33. ČLANKO PROUČIBASE
ĐILI 4 „O Jehova tano mo pastiri“
Uverin tut ko odova so o Jehova mangela tut
Privucinava tut me verno mangipaja (JER. 31:3)
SO KA SIKLJOVA?
Ka dikha sose tano važno te uverina amen so o Jehova mangela amen hem so šaj te ćera te šaj te ova pana posigurna ko odova.
1. Sose predajinđan to životi e Jehovase? (Dikh i slika.)
ŠAJ li te setine tut ko dive ked predajinđan tut e Jehovase? Tu anđan odija odluka sose upoznajinđan e Jehova hem but zamangljan le. Obećinđan lese so olesi volja ka ćhive ko prvo than ko to životi hem so ponodri ka mange le celone vileja, celona dušaja, gođaja hem snagaja (Mar. 12:30). Ando odova vreme to mangipe premalo leste ulo sa pobaro. Odolese, ked bi akana neko pućela tut: „Da li hijan sigurno so mangeja e Jehova?“ Bizo te razmisline, tu bi sigurno odgovorineja: „Mangava le pobuter ando bilo so aver.“
Da li setineja tut kobor baro mangipe osetinđan premalo Jehova ked predajinđan to životi olese hem ked krstinđan tut? (Dikh o 1. odlomko)
2-3. Ko so o Jehova mangela te ova uverime hem sostar ka vaćera ko akava članko? (Jeremija 31:3)
2 Sar bi odgovorineja ako bi neko pućela tut: „Da li o Jehova mangela tut?“ Šaj mislineja so na hijan dovoljno šukar te bi o Jehova mangela tut. Jekh phen koja hine la pharo detinjstvo, phenela: „Me đanava so mangava e Jehova, ko odova na sumnjinava. Ama, često sumnjinava ko odova da li o Jehova mangela man.“ So o Jehova ćaće osetini premalo tute?
3 O Jehova mangela te ova uverime so ov mangela amen. (Čitin Jeremija 31:3.) Ma bistri, ov privucinđa tut koro peste. Odolese, ked predajinđan to životi e Jehovase hem ked krstinđan tut, tu dobinđan olestar diso posebno – oleso verno mangipe. Odova značini so but mangela tut hem so niked na ka aćhavi tut. Asavko mangipe podstaknini le upro pe verna sluge, maškaro kola hijan hem tu, te dikhel sar upro po „posebno narodo“ (Mal. 3:17). O Jehova mangela te osetina amen sar o apostol Pavle. Ov hine uverimo so o Jehova mangela le hem odolese pisinđa: „Uverimo hijum so ni o meribe, ni o životi, ni o anđelija, ni o vlastija, ni odova soj tano akana, ni odova so ka avel, ni o sile, ni odova soj tano ućo, ni odova soj tano hor, ni bilo so aver soj tano stvorimo, našti te ulavi amen ando Devleso mangipe“ (Rimlj. 8:38, 39). Ko akava članko ka dikha, sose valjani te uverina amen ko odova so o Jehova mangela amen hem so ka pomožini amen te ćera odova.
SOSE VALJANI TE UVERINA AMEN KO JEHOVASO MANGIPE?
4. Sar šaj te suprotstavina amen e Bengese?
4 Ako hijam uverime so o Jehova mangela amen, amen ka šaj te borina amen protiv jekh e Bengesi zamka (Ef. 6:11). O Satana ćerela sa so šaj te ćhinavi amen te služina e Jehovase. Jekh način ko kova ćerela odova tano ađahar so ćhivela amen te mislina so o Jehova na mangela amen. Ama odova tano baro hovajbe. I Biblija uporedini e Satana jekhe laveja (1. Petr. 5:8, 9). O lav napadini e životinjen kola tane slaba hem kola našti te braninen kokri pes. Isto ađahar, o Satana napadini amen ked hijam slaba, umorna ja tužna odolese so šaj doživinđam disave lošna buća ki prošlost, šaj akana isi amen disave problemija ja šaj brininaja amen so ka ovel ki budućnost (Posl. 24:10). O Satana nadini pe so ka ćerel amen te ova odobor slaba so ka manga te ćhinava te služina e Jehovase. Ama, amen šaj te suprotstavina amen olese hem aso olese zamke, ako daja sa amendar te ćera sa so šaj te uverina amen so o Jehova mangela amen (Jak. 4:7).
