija ando amare phralja hem phenja kola dena len ando vilo. O govorija kola temeljinena pe ki Biblija hem o prikazija kola on isi len, zorjaćerena amari odlučnost te služina e Jehovase. Isto ađahar, ohrabrini amen odova ked vaćeraja amare phralencar hem e phenjencar angleder hem palo sastanko (1. Sol. 5:14). Uzo odova, amare sastankija dena amen prilika te pomožina averenđe, a odova ćerela amen bahtale (Dela 20:35; Rimlj. 1:11, 12). Amare sastankija pomožinena amen hem ko aver način. On pomožinena amenđe pana pošukar te propovedina hem te sikava e manušen ki služba. Na primer, amen sikljovaja sar šaj šukar te koristina amare glavna publikacije e službaće. Odolese, pripremin tut šukar aso sastanko. Đi trajini o sastanko, šun pažljivo hem palo sastanko primenin odova so sikljiljan. Ked ka ćere odova, tu ka ove „šukar vojniko“ ando Hrist Isus (2. Tim. 2:3).

14. Koja aver pomoć o Jehova dela amen?

¹⁴ Amen isi amen podrška hem ando but milionija moćna anđelija. Zamislin samo so šaj te ćerel jekh olendar! (Is. 37:36). Akana zamislin so šaj te ćerel jekh bari vojska ando anđelija. O Jehova tano svemoćno. Odolese, ked tano ov amencar, amen uvek ka ova pozorale ando amare neprijateljija bizo obzir kobor tane on (Sud. 6:16). Kobor tano odova ćaće! Ićer ki godi odola mislija ked hijan obeshrabrimo sebepi diso so ćerđa ja phenđa to kolega ki buti, to amal ki škola ja to rođako kova nane amaro phral. Ma bistri so tu na hijan kokri ki odija borba. Sebepi so ićereja tut ko olese smernice, tu isi tut olesi podrška.

O JEHOVA HEM PONODRI KA ŠTITINI AMEN

15. Premalo Isaija 54:15, 17, sose niko našti te ćhinavi e Devlese narodo te propovedini?

¹⁵ E Bengeso sveto isi le but razlogija te mrzini amen. Na primer, amen na mešinaja amen ki politika hem na đaja ko maribe. Isto ađahar, vaćeraja ando e Devleso anav hem ando odova so jedino oleso Kraljevstvo ka anel mir ki phuv hem ićeraja amen ko olese pravedna merilija. Amen mothovaja averenđe so o Beng tano hovavno hem so mudari e manušen (Jov. 8:44). Amen vaćeraja so pana hari, e Bengeso sveto ka ovel uništimo. O Beng hem okola kola tane ki olesi strana našti te ćhinaven amen te propovedina i šukar vest. Umesto odova, amen koristinaja svako prilika te slavina e Jehova. Kobor god o Beng te ovel moćno, ov našti te ćhinavi amen te propovedina i šukar vest e manušenđe ko celo sveto. On našti te ćeren odova sebepi so o Jehova štitini amen. (Čitin Isaija 54:15, 17.)

16. Sar o Jehova ka spasini pe narodo ki bari nevolja?

¹⁶ So pana hari ađićeri amen? Ki bari nevolja, o Jehova ka spasini amen ko duj načinija. Sar prvo, ov ka spasini pe verna slugen ko vreme ked ov ka ćhivel e kraljen andi phuv te uništinen o Baro Vavilon, i hovavni religija (Otkr. 17:16-18; 18:2, 4). Tegani, ov ka spasini pe narodo ked ko Armagedon ka uništini sa okolen kola aćhilje ando e Bengeso sveto (Otkr. 7:9, 10; 16:14, 16).

17. Sose tano amare šukaripase te aćhova paše e Jehovaja?

¹⁷ Ked aćhovaja paše e Jehovaja, o Beng našti te ćerel amenđe nijekh buti koja ka anel amenđe trajno šteta (Rimlj. 16:20). Umesto odova, ov ka doživini odija trajno šteta ađahar so ka ovel uništimo. Odolese, urav i kompletno ratno oprema hem ma huljav la! Ma pokušin te borine tut kokri ki odija borba. Podržin te phralen hem te phenjen. Hem ićer tut ko e Jehovase smernice. Ako ćereja ađahar, šaj te ove uverimo so o Jehova, to nebesko Dad, kova but mangela tut, ka zorjaćeri tut hem ka zaštitini tut (Is. 41:10).