Sikljov te razmisline sar o Jehova hem o Isus

1-2. So značini te manga e Jehova hem sar o Isus mothovđa so manglja e Jehova celona gođaja?

O ISUS phenđa koja tani i najvažno zapovest ando Mojsijeso zakon. Ov phenđa: „Mang e Jehova, te Devle, celone vileja, celona dušaja, celona snagaja hem celona gođaja“ (Luka 10:27). Odolese, o mangipe premalo Jehova šaj te mothova odoleja so isi amen hem odoleja save hijam. Odova uključini amare želje, osećanja, snaga hem amari godi. Avere lafencar, amaro način sar razmislinaja. Naravno, amen niked našti potpuno te haljova sar o Jehova razmislini. Ama, pošukar ka haljova sar o Jehova razmislini, ako „razmislinaja sar o Hrist“ sose ov savršeno oponašinđa pe Dade (1. Kor. 2:16).

² O Isus manglja e Jehova celona gođaja. Ov đanđa so o Jehova mangela te ćerel hem hine odlučno te ćerel odova, iako valjanđa te patini. Olese hine najvažno te ćerel e Jehovasi volja hem na mukhlja ništa te ovel lese považno ando odova.

3. So o apostol Petar sikljilo ando Isus hem so ohrabrinđa e hrišćanen te ćeren? (1. Petrova 4:1)

³ O Petar hem avera apostolija hine len bari čast te sarađujinen e Isuseja hem te dikhen sar ov sikavi. Ked o Petar pisinđa po prvo lil, ov ohrabrinđa e hrišćanen te oven spremna, te ovel len sar e Isuseso stav.a (Čitin 1. Petrova 4:1.) Ki izvorno ćhib, ko akava than o Pavle koristinđa jekh izraz kova koristini pe ki vojska ked jekh vojniko pripremini pes hem o oružje aso maribe. Odolese, ako isi amen sar e Isuseso stav, avere lafencar ako sikljovaja te razmislina sar oleste, amen ka ova spremna te borina amen protiv amare pogrešna želje hem protiv o Beng (2. Kor. 10:3-5; Ef. 6:12).

4. Sar šaj akava članko te pomožini amen te primenina e Petareso savet?

⁴ Akana ka razmotrina sar o Isus razmislinđa hem sar šaj te oponašina le. Ka dikha (1) sar šaj te sikljova te razmislina sar o Jehova te šaj te složina amen averencar, (2) te ova ponizna hem (3) te ova razborita ađahar so ka oslonina amen upro Jehova ki molitva.

TRUDIN TUT TE RAZMISLINE SAR O JEHOVA

5. Ki koja situacija o Petar na razmislinđa sar o Jehova?

⁵ Te dikha jekh situacija ki koja o Petar mothovđa so na razmislinđa sar o Jehova. O Isus phenđa e apostolenđe so ka valjani te đal ko Jerusalim hem odothe o verska vođe ka astaren le, ka ovel mučimo hem ko krajo mudardo (Mat. 16:21). O Petar đanđa so o Isus tano o obećimo Mesija. Odolese, hine lese but pharo te prihvatini odova so o Jehova ka dozvolini o Isus te ovel mudardo (Mat. 16:16). Odolese, legarđa e Isuse ki strana hem phenđa lese: „Ov šukar premalo tute, Gospode. Tuće odova na ka desini pe“ (Mat. 16:22). Ama, o Isus hem o Petar na hine len isto stav, odolese so o Petar na razmislinđa ađahar sar so o Jehova razmislini.

6. Sar o Isus mothovđa so razmislini sar o Jehova?

⁶ O Isus razmislinđa sar po nebesko Dad. Ov phenđa e Petarese: „Naš mandar, Satano! Tu hijan maje uzrok aso spoticanje, sose te mislija nane e Devlese nego manušikane“ (Mat. 16:23). O Isus đanđa so valjani te patini hem te merel te šaj te ćerel e Jehovasi volja. Odolese, na prihvatinđa e Petareso savet, iako ov samo manglja te pomožini le. Tegani o Petar haljilo so valjani te sikljol te razmislini sar o Jehova. A odova tano važno hem amen te sikljova.