5. Sose tano važno te osetina so o Jehova mangela amen hem cenini amen?
5 Ako hijam uverime so o Jehova mangela amen, ka ova pana popaše oleja. Sose phenaja odova? O Jehova ćerđa amen te ova sposobna te manga hem te ova mangle. Ked amenđe neko mothovi mangipe, amari prirodno reakcija tani hem amen te mothova lese mangipe. Odolese, so pobuter osetinaja so o Jehova mangela amen hem cenini amen, amaro mangipe premalo leste ka barjol (1. Jov. 4:19). A ked amaro mangipe premalo leste ovela pobaro hem oleso mangipe premalo amende ovela pana pobaro. Ki Biblija pisini: „Oven paše e Devleja, hem ov ka ovel paše tumencar“ (Jak. 4:8). Ama, so šaj te ćera te šaj te uverina amen so o Jehova mangela amen?
SO ŠAJ TE POMOŽINI AMEN TE UVERINA AMEN KO JEHOVASO MANGIPE?
6. So šaj te ćere ako na hijan sigurno so o Jehova mangela tut?
6 Ov konkretno hem istrajno ko te molitve (Luka 18:1; Rimlj. 12:12). Molin tut e Jehovase, ako valjani nekobor putija svako dive, te pomožini tut te dikhe upro tute ađahar sar so ov dikhela tut. Šaj nane tuće lokho te ćere odova sose to vilo osudini tut. Ama, ma bistri so o Jehova tano pobaro ando to vilo (1. Jov. 3:19, 20). Ov đanela tut pošukar tutar hem dikhela o šukar buća kolendar tu ni na hijan svesno (1. Sam. 16:7; 2. Let. 6:30). Odolese, ma lađa te phrave lese to vilo hem te rode lestar te pomožini tut te uverine tut ko oleso mangipe (Ps. 62:8). Palo odova so ka moline tut, važno tano te ćere o buća kolendar akana ka vaćera.
7-8. Sar o Psalmija uverinena amen so o Jehova mangela amen?
7 Nek ovel tut poverenje ko odova so o Jehova phenela. O Jehova dinđa po sveti duh e manušenđe kola pisinđe i Biblija. Odolese, šaj te ova sigurna so sa odova so phenđe olestar tano tačno. Te dikha sar o David ko jekh šukar način opisujinđa e Jehova. Ov phenđa: „O Jehova tano paše okolencar kola tane phage vileja, ov spasini okolen kola tane obeshrabrime“ (Ps. 34:18). Ked hijan tužno, šaj osetineja tut so hijan kokri. Ama, o Jehova obećini tuće so tegani ka ovel paše uzo tute sose đanela so valjani tuće olesi pomoć. A ko jekh aver psalam o David pisinđa: „Ćede me asva ko to meh“ (Ps. 56:8). O Jehova dikhela ked tano tuće pharo. Ov brinini pe tutar hem osetini ti dukh ko po vilo. Sar so svako kapka ando pani tani dragoceno jekhe manušese kova putujini ki pustinja, ađahar tani dragoceno svako ti asvi e Jehovase. Ov pamtini svako situacija ki koja hine tuće pharo hem ki koja runđan. Ko Psalam 139:3 pisini: „Tu [Jehova] šukar đaneja sa me drumija.“ O Jehova dikhela sa so ćereja, ama usredsredini pe ko šukar buća kola ćereja (Jevr. 6:10). Sose? Odolese so cenini odova so trudineja tut te ugodine lese.a
8 O Jehova koristini akala utešna stihija ando po Lafi te phenel tuće so brinini pe tutar hem so but mangela tut. Ama, sar so pominđam angleder, o Beng mangela te verujine so o Jehova na mangela tut. Odolese, ako podijekh puti sumnjineja ko odova so o Jehova mangela tut, aćhov hem puć tut: „Kase ka verujinav, okolese kova tano dad ando hovajbe ili e Devlese ando ćaćipe?“ (Jov. 8:44; Ps. 31:5).
