O Josija manglja e Devleso zakon

O Josija ulo kralj ki Juda ked hine le ofto berš. Ko odova vreme, o manuša ćerđe mađije hem služinđe e hovavne devlenđe. Ked hine le 16 berš, o Josija manglja te sikljol sar te služini e Jehovase ko ispravno način. Ked hine le 20 berš, počminđa te uništini e idolen hem o oltarija so hine ki celo phuv. A ked hine le 26 berš, naredinđa te obnovini pe e Jehovaso hram.

Ko hram, o prvosvešteniko Helkija arakhlja jekh lil kaj hine pisimo e Jehovaso zakon. Šaj akava hine odova isto lil so pisinđa le o Mojsije. O Safan, kova hine e kraljeso pisari, anđa o lil e Josijase hem počminđa te čitini le ko glaso. Đi o Josija šunđa odova so čitini, haljilo so o manuša beršencar na šunđe e Jehova. Tegani, o kralj Josija, phenđa e Helkijase: „O Jehova tano but holjamo upro amende. Đa hem molin tut olese. O Jehova ka phenel amenđe so te ćera.“ Tegani, prekali proročica Olda, o Jehova phenđa lenđe: „O manuša andi Juda bisterđe man. Odolese, ka oven kaznime, ama na ka ćerav odova sa đi tano o Josija kralj, sose ov ponizinđa pe anglo mande.“

Ked o Josija šunđa odova, đelo ko hram hem vićinđa sa e manušen andi Juda. Tegani, ov čitinđa e Jehovaso zakon anglo celo narodo. O Josija hem o narodo obećinđe e Jehovase so ka šunen le celone vileja.

O narodo andi Juda beršencar na slavinđa i Pasha. Ama, ked o Josija čitinđa ko Zakon so i Pasha valjani te slavini pe svako berš, phenđa e narodose: „Ka slavina i Pasha ki čast e Jehovase.“ Tegani, o Josija anđa but životinje te den pe sar žrtva hem organizujinđa ko hram te ovel hor kova ka đilabi. Ađahar, o manuša slavinđe i Pasha hem palo odova, efta dive slavinđe o Prazniko ando mare bizo kvasco. Asavki Pasha na hine pana ando Samuileso vreme. O Josija ćaće but manglja e Devleso zakon. Da li hem tu uživineja đi sikljoveja ando Jehova?