Pomožin okolenđe kola isi len „ispravno stav premalo večno životi“

1. Sar o manuša reagujinena ked propovedinaja lenđe i šukar vest? (Dela apostolska 13:47, 48; 16:14, 15)

BUT manuša ko prvo veko prihvatinđe o ćaćipe samo so šunđe i šukar vest. (Čitin Dela apostolska 13:47, 48; 16:14, 15.) Isto ađahar, hem avdije disave tane but bahtale ked prvo puti šunena asi šukar vest. A disave kola ki početka nane zainteresovana, kasnije prihvatinena o ćaćipe. So valjani te ćera ked arakhaja nekas ko mangela te sikljol ando Devel hem andi Biblija?

2. Sose šaj te uporedina o propovedibe odoleja so ćerela jekh manuš ki bašta?

² Amaro propovedibe šaj te uporedina odoleja so ćerela jekh manuš ki bašta. Ako ki olesi bašta disavo plod tano zrelo, ov odmah ka ćedel le iako hem ponodri ka valjani te brinini pe ando avera plodija hem te ćhivel lenđe pani. Isto ađahar, ked ki služba arakhaja nekas ko mangela te šunel i šukar vest, amen so posig ka pomožina le te ovel e Isuseso učeniko. Ama, ka pomožina hem e manušenđe kolenđe valjani više vreme te haljon soj tano aso olengo šukaripe te sikljon ando Devel (Jov. 4:35, 36). I razboritost ka pomožini amen te đana sar najšukar te pomožina e manušenđe. Akana ka dikha sar šaj pana ko prvo razgovor te pomožina okolenđe kola mangena te šunen i šukar vest. Isto ađahar, ka dikha sar šaj te pomožina len hem ponodri te napredujinen.

KED O MANUŠA PRIHVATINENA I ŠUKAR VEST

3. So valjani te ćera ked arakhaja disave zainteresovano osoba ki služba? (1. Korinćanima 9:26)

³ Ked arakhaja disave osoba koja tani zainteresovano, amen mangaja te pomožina la te đal ko drumo kova legari ko životi. Odolese, na ka aćhava aver puti te nudina laće biblijako kurs ili te vićina la ko sastanak, već odova šaj te ćera odmah ko prvo razgovor. (Čitin 1. Korinćanima 9:26.)

4. Vaćer jekh iskustvo kova mothovi so neko odmah počminđa e biblijako kurs.

⁴ Ponudin e biblijako kurs. Disave kolencar vaćeraja tane spremna odmah te počminen te proučinen. Na primer, jekh romni kotar Kanada jekh četvrtak alji ki kolica hem lelja i brošura Ov bahtalo zauvek! Amari phen phenđa laće so odola brošuraja šaj besplatno te proučini i Biblija. Odija romni hine zainteresovano hem razmeninđe pe broja. Odova isto dive, i romni pisinđa amara phenjaće hem pućlja la ked šaj te počminen te proučinen. I phen phenđa laće so šaj ko vikend. I romni phenđa: „Da li šaj tajsa te ave? Me hijum slobodno.“ Ađahar ko petak počminđe e biblijako kurs. Odova isto kurko ko vikend alji ko sastanak hem palo odova sigate napredujinđa.

5. So valjani te ćera ako dikhaja so i osoba pana nane spremno te proučini i Biblija? (Dikh o slike.)

⁵ Naravno, na očekujinaja sare te oven sar akija romni hem te mangen odmah te proučinen. Disavenđe ka valjani pobuter vreme. Šaj najangleder ka valjani te vaćera andi tema koja zanimini e osoba. Ama, ako isi amen pozitivno stav hem ako mothovaja iskreno zanimanje e osobaće, šaj aso kratko vreme te počmina biblijako kurs. So šaj te phena ked nekase nudinaja biblijako kurs? Hajde te dikha so phenđe disave phralja hem phenja kola tane šukar ko odova.

6. So šaj te phena te šaj aver puti te nastavina o razgovor?

⁶ Odola phralja hem phenja phenđe so ko disave phuvja pošukar tano te na koristinen o lafija „proučavanje“ ja „biblijako kurs“. Umesto odova, on haljilje so ked objasninena e manušenđe soj tano e biblijako kurs, on phenena so odova tano „razgovor kotar jekh tema andi Biblija“ ja „način sar šaj pana pošukar te upoznajinen i Biblija“. Te šaj te nastavine o razgovor nekasa šaj te phene: „But manuša tane iznenadime ked haljona so ki Biblija šaj te arakhen odgovorija ko pe pućiba.“ Ja šaj te phene: „I Biblija nane samo jekh religiozno knjiga, oj šaj te pomožini amen ko but buća ko životi.“ Odova so šaj pana te phene tano: „Aso 10 ja 15 minutija šaj te sikljove but korisna buća.“ Odolese, nane potrebno te koristine o lafija „dogovor“ ja „svako kurko“ sose odola lafija šaj te ćhiven e osoba te mislini so ka ovel la disavi bari obaveza.