9. So o Jehova obećini okolenđe kola mangena le? (Izlazak 20:5, 6)
9 Razmislin ando odova so o Jehova osetini premalo okola so mangena le. Šukar tano te setina amen so o Jehova phenđa e Mojsijese hem e Izraelcenđe. (Čitin Izlazak 20:5, 6.) O Jehova obećini so hem ponodri ka mothovi po mangipe okolenđe kola mangena le. Akala lafija uverinena amen so našti te desini pe amaro verno Devel te na mangel okolen kola mangena ole (Nem. 1:5). Odolese, ako podijekh puti valjani te uverine tut so o Jehova mangela tut, puć tut: „Da li me mangava e Jehova?“ Palo odova, razmislin ando akava: Ako tu mangeja le hem trudineja tut te de le to najšukar, ov sigurno so hem ov mangela tut (Dan. 9:4; 1. Kor. 8:3). Avere lafencar, ako na sumnjineja ko odova so tu mangeja e Jehova, sose bi sumnjineja ko odova so ov mangela tut? Ov sigurno so o Jehova uvek ka mangel tut hem niked na ka mukhel tut.
10-11. So o Jehova na mangela te bistra andi otkupnina? (Galatima 2:20)
10 Razmislin andi otkupnina. I otkupnina tani jekh ando najbaro poklon kova o Jehova dinđa e manušenđe (Jov. 3:16). Ama, da li o Devel bićhalđa pe Ćhave te merel hem tuće? Ja! Te dikha o primer ando apostol Pavle. Angleder te ovel hrišćanin, ov ćerđa but bare grehija. Ama, hem palo odova morandilo te borini pe protiv pe slabostija (Rimlj. 7:24, 25; 1. Tim. 1:12-14). Ipak, ki otkupnina dikhlja sar poklon lično olese. (Čitin Galatima 2:20.) O Jehova prekalo po duh podstakninđa e Pavle te pisini akala lafija hem ov mangela hem amen te sikljova olendar (Rimlj. 15:4). O Jehova mangela te verujine so i otkupnina tani lično poklon tuće. Ako razmislineja ko asavko način, odova ka uverini tut so o Jehova mangela tut.
11 Amen hijam zahvalna e Jehovase so bićhalđa e Isuse ki phuv te merel amenđe. Ama, aver razlog sose o Isus alo ki phuv tano te vaćeri o ćaćipe ando Jehova (Jov. 18:37). Ko odova ćaćipe tano uključimo hem odova so o Jehova but mangela pe ćhaven.
SAR O ISUS POMOŽINI AMEN TE UVERINA AMEN KO DEVLESO MANGIPE?
12. Sose šaj te verujina ko odova so o Isus phenđa ando Jehova?
12 Đi hine ki phuv, o Isus uživinđa te vaćeri ando odova savo tano o Jehova (Luka 10:22). Amen šaj te verujina ko odova so o Isus vaćerđa olestar. Sose? Odolese so ov hine pe Dadeja ko nebo but vreme (Kol. 1:15). Ov đanđa kobor oleso Dad mangela ole. Isto ađahar, dikhlja kobor o Jehova mangela e anđelen hem pe verna slugen ki phuv. Sar o Isus pomožini amenđe te uverina amen ko Devleso mangipe?
13. Sar o Isus mangela te dikha upro Jehova?
13 O Isus manglja amen te đana so o Jehova ćaće osetini premalo amende. Ko jevanđelja, ov prekalo 160 putija koristinđa o lafi „Dad“. Ked vaćerđa pe učenikonencar, ov koristinđa o lafija „tumaro Dad“ ja „tumaro nebesko Dad“ (Mat. 5:16; 6:26). Angleder o Isus te avel ki phuv, e Jehovase sluge koristinđe o titule „Svemoćno“, „Najbaro“, „Veličanstveno Stvoritelj“ hem avera slična titule. Ama, o Isus često phenđa so o Jehova tano amaro „Dad“. Odova lafi mothovi so o Jehova mangela te osetina amen paše oleja sar soj tano o ćhavo paše pe dadeja. Jasno tano so o Isus manglja upro Jehova te dikha sar oleste. A ov upro leste dikhlja sar jekh dad kova mangela pe ćhaven. Akana ka dikha duj primerija sar ov koristinđa o lafi „Dad“.
