O Jehova pomožinđa amen „te cvetona uduri kaj hijam le sadime“

O bračno par Kasholm ko 1979. berš hine ki škola Galad hem but putija hine „sadime“, avere lafencar, hine bićhalde te služinen ko Iran, ko Zair, ki Tanzanija, ki Uganda, ko Mauricijus hem ko Mjanmar. O savet kova pominđam ki početka dinđa len o phral Džek Redford. Sar đelje o berša, odova savet but pomožinđa lenđe sose but putija hine „sadime“ hem „presadime“. Akana ka dikha sar hine odova.

Mats, šaj li te phene amenđe sar upoznajinđan o ćaćipe?

Mats: Đi hine o Dujto svetsko rat, mo dad živinđa ki Poljska hem ki katoličko crkva dikhlja kobor tane o manuša licemerna. Ama, ov često phenđa: „Sigurno hijum so negde isi ćaćipe“. Kasnije, haljiljum soj tano u pravu. Ćinđum but polovna knjige. Jekh olendar hine i plavo knjiga O ćaćipe kova legari ko večno životi. Odova naslov hine maje but zanimljivo. Odolese, ked ćinđum la, odija rat celo čitinđum la. Sabale, haljiljum so arakhljum o ćaćipe.

Kotar april ko 1972. berš, počminđum te čitinav but publikacije kola izdajinđe e Jehovase svedokija hem odothe arakhljum o odgovorija ko me pućiba. Osetinđum man sar o trgovco kotar Isuseso poređenje kova palo odova so arakhlja o dragoceno biser bikinđa sa so hine le te šaj te ćinel le. Isto ađahar, hem me bikinđum sa so hine man. Bikinđum me planija te đav ko fakulteti hem te ovav doktori te šaj te ćinav o dragoceno „biser“ ando ćaćipe kova arakhljum (Mat. 13:45, 46). Palo odova, ko 10. decembar, ko 1972. berš krstinđum man.

Aso jekh berš, krstinđe pe me roditeljija hem mo tikneder phral. Ko jul ko 1973. berš, počminđum e punovremeno službaja. Ki mi skupština hine but revna pionirija. Maškaro lende hine hem i An Katrin, jekh but šuži hem duhovno phen. Amen zaljubinđam amen hem leljam amen ko 1975. berš. Palo odova, štar berš živinđam ki Švedska ki jekh but šuži diz koja vićini pe Stremsund, kuri o manuša manglje te šunen i šukar vest.

An Katrin: Mo dad upoznajinđa o ćaćipe ki Stokholm hari angleder te završini o fakulteti. Iako hine man samo trin masek, ov legarđa man ko sastankija hem ki služba. Me dajaće odova hić na sviđinđa pe. Odolese trudinđa pe te dokažini so odova so sikavena e Jehovase svedokija nane tačno. Ama, na uspinđa. Sar đelo o vreme, hem oj krstinđa pe. Ked hine man 13 berš hem me krstinđum man, a ked pherđum 16 berš, uljum pionirka. Palo odova so služinđum ki Umea, ko than kuri hine bari potreba, počminđum te služinav sar specijalno pioniri.

Palo odova so leljam amen, o Mats hem me hijam le bahtale so šaj hine te pomožina nekobor manušenđe te upoznajinen o ćaćipe. Maškaro lende hine hem i Majvor, jekh ćhaj koja odrekninđa pe andi sportsko karijera hem zajedno me tiknedere phenjaja služinđe sar pionirke. Ko 1984. berš, on duj hine ki škola Galad hem pana služinena sar misionarija ko Ekvador.

So pomožinđa tumenđe ko tumare zadatkija te primeninen o savet „cveton othe kaj hijan sadimo“?

Mats: But putija hijam le „presadime“, avere lafencar, dobinđam neve zadatkija. Amen trudinđam amen te mukha koreno ko odola neve zadatkija, avere lafencar te prilagodina amen ađahar so ka oponašina e Isuseso primer, a posebno olesi poniznost (Kol. 2:6, 7). Na primer, na očekujinđam o phralja te prilagodinen pe amenđe, već mangljam te haljova sar razmislinena, savi tani olengi kultura hem sose ćerena o buća ko disavo određeno način. Ked oponašinđam e Isuseso primer, hine amenđe polokho te prilagodina amen ko amare zadatkija hem te cvetona uduri kaj služinđam (Ps. 1:2, 3).

