1 | Molitva – „Sa tumare brige forden koro leste“
KI BIBLIJA PISINI: „Sa tumare brige forden [ko Devel], sose ov brinini pe tumendar“ (1. PETROVA 5:7).
So odova značini?
O Jehova vićini amen phravdo te phena lese sa so mučini amen hem so brinini amen (Psalam 55:22). Ki molitva šaj te phena e Devlese sa amare pharipa, bilo te oven tikne ja bare. Ako tano diso amenđe važno, tegani odova tano važno hem e Jehovase, sose ov mangela amen hem brinini pe ando amare osećanja. I molitva tani važno korako te šaj te ovel amen mir ko vilo (Filipljanima 4:6, 7).
Sar odova šaj te pomožini?
Ked amaro mentalno sastipe nane šukar, tegani isi amen osećaj so hijam kokri. Avera manuša našti potpuno te haljon sar tano amenđe (Poslovice 14:10). Ama, ako phenaja e Devlese sar osetinaja amen, šaj te ova sigurna so ov pažljivo šunela amen hem so haljola amen. O Jehova đanela so nakhaja, kobor tano amenđe pharo hem mangela phravdo te phena lese sa so mučini amen (2. Letopisa 6:29, 30).
I molitva pomožini amenđe te ovel amen pana pobaro poverenje so o Jehova brinini pe amendar. Šaj osetinaja amen sar o psalmista kova ki molitva phenđa e Jehovase: „Tu dikhljan mo pharipe. Tu đaneja kobor maje pharo“ (Psalam 31:7). Odova so đanaja so o Jehova dikhela sova borinaja amen, šaj te pomožini amenđe te istrajina ko pharo vreme. Ama ov na samo so dikhela sova borinaja amen, već ov haljola amen pošukar ando bilo kova manuš hem pomožini amenđe te arakha uteha ko oleso Lafi.