14. Sar o Isus mothovđa so svako amendar tano posebno anglo Jehovase jaćha? (Matej 10:29-31; dikh i slika.)
14 Sar prvo, te dikha so o Isus phenđa ko Matej 10:29-31. (Čitin.) O vrapcija tane tikne ćiriklja kola našti te mangen e Jehova hem te služinen lese. Ama, ipak amaro Dad đanela ked svako olendar perela ki phuv. Ako ov brinini pe olenđe, kobor tek brinini pe amendar hem mangela amen kola šaj te služina lese hem te manga le. O Isus phenđa so o Jehova đanela kobor bala isi amen ko šero. Ako ov đanela odova amendar, šaj te ova sigurna so but brinini pe amendar. Sa akava mothovi amenđe so o Isus mangela te uverina amen so svako amendar tano posebno anglo Jehovase jaćha.
O Jehova tačno đanela kaj tano svako vrapco. Ako e Jehovase tani važno jekh odobor tikni ćirikli, šaj te ove sigurno so tu kova mangeja le hem služineja lese hijan lese but považno! (Dikh o 14. odlomko)
15. So e Isusese lafija ando Jovan 6:44 vaćerena amenđe ando amaro nebesko Dad?
15 Akana ka dikha o dujto primer sar o Isus koristinđa o lafi „Dad“. (Čitin Jovan 6:44.) To nebesko Dad privucinđa tut ko ćaćipe odolese so dikhlja diso šukar ko to vilo (Dela 13:48). Ked o Isus vaćerđa o lafija ando Jovan 6:44 šaj ki godi hine le e Jeremijase lafija ando amaro vodećo stih. Odothe o Jehova phenđa pe narodose: „Privucinava tut me verno mangipaja“ (Jer. 31:3; fusn. uporedin e stihoja ando Osija 11:4). Razmislin so odova značini. Amaro nebesko Dad hem ponodri dikhela o šukar buća koro amende kolendar amen šaj na hijam ni svesna.
16. (a) So o Isus phenđa hem sose šaj te verujina lese? (b) Sar šaj te uverine tu so o Jehova tano Dad kova valjani tuće? (Dikh o okvir „Dad kova valjani sarinenđe“.)
16 Ked o Isus phenđa so o Jehova tano amaro Dad, ov ka phene phenđa: „O Jehova nane samo mo Dad nego hem tumaro Dad. Uverinava tumen so ov mangela tumen hem brinini pe svakonese tumendar.“ Odolese, ako podijekh puti sumnjineja ko odova so o Jehova mangela tut, aćhov hem puć tut: „Ćaće li našti te verujinav ko odova so phenela o Ćhavo kova šukar đanela pe Dade hem kova uvek vaćeri o ćaćipe?“ (1. Petr. 2:22).
HEM PONODRI UVERIN TO VILO SO O JEHOVA MANGELA TUT
17. Sose hem ponodri valjani te uverina amen ko odova so o Jehova mangela amen?
17 Amen valjani hem ponodri te uverina amen ko odova so o Jehova mangela amen. Amaro dušmani, o Beng, ka del sa pestar te ćhinavi amen te služina e Jehovase. Ov mangela te ćerel amen te ova slaba. Odolese, hem ponodri ka ćhivel amen te verujina so o Jehova na mangela amen. Ama, na valjani te dozvolina lese te pobedini (Jov 27:5).
18. So šaj te ćere te šaj hem ponodri te uverine tut so o Jehova mangela tut?
18 Te šaj te uverine tut ko Jehovaso mangipe, molin tut lese te pomožini tut te dikhe upro tute sar ov. Hor razmislin ando stihija kola phenena so o Jehova brinini pe ando okola kola mangena le. Ma bistri so našti te desini pe o Jehova te na mangel okolen kola ole mangena. Upri otkupnina dikh sar poklon lično tuće. Verujin ko odova so o Isus phenđa so o Jehova tano hem to nebesko Dad. Tegani, ako neko ka pućel tut: „Da li hijan sigurno so o Jehova mangela tut?“ Uverimo šaj te phene: „Ja, mangela man hem svako dive dava sa mandar te mothovav lese so mangava le.“
ĐILI 154 Mangipe so na ćhinavđola