3 | Sikljov ando biblijake primerija

So odova značini?

I Biblija vaćeri ando murša hem đuvlja kola hine len razna emocije. Đi čitinaja olenge iskustvija, šaj te arakha nekas koj tano slično sar amen.

Sar odova šaj te pomožini?

Sare amen isi amen potreba avera te haljon sar osetinaja amen. Odova tano posebno važno ako isi amen problemi e mentalno sastipaja. Ked čitinaja i Biblija, amen sikljovaja ando manuša kola razmislinđe slično sar amen hem kola hine len slična osećanja. Sebepi odova, isi amen osećaj so na hijam kokri ko amare problemija.

• I Biblija vaćeri ando manuša kola hine bespomoćna hem očajna. Da li iked phenđan: „Našti više! Alo maje sa đi o nakh!“ Ađahar osetinđe pe hem o Mojsije, o Ilija hem o David (Brojevi 11:14; 1. Kraljevima 19:4; Psalam 55:4).

• I Biblija vaćeri andi jekh romni koja vićinđa pe Ana. Oj „hine la bari dukh ko vilo“ sose naštine te ovel la ćhave hem sose olake romesi dujto romni marđa laće muj (1. Samuilova 1:6, 10).

• I Biblija vaćeri hem kotar jekh manuš kova vićinđa pe Jov, kova hine le but pharipa ko po životi. Iako hine verno e Devlese, ov hine le but bari dukh ko vilo hem tegani phenđa: „Gadonđa pe maje mo životi! Na mangava više te živinav“ (Jov 7:16).

Odola manuša uspinđe te pobedinen po negativno razmislibe. Olengo primer šaj te pomožini hem amenđe te ikljova ko krajo amare problemencar.