Ked isi tut ozbiljno nabormipe

„Ked šunđum so isi man rak ko pluća hem ko debelo crevo, hijum le sigurno so ka merav. Ama ked resljum ćhere ando doktori, mislinđum: ’Na očekujinđum akava, ama mora te arakhav disavo način te borinav man‘“ (Linda, 71 berš).

„Isi man jekh pharo nabormipe kova pogodini o nervija andi levo strana ko muj. Podijekh puti perava ki depresija sebepi i dukh. But putija osetinđum man usamljeno hem čak razmislinđum te mudarav man“ (Eliz, 49).

KED neko isi le disavo ozbiljno nabormipe kolestar šaj te merel, odova hić nane lokho. Uzo odova so borini pe e nabormipaja, ov tano but zabrinuto hem darala sose na đanela so ka ovel. But pregledija, bare redija, bare troškija hem o posledice ando iljačija ćerena o stres te ovel pana pobaro. Sebepi odova bute manušenđe šaj te ovel pharo te izdržinen sa odova.

So šaj te pomožini tuće te ikljove ko krajo odoleja? Bute manušenđe pomožini ked vaćerena e Devleja ki molitva ando odova so mučini len hem ked čitinena disave stihija andi Biblija. Isto ađahar, ko asavke phare trenutkija but značini o mangipe hem i podrška andi porodica hem ando amala.

SO POMOŽINĐA DISAVENĐE?

O Robert, kova isi le 58 berš, phenela: „I vera ko Devel šaj te pomožini tut te borine tut te nabormipaja hem ov ka pomožini tut te akhare to pharipe. Phen lese sar osetineja tut hem rode olestar te del tut po sveti duh. Molin le te pomožini tut te ove pozitivno hem smirimo te šaj te ohrabrine te porodica.“

O Robert pana phenela: „But značini ked ko asavke phare momentija ti porodica tani uzo tute. Svako dive neko vićini man te pućel sar hijum. Isto ađahar, me amala but ohrabrinena man. On ćaće pomožinena maje te osetinav man pošukar hem odova dela man snaga te borinav man.“

Ako đana te posetinen nekas koj tano nabormo, razmislinen ando akava so phenđa i Linda: „I osoba koja tani nabormi, verovatno mangela te ovel la normalno životi hem šaj nane la volja uvek te vaćeri ando po nabormipe. Odolese, vaćer olaja ando avera teme.“

I snaga koja dela amen o Devel, i uteha andi Biblija hem o mangipe andi amari porodica hem ando amare amala, šaj te del amen volja te živina, iako isi amen disavo pharo nabormipe.

E biblijake stihija kola šaj te pomožinen tut

Oslonin tut upro Devel

„Molinđum man e Jehovase hem ov šunđa man. Svako dar koja hine man ov cidinđa mandar. Akava nevažno manuš vićinđa e Jehova hem ov šunđa le“ (Psalam 34:4, 6).

I Linda, kola pominđam angleder, phenela: „Niked na molinava man te ovel maje pošukar, nego uvek molinava man te pomožini man te ovav zorali hem te ovel man snaga te borinav man odole nabormipaja.“

Čitin e Devleso Lafi te šaj te ovel tut snaga

„Nijekh manuš ki phuv na ka phenel: ’Nabormo hijum’“ (Isaija 33:24).

Razmislin ando odova so ka ćerel o Devel ki budućnost hem odova ka del tut snaga.

Prihvatin i pomoć andi ti porodica hem ando te amala

„O šukar amal uvek mothovi mangipe, hem ko phare dive phral ovela“ (Poslovice 17:17).

I Eliz, kola pominđam angleder, phenela: „Ma cide tut kotar avera. Mukh te amala te pomožinen tuće. Podijekh puti šaj ka osetine tut usamljeno hem ka misline so ni o Devel na šunela tut, ama niked ma cide tut kotar avera.“