E Jehovaso vas uvek ka pomožini amenđe

1. Sar o Mojsije mothovđa so hine le poverenje upro Jehova ked ikalđa e Izraelcen ando Egipat?

KI KNJIGA Jevrejima vaćeri pe ando but manuša kola hine len vera ko Jehova. Jekh olendar hine o Mojsije, olesi vera hine but zorali (Jevr. 3:2-5; 11:23-25). Ov mothovđa vera ked ikalđa e Izraelcen ando Egipat. Ov na darandilo ando faraon hem andi olesi vojska. Potpuno verujinđa e Jehovase hem legarđa e narodo prekalo Crveno more đi i pustinja (Jevr. 11:27-29). But Izraelcija našalđe po poverenje upro Jehova hem pućlje pe da li ka brinini pe olendar. Ama, o Mojsije hine le vera ko Jehova. Ov na razočarinđa pe ked o Jehova dinđa e narodose pani hem habe te šaj te preživinen ki pustinja (Izl. 15:22-25; Ps. 78:23-25).a

2. Sose o Devel pućlja e Mojsije: „Našti li e Jehovaso vas te ćerel odova?“ (Brojevi 11:21-23)

² Ama, iako o Mojsije hine le zorali vera, oko berš dive palo odova so o Jehova oslobodinđa e Izraelcen ando Egipat, ov počminđa te pućel pe da li o Jehova ka del pe narodose mas sar so phenđa. O Mojsije našti hine te zamislini sar o Jehova odobor manušenđe ka del dovoljno mas ki pustinja kuri na hine ništa. Odolese, o Jehova pućlja le: „Našti li e Jehovaso vas te ćerel odova?“ (Čitin Brojevi 11:21-23.) O lafija „e Jehovaso vas“ akate odnosinena pe ko oleso sveti duh, avere lafencar ki olesi sila. Odolese, o Jehova ka phene pućlja e Mojsije: „Da li ćaće mislineja so me našti te ćerav odova so phenđum so ka ćerav?“

3. Sose valjani te zanimini amen e Mojsijeso hem e Izraelcengo primer?

³ Da li nekad pućljan tut, da li o Jehova ka del tuće hem te porodicaće sa odova so valjani tumenđe aso životi? Čak ako na pućljan tut, hajde akana te razmotrina o primer ando Mojsije hem o Izraelcija kola na verujinđe so o Jehova ka brinini pe olendar. Ka razmotrina hem disave biblijake načelija kola ka zorjaćeren amaro poverenje so e Jehovaso vas uvek ka pomožini amen.

SIKLJOV ANDO MOJSIJE HEM ANDO IZRAELCIJA

4. Sose o Izraelcija počminđe te pućen pe da li o Jehova ka brinini pe olendar?

⁴ Sose o Izraelcija počminđe te pućen pe da li o Jehova ka brinini pe olendar? O Izraelcija hem but avera kola pođinđe olencar, već jekh vreme hine ki pustinja hem hine ko drumo asi Obećimi phuv (Izl. 12:38; Pon. zak. 8:15). Odole manušenđe hem bute Izraelcenđe i mana alji đi o nakh hem odolese počminđe te žalinen pe (Br. 11:4-6). O manuša manglje te han odova so hine len ko Egipat. Odolese so odobor žalinđe pe, izgleda so o Mojsije mislinđa so ov valjani te del len mas (Br. 11:13, 14).

5-6. So šaj te sikljova ando Izraelcija upro kola utičinđe o manuša kola pođinđe olencar?

⁵ Upro Izraelcija izgleda utičinđa odova so o manuša kola pođinđe olencar na ceninđe sa o buća kola o Jehova dinđa len. Avdije, hem amen šaj te ova sar olende. Ked o manuša kola živinena uzo amende nane zahvalna, hem amen šaj te počmina te na cenina odova so o Jehova dela amen. Odova šaj te desini pe ako uvek razmislinaja ando odova so hine amen angleder hem ako ovaja ljubomorna upro avera sebepi odova so isi len. Ama, amen ka ova pobahtale ako hijam zadovoljna odoleja so isi amen.

⁶ O Izraelcija valjanđe te ićeren ki godi so o Jehova obećinđa lenđe so ka del len but buća ked ka resen ki Obećimi phuv. Odova obećanje valjanđa te ispunini pe ked bi resena uduri, a na đi putujinđe prekali pustinja. Isto ađahar, amen na valjani te razmislina ando odova so nane amen ko akava sveto, nego so o Jehova obećinđa so ka del amen ko nevo sveto. Uzo odova, šaj te razmislina ando stihija kola šaj te pomožinen amen te ovel amen pana pobaro poverenje upro Jehova.

