2 | I uteha ando Devleso Lafi
KI BIBLIJA PISINI: „Sa so hine pisimo angleder, pisimo tano te sikavi amen hem te del amen snaga te istrajina, te bi ovel amen nada“ (RIMLJANIMA 15:4).
So odova značini?
Ki Biblija šaj te arakha utešna mislija kola šaj te pomožinen amen te borina amen protiv o negativna mislija. Isto ađahar, oj dela amen nada so pana hari na ka ovel amen nisavi dukh ko vilo.
Sar odova šaj te pomožini?
Sare amen podijekh puti hijam uznemirime ja isi amen disavi dukh ko vilo. Ama okola so isi len depresija ja anksioznost, svako dive ađahar osetinena pe. Sar šaj i Biblija te pomožini lenđe?
Ki Biblija šaj te arakha šuže mislija kola šaj te pomožinen amenđe te ikala andi amari godi o negativna mislija (Filipljanima 4:8). Odola utešna mislija šaj te den amen mir hem te pomožinen amenđe te kontrolišina amare emocije (Psalam 94:18, 19).
I Biblija šaj te pomožini amenđe te ćhinava te mislina so ništa na vredinaja (Luka 12:6, 7).
But e biblijake stihija mothovena amenđe so na hijam kokri hem so o Devel, amaro Stvoritelj, haljola sar osetinaja amen (Psalam 34:18; 1. Jovanova 3:19, 20).
Ki Biblija pisini so o Devel pana hari ka cidel sa o uspomene kola anena amenđe dukh (Isaija 65:17; Otkrivenje 21:4). Odova obećanje šaj te del amen snaga te borina amen protiv o negativna mislija hem emocije.