2. LEKCIJA

Vaćer prirodno

2. Korinćanima 2:17

SO TE ĆERE: Vaćer prirodno hem ando vilo. Ađahar ka dićhol so hijan uverimo ko odova so vaćereja hem so hijan zainteresovano e manušenđe.

Molin tut hem šukar spremin tut. Molin tut e Jehovase te pomožini tut te na misline ki ti trema, nego ko odova so vaćereja. Ićer ki godi o glavna tačke kola spreminđan. Vaćer o mislija te lafencar. Ma ponovin len samo lafi palo lafi sar so pisini ko lil.

Ako mangeja te čitine andi Biblija ja kotar disavi publikacija, spremin tut angleder te šaj šukar te čitine. Ako čitineja nekase lafija, čitin len ando vilo hem ko način sar o manuša prirodno vaćerena.
Vaćer ando vilo. Razmislin sose o manuša valjani te šunen odova so mangeja te vaćere lenđe. Razmislin olendar. Tegani, premalo odova sar terđoveja, premalo te gestija hem premalo odova so ćereja te mujeja ka dićhol so vaćereja mangipaja, iskreno hem so isi tut šukar namere.

Te vaćere prirodno na značini so na valjani te pazine ko odova sar vaćereja. Vaćer jasno hem ispravno. Tegani, avera ka poštujinen i poruka koja vaćereja.
Dikh e manušen kolenđe vaćereja. Trudin tut te dikhe e manušen ko jaćha đi vaćereja. Ked isi tut govor, ma dikh ki celo publika ja samo kratko te nakhe jaćhencar kotar jekh strana ki aver. Umesto odova, dikh ko jekh manuš ki publika, a palo odova ko aver manuš.