An Katrin: Te šaj o kaš hem ponodri te barjol othe kaj tano presadimo, valjani lese svetlost koja avela ando kham. O Jehova uvek hine amenđe sar „kham“ (Ps. 84:11). Ov blagoslovinđa amen ađahar so dinđa amen bute phralen hem phenjen, a on mothovđe amenđe baro mangipe. Ki amari tikni skupština ko Teheran, ko Iran, o phralja hine but gostoljubiva hem velikodušna isto sar disave manuša kola pominena pe ki Biblija. Amen mangljam te aćhova ko Iran, ama ko jul ko 1980. berš, amaro delo hine zvanično zabranimo hem aso 48 satija morandiljam te mukha odija phuv. Palo odova, hijam le bićhalde te služina ko Zair (akana Kongo) ki Afrika.

Ked šunđum so ka đa ki Afrika, but runđum. Darandiljum sose šunđum so uduri isi sapa hem bare nabormipa. Ama, amare duj amala, kola beršencar služinđe uduri, phenđe amenđe: „Tumen niked na hijen le ki Afrika. Probinen hem ka dikhen so ka zamangen la“. Hem ćaće hine ađahar! O phralja hem o phenja mothovđe amenđe baro mangipe. Palo šov berš ked valjanđam te đa ando Zair sebepi i zabrana, asandiljum kokri maje sose haljiljum so tegani molinđum e Jehova te aćhova ki Afrika.

Palo sa akala berša, save blagoslovija hine tumen?

Mats: Odolese so služinđam ko but phuvja, uljam but paše avere misionarencar. Isto ađahar, ko but thana kaj služinđam hine amen but kursija, čak disavo puti po 20 kursija svako amendar. Niked našti te bistrav kobor baro mangipe hem gostoljubivost mothovđe amenđe o phralja andi Afrika. Đi posetinđam o skupštine ki Tanzanija sućam ko amare vorda, ama o phralja trudinđe pe te ovel amen sa odova so valjanđa amenđe, čak iako hine but ćorore (2. Kor. 8:3). Ko krajo ando dive uživinđam te vaćera jekh jekheja ando odova sar nakhljam odova dive hem te zahvalina amen e Jehovase.

An Katrin: Hijum but bahtali so živinđum maškaro phralja hem phenja kola tane kotar razna phuvja. Sikljiljam but ćhibja, sar soj tane farsi, francuski, luganda hem svahili. Isto ađahar, šaj hine te sikljova but buća ando razna kulture. Amen ćerđam učenikonen, arakhljam amenđe amalen hem sarađujinđam „piko pikeja“ ki služba e Jehovase (Sof. 3:9).

Isto ađahar, uživinđam ko razna buća kola o Jehova stvorinđa. Svako puti ked prihvatinđam disavo nevo zadatko, odova hine ka phene pođinđam ko jekh putovanje ko kova o Jehova hine amaro vodiči. Ov sikavđa amen but buća kola kokri niked na bi sikljovaja.

Save problemija hine tumen hem so pomožinđa tumen te istrajinen?

Mats: Sar nakhlje o berša, nekobor putija hijam le but naborme, na primer hine amen malarija. I An Katrin hine la nekobor hitna operacije. Isto ađahar, but sekirinđam amen amare roditeljenđe sose hine but phure. Ama, nek oven saste mo phral, me romnjake phralja hem olaki phen so brininđe ando amare roditeljija. But hijam lenđe zahvalna sose odova ćerđe strpljivo, bahtalipaja hem mangipaja (1. Tim. 5:4). Iako ćerđam sa so šaj te pomožina lenđe, podijekh puti hijam le but tužna sose našti hine te ćera diso pobuter sose hijam le dur.

An Katrin: Ko 1983. berš, đi služinđam ko Zair, me but naborsaljum andi kolera. O doktori phenđa me romese: „Odmah legar la kotar akija phuv.“ Tajsato dive, amen već khuvđam ko jekh teretno avioni. Odova hine jedino avioni kova odova dive đelo ki Švedska.

Mats: Amen but runđam odolese so mislinđam so više našti te služina sar misionarija. Ama iako o doktori mislinđa so i An Katrin na ka oporavini pe, oj ipak ulji pošukar. Palo jekh berš, amen šaj hine te irina amen ko Zair, ama akava puti đeljam ki diz Lubumbaši ki skupština kuri vaćerđa pe i ćhib svahili.

An Katrin: Đi hijam le ko Lubumbaši, aćhiljum khamni, ama nažalost našalđum e beba. Hijam le but tužna sebepi odova, iako na planirinđam te ovel amen ćhave. Ko odova but pharo period, o Jehova dinđa amen jekh but šužo poklon. Hine amen biblijake kursija sar niked angleder. Aso pohari kotar jekh berš, amari skupština barilji ando 35 ko 70 objaviteljija, a o broj ando prisutna ko amare sastankija barilo ando 40 ko 220 manuša. Odolese so hijam le zaokupime e službaja, o Jehova blagoslovinđa amaro trud hem odolese osetinđum man pošukar. Ama, amen pana razmislinaja hem vaćeraja andi amari beba. Jedva ađićeraja te dikha sar o Jehova ka cidel amari dukh ko nevo sveto.

