Da li e Devleso Lafi šaj te pomožini tuće ako hijan dugo nabormo?

So phenela e Devleso Lafi?

Šaj. O Devel brinini pe ando pe sluge kola tane naborme. Ked vaćeri ando verna sluge, e Devleso Lafi phenela: „O Jehova ka podržini le ked ka ovel nabormo“ (Psalam 41:3). Ako dugo hijan nabormo, akala trin buća ka pomožinen tuće te istrajine:

1. Molin tut asi snaga te istrajine. Tu šaj te dobine „e Devleso mir kova tano upreder odova so o manuš šaj te haljol“ hem kova ka pomožini tut hem ponodri te istrajine (Filipljanima 4:6, 7).

2. Ov pozitivno. E Devleso Lafi phenela: „Bahtalo vilo tano šukar leko, a o duho kova tano phago lela i snaga“ (Poslovice 17:22). Ma našal to smisao aso humor, sose odova na samo so ka pomožini tut te na ove tužno, već hem šukar ka utičini ko to sastipe.

3. Zorjaćer ti nada asi budućnost. I nada šaj te pomožini tut te ove bahtalo iako hijan nabormo (Rimljanima 12:12). Ko e Devleso Lafi pisini so ka avel o vreme ked „nijekh manuš na ka phenel: ’Nabormo hijum‘“ (Isaija 33:24). Tegani, o Devel ka cidel sa o nabormipa kola dugo trajinena hem aso kola o manuša avdije na arakhlje o leko. Na primer, e Devleso Lafi phenela so o phure palem ka oven terne hem saste. Ano late pisini: „Nek oleso telo ovela pana posasto nego ko ternipe, nek irini pe ko dive ked hine terno hem zoralo“ (Jov 33:25).

Ma bistri: Iako e Jehovase svedokija osloninena pe upri e Devlesi pomoć, isto ađahar ked tane naborme on đana ko doktori (Marko 2:17). Ama, ki aver strana, on na preporučinena sar neko valjani te lečini pe, sose odija tani svakone manušesi lično odluka.