Sar te reagujina ki nepravda?

1-2. Sar but manuša reagujinena ki nepravda hem so šaj te puća amen?

ŽIVINAJA ko sveto kuri isi bari nepravda. But đene doživinena nepravda sebepi odova soj tane ćorore, sebepi odova sar izgledinena ja kotar avena. But manuša patinena odolese so disave političarija ili disave barvale manuša brininena pe samo ando odova sar te zaradinen. Sa odova šaj but lošno te utičini upro amende hem upro avera.

² Nane ni čudo soj tane o manuša odobor holjame. Sare bi mangaja te živina ko mir hem avera te ponašinen pe šukar premalo amende. Disave manuša trudinena pe te rešinen o problemija kola dikhena ko sveto ja ki pi phuv. Sar ćerena odova? Ađahar so ćerena protestija protiv i vlada hem o zakonija ja ađahar so glasinena aso disavo političari kova obećini so ka rešini olenge problemija. Ama, amen sar hrišćanija na hijam „deo akale svetoso“ hem đanaja so jedino e Devleso Kraljevstvo ka cidel i nepravda (Jov. 17:16). Ipak, nane amenđe sa jekh. Disavo puti čak osetinaja holi ked dikhaja so neko doživini nepravda. Šaj pućaja amen: „Sar valjani te reagujinav ked diso ađahar ovela? So šaj te ćerav sebepi odova?“ Te šaj te dobina odgovor ko akala pućiba, hajde najangleder te dikha sar o Jehova hem o Isus dikhena ki nepravda.

O JEHOVA HEM O ISUS MRZINENA I NEPRAVDA

3. Sose odobor dukhala amen ked dikhaja so isi nepravda? (Isaija 5:7)

³ I Biblija phenela sose odobor dukhala amen ked dikhaja i nepravda. Koro late pisini so hijam stvorime premali Devlesi slika kova „mangela i pravednost hem i pravda“ (Ps. 33:5; Post. 1:26). Ov niked na postupini nepravedno, a na mangela ni avera odova te ćeren (Pon. zak. 32:3, 4; Mih. 6:8; Zah. 7:9). Na primer, ko Isaijaso vreme ov šunđa sar o Izraelcija „rovena“ odolese so hine maltretirime ando pe manuša. (Čitin Isaija 5:7.) O Jehova kazninđa okolen kola na ićerđe pe ko oleso Zakon hem kola nepravedno postupinđe premalo avera (Is. 5:5, 13).

4. Sar o Isus osetini pe ked avera doživinena nepravda? (Dikh i slika.)

⁴ Sar o Jehova, hem o Isus mangela i pravda, a mrzini i nepravda. Jekh puti đi hine ki phuv, ov dikhlja jekhe manuše koleso vas hine paralizovano. E Isusese hine but žao hem saćarđa odole manuše. Ama, ked odova dikhlje o religiozna vođe but holjanđe. Olenđe hine považno o manuša te ićeren pe ko pravilija kola on ćhivđe ando sabat, nego te pomožini pe odole jadno manušese. Sar o Isus osetinđa pe ked dikhlja so on ćerena? „Hine lese but pharo odolese so na hine lenđe žao ko vilo“ (Mar. 3:1-6).

5. Sose na valjani te mukha amari holi but te trajini?

⁵ O Jehova hem o Isus tane holjame ked dikhena i nepravda, odolese nane pogrešno hem amen ađahar te osetina amen (Ef. 4:26). Ama, na valjani te bistra so i holi, čak iako tani opravdano, našti te cidel i nepravda. Ako but vreme trajini amari holi, šaj te naborsaljova ja te ova but depresivna (Ps. 37:1, 8; Jak. 1:20). Tegani, so šaj te ćera ked amen ja neko aver doživini nepravda? Ko odova ka pomožini amen e Isuseso primer.

SO O ISUS ĆERĐA KED DIKHLJA I NEPRAVDA?

6. Kola nepravde o manuša doživinđe ked o Isus hine ki phuv? (Dikh i slika.)

⁶ O Isus dikhlja bari nepravda đi hine ki phuv. Dikhlja sar o religiozna vođe maltretirinena e manušen (Mat. 23:2-4). Isto ađahar, dikhlja kobor i rimsko vlast ponašini pe lošno premalo manuša. But Judejcija manglje te oven oslobodime andi rimsko vlast. Disave olendar, sar na primer o zelotija, hine spremna te borinen pe protiv o Rimljanija. Ama, o Isus niked na hine deo andi disavi grupa koja manglja te menini i vlast. Ked o manuša manglje te ćhiven le te ovel kralj, o Isus cidinđa pe olendar (Jov. 6:15).