Mats: Kasnije, i An Katrin osetinđa pe but slabo hem umorno. A maje o doktorija phenđe so isi man rak ko debelo crevo hem valjanđum te đav ki jekh but bari operacija. Akana, me osetinava man pošukar, a i An Katrin dela po najšukar e Jehovase.

Amen haljiljam so na hijam jedina kola isi len problemija. Palo genocid kova hine ki Ruanda ko 1994. berš, amen đeljam te posetina e phralen ko izbeglička kampija. Šaj hine te dikha so iako živinđe ko but phare okolnostija, on pana hine verna, istrajna hem gostoljubiva. Odova uverinđa amen so kobor god pharipa isi amen ko životi, o Jehova niked na ka aćhavi amen (Ps. 55:22).

An Katrin: Pana jekh phari situacija doživinđam ked đeljam ko posvećenje ki podružnica ki Uganda ko 2007. berš. Palo program amen đeljam ko Najrobi, ki Kenija hem ko autobus hine 25 Betelitija hem misionarija. Angleder te resa ki granica, jekh kamioni iznenada alo ki amari traka hem khuvđa amen. Nažalost, o vozači hem pana panđ phralja hem phenja mulje, a kasnije jekh phen mulji ki bolnica. Jedva ađićeraja palem te dikha len! (Jov 14:13-15).

Palo disavo vreme, me oporavinđum man ando povrede kola hine man. Ama, o Mats, me hem avera putnikija haljiljam so isi amen posttraumatsko stres. O anksiozna napadija vazdena man hine raćate hem hine man osećaj so ka phene isi man srčani-napad. Ama, odova so molinđam amen hem čitinđam amare omiljena stihija but pomožinđa amen te aćhova smirime. Isto ađahar, đeljam ko doktori kova but pomožinđa amenđe. Akana nane amen odobor jaka simptomija, ama hem ponodri molinaja amen okolenđe kola tane ki slično situacija.

Ked opisujinđen sar o Jehova pomožinđa tumen te ikljoven ko krajo tumare problemencar, phenđen so o Jehova „arakhlja tumen pažljivo sar jare.“ So mislinđen odoleja?

Mats: Ki ćhib svahili jekh poslovica phenela: „Akharđe amen pažljivo sar jare.“ Baš sar so jekh manuš pažljivo akhari o jare te na bi phađona, ađahar o Jehova mangipaja brininđa pe amendar ko svako than kuri služinđam. Uvek hine amen odova so valjanđa amenđe, a disavo puti čak pobuter ando odova. Jekh način sar osetinđam e Jehovaso mangipe hem olesi podrška tano prekalo Vodeće telo sose on hine but saosećajna premalo amende.

An Katrin: Mangava te phenav tumenđe sar o Jehova brininđa pe amendar ki jekh situacija. Jekh dive javinđe maje so mo dad tano but nabormo hem soj tano ki bolnica. Ama, amen naštine odmah te đa odolese so hine amen duj problemija. O Mats samo so oporavinđa pe andi malarija hem na hine le snaga, a hem na hine amen pare te ćina karte. Odolese, mislinđam te bikna amare vorda. Ama, sigate palo odova vićinđa amen jekh bračno par kova šunđa so ulo hem phenđa amenđe so mangena te ćinen amenđe jekh karta. Palo lende, vićinđa amen jekh phuri phen koja ćedinđa pare ki jekh koverta ki koja pisinđa: „Okolenđe kase valjani.“ Aso nekobor minutija, o Jehova obezbedinđa amenđe odova so valjanđa amenđe (Jevr. 13:6).

So sikljiljen ko akala 50 berš ki punovremeno služba?

An Katrin: Sikljiljum so ako arakhaja „o mir hem o pouzdanje“ odova ka ovel amari snaga. Ked osloninaja amen upro Jehova, ov brinini pe amendar (Is. 30:15; 2. Let. 20:15, 17). Kuri god služinđam, trudinđam amen te da amaro najšukar. Dobinđam but bare blagoslovija odolese so posvetinđam amaro životi e Jehovase, a na aso diso aver.

Mats: Najvažno buti koja sikljiljum tani te osloninav man ko Jehova ki svako situacija hem te dikhav sar ka pomožini man (Ps. 37:5). Ov uvek ispuninđa pe obećanja ađahar so pomožinđa man. Odova ćerela hem avdije đi služinaja ko Betel ko Mjanmar.

Nadinaja amen so o terne kola mangena te služinen pobuter e Jehovase ka osetinen oleso verno mangipe. Sigurna hijam so o Jehova ka pomožini lenđe te cvetonen bizo obzir kaj tane sadime.