O prvo kralj ko Izrael

O Jehova dinđa e Izraelcenđe sudijen te vodinen len, ama on rodinđe te ovel len kralj. Jekh dive phenđe e Samuilese: „Sa o narodija uzalo amende isi len kraljija hem amen mangaja te ovel amen kralj.“ O Samuilo đanđa so odova tano pogrešno hem odolese molinđa pe e Jehovase. O Jehova phenđa lese: „O manuša na odbacinena tut, nego man. Phen lenđe so ka ovel len kralj, ama odova kralj ka rodel olendar but buća.“ Iako đanđe odova, on phenđe: „Mangaja te ovel amen kralj, pa sar ovela nek ovel.“

O Jehova vaćerđa e Samuilese so o prvo kralj ko Izrael ka ovel jekh manuš kova vićini pe Saul. Ked o Saul đelo ko Samuilo ki Rama, o Samuilo ćhivđa le te ovel kralj ađahar so ćhorđa lese ulje upro šero.

Palo odova, o Samuilo vićinđa e Izraelcen te ćeden pe te mothovi lenđe e neve kralje. Ama, nigde naštine te arakhen e Saule. Đaneja li sose? Odolese so garavđa pe. Ked arakhlje le, anđe le maškaro narodo. O Saul hine najućo sarinendar hem hine but šužo. Tegani o Samuilo phenđa: „Dikhen kas o Jehova birinđa te ovel kralj.“ Ked o manuša dikhlje e kralje hine but radosna.

Ki početka, o kralj Saul šunđa e Samuile hem hine verno e Jehovase. Ama, palo disavo vreme meninđa pe. Na primer, o kralj na valjanđa te del žrtve. Ki jekh prilika, o Samuilo vaćerđa e Saulese te ađićeri le te avel. Ama, odolese so o Samuilo na alo odmah, o Saul odlučinđa te del i žrtva. Sar reagujinđa o Samuilo ked dikhlja akava? Ov phenđa lese: „Valjanđan te šune e Jehova.“ Da li o Saul sikljilo diso andi pi greška?

Palo disavo vreme, ked o Saul đelo te borini pe protiv o Amaličanija, o Samuilo phenđa lese te mudari sarinen. Ama, o Saul odlučinđa te na mudari e kralje, e Agage. O Jehova phenđa e Samuilese: „O Saul više na šunela man.“ O Samuilo hine but tužno hem phenđa e Saulese: „Odolese so na šuneja e Jehova, ov ka birini avere kralje.“ Ked o Samuilo irinđa pe te đal, o Saul dolinđa le ando ogrtači, ama o ogrtači cidinđa pe ando oleso vas. Tegani o Samuilo phenđa lese: „Isto sar so mo ogrtači cidinđa pe ando to vas, ađahar o Jehova avdije ka cidel o kraljevstvo ando te vasta.“ O Jehova ka del o kraljevstvo nekase koj tano olese poslušno hem kova mangela le.