7. Ked disave prvo puti šunđe o ćaćipe? (1. Korinćanima 14:23-25)

⁷ Vićin len ko sastanak. Ko vreme ando apostol Pavle izgleda so disave prvo puti šunđe aso ćaćipe ked hine ko sastanak. (Čitin 1. Korinćanima 14:23-25.) Odova često ovela hem avdije. But ando okola soj tane neve posigate napredujinena ked počminena te aven ko sastankija. Ked valjani te vićina len te aven ko sastankija? Ki knjiga Ov bahtalo zauvek! ki 10. lekcija vaćeri pe andi odija tema. Ama, amen na valjani te ađićera te resa đi odija lekcija te šaj te vićina e osoba te avel ko sastanak, već odova šaj te ćera odmah ko prvo razgovor. Tegani, šaj te phena laće i tema ando govor aso odova kurko hem disavi misao andi Stražarsko kula koja ka razmotrina odova vikend.

8. So šaj te phena e osobaće ked vićinaja la te avel ko sastankija? (Isaija 54:13)

⁸ Ked vićinaja disave zainteresovano osoba te avel ko sastanak, šaj te objasnina laće sar odova so ćerela pe ko amare sastankija tano averćhane ando odova so ćerela pe ko avera religije. Ked jekh romni koja proučinđa i Biblija prvo puti alji ko sastanak, kuri razmotrinđa pe i Stražarsko kula, oj pućlja e phenja kolaja proučini: „Da li o voditelj đanela svakoneso anav?“ I phen objasninđa laće so amen trudinaja amen te pamtina jekh jekheso anav, odolese so hijam sar jekh porodica, a ki porodica sare đanena jekh jekheso anav. Palo odova, i romni phenđa laće so ki olaki crkva but đene na đanena jekh jekheso anav. Amen šaj te objasnina e osobaće ko so pana hijam averćhane. (Čitin Isaija 54:13.) Ko amare sastankija, amen slavinaja e Jehova, sikljovaja olestar hem ohrabrinaja jekh jekhe (Jevr. 2:12; 10:24, 25). Odolese, amare sastankija tane ćerde te šaj te pomožinen amen te sikljova hem odothe nane nisave ritualija (1. Kor. 14:40). Isto ađahar, amare dvorane tane jednostavna hem koro lende isi dovoljno svetlo te šaj te ovel amenđe polokho te pratina o program. Amen hijam neutralna, odolese ko sastankija niked na vaćeri pe andi politika niti isi amen disave debate ja rasprave andi odija tema. Angleder so jekh osoba avela ko sastanak šukar bi ovela te mothova laće o video Sar izgledinena o sastankija ando Jehovase svedokija? Ađahar oj ka đanel so ćerela pe uduri.

9-10. So šaj te phene e osobaće ako darala te avel ko sastankija? (Dikh i slika.)

⁹ Disave darana te aven ko sastankija sose mislinena so ka valjani te meninen pi religija. Ama, šaj te phena lenđe so ka ovel amenđe but drago te aven hem so na valjani ništa te ćeren ja te vaćeren, dovoljno tano samo te aven. Isto ađahar, ko sastankija šaj te aven o roditeljija pe ćhavencar. Amen nane amen posebno program aso ćhave, već on bešena zajedno pe roditeljencar. Odolese, o roditeljija đanena kaj tane olenge ćhave hem so šunena (Pon. zak. 31:12). Ko amare sastankija na ćedaja prilogija sose mangaja te ićera amen ko odova so o Isus phenđa: „Besplatno dobinđen, besplatno hem den“ (Mat. 10:8). Isto ađahar, šaj te phena e osobaće so nane potrebno te uravi pe disave skupa šeja sose o Devel dikhela odova soj tano ko vilo, a na sar neko izgledini (1. Sam. 16:7).

¹⁰ Ked i osoba avela ko sastanak, de sa tutar te osetini pe šukar. Upoznajin la e starešinencar hem e phralencar hem e phenjencar. Ako i osoba koja alji ko sastanak osetini pe soj tani samći ćhere, tegani ka mangel hem aver puti te avel. Ko sastanak, šaj zajedno te pratinen o stihija sose ađahar šaj te pomožine la pošukar te haljol sostar vaćeri o govorniko.

KED POČMINĐAM O KURS

11. Sar šaj te mothove e osobaće kolaja proučineja so poštujineja olako vreme?

¹¹ So na valjani te bistra ako nekasa proučinaja? Mothov e osobaće so cenineja olako vreme. Ako dogovorinđen tumen ked te proučinen, ov tačno bizo obzir da li o manuša odothe kaj tu živineja tane tačna ja na. Isto ađahar, najšukar tano o prvo kurs te trajini kratko. Disave iskusna objaviteljija phenena soj tano pošukar o kurs uvek te trajini odobor kobor dogovorinđam amen, čak iako i osoba mangela pana te proučini. Isto ađahar, ma vaćer but, mukh e osoba te vaćeri (Posl. 10:19).

