O Isus birini e Savle

O Savle hine rimsko građanin kova bijandilo ko Tars. Ov hine farisej kova but šukar đanđa o jevrejsko zakon hem but mrzinđa e hrišćanen. Ov đelo ko olenge ćhera hem legarđa e muršen hem e đuvljen ko phanlipe. Jekh puti čak dikhlja sar o nasilna manuša barencar mudarena e Stefane.

Ama, o Savle na hine zadovoljno samo te astari e hrišćanen ko Jerusalim. Ov pućlja e prvosvešteniko te bićhali le ko Damask te šaj hem odothe te astari e hrišćanen. Ked o Savle reslja paše ko Damask, ando jekh puti okolo leste hine zorali svetlost hem ov pelo tele ki phuv. Tegani šunđa jekh glaso sar phenela: „Savle, sose progonineja man?“ O Savle pućlja: „Ko hijan tu?“ Ov odgovorinđa: „Me hijum o Isus. Đa ko Damask hem uduri neko ka phenel tuće so valjani te ćere.“ Ko odova trenutko, o Savle ulo kororo hem odolese morandilje te dolen le kotar vas hem te igaren le ki diz.

Ko Damask hine jekh verno hrišćanin kova vićinđa pe Ananija. Ki jekh vizija o Isus phenđa lese: „Đa ko Judaso ćher, ki ulica koja vićini pe Prava, hem rode jekhe manuše kova vićini pe Savle.“ Ama, o Ananija phenđa lese: „Gospode, šunđum odole manušese! Ov ćerđa but lošna buća te učenikonenđe hem fordinđa len ko phanlipe!“ Ama, o Isus phenđa lese: „Đa koro leste sose birinđum e Savle te propovedini i šukar vest bute manušenđe.“

Ked o Ananija arakhlja e Savle, phenđa lese: „Savle, mo phral, o Isus bićhalđa man te šaj palem te dikhe.“ Palo odova, o Savle šaj hine palem te dikhel. Ov sikljilo ando Isus hem ulo oleso učenik hem krstinđa pe. Zajedno avere hrišćanencar, o Savle propovedinđa ko sinagoge. Sare kola šunđe le hine but iznenadime so ov sikavi e manušen e Isusestar. On phenđe: „Da li tano ov odova manuš kova progoninđa e Isusese učenikonen?“

Trin berš o Savle propovedinđa e manušenđe kola živinđe ko Damask. O Jevreja mrzinđe e Savle hem ćerđe plan sar te mudaren le. Ama, o phralja šunđe aso odova hem pomožinđe le te našel. On ćhivđe le ki jekh korpa hem mukhlje le kotar jekh otvor kova hine ko zido.

Ked o Savle đelo ko Jerusalim, manglja te propovedini zajedno e phralencar. Ama, sarine darandilje olestar. Odothe hine o Varnava kova lelja e Savle hem igarđa le ko apostolija te šaj te uverini len so o Savle ćaće meninđa pe. O Savle počminđa hrabro te propovedini i šukar vest zajedno e phralencar hem e phenjencar ko Jerusalim. Palo odova, ov ulo penđardo sar Pavle.