Da li o Jehova ka odgovorini ko me molitve?

1-2. Sose šaj te mislina so o Jehova na odgovorini ko amare molitve?

„NEK o Jehova ovela ti najbari radost. Tegani ka del tut odova so to vilo mangela“ (Ps. 37:4). Savo šužo obećanje! Ama, da li valjani o Jehova odmah te del amen odova so rodaja lestar? Sose tano akava pućibe but važno? Razmislin ando akala situacije. Jekh phen koja tani kokri molini e Jehova te ovel vićimi te đal ki Škola aso objaviteljija ando Kraljevstvo. Ama, nakhena nekobor berš, oj pana nane vićimi. Jekh terno phral kova tano but nabormo, molini pe e Jehovase te ovel pošukar te šaj te služini pana pobuter ki skupština. Ama, sar đala o vreme, olese na ovela pošukar. O roditeljija molinena e Jehova olenge ćhave te aćhon ko ćaćipe, ama on odlučinena te ćhinaven te služinen e Jehovase.

² Šaj hem tu molineja tut e Jehovase aso diso, ama na dobineja odgovor. Odolese šaj mislineja so o Jehova odgovorinđa ko averenge molitve, a ko te molitve na. Ja šaj mislineja so tu sigurno ćerđan diso pogrešno. Ađahar osetinđa pe amari phen i Dženis.b Oj hem olako rom molinđe pe e Jehovase te služinen ko Betel. Oj phenela: „Hijum le uverimi so o phralja sigate ka vićinen amen.“ Ama, nakhlje nekobor berš, a on pana na hine vićime. I Dženis phenela: „Hijum le tužno hem na đanđum so te ćerav. Pućljum man, so ćerđum te razočarinav e Jehova? Molinđum man konkretno aso oleso vođstvo. Sose na odgovorinđa ki mi molitva?“

3. Sostar ka vaćera ko akava članko?

³ Disavo puti, šaj pućaja amen da li o Jehova šunela amare molitve. Čak hem disave verna e Jehovase sluge pućlje pe odova (Jov 30:20; Ps. 22:2; Avak. 1:2). So šaj te uverini tut so o Jehova šunela te molitve? (Ps. 65:2). Te šaj te odgovorina ko odova pućibe, ka razmotrina trin buća: (1) So šaj te očekujina ando Jehova? (2) So o Jehova očekujini amendar? (3) Sose šaj valjani te molina amen aso diso aver?

SO ŠAJ TE OČEKUJINA ANDO JEHOVA?

4. Premalo Jeremija 29:12, so o Jehova obećini amenđe?

⁴ O Jehova obećini so ka šunel amare molitve. (Čitin Jeremija 29:12.) Amaro Devel mangela pe verna slugen, odolese niked na ka phanel pe kana ked molinena pe (Ps. 10:17; 37:28). Ama, odova na značini so ka del amen sa so rodaja lestar. Aso disave buća šaj ka valjani te ađićera đi na avela o nevo sveto.

5. Sostar o Jehova razmislini đi šunela amare molitve? Objasnin.

⁵ O Jehova razmislini andi pi namera đi šunela amare molitve. (Is. 55:8, 9). Jekh buti koja o Jehova mangela te ćerel tani te pherel i phuv e manušencar kola spremno šunena le sar pe Vladare. Ama, o Satana phenela so o manuša ka oven bahtale ako on vladinena (Post. 3:1-5). Te šaj te mothovi so o Beng hovavi, o Jehova mukhlja e manušen kokri te vladinen. Ama, odova anđa bare problemija (Prop. 8:9). Amen haljovaja so o Jehova našti te cidel odmah sa amare problemija. Ked bi odova ćerela, odova bi značini so o manuša šaj kokri te vladinen hem so šaj te rešinen sa o problemija ki phuv.

6. Sose šaj te ova uverime so o Jehova uvek ka ćerel odova soj tano šukar hem pravedno?

⁶ O Jehova šaj ko razna načinija te odgovorini ko slična molitve. Na primer, ked o kralj Jezekilj hine but nabormo, ov molinđa e Jehova te saćari le. O Jehova odgovorinđa ki olesi molitva ađahar so saćarđa le (2. Kralj. 20:1-6). Ki aver strana, ked o apostol Pavle molinđa e Jehova te cidel lestar o karo ando telo, kova verovatno hine disavo nabormipe, o Jehova na ćerđa odova (2. Kor. 12:7-9). Te dikha o primer ando apostolija o Jakov hem o Petar. O kralj Irod manglja te mudari soldujen. O phralja molinđe pe soldujenđe. Ama, o Jakov hine mudardo, a e Petare spasinđa jekh anđeo (Dela 12:1-11). Amen šaj te puća amen: „Sose o Jehova e Petare spasinđa, a e Jakove na?“ Ki Biblija na vaćeri pe odolestar.c Odova so šaj te ova sigurna tano so e Jehovase „drumija tane pravedna“ (Pon. zak. 32:4). Isto ađahar, amen đanaja so o Jehova but manglja soldujen (Otkr. 21:14). Disavo puti, o Jehova šaj na ka odgovorini ko amare molitve ađahar sar so amen nadinđam amen. Ama, odolese so hijam uverime so o Jehova uvek ćerela odova soj tano šukar hem pravedno, amen na ka žalina amen sar o Jehova odgovorinđa ko amare molitve (Jov 33:13).

