So ćhinavi tut te krstine tut?

1. Sose tano šukar te krstine tut?

Da li mangeja e Jehova, e Devle kova dinđa tut sa o šukar buća pa hem to životi? Da li mangeja te mothove lese kobor mangeja le? Najšukar način te ćere odova tano ađahar so ka predajine to životi olese hem ka krstine tut. Palo odova, ka ove deo andi Jehovasi porodica. Sebepi odova, to Dad hem to Amal ka vodini tut hem ka brinini pe tutar (Ps. 73:24; Is. 43:1, 2). Isto ađahar, palo predanje hem krštenje šaj te ovel tut nada aso večno životi (1. Petr. 3:21).

2. Sostar ka vaćera ko akava članko?

² Da li isi diso so ćhinavi tut te krstine tut? Ako ja, tegani na hijan kokri. Milionija manuša kola krstinđe pe morandilje te meninen po ponašanje hem po način sar razmislinena te šaj te ispuninen o uslovija aso krštenje. On akana radosno hem revno služinena e Jehovase. So šaj te sikljova ando disave manuša kola krstinđe pe ko prvo veko? Akana ka dikha so šaj hine te ćhinavi len te krstinen pe hem so šaj te sikljova ando olengo primer.

O SAMARIĆANIJA KRSTINĐE PE

3. So o Samarićanija šaj valjanđe te ćeren angleder te krstinen pe?

³ Ko Isuseso vreme, o Samarićanija hine jekh religiozno grupa koja živinđa paše uzo Sihem hem uzi Samarija, severno andi Judeja. Angleder so krstinđe pe, o Samarićanija valjanđe te prihvatinen e Devleso Lafi hem te sikljon olestar. On verujinđe ko samo prva panđ knjige andi Biblija, kotar Postanak đi o Ponovljeni zakoni hem verovatno ki knjiga Isus Navin. Ama, on očekujinđe o Mesija te avel, odolese so verujinđe ko Devleso obećanje kova pisini ko Ponovljeni zakoni 18:18, 19 (Jov. 4:25). Te šaj te krstinen pe, on valjanđe te prihvatinen so o Isus tano o obećimo Mesija. But Samarićanija baš odova hem ćerđe (Jov. 4:39). A avera šaj valjanđe te ciden pestar o predrasude kola hine len premalo Jevreja (Luka 9:52-54).

4. Premalo Dela apostolska 8:5, 6, 14, sar disave Samarićanija reagujinđe ked o Filip propovedinđa lenđe?

⁴ So pomožinđa e Samarićanenđe te krstinen pe? Ked o Filip propovedinđa „ando Hrist“, disave Samarićanija „počminđe te verujinen ko Devleso lafi“. (Čitin Dela apostolska 8:5, 6, 14.) Iako ov hine Jevrejin, on ipak šunđe le. Sose? Šaj setinđe pe so ko Mojsijese knjige pisini so o Devel nane pristrasno (Pon. zak. 10:17-19). On „pažljivo šunđe e Filipe ked vaćerđa lenđe“ ando Isus hem haljilje so o Devel bićhalđa le koro lende. O Filip ćerđa but čudija, saćarđa e nabormen hem ikalđa e demonen ando manuša (Dela 8:7).

5. So sikljovaja ando Samarićanija?

⁵ Odola Samarićanija šaj hine te na šunen e Filipe odolese so ov hine Jevrejin hem so sikavđa len diso so niked angleder na šunđe. Ama, on na ćerđe odova. Palo odova so uverinđe pe so o Filip sikavi len ando ćaćipe, on na razmislinđe odolestar da li valjani te krstinen pe, nego odmah ćerđe odova. Ki Biblija pisini: „Ked počminđe te verujinen e Filipese kova vaćerđa i šukar vest ando Devleso Kraljevstvo hem ando Isuse Hristeso anav, krstinđe pe hem murša hem đuvlja“ (Dela 8:12). Da li hem tu hijan uverimo so odova so pisini ki Biblija tano ćaće? Da li hijan uverimo so e Jehovase svedokija mothovena so mangena jekh jekhe sar so o Isus phenđa so o prava hrišćanija valjani te ćeren? (Jov. 13:35). Odolese, ma dara te krstine tut. Ov sigurno so o Jehova ka blagoslovini tut.