7-8. Sose o Isus na cidinđa i nepravda ked hine ki phuv? (Jovan 18:36)

⁷ Ked hine ki phuv, o Isus na manglja te mešini pe ki politika te šaj te rešini o problemija. Sose? Odolese so đanđa so o manuša nane len ni pravo ni sposobnost te vladinen upro avera (Ps. 146:3; Jer. 10:23). Isto ađahar, o manuša našti te ciden o uzrok andi nepravda. O vladari ando akava sveto o Satana, o Beng, koristini pi moć te ćhivel e manušen te ćeren odova soj tano nepravedno (Jov. 8:44; Ef. 2:2). Čak hem o manuša kola tane but šukar našti te rešinen o problemija ko sveto odolese so na ćerena uvek odova soj tano pravedno (Prop. 7:20).

⁸ O Isus đanđa so samo e Devleso Kraljevstvo ka cidel o uzrok ando sa o nepravde. Odolese, dinđa sa pestar te vaćeri e manušenđe i šukar vest ando odova Kraljevstvo (Luka 8:1). Okolenđe kola hine „bokhale hem trošale asi pravednost“ phenđa so o lošnipe hem i nepravda pana hari više na ka oven (Mat. 5:6; Luka 18:7, 8). Nijekh manušikani vlast na ka ćerel odova, nego samo e Devleso Kraljevstvo kova „nane deo kotar akava sveto“. (Čitin Jovan 18:36.)

OV SAR O ISUS

9. So uverini tut so jedino e Devleso Kraljevstvo ka cidel sa i nepravda?

⁹ Avdije, isi pobari nepravda nego ked hine o Isus ki phuv. Ama, sar tegani hem akana, ko akala „poslednja dive“, i nepravda pana avela ando Beng hem ando manuša upro kola ov utičini (2. Tim. 3:1-5, 13; Otkr. 12:12). Sar o Isus, hem amen đanaja so jedino e Devleso Kraljevstvo ka cidel o uzrok andi nepravda. Odolese so podržinaja e Devleso Kraljevstvo, amen na đaja ko protestija hem na verujinaja so disavi vlast ka cidel sa i nepravda. Aće te dikha o primer andi amari phen i Stejsi.a Angleder te upoznajini o ćaćipe, oj redovno ikljilji ko protestija. Ama, palo disavo vreme počminđa te pućel pe, da li odova so ćerela ćaće ka pomožini averenđe hem ka rešini o problemija. Oj phenela: „Đi hijum le ko protestija disavo puti pućljum man, da li odova aso so borinava man tano pravo rešenje. Ama, akana hijum sigurno so e Devleso Kraljevstvo ka cidel sa o problemija hem so o Jehova ka borini pe aso okola soj tane žrtve andi nepravda pošukar nego so bi me odova ćerava“ (Ps. 72:1, 4).

10. Premalo Matej 5:43-48, sose na mangaja te menina o zakonija hem i vlast? (Dikh i slika.)

¹⁰ But manuša avdije tane ko disave grupe kola mangena te meninen i vlast. Ama, but olendar tane holjame, na šunena o zakonija hem čak povredinena jekh jekhe. O Isus na sikavđa amen te ponašina amen ađahar (Ef. 4:31). Amaro phral o Džefri phenela: „O protestija šaj te počminen ko jekh mirno način. Ama, o manuša sigate šaj te oven odobor holjame so počminena sa te phagen, te ćoren pa čak hem te povredinen jekh jekhe.“ O Isus sikavđa amen te manga sa e manušen, pa čak hem okolen kolencar na složinaja amen ja progoninena amen. (Čitin Matej 5:43-48.) Sar hrišćanija, amen daja sa amendar te na ćera diso sova ka mothova so na sledinaja e Isuseso primer.

11. Sose disavo puti nane amenđe lokho te oponašina e Isuse?

¹¹ Iako đanaja so e Devleso Kraljevstvo ka cidel i nepravda, ipak nane amenđe lokho te oponašina e Isuse ked doživinaja disavi nepravda. Ađahar osetinđa pe amari phen koja vićini pe Dženaja. Oj doživinđa diskriminacija sebepi pi nacija. I Dženaja phenela: „Hijum le holjami hem but povredinđa man odova so o manuša phenđe hem mangljum te oven kaznime. Razmislinđum odolestar te podržinav jekh pokret kova borini pe protiv o rasizam hem i diskriminacija. Mislinđum so ako ka ćerav odova ka osetinav man pošukar.“ Ama, sar đelo o vreme, haljilji so valjani diso te menini koro peste. Oj pana phenela: „Mukhljum avera te utičinen upro mo mišljenje hem počminđum te verujinav e manušenđe, a na e Jehovase. Odolese, odlučinđum te ćhinavav te družinav man e manušencar kola tane uključime ko asavke buća.“ Iako hijam holjame ked amen ja neko aver doživini nepravda, ipak valjani te kontrolišina amari holi hem te aćhova neutralna (Jov. 15:19).

