Da li valjani te molinav man e sveconenđe?

So phenela i Biblija?

Na. I Biblija phenela so valjani te molina amen samo e Devlese, ko Isuseso anav. O Isus phenđa pe učenikonenđe: „Odolese, ađahar molinen tumen: „’Amaro Dad, kova hijan ko nebo, te svetini pe to anav“ (Matej 6:9, Daničić-Karadžić). O Isus sikavđa pe učenikonen te molinen pe e Devlese, a na e sveconenđe, e anđelenđe ja nekase averese.

Isto ađahar, o Isus phenđa pe učenikonenđe: „Me hijum o drumo, o ćaćipe hem o đivdipe; niko nane te avel e Dadese, osim prekalo mande“ (Jovan 14:6, Daničić-Karadžić). O Devel ćhivđa jedino e Isuse te ovel posrednik maškaro Devel hem o manuša (Jevrejima 7:25).

Da li šaj te molinav man hem e Devlese hem e sveconenđe?

Jekh ando Deš zapovestija phenela: „Me hijum o Gospod, toklo Devel, kova hijum ljubomorno“ (Izlazak 20:5, Bakotić). Sar tano o Devel „ljubomorno“? Ko prevod Novi svet ko akava than pisini „kova rodela te ove verno ko sa.“ Odova značini so o Devel mangela samo olese te služina, a jekh način sar služinaja olese tano ađahar so molinaja amen (Isaija 48:11).

Ked molinaja amen e anđelenđe ja e sveconenđe, amen maraja muj e Devlese. Ked o apostol Jovan manglja te klanini pe e anđelese, o anđeo phenđa lese: „Ma, me hijum sIuga sar hem tu hem te phralja kola isi len svedočanstvo ando Isus. E Devlese klanin tut“ (Otkrivenje 19:10, Daničić-Karadžić).