Birinen kase ka služinen

1. So valjani te ćera ako mangaja te ova bahtale hem sose? (Isaija 48:17, 18)

AMARO nebesko Dad but mangela amen hem mangela te uživina ko životi akana hem ki budućnost (Prop. 3:12, 13). Ked ćerđa amen, ov dinđa amen disave talentija, ama na dinđa amen sposobnost te vladina upro avera ili kokri te ćhiva amenđe merilija ando odova soj tano šukar, a soj tano lošno (Prop. 8:9; Jer. 10:23). Ov đanela, so te šaj te ova bahtale, amen valjani te služina lese hem te ićera amen ko olese merilija. (Čitin Isaija 48:17, 18.)

2. Ko so o Satana mangela te verujina hem so o Jehova ćerđa?

² O Satana mangela te verujina so šaj te ova bahtale bizo Jehova hem so o manuša šaj kokri te vladinen (Post. 3:4, 5). Te šaj te mothovi so o Satana hovavi, o Jehova mukhlja o manuša jekh određeno vreme kokri te vladinen. Ama, amen jasno dikhaja so o manuša nane sposobna te ćeren odova. Ki aver strana, ki Biblija isi but primerija ando manuša kola hine bahtale sose služinđe e Jehovase. Jekh olendar hine o Isus Hrist. Najangleder, ka dikha sose o Isus birinđa te služini e Jehovase. Palo odova, ka dikha sose amaro nebesko Dad zaslužini te služina lese. Ko krajo, ka dikha disave razlogija sose birinaja te služina e Jehovase.

SOSE O ISUS BIRINĐA TE SLUŽINI E JEHOVASE?

3. So o Satana nudinđa e Isusese hem so ov ćerđa?

³ Đi hine ki phuv, o Isus valjanđa te odlučini kase ka služini. Kratko palo odova so krstinđa pe, o Satana phenđa so ka del le sa o kraljevstvija ando sveto, ako ka poklonini pe olese samo jekh puti. Ama, o Isus phenđa lese: „Naš, Satano! Sose tano pisimo: ’E Jehovase, te Devlese, klanin tut hem samo olese služin‘ “ (Mat. 4:8-10). Sose o Isus anđa odija odluka? Akana ka dikha.

4-5. Sose o Isus birinđa te služini e Jehovase?

⁴ O mangipe tano glavno razlog sose o Isus birinđa te služini e Jehovase. Ov but mangela pe Dade (Jov. 14:31). Isto ađahar, ov služini lese odolese so đanela soj tano odova ispravno (Jov. 8:28, 29; Otkr. 4:11). Ov đanela so ando Jehova avela o životi, so šaj te verujina lese hem soj tano velikodušno (Ps. 33:4; 36:9; Jak. 1:17). O Jehova uvek vaćerđa o ćaćipe e Isusese hem sa so isi le dobinđa olestar (Jov. 1:14). Ama, o Satana tano but averćhane ando Jehova. Ov ćerđa o manuša te grešinen hem te meren. Ov tano hovavno, pohlepno hem sebično (Jov. 8:44). O Isus đanela koj tano o Jehova, ama đanela hem koj tano o Beng. Odolese, niked na manglja te ovel sar o Satana hem te bunini pe protiv o Devel (Fil. 2:5-8).

⁵ Pana jekh razlog sose o Isus birinđa te služini e Jehovase tano odolese so razmislinđa ando odova save šukar buća ka anel olesi žrtva (Jevr. 12:2). Ov đanđa so ako aćhola verno e Jehovase, ka posvetini pe Dadeso anav hem ka cidel o greh hem o meribe.

SOSE O JEHOVA ZASLUŽINI TE SLUŽINA LESE?

6-7. Sose but đene avdije na služinena e Jehovase, ama sose ov zaslužini te služina lese?

⁶ Avdije, but manuša na služinena e Jehovase odolese so na đanena olese šuže osobine hem na đanena kola buća ćerđa lenđe. Slična tane sar o manuša kolenđe o Pavle propovedinđa ki Atina kola na đanđe ništa ando Devel (Dela 17:19, 20, 30, 34).

⁷ O Pavle objasninđa e manušenđe ki Atina so o ćaćutno Devel „sarinenđe dela životi hem dah hem sa aver“. Ov pana phenđa: „Sebepi oleso isi amen životi, phiraja hem postojinaja.“ O Devel tano Stvoritelj kova „ćerđa sa e manušen,“ ov tano jedino kase valjani te služina (Dela 17:25, 26, 28).

8. So o Jehova niked na ka ćerel? Objasnin.

⁸ Sar Stvoritelj hem Vladari ando celo svemir, o Jehova šaj hine zorjeja te ćhivel e manušen te služinen lese. Ama, ov niked na ka ćerel odova. Umesto odova, ov dinđa amen dokazija so ov postojini hem so but mangela amen. Ov mangela so pobuter manuša te oven olese amala zauvek (1. Tim. 2:3, 4). Odolese, o Jehova sikavi amen sar averenđe te vaćera andi olesi namera hem ando šukar buća kola ka ćerel e manušenđe (Mat. 10:11-13; 28:19, 20). Isto ađahar, dinđa amen skupštine kuri šaj te služina lese hem te dobina pomoć ando amare starešine (Dela 20:28).

