O David hem o Saul

Palo odova so o David mudarđa e Golijate, o kralj Saul ćhivđa le te vodini e vojska. O David pobedinđa ko but mariba hem ulo but penđarutno. Uvek ked irinđa pe ando disavo maribe, o đuvlja ćhelđe hem đilabđe: „O Saul mudarđa hiljada dušmanija, a o David deš hiljada dušmanija.“ Odolese, o Saul ulo ljubomorno upro David hem manglja te mudari le.

O David but šukar bašalđa i harfa. Jekh dive, đi bašalđa e Saulese, o Saul fordinđa po koplje upro leste te mudari le. O David sigate cidinđa pe hem o koplje khuvđa ko zido. Palo odova, o Saul manglja but putija te mudari le. Odolese, o David našlja hem garavđa pe ki pustinja.

O Saul lelja 3 000 vojnikija hem đelo te rodel e Davide. Ov khuvđa ki pećina kuri o David garavđa pe pe manušencar. Tegani, e Davidese manuša phenđe lese: „Aće, akana šaj te mudare le.“ O David pohari đelo uzo Saul hem ćhinđa jekh kotor ando oleso ogrtači. Ama, o Saul ništa na osetinđa. Palo odova, e Davidese hine pharo, sose ađahar mothovđa so na poštujini e kralje kas o Jehova birinđa. Ov na mukhlja pe manušen te napadinen e Saule. Ked o Saul ikljilo andi pećina o David vićinđa le hem phenđa lese so šaj hine te mudari le, ama na ćerđa odova. Da li o Saul odustajinđa ando odova te mudari e Davide?

Na. O Saul pana rodinđa le. Jekh rat, o David hem olese phenjako ćhavo o Avisaj, ćorjale alje ko Sauleso logor. Othe sarine suće, čak hem e Sauleso čuvari, o Avenir. O Avisaj phenđa: „Akana šaj te mudara le. Mukh man te ćerav odova!“ Ama, o David odgovorinđa: „O Jehova ka irini e Saulese. Hajde te la lestar samo o koplje hem o khoro hem te đa.“

Ked o David ukljinđa ki planina kotar šaj hine te dikhel pe o logor, vićinđa: „Avenir, sose na arakheja e kralje? Kaj tano oleso koplje hem o khoro?“ O Saul penđarđa e Davideso glaso hem phenđa: „Šaj hine te mudare man, ama na ćerđan odova. Đanava so palo mande tu ka ove kralj ko Izrael.“ Palo odova, o Saul irinđa pe ki pi palata. Ama, na mrzinđe e Davide sarine andi Saulesi porodica.