7. Sar o Petar kasnije mothovđa so manglja te sikljol te razmislini sar o Jehova? (Dikh i slika.)

⁷ Kasnije, o Petar mothovđa so mangela te sikljol te razmislini sar o Jehova. Alo o vreme o manuša ando avera narodija te oven deo ando Devleso narodo. O Petar dobinđa zadatko te propovedini e Kornelijese, kova ulo prvo hrišćanin maškaro manuša kola na hine Jevreja. O Judejcija obično na družinđe pe e manušencar ando avera narodija. Odolese, e Petarese valjanđa vreme te šaj te pripremini pi godi te propovedini lenđe. Ked haljilo soj tani e Jehovasi volja, ov hine spremno te menini po mišljenje. Ked o Kornelije pućlja le te avel koro leste, o Petar đelo bizo te razmislini (Dela 10:28, 29). Ov propovedinđa olese hem olese ćherutnenđe hem on krstinđe pe (Dela 10:21-23, 34, 35, 44-48).

8. Sar šaj te mothova so razmislinaja sar o Jehova? (1. Petrova 3:8)

⁸ Palo nekobor berš, o Petar podstakninđa e phralen hem e phenjen te oven „složna ko razmislibe“. (Čitin 1. Petrova 3:8.) Sar e Jehovaso narodo, amen šaj te ćera odova ako trudinaja amen te razmislina sar o Jehova. Na primer, o Isus podstakninđa pe učenikonen te ćhiven e Jehova ko prvo than ko olengo životi (Mat. 6:33). Odolese, neko andi ti skupština šaj te odlučini te ovel ki punovremeno služba. Umesto te phene lese so valjani te ovel šukar premalo peste, avere lafencar te birini polokho životi, tu valjani te vaćere pozitivno ando oleso cilj hem ako šaj te pomožine lese.

OV PONIZNO

9-10. Sar o Isus mothovđa soj tano ponizno?

⁹ I rat angleder o Isus te ovel mudardo, ov e Petare hem avere apostolen sikavđa jekh but važno buti andi poniznost. Hari angleder, ov bićhalđa e Petare hem e Jovane te pripreminen sa so valjani asi poslednjo večera koja ka hal olencar angleder te merel. Verovatno valjanđe hem te pripreminen o legeni e panjeja hem o peškirija, te šaj angleder o maro te thoven pe e gostonenge pre. Ama, ko ka ovel odobor ponizno te thovel averenge pre ked aso odova ka avel o vreme?

¹⁰ O Isus bizo te razmislini ćerđa odova. Ov ađahar mothovđa kobor tano ponizno. O apostolija sigurno iznenadinđe pe ked dikhlje so ov ćerđa diso so obično ćerela jekh sluga. O Isus huljavđa po ogrtači, lelja o peškiri, ćhivđa pani ko legeni hem počminđa te thovel olenge pre (Jov. 13:4, 5). Olese šaj valjanđa but vreme te thovel sa e apostolenge pre. Čak thovđa e Judase pre, kova kasnije izdajinđa le. O Isus hine ponizno hem odolese ćerđa odova. Palo odova, phenđa lenđe: „Da li haljona sose thovđum tumare pre? Tumen vićinena man ’Učitelju‘ hem ’Gospode‘, hem ađahar tano, sose odova hem hijum. Odolese, ako me o Gospod hem o Učitelj, thovđum tumare pre, hem tumen valjani te thoven jekh jekhese pre“ (Jov. 13:12-14).

11. Sar o Petar mothovđa so sikljilo te ovel ponizno? (1. Petrova 5:5; dikh i slika.)

¹¹ O Petar but sikljilo andi Isusesi poniznost. Palo odova so o Isus đelo ko nebo, o Petar ćerđa jekh čudo. Saćarđa jekhe manuše kova celo životi našti hine te phirel (Dela 1:8, 9; 3:2, 6-8). Naravno, but manuša kola dikhlje odova čudo alje uzo Petar (Dela 3:11). Da li o Petar tegani vazdinđa kokri pes, pogotovo odolese so ki olesi kultura hine but važno neko te ovel le baro položaj? Na. O Petar sa i slava aso odova so ćerđa dinđa e Jehovase hem e Isusese. Ov phenđa: „Prekalo e Isuseso anav hem odolese so verujinaja koro leste, akava manuš kole dikhena hem penđarena dobinđa snaga“ (Dela 3:12-16). O Petar kasnije ko po lil e hrišćanenđe phenđa so valjani te uraven pe ki poniznost, a odova setinćeri amen ko odova ked o Isus thovđa pe apostolenge pre. (Čitin 1. Petrova 5:5.)