7. Sose šaj te ova sigurna so e Jehovaso vas uvek ka pomožini amen?

⁷ Ked o Jehova pućlja e Mojsije odova so pisini ko Brojevi 11:23, šaj manglja o Mojsije te razmislini ando duj buća. Sar prvo, so olesi moć nane la krajo hem sar dujto so šaj te koristini la kuri god valjani. Iako o Izraelcija hine maškar i pustinja, o Jehova šaj hine te del len mas kobor god valjanđa lenđe. Pe „zorale hem moćno vasteja“ o Jehova mothovđa so šaj te brinini pe ando po narodo kuri god te ovel (Ps. 136:11, 12). Odolese, ked isi amen disavo pharipe, šaj te ova sigurna so e Jehovaso vas uvek ka pomožini amen (Ps. 138:6, 7).

8. So šaj te pomožini amen te na ćera isto greška sar o Izraelcija ki pustinja? (Dikh i slika.)

⁸ Sigate palo odova, o Jehova dinđa len mas. Bićhalđa lenđe prepelice. Ama, umesto te zahvalinen pe e Jehovase aso odova čudo, o Izraelcija ulje pohlepna. Ćedinđe pobuter ando odova so valjanđa lenđe. Hić na terdilje, dive-rat ćedinđe. O Jehova holjanđa upro okola kola hine pohlepna hem kazninđa len (Br. 11:31-34). Amen šaj te sikljova diso ando odova primer. Valjani te pazina te na ova pohlepna. Bilo te ova barvale ja ćorore, najvažno valjani te ovel amenđe te ćeda „barvalipe ko nebo“ ađahar so ka zorjaćera amaro amalipe e Jehovaja hem e Isuseja (Mat. 6:19, 20; Luka 16:9). Ked odova ka ćera, šaj te ova sigurna so o Jehova ka del amen odova so valjani amenđe.

9. Ko so šaj te ova sigurna?

⁹ O Jehova phravela po vas te pomožini pe narodose hem avdije. Da li odova značini so uvek ka ovel amen pare hem so niked na ka ova bokhale? Na.b Odova značini so o Jehova niked na ka irini amenđe po dumo. Ov uvek ka del amen snaga te istrajina, kobor god amari situacija te ovel phari. Sar šaj te mothova so isi amen poverenje so o Jehova ka brinini pe amendar? Akana ka razmotrina duj situacije: (1) ked isi amen finansijska problemija hem (2) ked razmislinaja da li ka ovel amen odova so valjani amenđe ked ka phurjova.

KED ISI AMEN FINANSIJSKA PROBLEMIJA

10. Kola finansijska problemija šaj te oven amen?

¹⁰ Sar tano o krajo sa popaše, verovatno pana pobare problemija ka oven amen. Sose? Odolese so i vlada menini pe, isi mariba hem neve pandemije. Ja kotar jekhvar šaj te našala amari buti, o buća kola isi amen ja šaj ka valjani te ikljova ando ćher. Šaj ka ovel amenđe sa popharo te obezbedina odova so valjani amenđe. Šaj ka valjani te roda aver buti odothe kaj živinaja ja te razmislina ando odova te selina amen amare porodicaja negde averthe. So šaj te pomožini amen te ana odluke kola ka mothoven so osloninaja amen upro Jehova?

11. So šaj te pomožini tuće te ikljove ko krajo ked isi tut finansijska problemija? (Luka 12:29-31)

¹¹ But tano važno te vaćere e Jehovase ki molitva so brinini tut (Posl. 16:3). Molin tut olese te del tut mudrost te ane šukar odluke hem te del tut mir kova ka pomožini tut te na sikirine tut sebepi ti situacija. (Čitin Luka 12:29-31.) Molin le hem ponodri te pomožini tut te ove zadovoljno odoleja so isi tut (1. Tim. 6:7, 8). Ko amare publikacije rode o člankija kola vaćerena ando odova sar šaj te ikljove ko krajo ked isi tut finansijska problemija. But phralja hem phenja phenena so but pomožinđe lenđe o videa hem o člankija kotar amaro sajt kola vaćerena ando odova problemi.

12. So šaj neko te pućel pe te šaj te anel šukar odluka pe porodicaće?

¹² Disave prihvatinđe te ćeren buti but dur andi pi porodica, ama kasnije haljilje so odija na hine mudro odluka. Angleder te prihvatine disavi buti, ma razmislin samo kobor pare ka zaradine, nego da li odija buti ka pomožini tuće hem te porodicaće te oven paše e Jehovaja (Luka 14:28). Puć tut: „Sar upro mo bračno drug ka utičini ako hijam dur jekh jekhestar? Da li ka resav te đav ko sa o sastankija, ki služba hem da li ka ovel man vreme te družinav man e phralencar hem e phenjencar?“ Isto ađahar, ako isi tut ćhave valjani te puće tut: „Sar šaj te vaspitinav me ćhaven hem te sikavav len te šunen e Jehova ako na hijum olencar?“ (Ef. 6:4). Ked valjani te ane odluka, ćer odova so o Jehova phenela, a na so phenela ti familija ja te amala kola na verujinena ki Biblija.c O Toni kova živini ki zapadno Azija hine le prilika te prihvatini nekobor šukar buća ki aver phuv kuri šaj hine but te zaradini. Ama, palo odova so molinđa pe hem vaćerđa pe romnjaja, ov odlučinđa te na prihvatini nijekh buti. Umesto odova, odlučinđe te razmislinen sar šaj te živinen poskromno. Akana, o Toni phenela: „Odolese so anđam akija odluka, šaj hine te pomožina nekobor manušenđe te upoznajinen e Jehova hem amare ćhave but mangena le. Amari porodica sikljilji so sa đi živinaja premalo lafija kola pisinena ko Matej 6:33, o Jehova ka brinini pe amendar.“

