69. PRIČA
O Gavrilo alo ki Marija
I Marija hem i Jelisaveta hine familija. Oj hine terni hem živinđa ki diz Nazaret ki Galileja. I Marija hine verimi e Josifeja, kova hine tesari. Ked i Jelisaveta hine khamni šov masek, o anđeo Gavrilo pojavinđa pe e Marijaće. Ov pozdravinđa la hem phenđa laće: „Marija, o Jehova mothovđa tuće bari milost.“ Oj na haljilji ko so o Gavrilo mislinđa. Odolese, ov phenđa laće: „Ka aćhove khamni hem ka bijane murše hem ka ćhive oleso anav Isus. Ov ka vladini sar Kralj hem oleso Kraljevstvo večno ka trajini.“
I Marija phenđa: „Ama me pana hijum ćhaj. Sar šaj te ovel man ćhavo?“ O Gavrilo odgovorinđa laće: „O Jehova sa šaj te ćerel. O sveti duh ka avel upro tute hem tu ka ovel tut ćhavo. Aće, hem ti rođaka i Jelisaveta, aćhilji khamni iako tani ko phure berša.“ Tegani i Marija phenđa lese: „Me hijum e Jehovasi robinja. Nek ovel sar so vaćerđan.“
I Marija đelji ki jekh diz koja hine ko bregija te posetini e Jelisaveta. Ked reslja koro late hem pozdravinđa la, i Jelisaveta osetinđa so i beba mrdinđa ko olako vođi. Tegani pherdilji sveto duhoja hem phenđa laće: „Marija, o Jehova but blagoslovinđa tut. Kobor bari čast isi man so e Mesijasi daj alji koro mande!“ I Marija phenđa: „Celone vileja hvalinava e Jehova.“ Oj aćhilji ki Jelisaveta trin masek hem palo odova irinđa pe ćhere ko Nazaret.
Ked i Marija phenđa e Josifese soj tani khamni, ov više na manglja te lel la romnjaće. Ama, jekh anđeo pojavinđa pe lese ko suno hem phenđa lese: „Ma dara te ženine tut olaja. Oj na ćerđa ništa lošno.“ Tegani o Josif ženinđa pe e Marijaja.
„O Jehova ćerela sa so mangela, ko nebo hem ki phuv“ (Psalam 135:6)