6. Sar šaj te pomožini tuće e Rubeneso iskustvo?

⁶ O Ruben, andi Nemačka, barilo ki porodica ando Jehovase svedokija. Ama, sar tinejdžer počminđa te sumnjini ko odova da li o Devel ćaće postojini. So pomožinđa lese te cidel pestar odola sumnje? Ov odlučinđa te istražini andi odija tema sose haljilo so na đanela but buća odolestar. Ov phenđa: „Ko mo lično proučibe, odlučinđum te uverinav man soj tano o ćaćipe. But putija morandiljum te istražinav andi evolucija.“ Ov čitinđa i knjiga, Postoji li Stvoritelj kome je stalo do tebe? Odija knjiga but pomožinđa le te zorjaćeri pi vera ko Devel. Ano peste mislinđa: „O Jehova ćaće postojini.“ Kasnije, posetinđa amaro glavno sedište hem tegani počminđa pana pobuter te cenini o jekhipe kova isi ki organizacija. Ked irinđa pe ćhere, odlučinđa te krstini pe hem odova ćerđa ked hine le 17 berš. Ako hem tu počmineja te sumnjine ko odova so sikljiljan, odvojin vreme te istražine pobuter odolestar ko amare publikacije. Odova so ka sikljove ka pomožini tut te pobedine te „sumnje“ (Ef. 4:13, 14). Đi šuneja o iskustvija ando mangipe hem jekhipe kova isi maškaro Jehovaso narodo ko razna phuvja hem dikheja dokaz ando odova ki ti skupština, tu pobuter ka cenine amaro jekhipe.

O SAVLE ANDO TARSIS KRSTINĐA PE

7. Savo stav o Savle valjanđa te menini koro peste?

⁷ Akana ka razmotrina o primer ando Savle kotar Tarsis. Ov but šukar napredujinđa ko judaizam hem hine le baro položaj maškaro Jevreja (Gal. 1:13, 14; Fil. 3:5). Ko odova vreme, but Jevreja mislinđe so o hrišćanija tane otpadnikija hem odolese o Savle progoninđa len. Ov mislinđa so ađahar ćerela e Devlesi volja (Dela 8:3; 9:1, 2; 26:9-11). Ako bi počmini te verujini ko Isus hem palo odova te krstini pe, ov valjanđa te ovel svesno so hem ov ka ovel progonimo.

8. (a) So pomožinđa e Savlese te krstini pe? (b) Premalo Dela apostolska 22:12-16, sar o Ananija pomožinđa e Savlese? (Dikh i slika.)

⁸ So pomožinđa e Savlese te krstini pe? Ked o Isus pojavinđa pe lese, i svetlost koja alji ando nebo korjaćerđa le (Dela 9:3-9). Trin dive postinđa hem sigurno razmislinđa ando odova so ulo. O Savle uverinđa pe so o Isus tano o obećimo Mesija hem so olese učenikija tane e Jehovase ćaćutne sluge. E Savlese sigurno hine but pharo hem hine but tužno so učestvujinđa ko odova te mudari pe o Stefan (Dela 22:20). Palo trin dive, jekh učeniko kova vićinđa pe Ananija alo koro leste, saćarđa le hem podstakninđa le odmah te krstini pe. (Čitin Dela apostolska 22:12-16.) O Savle ponizno prihvatinđa olesi pomoć hem počminđa te živini jekh nevo životi (Dela 9:17, 18).

9. So šaj te sikljova ando Savle?

⁹ Amen šaj te sikljova diso ando Savle. Ov šaj hine te mukhel o ponos ili i dar ando manuš te ćhinavi le te krstini pe. Ama, na ćerđa odova. Ov hine ponizno hem hine spremno te menini pe te šaj te ovel e Isuseso sledbeniko (Dela 26:14, 19). Ov manglja te ovel hrišćanin iako đanđa so ka ovel progonimo (Dela 9:15, 16; 20:22, 23). Palo krštenje, hem ponodri osloninđa pe ko odova so o Jehova ka pomožini le te istrajini ko razna pharipa (2. Kor. 4:7-10). Šaj hem tu palo krštenje ka oven tut pharipa hem kušnje, ama ka ovel tut hem pomoć. Ov sigurno so o Jehova hem o Isus ka pomožinen tut (Fil. 4:13).

