Ov palem paše e Jehovaja

SVAKO berš, but phralja hem phenja irinena pe e Jehovase. Zamislin kobor tani bari radost ko nebo ked jekh olendar irini pe ki skupština (Luka 15:7, 10). Ako irinđan tut e Jehovase, šaj te ove sigurno so o Isus, o anđelija hem o Jehova tane but bahtale so palem hijan deo andi skupština. Đi trudineja tut palem te ćere ko to amalipe e Jehovaja, šaj te ovel tut disave pharipa. Kola tane odola pharipa hem so šaj te pomožini tuće?

KOLA TANE ODOLA PHARIPA?

But phralja hem phenja isi len negativna osećanja, čak hem palo odova so irinena pe ki skupština. Šaj hem tu osetineja tut sar o kralj David. Čak hem palo odova so olese grehija hine oprostime, ov phenđa: „Odobor grehija ćerđum so na dikhava o drumo anglo mande“ (Ps. 40:12; 65:3). Ked jekh phral ja phen irini pe e Jehovase, čak hem beršencar palo odova šaj te ovel len osećaj andi krivica hem te osetinen lađ. I Izabela koja hine isključimi prekalo 20 berš, phenela: „Hine maje pharo te verujinav so o Jehova oprostinđa maje.“ Ako obeshrabrineja tut, ti vera palem ka slaboni (Posl. 24:10). Odolese, ma mukh odova te desini pe tuće.

Disave mislinena so na ka uspinen te ćeren sa so valjani te šaj palem te oven paše e Jehovaja. Palo odova so irinđa pe, o Antoan, phenđa: „Bisterđum sa so sikljiljum hem sa so ćerđum angleder.“ Sebepi so isi len asavke osećanja, disave na ćerena e Jehovase sa so šaj.

Zamislin so sebepi jekh bari oluja jekhe manušeso ćher samo so na pelo. Ked razmislini kobor bari buti valjani te ćerel hem kobor vreme valjani lese te popravini po ćher, odova šaj but te obeshrabrini le. Isto ađahar, ako ruminđan to amalipe e Jehovaja, sebepi o greh kova ćerđan, šaj hem tu mislineja so valjani but te trudine tut te ove palem paše e Jehovaja. Ama, tu na hijan kokri ko odova.

O Jehova vićini amen: „Aven te vaćera hem me ka pomožinav tumen te pomirinen tumen mancar“ (Is. 1:18). Đi akana, tu već menjinđan o lošna buća kola hine ko to životi. O Jehova mangela tut sebepi odova. Odoleja so irinđan tut e Jehovase, tu mothovđan so o Beng hovavi (Posl. 27:11).

Ked irinđan tut, tu već uljan paše e Jehovaja hem ov dela po lafi so hem ov ka ovel paše tuvaja (Jak. 4:8). Šukar tano so irinđan tut, ama isi pana diso so valjani te ćere. Valjani hem ponodri te zorjaćere to mangipe premalo to Dad hem to amal, o Jehova. Sar šaj te ćere odova?

ĆHIV TUĆE CILJIJA KOLA ŠAJ TE ISPUNINE

Ćhiv tuće ciljija kola šaj te ispunine. Verovatno na bisterđan o osnovna buća kola sikljiljan ando Jehova hem so ov mangela te ćerel e manušencar. Ama, tu palem valjani te ćere o buća kola ćerđan angleder. Na primer, te propovedine, te đa ko sastankija hem te družine tut e phralencar hem e phenjencar. Razmislin ando akala ciljija.

Redovno molin tut e Jehovase. To Dad haljola so sebepi o osećaj andi krivica tuće šaj te ovel pharo te moline tut olese (Rimlj. 8:26). Ama, „istrajin ki molitva“ hem vaćer e Jehovase kobor tano tuće važno te ove oleso amal (Rimlj. 12:12). Ked razmislini ando odova period, o Andrej phenela: „Hine man but baro osećaj andi krivica hem osetinđum bari lađ. Ama, pali svako molitva hine maje pošukar. Hine man mir ko vilo.“ Ako na đaneja so te phene e Jehovase ki molitva, razmislin ando molitve kola o kralj David vaćerđa e Jehovase, a kola tane zapisime ko 51. hem ko 65. Psalam.

Redovno proučin i Biblija. Odova ka pomožini tuće te ovel tut pobari vera hem to mangipe premalo Jehova ka ovel pana pobaro (Ps. 19:7-11). O Filipe, phenela: „Na proučinđum i Biblija svako dive. Odolese mi vera slabonđa hem ko krajo povredinđum e Jehova. Na mangljum palem te povredinav e Jehova. Odolese odlučinđum redovno te proučinav i Biblija.“ Hem tu šaj te ćere odova. Ako na đaneja so te proučine, šaj te puće jekhe iskusno amale te pomožini tut.

