Ked doživineja disavi prirodno katastrofa

„Ki početka hijam le but razočarime. I poplava hem i ćik legarđe sa so hine amen“ (Andru, Sijera Leone).

„Palo uragan, irinđam amen ćhere. Ked dikhljam so ništa na aćhilo ando amaro ćher, hijam le šokirime. Mi ćhaj pelji ko koćija hem runđa“ (Dejvid, Devičanska ostrva).

AKO hem tu doživinđan disavi prirodno katastrofa, verovatno hijan le šokirimo, naštine te verujine so ulo, na đanđan so te ćere, hine tut but brige hem naštine te sove. But manuša kola odova doživinđe odobor hine obeshrabrime so na hine len ni snaga ni volja te borinen pe.

Ako ki prirodno katastrofa našalđan sa so hine tut, šaj sebepi o problemija isi tut osećaj so ka pharjove. Čak šaj te misline so više nane tut nisavo razlog te živine. Ama, i Biblija mothovi so vredini te živine hem so isi tut šukar razlogija te verujine so ađićeri tut pošukar budućnost.

O ĆAĆIPE ANDI BIBLIJA DELA AMEN NADA

Ko Propovednik 7:8 pisini: „Pošukar tano o krajo andi disavi buti nego o početko.“ Ako akana sigende doživinđan disavi prirodno katastrofa, šaj tano tuće pharo te verujine so ka ovel pošukar. Ama, hari po hari to životi šaj te ovel pošukar.

I Biblija phenela so ka avel vreme ked „više na ka šunel pe sar neko rovela ja rodela pomoć“ (Isaija 65:19). Odova ka ispunini pe ked ka vladini e Devleso Kraljevstvo hem ked celo phuv ka ovel raj (Psalam 37:11, 29). O prirodna katastrofe više na ka oven. E manušen više na ka mučinen o lošna uspomene hem o traume kola doživinđe sose o Devel obećini: „Okova so hine angleder na ka avel ki godi, niti ka pojavini pe ko vilo“ (Isaija 65:17).

O Stvoritelj mangela te ovel amen „šuži budućnost hem nada“ – mirno životi ked ka avel oleso Kraljevstvo (Jeremija 29:11). Akana ked odova đaneja, da li odova pomožini tut te ovel tut volja te živine? I Sali, kola pominđam ko okova članko, phenela: „Ako razmislinaja ando šukar buća kola ka oven amen ked ka vladini e Devleso Kraljevstvo, ka ovel amenđe polokho te mukha o lošna buća kola desinđe pe amenđe hem te istrajina ko problemija kola isi amen akana.“

Da li mangeja te đane diso pobuter ando odova so e Devleso Kraljevstvo pana hari ka ćerel e manušenđe? Odova ka pomožini tuće te uverine tut so vredini te živine iako doživinđan but pharipa. Ama, đi na avela o vreme ked na ka oven više prirodna katastrofe, e biblijake savetija šaj but te pomožinen tut te istrajine. Aće nekobor savetija.

E biblijake stihija kola šaj te pomožinen tut

Sov dovoljno

„Pošukar tano hari odmor nego te ćerel pe but buti, sose odova tano sar ka phene prastaja pali bavlal“ (Propovednik 4:6).

O stručnjakija phenena so o manuša kola doživinđe disavi trauma, ka osetinen pe but lošno hem ka ovel len emocionalna problemija ako na sovena dovoljno. Odolese tano but važno dovoljno te odmorine tut.

Vaćer sar osetineja tut

„Andi briga e manušese ovela pharo ko vilo, a o šužo lafi ćerela le radosno“ (Poslovice 12:25).

Vaćer nekasa andi ti porodica ja disave paše amaleja. Osim so ka šunen tut, on ka ohrabrinen tut hem ka pomožinen tut.a

Razmislin ando šuže buća kola ka oven

„Premalo [e Devleso] obećanje, ađićeraja o nevo nebo hem i nevi phuv kuri i pravednost ka vladini“ (2. Petrova 3:13).

a Ako jekh osoba but vreme isi la stres ja tani but uznemirimi, šukar bi ovela te rodel stručno pomoć.