I Ana molinđa pe te ovel la ćhavo

Jekh Izraelco kova vićinđa pe Elkana hine le duj romnja – i Ana hem i Fenina. Ama, ov pobuter manglja e Ana. I Fenina hine la but ćhave hem celo vreme marđa muj e Anaće sose oj na hine la. Svako berš, o Elkana igarđa pe porodica te den žrtva e Jehovase ko Silom, kaj hine o sveto šatori. Jekh puti, đi hine ko Silom, ov dikhlja so olesi mangli romni, i Ana, hine but tužno. Odolese, o Elkana phenđa: „Ma rov, Ana. Aće, me hijum tuvaja hem me mangava tut.“

Hari palo odova, i Ana đelji kokri te molini pe. Đi molinđa pe e Jehovase te pomožini la, but runđa. Oj obećinđa e Jehovase: „Ako dinđan man murše, me ka dav le tuće te služini celo po životi.“

O prvosvešteniko, o Ilije, dikhlja sar i Ana vaćeri kokri peja, ama na šunđola lako glaso hem mislinđa soj tani mati. Ama, oj phenđa lese: „Na hijum mati, gospodare, nego isi man baro problemi hem aljum te vaćerav odova e Jehovase.“ O Ilije haljilo so grešinđa hem vaćerđa e Anaće: „Nek del tut o Devel odova so rodeja olestar.“ I Ana osetinđa pe pošukar hem đelji pe drumoja. Aver berš, i Ana bijanđa murše hem ćhivđa leso anav Samuilo. Šaj li te zamisline kobor hine radosno i Ana?

I Ana na bisterđa so obećinđa e Jehovase. Samo so ćhinavđa te del thud e Samuilese, oj igarđa le ko sveto šatori te služini e Jehovase. Oj phenđa e Ilijese: „Aće, o ćhavo aso kova molinđum man. Dava le te služini e Jehovase celo po životi.“ O Elkana hem i Ana svako berš đelje te posetinen e Samuile hem igarđe lese po jekh nevi tunika. O Jehova dinđa e Anaće pana trin murša hem duj ćhaja.