10. Sar pomožini tuće e Anako iskustvo?

¹⁰ I Ana tani andi Istočno Evropa. Oj avela ando narodo Kurdi. Palo odova so olaki daj krstinđa pe, oj počminđa te proučini i Biblija ked hine la 9 berš hem olako dad složinđa pe odoleja. Ama, odova na sviđinđa pe olake familijaće koja živinđa e Anaja hem olake porodicaja. On phenđe laće soj tani but bari lađ ked neko mukhela i religija ando pe phure. Ked hine la 12 berš, oj pućlja pe dade da li ov složini pe odoleja oj te krstini pe. Olako dad manglja te đanel da li tani odija olaki odluka ili neko aver ćhivela la te ćerel odova. Oj phenđa: „Me mangava e Jehova.“ Ked šunđa odova, ov dozvolinđa laće te krstini pe. Palo odova, olaki familija hem ponodri ponašinđa pe but lošno premalo late. Čak olako papo phenđa laće: „Pošukar hine te živine nemoralno hem te pušine nego te ove e Jehovaso svedoko.“ So pomožinđa e Anaće? Oj phenela: „O Jehova pomožinđa man te ovav zorali, a hem me roditeljija but pomožinđe man.“ I Ana ki jekh sveska pisini ando disave situacije ked osetinđa e Jehovaso vas ko po životi. Disavo puti, oj čitini odova so pisinđa te na bistrel sar o Jehova pomožinđa la. Ako daraja ando protivljenje, ma bistri so o Jehova hem tuće ka pomožini (Jevr. 13:6).

O KORNELIJE KRSTINĐA PE

11. So šaj hine te ćhinavi e Kornelije te krstini pe?

¹¹ But buća šaj te sikljova hem ando Kornelije. Ov hine zapovedniko upro 100 vojnikija ki rimsko vojska (Dela 10:1, fusn.). Odolese, šaj hine le baro položaj maškar o manuša hem ki vojska. Ov „ćerđa but šukar buća e ćororenđe“ (Dela 10:2). O Jehova bićhalđa e Petare te vaćeri lese i šukar vest. Da li odova so o Kornelije hine le baro položaj ćhinavđa le te krstini pe?

12. So pomožinđa e Kornelijese te krstini pe?

¹² So pomožinđa e Kornelijese te krstini pe? Ki Biblija pisini „so ov darandilo ando Devel hem služinđa lese pe ćherutnencar“. Isto ađahar, ov stalno ando vilo molinđa pe e Devlese (Dela 10:2). Ked o Petar vaćerđa lese i šukar vest, ov hem olesi porodica počminđe te verujinen ko Isus hem odmah krstinđe pe (Dela 10:47, 48). O Kornelije hine spremno te ćerel bilo koja promena koro peste te šaj te služini e Jehovase zajedno pe porodicaja (Is. Nav. 24:15; Dela 10:24, 33).

13. So šaj te sikljova ando Kornelije?

¹³ Sar o Savle, hem o Kornelije šaj hine te mukhel o položaj te ćhinavi le te krstini pe, ama na ćerđa odova. Da li hem tu valjani te ćere disave bare promene angleder te krstine tut? Ako ja, o Jehova ka pomožini tuće. Ov ka blagoslovini tut ako hijan odlučno te ićere tut ko biblijake načelija te šaj te služine lese.

14. Sar šaj te pomožini tuće o primer ando Cujoši?

¹⁴ O Cujoši ando Japan, morandilo te ćerel disave promene ki pi buti te šaj te krstini pe. Ov ćerđa sar pomoćniko ando direktori ki škola Ikenobo. Ki odija škola sikljola pe sar te ćeren pe buketija ando luluđa. Ked o direktori našti hine te đal ko parujbe, o Cujoši ko oleso than đelo hem učestvujinđa ko disave budistička ritualija. Ama, palo odova so sikljilo so ovela e manušencar ked merena, ov haljilo so na ka šaj te krstini pe ako hem ponodri učestvujini ko odola ritualija. Odolese odlučinđa više te na ćerel odova (2. Kor. 6:15, 16). Ov vaćerđa pe direktoreja odolestar. So ulo palo odova? O Cujoši pana šaj hine te ćerel buti, ama bizo te učestvujini ko odola ritualija. Krstinđa pe jekh berš palo odova so počminđa te proučini i Biblija.a Ako valjani hem tu te ćere disave promene ki ti buti te šaj ugodine e Jehovase, ov sigurno so ov ka brinini pe tutar hem andi ti porodica (Ps. 127:2; Mat. 6:33).