7. So na valjani te ćera hem sose?

⁷ Valjani te trudina amen te na uporedina amari situacija averencar. Na primer, šaj molinaja amen e Jehovase asi disavi konkretno situacija, ama nane amen nisavo odgovor. Kasnije, šunaja so neko molinđa pe aso slično problemi hem o Jehova odgovorinđa lese. Odova doživinđa amari phen i Ana. Olako rom, o Metju, kova hine le 39 berš, hine le rak hem oj molinđa pe e Jehovase te saćari le. Ko isto vreme, duj phure phenja isto hine len rak. I Ana usrdno molinđa pe aso Metju hem aso phenja. Odola phenja saćilje, ama o Metju mulo. Ki početka, i Ana pućlja pe, da li akala duj phenja ulje pošukar sose o Jehova pomožinđa len? Ako tano ađahar, sose o Jehova na šunđa olaki molitva te saćari olake rome? Naravno, amen na đanaja sar akala duj phenja saćilje. Ama, odova so đanaja tano so o Jehova pana hari zauvek ka cidel o patnje hem jedva ađićeri te vazdel pe amalen kola mulje (Jov 14:15).

8. (a) Premalo Isaija 43:2, sar o Jehova pomožini amen? (b) Sar i molitva šaj te pomožini amen ked isi amen pharipa? (Dikh o video I molitva pomožini amenđe sa te izdržina.)

⁸ O Jehova uvek ka pomožini amen. Sar amaro manglo Dad, e Jehovase nane sa jekh ked dikhela sar patinaja (Is. 63:9). Ipak, na ćhinavi sa amare kušnje kola podijekhvar šaj te oven sar reka ja jag. (Čitin Isaija 43:2.) Ama, ov dela amen po lafi so ka pomožini amen hem so na ka mukhel o kušnje te ćeren amenđe trajno šteta. Isto ađahar, ov prekalo po sveti duh ka pomožini amen te istrajina (Luka 11:13; Fil. 4:13). Odolese, šaj te ova uverime so ka del amen odova so valjani amenđe te aćhova lese verna.d

SO O JEHOVA OČEKUJINI AMENDAR?

9. Sar o lafija andi Jakovljeva 1:6, 7, pomožinena amen te ovel amen poverenje upro Jehova?

⁹ O Jehova očekujini amendar te ovel amen poverenje upro leste (Jevr. 11:6). Disavo puti, šaj te mislina so amare problemija tane odobor bare so našti te ikljova ko krajo olencar. Čak šaj te počmina te sumnjina ko odova da li o Jehova ka pomožini amenđe. Ama, i Biblija uverini amen so uzi Jehovasi pomoć, šaj hem ko „zido“ te uklja (Ps. 18:29). Odolese, umesto te mukha amare sumnje te barjon, amen valjani te molina amen hem te ovel amen poverenje so o Jehova ka odgovorini ko amare molitve. (Čitin Jakovljeva 1:6, 7.)

10. Vaćer jekh primer sar šaj te postupina premalo amare molitve.

¹⁰ O Jehova očekujini amendar te postupina premalo amare molitve. Na primer, jekh phral šaj te molini e Jehova te pomožini lese te dobini slobodna dive aso regionalno kongres. Sar o Jehova šaj te odgovorini ki odija molitva? Ov šaj te del le snaga te đal ko po šef, ama ipak odova phral ka valjani te vaćeri pe šefeja hem odova šaj nekobor putija. Ov čak šaj te pućel le te ćerel buti aver dive ili te na ovel platimo odola dive ked ka đal ko kongres.

11. Sose valjani uvek te molina amen aso buća kola tane amenđe važna?

¹¹ O Jehova očekujini amendar uvek te molina amen aso buća kola tane amenđe važna (1. Sol. 5:17). Sar so o Isus phenđa, o Jehova na ka del amen odmah odova so rodaja olestar (Luka 11:9). Ama, odova na značini so valjani te odustajina, već valjani hem ponodri usrdno te molina amen (Luka 18:1-7). Ked hem ponodri molinaja amen aso buća kola tane važna, amen mothovaja so ćaće mangaja o Jehova te del amen odova. Isto ađahar, mothovaja so isi amen vera so o Jehova šaj te ćerel odova.

SOSE ŠAJ VALJANI TE MOLINA AMEN ASO DISO AVER?