12. Savo cilj valjani te ovel amen ked počminaja te proučina nekasa?

¹² Ked počminaja te proučina e osobaja, amen mangaja već ki prvo lekcija te pomožina la te upoznajini e Jehova hem e Isuse hem te zamangel len. Odova šaj te ćera ađahar so sa i pažnja ka usmerina ko Devleso Lafi, a na upro amende hem amaro đandipe (Dela 10:25, 26). O apostol Pavle tano šukar primer ko odova. Đi sikavđa e manušen, ov često i pažnja usmerinđa ko Isus kas o Jehova bićhalđa te pomožini amen te upoznajina le hem te manga le (1. Kor. 2:1, 2). Isto ađahar, o Pavle pomožinđa len te haljon kobor tano važno te razvijinen o osobine kola tane sar zlato, srebro hem draguljija (1. Kor. 3:11-15). Odola osobine tane i vera, i mudrost, i razboritost hem o strahopoštovanje premalo Jehova (Ps. 19:9, 10; Posl. 3:13-15; 1. Petr. 1:7). Sar šaj te oponašina e Pavleso primer? Ađahar so ka pomožina e osobaće te razvijini zorali vera hem te ovel paše pe nebesko Dadeja (2. Kor. 1:24).

13. Sar šaj te mothova so hijam strpljiva hem razumna đi pomožinaja e osobaće kolaja proučinaja? (2. Korinćanima 10:4, 5; dikh i slika.)

¹³ Oponašin e Isuse ađahar so ka ove strpljivo hem razumno premali osoba kolaja proučineja. Pazin te na pućela diso so ka ćerel te osetini pe neprijatno. Ako isi diso so i osoba na haljola nane potrebno but te zadržinen tumen odothe. Šaj te nastavinen hem kasnije te irinen tumen ko odova. Umesto te ćhiva la te prihvatini disavo nevo sikljovibe, de la vreme o ćaćipe te astari koreno ko olako vilo (Jov. 16:12; Kol. 2:6, 7). I Biblija uporedini o hovavne sikljoviba ko kola o manuša verujinena jekha tvrđavaja. (Čitin 2. Korinćanima 10:4, 5.) Umesto te rušina olaki tvrđava, amen valjani te pomožina la o Jehova te ovel olako utočište (Ps. 91:9).

KED NEKO NEVO AVELA KI DVORANA

14. Sar valjani te ponašina amen premalo neve kola avena ki dvorana?

¹⁴ O Jehova mangela premalo sa o manuša te ponašina amen ljubazno, bizo obzir kotar avena, savi tani olengi kultura ja da li tane barvale ja ćorore (Jak. 2:1-4, 9). Sar šaj te mothova mangipe premalo neve kola avena ki dvorana?

15-16. Sar šaj te pomožina e nevenđe kola avena ko sastankija te osetinen pe šukar?

¹⁵ Neko šaj te avel ki dvorana sose mangela te đanel so ćerela pe odothe ja neko podstakninđa le te avel. Odolese, ked dikheja so neko nevo alo ki dvorana đa koro leste hem pozdravin tut oleja, ama dikh te na ovel lese neprijatno. Šaj zajedno te bešen hem te pratinen o stihija andi Biblija hem o materijali andi publikacija koja razmotrini pe ko odova sastanko ja šaj te de le odola publikacije. Isto ađahar, razmislin so šaj pana te ćere te šaj o manuša te osetinen pe šukar ked avena ki dvorana. Jekh manuš kova alo ko sastanak phenđa jekhe phralese soj tano lese but neprijatno sose nane uravdo sar sa avera. O phral phenđa lese so nane nisavo problemi hem so amen hijam obična manuša. Kasnije, odova manuš napredujinđa hem krstinđa pe, ama niked na bisterđa kobor odova phral hine šukar premalo leste. Ama, na valjani te bistra so iako mangaja te mothova e osobaće zanimanje ked vaćeraja olaja, na valjani te khuva ko olake privatna buća (1. Petr. 4:15).

¹⁶ Isto ađahar, amen mangaja te mothova poštovanje ko amare razgovorija, komentarija ja tačke posebno ked pominaja okolen so nane e Jehovase svedokija ja pominaja olenge verovanja. Odolese, ma koristin o lafija kola šaj te uvredinen len hem sebepi kola šaj te ćhinaven te aven ko sastanak (Titu 2:8; 3:2). Na primer, niked na ka vaćera diso lošno ando olenge verovanja (2. Kor. 6:3). Ko odova posebno ka pazinen o phralja kola ićerena govorija. On valjani te len ko obzir so ki publika isi hem okola kola nane e Jehovase svedokija hem sebepi odova ka objasninen disave izrazija kola šaj na haljona.

17. So valjani te ovel amaro cilj ked arakhaja okolen kola isi len „ispravno stav premalo večno životi“?

¹⁷ Svako dive tano sa pohitno te ćera učenikonen sose na aćhilo amen pana but vreme. Odolese valjani te da sa amendar te roda okolen kola isi len „ispravno stav premalo večno životi“ (Dela 13:48). Isto ađahar hem ponodri ka nudina biblijake kursija hem ka vićina e manušen te aven ko sastankija. Ako ćeraja odova, ka pomožina len te đan ko „drumo kova legari ko večno životi“ (Mat. 7:14).