9. Sar o Jehova mothovi so mangela e manušen?

⁹ E Jehovaso mangipe šaj te dikha ko odova sar ponašini pe okolencar kola na verujinena koro leste. Razmislin ando akava: Beršencar, but manuša kokri odlučinđe soj tano šukar, a soj tano lošno, umesto te šunen e Jehova. Ama, ov čak hem olenđe dela sa so valjani te šaj te živinen hem te uživinen ko životi (Mat. 5:44, 45; Dela 14:16, 17). Sebepi oleso, on isi len amala hem porodica koja mangela len, isi len ćhave, buti hem ćaće uživinena ko životi (Ps. 127:3; Prop. 2:24). Odova mothovi amenđe so o Jehova mangela sa e manušen (Izl. 34:6). Akana ka podsetina amen ko odova sose amen služinaja e Jehovase hem sar ov blagoslovini okolen kola birinena te služinen lese.

SOSE BIRINAJA TE SLUŽINA E JEHOVASE?

10. (a) Kova tano o glavno razlog sose služinaja e Jehovase? (Matej 22:37) (b) Da li tuće pomožini odova so o Jehova tano strpljivo? (Psalam 103:13, 14)

¹⁰ Sar o Isus, amaro glavno razlog sose služinaja e Jehovase tano sose but mangaja le. (Čitin Matej 22:37.) Amen hijam paše e Jehovaja ked sikljovaja ando olese šuže osobine. Na primer, razmislin ando Jehovaso strpljenje kova mothovi premalo amende. Ked o Izraelcija na šunđe le, ov phenđa lenđe: „Molinava tumen, ćhinaven te ćeren odova soj tano lošno, meninen tumaro životi hem odova so ćerena“ (Jer. 18:11). O Jehova na bistrela so amen na hijam savršena hem so hijam praho. (Čitin Psalam 103:13, 14.) Ked razmislineja ando Jehovaso strpljenje hem ando olese avera osobine, na hijan li podstaknimo zauvek te služine lese?

11. Sose birinaja te služina amare nebesko Dadese?

¹¹ Isto ađahar, amen birinaja te služina e Jehovase sose tano odova ispravno (Mat. 4:10). Uzo odova, amen đanaja so ako hijam verna e Jehovase but šukar buća ka oven sebepi odova. Ked verno služinaja e Jehovase, amen učestvujinaja ko odova te posvetini pe oleso anav, mothovaja so o Beng hovavi hem radujinaja amare nebesko Dade. A ako avdije birinaja te služina e Jehovase, amen šaj te ovel amen nada so ka živina večno (Jov. 17:3).

12-13. So sikljovaja andi Džejn hem i Pem?

¹² Pana kotar tiknipe, amen šaj te sikljova te manga e Jehova. A sar đala o vreme odova mangipe šaj te ovel pana pobaro. Te dikha o primer ando duj phenja. I Džejna hine la 11 berš, a i Pem 10 berš ked počminđe te proučinen i Biblija. Iako olenge roditeljija na proučinđe, on mukhlje len te proučinen e Jehovase svedokonencar sa đi redovno đana pe porodicaja ki crkva. I Džejn phenela: „Odova so e Jehovase svedokija sikavđe man andi Biblija, pomožinđa maje te na ćerav odova so ćerđe me amala ki škola, sar na primer te na drogirinav man hem te na ćerav nemoral.“

¹³ Palo nekobor berš, on krstinđe pe. Kasnije, ulje pionirke hem brininđe pe ando pe roditeljija kola hine phure. Ked razmislini ando odova so doživinđe, i Džejn phenela: „Sikljiljum so o Jehova brinini pe ando pe amala hem soj tane ćaće o lafija andi 2. Timoteju 2:19 kuri pisini: ’O Jehova penđari okolen soj tane olese.‘ “ Šaj te ova sigurna so o Jehova uvek ka brinini pe ando okola kola mangena le hem služinena lese.

14. Sar šaj te branina e Jehova? (Dikh o slike.)

¹⁴ Amen mangaja avera te đanen o ćaćipe ando Jehova. Na primer, zamislin so isi tut jekh but šukar amal. Ov tano velikodušno hem spremno oprostini averenđe. Ama, jekh dive šuneja sar neko vaćeri so to amal tano okrutno hem so nane pošteno. Sar ka reagujine? Sigurno ka branine le. Isto ađahar, ked šunaja so neko vaćeri hovajbe ando Jehova, amen spremno ka branina le ađahar so ka phena o ćaćipe olestar (Ps. 34:1; Is. 43:10). Amare lafencar hem deloncar amen mothovaja so mangaja te služina e Jehovase celone vileja.