O MANUŠA ANDO KORINT KRSTINĐE PE

15. So šaj hine te ćhinavi e manušen ando Korint te krstinen pe?

¹⁵ O manuša kola živinđe ki purani diz Korint but manglje o materijalna buća hem hine nemoralna. But manuša ćerđe disave buća kola o Devel na mangela. Odolese, jekhe manušese kova živinđa ki jekh asavki diz hine but pharo te prihvatini o ćaćipe. Ama, ked o apostol Pavle alo ki odija diz hem propovedinđa i šukar vest ando Hrist, „krstinđe pe but manuša ando Korint kola šunđe le“ (Dela 18:7-11). Palo odova, o Gospod o Isus Hrist pojavinđa pe e Pavlese ki vizija hem phenđa: „Ki akija diz isi pana but manuša kola ka verujinen koro mande.“ Odolese, o Pavle uduri propovedinđa pana jekh tekvaš berš.

16. So pomožinđa disavenđe ko Korint te ćhinaven te ćeren odova soj tano lošno te šaj te krstinen pe? (2. Korinćanima 10:4, 5)

¹⁶ So pomožinđa e manušenđe ando Korint te krstinen pe? (Čitin 2. Korinćanima 10:4, 5.) E Devleso Lafi hem oleso sveti duh pomožinđa lenđe te ćeren bare promene (Jevr. 4:12). Okola kola prihvatinđe i šukar vest ando Hrist šaj hine te ćhinaven te ćeren odova soj tano lošno sar soj tano o pibe, o ćoribe hem i homoseksualnost (1. Kor. 6:9-11).b

17. So šaj te sikljova ando manuša kotar Korint?

¹⁷ Zapazin so iako disave manuša ko Korint valjanđe te ćeren but bare promene te šaj te krstinen pe, on na mislinđe so odova tano but pharo. On dinđe sa pestar te oven ko drumo kova legari ko večno životi (Mat. 7:13, 14). Da li tano tuće pharo te menine tut te šaj te krstine tut? Niked ma ćhinav te borine tut! Molin tut e Jehovase te del tut po sveti duh kova ka pomožini tuće te ćhinave te ćere odova soj tano lošno.

18. Sar šaj te pomožini tuće e Monikako primer?

¹⁸ Te šaj te krstini pe, i Monika andi Gruzija but trudinđa pe te ćhinavi te koristini melale lafija hem lošno zabava. Oj phenđa: „Angleder te krstinav man, molinđum man e Jehovase te del man snaga. O Jehova đanđa so me mangava te ćerav odova soj tano ispravno. Uvek pomožinđa man hem usmerinđa man.“ I Monika krstinđa pe ked hine la 16 berš. Da li hem tu isi tut disave navike kola valjani te cide tutar te šaj te služine e Jehovase? Uvek rode lestar snaga te šaj te menine tut. O Jehova niked na ka ćhinavi te del tut po sveti duh (Jov. 3:34).

TI VERA ŠAJ TE CIDEL O PLANINE

19. So šaj te pomožini tut te cide tutar o pharipa kola tane sar planina? (Dikh i slika.)

¹⁹ Ov sigurno so o Jehova mangela tut hem mangela te ove deo andi olesi porodica, bizo obzir so ćhinavi tut te krstine tut. O Isus aso nekobor učenikija phenđa: „Ako tani tumari vera bari sar zrno andi gorušica, ka phenen akala planinaće: ’Cide tut akatar hem đa uduri‘, hem ka cidel pe. Hem na ka ovel ništa so našti te ćeren“ (Mat. 17:20). Okola so šunđe le hine oleja samo nekobor berš, odolese olengi vera valjanđa pana te barjol. O Isus uverinđa len so ako isi len asavki vera, o Jehova ka pomožini len te ciden pestar o pharipa kola tane sar planina. O Jehova ka pomožini hem tuće te ćere odova!

20. Ko so podstakninđe tut o primerija ando prvo veko hem o primerija kola pominena pe ko akava članko?

²⁰ Ako isi diso so ćhinavi tut te krstine tut, tegani de sa tutar te menine odova. Nek zorjaćeri tut o primer ando prva hrišćanija hem ando phralja hem phenja ando amaro vreme. Nek olengo primer ohrabrini tut hem podstaknini tut te predajine tut e Jehovase hem te krstine tut. Odija tani najšukar odluka koja ka ane ko to životi!