12. Sose valjani te pazina so čitinaja, so šunaja hem so dikhaja?

¹² So šaj te pomožini amen ked doživinaja nepravda? Valjani te pazina so čitinaja, so šunaja hem so dikhaja. Disave buća kola tane ćhivde ko društvena mreže tane othe samo te šokirinen e manušen hem te žalinen pe upri vlada. Često o novinarija pisinena ando po lično mišljenje, a na kotar odova sar tani ćaće i situacija. Čak ako tano odova so pisinena tačno, amen našti te rešina o problemi ako uvek čitinaja odolestar ja dikhaja o vestija. Ako but vreme đala amenđe ko odova te šuna ja te čitina asavke vestija, tegani amen samo šaj te nervirina amen hem te obeshrabrina amen (Posl. 24:10). Soj tano pana pogore, šaj te bistra so jedino e Devleso Kraljevstvo ka cidel sa i nepravda.

13. Sar odova so čitinaja i Biblija svako dive ka pomožini amen ked dikhaja so o manuša doživinena nepravda?

¹³ Ako svako dive čitinaja i Biblija hem razmislinaja ando odova so čitinđam, amen ka đana so te ćera ked amen ja neko aver doživini nepravda. Amari phen i Alija hine but tužno ked dikhlja sar disave manuša lošno ponašinena pe premalo avera. Hine but holjami sose odola so ćerena odova na hine kaznime. Oj phenela: „Morandiljum te bešav hem te pućav kokri man: ’Da li me ćaće verujinava so o Jehova ka rešini sa akala problemija?‘ “ Baš ko odova vreme čitinđum o stihija ando Jov 34:22-29. Odola stihija setinćerđe man so niko našti te garavi pe ando Jehova. Jedino ov đanela sar te sudini e manušenđe hem sar te rešini sa amare problemija.“ Đi ađićeraja odova vreme te avel, so šaj akana te ćera?

SO ŠAJ AKANA TE ĆERA?

14. So šaj akana te ćera? (Kološanima 3:10, 11)

¹⁴ Amen našti te menina odova sar o manuša ponašinena pe premalo avera, ama šaj te pazina sar amen ponašinaja amen. Sar so đi akana dikhljam, amen oponašinaja e Isuseso primer ađahar so mothovaja mangipe. Odova mangipe podstaknini amen te ova šukar premalo sarinende pa čak hem premalo okola so progoninena amen (Mat. 7:12; Rimlj. 12:17). O Jehova tano but bahtalo ked dikhela so ponašinaja amen ljubazno hem šukar sarinencar. (Čitin Kološanima 3:10, 11.)

15. Sar šaj te pomožina e manušenđe?

¹⁵ Najšukar način te pomožina e manušenđe tano te sikava len ando Jehova. Sose? Odolese so ked sikljona ando Jehova, on ćerena promene hem sikljona te oven ljubazna hem te mothoven mangipe (Is. 11:6, 7, 9). Angleder te sikljol o ćaćipe, o Džemal khuvđa ki jekh grupa koja borinđa pe aso odova te menini pe i vlada ki olesi phuv sose mislinđa soj tani but lošno. Ov phenela: „Našti zorjeja te ćhive e manušen te meninen pe niti me meninđum man zorjeja. Odova so maje pomožinđa te meninav man tano o ćaćipe kova sikljiljum andi Biblija.“ Odova podstakninđa e Džemale više te na borini pe te menini i vlada. So pobuter manušenđe pomožinaja te upoznajinen o ćaćipe hem te meninen pe, ka oven pohari manuša kola ka ćeren nepravda ki phuv.

16. Sose mangeja averenđe te vaćere ando Devleso Kraljevstvo?

¹⁶ Sar o Isus, hem amen mangaja te vaćera sa e manušenđe so samo e Devleso Kraljevstvo ka cidel sa i nepravda kotar phuv. Odova šaj te utešini e manušen kola tane maltretirime (Jer. 29:11). I Stejsi, kola angleder pominđam, phenela: „Odolese so đanava so o Devel ka cidel sa i patnja, šaj te aćhovav smirimi ked me ja neko aver doživini nepravda. O Jehova koristini odova so pisini ko oleso Lafi te utešini amen.“ Ama, te šaj hem amen te utešina averen odoleja so pisini ki Biblija, valjani šukar te pripremina amen. Ako hijam uverime so odova so pisini ko akava članko tano tačno, tegani ka ova spremna taktično te vaćera andi akija tema amare amalencar ki škola ja ki buti.b

17. Sar o Jehova pomožini amen ked doživinaja nepravda?

¹⁷ Nažalost, sa đi akale svetoja vladini o Satana, amen ka doživina nepravda. Ama, đi ađićeraja o Jehova te uništini le, amen na hijam bizi nada (Jov. 12:31). Prekalo po Lafi, i Biblija, o Jehova na samo so phenela amenđe sose isi odobor bari nepravda, već hem sar ov osetini pe sebepi odova (Ps. 34:17-19). Prekalo po Ćhavo, sikavi amen sar te reagujina ked doživinaja nepravda hem sar prekalo po Kraljevstvo zauvek ka cidel sa i nepravda (2. Petr. 3:13). Odolese, hajde hem ponodri te propovedina ando Devleso Kraljevstvo đi ađićeraja o vreme ked ki phuv zauvek ka ovel „pravda hem pravednost“ (Is. 9:7).