KED RAZMISLINEJA ANDO TO PHURIPE

13. So šaj akana te ćera te šaj te ovel amen odova so valjani amenđe ked ka phurjova?

¹³ Amen šaj te mothova kobor baro poverenje isi amen upro Jehova ked razmislinaja odolestar sar ka ovel ked ka phurjova. I Biblija podstaknini amen te ćera buti te šaj ki budućnost te ovel amen odova so valjani amenđe (Posl. 6:6-11). Ako šaj, šukar bi ovela te ćhiva disave pare ki strana. Tačno tano soj tane o pare sar zaštita (Prop. 7:12). Ama, on na valjani te oven amenđe ko prvo than ko životi.

14. Sar šaj o lafija ando Jevrejima 13:5 te pomožinen amen te na sekirina amen but?

¹⁴ O Isus vaćerđa jekh poređenje ando manuš kova ćhivđa pare ki strana, ama na hine „barvalo anglo Devel“ (Luka 12:16-21). Niko amendar na đanela so anela o tajsato dive (Posl. 23:4, 5; Jak. 4:13-15). Isto ađahar, o Isus phenđa so okola so mangena te oven olese učenikija valjani te oven spremna te odrekninen pe ando materijalna buća kola isi len (Luka 14:33). Odova desinđa pe e hrišćanenđe ki Judeja hem on hine spremna te odrekninen pe ando sa odova so hine len. Ama, na našalđe pi radost (Jevr. 10:34). Ko amaro vreme but phralja hem phenja našalđe pi buti sose na mangena te oven ki nijekh političko strana (Otkr. 13:16, 17). So pomožinđa lenđe te ćeren odova? On isi len poverenje so o Jehova ka ispunini akava obećanje: „Niked na ka aćhavav tut hem niked na ka irinav tuće mo dumo.“ (Čitin Jevrejima 13:5.) Amen ćeraja sa so šaj te ovel amen dovoljno pare ked ka phurjova hem isi amen poverenje so o Jehova ka brinini pe amendar ako desini pe diso so na očekujinđam.

15. Sar o roditeljija valjani te dikhen upro pe ćhave? (Dikh i slika.)

¹⁵ Ko disave kulture, o bračna parija isi len ćhave samo te šaj neko te brinini pe olendar ked ka phurjoven. Ki Biblija pisini so o roditeljija valjani te brininen pe ando ćhave (2. Kor. 12:14). Naravno, ked o roditeljija ka phurjoven šaj ka valjani lenđe disavi pomoć hem o ćhave ka oven othe te pomožinen len (1. Tim. 5:4). Ama, o roditeljija kola tane e Jehovase svedokija haljona so olengo bahtalipe na avela ando odova te barjaćeren pe ćhaven te šaj kasnije te brininen pe olendar, već ando odova te sikaven pe ćhaven te služinen e Jehovase (3. Jov. 4).

16. So o roditeljija valjani te sikaven pe ćhaven? (Efešanima 4:28)

¹⁶ Đi sikavena tumare ćhaven sar kasnije te brininen pe ando pe potrebe, tumare primereja mothoven lenđe so valjani te osloninen pe upro Jehova. Kotar tiknipe, sikaven len te oven bućarne (Posl. 29:21; čitin Efešanima 4:28). Isto ađahar, pomožinen len te sikljon šukar ki škola. O roditeljija šaj te arakhen disave biblijake načelija hem te pomožinen pe ćhavenđe te primeninen len te šaj te anen mudra odluke ando odova ki savi škola ka đan. E roditeljengo cilj tano te pomožinen e ćhavenđe te sikljon sar jekh dive kokri te brininen pe pestar hem te ovel len pobuter vreme asi služba, pa čak hem te oven pionirija.

17. Ko so šaj te ova sigurna?

¹⁷ E Jehovase verna sluge šaj te osloninen pe ko odova so ov šaj hem mangela te brinini pe ando olenge materijalna potrebe. Sar o kraj ando akava sveto tano sa popaše, sa pobuter valjani te oslonina amen upro Jehova. So god te ovel, ov odlučno te verujine so o Jehova ka koristini pi moć te del tut sa odova so valjani tuće. Šaj te ova sigurna so e Jehovaso zoralo hem moćno vas uvek ka pomožini amen.