12. (a) Kova pućibe valjani te puća amen hem sose? (b) Sar šaj te ova sigurna so mothovaja poštovanje premalo Jehova đi molinaja amen? (Dikh o okvir „Da li me molitve mothovena so poštujinava e Jehova?“)

¹² Ako na dobinđam odgovor ki amari molitva, šaj te puća amen trin pućiba. Sar prvo: „Da li molinava man asi ispravno buti?“ But putija amen mislinaja so đanaja soj tano najšukar amenđe. Ama, šaj odova aso so molinaja amen nane najšukar. Ako molinaja amen aso disavo problemi, šaj isi disavo pošukar rešenje ando odova aso so molinaja amen. A disavo puti šaj molinaja amen aso diso so nane premali Jehovasi volja (1. Jov. 5:14). Na primer, razmislin ando roditeljija kolen pominđam angleder. On molinena pe e Jehovase olenge ćhave te aćhon ko ćaćipe. Šaj izgledini so molinena pe aso diso šukar. Ama, o Jehova nikas na ćhivela silaja te služini lese. Ov mangela svako amendar, pa čak hem o ćhave kokri te odlučinen te služinen lese (Pon. zak. 10:12, 13; 30:19, 20). Odolese, o roditeljija valjani te molinen pe e Jehovase te pomožini len te resen đi pe ćhavengo vilo te šaj te oven podstaknime te mangen e Jehova hem te oven olese amala (Posl. 22:6; Ef. 6:4).

13. Premalo Jevrejima 4:16, ked o Jehova ka pomožini amenđe? Objasnin.

¹³ O dujto pućibe tano: „Da li tano akana pravo vreme o Jehova te odgovorini ki mi molitva?“ Amen šaj mislinaja so o Jehova valjani odmah te odgovorini ko amare molitve. Ama, ov đanela ked tano pravo vreme te pomožini amen. (Čitin Jevrejima 4:16.) Ked na dobinaja odmah o odgovor ko amare molitve, šaj te mislina so e Jehovaso odgovor tano: „Na“. Ama, oleso odgovor šaj te ovel: „Na pana“. Na primer, razmislin ando phral kova molinđa e Jehova te saćari le. Ako bi o Jehova saćari le, ađahar so bi ćerela disavo čudo, o Satana bi phenela so odova phral služini e Jehovase samo odolese so saćarđa le (Jov 1:9-11; 2:4). Ama, o Jehova već odredinđa o vreme ked ka cidel sa o nabormipa (Is. 33:24; Otkr. 21:3, 4). Đi tegani, amen našti te ađićera kotar Jehova te ćerel disavo čudo. Odolese, odova phral šaj te molini e Jehova te del le snaga hem mir te šaj te istrajini ko po nabormipe hem ponodri verno te služini lese (Ps. 29:11).

14. So sikljovaja andi phen Dženis?

¹⁴ Razmislin andi Dženis koja molinđa pe te služini ko Betel. Nakhlje panđ berš đi na haljilji sar o Jehova odgovorinđa ki olaki molitva. Oj phenela: „O Jehova koristinđa odova vreme te sikavi man hem te pomožini man te ovav pana pošukar osoba. Valjanđum te barjaćerav mo poverenje upro leste. Isto ađahar, valjanđum te sikljovav sar pohor te proučinav i Biblija hem sar šaj te ovav radosno bizo obzir kaj služinava.“ Kasnije, i Dženis hem olako rom hine vićime te služinen ki pokrajinsko služba. Ked akana razmislini, i Dženis phenela: „O Jehova odgovorinđa ko me molitve, ama na ko način sar so me očekujinđum. Valjanđa maje vreme te haljovav sar o Jehova odgovorinđa maje hem te dikhav kobor samo šuže poklonija dinđa man. Akana hijum but zahvalno e Jehovase so šaj hine te osetinav oleso mangipe hem šukaripe.“

15. Sose disavo puti na valjani te ova odobor konkretna ko amare molitve? (Dikh o slike.)

¹⁵ O trito pućibe tano: „Da li valjani te molinav man aso diso aver?“ But tano šukar ked hijam konkretna ko amare molitve. Ama disavo puti šaj tano pošukar te na ova odobor konkretna, već te trudina amen te dikha soj tani e Jehovasi volja amenđe. Razmislin andi phen koja molini pe te đal ki Škola aso objaviteljija ando Kraljevstvo. Oj mangela te đal ki odija škola te šaj te ovel vićimi uduri kuri isi pobari potreba. Odolese, đi molini pe aso odova, oj šaj te molini pe hem te dikhel kola avera prilike isi la te proširini pi služba (Dela 16:9, 10). Palo odova, šaj te pućel e pokrajinsko nadgledniko da li uzi olaki skupština valjani pana pionirija. Isto ađahar, šaj te pisini e phralenđe ki podružnica te pućel da li isi disavo than kuri isi pobari potreba aso objaviteljija.e

16. Ko so šaj te ova sigurna?

¹⁶ Sar so dikhljam, šaj te ova sigurna so o Jehova ka odgovorini ko amare molitve ko jekh šukar hem pravedno način (Ps. 4:3; Is. 30:18). Podijekh puti, šaj na ka dobina o odgovor kova amen očekujinđam. Ama, o Jehova niked na ka phanel pe kana ked molinaja amen. Ov but mangela amen hem niked na ka aćhavi amen (Ps. 9:10). Odolese, „koro leste uvek uzdajinen tumen“ hem phraven lese tumaro vilo ki molitva (Ps. 62:8).