12. Sar šaj sar o Petar hem ponodri te mothova poniznost?

¹² Amen šaj te ova sar o Petar hem te trudina amen te ova ponizna. Ma bistri, i poniznost na dikhela pe samo ko lafija. O izraz kova o Pavle koristinđa, a kova tano prevedimo sar „poniznost“, mothovi so i poniznost uključini odova savo mišljenje isi amen amendar hem averendar. Amen pomožinaja averenđe odolese so mangaja e Jehova hem e manušen, a na sose mangaja avera te hvalinen amen. Ako hijam bahtale đi služinaja e Jehovase hem pomožinaja amare phralenđe kobor god šaj, bizo obzir da li neko primetini amaro trud, amen mothovaja so hijam ponizna (Mat. 6:1-4).

OV „RAZBORITO“

13. So značini te ove „razborito“?

¹³ So značini te ove „razborito“? (1. Petr. 4:7). Jekh hrišćanin kova tano razborito, angleder te anel disavi odluka razmislini sar o Jehova dikhela ki odija buti. Asavko hrišćanin đanela so ništa ko oleso životi nane považno ando oleso amalipe e Jehovaja. Ov nane le but baro mišljenje pestar hem svesno tano so na đanela sa. Oslonini pe upro Jehova ađahar so često hem ponizno molini pe olese aso vođstvo.b

14. Sar o Petar ki jekh situacija mothovđa so na osloninđa pe upro Jehova?

¹⁴ Ki rat angleder te merel, o Isus upozorinđa pe učenikonen: „Sarinengi vera akija rat ka slaboni.“ A o Petar phenđa: „Ako sarinengi vera ka slaboni sebepi odova so ka ovel tuvaja, mi vera niked na ka slaboni!“ Odija rat, o Isus disave učenikonenđe phenđa: „Oven đangavde hem molinen tumen“ (Mat. 26:31, 33, 41). Ked bi o Petar hine šunela akava savet, verovatno bi ovela dovoljno hrabro te phenel soj tano e Isuseso učeniko. Ama, ov phenđa so na penđari e Isuse hem palo odova but kajinđa pe (Mat. 26:69-75).

15. So pomožinđa e Isusese te aćhol razborito odija rat ked valjanđa te merel?

¹⁵ O Isus potpuno osloninđa pe upro Jehova. Iako hine savršeno, ov odija rat nekobor putija molinđa pe. Odova dinđa le hrabrost te ćerel odova so o Jehova rodinđa olestar (Mat. 26:39, 42, 44; Jov. 18:4, 5). Sigurno o Petar niked na bisterđa kobor e Isusese hine važno i molitva.

16. Sar o Petar mothovđa so razvijinđa razboritost? (1. Petrova 4:7).

¹⁶ Palo disavo vreme, o Petar sikljilo te oslonini pe upro Jehova ki molitva. Ked o Isus uskrsninđa, ov uverinđa e Petare hem avere apostolen so ka dobinen sveti duh te šaj te propovedinen i šukar vest. Ama, o Isus phenđa lenđe te ađićeren ko Jerusalim đi odova na desini pe (Luka 24:49; Dela 1:4, 5). So ćerđa o Petar đi ađićerđa? Ov hem avera phralja hem phenja „istrajno molinđe pe“ (Dela 1:13, 14). Kasnije, ko po prvo lil, ov podstakninđa e phralen te oven razborita hem te osloninen pe upro Jehova ki molitva. (Čitin 1. Petrova 4:7.) O Petar sikljilo te oslonini pe upro Jehova hem ulo stubo ki skupština (Gal. 2:9).

17. So valjani hem ponodri te ćera? (Dikh i slika.)

¹⁷ Te šaj te ova razborita, valjani redovno te molina amen e Jehovase. Čak iako isi amen disave sposobnostija, amen valjani hem ponodri te ćera odova. Odolese, posebno ked valjani te ana disavi važno odluka, amen valjani te molina amen e Jehovase aso vođstvo hem te ovel amen poverenje upro leste so ov đanela soj tano najšukar amenđe.

18. So valjani te ćera te šaj te razmislina sar o Jehova?

¹⁸ But hijam zahvalna e Jehovase so ćerđa amen ađahar so šaj te oponašina olese osobine (Post. 1:26). Naravno, amen našti savršeno te oponašina le (Is. 55:9). Ama, sar o Petar šaj te trudina amen te razmislina sar o Jehova, te ova ponizna hem razborita.