15. Kola šukar buća desinđe pe e Pavlese palo odova so ćerđa bare promene ko po životi? (Filipljanima 3:7, 8)

¹⁵ Amen hijam spremna te ćera disave promene ko životi te šaj te ugodina e Jehovase ili te ćera diso pobuter ki služba. Na primer, o apostol Pavle hine le važno položaj ki jevrejsko religija, ama ov mukhlja odija religija te šaj te ovel e Isuseso učeniko hem te služini e Jehovase (Gal. 1:14). Sebepi odova, hine le bare blagoslovija hem dobinđa nagrada te vladini e Isuseja ko nebo. Ov niked na kajinđa pe odolese so odlučinđa te služini e Jehovase, a ni amen na ka kajina amen. (Čitin Filipljanima 3:7, 8.)

16. So sikljovaja ando Džulijako iskustvo? (Dikh o slike.)

¹⁶ Ako i služba e Jehovase ćhivaja ko prvo than ko amaro životi, ov ka nagradini amen akana hem ki budućnost. Te razmotrina o iskustvo andi jekh phen koja vićini pe Džulija. Ked hine tikni, oj đilabđa ko crkveno hor. Jekh profesionalno opersko pevači dikhlja kobor šukar đilabi hem počminđa te sikavi la. Sigate ulji but poznato hem đilabđa ko poznata thana. Đi hine ki jekh poznato muzičko škola, jekh olako amal ando razred počminđa te vaćeri olaja ando Devel hem objasninđa laće so e Devleso anav tano Jehova. Hari palo odova, i Džulija počminđa te proučini i Biblija duj putija ko kurko. Ko krajo, odlučinđa po vreme hem pi snaga te koristini te služini e Jehovase, a na te ovel opersko pevačica. Odija odluka na hine hić lokhi. Oj phenela: „But manuša phenđe maje so hijum dilini so aćhavđum i muzika te šaj te služinav e Jehovase. Ama, me mangljum mo životi te koristinav te služinav olese.“ Sar osetini pe akana, palo 30 berš so anđa odija odluka? Oj phenela: „Isi man baro mir hem hijum sigurno so o Jehova ki budućnost ka ispunini sa me želje“ (Ps. 145:16).

HEM PONODRI SLUŽIN E JEHOVASE

17. So amenđe, a so avere manušenđe značini odova so o krajo tano but paše?

¹⁷ Amen živinaja ko vreme ando krajo. O apostol Pavle pisinđa: „Sose ’pana hari‘ hem ka ’resel okova so avela hem na ka harini‘ “ (Jevr. 10:37). So odova značini? Na aćhilo but vreme o manuša te odlučinen da li ka služinen e Jehovase (1. Kor. 7:29). Ako već odlučinđam te služina e Jehovase, đanaja so iako ka oven amen pharipa on ka oven samo „pana hari“.

18. So o Isus hem o Jehova mangena amen te ćera?

¹⁸ O Isus podstakninđa e manušen te oven olese učenikija hem te nastavinen te sledinen le (Mat. 16:24). Odolese, ako beršencar služinaja e Jehovase, valjani te ova odlučna hem ponodri te ćera odova. Valjani te trudina amen te ispunina amaro zavet so ka služina lese. Odova šaj na ka ovel lokho, ama ka oven amen bare blagoslovija pana akana (Ps. 35:27).

19. So sikljovaja ando Džineso iskustvo?

¹⁹ Disave mislinena so našti te uživine ko životi ako hijan e Jehovaso svedoko. Ako hijan terno, hem tu šaj mislineja so našaleja diso ko životi odolese so hijan Svedoko. Jekh terno phral kova vićini pe Džin, phenela: „Mislinđum so našti te uživinav odolese so hijum e Jehovaso svedoko. Dićhilo maje so o ćhave kolencar bariljum uživinena odolese so đana ko žurke, isi len veze, ćhelena nasilna video-igrice, a me samo đava ko sastankija hem ki služba.“ Sar akava razmišljanje utičinđa upro Džin? Ov phenela: „Počminđum te ćerav disave lošna buća kola ćerena o terne. Jekh vreme osetinđum man šukar. Ama, odova na anđa maje ćaćutno bahtalipe. Odolese, počminđum te razmislinav ando odova kobor šaj te pomožini amen odova ked ićeraja amen ko načelija andi Biblija hem odlučinđum celone vileja te služinav e Jehovase. Ando tegani, mislinava so o Jehova odgovorinđa ki svako mi molitva.“

20. So valjani te ova odlučna te ćera?

²⁰ Jekh psalmista ki đili phenđa e Jehovase: „Bahtalo tano o manuš kole tu birineja hem aneja le uzo tute te ovel ko dvorija ando to hram“ (Ps. 65:4). Odolese hajde te trudina amen hem ponodri te služina e Jehovase. Sar o Isus Navin hem amen ka phena: „Me hem mo ćher ka služina e Jehovase“ (Is. Nav. 24:15).