Družin tut e phralencar hem e phenjencar. Disave kola irinena pe ki skupština mislinena so avera ka oven holjame upro lende. I Larisa phenela: „Osetinđum bari lađ hem mislinđum so povredinđum hem razočarinđum me phralen hem me phenjen. Asavke osećanja na mukhlje man hem but vreme palo odova.“ Ov sigurno so o starešine hem avera phralja hem phenja mangena te pomožinen tut palem te ove paše e Jehovaja. (Dikh o okvir „So šaj o starešine te ćeren?“) On tane bahtale so irinđan tut ki skupština hem mangena hem tu te ove bahtalo (Posl. 17:17).

So šaj te pomožini tut te ove pana popaše e phralencar hem e phenjencar andi skupština? Đa ko sa o sastankija hem učestvujin ki služba. Sar odova ka pomožini tuće? O Feliks phenela: „O phralja hem o phenja jedva ađićerđe te irinav man ki skupština. Osetinđum kobor mangena man. On pomožinđe maje palem te ovav deo andi skupština, te haljovav so o Jehova oprostinđa maje hem te nastavinav te služinav olese.“ (Dikh o okvir „So šaj tu te ćere?“)

MA VAZDE TE VASTA!

Đi trudineja tut te ove pana popaše e Jehovaja, o Beng ka nastavini te ćerel tuće problemija, sose mangela te našale ti vera (Luka 4:13). Odolese, de sa tutar te zorjaćere to amalipe e Jehovaja.

O Jehova dela po lafi pe narodose: „Ka rodav okolen kola našaldilje, ka irinav okolen kola durilje, ka paćarav okolen kola tane povredime hem ka zorjaćerav okolen kola tane slaba“ (Jezek. 34:16). O Jehova pomožinđa bute phralenđe hem phenjenđe palem te oven paše oleja. Ov sigurno so mangela te pomožini hem tuće te ove pana popaše oleja.

So šaj o starešine te ćeren?

O starešine šaj but te pomožinen okolenđe kola irinđe pe ki skupština te šaj palem te oven paše e Jehovaja. Dikh so šaj on te ćeren.

Ohrabrin len. O apostol Pavle đanđa so i dukh šaj te peravi okole kova irinđa pe ki skupština (2. Kor. 2:7). Ov šaj te ovel le osećaj andi krivica hem te ovel obeshrabrimo. Odolese, o Pavle phenđa e phralenđe: „Spremno oprostinen lese hem utešinen le.“ Okola kola irinđe pe ki skupština valjani te oven sigurna so o Jehova, o phralja hem o phenja but mangena le. Ked o starešine redovno pohvalinena len hem pomožinena lenđe, odova šaj te pomožini lenđe te na oven obeshrabrime.

Molin tut olencar. „E pravednikosi molitva koja avela ando vilo isi la bari snaga“ (Jak. 5:16). I Larisa, kolatar vaćerđam hari angleder, phenela: „Phenđum e starešinenđe kola sumnje isi man hem sostar darava. On molinđe pe mancar. Tegani haljiljum so o starešine na hine holjame upro mande. On manglje te pomožinen maje te ovav palem paše e Jehovaja.“ Amaro phral o Teo, phenela: „Ked o starešine molinđe pe mancar odova pomožinđa maje te ovav sigurno so o Jehova ćaće mangela man hem so dikhela odova soj tano šukar koro mande, a na samo odova soj tano lošno.“

Ov amal olencar. Okola so irinđe pe e Jehovase valjani te ovel len amala ki skupština. Jekh starešina kova vićini pe Džastin, phenela: „De sa tutar te đa olencar ki služba hem posetin len. But tano važno te ove olengo amal.“ Jekh aver starešina kova vićini pe Henri, phenela: „Ked avera ki skupština dikhena so o starešine tane amala okolese kova irinđa pe ki skupština, tegani hem on ka ćeren odova.“

Pomožin lenđe te proučinen i Biblija. Jekh zrelo amal šaj te pomožini okolese kova irinđa pe e Jehovase redovno te čitini hem te proučini i Biblija. O starešina kova vićini pe Darko, phenela: „Mangava te vaćerav olencar ando disave zanimljiva mislija kola arakhljum đi proučinđum i Biblija. Ađahar, on šaj te dikhen so šaj te uživina đi proučinaja i Biblija. Uzo odova, pućava len da li šaj zajedno te proučina disavo članko.“ Pana jekh starešina kova vićini pe Klejton, phenela: „Ohrabrinava len te roden disave biblijake izveštaja ando manuša kola nakhlje diso slično sar on hem te sikljon olendar.“

Ov šukar pastiri. Okola kola irinđe pe e Jehovase dikhlje sar o starešine sudinena. Ama, akana valjani te dikhen sar o starešine brininena pe olendar (Jer. 23:4). Ov spremno te šune len hem te pohvaline len. Ked god šaj, vaćer olencar. Dikh so jekh starešina kova vićini pe Markus ćerela ko pastirska posete: „Vaćeraja andi jekh misao kotar i Biblija, pohvalinaja len hem uverinaja len so amen hem o Jehova hijam but ponosna upro lende sose dinđe sa pestar te irinen pe ki skupština. Ko krajo andi amari poseta, dogovorinaja amen ked ka ava aver puti.

a Disave anava tane menjime.